Webrwanda Backend

Author: webrwanda

  • Umwe mu bari bagiye gutorokesha Kizito Mihigo yakatiwe igifungo cy'imyaka itanu n'igice #rwanda #RwOT

    Kuri uyu wa gatanu tariki 22 Ukwakira 2021 nibwo Urukiko Rwisumbuye rwa Nyarugenge rwahamije ibyaha uwitwa Jean Bosco Nkundimana wahoze ari umukozi wo mu rugo kwa Nyakwigendera Kizito Mihigo, baza gufatanwa ubwo bari mu mugambi wo gusohoka mu gihugu mu buryo butemewe n'amategeko.

    Jean Bosco Nkundimana yanahamwe kandi n'icyaha cyo gutanga ruswa, maze ahanishwa igifungo cy'imyaka itanu n'igice.

    Kizito Mihigo we yahise yiyahura, apfa atagejejwe imbere y'ubutabera.

    Undi wahanwe ni Joel Ngayabahiga wagombaga kwereka Kizito Mihigo na Jean Bosco Nkundimana inzira bari gukoresha binjira mu Burundi. Uyu Ngayabahiga we yahanishijwe igifungo cy'amezi atatu, ariko kuko bamaze igihe kinini muri gereza ugereranyije n'igihano yahawe, Joel Ngayabahiga akaba agomba guhita arekurwa.

    Hari kandi Innocent Harerimana wari utwaye imodoka aba bagabo bafatiwemo, icyakora urukiko rukaba rwamugize umwere ngo kuko yabatwaye atazi imigambi yabo.

    Tariki 12 uku kwezi, Ubushinjacyaha bwari bwasabiye Jean Bosco Nkundimana na Joel Ngayabahiga igifungo cy'imyaka 7 n'ihazabu y'amafaranga y'u Rwanda miliyoni ebyiri n'igice. Ari abaregwa, ari n'Ubushinjacyaha, ntawe uratangaza niba yiteguye kujurira.

    Ku gicamunsi cyo ku itariki 12 Gashyantare 2020 nibwo Kizito Mihigo n'abo bari kumwe bafatiwe mu Karere ka Nyaruguru, mu Ntara y'amajyepfo, bagerageza kwambuka umupaka w'u Rwanda n'u Burundi.

    Bahise bajyanwa muri kasho y'Urwego rw'Igihugu rushinzwe Ubugenzacyaha, RIB, ariko tariki 17 z'uko kwezi Kizito Mihigo yitaba Imana yiyahuye, aho yari afungiye i Remera mu Mujyi wa Kigali.

    Ubwo Kizito yafatwaga, RIB yatangaje ko akekwaho kuba yari agiye mu mitwe y'iterabwoba igambiriye guhungabanya umutekano w'u Rwanda. Mu w'2015 umuhanzi Kizito Mihigo yahamwe n'ibyaha birimo kugambirira kugirira nabi Umukuru w'igihugu, ndetse akatirwa gufungwa imyaka 10.

    Nyuma y'imyaka 4 n'igice yaje gufungurwa ku bw'imbabazi za Perezida wa Repubulika, ariko bikavugwa ko atigeze areka imigambi yo kwifatanya n'abagizi ba nabi.

    The post Umwe mu bari bagiye gutorokesha Kizito Mihigo yakatiwe igifungo cy'imyaka itanu n'igice appeared first on RUSHYASHYA.

    Source : https://rushyashya.net/umwe-mu-bari-bagiye-gutorokesha-kizito-mihigo-yakatiwe-igifungo-cyimyaka-itanu-nigice/?utm_source=rss&utm_medium=rss&utm_campaign=umwe-mu-bari-bagiye-gutorokesha-kizito-mihigo-yakatiwe-igifungo-cyimyaka-itanu-nigice

  • Rubavu : Mu gitondo cya kare abantu bataramenyekana barashe umusore arapfa #rwanda #RwOT

    Uyu musore witwa Shurudiya Hitimana w’imyaka 20 yarasiwe mu Mudugudu wa Rubara mu Kagari ka Nyamirambo muri uriya Murenge wa Kanzenze.

    Umukozi w’Akagarika Nyamirambo ushinzwe Imibereho y’abaturage (Sedo) yemeje aya makuru ko uriya musore yarashwe ariko ko abamurashe bataramenyekana ndetse ko inzego zibifitiye ububasha zatangiye iperereza.

    Umwe mu baturage batuye muri kariya avuga ko yakanguwe n’amasasu yavuze mu gitondo cya kare ndetse bakumva umuntu ariho ataka ngo 'Ndapfuye.'

    Uyu muturage yagize ati 'Nashigukiye hejuru numva amasasu 2 ntakindi numvise. Byari mu rukerera ariko ntabwo nzi neza amasaha. Ntabwo twahunze ahubwo ubwoba bwanyishe.'

    Uyu muturage avuga muri kariya gace hatari hakunze kumvikana urugomo ku buryo n’ibyo byabaye byabatunguye.

    Undi muturage we yagize ati 'Numvise umuntu atabaje ngo 'mumbabarire’. Ijwi ryo sinari kurimenya ubundi tuvugira mu nzu ngo 'urakomere urakomere’. Twumva barashe amasasu 3 turaceceka cyane kuko bwari bunakeye.'

    Ngo ubwo abantu babyukaga batangiye kujya mu mirimo, ni bwo abari bagiye gutashya inkwi, ubundi baza kubona umurambo wa nyakwigendera.

    Abayobozi bo mu nzego z’umutekano n’abo mu z’ibanze babyutse bajya kuganiriza abatuye muri kariya gace banabahumuriza, banizeza ko umutekano ucunzwe kandi ko hagiye gushakishwa abakozi buriya bugizi bwa nabi.

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Rubavu-Mu-gitondo-cya-kare-abantu-bataramenyekana-barashe-umusore-arapfa

  • Minisitiri Mbabazi yagaragaje urubyiruko nk’umutungo ukomeye Afurika ifite – #rwanda #RwOT

    Ibi byavugiwe mu ihuriro ry’urubyiruko ryiswe YouthConnekt Africa Summit riri kuba ku nshuro ya kane, kuva tariki ya 20 kugeza kuya 22 Ukwakira 2021.

    Ubwo hafungurwaga ku mugaragaro iyi nama iri kubera muri Ghana kuri uyu wa mbere tariki ya 20 Ukwakira 2021, Minisitiri w’Urubyiruko n’Umuco, Mbabazi Rosemary, yagaragaje urubyiruko nk’umutungo ukomeye wa Afurika, bityo rugomba kuba inkingi ya mwamba mu guteza imbere ubukungu by’uyu mugabane.

    Minisitiri Mbabazi yagize ati “Afurika ifite ubutunzi mu ngeri zinyuranye, ariko ubutunzi buruta ubundi ifite ni urubyiruko. Urubyiruko rwa Afurika rufite ubushobozi, imbaraga, ubumenyi n’impano, ndetse rufite umwanya mwiza wo kuba ku isonga mu guhindura uyu mugabane.”

    “Kwihuza kw’ibihugu byateye intambwe ishimishije kurusha mbere, gushyiraho Isoko rusange rya Afurika ni kimwe mu by’ingenzi twagezeho kuko ishyirwa mu bikorwa ryaryo rizagaragaza imbaraga nyazo za Afurika. Kwishyira hamwe kwa Afurika twifuza muri aya masezerano bizagerwaho ari uko urubyiruko rubigizemo uruhare.”

    Minisitiri w’Urubyiruko n’Umuco yibukije urubyiruko rw’ubu ko rugomba gushingira ku bumenyi n’ubushobozi rufite maze rugaharanira iterambere rya Afurika, binyuze mu guhanga ibishya, guhanga imirimo ndetse no gufatanya.

    Yibukije abayobozi ba Afurika ko kugira ngo ive mu ngaruka z’icyorezo cya COVID19, hagomba kongera kurebwa uburyo baha umwanya n’ubushobozi urubyiruko ngo rutange umusanzu mu iterambere ry’ubukungu.

    Dr. Mahamudu Bawumia, Visi Perezida wa Ghana yavuze ko igihe urubyiruko rwaba ruhawe amahirwe n’ubushobozi, nta kabuza rwatanga umusanzu ukomeye mu kuzamura ubukungu bwa Afurika.

    Inama ngarukamwaka ya YouthConnekt Africa ihuza urubyiruko ruvuye hirya no hino ku mugabane wa Afurika no hanze yawo, abanyapolitiki, ibigo bya Leta n’iby’abikorera n’imiryango itari iya Leta hagamijwe kuganira no gushyiraho ingamba zigamije iterambere ry’urubyiruko rwa Afurika.

    Iyi nama yitabiriwe n’abantu b’ingeri zitandukanye biganjemo urubyiruko

    Minisitiri Mbabazi yavuze ko urubyiruko rubyajwe umusaruro, rwafashwe Afurika kwigobotora ibibazo bitandukanye biyugarije

    U Rwanda rwari ruhagarariwe n’inzego zitandukanye muri iyi nama

    Urubyiruko rwiyemeje gutanga umusanzu warwo mu gufasha Afurika kwigobotora ingaruka yatewe na Covid-19

    source : https://ift.tt/3C7TPkr

  • Gatsibo: Abangavu 100 batewe inda imburagihe basubijwe mu ishuri – #rwanda #RwOT

    Ni igikorwa cyabaye kuri uyu wa Kane tariki 21 Ukwakira 2021 nyuma y’inama nyunguranabitekerezo yahuje inzego z’ubuyobozi hagamijwe gusesengura inzitizi zibuza abana babyariye iwabo gusubira mu ishuri no gufata ingamba mu kuzikemura.

    Iyi nama yateguwe ku bufatanye n’Umuryango Empower Rwanda usanzwe ukora ibikorwa byo kwita ku bakobwa babyariye mu rugo.

    Mu bangavu 100 basubijwe mu ishuri na Empower Rwanda abagera kuri 80 bagiye kurihirirwa imyuga mu gihe abandi 20 bazakomeza mu mashuri yisumbuye.

    Uwimpuhwe Yvonne ufite imyaka 19 watewe inda afite imyaka 16 yavuze ko zimwe mu mbogamizi zikunze gutuma iyo bamaze kubyara badasubira mu ishuri harimo kuba baba baturuka mu miryango itishoboye.

    Yakomeje agira ati “Nkanjye sinari mfite uwo nsigira umwana, nta mata nabonaga ngo wenda ninjya ngenda nyasigire mama ayamuhe, ikindi iwacu ntibari babashije kubona ibikoresho n’amafaranga y’ishuri byari bibagoye cyane.”

    Umwe mu babyeyi bo mu Karere ka Gatsibo watanze ubuhamya ku gituma abangavu baterwa inda ariko ntibabashe gusubira mu ishuri, Mukankusi Cartas yavuze ko abenshi usanga baturuka mu miryango ikennye ku buryo kubona ubushobozi bwo gusigarana wa mwana na nyina akajya kwiga bitoroha.

    Yakomeje agira ati “Abenshi bafite ababyeyi b’abakene batakwemera gusigarana abana babo usanga mu rugo hari uwo mukobwa wabyaye ariko afite n’abandi bavandimwe be bakeneye kurya bigatuma wa mubyeyi ajya kubashakira icyo kurya ntasigarane wa mwana.”

    Umuyobozi wa Empower Rwanda, Kabatesi Promesse Olivia, yavuze ko basanze hari abagira ipfunwe ry’uko iyo basubiye mu ishuri bitwa abagore. Ibi ngo akenshi abibwirwa n’abo bigana rimwe na rimwe –ntabashe kubyakira.

    Yavuze ko kandi hari n’abagaragaraza ko bamaze gukura ku buryo abo biganye bageze kure ntabashe kwigana n’abo aruta.

    Umuyobozi w’Akarere ka Gatsibo, Gasana Richard, yavuze ko bafite urutonde rw’abangavu babyariwe iwabo n’abamaze gucutsa ku buryo bazarugenderaho bakomeza gukora ubukangurambaga, aba bangavu bagasubira mu ishuri.

    Yasabye ababyeyi kandi kugira inshingano zo kurera abana babo no kubaha iby’ibanze bakenera mu buzima bwabo bwa buri munsi kugira ngo abifuza kubashuka babure aho babahera.

    Kuva uyu mwaka watangira mu Karere ka Gatsibo habarurwa abangavu basaga 400 batewe inda imburagihe ni mu gihe mu mezi make ashize hakozwe umukwabo wafatiwemo abagabo barenga 390 bateye inda abangavu.

    Umwe mu babyeyi batanze ubuhamya yavuze ko ubukene buri mu bituma batita ku bana b’abangavu batewe inda

    Umuyobozi wa Empower Rwanda Kabatesi Olivia yavuze ko bazakomeza kwita ku bangavu batewe inda imburagihe

    Umuyobozi w’Akarere ka Gatsibo Gasana Richard yasabye ababyeyi kongera imbaraga mu kwita ku bana babo babarinda ababasambanya

    source : https://ift.tt/3B6EzCM

  • Karongi: Abakobwa bayobotse umwuga wo gukora no kudoda inkweto baratinyura bagenzi babo – #rwanda #RwOT

    Nishimwe Chantal, wiga umwuga wo gukora inkweto mu Ishuri rya Munanira TVET avuga ko mbere yumvaga umwuga wo gukora no kudoda inkweto ari uw’abagabo, gusa ngo nyuma yo kubona uburyo inkweto ziva hanze zihenze byamuteye ishyaka ahindura imyumvire kugira ngo akore inkweto zahangana n’iziva hanze zihenze.

    Ati “Nabonaga abamasayi uburyo bari kuduhenda kandi natwe mu Rwanda twabyikorera, ibyo byatumye ntinyuka ndavuga nti ‘abakobwa natwe natwe dufite ubushobozi bwo kugera ku byo abandi bagezeho”.

    Nishimwe afite intego yo kuzagira uruganda rukorera inkweto mu Rwanda. Uyu mukobwa asaba bagenzi be bacyitinya bumva ko hari imirimo igenewe abagabo n’igenewe abagore ko iyo myumvire bakwiye kuyihindura.

    Ati “Abakobwa bagenzi banjye bacyitinya nababwira ko abakobwa natwe dushoboye, nta murimo ugenewe umugabo, nta wugenewe abagabo, umwuga umwe yakora na mugenzi we yawukora”.

    Mutoni Shakira asana inkweto zacitse ndetse akaba aniga gukora inkweto n’amasakoshi.

    Ati “Imyuga iyo umuntu yayize ntabwo apfa gukena, abona amafaranga menshi mu gihe yifuza atagiye gushakisha akazi. Nshobora gukora inkweto imwe nkaba ndushije amafaranga umuntu wiriwe ahinga. Inama naha abakobwa bagenzi banjye ni ukubakundisha umwuga wo gukora ibikomoka ku mpu kuko bifasha umuntu kwiteza imbere, kandi ntabure amafaranga mu gihe ayakeneye.”

    Umuyobozi wungirije w’Akarere ka Karongi, Mukase Valentine, avuga ko nta wukwiye kumva ko umurimo runaka ugenewe igitsina runaka, cyangwa ngo hagire umwuga umuntu yumva ko usuzuguritse.

    Ati “Abaturage icyo twababwira ni uko bagomba guha umurimo agaciro, bagakura amaboko mu mufuka bagakora, nta murimo ugenewe abagore nta murimo ugenewe abagabo. Ikindi nababwira ni uko nta murimo mutoya ubaho umurimo wose wakoze uwushyizeho umwete, ukitanga ugakora ntacyatuma utaguteza imbere.”

    Ishuri rya Munanira TVET ryigamo abakobwa 13 n’abahungu 13.

    Uwamariya Josephine, umuyobozi w’umuryango ActionAid, avuga ko igitekerezo cyo kubaka ishuri rya TVET cyavuye mu baturage ubwabo.

    Abakobwa bakora inkweto bavuga ko uyu mwuga utakiri uw’abagabo gusa

    Inkweto ziha ahandi zajyaga zibahenda none basigaye bazikorera

    source : https://ift.tt/3poL4ik

  • Huye: Abantu batatu baguwe gitumo bafite litiro 840 z’inzoga ya ‘muriture’ – #rwanda #RwOT

    Zafatanwe abantu batatu barimo uw’imyaka 41, uwa 28 n’uw’imyaka 26 y’amavuko.

    Umuvugizi wa Polisi mu Ntara y’Amajyepfo, Superintendent of Police (SP) Theobald Kanamugire yavuze ko izo nzoga zafashwe biturutse ku makuru yatanzwe n’abaturage.

    Yagize ati” Polisi yabonye amakuru ko bariya bantu bakora inzoga zitemewe zo mu bwoko bwa Muriture. Twateguye ibikorwa byo kubafata nibwo abapolisi bagiye mu ngo zabo hagaragarayo litiro 840 za ziriya nzoga.”

    SP Kanamugire akomeza avuga ko abafatanwe izo nzoga bahise bashyikirizwa Urwego rushinzwe Ubugenzacyaha na ho inzoga ziramenwa. Yakomeje akangurira abaturage kwirinda kunywa ziriya nzoga ndetse bagatanga amakuru igihe hari abantu babonye bazikora.

    Ati” Ziriya nzoga ntabwo ari nziza ku buzima bw’umuntu bitewe n’uko ibyo bazikoramo bitazwi. Ziriya nzoga abazinyoye usanga bakora ibyaha bitandukanye bihungabanya umutekano w’abaturage nko gukubita no gukomeretsa, gufata ku ngufu abagore n’abakobwa, ubujura n’ibindi bitandukanye.”

    SP Kanamugire yibukije abaturage ko Polisi itazahwema kurwanya bene izo nzoga kandi abazajya bazifatanwa bazajya bashyikirizwa ubutabera. Abafashwe bahise bashyikirizwa Urwego rushinzwe ubugenzacyaha (RIB) rukorera muri sitasiyo ya Polisi ya Simbi kugira ngo hakorwe iperereza.

    Ingingo ya 5 y’Iteka rya Minisitiri Nº001/MoH/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira inzoga zikozwe mu buryo budakurikije ibisabwa n’amabwiriza y’ubuziranenge n’andi mategeko mu biyobyabwenge byoroheje.

    Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu Gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo kitari munsi y’imyaka irindwi (7) ariko kitarenze imyaka icumi (10) n’ihazabu y’amafaranga y’u Rwanda atari munsi ya miliyoni eshanu (5.000.000 FRW) ariko atageze kuri miliyoni icumi (10.000.000 FRW) ku byerekeye ibiyobyabwenge byoroheje.

    Bafatanywe litiro zisaga 800 z’inzoga ya muriture

    source : https://ift.tt/3BarQPv

  • Rutahizamu w’Amavubi yerekeje muri Botswana, yaherekejwe n’umubyeyi we #rwanda #RwOT

    Iradukunda Jean Bertrand akaba rutahizamu w’Amavubi yafashe rutimikirere yerekeza mu ikipe ya Township Rollers yo muri Botswana aheruka gusinyira imyaka 2.

    Mu ntangiriro z’uku kwezi, Township Rollers ibinyujije mu itangazo yasohoye yemeje ko yamaze gusinyisha uyu musore kimwe na Mohamed Dialo wo muri Mali na Aaron Marc wakiniraga CF Zoe yo muri Cote d’Ivoire.

    Bertrand wari mu ikipe y’igihugu yakinnye imikino na Uganda(yabereye mu Rwanda no muri Uganda) mu gushaka itike y’igikombe cy’Isi cya 2021, yahagurutse mu Rwanda kuri uyu wa Gatanu yerekeza muri Botswana.

    Biteganyijwe ko anyura muri Afurika y’Epfo aho ari buve yerekeza muri Botswana mu ikipe ye nshya ya Township Rollers.

    Ku kibuga cy’indege cya Kigali i Kanombe akaba yari yaherekejwe n’inshuti ze, umubyeyi we, umukinnyi Sibonama Patrick Papy n’abandi.

    Iradukunda Jean Bertrand yatandukanye na APR FC muri 2016 yerekeza muri Bugesera FC yakiniye umwaka umwe ahita yerekeza muri Police FC nayo ayikinira umwaka umwe, muri 2018 yerekeje muri Mukura VS ayikinira imyaka 2 maze muri 2020 yayivuyemo yerekeza muri Gasogi United akinira kugeza uyu munsi.

    Bertrand mbere yo kurira indege

    Umubyeyi we yari yamuherekeje

    Iradukunda Jean Bertrand ni umukinnyi w’Amavubi

    Source : http://isimbi.rw/siporo/article/rutahizamu-w-amavubi-yerekeje-muri-botswana-yaherekejwe-n-umubyeyi-we

  • Muhanga : Abantu 16 bakomerekeye mu mpanuka yatewe na Kajugujugu bari bagiye gushungera #rwanda #RwOT

    Iriya miti n’amaraso bari bijyanye n’iriya ndege ya Kajugujugu ya gisivile, ni ibyo kwifashishwa n’Ikigo cya Zipline gisanzwe cyohereza amaraso n’imiti mu bitaro binyuranye gikoresheje utudege duto tutagira abapilote.

    Umuyobora w’Akarere ka Muhanga, Kayitare Jacqueline avuga ko umuyaga watewe n’iriya Kajugujugu wagushije urukuta ruzengurutse kuri kiriya kigo cya RMA cyo mu Murenge wa Nyamabuye.

    Yagize ati 'Bo buriye urukuta bareba indege irimo imbere, noneho izamutse (ihagurutse), umuyaga urusha imbaraga urukuta, urukuta buriyeho urumva ko rwari ruremerewe n’abarwuriye, ruba ruraguye bagwana na rwo ariko ntacyo babaye.'

    Avuga ko mu bakomeretse babiri ari bo bakiri kwa Muganga mu bitaro bya Kabgayi barimo kwitabwaho, abandi ngo batashye.

    Uyu muyobozi asobanura ko iriya ndege atari yo yagushije ruriya rukuta ahubwo ko rwagushijwe n’umuyaga warwo ugakubitiraho no kuba rwari rwuriwe n’abaturage.

    Yagize ati 'Ahubwo utwaye indege ntiyanamenye ko baguye kuko si indege yagonze urukuta, yikomereje.'

    Ababonye iyo ndege bavuga ko ari Kajugujugu ya gisivili y’umweru, yari ijyanye imiti kuri RMA ahagana saa yine za mu gitondo (10h00 a.m).

    UKWEZI.RW

    Source : http://www.ukwezi.rw/mu-rwanda/Amakuru-anyuranye/article/Muhanga-Abantu-16-bakomerekeye-mu-mpanuka-yatewe-na-Kajugujugu-bari-bagiye-gushungera

  • Amateka ya Makanyaga Abdul umaze imyaka hafi 50 mu muziki #Rwanda #RwOT via @kigalitoday #rwanda #RwOT

    Makanyaga Abdul yavukiye muri Komini Ngoma ahahoze ari muri Perefegitura ya Butare ubu ni mu Karere ka Huye. Ku myaka itatu (1950) yajyanye n’ababyeyi be i Muyinga mu Burundi bajyanywe n’Ababiligi se wa Makanyaga yakoreraga mu by’amashanyarazi ariko nyuma baje kugaruka mu Rwanda baturutse i Bujumbura.

    Yatangiye umwuga wo gucuranga no kuririmba ahagana mu 1967, aririmba muri Orchestres zitandukanye zo mu Rwanda zirimo Abamararungu, Inkumburwa, Les Copins n’izindi.

    Nyuma ya Jenoside yakorewe Abatutsi mu 1994, Makanyaga yifatanyije n’abandi bagenzi be bacurangaga muri Orchestres zitandukanye zari zitakiriho bashyiraho Itsinda ryitwa Irangira.

    Usibye kuba umuhanzi n’umucuranzi, Makanyaga ni n’umwe mu bakinnyi ba mbere b’ikipe y’umupira w’amaguru ya Kiyovu Sports usibye ko atatinzemo kubera imvune.

    Mu myaka hafi 50 amaze mu mwuga, Makanyaga arakihagazeho haba ku ijwi n’ubuhanga mu gukirigita gitari abikesha ibanga rimwe rukumbi.

    Bikurikire muri iki kiganiro Nyiringanzo kuri YouTube ya KT Radio:

    source : https://ift.tt/3jrPlxv

  • Rubavu: Imiryango 60 yacuruzaga magendu yiyemeje kubireka – #rwanda #RwOT

    Ibi babitangaje nyuma y’amahugurwa bahawe n’umushinga ‘’Mupaka Shamba Letu’’, aho bahuriye n’abagabo babo.

    Nshimiyimana Gaudence umwe mu bitabiriye, yavuze ko mbere yatahaga nijoro agatangira gushwana n’umugabo kuko yabaga akeka ko yagiye mu bagabo.

    Ati “Natahaga bwije umugabo agahita atangira kuntoteza ngo nari mu bagabo, byose bigaterwa n’uko mvuye gucuruza nanyuze mu nzira zitemewe n’amategeko kuburyo byageze aho umugabo avuga ko n’umwana nabyaye atari uwe, ubu turi guca ku mupaka tugasora’’.

    Umugabo we Mbwirabumva Jean Claude yavuze ko abakora ubwo bucuruzi butemewe bwambukiranya imipaka, bazwiho kuryamana n’ababaha inzira ari nabyo byatumaga atumvikana n’umugore we.

    Ati’’Icyaduteraga umwiryane nuko yajyaga gucuruza muri Congo agataha ijoro nkumva ko hari izindi nzira yanyuzemo z’ubusambanyi ashaka guca mu mayira atemewe . N’iyo namuhaga igishoro akambwira ko ibyo yaguze babifashe, sinabyakiraga nkumva ko hari ukundi byagenze ariko ubu byarahindutse kubera ibiganiro twagiranye bigatuma abagore bacu bakora ubucuruzi bwemewe’’.

    Nshimiyimana Patrick wo mu murenge wa Nyamyumba avuga ko mbere iyo umugore we yajyaga muri Congo, iyo yatahaga atinze yakekaga ko yagiye gusambana.

    Ati “Mu mudugudu wacu ni njye wari uzwiho amakimbirane n’umugore wanjye byose biterwa n’uko numvaga ko umugore wanjye yatinze gutaha, nkumva ko yagiye gusambana avuye muri Congo ariko ubu kubera ko baduhuje tugahugurwa byararangiye tubanye neza kuburyo mufasha n’imirimo kandi ndimo no gufasha abakibanye nabi’’.

    Kanamugire Marie Michelle Aline, Umukozi w’umushinga wa Mupaka Shamba Letu yavuze ko aba bagore bigiraga mu bushabitsi bakibagirwa imiryango yabo bigatera amakimbirane ntibabashe no guteza imiryango yabo imbere.

    Ati “Aba bagore wasangaga bigira mu kazi gusa ntibibuke inshingano zabo mu rugo kuburyo batibukaga kwita ku bana babo, bamwe bakabasiga mu mipaka bagasigarana na bakuru babo nabo bakuwe mu ishuri, yanataha agasanga umugabo yarakaye kuko yakekaga ko yagiye mu bagabo bigatera amakimbirane.”

    Yakomeje asaba abagikora ubwo bucuruzi kubegera bakajya mu makoperative kuko bizabafasha kubakorera ubuvugizi ariko bakanirinda guca mu mayira atemewe.

    Mu karere ka Rubavu hakunze kugaragara abakora ubucuruzi butemewe bwambukiranya umupaka, nubwo inzego z’ubuyobozi zihora zibakangurira gukoresha uburyo bwemewe banyura ku mupaka.

    Imiryango myinshi kuri ubu ibanye neza nyuma yo kuva mu bucuruzi butemewe

    Biyemeje kureka ubucuruzi butemewe kugira ngo bakore ibibateza imbere kandi imiryango yabo itekane

    source : https://ift.tt/3GbvjBj