Author: webrwanda

Uburwayi uzarwara niba ukunda gutindana inkari igihe kirekire utajya kwihagarika:

Inkari ziba zigizwe n'iki?

Ubusanzwe inkari ziba zifite ibara ry'umuhondo rijya kweruruka. Ziba zigizwe n'amazi, imyanda iba yavuye mu mirimo inyuranye iba yakorewe mu turemangingo tw'umubiri (différents métabolismes cellulaires), haba harimo imyunyu ndetse n'indi myanda iba yaturutse mu biryo turya cyangwa indi iba yaturutse muri imwe mu miti. Zikorerwa mu mpyiko.

Inkari iyo zimaze gukorerwa mu mpyiko, zirundanya mu ruhago (vessie). Uko inkari ziba nyinshi mu ruhago niko rurushaho kwikwedura. Gushaka kunyara bituruka kuri 'capteurs' ziba aho twakwita ku ruhu rw'uruhago, zimenya ingano y'inkari zimaze kugera mu ruhago, zikohereza icyifuzo cyo kunyara ku bwonko binyuze mu dutsi (nerfs) duhuza ubwonko n'uruhago.

N'ubwo icyifuzo cyo kunyara kiba kimaze koherezwa ku bwonko, ntabwo inkari zihita zizana ako kanya bitewe n'icyitwa 'sphincter' iherereye ku muyoboro w'inkari. Sphincter niyo idufasha gufata inkari ntizihite ziza, zikaza ari uko tubishatse.

Icyo abantu benshi birengagiza ni uko mu kugumana inkari igihe kirekire, bituma bagira ibibazo by'ubuzima.

Zimwe mu ndwara ziterwa no kugumana inkari igihe kirekire:

Uburwayi bwa 'cystite'

Mu kudahita unyara mu gihe uruhago rwabigusabye, bituma udukoko (bactéries) ziba ziri mu nkari ziyongera, zigatera icyo twakwita ikibazo cyangwa se uburwayi bwitwa cystite. Ubu burwayi burangwa no gushaka kunyara inshuro nyinshi ndetse n'uburibwe mu gihe umuntu anyara.

Ibibazo by'impyiko

Iyo uburwayi bwa cystite budahise bwitabwaho ngo buvurwe, udukoko twavuze haruguru, turazamuka tunyuze mu miyoboro y'inkari tukagera mu mpyiko, tugatera ubundi burwayi bwitwa 'pyélonéphrite'.

Pyélonéphrite butera ibibazo byinshi birimo kugira umuriro, umunaniro, kuribwa mu nda, ndetse n'ibibazo mu gihe cyo kunyara. Iyo ubu burwayi nabwo butitaweho hakiri kare, butera ikindi kibazo bita péri-rénal cyangwa septicemie. Péri-rénal ikunda kuranga cyane abagore bakuze cyane, bafite imyaka irenga 65 ndetse n'abagore batwite.

Kunanirwa kunyara

Ubundi burwayi ushobora kurwara igihe ukunda gutindana inkari, harimo kugira ikibazo mu gihe uri kunyara cyangwa se kubura inkari igihe kirekire aribwo burwayi bita 'rétention urinaire'.

Ubu burwayi bukunda kuranga abagabo kurusha uko buranga abagore. Burangwa no kubura inkari igihe kirekire, kwiyongera k'uruhago ku buryo bugaragara, kubabara cyane mu kiziba cy'inda ndetse no kumva utishimye. Ubu burwayi rimwe na rimwe bushobora no gutera urupfu nk'uko ikinyamakuru cyandika ku buzima Santé Plus Mag cyabitangaje.

Santé Plus Mag itangaza ko urwaye ubu burwayi, agomba kwihutira kujya kwa muganga akibona ibimenyetso twavuze haruguru.

Kugira ngo wirinde ibi bibazo byose umubiri wawe ujye ukora neza, ni ngombwa ko ugomba guhora unywa amazi menshi buri munsi, nibura litiro 1.5 y'amazi ku munsi ndetse ukihutira kujya kunyara igihe wumvise ubishaka.

Gahongayire ni we wari umutumirwa mu makuru ya Radio Rwanda mu ijoro ryo kuri uyu wa Gatandatu tariki 15 Mutarama 2022.

Muri aya makuru yagarutse ku rugendo rw'umuziki we, ibyagiye binyeganyeza umutima we, imbaraga zo kunesha imijugujugu yagiye aterwa… n'ukuntu aryowe n'urukundo muri iki gihe n'umukunzi we ushobora kuba atari uwo mu Rwanda.

Uyu muhanzikazi watangiye umuziki afite imyaka 12 y'amavuko, avuga ko aryohewe n'ubuzima bushya bw'urukundo rw'icyanga yinjiyemo kuko yabanje gufata igihe kinini cyo gukira ibikomere by'urukundo rw'ahahise.

Gahongayire avuga ko ntawe yakwifuriza gutandukana n'uwo akunda bitewe n'ibihe yanyuzemo. Ati '[…] Urukundo ni rwiza kubera y'uko ntigeze naba mu rukundo cyangwa se muri 'relationship' irapfa nta muntu nifuriza gutandukana cyangwa ku-divorcer ni ibintu bitari byiza n'ubwo mbyambayeho ariko ntawe nabyifuriza mfite imbaraga zibihagarika navuga ngo bihagarikire kuri njyewe,'

Uyu muhanzikazi w'imyaka 35 y'amavuko avuga ko nyuma yo gutandukana n'umugabo bari barushinze, yafashe igihe cyo kubanza gutuza, amenya neza amakosa ye kuko ariyo 'Mpa agaciro kugira ngo mbanze nyakosore hanyuma mbone kujya mu y'indi nzira'.'

Akomeza avuga ko muri iki gihe ari mu nzira nziza y'urukundo n'umukunzi we mushya atifuje kuvugaho byinshi. Ati '…Ndi mu nzira nziza y'urukundo kuko amahirwe y'urukundo sinayima Imana yampaye umutima mugari kandi nabwo bigomba kugarukira aho.'

'Ndi muri 'relationship' [Urukundo] inejeje kandi numva y'uko hamwe n'Imana ndacyabisengera. Igihe cyo kubishyira hanze nticyari cyagera ariko numva y'uko hari ahantu mpagaze.'

Umunyamakuru Uwimana Ferdinard yabajije Aline Gahongayire icyo yabwira umukunzi we muri ako kanya, maze agira ati ' 'Of Course i Love him' [Yego rwose ndamukunda] 'because' [Kubera ko] n'ibyo yumva kandi 'God bless him' [Imana imuhe umugisha].'

Uwimana yabajije Gahongayire niba umukunzi we atumva Ikinyarwanda bitewe n'uko yari akoresheje ururimi rw'Icyongereza amubwira ko amukunda, maze Gahongayire asubiza ati 'Aracyumva [Ikinyarwanda] turi kuri Radio Rwanda [Akubita agatwenge].'

Gahongayire avuga ko yanyuze mu buzima bwo kuvugwa, gupfusha, guca mu itangazamakuru mu bibi gusa n'ibindi byakomerekeje umutima ku buryo hari igihe cyageze akumva yareka umuziki yakumva n'aho uvugira akumva arashaka guhunza amatwi.

We avuga ko ashima Imana kuko yabashije gusobanura ibihe bye. Akavuga ko ibihe byose yanyuzemo yakuyemo isomo rimwe ryo kumenya kudaterana amabuye n'abayamuteraga.

Ati '…Kuko iyo nza kwisobanura mbarisobetse. Ariko, uyu munsi narindiye Imana ndababara ariko uyu munsi sinyibarara ndanezerewe kandi Imana yasobanuye ibihe, ndasobanutse.'    Aline Gahongayire yatangaje ko aryohewe n'urukundo arimo n'umukunzi we ushobora kuba ari umunyamahanga Gahongayire yavuze ko yanyuze mu bihe byakomerekeje umutima ku buryo hari igihe cyageze akumva yareka umuziki Gahongayire avuga ko ibyo yanyuzemo byamuhaye isomo ry'uko 'Si byiza ko iyo umuntu bamutera amabuye yisobanura' 

Aline avuga ko ibihe bisobanura buri kintu cyose, isengesho riba nyambere muri buri kimwe

KANDA HANO UREBE AMASHUSHO Y'INDIRIMBO 'RENDEZ VOUS' YA GAHONGAYIRE
“>

Ikigo Civic Engagement in the Arts gitegura ibi bihembo kivuga ko kuva icyorezo cya Covid-19 cyakwaduka cyagiranye ibiganiro birambuye n'abahanzi barenga 300 ndetse n'abayobozi b'ibigo byo mu bihugu birenga 50 ku Isi ari nabo bavuyemo aba 10 bahize abandi.

Byari bigamije kugaragaza no kuganira na buri umwe n'uko yafashwa kwagura ibikorwa by'ubuhanzi yarimo akora, by'umwihariko imikino y'imbonankubone yo mu Inganda Ndangamuco barimo bakora mu gufasha abantu kongera gususuruka.

Ibi bihembo bitegurirwa mu Mujyi wa New York ari na ho Akanama Nkemurampaka karebye mu bahanzi barenga 300 ku Isi bahitamo 10 bahize abandi mu gukomereza gukoresha ubuhanzi no muri iki gihe cya Covid-19.

Abategura ibi bihembo bavuga ko barimo n'abayobozi b'ibigo bakoze kuva mu 2020 kugera mu mwaka w'2021.

Hope Azeda ari ku rutonde rumwe na Emmanuel Demarcy-Mota [France], Abanyeshuri bo muri Kaminuza SZFE bo muri Hungary, Abhishek Majumdar, Tanvi Shah na Sajal Mondal bo mu Buhinde.

Chris Myers wo muri Amerika, Thomas Oberende wo mu Budage, Milo Rau/NTGent/IIPM bo mu Bubiligi, Papermoon Puppet Theatre bo muri Indonesia, Pamela Villoresi bo mu Butaliyani, Kirill Serebrennikov wo mu Burusiya na HowlRound Theatre Commons wo muri Amerika.

Bavuze ko Hope bamuhaye iki gihembo ‘kubera muri Covid-19 yakoresheje ubuhanzi mu mu bikorwa iserukiramuco ryari ryubakiye ku nsanganyamatsiko ya 'Humeka' n’izindi, aha umwanya abahanzi banyuranye n'abandi.

Hope Azeda yabwiye INYARWANDA ko yishimiye iki gihembo yahawe ku bwo gukomeza kwifashisha ubuhanzi no muri ibi bihe Isi yugarijwe.

Mu 2021, iri serukiramuco ryabaye hifashishijwe ikoranabuhanga aho abahanzi bifashishijwe bakinnye imirimo irimo nka 'Airbone' yakinnyemo Akaliza Amanda wabaye igisonga cya mbere cya Miss Rwanda 2020.

Uyu mukino uvuga ku cyizere cyo kunyura mu ngorane z'ubuzima bwa buri munsi aho iyo uhuye n'ikibazo runaka wishakamo izindi mbaraga zo kukirenga no gukomeza ubuzima kandi wemye.

Ni umukino wahimbwe hagendewe cyane cyane kuri zimwe mu nkuru zirimo ibibabaje biba ku bantu mu mibereho yabo. Urugero nk'iruka ry'ikirunga cya Nyiragongo muri Repubulika Iharanira Demokarasi ya Congo n'ibihe bigoye abaturage bo muri Palestine baciyemo.

Undi mukino wakinywe witwa 'Shared stories' uvuga ku nkuru zitandukanye ku Rwanda, U Budage na Bosnia. Ushushanya ukuntu abantu bagira inkuru zitandukanye kandi zisa, ari nabyo bigira abantu abo bari bo.

Uyu mukino ugaragaza ko buri wese afite uburyo inkuru ye ayikubariye niyo mwaba mudahuje umuco cyangwa ururimi wisanga bisa n'aho ari iyawe ari kuvuga kandi mutanaziranye.

Mu 2021, iri serukiramuco ryagarutse ku nsanganyamatsiko zirimo ubuzima bwo mu mutwe, kongera kuvuka bundi bushya, ubuzima bwo kubaho udafite aho wita mu rugo cyangwa waba unahafite ntuhagirire amahoro yo mu mutima n'ibindi.

Iserukiramuco rya Ubumuntu Hope ategura rigamije guhuza abantu batandukanye bavuye ahantu hatandukanye, babayeho mu mibereho itandukanye bagahura bakaganira mu rurimi rumwe rwitwa ‘Ubuhanzi’.

Iri serukiramuco ryatangiye mu 2015 riba ngaruka mwaka rikurikira iminsi 100 yo Kwibuka Jenoside yakorewe Abatutsi ribera hanze kuri ‘amphitheate’r ku rwibutso rwa Kigali.

Iserukiramuco riba rigizwe na byinshi harimo imbyino, ibiganiro no gusura urwibutso. Kwinjira aho ryaberaga nta kiguzi kuri muntu uwari we wese, amikoro n'ubushobozi babikura mu bufasha n’inkunga babona.

Muri iki gihe cya Covid-19 ubuhanzi ku Isi yose bwiyerekanye nk'uburyo bwo guhererekanya amakuru, gutanga ibitekerezo, kuvuga ibibazo, no gusangira imyumvire ku mirongo migari y’ubuzima n’ubumuntu.

Ubuhanzi ni nk’umuyoboro wo guhererekanya amakuru, gutanga ibitekerezo, guhanga udushya no kurema umwihariko n'umuyoboro ukomeye mu guhindura imibereho. Hope Azeda watangiye itorero Mashirika n'iserukiramuco rya 'Ubumuntu' yashyizwe mu bantu 10 ku Isi bahawe 'Segal Center Awards'

Bishop Justin Alain yamenyekanye mu gutegura ibiterane bikomeye biri ku ku rwego mpuzamahanga by’umwihariko icyo aherutse gutegura cyo gusengera Isi yose cyiswe ‘Pray For Our World’ (Dusengere Isi yacu) cyabaye mu 2021. Iki giterane cyabereye ku migabane yose mu byumweru bitanu kuva tariki 02 Kanama 2021 kugeza tariki 05 Nzeri 2021, kiba hifashishijwe ikoranabuhanga mu kwirinda icyorezo cya Covid-19. Bagikoreye kuri ‘Google meet’ n'imbuga nkoranyambaga za Rise and Shine World nka YouTube, Facebook, Instagram na Twitter.

Kuri ubu inkuru ishyushye ku bakunzi b’uyu mupasiteri ni uko yamaze kwinjira mu muziki agatangirira ku ndirimbo yashyize hanze mu buryo bw’amajwi. Nubwo magingo aya ari bwo ashyize hanze indirimbo ya mbere, Bishop Justin Alain yavuze ko ubuzima bwe buba mu muziki. Ati “Ntabwo navuga ngo nsanzwe nkora umuziki ahubwo mba mu muziki. Ndi umuntu ukunda umuziki uhimbaza Imana ku buryo buri ku rwego rwo hejulu. Muri uko kuwukunda ngerageza no kuririmba dore ko n’akazi kanjye ka buri munsi k’ubushumba gahura n’indimbo nyinshi zihimbaza Imana”.

Bishop Justin Alain yashyize hanze indirimbo ye ya mbere

Mu kiganiro na inyaRwanda.com, Bishop Justin Alain yavuze ko yatangiye kuririmba cyera akiri umwana, abitangirira mu ishuri ryo ku Cyumweru. Ati: “Rero mu by’ukuri natangiye kuririmba nkitangira kuba muri ‘Sunday school’ nkomereza no mu makorari atandukanye kuko ni ibintu nkunda cyane”. Yunzemo ati “Ariko kuba nakora indirimbo zanjye bwite ntabwo nigeze mbikora kubera igihe wenda cyari kitaragera dore ko n’inshingano ziba ziri nyinshi. Ubu rero numva igihe kigeze cyo gukora umuziki uhimbaza Imana nubwo navuga ko atari byo ngiye kugira umwuga”.

Ku bijyanye no gufatanya umuziki n’umurimo w’ivugabutumwa asanzwe akora, yavuze ko bitazamugora kuko “ubwabyo nabyo ni ivugabutumwa”. Yongeyeho ati “Ahubwo numva ari inyunganizi mu murimo w’ivugabutumwa nkora. Hari ukunda indirimbo cyangwa se agakunda ivugabutumwa risanzwe. Rero inzira zose zatuma ubutumwa bwiza bugera aho bugomba kugera nabukoresha ariko bukagera ku bo bireba. Rero byose bizuzuzanya mu kwagura ubwami bwa Data”.

InyaRwanda.com yabajije Bishop Justin Alain igihe yandikiye iyi ndirimbo ye, aduhishurira ko yayanditse mu 2012 akaba yarayiririmbaga ari kumwe n’abo bari bahuriye mu itsinda ry’abavugabutumwa yashinze hamwe n’umugore we witabye Imana tariki 12/02/2016. Ati “Indirimbo ‘Akira ishimwe’ yanditswe ahagana mu mwaka wa 2012. Ni indirimbo naririmbaga ndi kumwe n’abantu twakoranaga muri group nari narashinze njyewe na Madame wanjye nubwo yitahiye (Akomeze aruhukire mu mahoro). Icyo gihe yari ishinzwe kugenda yamamaza ubutumwa hirya no hino”.

‘Akira ishimwe’ niyo ndirimbo yinjije mu muziki Bishop Justin Alain

Yavuze ko iyi ndirimbo ye yakorewe mu mujyi wa Kigali, ikaba ibumbatiye ubutumwa bwo gushima Imana. Ati “Ni indirimbo yakorewe i Kigali, niba nibuka neza umu producer wayikoze yitwaga Chris. Ni indirimbo ivuga ubutumwa bwo gushima Imana iyo twibukaga ibyo twaciyemo Imana ikabidutambutsa”. Yavuze ko “Amashusho yayo dateganya kuzayakora neza ninza muri Africa nkashakisha abo bantu twabanaga no muri iyo group kuko ni indirimbo inyibutsa byinshi”.

Yanavuze ko ashaka kuyisubiramo akayikora mu buryo bugezweho bw’imicurangire bityo ikarushaho kuryoha. Yagize ati “Kuko nkeneye no kuzayikorera remix mu bijyanye n’imicurangire ijyanye n’igihe tugezemo kugira ngo irusheho kuba nziza. Nubwo amajwi y’abarimo atazaba ari yo agarukamo nk’uko n’uwari Madame wanjye harimo ijwi rye ariko ubu ataboneka, niyo mpamvu nyifata nk’indirimbo y’urwibutso kuko ihora imbera nshya kuko inyibutsa gushima Imana muri byose”.

Bishop Justin Alain yateguje abakunzi b’umuziki wa Gospel indirimbo yindi agiye gushyira hanze, ati “N’itariki nteganya no gusohoraho indirimbo yindi ifite ibisobanuro bikomeye ku bijyane n’imbaraga no gusenga. Muzayibona, ni indirimbo imeze neza cyane ndayibakumbuje”. Yavuze ko umunsi umugore we yitabaga Imana agasigarana abana bato cyane harimo n’uruhinja rukivuka, yasenze Imana ngo izabane na we. Ati “Imana ntiyigeze intererana kuko yabanye nanjye iranderera kandi impoza n’amarira”.

Bishop Justin Alain yinjiye mu muziki ateguza abakunzi b’umuziki wa Gospel kwitega indirimbo ye ya kabiri

INKURU WASOMA: Bishop Justin Alain yavuze iyerekwa yagize ryashibutsemo igiterane cyo gusengera Isi yose mu byumweru 5

UMVA HANO ‘AKIRA ISHIMWE’ INDIRIMBO YA MBERE YA BISHOP JUSTIN ALAIN

Indirimbo nshya ‘Izina’ ya Bruce Melodie yagize hanze kuri uyu wa Gatandatu tariki 15 Mutarama 2022, igaragaramo inkumi y'uburanga yitwa Malkia Karen inumvikana mu yo uyu muhanzi aba aririmba agira ati: 'Malkia mutima wanjye'.

Malkia asanzwe ari icyamamare muri Tanzania mu bitangazamakuru dore ko ari n'umuntu w'imbere muri Wasafi unisiga amarangi.

Mu bihembo bitangirwa muri Zambia, byitwa Lusaka bya Zikomo Awards 2021, uyu mukobwa ni we wegukanye igihembo cy'umuhanzikazi mwiza muri Africa yose ahigitse abo bari bahatanye muri icyo cyiciro.

Ibi bihembo bya Zikomo Awards mu mwaka wa 2022 bikaba bigeze kure bitegurwa aho mu bihe bya vuba ruzaba rwambikanye mu bahanzi na ba rwiyemezamirimo bitwaye neza mu mwaka ushize n’ubu.

Yegukanye igihembo cy’umuhanzikazi mwiza muri Africa mu bihembo bya Zikomo Awards 2021

Ni umwe mu bakobwa bakorana bya hafi na kompanyi ya Wasafi

Ni umwe mu bahanzikazi bakomeye muri Tanzania no muri Africa

Uburanga bwe ni ntagereranwa

Indirimbo ya Bruce Melodie ‘Izina’ igiye hanze mu gihe hategerejwe iyo yakoranye na Harmonize

Hanscana usanzwe akorera amashusho Diamond Platnumz yashyize umusada mu ikorwa ry’amashusho yatunganijwe na Meddy Saleh 

Nyarwaya Innocent 'Yago’ yashimiye abamwihanganishije n’abamufashije kugira ngo umuyoboro we wo kuri YouTube ugaruke

Uwo muyoboro wa YouTube ukimara kugaruka ku wa Gatandatu tariki 15 Mutarama 2022, Yago yahise ashyiraho ikiganiro cye bwite aho asobanura byinshi ku byihishe inyuma yo guhagarikwa k’uwo muyoboro.

Mu marangamutima menshi, Yago yasobanuye uburyo yari amaze iminsi yarahangayitse kugeza ubwo atakaza ibiro bitanu, yibaza uburyo igikorwa cy’indashyikirwa yubatse mu myaka ibiri ishize kibaye impfabusa kubera abamugiriye ishyari bakamugambanira ku buyobozi bwa YouTube kugira ngo umuyoboro we ufungwe nyamara atabazi, ndetse bamurega ibinyoma.

Uyu muyoboro we wa YouTube agaragaza uburyo wari umubeshejeho, ko nta kandi kazi kamutunze afite, akerekana n’uburyo yawukoresheje agahindura ubuzima bwa benshi, ari na ho ahera agaragaza ko atari kwivanaho nk’uko bamwe babimushinje, kuko adashobora guhagarika nkana igikorwa kimuha imibereho ya buri munsi.

Yashimiye abantu benshi yarondoye amazina bamwoherereje ubutumwa bumwihanganisha, abamusengeye, n’abandi bamubaye hafi mu buryo butandukanye, baba abari mu Rwanda ndetse no mu mahanga.

Mu butumwa yanditse ku mbuga nkoranyambaga, Nyarwaya yagize ati 'Nyuma y’ibyumweru 2 n’igice hafi 3 YAGO TV SHOW yongeye gusubira ku murongo. Ndashimira itsinda ry’abasore 3 bakoze ibishoboka bakaburana ibyo twaregwaga byose kugeza Channel igarutse. Ndashimira abantu mwese mwadusengeye cyane. Ntacyo nabona mbitura. Mwarakoze Cyane!'

Icyakora mu kiganiro yashyize kuri uyu muyoboro we, Yago yikomye abantu batatu ateruye ngo abavuge mu mazina, ariko avuga ko ari abanyamakuru kandi ko bahuriye ku bintu bisa n’ibyo atangaza kuri YouTube. Yavuze ko ubu yamaze kumenya neza abari babyihishe inyuma kubera amashyari.

Abo ngo ni bo bamutangiraga ibirego ku buyobozi bwa YouTube bamushinja ibinyoma, dore ko ibyo yabaga yatangaje byari mu Kinyarwanda, bityo ubuyobozi bwa YouTube ntibubashe kumenya niba ibyo aregwa ari ibinyoma.

Umwe mu bo yagarutseho cyane ni umunyamakuru Phil Peter uherutse no kwandika ubutumwa burebure ku mbuga nkoranyambaga, asaba Yago kuvugisha ukuri kuko ngo ari we wikuriyeho 'channel’ ye ku bushake, bigatuma hari abo abantu barimo kwibasira 'bababeshyera’.

Iki kibazo cyatumye Yago na Phil Peter baterana amagambo

Mu kumusubiza, Yago yavuze ko Phil Peter yigaragaje, kandi ko umugambi wabo batabashije kuwugeraho, icyakora avuga ko we atabitura inabi nk’iyo bamugiriye.

Yago avuga ko afite amajwi n’ubutumwa ababiri inyuma bagiye bavuga bamwigambaho ko bazamucecekesha, kuko ari abantu bakomeye kandi atazi icyo bari cyo. Yavuze ko ashatse ubu yabajyana mu butabera kuko ibyo bamukoreye birimo ibyaha, ariko avuga ko nta nyungu afite mu kubashyira habi nk’aho bashatse kumushyira.

Icyakora kugeza na n’ubu hari abagitekereza ku kuri kw’ibivugwa na buri ruhande, bibaza uvugisha ukuri n’ubeshya, dore ko hari abakomeje gushidikanya kuko mu myidagaduro hakunze kugaragara ibyo bamwe bavuga babeshya bagamije kurushaho kuvugwa cyane no kwamamara, ibyo bita 'gutwika'.

Reba ikiganiro Yago yatanze umuyoboro we wo kuri YouTube ukimara kugaruka, asobanura ibyamubayeho.

Minisitiri Gatete n’abandi bayobozi batandukanye baganiriye n’abaturage ku bikorwa by’iterambere bibateganyirijwe

Ni imodoka izajya ifasha mu ngendo abatuye mu Murenge wa Gitambi ikazaba ari nini kurenza iyo bari bafite.

Imodoka ya mbere bari bayihawe n’Umukuru w’igihugu mu mpera z’umwaka ushize wa 2021.

Ni imodoka yo mu bwoko bwa Ritco yo kuborohereza urugendo no kubona uburyo bwo kugeza umusaruro wabo ku isoko.

Ubwo Minisitiri w’Ibikorwa remezo Ambasaderi Claver Gatete yabagezagaho iyo nkuru nziza yagize ati: 'Umukuru w’Igihugu yabageneye indi modoka nini izajya ibafasha mu ngendo. Kandi iyo modoka ku wa mbere tariki 17 Mutarama ku mugoroba izaba yabagezeho, naho ku wa kabiri tariki 18 Mutarama 2022 mutangire kuyikoresha'.

Abaturage batuye mu Murenge wa Gitambi by’umwihariko abo mu kagari ka Kingwa bakibwirwa inkuru y’uko Umukuru w’Igihugu yabemereye indi modoka, bagaragaje umunezero wabo mu mbyino ndetse bashimira Nyakubahwa Perezida Paul Kagame.

Bati: 'Turishimye cyane kuba Nyakubahwa Perezida Paul Kagame yongeye kudutekereza akatugenera imodoka nini. Iyo yari aherutse kuduha yadufashaga ingendo ariko nanone hari ubwo byasabaga ko tuyitegereza igihe kirekire ndetse waba ufite umuzigo ntibemere kugutwara'.

Undi ati: 'Wenda Nyakubahwa yari buzabyumvire kuri radiyo, ariko ubwo Minisitiri yahageze turamwitumiye atubwirire Nyakubahwa ko twishimye cyane'.

Iyi modoka izafasha abaturage b’Imirenge ya Nyakarenzo, Gitambi na Gashonga n’ibice byegeranye bakoresha umuhanda wa Nyakarenzo, Mibirizi na Mashesha. Ni umuhanda umaze igihe gito ukozwe neza kuko mbere wari warangiritse, muri iyo minsi bahita bahabwa n’umuriro w’amashanyarazi.

Umuriro w’amashanyarazi wabagezeho, abo utarageraho na bo ngo urabageraho vuba

Iyi nkuru dukesha RBA ivuga ko Sosiyete y’u Rwanda ishinzwe ingufu (REG) na yo yahise ibemerera umuriro mu bice bisigaye bitawufite bigizwe n’utugari tubiri.

Umuyobozi wa REG mu Rwanda yagize ati: 'Tuzabaha umuriro w’amashanyarazi ijana ku ijana bitarenze muri Werurwe uyu mwaka'.

Uwo munsi ndangamuco wizihizwa hamurikwa imico itandukanye binyuze mu bumenyi bungurana biga amateka n'umuco bya buri gihugu hagamijwe kumenyana no kwisanzuranaho nk'abantu baba bigira hamwe mu gihe cy'umwaka.

Bamwe mu banyeshuri b'abasirikare bari gukurikirana amasomo yabo muri iryo shuri, bemeza ko ari umwanya mwiza ubafasha kurushaho kumenyana no gukorera hamwe kandi binabafasha kurushaho gukora inshingano zabo mu gihe bahuriye mu butumwa bwo kugarura no kubungabunga amahoro.

Lt Col Callixte Migabo, uhagarariye abo banyeshuri, yavuze ko akenshi inyigisho za gisirikare zishingiye ku mateka, indangagaciro n'amahame bityo ko ari ngombwa ko bagira n'igihe cyo kuyasangizanya binyuze mu imurika ry'umuco.

Yagize ati”Imyumvire y'umuco ituma ingabo zibasha guhangana n'ibibazo by'umutekano bigoye nk'igihugu kimwe kitabasha kwikemurira, muri iki gihe bisaba ko abantu bakorera hamwe kandi gukorana neza ni uko baba baziranye babasha no kumenya bimwe mu bigize umuco w'ahandi bikabafasha kugera ku ntego.”

“Ubu ingabo z'u Rwanda ziri gukorera henshi muri Afurika, aho tuhahurira n'abandi, iyo tuzi umuco wabo bidufasha no gukorana neza kandi tukawububahira kuko tuba tuzi ngo aba babaho muri ubu buryo tugakorana neza.”

Maj Bervyn Gondwe wo mu Ngabo zirwanira ku kirere muri Zambia, yashimiye u Rwanda rwabakiriye agahamya ko ubumenyi n'amasomo bahabwa bizabafasha gukora inshingano zabo neza kandi binabafasha kurushaho kumenyana.

Yagize ati” Mbere ya byose ndabanza gushimira imiyoborere y'u Rwanda na Nyakubahwa Perezida Paul Kagame n'ubuyobozi bw'ingabo. Amasomo duhabwa hano aratwubakamo ubunyamwuga buzadufasha kurangiza inshingano zacu, gusangira imico itandukanye na byo bizadufasha gukorera hamwe tuziranye turusheho kwishimira kwigara kwa Afurika.”

Umuyobozi w'Ishuri Rikuru rya Gisirikare rya Nyakinama, Brig Gen Didas Ndahiro, yavuze ko umunsi w'umuco uhuriza hamwe uruhurirane rw'imico itandukanye mu bihugu bitandukanye kandi ko ari n'umwanya mwiza wo kurushaho kumenyana nk'abantu baba bigira hamwe.

Yagize ati “Uyu ni umwanya mwiza wo kurushaho kumenyana no gukorera hamwe baziranye, baramurika impano zitandukanye banasangira ubumenyi nk'abantu baba bigira hamwe bizabafasha kubaka ikiraro kibahuza binyuze mu mico itandukanye, kumvikana no gukorera hamwe.”

Kuri ubu, mu Ishuri Rikuru rya Gisirikare rya Nyakinama hari kwigiramo abasirikare 48 bo mu bihugu by' u Rwanda, Botswana, Ethiopia, Kenya, Malawi, Nigeria, Senegal, Sudani y'Epfo, Tanzania, Uganda na Zambia bafite ipeti rya Major kugeza kuri Lieutenant Cornel barimo Abanyarwanda 31 n'abanyamahanga 17.

Mu byamuritswe n’abanyeshuri bo mu Rwanda harimo n’ibijyanye n’amafunguro

Abanyarwanda bamuritse ibijyanye n’imyubakire ya kera n’ibindi bikorwa nko gusya ku rusyo

Abari bakurikiye igikorwa cyo kumurika umuco uranga ibihugu bifite abasirikare bari mu masomo mu Ishuri Rikuru rya Gisirikare i Nyakinama

Maj Bervyn Gondwe wo mu Ngabo zirwanira ku kirere muri Zambia, yashimiye u Rwanda rwabakiriye agahamya ko ubumenyi n'amasomo bahabwa bizabafasha gukora inshingano zabo neza

Umuyobozi w’Ishuli Rikuru rya Gisirikare rya Nyakinama Brig Gen Didas Ndahiro avuga ko umunsi w'umuco uhuriza hamwe uruhurirane rw'imico itandukanye mu bihugu bitandukanye kandi ko ari n’umwanya mwiza wo kurushaho kumenyana nk’abantu baba bigira hamwe