Author: webrwanda

Umuvugizi wa Polisi mu Ntara y'Iburasirazuba Superintendent of Police (SP) Hamduni Twizeyimana yavuze ko uyu mugabo yafashwe biturutse ku makuru yatanzwe n'abaturage.

Yagize ati:” Abaturage bo mu mudugudu wa Mwurire bahaye amakuru Polisi ko atwaye kuri moto ifite nimero RG 697 A umugenzi ufite igikapu kirimo urumogi. Polisi yahise itangira igikorwa cyo kubafata nibwo yafatwaga afite urumogi ibiro 15, ariko uwo yaratwaye yabonye abapolisi ahita yiruka.'

Uwafashwe yavuze ko urumogi ari urwa mugenzi yari atwaye wirukanse, akaba yari amuvanye mu kagari ka Karambi amujyanye Kabarondo, ariko ntiyigeze ashaka kuvuga amazina ye.

SP Twizeyimana yagiriye inama abantu bose bishora mu biyobyabwenge haba ababicuruza cyangwa ababinywa kubireka kuko amayeri yabo yose yaramenyekanye, kandi ko Polisi ifatanije n'izindi nzego z'umutekano ndetse n'abaturage bazajya bafatwa bahabwe ibihano birimo n'igifungo cy'igihe kirekire.

Yasoje Ashimira abaturage batanze amakuru ruriya rumogi rugafatwa rutarakwirakwira mu baturage, anabasaba kujya bakomeza gutanga amakuru.

Uwafashwe ahamwe n'ibyo yafatanwe yashyikirijwe Urwego rw'Ubugenzacyaha (RIB) rukorera muri sitasiyo ya Polisi ya Ndego, ngo hakurikizwe amategeko, ibikorwa byo gushaka uwacitse birakomeje.

Iteka rya minisitiri nº 001/moh/2019 ryo ku wa 04/03/2019 rigena urutonde rw'ibiyobyabwenge n'ibyiciro byabyo rishyira ikiyobyabwenge cy'urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n'ibihano muri rusange, ingingo ya 263 ivuga ko Umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw'imiti ikoreshwa nka byo mu buryo bunyuranije n'amategeko, aba akoze icyaha.

Iyo abihamijwe n'urukiko ahanishwa igifungo cya burundu n'ihazabu y'amafaranga y'u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW) ku byerekeye ibiyobyabwenge bihambaye.

Uru rumogi rwari rugiye gukwirakwizwa mu baturage i Kayonza

Saa tatu za mu gitondo kuri uyu wa Gatandatu tariki 26 Werurwe 2022, nibwo inkongi y'umuriro yagaragaye mu nzu z'ubucuruzi ziri ku isantere ya Ntendezi.

Umunyamabanga Nshingwabikorwa w'Umurenge wa Ruharambuga, Hagabimfura Pascal, yabwiye IGIHE ko iyi nkongi y'umuriro bikekwa ko yaturutse ku mpanuka y'umuriro w'amashanyarazi.

Ati “Byabaye mu gihe abantu bari mu muganda, dutegereje umukozi w'Ikigo gishinzwe ingufu, REG, ariko abaturage barakeka ko iyi mpanuka yatewe n'umuriro w'amashanyarazi”.

Mu kuzimya iyi nkongi hitabajwe imodoka izimya inkongi yo ku kibuga cy'indege i Kamembe. Saa sita z'amanywa imirimo yo kuzimya yari igikomeje ariko umuriro wamaze gucika intege.

Nta muntu wagiriye ikibazo muri iyi nkongi, gusa yangije ibyacururizwaga muri iyi miryango birimo amasukari, ibikoresho by'ubwubatsi, ibiribwa bicuruzwa muri Alimentation n'ibindi.

Ibi byabaye kuri uyu wa Gatandatu tariki ya 26 mu Murenge wa Mwiri mu Kagari ka Kageyo aho aba basore basanzwe mu nkengero z'isantere ya Gasarabwayi bari kubaga imbwa ngo bagurishe inyama zayo.

Amakuru yatanzwe n'abaturage avuga ko atari ubwa mbere aba basore bakora iki gikorwa ngo kuko basanzwe bagurisha inyama z'imbwa babeshya abantu ko ari iz'inyamanswa z'ishyamba baba bishe ngo abaturage bakazigura ku bwinshi.

Umunyambanga Nshingwabikorwa w'Umurenge wa Mwiri, Ntambara John, yabwiye IGIHE ko aba basore bafashwe bari kubaga imbwa abaturage bavuga ko ari akamenyero basanganwe ko kubaga imbwa bakagurisha inyama zayo bazitirira inyamanswa z'ishyamba zikunda kugurwa cyane.

Ati ' Abo basore n'ubundi basanzwe ari ibirara twaje kubafata rero bari kubaga imbwa ariko banze kuvuga aho bari bajyanye inyama zayo gusa amakuru twakuye mu baturage ni uko bari bagiye kugurisha inyama zayo abaturage, nyiri iyo mbwa we ntabwo aramenyekana aracyashakishwa.'

Gitifu Ntambara yavuze ko ngo kugira ngo aba basore bafatwe ari amakuru yatanzwe n'abaturage abasaba kujya bashishoza mu kugura inyama bakanabanza kumenya aho zaturutse.

Ati ' Abaturage twakoranye inama tubashishikariza kugura inyama bazi neza aho zaturutse, abacuruza inyama bo turabasaba gushyira ibyo bacuruza ahagaragara niba ari ihene bikagaragara aho kugurisha umuntu inyama batazi nabo aho zaturutse.'

Kuri ubu aba basore bacumbikiwe kuri sitasiyo ya RIB Mwiri mu gihe hagitegerejwe iperereza no kumenya aho izo nyama bari bazitwaye.

Nyirabumba Béatrice wo murenge wa Nzahaha mu karere ka Rusizi, nyuma yo kujya mu matsinda imibereho ye yarahindutse.

Uyu mugore w'imyaka 45 afite ubumuga bw'amaguru, yahoze acuruza agataro agakuramo amafaranga yo kurya gusa ntagire igikorwa cy'iterambere ageraho.

We na bagenzi be bafite ubumuga mu myaka ine ishize, batangiye bizigama igiceri cya 50Frw bagenda bazamura ubu bageze ku mafaranga 500Frw buri cyumweru.

Ati “Nagiye nguza nkagura amatungo ubu mfite inka ebyiri, mfite ihene enye zirimo iza kizungu zikamwa, nishyuriye umwana ishuri ryisumbuye. Mfite intego yo kuzamwishyurira na kaminuza”

Nyirabumba asanga umuntu ufite ubumuga adakwiye kwiheza, cyangwa ngo ajye mu muhanda gusabiriza. Muri aya matsinda iyo hari uwo bamenye wagiye gusabiriza yitwaje ko afite ubumuga bamuca amande.

Ati “Abantu bafite ubumuga nabakangurira kuva mu muhanda kuko gusabiriza ntacyo bimaze. Uguhaye none ni nk'inzara abaguteye”.

Mu karere ka Rusizi hari amatsinda 214 y'abantu bafite ubumuga butandukanye.
Mukantagara Marie Thérèse wo mu murenge wa Nyakarenzo ari muri rimwe mu riyo

Kujya muri aya matsinda byatumye yunguka ubumenyi bwo gukorera neza urutoki no guhinga kijyambere.

Ati “Abafite ubumuga basabiriza ndabagaya kuko baradusebya. Nakore, yizigame yigurize ariko kujya gusabiriza mu muhanda ni ukwisuzuguza”.

Aya matsinda y'abantu bafite ubumuga kuri ubu akorera mu turere 9 turimo Rusizi na Rutsiro.

Ngiruwonsanga Assiel wo mu murenge wa Mushubati mu karere ka Rutsiro yatangiye acuruza ibitoki, n'imineke ubu asigaye acuruza butike irimo ibihumbi 600Frw bitewe n'inguzanyo agenda afata akishyura gahoro gahoro.

Ati “Icyo kujya mu itsinda byamariye ubu mfite butike y'ibihumbi 600, mfite n'inka. Amafaranga 100 ashobora kuguhindurira ubushobozi. Umuntu uri mu itsinda ntasaba isabune ntasaba umunyu, bituma abantu batwubaha n'ubyaye umwana ufite ubumuga akamujyana ku ishuri”.

Nyiramisago Dancille ufite ubumuga bw'ingingo kujya kuvoma byaramugoraga kubera ubumuga afite.

Agira ati “Itsinda ryamfashije gukurura amazi ubu mfite amazi mu rugo. Mfite umugambi wo kujya ngura itungo buri uko turashe ku ntego”.

Ihuriro ry'imiryango y'abantu bafite ubumuga mu Rwanda (NUDOR) ryakoze aya matsinda, rivuga ko yakozwe binyuze mu mushinga wo kuzamura imibereho myiza n'ubukungu mu bantu bafite ubumuga.

Umukozi wa NUDOR, ushinzwe amatsinda yo kubitsa no kugurizanya, Vuningabo Emile Cadet avuga ko mu gihe aya matsinda yakomeza gukora neza yagabanya mu buryo bugaragara umubare w'abantu bafite ubumuga basabiriza.

Ati “Uyu mushinga watangiye muri 2018, uzarangira mu kwezi kwa kane, uyu mwaka, ariko ntabwo navuga ko uzarangira ahubwo uzimukira mu tundi turere 8”.

Umuyobozi wungirije w'Akarere ka Rusizi ushinzwe imbereho myiza y'abaturage Dukuzumuremyi Anne Marie ashima uruhare rw'amatsinda yo kubitsa no kugurizanya mu kuzamura imibereho y'abantu bafite ubumuga.

Ati “Ni ikintu cyiza kuba umuntu ufite ubumuga abasha nawe gutunga urugo rwe, rukabona ibyo kurya, rukabona, rukabona minerval, rukabona rya tungo, akabasha kwambara umwenda mwiza ufuze uteye ipasi nk'abandi banyarwanda, impinduka zo zirahari ziragaragara”.

Visi Meya Dukuzumuremyi avuga ko bazakomeza gufatanya n'abafatanyabikorwa mu gufasha abafite ubumuga mu rwego rwo kugabanya abasabiriza.

Ati “Abakiri hanze tuzakomeza kubegera no kubabumbira mu makoperative, na NUDOR ntabwo idusezeyeho, Leta n'abafatanyabikorwa tuzakomeza gufatanya, kugira ngo na wawundi utaragerwaho n'izi gahunda nawe zimugereho tuzamukire hamwe iterambere turigereho ku buryo bwuzuye”.

Kubumbira abantu bafite ubumuga mu matsinda yo kubitsa no kugurizanya byatangiriye muri Gasabo na Nyaruguru ari igererageza. Nyuma yo kubona bitanga umusaruro nibwo iyi gahunda yaguwe igera mu turere icyenda, biteganyijwe ko hagiye kongerwamo utundi turere 8.

Kuva mu kwezi kane umwaka ushize kugeza ubu, gihugu hose abafite ubumuga 50,708, bibumbiye mu matsinda 1721, bamaze kwizigamira 659 122 973Frw.

Kwibumbira mu matsinda yo kubitsa no kugurizanya byamufashije gushinga butiki y’ibihumbi 600 ahereye ku mafaranga make

Nyirabumba Béatrice asaba abafite ubumuga bagisabiriza kubivamo bakajya matsinda yo kwiteza imbere

Abantu bafite ubumuga kujya mu matsinda byabashoboje kugura amatungo

Visi Meya Dukuzumuremyi Anne Marie avuga ko bazakomeza gukorana n’abafatanyabikorwa mu kugabanya umubare w’abafite ubumuga basabiriza

Byagaragajwe mu nama nyunguranabitekerezo yabereye mu Karere ka Huye kuri uyu wa Gatanu tariki ya 25 Werurwe 2022, yateguwe na Minisiteri y'Ubuhinzi n'Ubworozi ku bufatanye na Minisiteri y'Ubucuruzi n'Inganda n'izindi nzego mu rwego rwo guteza imbere imikoranire hagati ya Leta n'inzego z'abikorera.

Yahurije hamwe abagera kuri 70 bahagarariye abandi barimo abikorera b'urubiruko n'abakuze, abahagarariye inzego za Leta, abafatanyabikorwa mu buhinzi n'ubworozi barimo RYAF, Urugaga rw'abikorera n'abandi.

Umuyobozi ushinzwe Igenamigambi, Ikurikiranabikorwa n'isuzumabikorwa muri Minisiteri y'Ubucuruzi n'Inganda, Munyurangabo Jonas, yagaragaje ko kugeza ubu ubuhinzi bufite 24% by'umusaruro mbumbe w'igihugu bukaba bwarazamutseho 6% ugereranyije n'umwaka ushize.

Gusa abatanze ibitekerezo barimo Umuyobozi w'Akarere ka Nyaruguru Wungirije ushinzwe Iterambere ry'Ubukungu, Gashema Janvier, bagaragaje ko batewe impungenge n'ahazaza h'ubuhinzi mu Rwanda kuko bwiganjemo abantu bakuze gusa, naho urubyiruko rukaba rutabwitabira uko bikwiye.

Gashema yavuze ko ibiti bya kawa byinshi bishaje ku buryo usanga abayihinga babishyiraho ifumbire nyinshi igasa n'aho ipfuye ubusa kandi Leta iyitangaho amafaranga menshi.

Ati 'Ubuhinzi bwacu ahanini bwiganjemo abantu bakuze babukora mu buryo bwa gakondo ugasanga nka kawa ihingwa n'abasaza. Gufata ifumbire mvaruganda ukayishyira ku biti bya kawa bishaje ni nko kugaburira abasaza 'Cerelac'. Dukwiye gushiraho uburyo abari kubyiruka bajya mu buhinzi kuko nibo bafite imbaraga kandi ni bo bazahinga kijyambere.'

Yakomeje agaragaza ko nko mu buhinzi bw'icyayi, kawa n'ibirayi bukorerwa mu Karere ka Nyaruguru usanga bwiganjemo abantu bakuze naho urubyiruko rukaba rutabwitabira.

Uwingabire Angelique umwe mu rubyiruko ruhinga imyumbati mu Karere ka Muhanga, yagaragaje ko ubuhinzi burimo amafaranga kuko mu gihe amaze abukora yatangiye kubona inyungu.

Ati 'Nari umushomeri ariko nagera ku isoko nkabona imyumbati bayishaka cyane ndavuga ngo uwajya kuyihinga, ubwo ntangira guhinga ahantu hatoya imaze kwera mbona ndungutse mpita mbikomeza. Iyi nama nyungukiyemo ko ngiye kurushaho kwita ku buhinzi no kubikora kinyamwuga kugira ngo ndusheho kubona inyungu.'

Umuyobozi Mukuru wungirije ushinzwe iterambere ry'ubuhinzi mu Kigo cy'Ubuhinzi n'Ubworozi, Dr Bucagu Charles, yavuze ko ku bufatanye n'izindi nzego bari gukora ibishoboka byose ngo urubyiruko rwinjire mu buhinzi kandi rubishyizeho umutima.

Ati 'Ni ingamba dufite muri iyi gahunda yo kuzamura umusaruro mu gihugu, iyo ureba abahinzi bari mu mwuga abenshi ni abasaza n'abakecuru kandi iyo tuvuga kuzamura umusaruro cyangwa guhindura ubuhinzi ni ukuva muri gakondo tujya mu buhinzi bw'isoko, bikeneye udushya n'ibitekerezo bishya. Ibyo rero ntibyaza mu gihe ubikora atumva, birashaka umuntu ubyumva kandi ubikora uzanamo ikoranabuhanga n'uburyo bushya.'

Yakomeje agira ati 'Ibi rero tuzabikora mu rubyiruko cyane cyane abize ubuhinzi n'ubworozi ariko n'utarabyize akaba afite ubushobozi bwo kumva ibintu vuba abo bose turabakeneye.'

Dr Bucagu yavuze ko igihugu cy'u Rwanda kidafite ubutaka bwiyongera bityo ubuhari bugomba kubyazwa umusaruro mwishi ushoboka.

Ati 'Ubwo dufite tugomba kubuzamuraho umusaruro kandi kuwukuba inshuro nyinshi bisaba ikoranabuhanga.'

Yavuze ko mu gihugu hari ibishanga byinshi bitunganyije n'ibigiye gutunganywa kandi hari na politike ya Leta yo gushora imari mu buhinzi ku buryo urubyiruko ruzayisangamo bitewe n'amahirwe arimo ndetse hazakorwa n'ubukangurambaga.

Inama nyunguranabiteherezo yahuje abagira aho bahurira n'ubuhinzi yatewe inkunga na USAID Rwanda.

Inzego zitandukanye zigira aho zihurira n'ubuhinzi mu Rwanda zagaragaje impungenge z'uko urubyiruko rutabwitabira

Umuyobozi ushinzwe Igenamigambi, Ikurikiranabikorwa n'isuzumabikorwa muri Minisiteri y'Ubucuruzi n'Inganda, Munyurangabo Jonas, yagaragaje ko kugeza ubu ubuhinzi bufite 24% by'umusaruro mbumbe w'igihugu

Umuyobozi w'Akarere ka Nyaruguru Wungirije ushinzwe Iterambere ry'Ubukungu, Gashema Janvier, yagarageje ko urubyiruko rukwiye kwinjizwa mu buhinzi

Umuyobozi Mukuru wungirije ushinzwe iterambere ry’ubuhinzi mu Kigo cy’Ubuhinzi n’Ubworozi, Dr Bucagu Charles, yavuze ko ku bufatanye n'izindi nzego bari gukora ibishoboka byose ngo urubyiruko rwinjire mu buhinzi

[email protected]