Author: webrwanda

  • Gasogi United yatandukanye Herron, ihitamo kubika nimero ye imyaka 3 idakoreshwa #rwanda #RwOT

    Ikipe ya Gasogi United yatandukanye n’uminya-Liberia wayikiniraga, Herron Berrian Scarla maze nimero yambaraga barayibika.

    Ku mugoroba w’ejo hashize ku wa Kabiri ni bwo Gasogi United yatangaje ko itazakomezanya n’uyu musore wakinaga mu kibuga hagati wari uyimazemo imyaka 3.

    Iyi kipe kandi yakomeje ivuga ko mu rwego rwo kubaha akazi yabakoreye, nimero 5 yambaraga muri iyi kipe igiye kubikwa mu gihe cy’imyaka 3, nta wundi muntu uzongera kuyambara mbere ya 2025.

    Bati “No 5 yambarwaga na Herron Berrian Scarla izabikwa imyaka 3 nta wundi uyambara mu rwego rwo kumuha icyubahiro.”

    Herron Berrian yinjiye muri Gasogi United 2019 avuye muri Kiyovu Sports, yayisinyiye umwaka umwe ushize iyi kipe imwongerera indi 2 yarangiranye n’umwaka w’imikino wa 2021-22.

    Herron Berrian yatandukanye na Gasogi United

    Source : http://isimbi.rw/siporo/article/gasogi-united-yatandukanye-herron-ihitamo-kubika-nimero-ye-imyaka-3-idakoreshwa

  • I Kigali hateraniye inama yitezweho kwimakaza uburinganire n'impinduka mu gukumira ibyaha mu Karere – #rwanda #RwOT

    Ubusanzwe Umuryango EAPCCO ugizwe n'ibihugu 14, washinzwe mu 1998 hagamijwe gushimangira ubufatanye bwa Polisi zo mu Karere, guhanahana amakuru ku byaha no guhuza amategeko hagamijwe kongerera ubushobozi inzego z'umutekano mu kurwanya ibyaha byambukiranya imipaka.

    Abitabiriye aya mahugurwa y'iminsi itatu mu Rwanda barimo abahagarariye Sudani y'Epfo, Kenya, Eritrea, Djibouti, Seychelles, Sudani, Tanzania na Uganda mu gihe ibindi bihugu nk'u Burundi na RDC bitohereje intumwa zabyo.

    Umuyobozi mukuru wungirije w'Urwego rw'Igihugu rw'Ubugenzacyaha, RIB, Isabelle Karihangabo, yagaragaje ko iyi nama izasiga ibihugu bishashe inzobe mu kurwanya no gukurikirana ibyaha n'ihohoterwa.

    Ati 'Gucunga umutekano muri Afurika y'Iburasirazuba ntabwo ari ibya za guverinoma gusa ahubwo hakenerwa n'abandi bafatanyabikorwa batandukanye mu ishyirwa mu bikorwa rya bimwe mu bigamije gukumira ibyaha.'

    Yavuze ko hagiye kuganirwa uburyo ibihugu byagira imikorere imwe ariko mu buryo bwita no kukubahiriza uburinganire mu nzego zitandukanye.

    Ati 'Haraganirwa uburyo ibihugu byagira imikorere imwe yo gukurikirana ibyaha no kubikumira ariko hibandwa cyane cyane ku bijyanye n'uburinganire ku buryo buri wese yibonamo kandi akitabwaho bikwiye.'

    'Ikivamo ni uko ibihugu byacu bigiye kugira umurongo umwe, bigiye kwigira hamwe inyandiko y'uburyo igihugu cyakurikirana ibyo byaha ariko ari uburyo bumwe kuri ibyo bihugu byose. Ku buryo niba habayeho ibyaha byambukiranya imipaka, mwumvise ko harimo ibyaha by'iterabwoba n'ibindi bihangayikishije sosiyete ibyo bihugu bagira uburyo bumwe bwo kubyumva no kubikurikirana.'

    Yavuze ko bizafasha ibihugu bigize EAPCCO kugira ingamba zihuriweho mu rwego rwo gukumira no kurwanya ibyaha.

    Yagaragaje ko imikoranire n'ibihugu byo mu karere yagize uruhare mu kurwanya ibyaha byambukiranya imipaka birimo itarabwoba, icuruzwa ry'abantu, ibibyobyabwenge n'ibindi.

    Umuyobozi wa EAPCCO, Gedion Kimilu, yavuze ko ibizava muri iyi nama bizagira uruhare mu gukumira ibyaha.

    Ati 'Iyo urebye mu nzego zacu za Polisi usanga harimo ubusumbane…ntabwo dufite mu by'ukuri ubwuzuzanye bukenewe. Iyo ni yo mpamvu turi hano kandi iyo ufite icyuho mu buringanire ku nzego za Polisi n'uburyo bwo gukurikirana ibyaha bigira ingaruka kuri sosiyete.'

    Yavuze ko mu gihe ibihugu byose bigize EAPCCO uko ari 14 byahuriza hamwe imbaraga byagira ingaruka nziza kuko byaba bifite umurongo umwe ku birebana no gukumira ibyaha.

    Umukozi w'Umuryango utari uwa Leta wo muri Afurika y'Epfo akaba n'umujyanama w'Umuryango wa EAPCCO mu gukumira ibyaha, Sean Tait, yagaragaje ko kuba abahagarariye ibihugu byabo bagiye kumara iminsi itatu bishobora kugira impinduka nziza mu mikorere n'imikoranire y'uyu muryango.

    Yavuze ko ibikwiye guhabwa umwanya mu rwego rwo kuzamura no kwimakaza ihame ry'uburinganire mu nzego zishinzwe umutekano hibandwa cyane ku ngingo ebyiri zirimo kugira umubare uhagije w'abagore mu nzego za polisi nka kimwe mu bimaze igihe biganirwaho no gukurikirana kimwe ibyaha hatabayeho kujenjeka ku bikorerwa abagore nk'ihohoterwa n'ibindi.

    Ibihugu bigize Umuryango wa EAPCCO ni u Rwanda, Burundi, Comoros, RDC, Djibouti, Eritrea, Ethiopia, Seychelles, Somalia, Sudani y'Epfo, Uganda, Sudani na Tanzania.

    Kugeza ubu u Rwanda ni kimwe mu bihugu byafunguye amarembo ku bakobwa n'abagore binjira mu nzego z'umutekano nk'igipolisi n'igisirikare.

    Ikibazo cyo kuba abapolisi b'abagore bakiri bake muri izi nzego bishingiye ku kuba hambere barafatwaga nk'abanyantege nke ari nabyo byatumye batitabira kwinjira mu nzego zishinzwe umutekano nubwo hari ibihugu bitanabahaga amahirwe.

    EAPCCO igaragaza ko nk'uko abagore bazamuye imyumvire bagatinyuka guhanganira imyanya ikomeye mu nzego z'ubuyobozi ari na ko bakwiye kurushaho kwitabira kujya mu nzego z'umutekano ngo ibihugu bikomeze kubahiriza ihame ry'uburinganire mu ngeri zose.

    Umuyobozi Mukuru wungirije wa RIB, Isabelle Kalihangabo, yagaragaje ko kwimakaza ihame ry’uburinganire mu nzego z’umutekano by’umwihariko Polisi bikwiye guhabwa umwanya muri EAPCCO

    Umuyobozi wa EAPCCO, Gedeon Kimilu, yavuze biteze gufatira imyanzuro ikomeye muri iyi nama

    Umukozi w'Umuryango utari uwa Leta wo muri Afurika y'Epfo ufatwa nk'umujyanama w'Umuryango wa EAPCCO mu gukumira ibyaha, Sean Tait na Gideon Kamilu uyobora EAPCCO

    Umukozi muri Raoul Wallenberg Institute Chris Muthuri yagaragaje ko hakwiye kugira igikorwa mu kwimakaza ihame ry’uburinganire no mu gukumira ibyaha

    Umuvugizi wa RIB, Dr Murangira B. Thierry, ni we wari umuhuza w’amagambo

    Nyuma y’iki gikorwa hafashwe ifoto y’urwibutso


    Source : http://igihe.com/amakuru/u-rwanda/article/i-kigali-hateraniye-inama-yitezweho-impinduka-mu-gukumira-ibyaha-mu-karere

  • Kina Rwanda yagiranye ubufatanye na Juno Kizi… – #rwanda #RwOT

    Ku wa 11 Kamena 2022, nibwo Juno Kizigenza yashyize hanze iyi ndirimbo yakoranye na Dj Higa ndetse na Dj Rusam. Mu buryo bw'amajwi yanononsowe na Bob Pro, ayandika afatanyije n'umusizi Rumaga.

    Nyuma y'uko kwezi gusatira iyi ndirimbo ayisohoye, uyu muhanzi yagiranye ubufatanye na Kina Rwanda nk'uko byatangajwe kuri uyu wa Kabiri tariki 5 Nyakanga 2022, mu kiganiro n'abanyamakuru cyabereye kuri Norksken muri Kigali.

    Kina Rwanda ni umuryango Nyarwanda ndetse ukorera no mu bindi bihugu, wemera ko gukina ari umusemburo w'iterambere ry'ubukungu n'imibanire mu bantu.

    Guha abana amahirwe yo gukinira mu rugo, ku ishuri ndetse no mu byanya rusange, bituma bizera neza ko abana bose bafite amahirwe yo kugera ku nzozi zabo binyuze mu kunguka ubumenyi babinyujije mu mikino.

    Umuyobozi washinze Kina Rwanda, Malik Shaffy yabwiye itangazamakuru ko bagiranye ubufatanye na Juno Kizigenza nyuma yo gutungurwa n'indirimbo ye 'Aye' irimo ubutumwa bujyanishije neza n'intego yabo, yo gukangurira ababyeyi gufasha abana gukina.

    Ati 'Twebwe nka Kina Rwanda twumvise indirimbo, twumva ni indirimbo irimo ubutumwa dukeneye bijyanye n'ibikorwa dukora n'ukuntu tubikora. Kubera ko ibikorwa byacu byinshi tubikora dukoresheje ubukangurambaga, itangazamakuru, imbuga nkoranyambaga cyangwa se ibinyamakuru bitandukanye twumva y'uko byaba byiza tuganiriye na Juno Kizigenza, iyi ndirimbo ye twayikoresha noneho mu gutanga amakuru atandukanye.'

    Yavuze ko uyu muhanzi azagaragara mu bikorwa bitandukanye birimo na Kina Rwanda Tour, izagera mu Turere dutandukanye tw'u Rwanda.

      

    Kina Rwanda Tour yateguwe kubera umusanzu w'abafatanyabikorwa batandukanye bakora ibijyanye no kwiga binyuze mu mikino, ndetse n'abandi bateza imbere imikurire, imyigire ndetse n' imibereho myiza y'abana.

    Iyi gahunda yo gukina izagera mu tundi turere mu kwezi gutaha yateguwe na Kina Rwanda ifatanyije na UNICEF, ishyirwa mu bikorwa ku bufatanye na Agati Library, Rwanda Girl Guides Association, Kigali Public Library, Mukamira, Winnaz n'abandi.

    Malik Shaffy yavuze ko ari bo bazishyura ifatwa ry'amashusho y'indirimbo 'Aye', kandi bazashyiramo amashusho atandukanye atanga ubutumwa bushishikariza abana gukina imikino itandukanye, nka kimwe mu byabafasha kwiyungura ubumenyi.

    Uyu muyobozi yavuze ko Kina Rwanda ari urubuga rugamije kwigisha Abanyarwanda muri rusange ibijyanye no gukina n'abana.

    Avuga ko muri Kina Rwanda bemera y'uko iyo umwana ari gukina hari byinshi yigiramo. Ati 'Muri Kina Rwanda twemera y'uko iyo umwana ari gukina yigiramo ibintu byinshi, bitandukanye no kumva y'uko gukina ari uguta umwanya nk'uko abantu benshi babitekereza, cyangwa se gukina ari ukwishimisha gusa.'

    Akomeza ati 'Hari ubushakashatsi bwinshi bwagiye bugaragaza y'uko uko abana bakina ariko batera imbaraga… Burya n'iyo umubyeyi ari gukina n'umwana nanone bituma umubyeyi asobanukirwa umwana we neza.'

    Yavuze ko mu gihe cy'imyaka ibiri ishize bamaze bakora, hari byinshi bamaze kugeraho bishimira n'ubwo bagira n'imbogamizi.

    Juno yabwiye INYARWANDA ko yakuze nk'abandi bana, akina nkabo ari nayo mpamvu yagize igitekerezo cyo gukora indirimbo nk'iyi ikangurira abana gukina.

    Avuga ko biturutse ku bushuti afitanye na Dj Higa na Dj Rusam, ari byo byatumye abifashisha muri iyi ndirimbo.

    Uyu muhanzi avuga ko yabanje gufata umwanya wo kumenya ibikorwa bya Kina Rwanda n'intego yabo.

    Ati 'Nanyuzwe n'intego yabo, gukina ariko ukaniga. Naravuze nti ngomba kugira uruhare mu gutuma abana bashishikarira gukina, mbabwira ko gukina bitari ugukina gusa, ahubwo wakuramo n'izindi nyungu. Ushobora gukina uririmba ukavamo umuhanzi nkanjye.'

    Juno avuga ko akunda gukina n'abana, kandi ko kubashishikariza gukina ari wo musanzu we nk'umuhanzi.

    Ikorwa ry'amashusho y'iyi ndirimbo ni umusanzu wa Kina Rwanda

    Malik Shaffy Lizinde ntatangaza amafaranga akenewe azagenda kuri iyi ndirimbo mu ifatwa ry'amashusho, bitewe n'uko buri ndirimbo igira ibiyigendaho.

    Gusa, avuga ko amafaranga yose azakenerwa mu ikorwa ry'iyi ndirimbo biteguye kuyatanga.

    Yavuze ko ubufatanye bagiranye na Juno Kizigenza buzamara igihe kinini, cyane ko Kina Rwanda ari umushinga mugari.

    Akavuga ko bamaze iminsi bakira ubutumwa bw'abantu batandukanye basaba gukorana na Kina Rwanda.

    Yavuze ko iki ari igikorwa cy'Abanyarwanda bashaka ko buri wese yiyumvamo. Juno Kizigenza aramwunganira akavuga ko azakomeza gutanga umusanzu we muri Kina Rwanda.

    Asubiza ikibazo cy'umunyamakuru wa INYARWANDA, Malik Shaffy yavuze ko umuryango Kina Rwanda watangijwe ubwo icyorezo cya Covid-19 cyari cyakajije umurego mu Rwanda.

    Nyuma baza kubona abafatanyabikorwa babafashije gushyira mu bikorwa uyu mushinga ugizwe n'imikino itandukanye ifasha abana.

    Shaffy avuga ko Kina Rwanda imaze kugira uruhare mu kumvisha ababyeyi ko bakwiye kugira uruhare mu gufasha abana gukina.

    Ati 'Impinduka zirahari, ikintu cya mbere tuba dushaka ni uko ababyeyi bumva y'uko bagomba gufata umwanya bagakina. Umubyeyi akumva y'uko ningera mu rugo ndibuze gufata umwanya wo gukina n'umwana wanjye.'

    Mu minsi ishize, umugore wa Prince Charles yasuye ibikorwa bya Kina Rwanda biherereye muri Kigali Public Library.

    Malik Shaffy avuga ko ubwo Camilla yasuraga Kigali Public Library, ari bwo nabo basabwe kujya kugaragaza ibikorwa bya Kina Rwanda. Avuga ko ibi biri mu murongo w'impinduka nziza bari kugenda bageraho.

    Uyu muyobozi avuga ko barajwe ishinga no gutuma ababyeyi bamenya impamvu yo gukina n'abana. Avuga ko ntacyo bisaba kugira ngo umunyarwanda yisange muri Kina Rwanda.

    Malik Shaffy yavuze ko intego za Kina Rwanda ari uko 'Abanyarwanda basobanukirwa muri rusange, basobanukirwa gukina icyo ari cyo bagahana n'umwanya wo gukina n'abana'.

    Avuga ko kugira ngo bagere kuri iyi ntego, bisaba ubufatanye bwa buri wese cyane cyane inzego za Leta zikaba hafi Kina Rwanda.


    Umuryango Kina Rwanda watangaje ubufatanye n'umuhanzi Juno Kizigenza 

    Malik Shaffy Lizinde, uhagarariye Kina Rwanda [Uwa Gatatu uvuye ibumoso] yavuze ko banyuzwe n'ubutumwa bukubiye mu ndirimbo 'Aye' ya Juno Kizigenza 

    Juno Kizigenza avuga ko azakomeza gukorana na Kina Rwanda mu gukangurira abana gukina, kandi azaririmba mu bikorwa bya Kina Rwanda Tour bizakomereza Rubavu 

    Juno avuga ko mu ndirimbo 'Aye' aririmba asobanurira abana ko gukina hari byinshi byamufashije mu iterambere rye

    KANDA HANO WUMVE INDIRIMBO 'AYE' YA JUNO KIZIGENZA YAMUHESHEJE GUKORANA NA KINA RWANDA

     “>

    KANDA HANO UREBE MALIK SHAFFY ASOBANURA UBUFATANYE NA JUNO KIZIGENZA

    “>

    AMAFOTO: Murwanashyaka Abuba

    VIDEO: Iradukunda Jean De Dieu

    Source : https://inyarwanda.com/inkuru/118722/kina-rwanda-yagiranye-ubufatanye-na-juno-kizigenza-nyuma-yo-gukora-indirimbo-ikangurira-ab-118722.html

  • Zozibini Tunzi wabaye Miss Universe nabitabi… – #rwanda #RwOT

    Iri serukiramuco ryahujwe n'Inama Mpuzamahanga MOCA ryasojwe ku wa 2 Nyakanga 2022 mu gitaramo gikomeye Umufaransa La Fouine yakoreye muri Car Free Zone, aho yahuriyemo n'abahanzi barimo Riderman, Afrique, Ariel Wayz, Chris Eazy n'abandi.

    Ryaranzwe n'ibikorwa byo kumurika imideli, ibiganiro bigamije kureba icyakorwa mu guteza imbere Inganda Ndangamuco n'ibindi.

    Miss Zozibini Tunzi ari mu batanze ikiganiro muri iri serukiramuco, aho yibanze ku kwigirira icyizere no gufatirana amahirwe.

    Uyu mukobwa w'imyaka 30 y'amavuko yagize ati 'Icyo nababwira cyo turahagije nk'abari n'abategarugori, nk'abahanzi, nk'abagabo nk’abirabura kandi ntaho duhejwe. Rero nuramuka ugize amahirwe yo kugira aho winjira bikore neza, ugire icyo wigezaho kandi buri hamwe wahagera kandi dufatanije twagera kure.'

    Kuri uyu wa Mbere tariki 4 Nyakanga 2022, Zozibini ari kumwe n'abagize uruhare rukomeye muri iri serukiramuco basuye Urwibutso rwa Jenoside rwa Kigali, basobanurirwa amateka yagejeje u Rwanda mu icuraburindi rya Jenoside yakorewe Abatutsi muri Mata 1994.

    Mu basuye Urwibutso, harimo Raoul Rugamba washinze Hope Agency ari nayo yateguye iri serukiramuco.

    Uretse gusura Urwibutso rwa Kigali, aba bashyitsi barimo Prof. Daniel Ona Ondo bagize n'umwanya wo gutemberera kuri Kigali Cultural Village ku i Rebero mu rwego rwo kureba aho gushora imari.

    Bagiranye kandi ibiganiro n'Umuyobozi Mukuru Wungirije wa RDB, Niyonkuru Zephanie byibanze ku ngingo zijyanye n'ubukungu, ikoranabuhanga mu inganda ndangamuco. 

    Zozibini wabaye Miss Universe 2019 ari kumwe na bagenzi be bitabiriye African in Colors basuye Urwibutso rwa Jenoside rwa Gisozi, bunamira inzirakarengane 

    Umuyobozi Mukuru Wungirije wa RDB, Niyonkuru Zephanie yakiriye kandi agirana ibiganiro n'itsinda ryitabiriye iserukiramuco Africa in Colors 

    Umuyobozi wa Hope Agency yateguye Africa in Colors igahuzwa n'Inama Mpuzamahanga MOCA, Raoul Rugamba 

    Abitabiriye Africa in Colors bagize umwanya wo gutemberera muri Kigali Cultural Village ku i Rebero

    Ibiganiro byibanze ku kurebera hamwe amahirwe ari mu Inganda Ndangamuco n’uko zatezwa imbere

    Source : https://inyarwanda.com/inkuru/118721/zozibini-tunzi-wabaye-miss-universe-nabitabiriye-africa-in-colors-basuye-urwibutso-rwa-jen-118721.html

  • Izuba ryarasiye i Remera! Imyaka 35 irihirits… – #rwanda #RwOT

    Tariki ya 05 Nyakanga 1987, ni bwo uwari Perezida w'u Rwanda, Juvenal Habyarimana, yatashye ku mugaragaro Stade Amahoro yari imaze igihe yubakwa, ndetse ni nacyo kibuga cya mbere gifite ibikorwa remezo bihagije cyari cyubatswe ku butaka bw'u Rwanda icyo gihe.

    Mu gutaha iki kibuga, hakinwe umukino wa nyuma w'irushanwa ryitwaga Trophée President Habyarimana, wahuje Panthères Noir na Mukura Victory Sport, urangira iyi kipe yari iya gisirikare itsinze Mukura igitego 1-0, cyatsinzwe na Napoleon ku mupira mwiza yahawe na murumuna we, Boumbedienne, Panthères yegukana igikombe.

    Uwo munsi byari ibirori bikomeye ku banyarwanda kuko bari batsinze amahanga igitego cy'umutwe, bagira ikibuga cyiza kandi kigezweho, ni igikorwa kandi cyitabiriwe ku buryo bukomeye cyane kuko Stade yari yuzuye abafana ku buryo uwataye urushinge atari kubona uko arutora.

    Kugeza magingo aya iki kibuga kibumbatiye amateka akomeye u Rwanda rufite mu mupira w'amaguru, haba kwitabira igikombe cya Afurika CAN, inshuro imwe rukumbi, Kwegukana irushanwa rya CECAFA 1999, kwitabira igikombe cy'Isi ku ikipe y'igihugu y'abatarengeje imyaka 17, kwitabira irushanwa rya CHAN mu myaka itandukanye ndetse no kugera kure kw'amakipe (Clubs) ahagarariye u Rwanda mu marushanwa mpuzamahanga atandukanye.

    Iki kibuga cyatangiye kuvugururwa, hakaba hagiye kongerwa imyanya yicarwamo ndetse gisanwe neza ku buryo bugezweho, kijye mu ruhando rw'ibibuga byiza muri Afurika.

    Stade Amahoro ni cyo kibuga cy’umupira w’amaguru kigezweho cyubatswe bwa mbere ku butaka bw’u Rwanda

    Iki kibuga cyakiraga abafana bari hejuru gato y’ibihumbi 20, igiye kuvugururwa yongererwe imyanya yicarwamo kugeza ku bafana ibihumbi 45.


    Source : https://inyarwanda.com/inkuru/118719/izuba-ryarasiye-i-remera-imyaka-35-irihiritse-stade-amahoro-ibumbatiye-amateka-akomeye-yum-118719.html

  • Hamuritswe Filime Mbarankuru ku mateka ya Jenoside yakorewe Abatutsi i Mibilizi n'uduce tuyikikije – #rwanda #RwOT

    Iyi filime yamuritswe ku Cyumweru, tariki ya 3 Nyakanga 2022, ku Rwibutso rwa Jenoside yakorewe Abatutsi rwa Kigali ruri ku Gisozi.

    Ni igikorwa cyitabiriwe n'abayobozi mu nzego zitandukanye za Leta, abikorera n'abandi bashyitsi batandukanye.

    Ikozwe mu buryo bwerekana itegurwa n'ishyirwa mu bikorwa rya Jenoside yakorewe Abatutsi muri Paruwasi ya Mibilizi, iya Mushaka no mu tundi duce twayo twabereyemo ubwicanyi bw'indengakamare nka Cyato, Nyakanyinya, Mutimasi, Muhanga , Rango, Ruhoko ahitwaga mu Rusayo hazwi nko kwa Adria , Nyakarenzo, mu Gatandara, Nyarushishi, Kinanira, Runyanzovu, Rubona, Munyinya, Rukunguri n'ahandi.

    Impamvu nyamukuru yatumye iyi filime itegurwa ni uko ibimenyetso bimwe biranga ayo mateka ya Jenoside bisibama uko imyaka igenda, abayazi na bo bakagenda bitaba Imana ntacyo bayavuzeho ngo cyandikwe, kibikwe mu ikoranabuhanga. Ibyo byateye impungenge ko umunsi umwe ayo mateka yazatakaza umwimerere.

    Indi mpamvu kandi ijyanye no kurwanya abahakana n'abagoreka amateka ku nyungu za politiki berekana ko nta Jenoside yabaye cyangwa se ko yatewe n'ihanurwa ry'indege y'uwari umukuru w'igihugu, Juvénal Habyarimana.

    Mu gukora iyi filime kandi hanatekerejwe ku gusigira umurage abari bato n'abari bataravuka batazi amateka y'amarorerwa ya Jenoside.

    Iyi filime yakozwe na 'Ihuriro Mibilizi' yerekana ukuntu umugambi wo gutsemba Abatutsi watangiye kera muri za 1959, 1963, 1973 ukaza gusozwa mu 1990-1994.

    Yerekana ubukana Jenoside yakoranywe, aho abicwaga bamwe batwikiwe mu nzu, abariwe ibice by'umubiri, abajugunywe mu migezi nka Rusizi, abatwikiwe = ku mashuri bigatuma imiryango imwe izima ndetse abarokotse bagasigarana ibikomere n'ihungabana bikabije.

    Iyi filime mbarankuru yubakiye ku buhamya bw'abaganirijwe mu barokotse Jenoside banyuranye barimo abari mu mijyi n'abasigaye aho bari batuye mu 1994.

    Mu kuyitegura, Ihuriro Mibilizi ryahawe uburenganzira rinagirwa inama n'iyari Komisiyo y'Igihugu yo kurwanya Jenoside [ubu inshingano zayo zimuriwe muri MINUBUMWE] n'ubuyobozi bw'Akarere ka Rusizi bwafashije mu bikorwa byabereye by'ikusanyamakuru.

    Mu ijambo rye, uwari uhagarariye Akarere ka Rusizi, Shakimana Bruce, yashimye igikorwa cy'ubwitange n'ubutwari abakoze iyi filime berekanye.

    Yavuze ko bizafasha cyane inzibutso ziri muri Rusizi mu gusobanura neza amateka ya Jenoside yahakorewe.

    Tito Rutaremera yasabye abakoze filime kuyagura, ikongerwamo n'ibyatuma igera ku rwego mpuzamahanga.

    Yashimye abarokotse Jenoside b'i Mibilizi kuba ari bo batangije indirimbo ya mbere mu kwibuka ku rwego rw'igihugu yitwa 'Genda Mibilizi wari Nziza'.

    Yakomeje ati 'Ndabashimira ko ari mwe mwabaye aba mbere mu gushyira hanze na filime mbarankuru ku mateka ya Jenoside yakorewe Abatutsi.''

    Senateri André Twahirwa we yavuze ku macakubiri yaranze umuryango Nyarwanda ugatuma bamwe bicwa abandi bakaba impunzi imyaka irenga 30.

    Yasabye umuryango Nyarwanda kurwanya icyatuma Jenoside n'ibisa na yo byongera kuba mu Rwanda.

    Intumwa ya Minisiteri y'Ubumwe n'Uburere Mboneragihugu (MINUBUMWE), Zakhia Mbabazi, na we yashimye abateguye iyi filime mbarankuru, kuba bararenze akababaro n'ibikormere batewe na Jenoside bagakora igikorwa cy'ubutwari cyo kwivugira amateka babayemo.

    Yibukije ko filimenk'iriya atari 'iy'Abanyamibilizi gusa ahubwo ari umusanzu ku rwego rw'igihugu na MINIBUMWE mu buryo bw'umwihariko'.

    Yavuze ko igikorwa nk'iki gituma ibimenyetso, amakuru y'ingenzi abikwa, aboneraho no gukangurira n'abandi barokotse Jenoside kwigira kuri Mibilizi bakandika, bakavuga amateka yabo.

    Mbabazi yijeje kandi ubuvugizi n'ubujyanama mu gushaka ubufasha mu mirimo isigaye yo kunonosora neza filime mbarankuru no kwandika igitabo cy'amateka ya Jenoside muri Mibilizi no mu nkengero zayo.

    Filime mbarankuru ku mateka ya Mibilizi muri Jenoside igizwe n'amasaha abiri n'iminota 45.

    Ihuriro Mibilizi ryagize uruhare mu ikorwa ryayo rifite intego yo gushyira hanze igitabo gikubiyemo ubuhamya bwose bwatanzwe giteganyijwe kujya hanze mu 2023.

    Abagize iri huriro bashimye Ingabo z'u Rwanda zahagaritse Jenoside yakorewe Abatutsi mu 1994, zikabohora igihugu cyari mu maboko y'ubutegetsi bubi.

    Intumwa ya Minisiteri y'Ubumwe n'Uburere Mboneragihugu (MINUBUMWE), Zakhia Mbabazi, yashimye abateguye iyi filime mbarankuru ku mateka ya Jenoside yakorewe Abatutsi mu 1994

    Senateri André Twahirwa yasabye umuryango Nyarwanda kurwanya icyatuma Jenoside n'ibisa na yo byongera kuba mu Rwanda

    Tito Rutaremera yasabye abakoze filime kuyagura, ikongerwamo n'ibyatuma igera ku rwego mpuzamahanga

    Abantu batandukanye bitabiriye imurikwa rya Filime Mbarankuru ku mateka ya Jenoside yakorewe Abatutsi i Mibilizi no mu duce tuyikikije

    Muri iyi filime mbarankuru hifashishijwemo ubuhamya bw’abarokotse Jenoside, bugaruka ku nzira igoye banyuzemo kugeza barokotse

    Abagize ‘Ihuriro Mibilizi’ bafashe ifoto y’urwibutso bari kumwe n’abayobozi bitabiriye imurikwa ry’iyi filime


    Source : http://igihe.com/amakuru/u-rwanda/article/hamuritswe-filime-mbarankuru-ku-mateka-ya-jenoside-yakorewe-abatutsi-i-mibilizi

  • Kicukiro: Batashye inyubako y’ubucuruzi yuzuye itwaye Miliyari 25 Frw #Rwanda #RwOT via @kigalitoday #rwanda #RwOT

    Ubuyobozi bw’Akarere ka Kicukiro n’abafatanyabikorwa bako, batashye inyubako yazamuwe ahahoze Sonatubes mu Murenge wa Kicukiro. Yitwa Silverback Mall (…)

    Source : https://www.kigalitoday.com/ubukungu/ishoramari/article/kicukiro-batashye-inyubako-y-ubucuruzi-yuzuye-itwaye-miliyari-25-frw

  • Mu Mafoto asaga 100, ihere ijisho ibikorwa byatashywe i Nyaruguru hizihizwa #Kwibohora28 – #rwanda #RwOT

    Iyo sabukuru yizihijwe kuri uyu wa 4 Nyakanga 2022 yitabirwa na Minisitiri w'intebe Dr Ngirente Edouard hamwe n'abandi bayobozi mu nzego nkuru z'igihugu n'inzego z'ibanze, abafatanyabikorwa ndetse n'abaturage.

    Hatashywe n'umuhanda wa kaburimbo Huye-Kibeho-Munini-Ngoma ureshya n'ibilometero 66 watwaye asaga Miliyari 72 n'ibindi bikorwaremezo biwushamikiyeho birimo Ibitaro bya Munini byuzuye bitwaye amafaranga agera kuri Miliyari 9 Frw.

    Hari kandi Umudugudu w'Icyitegererezo wa Munini ( Munini IDP Model Village) ugizwe n'inzu zatujwemo imiryango 48; ishuri rya G.S Munini rifite ibyumba 18 byo kwigiramo, laboratwari ebyiri, icyumba cy'ikoranabuhanga, icyumba cyo kuriramo cyakira abantu 1000, igikoni, ibyumba bitatu byigiramo abana b'incuke.

    Ikigo Mbonezamikurire y'Abana bato cya Munini; Agakiriro; aho gucururiza n'ibindi birimo ubusitani, uturima tw'igikoni, amazi meza, amashanyarazi, imihanda n'ingurane ku baturage. Ibyo bukorwa remezo byose byatwaye asaga miliyari 15 Frw.

    Mu butumwa Minisitiri w'Intebe yatanze, yasabye abaturage gufata neza ibyo bikorwa remezo no kubibyaza umusaruro.

    Ati 'Mu by'ukuri ni impano idakwiye kudupfira ubusa ahubwo ni impano izinganira wa musingo twavuze w'iterambere tumaze kugeraho mu myaka 28 ariko urugamba rw'iterambere nk'uko mubizi ntirurangira ahubwo rurakomeje.'

    Mu mafoto, ihere ijisho ibikorwa byatashywe i Nyaruguru

    Uyu mudugudu w’icyitegererezo wa Munini wubakiwe imiryango itishoboye

    Uyu mudugudu wagenewe imiryango 48 igizwe n'abantu 164 barimo abari bamaze igihe basembera abatagira aho kuba, abafite amacumbi ashaje n'abari batuye mu manegeka

    Urugo mbonezamikurire y’abana rwa Munini rufite ibice bitandukanye

    Urugo mbonezamikurire y’abana rwa Munini rwakira abagera 90

    Urugo mbonezamikurire y’abana bato rwa Munini rwitezweho kurandura imirire mibi mu bana bato

    Urugo mbonezamikurire rwubakiwe abana b’imiryango yatujwe mu mudugudu n’abaturanyi bayo

    Urugo Mbonezamikurire rwa Munini rwitezweho umusaruro mwiza

    Umwe mu bana bo mu rugo mbonezamikurire rwa Munini

    Mu rugo mbonezamikurire y’abana rwa Munini hari imitako itandukanye ikangura ubwonko bw’abana

    Umwana urererwa muri uru rugo mbonezamikurire yitezweho gukurana uburere n’ikinyabupfura

    Umudugudu wa Munini watujwemo imiryango 48 itishoboye

    Umudugudu w'icyitegererezo wa Munini wubakiwe abaturage kugira ngo babe ahantu heza hatekanye kandi bayoboke ibikorwa bibateza imbere

    Mu mudugudu wa Kivugiza hubakiwe imiryango 104 igizwe n'abantu 491

    Bahawe ingurube nziza zitezweo kuzamura iterambere ryabo

    Ibiraro by’ingurube z’abatujwe mu mudugudu

    Abatujwe muri uyu mudugudu basabwe kuwufata neza

    Umwarimu wo GS Munini akurikirana uko umwana akoresha mudasobwa

    Umwarimu ufasha abanyeshuri kubona ibitabo mu isomero rya GS Munini

    Ubukarabiro buri aho abanyeshuri barira

    Ni ishuri rifite inyubako igezweho

    Ni ishuri rifite Laboratwari ifasha abana kwiga neza

    Mu cyumba aho abana bazajya barara

    Mu gikoni aho bazajya batekera bakabika n’ibikoresho byaho

    Minisitiri w’Ubuzima Dr Ngamije na Minisitiri w’Ubutegetsi bw’Igihugu Gatabazi bareba muri mudasobwa z’abanyeshuri muri GS Munini

    Minisitiri w’Ubuhinzi n’Ubworozi, Dr Mukeshimana Gerardine kuri mudasobwa abanyeshuri bigiraho muri GS Munini

    Laboratwari y’iryo shuri irimo ibikoresho byabugenewe

    Kimwe mu byumba byagenewe gufatiramo amafunguro ku ishuri

    Isomero ryahawe abiga ku Rwunge rw’Amashuri rwa Munini

    Ishuri rya GS Munini ryashyizwemo ibikoresho bihagije birimo na mudasobwa

    Ishuri bubakiwe rifite n’ibigega bifata amazi

    Ishuri bubakiwe rifite ibikoresho byiza birimo intebe zo kwicaraho n’ibibaho byo kwandikaho

    Iri shuri ryubatswe mu buryo bugezweho

    Iri shuri rizajya ryigwamo n’abana mu mashuri y’incuke, abanza n’ayisumbuye

    Inzira zihuza ibyumba by’amashuri zimeze neza kandi ziratwikiriye

    Intebe zagenewe abashaka gusomera ibitabo mu isomero rya GS Munini

    Ikigega cya gaz yo gutekesha ku ishuri ryubatswe ku Munini

    Iki kigo cy'ishuri cyubatswe ku Munini kizigamo abana bagera ku 1630 mu mashuri y'incuke, abanza n'ayisumbuye.

    Ibyumba byagenewe ubuyobozi bw’ishuri

    Ibikoresho bitandukanye biboneka muri Laboratwari y’ishuri

    Dr Ngirente yitegereza uko umunyeshuri wo muri GS Munini akoresha mudasobwa

    Dr Ngirente areba mudasobwa zagenewe abanyeshuri muri GS Munini

    Aho abanyeshuri barira naho harateguye kandi hameze neza

    Aho abanyeshuri bicara mu isomero bahawe

    Abiga kuri GS Munini basigaye bakoresha mudasobwa

    Abanyeshuri bubakiwe ikibuga cy’imikino y’intoki imbere mu kigo cy’ishuri

    Abanyeshuri bo kuri GS Munini bagaragaje bimwe mu byo biga

    Abanyeshuri bazajya batekerwa hakoreshejwe gaz

    Abanyeshuri basabwe kwiga bashyizeho umwe

    Ubukarabiro bwo mu Bitaro bya Munini

    Minisitiri w’Ubuzima Dr Ngamije Daniel asobanura uko Ibitaro bya Munini bikora

    Kimwe mu bikorwa remezo bikomeye batashywe ni Ibitaro bya Munini

    Inyubako z’Ibitaro bya Munini zubatse mu buryo bwihariye

    Ibitaro bya Munini ni kimwe mu bigize impano Perezida Kagame yageneye abaturage bo mu Karere ka Nyaruguru

    Ibitaro bya Munini byitezweho kunoza serivise z’ubuzima muri Nyaruguru

    Ibitanda biri mu bitaro bya Munini

    Dr Ngirente yasobanuriwe imitangire ya serivise mu Bitaro bya Munini

    Dr Ngirente mu Bitaro bya Munini ateze amatwi ubusobanuro bw’uko bikora

    Uyu muhanda watwaye asaga Miliyari 72 Frw wahise uba umusingi w'ibindi bikorwa remezo byinshi byubatswe n'ibiri kubakwa

    Umuhanda wa kaburimo mu Karere ka Nyaruguru wahinduye isura yako

    Umuntu avuze ko ku Munini habaye impinduka zikomeye ntiyaba akabije kuko ni ibintu byigaragaza

    Umuhanda wa kaburimbo mu Karere ka Nyaruguru wazanye impinduka

    Umuhanda wa kaburimbo Huye-Kibeho-Munini-Ngoma ureshya n'ibilometero 66.

    Mu marembo ya Nyaruguru ni uko hameze

    Hubatswe n’ibiraro bikomeye ku buryo imodoka zitambuka nta nkomyi

    Hubatswe n’agakiriro gakorerwa imyuga itandukanye n’ubukorikori

    Bakoresheje amakaro mu kurimbisha inzu z’ubucuruzi mu isantere ya Munini

    Inyubako zo mu isantere ya Munini zaravuguruwe zisa neza

    Hubatswe n’agakiriro gakorerwa imyuga itandukanye n’ubukorikori

    Dr Ngirente aganira na Minisitiri w’Ubuzima Dr Ngamije Daniel mu Bitaro bya Munini

    Haganiriwe ku cyakomeza gukorwa ngo abaturage batere imbere kurushaho

    Biyemeje kurushaho kwegera abaturage no kubafasha kubyaza umusaruro ibyo bahabwa

    Bashimye uburyo abana bigishwa neza

    Abayobozi basuye ibiraro by’ingurube zahawe abatujwe mu Mugududu wa Munini

    Abayobozi basabwe gukomeza kuba hafi y’abaturage kugira ngo impano bahawe ibagirire akamaro

    Abaturage bo mu Karere ka Nyaruguru bizihije umunsi wo kwibohora mu byishimo

    Abaturage bo mu Karere ka Nyaruguru bishimiye ibikorwa remezo bahawe n’Umukuru w’Igihugu

    Abaturage bo mu Karere ka Nyaruguru bisimiye ibyo bagezeho

    Abajyanama b’Ubuzima bishimiye ibyiza bikomeje kugezwa iwabo

    Ababyeyi b’i Nyaruguru bari babukereye

    Umuyobozi w’Akarere ka Nyaruguru, Murwanashyaka Emmanuel, yavuze ko hari byinshi bamaze kugeraho mu rwego rwo kwiteza imbere kandi urugendo rwo kwiyubaka barukomeje bafatanyije.

    Perezida w’Urugaga rw’Abikorera mu Ntara y’Amajyepfo Dr Kubumwe Célestin mu bitabiriye uwo munsi

    Ni umunsi witabiriwe n’abarimo inzego z’umutekano

    Ni umunsi witabiriwe n’abarimo Abihayimana

    Musenyeri wa Diyoseze ya Gikongoro, Hakizimana Célestin mu bitabiriye kwizihiza Isabukuru yo Kwibohora kw’Abanyarwanda

    Musenyeri wa Diyoseze ya Butare, Philippe Rukamba yitabiriye kwizihiza isabukuru yo kwibohora mu Karere ka Nyaruguru

    Mu Karere ka Nyaruguru niho hizihirijwe ku nshuro ya 28 umunsi wo kwibohora kw’Abanyarwanda ku rwego rw’igihugu

    Minisitiri w’Ubutegetsi bw’Igihugu Gatabazi Jean Marie Vianney aganira na Minisitiri w’Ibikorwa Remezo Dr Nsabimana Erneste hamwe n’abayobozi mu nzego za Gisirikare

    Minisitiri w’Ibikorwa Remezo Dr Nsabimana Erneste mu bitabiriye uwo munsi

    Martha Ntakirutimana wo mu Murenge wa Ruheru yatanze ubuhamya avuga ko bari mu rugendo rw’iterambere bubakiye ku bikorwa remezo bahawe.

    Minisitiri w’Uburezi Dr Uwamariya Valentine na we yitabiriye kwizihiza isaburu yo kwibohora kw’Abanyarwanda mu Karere ka Nyaruguru

    Minisitiri w’Intebe Dr Ngirente Edouard, yashyikirije abaturage bo mu Karere ka Nyaruguru impano y'ibikorwa remezo bitandukanye bahawe na Perezida Kagame abasaba kuyifata neza

    Amafoto: Munyakuri Prince na Igirubuntu Darcy

    Video: Kazungu Armand

    [email protected]


    Source : http://igihe.com/amakuru/u-rwanda/article/mu-mafoto-asaga-100-ihere-ijisho-ibikorwa-byatashywe-i-nyaruguru-hizihizwa