Author: webrwanda

Kuri uyu wa Kabiri tariki 6 Nzeri, hasubukuwe Shampiyona y’icyiciro cya mbere ‘Rwanda National Primus League’ hakinwa imikino ine ibanziriza indi y’umunsi wa Kabiri, yose yatangiriye rimwe i Saa Cyenda z’Amanywa.

Mu mukino wabereye kuri Stade ya Kigali i Nyamirambo, Gasogi United yakiriye inanganya na Etincelles FC y’ i Rubavu igitego kimwe kuri kimwe, mu mukino warangiye abanya-Rubavu bitotomba.

Etincelles FC itozwa na Bizumuremyi Radjab, yatangiye umukino neza, ibona igitego cyinjijwe na Niyonsenga Ibrahim ku munota wa 18, ari na cyo cyasoje iminota 45 y’igice cya mbere.

Mu gice cya kabiri, Gasogi United yagerageje amashoti menshi ku izamu rya Etincelles, ariko rutahizamu Maxwell Ndoumekou ntiyagaragaza urwego rwiza kuko yahushije uburyo bwinshi bwabazwe.

Ku munota wa 85′ Myugariro wa Etincelles Isaa Papi yagonganye na Niyitegeka Idrissa wa Gasogi United mu rubuga rw’amahina, abasifuzi bose bemeza ko Etincelles FC ihanishwa Penaliti, mu gihe abakinnyi bayo bavugaga ko aho uwa Gasogi United ari we wakoze ikosa.

Herve Ngono Guy yaboneje mu izamu Penaliti, yishyurira Gasogi United igitego yari yatsinzwe, ariko gikomeza kutavugwaho rumwe ku bakinnyi n’abayobozi ba Etincelles FC batashye batanyuzwe.

Abafana ba Gasogi United

Mu wundi mukino, Rwamagana FC yakirira kuri Stade y’Akarere ka Ngoma, yahatsindiwe igitego kimwe ku busa na Rutsiro FC, aho cyinjijwe na rutahizamu Nizeyimana Jean Claude bakunda Kwita ‘Rutsiro’.

Ni nyuma y’uko amakipe yombi yari yatsinzwe ku munsi wa mbere wa Shampiyona, bigaragaza ko Rwamagana FC ishobora gusubira mu cyiciro cya kabiri bidatinze.

Ku rundi ruhande, Stade Ubworoherane ya Musanze FC yakomeje gukomerera Marine FC, kuko kuva aya makipe yombi yabaho, Marine itarakura intsinzi i Musanze na rimwe.

Kuri uyu wa Kabiri, nabwo Musanze FC yatsinze byoroshye Marine ya Rwasamanzi Yves ibitego 3-1, byinjijwe na Ben Ocean, Victor Omondi ndetse na Peter Agblevol.

Kuri Stade ya Golgotha i Nyagatare, ikipe ya Sunrise FC yatengushye abafana bayo, inganya igitego kimwe kuri kimwe (1-1) na Gorilla FC, aho Sunrise yinjirijwe na Rutonesha Hesborn, igitego cyishyuwe na Yves wa Gorilla FC.

Ku mugoroba wo kuwa Kabiri habaye imikino ine mu gihe kuri uyu wa Gatatu hateganijwe umukino umwe uhuriza Kiyovu Sports na Espoir FC kuri Stade ya Kigali i Nyamirambo.

Ejo Kuwa Kane tariki 8, hategerejwe umukino w’umunsi uzahuza Rayon Sports na Police FC ukabera kuri Stade ya Kigali, mu gihe imikino yagombaga guhuza APR FC na Bugesera FC ndetse n’uwa AS Kigali na Mukura VS&L yo yasubitswe, kuko APR na AS Kigali bari kwitegura imikino Nyafurika.

Urubambyingwe rwa Gasogi United

Source : https://inyarwanda.com/inkuru/120707/gasogi-yatsinze-igitego-kitavuzweho-rumwe-rwamagana-ikomeza-nabi-uko-shampiyona-y-u-rwanda-120707.html

Source : https://www.kigalitoday.com/ubuzima/indwara/article/covid19-abantu-3-banduye-babonetse-mu-bipimo-1-970

Bamwe mu baturage bagana ibiro bishinzwe ibikorwaremezo, imiturire n'imikoreshereze y'ubutaka (One Stop Center) mu Karere ka Muhanga, baravuga ko bibasaba gutegereza igihe kirekire kugirango bahabwe serivisi zijyanye n'ibyangombwa. Bavuga ko imvano ya byose ari ihagarikwa rya bamwe mu bakozi bakoreraga ku masezerano y'akazi.

Mugemana Narcisse, umwe mu baturage utishimiye itangwa rya Serivisi muri ibi biro, avuga ko yasabye icyangombwa cyo guhinduza icyo ubutaka bwagenewe gukoreshwa, akirukanswa hafi ukwezi kose abwirwa ko ushinzwe kumuha icyangombwa ntawuhari.

Yagize ati' Twasabye ibyangombwa duhinduza icyo ubutaka bwemerewe gukoreshwa ariko biratangaje kubona mara ukwezi kurenga ngisabye, bahora bambwira ko uzakimpa adahari ngo nintegereze'.

Rukundo Safari Dieudonne, avuga ko yagabanyije isambu ye kugirango buri mwana abone ubutaka bwe, ariko ngo iyo ageze mu biro bamubwira ko serivisi ashaka uwakagombye kuyimuha adahari yahagaritswe mu kazi.

Yagize ati' Twasabye ko tugabanywa ubutaka bwacu maze buri wese agahabwa icyangombwa cye ariko iyo ugezeyo usanga nta bakozi bahari. Bambwiye ko uzampa serivisi adahari kandi twebwe duhora dusiragizwa, amakuru akavuga ko bahagaritse bamwe mu bakozi'.

Mukankiko Sperancia, avuga ko n'ubusanzwe serivisi zatangirwaga muri ibi biro zari zisanzwe zikemangwa kubera ruswa zivugwamo akavuga ko bishoboka ko aba bakozi bahagaritswe kubera ayo makuru avugwa.

Umuyobozi w'Ishami ry'Ibikorwaremezo, Imiturire n'Imikoreshereze y'Ubutaka, Eng Nzabonimpa Onesphore avuga ko icyuho kigaragara cyane. Ahamya kandi ko n'aba bakozi batongerewe amasezerano batarayahagarikirwa hari ibibazo by'abakozi kuko nk'ubu ngo bakagombye kuba bafite amakozi 17 none hari abakozi 5 gusa.

Yagize ati' Dufite icyuho mu bakozi kuko hari abakozi 3 baherutse guhagarikirwa amasezerano y'akazi, ariko bataranayahagarikirwa n'ubundi twari dufite icyuho ariko noneho byariyongereye cyane. Twakagambonye kugira abakozi 17 ariko nk'umujyi ukura kandi wegereye Kigali mu mpapuro twakagombye kuba dufite 24, ubu rero dufite abakozi hagati ya 5 n'u 8 ariko hari abakoze ibizamini nibaza icyuho kizagabanuka'.

Umuyobozi w'Akarere wungirije ushinzwe Iterambere ry'Ubukungu mu karere ka Muhanga, Bizimana Eric avuga ko aba bakozi koko bahagarikiwe amasezerano ndetse hari hashyizweho gahunda y'uko mu gihe aba bakozi batangaga serivisi bataraboneka hazajya hiyambazwa abakozi bo mu turere twa Ruhango na Kamonyi bagafasha mu gutanga izi serivisi abaturage baba basabye.

Akimana Jean de Dieu

Source : https://www.intyoza.com/2022/09/07/muhanga-bamwe-mu-bagana-ibiro-byubutaka-baranenga-serivisi-barimo-guhabwa/

Ibyo benshi bafataga nk'inzozi byarangiye mu ijoro ryo ku wa 3 Nzeri 2022 biba impamo ubwo kuri Chillax Lounge i Nyarutarama, abayobozi batandukanye bagaragaje impano zabo mu kuvanga imiziki.

Aba-Djs bari bateguwe barimo Umuyobozi wa Banki ya Kigali, Dr Diane Karusisi wari DJ BK, Clare Akamanzi wa RDB yari Dj VisitRwanda, Umunyemari Sina Gerard ari Dj Akabanga, Kampeta Sayinzoga wa BRD yagizwe Dj Kampz, Arthur Asiimwe uyobora RBA yiswe Dj Hafiyawe na Julienne Oyler wa Inkomoko wiswe Dj Jupac.

Ibi birori byari bitandukanye cyane n'ibindi ushobora kuba waritabiriye birimo abayobozi bo ku rwego rwo hejuru kuko akenshi wasangaga bicaye mu myanya y'icyubahiro bari gususurutswa.

Binyuze mu gikorwa cyiswe 'Battle of the Djs' bagiye bashyirwa mu matsinda y'abantu babiri, bagacurangira abatabiriye ibirori ukunzwe cyane akaba atsinze undi.

Itsinda rya mbere ryari rigizwe na Dj BK na Dj Akabanga, irya kabiri ryari irya Dj Hafiyawe na Dj Jupac naho iryagiyeho nyuma ni irya Dj VisitRwanda na Dj Kampz.

— Dj BK yemeje abantu muri 'Buga Dance'

Irushanwa ryo guhanganisha aba-djs ''Battle of the Djs'', ryatangiye hacuranga Dj BK, Dr. Diane Karusisi uyobora Banki ya Kigali. Yinjije neza mu mwuka wo kubyina abari bategerezanyije amatsiko iki gikorwa.

Yatangiye acuranga 'In Da Club ya 50 Cent', abantu bose amaboko bayashyira mu bicu akabyiniro aba aragafunguye. Yakomereje ku zindi ndirimbo zo mu bihe byo hambere nka 'No Diggity' ya Blackstreet, Dr. Dre na Queen Pen.

Bidatinze yahise ashyiramo izigezweho nka 'Particula' ya Major Lazer yafatanyije na Dj Maphorisa, Nasty C, Ice Prince, Patoranking na Jidenna.

Dj BK yiyeretse abafana be bya nyabo ubwo hajyagamo 'Buga' ya Kizz Daniel na Tekno, mugani w'abubu yahatwitse. Iyi ndirimbo iri mu zikunzwe yabyinwe na bose ndetse Karusisi aratungurana abyina 'Buga Dance' babyina bamanuka bazamuka, abari aho hose bati 'aratwemeje'.

— Dj Akabanga, kwamamaza ntiyari kubitangwa

Umunyemari Sina Gerard ubwo yageraga ku rubyiniro mu minota icumi bahaga buri muntu yabanje indirimbo itaka urusenda rwe Akabanga, abantu bose batera induru hejuru.

Yakomeje mu ndirimbo zabyinwe mu myaka yo hambere abatari urubyiruko bari bitabiriye ibi birori abashyira mu birere mu ndirimbo nka 'Vuli Ndlela' ya Brenda Fassie, 'Tinda Tine' ya Mariam n'izindi.

Uko byagaragaye Dj Akabanga yari yateguye kuko kubanzamo Akabanga byatumye abafana bakomeza kwishima kugeza iminota ye irangiye.

— Dj Jupac yari yateguye bigeze mu kuririmba arigaragaza

Mu muhango wo Kwita Izina wabaye ku wa 2 Nzeri 2022, hasohotse amashusho ya Julienne Oyler uyobora Inkomoko ari kubyina 'Umuriro Watse' ya King James mu Kinigi, bigaragara ko imyiteguro yayitangiye kare.

Dj Jupac ubwo umwanya we wageraga yagaragaje itandukaniro asusurutsa abantu biratinda. Nta muntu ushobora guhakana ko yari yateguye kuko yazanye n'imyenda itandukanye yo kujyana 'stage'.

Ubwo yari mu birori bisanzwe yari yambaye umupira wa Inkomoko ariko ahamagawe mu kurushanwa yabanje kuririmba ajya hasi mu bafana yambaye umupira uriho ifoto ya 2Pac, anaririmba indirimbo y'uyu muhanzi yise 'Changes'.

Yaririmbye karahava abonye ko abari inyuma batari kumureba neza afata intebe ahagaraho ngo bose baririmbane bamureba ahirengeye.

Yakomeje ajya kuvanga imiziki ari nako abyina, aha naho yahise ahindura imyenda yambara umupira wo muri House of Tayo.

Mu kuvanga imiziki yuriye hejuru kugira ngo buri wese amubone ashyiramo indirimbo zitandukanye nka 'Lambadina' ya Teddy Afro.

— Inana yazamuriye Dj Hafiyawe amanota

Uwabonye uko Dj Hafiyawe yavanze akajya acishamo akanyuka umuziki ntawe ushobora guhakana ko ibi ari ibintu asanzwe yiyumvamo kandi akunda kuko yagaragaje ubuhanga.

Imbyino zigezweho ni zo zamuranze mu kuvanga imiziki wumvaga ko yayitondeye ubwo yayihitagamo, yabanje kwibanda ku imaze iminsi yiganjemo iri mu jyana ya 'Reggae'.

Byafashe indi ntera ubwo yashyiragamo Inana ya Chriss Easy, iyi ni imwe mu ndirimbo zidashobora kubura mu birori mu Rwanda, aha niho yahise yigarurira abitabiriye ibi birori.

— Dj VisitRwanda in the house

Clare Akamanzi wari Dj VisitRwanda na we yari yateguye cyane kuko byagaragaye ubwo yageraga ahagombaga kubera ibirori yambaye ishati yanditseho 'Dj VisitRwanda'.

Yongeye gutungurana ubwo yageraga ku rubyiniro ati 'Dj VisitRwanda in the house' imvugo isanzwe ikoreshwa n'abavanga imiziki babigize umwuga, abafana bose bahise bazamura amaboko mu kumwakira.

Uyu ni umwe mu ba-Djs bacuranze cyane indirimbo z'abahanzi bo mu Rwanda, nka 'Katerina' ya Bruce Melody, 'Tuza' ya Mike Kayihura. Yanabyinishije abari aho mu ndirimbo zigezweho nka 'Buga' ya Kizz Daniel na Tekno, 'Dior' ya Ruger n'izindi.

— Dj Kampz yazanye 'Vibes'

Kwemera ko aba bayobozi bumva umuziki byari byarangiye gusa Dj Kampz [Kampeta Sayinzoga uyobora BRD], yazanye imbaraga zitandukanye n'abandi.

Dj Kampz ku rubyiniro yahajyanye imbaraga haba mu kubyina no gucuranga indirimbo z'abanyabirori ba nyabo. Ibi ni byo abasanzwe bazi iby'ibirori bita kugira 'Vibes' cyangwa se imbaraga zidasanzwe ku rubyiniro.

Uyu abamuteye ijisho kuva kare babibonaga ko yateguye kuko yari yambaye neza yashyizeho n'ingofero.

Yacuranze indirimbo zitandukanye z'abanyabirori birangira avuye aho bacurangiraga afata indangururamajwi ajya hejuru aho buri wese amureba atangira kubashyushya ari na ko abyina ubona ko asanzwe abizi atari ibyo yize ako kanya.

Mu ndirimbo yabyinanye n'abafana be harimo 'Who's That Girl' ya Eve na 'Pon de Replay' ya Rihanna n'izindi.

Yafashe imitima y'abantu bugwate ubwo ashyiragamo 'Twaje' ya Yvan Buravan, uheruka kwitaba Imana abyina amaraba ndetse avuga ko bakwiye kumwibuka. Yasoreje ku ndirimbo 'Garagaza', na yo y'uyu muhanzi.

Aba ba-Djs buri wese yahawe iminota icumi ashimisha abari bitabiriye ibi birori gusa bagiye bunganirwa n'abavanga imiziki babigizwe umwuga nka Dj Bissoso.

Inkomoko yavuze ko yateguye iki gikorwa cy'aba-Djs mu kwizihiza imyaka 10 y'ibyiza yagezeho, cyane ifatanyije n'aba bayobozi b'ibigo bitandukanye batasibye kuyiba hafi mu gihe imaze ikorera ku butaka bw'u Rwanda.

Source : https://umuryango.rw/imyidagaduro/article/amafoto-abayobozi-bakuru-bavanze-imiziki-bishimirwa-na-benshi

Papa Yohani Pawulo I, wategetse Kiliziya Gatolika iminsi 33 gusa mu 1978, Vatican yamushyize mu rwego rw'abahire — intambwe ya nyuma mbere yo kugirwa umutagatifu.

Abantu ibihumbi bari bakoraniye ku rubuga rwa Mutagatifu Petero i Vatican muri uwo muhango wari ukuriwe na Papa Francis.

Umwaka ushize, Papa Francis yavuze ko uyu Pawulo I ari we wakijije mu buryo bw'igitangaza umukobwa wo muri Argentine, igihugu Francis akomokamo.

Igitangaza cya kabiri nicyo gisigaye kumwitirirwa kugira ngo agirwe umutagatifu.

Yohani Pawulo I uhabwa akazina ka 'Papa useka' niwe wamaze igihe gito ku butegetsi bwa Kiliziya kuva mu 1605.

Muri iyo minsi yamazeho, yahagaze ku cyemezo cya Kiliziya cyo kudashyigikira gukuramo inda no kuboneza imbyaro, ariko anaharanira impinduka muri kiliziya no kuranduramo ruswa.

Yohani Pawulo I yapfuye yishwe n'uburwayi bw'umutima tariki 28 Nzeri(9) mu 1978.

Ariko urupfu rwe rwateje impaka — n'inkuru zidafite ibihamya — kubera ko urupfu rwe rwavuzwe ugutandukanye.

Vatican yavuze ko ababikira babiri ari bo bamusanze yapfuye.

Gusa mbere, Vatican yari yavuze ko umupadiri ari we wamugezeho mbere yapfuye — nabwo bagorwa no gusobanura uko abagore bageze mu cyumba bwite cya Papa.

Kugira ngo umuntu agirwe umuhire, hagomba kuba igitangaza kitirirwa amasengesho ye nyuma y'urupfu rwe.

Igitangaza cyitiwe uyu mugabo ni ugukira k'umukobwa w'imyaka 11 nyuma y'uko ababyeyi be bari batuye amasengesho yabo Yohani Pawulo I

Mu myaka 1,000 ishize, abapapa umunani nibo gusa bagizwe abatagatifu.
BBC

Source : https://umuryango.rw/amakuru/mu-mahanga/politiki/article/umu-papa-wategetse-kiliziya-iminsi-33-yagizwe-umuhire-yahoraga-yisekera

Igipolisi muri Canada cyatangaje ko abantu 10 bishwe batewe ibyuma mu duce 13 mu byiciro bibiri gusa, ahitwa mu mugi wa Saskatchewan uhana imbibe na Leta zunze ubumwe za Amerika.

Usibye aba bishwe ,kuri ubu ngo abanda bagera kuri 15 nabo bajyanwe mu bitaro nyuma yo kubasanga batewe ibyuma ariko batarashiramo umwuka.

Amakuru ava mu perereza ryambere avuga ko abagizi ba nabi bateraguye ibyuma abantu nta gutoronya.icyakora igipolisi ntikiratangaza icyaba cyateye abo bagizi banabi kwitwara gutyo.

Babiri bakekwa kuba inyuma y'ubwo bwicanyi baracyashakishwa na polisi ariko kugeza ubu ntirabasha kumenya neza irengero ryabo.

Bivugwa ko abaguye muri icyo gitero bari bagiye kureba umukino wa Football ngaruka mwaka wahuzaga amakipe ya Roughriders na Winnipeg Blue Bombers ahitwa Regina nk'umurwa mu kuru w'iyo ntara.

Source : https://umuryango.rw/amakuru/mu-mahanga/umutekano/article/canada-igitero-cyitwaje-intwaro-gakondo-cyahitanye-10-gikomeretsa-15

Source : https://www.kigalitoday.com/amakuru/amakuru-mu-rwanda/article/perezida-kagame-yakiriye-mugenzi-we-wa-zimbabwe

Minisitiri w'Intebe, Dr Edouard Ngirente yahahamagariye ibihugu bya Afurika kongera ishoramari mu bikorwaremezo by'ubuhinzi n'ubworozi kugira ngo uyu mugabane ubashe kwihaza mu biribwa.

Ibi yabigarutseho nama y'ihuriro mpuzamahanga ku iterambere ry'ubuhinzi muri Afurika, AGRF, ibera i Kigali kuva kuri uyu wa Kabiri 'AGRF', iteraniye  i Kigali kuva kuri uyu wa mbere tariki 5 Nzeri 2022.

Ikibazo cy'ibiribwa bidahagije ku mugabane wa Afurika n'uburyo gishobora gukemuka uyu mugabane ukihaza ndetse ugasagurira amasoko niryo ni cyo kiri kugarukwaho cyane muri iyi nama.

Minisitiri w'Intebe yavuze ko 'Gukemura ikibazo cy'ibiribwa bidahagije muri Afurika bigomba gutangirana no kugabanya umusaruro w'ibiribwa wangirika udakoreshejwe, ubarirwa hagati ya 30% na 40% by'umusaruro wose mu bihugu bikiri mu nzira y'amajyambere, ikoreshwa ry'ifumbire n'imbuto za kijyambere ndetse n'ikoranabuhanga mu buhinzi bizubaka ubudahangarwa bw'urwego rw'ibiribwa.'

Yakomeje avuga ko kugira ngo ibi bigerweho bisaba ko hubakwa ubufatanye buhamye hagati ya leta n'abikorera.

Uwahoze ari minisitiri w'intebe wa Ethiopia, Hailemariam Desalegn yavuze ko 'Turi mu gihe aho dukeneye ibikorwa bifatika mu buryo bwihuse kubera ko tutagize icyo dukora buri munota byibura umuntu umwe ukuze, abana babiri ndetse n'abagore babiri bajya munsi y'umurongo w'ubukene kubera inzara n'imirire mibi. Ntabwo dukwiye gutegereza, dukeneye ibikorwa bifatika kuko ibibazo turimo guhura nabyo birasaba ubuyobozi buhamye kandi buhanga ibishya, bugahuza ibikorwa bukongerera imbaraga inzego kandi bugatanga umusaruro hose.'

Perezida w'ihuriro mpuzamahanga rishinzwe iterambere ry'ubuhinzi muri Afurika, AGRAA, Dr. Agnes Kalibata we yavuze ko umugabane wa Afurika ufite amahirwe akomeye ukwiye kubyaza umusaruro bityo ntukomeze gutakaza amafaranga ujya kugura ibiribwa mu mahanga.

Iyi nama y'ihuriro mpuzamahanga ku iterambere ry'ubuhinzi muri Afurika ibaye ku nshuro ya 12, nyuma yuko yari imaze igihe itaba bitewe n'icyorezo cya Covid-19. Yitabiriwe nababarirwa mu bihumbi baturutse hirya no hino ku isi barimo abanyacyubahiro nk' abakuru b'ibihugu, abafasha b'abakuru b'ibihugu ndetse n'abafatanyabikorwa batandukanye bari mu rwego rw'iterambere ry'ubuhinzin'ubworozi. biteganyijwe ko izamara iminsi 5.

[email protected]

 

 

The post U Rwanda rwahamagariye Afurika kongera ishoramari mu bikorwaremezo by'ubuhinzi n'ubworozi appeared first on IRIBA NEWS.

Source : https://iribanews.rw/2022/09/06/u-rwanda-rwahamagariye-afurika-kongera-ishoramari-mu-bikorwaremezo-byubuhinzi-nubworozi/

Urukiko rw'Ikirenga rwa Kenya uyu munsi ruratangaza umwanzuro warwo ku birego byatanzwe ku matora ya perezida yo mu kwezi gushize.

Kuwa gatanu, abacamanza barindwi b'uru rukiko bagiye kwiherera kugira ngo bafate umwanzuro wabo nyuma y'iminsi itatu bumva impande zareze n'izarezwe.

Raila Odinga — umukandida watsinzwe — avuga ko amatora yabayemo uburiganya hifashishijwe ikoranabuhanga ngo bigeze ku nstinzi mukeba we William Ruto.

Abanyamategeko ba Ruto n'aba komisiyo y'amatora bahakanye ibi birego.

Iyi ni inshuro ya gatatu Odinga aregeye urukiko yamagana ibyavuye mu mtora.

Mu myaka itanu ishize uru rukiko rwakoze amateka rutesha agaciro ibyavuye mu matora rutegeka ko haba andi, Odinga wari wareze ariko yanze kuyitabira.

Ruto na Odinga bavuze ko bazemera umwanzuro w'uru rukiko ku mpaka zo kuri aya matora.

Abacamanza barashingira umwanzuro wabo ku bintu icyenda byatanzwe nk'impamvu z'abarega.

Abasesenguzi bavuga ko, bitandukanye n'izindi manza, uru rugoye gucyeka ibiruvamo.

Inzobere mu mategeko zo ziravuga ko hari ibintu bitatu bishoboka kuva muri aba bacamanza.

Ko bashobora kwemeza ibyavuye mu matora ko Ruto ari we watsinze, gusesa aya matora bagategeka ko haba andi, cyangwa guha intsinzi uwatanze ikirego, Raila Odinga.

Umwanzuro w'uru rukiko uteganyijwe none kuwa mbere ushobora guhindura ishusho ya politiki ya Kenya no kuba intango y'ivugurura ry'amategeko agenga amatora.

Hagati aho, umutekano wakajijwe ku mihanda yegereye uru rukiko mu murwa mukuru Nairobi, ndetse ntabwo ibinyabiziga byemerewe kuhanyura.

Umukuru wa polisi ya Kenya yasabye rubanda gukurikira itangazwa ry'imyanzuro y'uru rukiko kuri za televiziyo bari mu ngo zabo.

BBC

Source : https://umuryango.rw/amakuru/mu-mahanga/politiki/article/kenya-urukiko-ruratangaza-umwanzuro-ku-mpaka-za-ruto-na-raila

Mu butumwa yanyujije kuri Konti ye ya  Instagram, Bazongere Rosine yagize ati: “Nyiri iyi numero ‘+255767663344’ akomeje kwandikira  abantu batandukanye  abasaba amafaranga….”.

Nyuma yo gutambutsa ubu butumwa akabumenyesha (Tag) Rwanda National Police na RIB , Rosine yatangaje ko ahangayikishijwe n’uyu muntu ukomeje kuganira n’abantu batandukanye mu ishusho ye avuga ko biteye inkeke, gusa aburira buri wese kutagira uwo yemerera kuyobywa ngo atange amafaranga abwirwa ko ari kumufasha.

Nk’uko bigaragara  mu butumwa bwageze kuri Rosine, mu kiganiro uyu muntu yagiranye n’umwe mubo yayobeje yagerageje kumwereka ko ari Rosine wa nyawe, kandi ko afite ikibazo ashaka ko yaba amugurije amafaranga maze akazamwishyura nyuma.

Bazongere Rosine yabwiye InyaRwanda.com ko ahangayikishijwe n’uyu muntu gusa avuga uwo ari we wese azafatwa. Ati “Uyu muntu arampangayikishije kandi urabona ko agerageza kuganiriza (Chat) abantu banzi, akabaka amafaranga. Rero namubwira ko isaha n’isaha azafatwa, gusa icyo nasaba abanyarwanda kimwe n’abandi  bose ni ukwigengesera cyane, ntihagire ubashuka kuko sinjye rwose. Njye nta kibazo mfite kandi ntabwo ndi kwaka amafaranga”.

NGUBWO UBUTUMWA BWE AGANIRIZA ABANTU 

Source : https://inyarwanda.com/inkuru/120692/bazongere-rosine-yikomye-umuntu-ukomeje-kumwiyitirira-akaganira-ninshuti-ze-azisaba-amafar-120692.html