Author: webrwanda

Cristiano Ronaldo yavuze ko ari umugabo mwiza ubwo yabazwaga ku byerekeye gusohoka kwe muri Manchester United.

Uyu munya Portugal w'icyamamare yasohotse muri Man United nyuma y'ikiganiro yakoranye n'umunyamakuru,Piers Morgan.

Amezi ye ya nyuma muri Man United yaranzwe n'ibibazo birimo kubura umwanya wo gukina kubera ko umutoza Erik ten Hag yamwimye umwanya.

Ronaldo yanze kwinjira mu kibuga asimbuye mu mukino wa Tottenham mbere y'uko aganira na Morgan.

Muri icyo kiganiro yibasiye umutoza we Ten Hag na ba nyiri ikipe byatumye asabwa ko basesa amasezerano.

Uyu yahise yerekeza mu ikipe yo muri Saudi Arabia, Al Nassr yamwemereye kuzajya imuhemba akayabo ka miliyoni 173 z'amapawundi ku mwaka.

Ronaldo yongeye kugaruka mu bihe byiza atsinda ibitego icyenda mu mikino umunani ye ya mbere muri shampiyona ya Saudi Pro League.

Ronaldo uri mu ikipe ya Portugal,yagiranye ikiganiro n'abanyamakuru aho yagarutse ku bihe bya nyuma muri Man United no gutandukana nayo.

Yagize ati “Rimwe na rimwe uba ugomba guca mu bintu kugira ngo urebe uri ku ruhande rwawe.

Nta kibazo cyo kuvuga mfite,nagize igihe kibi mu mwuga wanjye,ariko nta gihe cyo kwicuza.

Ubuzima burakomeza waba umeze neza cyangwa nabi,ni bimwe mu bigize gukura kwanjye.

Iyo turi ku gasongero ku musozi,hari ubwo tutabasha kureba hasi.Ubu nditeguye cyane kandi nize ko byari ingenzi kuko sinigeze nyura mu byo naciyemo mu mezi ashize.

Ubu ndi umugabo mwiza.”

Ronaldo yaherukaga kuvuga ko kuva kuri Old Trafford ari inkuru yafunzwe.

Portugal ya Ronaldo irakina imikino ibiri yo gushaka itike ya Euro aho irakina na Lichtenstein hanyuma bazakine na Luxembourg.

Source : https://umuryango.rw/imyidagaduro/imikino/article/cristiano-ronaldo-yavuze-amagambo-akomeye-abajijwe-ku-kuva-muri-man-united

Muri iki gitondo cyo kuri uyu wa Kane tariki ya 23 Werurwe 2023, nibwo uyu muhanzi yasangije abamukurikira amafoto ateruye umwana we Myla Ngabo arikumwe na Mama we mu byishimo byinshi ,maze agira ati' Imana yampaye umufasha mwiza , mba mu ijuru rito'.

Aya mafoto yakuruye amarangamutima ku mbuga nkoranyambaga, arimo nay'uwitwa Anitha Pendo wishimiye cyane uyu mwana .

Myla Ngabo niyo mazina yiswe n'ababyeyi be, ndetse uyu mwana akaba yarerekanye igikundiro cyinshi ubwo yagera ku isi.

Myla wujuje umwaka umwe w'amavuko

Tariki 22 Werurwe 2022 nibwo umuryango wa Ngabo Medard Jobert na Mimi Mehfra bibarutse umwana w'umukobwa.

Muri Gicurasi 2021 nibwo Ngabo Médard Jobert ndetse na Mimi Mehfira ukomoka muri Ethiopia barushinze, nyuma y'igihe kinini bakundana.

Aba bombi ibirori by'ubukwe bwabo byabereye muri Dallas muri Leta Zunze Ubumwe za Amerika ku wa Gatandatu tariki 22 Gicurasi 2021, byitabirwa na benshi mu byamamare mu Rwanda barimo King James, K8 Kavuyo, Shaffy, The Ben wanaririmbiye abageni, Adrien Misigaro, Miss Grace Bahati n'abandi.

Meddy yerekanye amwe mu mafoto yaranze ibirori byo kwizihiza isabukuru y'amavuko y'imfura ye Na Mimi

Urukundo rwa Meddy na Mimi rwatangiye kuvugwa mu itangazamakuru kuva muri Kanama 2017.

Muri Kanama 2018, Mimi kwiyumanganya byaranze maze asuka hanze amarangamutima ye, yifuriza isabukuru uyu muhanzi.

Icyo gihe yashyize kuri Instagram ifoto ari kumwe na Meddy, ayiherekeza amagambo y'Ikinyarwanda amubwira ati 'Mutima wanjye, ndagukunda', arangije ashyiraho utumenyetso tw'umutima.

Source : https://umuryango.rw/imyidagaduro/article/bwa-mbere-meddy-yerekanye-usura-y-umwana-we-izamura-amarangamutima-ya-benshi

Abategetsi ba leta zunze ubumwe za Amerika basubije muri Texas abimukira bafashwe bagerageza kwinjira muri Canada baciye mu nzira zitazwi.

Urwego rw'iki gihugu rushinzwe abinjira n'abasohoka rwavuze ko abimukira babarirwa mu 100 batwawe indege 2 z'Amerika , abo bose bafatiwe I Plattsburgh ihana imbibe na Canada.

Minisitiri w'intebe muri Canada, Justin Trudeau, yavuze ko ari buze kuganira na Prezida Joe Biden i Ottawa ku kibazo cy'abimukira uyu munsi n'ejo.

Inzego z'umutekano ku mipaka y'America zimanze gufata abandi bimukira bakabakaba 3000 binjira muri America bavuye muri Canada mu buryo butemewe n'amategeko mu mezi atanu kuva mu kwezi kwa 10/ 2022.

VOA

Source : https://umuryango.rw/amakuru/mu-mahanga/umutekano/article/amerika-yakumiriye-abimukira-nk-icyorezo-isubizayo-abagerageje-kwinjira-muri

Ibaruwa DANI Alves yandikiye umugore we ushaka ko batandukana yashyizwe ahagaragara mu gihe we akomeje gufungwa nyuma y'ibirego bivugwa ko yasambanyije umugore mu kabyiniro ku ngufu.

Uyu mukinnyi wahoze akinira FC Barcelona yandikiye ibaruwa ivuye ku mutima uyu wahoze ari umugore we Joana Sanz w'imyaka 29, ari muri gereza ya Brian 2 aho afungiye ashinjwa icyaha cyo gufata ku ngufu.

Yagize ati “Mukundwa Joana,hashize imyaka umunani yuzuye urukundo,kwitanaho,kubahana no guhana ibyishimo.

imyaka yashize ku ruhande rwawe ibintu byose byasaga nk'ibyoroshye kandi bishimishije.

“Wowe n'abana banjye, Dani Filho na Victoria, ni cyo kintu cyiza cyambayeho mu buzima bwanjye.

“Twakuriye hamwe kuva umunsi twahuye, kuva ku munota wa mbere twatangiriye ubuzima hamwe.

“Muri iyo myaka yose twarafatanyije,turakomezanya buri wese yita ku buzima bwa mugenzi we.

“Ubu, muri ibi bihe bitoroshye,mbabajwe n'icyemezo cyawe kandi ndifuza ko ubuzima bwampa andi mahirwe yo kongera kugukunda.

“Ndumva ububabare ibintu bitari byo turimo byaguteye kandi ndumva ko udashoboye kwihanganira igitutu cyose.

“Ibintu ndegwa ntibisanzwe kuri njye, no ku ndangagaciro zayoboye ubuzima bwanjye: urukundo, kubahana n'imbaraga.

“Nzakomeza kurwana nk'uko nahoze mbikora, nshyigikiwe n'abari iruhande rwanjye kugira ngo nereke isi yose ko ndi umwere.

“Nzarwana kugeza ku ndunduro bitewe n'urukundo rutagira akagero rw'abana banjye, ababyeyi banjye ndetse n'abakomeje kumba iruhande, kugira ngo mpamye ko ndi umwere ku isi yose.”

Dani Alves yemereye urukiko ko yaryamanye n'uyu mukobwa babyumvikanyeho ariko atamufashe ku ngufu nkuko abishinjwa.

Ntabwo haramenyekana igihe urubanza rwe ruzabera.

Source : https://umuryango.rw/imyidagaduro/imikino/article/dani-alves-ushinjwa-gufata-ku-ngufu-yandikiye-ibaruwa-ikomeye-umugore-we-ushaka

Umuhanga Adrian Mehic wakoreye ubushakashatsi muri Kaminuza ya Lund mu gihugu cya Suède, yagaragaje ko iki kibazo cyagaragaye mu bihe by'icyorezo cya Covid-19 aho abanyeshuri benshi bo ku Isi bose bigaga hakoreshejwe ikoranabuhanga , ari nabwo basanze abantu bafite uburanga aribo bagiraga amanota mabi ugereranyije n'abandi.

Ubwo bushakashatsi bwasohotse ku kinyamakuru cya Economic Letters , hifashishije imibare y'abanyeshuri 300 bigaga muri Kaminuza ya Lund mu masomo atandukanye.

Icyo gihe yakoresheje itsinda ry'abakorerabushake 74, kugira ngo batange ibitekerezo ku buranga bw'abo banyeshuri 300 bakurikije uko bababonaga.

Yagaragaje ko abakobwa b'uburanga bagize amanota make mu ishuri mu bihe by'icyorezo cya Covid-19, ubwo amasomo menshi yimurirwanga ku ikoranabuhanga, abarimu bakigisha abanyeshuri benshi batari kumwe imbonankubone.

Icyo gihe yakurikije igereranya ry'abanyeshuri batangiye kwiga mbere y'icyorezo cya Covid-19 ubwo bigaga bari kumwe n'abarimu, ndetse na nyuma y'aho gitangiriye amasomo akimurirwa ku ikoranabuhanga.

Icyatumye hatangazwa ubushakashatsi ku mwihariko w'abakobwa b'uburanga, ni uko mu bakoreweho ubushakashatsi hari harimo n'abahungu ndetse n'abatarabwiwe ko bafite uburanga, ariko abo bakobwa babwiwe ko bafite uburanga akaba ari bo bagira amanota make.

Mehic yanagaragaje ko abakobwa b'uburanga bakurikira amasomo iyo bari kumwe n'umwarimu ubigisha bakungurana ibitekerezo, ariko ko iyo amasomo ashyizwe ku ikoranabuhanga bakiga badatanga ibitekerezo, batakaza ubushake bwo kwiga.

Aganira na Daily Mail, yavuze ko nta cyamutangaje mu byavuye mu bushakashatsi, kuko benshi mu bakobwa b'uburanga bakunze guhabwa amahirwe menshi mu kazi ndetse no mu bindi bitandukanye, bakanahembwa umushahara mwinshi ugereranyije n'abandi bakorana, ibituma bigirira icyizere cyinshi bakagira byinshi kandi by'ingenzi batitaho.

Ubundi bushakashatsi bwakozwe na Kaminuza ya Wisconsin muri 2021, bwagaragaje ko abantu bafite uburanga bahabwa umushahara wisumbuyeho ku kigero cya 9%, ugereranyije n'abandi bakozi bafite ubumenyi bungana n'ubwabo.

Source : https://umuryango.rw/ubuzima-115/udushya/article/hamenyekanye-impamvu-abakobwa-beza-bigira-kuri-murandasi-batsindwa-cyane

Bamwe mu bagize Inteko Ishingamategeko y'u Rwanda barifuza ko ikiruhuko cy'umugabo ufite umugore wabyaye kiva ku minsi ine ikaba 30, naho icy'umugore kikava ku mezi atatu akaba atandatu.

Iyi ni ingingo Abanyarwanda barimo gutangaho ibitekerezo bitandukanye, bamwe bayishyigikiye abandi bavuga ko yemejwe yagira ingaruka ku bukungu bw'igihugu.

Kuwa kabiri, minisiteri y'umurimo yajyanye mu Nteko Ishingamategeko umushinga usaba abadepite kuvugurura itegeko ry'umurimo.

Depite Frank Habineza yabwiye BBC ko iyi minisiteri yazanye uyu mushinga 'cyane cyane ugamije kwemeza igabanywa ry'amasaha y'akazi yavuye kuri 45 akaba 40 mu cyumweru'.

Itegeko risanzwe ry'umurimo ntiriteganya ikiruhuko cy'umubyeyi w'umugabo ufite umugore wabyaye, ahubwo sitati rusange igenga abakozi ba leta niyo imuha iminsi ine(4).

Habineza avuga ko minisiteri y'umurimo yaje inasaba ko iyi minsi ine y'ikiruhuko ku mugabo yemezwa mu itegeko.

Ati: 'Rero, natanze igitekerezo ko tuzamura ikiruhuko cy'umugore wabyaye kikava ku mezi atatu akaba atandatu, kandi n'icy'umugabo we kikava ku minsi ine ikaba ukwezi kumwe.'

Ikinyamakuru New Times kivuga bamwe mu bandi badepite bashyigikiye iki gitekerezo mu mpaka zo mu Nteko kuri uyu mushinga wo kuvugurura itegeko ry'umurimo ryo mu 2018 nk'uko byifuzwa na minisiteri y'umurimo.

Depite Habineza yabwiye BBC ati: 'Mu by'ukuri, iminsi ine [ku mugabo] ni micye cyane, hari igiye irangira mukiva kwa muganga [nabwo] iyo nta bibazo byabaye [ku mubyeyi].

'Ariko kandi [ukwezi kw'ikiruhuko] kwafasha kurushaho kwegerana mu marangamutima k'umubyeyi, umwana, n'umugabo.'

Immy Kanyange, umukozi wa leta, yabwiye BBC ko 'byaba ari byiza cyane' umugabo ahawe ikiruhuko cy'ukwezi.

Ati: 'Muri iki gihe ubuzima buragoye, nkanjye iwanjye nta mukozi [wo mu rugo] tukigira, ndamutse mbyaye umugabo akamara ukwezi ari mu rugo urumva ko byadufasha cyane'.

Naho kuvana ikiruhuko cy'umugore wabyaye ku mezi atatu akaba amezi atandatu, Kanyange abona ko 'ibyo ni ibyo mu bihugu bifite ubukungu bukomeye, kandi aho ntiturahagera'.

Marcel Karinganire abona ko ikiruhuko cy'umugabo w'umugore wabyaye koko gikwiye kongerwa ariko ntikirenze iminsi 15.

Ati: 'Amasaha y'akazi yaragabanutse, abantu ntibakizinduka cyane, rero ndumva umugabo wabyaye bamuhaye iminsi 15 yaba ari iyo, naho ubundi se yamara ukwezi mu rugo akora iki?'

Depite Habineza avuga ko minisitiri w'umurimo n'abakozi ba leta atashyigikiye igitekerezo [Habineza] yatanze 'avuga ko cyagira ingaruka ku ngengo y'imari'.

Ati: 'Twarakomeje kugeza twemeranyije ko bazabyigaho kurushaho, tunemeranya ko iteka rya Minisitiri ari ryo rizagena iyo minsi [y'ikiruhuko].”

Impinduka ziheruka ku murimo n'ibiruhuko mu Rwanda

Itegeko ry'umurimo ryemeraga umugore wabyeye ikiruhuko cy'amezi atatu (ibyumweru 12)

Ryageneraga umugore wabyaye umushahara we wose ukwezi kumwe n'igice

Nyuma yahitamo kuguma mu kiruhuko ukundi kwezi kumwe n'igice agahembwa 20%

Abagore benshi bahitagamo gusiga abana b'ukwezi kumwe bagasubira ku kazi aho guhembwa 20%

Iri tegeko ryavuguruwe mu 2016 ryemerera umugore wabyaye guhembwa umushahara we wose mu mezi atatu y'ikiruhuko

Kuva muri Mutarama(1) 2023 amasaha y'akazi yavanywe ku icyenda ku munsi aba umunani

Akazi gatangira saa tatu kakarangira saa kumi n'imwe, mugihe mbere katangiraga saa moya.

BBC

Source : https://umuryango.rw/amakuru/mu-rwanda/ubuzima/article/impaka-zikomeje-kuzamuka-ku-kiruhuko-kiri-gusabirwa-umugabo-ufite-umugore

Perezida wa Nigeria uherutse gutorerwa iyo ntebe, Bola Tinubu yahisemo kujya mu karuhuko gato nyuma y'urugamba rukomeye rw'amatora rwamuhaye instinzi yo kuyobora igihugu.

Ubunyamabanga bwe buyobowe na Tunde Rahman bwatangaje ko Tinubu yvuye mu gihugu kuri uyu wa kane tariki ya 23 werurwe 2023 mu buryo bwo kujya gutekereza igikurikiyeho mu buyobozi bwe.

Bimwe mu byo batangaje azakora muri ako karuhuko ngo ni ugutegura umunsi mukuru wo kurahirira intebe y'ubutegetsi muri Nijeriya uteganijwe kuya 29 Gicurasi 2023.

Rahman, yatangaje ko kandi Perezida Tinubu azava mu mugi wa Paris mu Bufaranda na London mu Bwongereza yerekeze muri Saudi Arabia, aho azabonana na Hajj atangira ukwezi kwa Ramadan kugizwe no kwigomwa ifunguro amasaha menshi .

Icyakora abakurikiranira hafi uyu Tinubu watorewe kuyobora Nigeriya bavuga ko akunze gutembera amahanga mu buryo bwo kwivuza kuko ubuzima bwe butameze neza.

Uru rugendo nti rutunguranye kuko no mugihe cyo kwiyamamaza yibandaga ku rugendo azakorera muri ibyo bihugu byavuzwe haruguru, ari nabyo abamushinja kuba ubuzima bwe butameze neza babihera.

Hagati aho abatavuga rumwe n'ubutegetsi bo bakomeje kugeza ibirego ku rukiko rukuru na komisiyo y'amatora bavuga ko amatora yajemo uburiganya kandi ko uwatowe atariwe nyakuri.

Basaba ko Mr Tinubu yatangarizwa ko yibye amatora maze hagafatwa izindi nzira ziganisha ku gutora binyuze mu mucyo nkuko bo babyivugira.

BBC

Source : https://umuryango.rw/amakuru/mu-mahanga/politiki/article/nigeriya-perezida-tinubu-uherutse-gutorwa-yerekeje-i-paris-na-london-mu

Ntiyakunze kugaragazwa mu ruhame kuva yavuka nk’abana b’ibindi byamamare, gusa ubwo yari yujuje umwaka, Myla ababyeyi be Meddy na Mimi basangije ababakurikira amafoto y’uyu mukobwa bamukoreye ibirori.

Uyu munsi tariki ya 23 Werurwe 2023 ni bwo umuhanzi nyarwanda ukorera umuziki we muri Leta Zunze Ubumwe za Amerika, Ngabo Medard [Meddy] yasangije abamakurikira AMAFOTO y’umwana we na Mimi Mehfira ukomoka muri Ethiopia bari mu birori by’isabukuru ye.

Meddy ifoto imwe y’uyu mukobwa yayiherekeresheje amagambo agira ati “igikomangomakazi cyanjye. Umwana wanjye yujuje umwaka 1 w’amavuko.”

Tariki ya 23 Werurwe 2022 nibwo Meddy ni bwo yahishuye ko umugore we Mimi yibarutse imfura ya bo bise Myla Ngabo.

Aba bombi bakoze ubukwe muri Gicurasi 2021, bubera muri Amerika muri Leta ya Dallas aho aba bombi baba.

Mu ijoro ryo ku wa Gatanu tariki 19 Ukuboza 2020, nibwo Meddy yasabye uyu munya-etiyopiyakazi ko yareka igihe basigaje ku Isi bakazakimarana.

Muri Kanama 2019, Mimi yari yatangaje ko nyuma y’igihe amaranye n’uyu musore yabonye ari umwizerwa bityo ko amusabye ko babana atazuyaza.

Tariki ya 1 Mutarama 2019 ni bwo Meddy yerekanye umukunzi we mu Rwanda mu gitaramo cya East African Party Meddy yari yatumiwe kuririmbamo, akaba ari nabwo uyu mukobwa w’imyaka 30 aheruka mu Rwanda ariko akaba yavuze ko ari hafi kugaruka.

Urukundo rwa Meddy na Mimi rwatangiye muri 2017 ubwo Meddy ubwe yatangazaga ko hari umukobwa utari Umunyarwanda asigaye atereta uba muri Amerika.

Myla yujuje umwaka umwe

Ari kumwe n’ababyeyi be

Source : http://isimbi.rw/imyidagaduro/article/amafoto-y-umukobwa-wa-meddy-na-mimi-wakorewe-ibirori-byo-kwizihiza-isabukuru

Umunyapolitiki utavuga rumwe n'ubutegetsi bwa Kongo, bwana Martin Fayulu, yavuze ko igihe amatora ya perezida atabera igihe mu Ukuboza uyu mwaka, hazajyaho inzibacyuho y'amezi hagati y'Atatu n'Ane, nyuma yaho abaturage bagatora.

Ikinyamakuru Mediacongo, cyanditse ko iyi ngingo y'uko amatora yazaba cyangwa se agasubizwa inyuma, ari imwe muziri kuvugwaho cyane mu gihugu.

Hari ababona ko ubutegetsi buriho bushobora gutinza amatora nk'uko byagenze kubwa Joseph Kabila Kabange, wayakerereje imyaka itatu kuva 2015 kugera muri 2018.

Martin Fayulu utarahiriwe n'amatora ya 2018, avuga ko amahanga akwiriye kuba maso agafasha iki gihugu kugira amatora no kubaha inzego ziriho.

Kuri we ngo amatora atabaye mu kwezi k'Ukuboza, abayobora inzibacyuho y'amezi atatu, baba bakumiriwe kukwiyamamariza gushaka ubutegetsi bose.

Leta ya Kongo ntacyo itangaza ku gukoresha amatora mu mpera z'uyu mwaka, ariko amakuru avuga ko perezida uriho yazashyirwaho igitutu cyangwa se akitwaza umutekano muke mu gihugu, cyane mu ntara z'uburasirazuba  agasubika amatora mu kwezi k'Ukuboza 2023.

Ibihugu birimo Amerika n'uburayi bimaze igihe bisaba abategetsi muri Kongo Kinshasa, kubahiriza ingengabihe y'amatora akazaba ku gihe kandi mu bwisanzure.

The post RDC: Fayulu yasabye ko hajyaho inzibacyuho amatora ya Perezida atabereye igihe  appeared first on FLASH RADIO&TV.

Source : https://flash.rw/2023/03/23/rdc-fayulu-yasabye-ko-hajyaho-inzibacyuho-amatora-ya-perezida-atabereye-igihe/?utm_source=rss&utm_medium=rss&utm_campaign=rdc-fayulu-yasabye-ko-hajyaho-inzibacyuho-amatora-ya-perezida-atabereye-igihe

Ni nyuma y'ibiganiro Minisiteri yagiranye n'abadepite bagize Komisiyo y'imibereho y'abaturage mu mutwe w'abadepite kuwa Kabiri w'iki cyumweru, bigendanye n'amavugurura mu itegeko no 66/2018 ryo ku wa 30/08/2018 rigenga umurimo mu Rwanda.

Ubusanzwe umugore wabyaye yahabwaga ikiruhuko cy'amezi atatu [ni ukuvuga ibyumweru 12], icyifuzo ni uko ikiruhuko cyaba amezi atandatu, naho umugabo wabyaye wahabwaga iminsi ine, agahabwa ukwezi kumwe.

Ishingiro ry'iki cyifuzo ni ukongera umwanya ababyeyi bamarana n'umwana hagamijwe kwita ku muryango.

Depite Frank Habineza, avuga ko niba bishoboka ikiruhuko gihabwa umugore wabyaye cyakongerwa 'nibura kikaba amezi atandatu ariko nanone no ku mugabo kikongerwa kikava ku minsi ine'.

Ati 'Iyo urebye mu by'ukuri iminsi ine [ku mugabo] ni mike cyane usanga irangira mukiri kwa muganga akenshi iyo habayemo ibibazo mu kubyara usanga umusiga mu rugo ugahita ugenda ugasanga ntacyo iminsi ine ikumariye'.

Mugenzi we, Depite Manirarora Annonce ashimangira ko iminsi ine ihabwa umugabo ari mike cyane kuko nk'iyo umudamu yagize ingorane akabyara bigoranye cyangwa akabyara n'umwana udashyitse, ya minsi ine umugabo aba ari we wita kuri uriya mugore.

Ati 'Igihe wamuhaye iyo minsi ine no kwa muganga bagafata ikindi cyemezo kijyanye n'ubuzima bw'umubyeyi bakongera iyo minsi, sinzi ko umugabo azabasha kurwaza wa mugore n'umwana'.

Perezida wa Komisiyo y'imibereho y'abaturage mu mutwe w'abadepite, Uwamariya Odette, ashimangira ko izi ngingo zisaba ibiganiro byimbitse ariko ko ibitekerezo by'abaturage, abadepite n'abandi bizahabwa agaciro hashyizwe imbere inyungu z'umuturage.

Minisitiri w'abakozi ba Leta n'umurimo, Rwanyindo Kayirangwa Fanfan, avuga ko ibi bitekerezo bizakomeza kuganirwaho n'izindi nzego bireba zirimo izifite mu nshingano ubwiteganyirize n'izindi hagamijwe ko ababyeyi bombi babona ikiruhuko gihagije.

Ati 'Uko tuzagenda dutera imbere, uko tuzagenda turushaho gushyira imbaraga cyangwa ingufu mu rwego rw'ubwiteganyirize, twumva tuzagenda duhindura tukongera iyo minsi ku bagore ndetse no ku bagabo'.

Amezi atandatu yateje impaka

Umunyamabanga Mukuru wa REWU, sendika ikorera ubuvugizi abakozi bo mu rwego rw'ubucukuzi bw'amabuye y'agaciro, Eng. André Mutsindashyaka, yabwiye IGIHE ko 'muri sendika yabo bifuza ko umugore wabyaye ahabwa ibyumweru 14 naho umugabo agahabwa bine'.

Ati 'Nibura umugore burya mu gihe cy'amezi atatu n'igice twavuga ko aba amaze gukomera iyo atagize ingorane zo kubyara, noneho n'umugabo igihe umugore yabyaye nta ngorane zabayeho, aba akeneye kugira ngo amube hafi aho kugira ngo yiyambaze abo mu muryango nabo bajye gufata za konji kandi umugore ari uwe'.

Ku bifuza ko umugore wabyaye yahabwa ikiruhuko cy'amezi atandatu, Mutsindashyaka avuga ko atari ko abibona kuko byabangamira iterambere ry'abakoresha n'umurimo muri rusange.

Ati 'Mu rwego rw'umurimo, wa mukoresha turi gusaba ngo ahembe umudamu wabyaye, aba akeneye ko uwo mudamu agomba kuboneka mu kazi agatanga umusaruro n'icyo kumuhemba kikabasha kuboneka'.

Mutsindashyaka asanga ibyasabwa bidakwiye kubangamira imibereho myiza y'umwana, umubyeyi ndetse n'umusaruro w'ikigo.

Ati 'Amezi atandatu twaba twihuse, igihugu kiracyakeneye ko dukoresha imbaraga nyinshi tuzamure umusaruro tugere ku bukungu twifuza, bikaba bikeneye ko n'umusaruro tugomba kuwukorera'.

Bamwe mu bakoresha imbuga nkoranyambaga nka Twitter, bagaragaje ko amezi atandatu ari ikiruhuko gikwiye ku mugore wabyaye kuko yajya asiga umwana yatangiye gufata imfashabere.

Umunyamakuru Rigoga Ruth yagize ati 'Iki kiruhuko cyaba ari cyiza mu buzima. Ni ukuva mu rugo umwana amaze gufatika'.

Uwitwa Mucyo Herve yagize ati 'Badepite bacu mwihangane mureke gushishikariza abantu kudakora ngo bararuhuka nyuma yo gutangira akazi saa tatu haje n'ibiruhuko bikabije'.

Rahmat Umuhoza ati 'Igitekerezo ubwacyo si kibi, ahubwo nibaza hari hakwiye kurebwa uburyo nyuma y'amezi atatu umubyeyi yoroherezwa niba ari ugukorera mu rugo cyangwa kugira ibyumba byabugenewe mu kazi. Bitari ibyo, kubyongera ni igitekerezo cyiza ku ruhande rumwe ariko ku rwego rw'imari, ibigo bizabyumva ni bike'.

Uwitwa Kamanzi Jean Bosco yavuze ko 'Iki kiruhuko cy'amezi 6 ku mubyeyi wabyaye kiramutse cyemejwe cyaba ari ingirakamaro ku buzima n'imikurire by'umwana. Byatuma umwana yonka bihagije kdi bizwi neza ko ku mezi 6 aribwo atangira guhabwa imfashabere'.

Hamim Kanze 'Ni byiza cyane mu gufasha umwana gukura neza mu mezi 6 ya mbere, ariko ku rwego rw'ubukungu biragoranye ko ibigo byakomeza guhemba abantu babiri muri icyo gihe (uri mu kiruhuko n'uwamusimbuye)'.

Nshimiyimana Didier ati 'Badepite bacu ndabibonye koko muri intumwa zacu nka rubanda! Icyo gitekerezo kizafasha mu kubaka umuryango wacu nyarwanda mu buryo ntajorwa, kuko umugore amarana n'uruhinja rwe igihe gihagije, kandi n'umugabo ni uko. Ikindi umugabo yita neza ku mugore we wabyaye!'.

Uwihoreye Marie Grace yagize ati 'Rwose abadepite twitoreye ndabashimiye cyane abadamu bari mu nteko kuko muzi neza konsa akamaro kabyo nanjye ndabashyigikiye umubyeyi yamara amezi 6 hanyuma agasubira mu kazi umwana nibura afata n imfashabere'.

Indi nkuru wasoma: Kugabanya amasaha y'akazi, ikiruhuko cy'abagabo… Impinduka mu itegeko ry'umurimo mu Rwanda

Bamwe mu badepite basaba ko umubyeyi wabyaye ahabwa ikiruhuko cy’amezi atandatu

---

Source : http://igihe.com/amakuru/u-rwanda/article/amezi-atandatu-yavugishije-benshi-impaka-ku-kiruhuko-cy-umugore-n-umugabo