Webrwanda Backend

Author: webrwanda

  • U Rwanda rukomeje guhatana kugira ngo haboneke igisubizo cy'aho Amavubi azakinira #rwanda #RwOT

    Ikipe y'igihugu “Amavubi”iri mu nzira zo kugaruka i Kigali nyuma yo kunganya igitego 1-1 na Benin mu mukino wa gatatu mu gushaka itike yo kwerekeza muri AFCON 2024.

    Nyamara CAF yategetse ko bakinira muri Benin imikino yombi ndetse ntabwo irisubiraho kuri icyo cyemezo nubwo MINISPORTS yavuze ko hari ikiri gukorwa.

    Icyemezo kidahindutse Amavubi yasubira i Cotonou.

    Abakunzi ba ruhago mu Rwanda bari mu rujijo rw'aho undi mukino uzahuza aya makipe yombi uzabera kubera ko CAF yamenyesheje u Rwanda ko rutemerewe kwakira uyu mukino kubera ko nta hoteli zemewe ziri mu karere ka Huye aho uwo mukino wagombaga kubera.

    Minisitiri Munyangaju ubwo yari muri Sena mu nama nyunguranabitekerezo yiga ku ruhare rwa siporo mu guteza imbere urubyiruko, ku wa 22 Werurwe 2023, yakomoje ku biri gukorwa kugira ngo icyemezo cya CAF gihindurwe.

    Ati 'Byarangiye saa Saba za mu gitondo, FERWAFA, yandikirana na CAF.''

    Yaciye amarenga ko hari ibiri gukorwa kandi inzego bireba ziticaye ubusa.

    Yakomeje ati 'Ibyo byose ni byo twarayemo, ni byo turimo. Hari aho bigera bikaba ngombwa ko amakuru adasohoka ako kanya kugira ngo bitagira icyo byangiza.''

    Nyuma yo kumenyeshwa icyemezo cyo kwakirira umukino warwo muri Bénin, u Rwanda rwahise rwandikira CAF rugaragaza ko rutanyuzwe n'uwo mwanzuro ndetse n'uburyo ikipe yabujijwe gukora imyitozo ku kibuga yakiniyeho, imigirere ubusanzwe ihanirwa n'amategeko ya CAF.

    Amakuru aravuga ko u Rwanda rukomeje gushakisha hirya no hino ndetse ku mugoroba byavuzwe ko uyu mukino ushobora kubera i Lome muri Togo nubwo nta rwego rwizewe rurabitangaza.

    Amavubi yahagurutse muri Bénin agaruka mu Mujyi wa Kigali aho biteganyijwe ko ikipe ihagera mu rukerera rwo ku wa Gatanu, tariki ya 24 Werurwe 2023, ahagana saa Sita na 45.

    Nyuma y'imikino itatu u Rwanda rumaze gukina, ruri ku mwanya wa gatatu aho rufite amanota abiri ku icyenda. Muri iri Tsinda L ryo gushaka itike y'Igikombe cya Afurika cya 2023 kizabera muri Côte d'Ivoire. Sénégal ni yo iyoboye n'amanota atandatu, Mozambique ifite ane [ibihugu byombi ntibirahura] mu gihe Bénin ya nyuma ifite inota rimwe.

    Source : https://umuryango.rw/imyidagaduro/imikino/article/u-rwanda-rukomeje-guhatana-kugira-ngo-haboneke-igisubizo-cy-aho-amavubi

  • M23 yatangiye kurekura ibice yari yarigaruriye #rwanda #RwOT

    I Masisi, ingabo z'u Burundi nizo zirimo guhita zigenzura ibice byari byarafashwe na M23 ubu irimo kugenda irekura mu kubahiriza gahunda y'amahoro yategetswe n'abakuru b'ibihugu by'akarere.

    Ingabo z'ibihugu byo mu karere (EACRF) zoherejwe muri Repubulika ya Demokarasi ya Congo, zatangaje ko umutwe w'ingabo z'u Burundi watangiye kugenzura uturere twa Karuba, Mushaki, Kirolirwe nyuma y'uko M23 ihavuye.

    EACRF ivuga kandi ko izi ngabo ziteze no kugenzura umujyi wa Kitchanga, M23 niwuvamo.

    Ibi ni ibice M23 yirukanyemo ingabo za leta n'inyeshyamba zitandukanye mu mirwano yo mu ntangiriro z'uyu mwaka muri Masisi.

    Itangazo rya M23 ryo mu ijoro ryo kuwa gatatu rishinja ingabo za leta gufatanya n'inyeshyamba zitandukanye bagafata ibice M23 irimo kuvamo bakabikoresha batera ibirindiro bya M23.

    Uruhande rw'ingabo za leta ntacyo ruratangaza kuri ibi birego, ariko mu minsi ishize rwashinje M23 gutera ibirindiro byazo muri teritwari ya Nyiragongo.

    Mu ijoro ryo kuwa gatatu kandi imirwano ikomeye hagati ya M23 n'ingabo za leta yumvikanye mu duce twa Rukoko hafi ya Buhumba muri teritwari ya Nyiragongo mu majyaruguru ya Goma.

    Umutwe wa M23 urimo gusubira inyuma muri teritwari ya Masisi ariko uracyagenzura hafi teritwari ya Rutshuru yose n'inzira ziyerekezamo.

    Amasezerano y'amahoro atandukanye ategeka uyu mutwe gusubira inyuma kugera ku kirunga cya Sabyinyo. Ntibizwi neza niba uyu mutwe uzabikora.

    M23 ivuga ko ingabo za leta zikomeje gukwiza urwango n'ubwicanyi ku basivile n'abasirikare bamwe na bamwe, mbere yashinje uruhande rwa leta gukora 'jenoside ku batutsi'.

    M23 ivuga ko ishaka ko aya makimbirane arangira haherewe ku mpamvu muzi zayo mu biganiro by'amahoro bitaziguye na leta.

    Uruhande rwa leta ruhakana ibirego bya M23 ku bwicanyi no kwibasira igice cy'abaturage ba Congo b'Abatutsi, kandi ivuga ko itazaganira n'uyu mutwe yita uw'iterabwoba.

    Leta ya Kinshasa kandi ishinja u Rwanda gufasha M23, ibyo leta ya Kigali ihakana.

    Aya makimbirane yatumye abaturage barenga 600,000 bava mu byabo barahunga, nk'uko bivugwa na ONU.

    The post M23 yatangiye kurekura ibice yari yarigaruriye appeared first on FLASH RADIO&TV.

    Source : https://flash.rw/2023/03/23/m23-yatangiye-kurekure-uduce-dutatu-two-muri-masisi-yari-yarigaruriye/?utm_source=rss&utm_medium=rss&utm_campaign=m23-yatangiye-kurekure-uduce-dutatu-two-muri-masisi-yari-yarigaruriye

  • U Rwanda ntako rutagira ngo amahoro aboneke muri RDC ariko abayobozi bayo ntibabigiramo uruhare-Ministiri Biruta #rwanda #RwOT

    Minisitiri w'Ububanyi n'Amahanga Vincent Biruta yavuze ko umubano w'u Rwanda n'ibindi bihugu umeze neza, ariko hari ikibazo giterwa na Repubulika ya Demokarasi ya Congo, avuga ko u Rwanda rukora ibishoboka byose ngo amahoro aboneke mu Burasirazuba bw'iki gihugu, ariko bikigoye kubera ko abayobozi bacyo badashaka kubigiramo uruhare.

    Ibi Minisitiri Biruta yabigarutseho mu kiganiro yatanze mu nama yahuje imitwe ya Politiki yemewe mu Rwanda kuri uyu wa Kane tariki 23 Werurwe 2023.

    Ni ikiganiro kigaruka kuri politiki y'u Rwanda ku bubanyi n'amahanga, ibyagezweho ndetse n'ibibazo bihari n'ingamba zo kubikemura.

    Tariki 26 Mutarama 2023,ubwo Minisitiri w'Ububanyi n'Amahanga, Dr Vincent Biruta, yagezaga ku Nteko Ishinga Amategeko, Umutwe w'Abadepite uko umubano w'u Rwanda n'ibihugu byo mu Karere uhagaze yavuze ko rwo na RDC bitabanye neza.

    Yavuze ko abashinja u Rwanda gukorana na M23 no guhungabanya umutekano wa RDC baba bafite inyungu zindi bashaka ziganisha ku bukungu n'imitungo kamere iyibarizwamo.

    U Rwanda na RDC bimaze igihe birebana ay'ingwe, nyuma y'aho Umutwe wa M23 wuburiye imirwano n'ingabo z'iki gihugu mu mpera za 2021.

    RDC ishinja u Rwanda gufasha M23 irwana isaba ko uburenganzira bw'abavuga Ikinyarwanda mu Burasirazuba bw'icyo gihugu bwubahiriza, mu gihe rwo ruyishinja gufasha no gukorana n'Umutwe w'Iterabwoba wa FDLR ugizwe n'abasize bakoze Jenoside yakorewe Abatutsi, bagikomeje no guhembera ingengabitekerezo yayo.

    The post <strong>U Rwanda ntako rutagira ngo amahoro aboneke muri RDC ariko abayobozi bayo ntibabigiramo uruhare-Ministiri Biruta</strong> appeared first on FLASH RADIO&TV.

    Source : https://flash.rw/2023/03/23/u-rwanda-ntako-rutagira-ngo-amahoro-aboneke-muri-rdc-ariko-abayobozi-bayo-ntibabigiramo-uruhare-ministiri-biruta/?utm_source=rss&utm_medium=rss&utm_campaign=u-rwanda-ntako-rutagira-ngo-amahoro-aboneke-muri-rdc-ariko-abayobozi-bayo-ntibabigiramo-uruhare-ministiri-biruta

  • Myugariro wa Gasogi United yasezeranye imbere y’amategeko (AMAFOTO) #rwanda #RwOT

    Myugariro wa Gasogi United, Ndabarasa Trésor yasezeranye imbere y’amategeko n’umukunzi we Uwera Josiane.

    Ni umuhango wabaye mu gitondo cyo kuri uyu wa Kane tariki ya 23 Werurwe 2023 saa 10h za mu gitondo.

    Wabereye mu Mujyi wa Kigali mu karere ka Gasabo mu Murenge wa Remera aho bombi barahiriye kubana akaramata.

    Uku gusezerana kwitabiriwe na bamwe mu bakinnyi bakinana na Trésor muri Gasogi United barangajwe imbere na kapiteni wa Gasogi ari we Kazindu Guy Bahati, umunyezamu Cuzuzo Gael ndetse na Kabera Fils Fidele ushinzwe ibijyanye n’itangazamakuru muri iyi kipe.

    Nyuma yo gusezerana imbere y’amategeko biteganyijwe ko ubukwe nyirizina buzaba tariki ya 1 Mata 2023.

    Tresor arahirira kubana akaramata n’umukunzi we Uwera Josiane

    Josiane yarahiriye kubana akaramata na Tresor

    Bamwe mu bakinnyi bakinana bari baje kumushyigikira

    Ubukwe buzaba mu kwezi gutaha

    Source : http://isimbi.rw/siporo/article/myugariro-wa-gasogi-united-yasezeranye-imbere-y-amategeko-amafoto

  • Gatsibo: Abasore babiri barakekwaho kwica mubyara wabo bamuziza ko ababyeyi bamutetesha kubarusha – #rwanda #RwOT

    Aba bavandimwe bikekwa ko bishe uyu mubyara wabo kuwa Gatatu tariki 22 Werurwe 2023 mu Mudugudu wa Kashango mu Kagari ka Nyagisozi mu Murenge wa Kageyo.

    Amakuru avuga ko uyu musore wabaga muri uru rugo yitwaraga neza kurusha abana baho bigatuma ababyeyi babo basore bamukunda kurenza bo. Ibi byanatumye bamuha urutoki n'indi mitungo imwe n'imwe nko kumushimira umuhate akoresha.

    Abana b'uyu muryango batari barigeze bahabwa ikintu na kimwe, ntibyabashimishije aho ngo batangiye kugira ishyari bavuga ko imitungo yabo ababyeyi babo batangiye kuyiha rubanda.

    Aba basore ngo batangiye kumugirira ishyari banatangira gutegura umugambi mubisha wo kumwica, mu rukerero rwo kuwa Gatatu babyukije mubyara wabo ahagana saa kumi n'igice za mugitondo bamubwira ko bagiye gutunda ifumbire bayijyana mu murima, nuko bageze mu nzira umwe ahita amutemesha umuhoro aramwica.

    Umunyamabanga Nshingwabikorwa w'Umurenge wa Kageyo, Nayigizente Gilbert, yabwiye IGIHE ko aba bavandimwe bakekwaho kwica mubyara wabo bamaze gutabwa muri yombi aho ngo buri wese ashinja undi kuba ariwe wamwishe.

    Yagize ati 'Uwo mwana yabaga muri uwo muryango ariko atari uwabo, umugabo waho rero yatangiye kumukunda kubera ko yitwaraga neza, amuha aho gukorera, amuha urutoki, abana b'uyu muryango ntibabyishimira batangira kumugambanira baza kumutemesha umuhoro ubwo bari bajyanye ifumbire mu murima.'

    Uyu muyobozi yasabye abaturage kurenga ibijyanye n'amakimbirane, aho agaragaye bakiyambaza ubuyobozi aho kurinda kuvutsanya ubuzima kubera imitungo n'ibindi bintu by'ubusabusa.

    Kuri ubu aba basore bafungiye kuri sitasiyo ya RIB iherereye mu Murenge wa Gatsibo iperereza rikaba rigikomeje ngo hamenyekane uwatemesheje umuhoro uyu musore.

    Source : http://igihe.com/amakuru/u-rwanda/article/gatsibo-abasore-babiri-barakekwaho-kwica-mubyara-wabo-bamuziza-ko-ababyeyi

  • U Rwanda na Suède bishimiye ibyagezweho mu bufatanye bw'imyaka 20 – #rwanda #RwOT

    Kuri uyu wa 22 Werurwe 2023 hatangijwe inama y'iminsi itatu iri kubera i Kigali, irebera hamwe ibyagezweho mu myaka 20 y'imikoranire ya UR n'Igihugu cya Suède binyuze muri iyi gahunda n'ibiteganya gukorwa mu gihe kiri imbere.

    Ku munsi wayo wa mbere yitabiriwe Minisitiri w'Uburinganire n'Iterambere ry'Umuryango, Prof. Bayisenge Jeannette, Umuyobozi Mukuru Wungirije mu Kigo cy'Igihugu Gishinzwe Ubuzima, Noella Bigirimana, n'Umuganga akaba n'Umushakashatsi muri Kaminuza Gothenburg yo muri Suède, Prof. Gunilla Krantz.

    Yitabiririwe kandi n'abahagarariye ibigo bya Leta n'ibyikorera byagiranye ubufatanye na Kaminuza y'u Rwanda muri uru rugendo, ndetse n'abafatanyabikorwa bo ku ruhande rwa Leta ya Suède muri iki gikorwa.

    Minisitiri w'Uburinganire n'Iterambere ry'Umuryango, Prof Bayisenge Jeannette, yavuze ko ibi bihe ibihugu byombi byishimira ibyagezweho, ari n'umwanya mwiza wo gutekereza ku cyakorwa ku byabaye imbogamizi.

    Ati ''Ibi bihe ni ibyo kwishimira ibyo twagezeho, ariko na none byashyizweho kugira ngo twongere dusuzume iby'urugendo rwacu, harebwa no ku byabaye inzitizi.''

    Ubu bufatanye bwaje nyuma y'uko u Rwanda rushegeshwe na Jenoside yakorewe Abatutsi mu 1994, nyuma yayo rugatangira inzira yo kwiyubaka kuko ibikorwa byinshi mu ngeri zose byari byarangiritse.

    Urwego rw'Uburezi ruri mu zagizweho ingaruka mbi na Jenoside yakorewe Abatutsi, nyuma y'uko hari abarubarizwagamo bishwe muri icyo gihe, mu gihe hari n'abari barurimo bakoze Jenoside bagombaga gukurikiranwa n'ubutabera.

    Ibi biri mu byatumye ubwo u Rwanda rwatangiraga gahunda y'icyerekezo 2020, Suède yaraje mu bihugu bya mbere bigira ishyaka ryo gufatanya n'u Rwanda kongera kwiyubaka mu nguni zose ariko hubakiwe ku burezi.

    Hakomojwe ku byagezweho mu myaka 20 ishize hagendewe ku mpinduka z'ubuzima rusange, ariko hibandwa cyane ku zagaragaye mu burezi, ubuhinzi, imihindagurikire y'ibihe no kwihaza mu biribwa.

    Hanagarutswe kandi ku rwego rw'ubuzima, harebwa ku bushakashatsi bwarukozwemo mu myaka yashize, muri iki gihe ndetse n'ubuteganya gukorwa.

    Hanavuzwe kandi ku bijyanye no gushishikariza abagore n'abakobwa kwiga amasomo ya Siyansi, Ikoranabuhanga n'Imibare kuko bakiri bake muri ayo masomo, hagaragazwa amahirwe yagiye ashyirwaho mu bihe bitandukanye binyuze muri gahunda ya UR-Sweden Program, ndetse n'ahari ubu.

    Umuyobozi Mukuru Wungirije muri RBC, Noella Bigirimana, yashimiye uruhare rwa UR-Sweden Program, mu guhindura Urwego rw'Ubuzima binyuze mu gutanga ubumenyi.

    Ati ''Imwe mu nyungu nabonye ni uko iyi gahunda iri gutanga ubumenyi, ikaba iri no kuzana ingamba nshya, iyi mishinga iri kugira uruhare mu kubona ibifatika twakoresha mu kugira ibindi dushyira mu bikorwa''.

    Prof. Gunilla Krantz uri mu batanze ibiganiro, yamuritse bimwe mu bikorwa byagezweho muri iyi myaka 20, avuga ko u Rwanda nirukomeza gahunda rufite yo gushyira imbaraga mu kurandura ubukene, n'ibisigaye bizagerwaho.

    Yavuze ibi nyuma yo kumurika bimwe mu byagezweho n'ubushakashatsi bwatewe inkunga n'igihugu cya Suède, ikorwa ryabwo rigirwamo uruhare n'abanyeshuri b'abanyarwanda bize muri icyo gihugu bishyurirwa amashuri binyuze muri gahunda ya UR-Sweden Program.

    Bamwe mu barangirije muri Kaminuza zo muri Suède binyuze muri ubu bufatanye, ubu ni abayobozi bafite imyanya ikomeye mu nzego zitandukanye mu Rwanda, harimo za minisiteri, Inteko Ishinga Amategeko, Abayobozi b'ibindi bigo bya Leta ndetse n'indi myanya ikomeye.

    Mu kiganiro n'itangazamakuru cyabanjirije iyi nama, Umuyobozi wa Kaminuza y'u Rwanda, Dr Kayihura Muganga Didas na Ambasaderi wa Suède mu Rwanda, Johanna Teague, bavuze ko bishimira ibyagezweho mu myaka 20 ishize binyuze muri ubu bufatanye, ndetse ko ibihugu byombi bigifite ubushake wo kubukomeza hakagira n'ibindi bikorwa birimo kongera umubare wa kaminuza zibwongerwamo.

    Ku ruhande rw'u Rwanda, Inama y'igihugu y'ubumenyi n'ikoranabuhanga (NCST), Ikigo cy'Igihugu gishinzwe Ubuhinzi n'Ubworozi (RAB), IKigo cy'Igihugu Gishinzwe Ubuzima (RBC) n'abandi, bari mu bafatanyabikorwa b'iyi gahunda, mu gihe Suède nay o ifite mu ubufatanye bwa Kaminuza zo muri icyo gihugu no hanze yacyo.

    UR-Sweden Program iri mu cyiciro cyayo cya Kane cyatangiye mu mwaka wa 2019 kugeza muri 2026, cyari giteganyijwe gusozwa muri 2024 ariko gikomwa mu nkokora n'impamvu zitandukanye zirimo n'icyorezo cya Covid-19.

    Ubufatanye bw’u Rwanda na Suède bwateje imbere urwego bw’ubushakashatsi mu Rwanda

    Minisitiri w'Uburinganire n'Iterambere ry'Umuryango, Prof. Bayisenge Jeannette, yavuze ko iyi nama y’iminsi itatu ari umwanya mwiza wo kwishimira ibyagezweho no gusuzuma icyakorwa ku bitaragerwaho

    Prof. Gunilla Krantz yavuze ko hari icyizere ku mpinduka nziza zizakomeza kuzanwa n’ubu bufatanye harimo no kurandura ubukene mu gihugu

    Umuyobozi Mukuru Wungirije muri RBC, Noella Bigirimana, ashimira ubufatanye bw’ibihugu byombi

    Source : http://igihe.com/amakuru/u-rwanda/article/u-rwanda-na-suede-bishimiye-ibyagezweho-mu-bufatanye-bw-imyaka-20

  • Hatangajwe ibihembo bizahabwa umukobwa uzegukana ikamba rya Miss Burundi 2023 #rwanda #RwOT

    Ni irushanwa ryatangijwe kuri uyu wa 22 Werurwe 2023 aho mu kiganiro n'abanyamakuru hatangarijwemo ibisabwa ku bakobwa bifuza kwiyandikisha ndetse n'ibihembo bizagenerwa uzabasha gutsinda.

    Kuva kuri uyu wa 22 Werurwe 2023 kugeza ku wa 25 Mata 2023 abujuje ibisabwa bifuza guhatanira ikamba rya Miss Burundi bazaba biyandikisha hanyuma hatangire igikorwa cyo gushaka uzaryegukana.

    Uwifuza guhatanira ikamba rya Miss Burundi agomba kuba ari umukobwa ufite ubwenegihugu bw'u Burundi, afite imyaka itarenze 25 ariko itari munsi ya 18, ashobora kuvuga neza Igifaransa n'Ikirundi.

    Agomba ariko kandi yararangije amashuri yisumbuye, afite uburebure butari munsi ya metero 1.65 atarenge ibiro 65, atarigeze abyara cyangwa ngo ashake umugabo, ikindi ni uko agomba kuba atarigeze akatirwa n'inkiko.

    Ku rundi ruhande, hanatangajwe ibihembo bizahabwa abazegukana amakamba mu irushanwa rya Miss Burundi.

    Uzegukana ikamba rya Miss Burundi azahabwa imodoka nshya yo mu bwoko bwa Toyota Ractis, litiro 480 za lisansi, ubwishingizi bw'iyi modoka, azajya akorerwa imodoka, yishyurirwe amashuri ndetse anagenerwe umushahara w'ibihumbi 500Fbu.

    Igisonga cya mbere cya Miss Burundi azagenerwa 2 500 000Fbu, Igisonga cya kabiri azagenerwa 2 000 000Fbu naho umukobwa uzagaragaza ko ashyigikiwe cyane akazagenerwa 1 000 000Fbu.

    Source : https://umuryango.rw/imyidagaduro/article/hatangajwe-ibihembo-bizahabwa-umukobwa-uzegukana-ikamba-rya-miss-burundi-2023

  • Musanze: Polisi yafashe ushinjwa kwiba telefone zigezweho akajya kuzigurisha mu bindi bihugu #rwanda #RwOT

    Polisi y'u Rwanda ku bufatanye n'inzego z'ibanze n'abaturage mu Karere ka Musanze, yafashe umusore w'imyaka 29 ukurikiranyweho kwiba telefone zigezweho (smart phones) akazigurishiriza mu bindi bihugu.

    Yafatiwe mu mudugudu wa Nyamuremure, akagari ka Kigombe mu murenge wa Muhoza ku mugoroba wo ku wa Kabiri tariki ya 21 Werurwe, afite telefone 6 zigezweho yari yibye mu Rwanda ashaka kwerekeza mu gihugu cya Repubulika Iharanira Demokarasi ya Congo (RDC) aho yari buzigurishirize.

    Superintendent of Police (SP) Alex Ndayisenga, ushinzwe guhuza ibikorwa bya Polisi n'abaturage mu Ntara y'Amajyaruguru, yavuze ko yafashwe biturutse ku makuru yagiye atangwa n'abaturage bagiye bibwa telefone zabo.

    Yagize ati:'Twari dufite amakuru yagiye atangwa n'abaturage mu bihe bitandukanye ko bibwa telefone zabo n'umuntu utaramenyekana uzibashikuza mu masaha y'umugoroba. Ku wa Kabiri ahagana ku isaha ya saa Kumi n'ebyiri nibwo twahamagawe n'umwe mu bakora ubucuruzi bw'ibikoresho by'amashanyarazi n'iby'ikoranabuhanga byakoreshejwe mu Mujyi wa Musanze, ko hari umuntu uje kugurisha telefone adafitiye ibyangombwa bikekwa ko yibwe.'

    Yakomeje agira ati: 'Ubwo abapolisi bahageraga, bamusanganye telefoni esheshatu zigezweho, Samsung galaxy S10, Samsung galaxy 03 Core, iPhone XR, Infinix smart 6, Google Pixel 3A na Tecno Camon 19 adafitiye ibyangombwa ahita atabwa muri yombi.'

    Akimara gufatwa yiyemereye ko zimwe muri izo telefone yazibye mu Mujyi wa Kigali izindi aziba mu Karere ka Musanze, azishikuje abantu izindi akaziba mu maduka, kandi izo yibye mu Rwanda azigurishiriza i Goma muri RDC, aho agera akiba izindi nazo akazambukana akazigurishiriza mu Rwanda.

    Yavuze ko ubwo yafatwaga yari agiye kugurisha imwe muzo yari ajyanye i Goma kugira ngo abashe kubona itike kuko yari imushiriyeho.

    Yashyikirijwe Urwego rw'Ubugenzacyaha (RIB) kuri sitasiyo ya Muhoza kugira ngo akorerwe dosiye izashyikirizwa Ubushinjacyaha, telefone 3 mu zo yafatanywe zisubizwa ba nyirazo mu gihe hagishakishwa na ba nyiri telefone zisigaye.

    SP Ndayisenga yashimiye uwatanze amakuru yatumye afatwa, asaba urubyiruko gukura amaboko mu mifuka bagashaka imirimo bakora ibateza imbere bakareka kwishora mu bujura kuko butazabahira.

    Amabwiriza agenga ubucuruzi bw'ibikoresho by'amashanyarazi n'iby'ikoranabuhanga byakoreshejwe, muri zimwe mu ngingo ziyakubiyemo harimo ko ubicuruza agomba kuba afite icyemezo cy'ikigo cy'igihugu cy'iterambere RDB, kigaragaza inkomoko y'ibyo acuruza n'urutonde rwabyo, gutanga inyemezabwishyu no kugira umwirondoro w'uwo aguze nawe igikoresho.

    Aya mabwiriza kandi ateganya mu ngingo ya 15, ko uguze igikoresho cy'ikoranabuhanga n'ukigurishije bagirana amasezerano mu nyandiko ariho imyirondoro yose ya buri ruhande.

    Itegeko nº68/2018 ryo ku wa 30/08/2018 riteganya ibyaha n'ibihano muri rusange Ingingo ya 166 ivuga ko; umuntu wese uhamijwe n'urukiko icyaha cyo kwiba, ahanishwa igifungo kitari munsi y'umwaka umwe ariko kitarenze imyaka ibiri, ihazabu y'amafaranga y'u Rwanda atari munsi ya miliyoni imwe, ariko atarenze miliyoni ebyiri, imirimo y'inyungu rusange mu gihe cy'amezi atandatu cyangwa kimwe gusa muri ibyo bihano.

    Ingingo ya 167 ivuga ko ibihano ku cyaha cyo kwiba byikuba kabiri iyo uwibye yakoresheje guca icyuho, kurira cyangwa yakoresheje igikoresho icyo aricyo cyose gifungura aho utemerewe kwinjira, kwiba byakozwe mu nzu ituwemo cyangwa isanzwe ibamo abantu cyangwa mu nyubako ziyikikije cyangwa kwiba byakozwe nijoro.

    Source : https://umuryango.rw/amakuru/mu-rwanda/umutekano/article/musanze-polisi-yafashe-ushinjwa-kwiba-telefone-zigezweho-akajya-kuzigurisha-mu

  • Cholera iri kwiyongera bikomeye mu bihugu by'Afurika– WHO #rwanda #RwOT

    Urwego rushinzwe ubuzima ku Isi WHO ,rwatanze impuruza ko indwara Cholera iterwa n'umwanda ikomeje kwiyongera ku muvuduko udasanzwe.

    Ni ikibazo uru rwego rwavuze ko gikabije cyane mu bihugu byinshi by'Afurika, ruburira gukaza ingamba z'isuku mu rwego rwo kurinda abaturage babyo

    Ni mu bushakashatsi WHO yakoze mu kwezi gushize kwa gashyantare bwatanze ishusho y'uko iki kibazo kimeze mu bihugu bitandukanye ku isi.

    Kugeza ubu, ibihugu bine nibyo bimaze gutangaza Ebolla nk'icyorezo cyibyugarije. Muri byo harimo Tanzania, Zambia, Zimbabwe na South Africa, byatumye ubu habarurwa ibihugu 24 byugarijwe na Ebola ku isi.

    Ukwiyongera kw'icyorezo cya Ebola gikabije cyane mu bihugu bya Malawi na Mozambique biherereye mu ihembe ry'Afurika

    WHO irakangurira amahanga gufata ingamba zihamye zo kurwanya Ebola kuko ubu hari ikibazo cy'imiti n'inkingo bihagije nabyo biri mubiri ku yitiza umurindi.
    BBC

    Source : https://umuryango.rw/amakuru/mu-mahanga/ubuzima/article/cholera-iri-kwiyongera-bikomeye-mu-bihugu-by-afurika-who

  • Umuraperi Tekashi 6ix9ine arembeye mu bitaro nyuma yo gukubitwa akagirwa intere #rwanda #RwOT

    Amakuru yamenyekanye ni uko Tekashi 6ix9ine yakubiswe mu ijoro ryo ku wa 21 Werurwe 2023 ubwo yari mu nzu y'imyitozo ngororamubiri ( gym) n'inshuti ze muri Leta ya California muri USA.

    Nkuko amafoto abigaragara Tekashi yarakubiswe bikomeye ndetse asigarana ibikomere mu maso gusa ku bw'amahirwe Imana ikinga akaboko ntiyahasiga ubuzima kuko yahise ajyanwa mu bitaro igitaraganya.

    Kugeza ubu abakubise uyu muraperi ntibaramenyekana icyakora Polisi ya Los Angeles muri California yatangaje ko iperereza rigikomeje.

    Lance Lazzaro umu avoka wa Tekashi yatangaje ko umukiriya we yakubiswe n'abagabo bari hagati ya batatu na bane.

    Tekashi wavutse 1996 ni umwe mu baraperi bakunzwe muri Leta zunze ubumwe z'America akaba azwiho kugira ibishushanyo byinshi k'umubiri we(Tatoo) ndetse n'imisatsi y'amabara atandukanye.

    Source : https://umuryango.rw/imyidagaduro/article/umuraperi-tekashi-6ix9ine-arembeye-mu-bitaro-nyuma-yo-gukubitwa-akagirwa-intere