Author: webrwanda

Ikipe y’umukino wo koga ya Mako Sharks SC yatangije irushanwa rya 'Mako Sharks Swimming League' rizakinwa mu byiciro bitatu mu rwego rwo gufasha abakinnyi kuzamura impano no kongera umubare w’amarushanwa bakina, uburyo butari bumenyerewe mu Rwanda.

Iri rushanwa ryatangiye ku Cyumweru tariki ya 26 Werurwe 2023 aho ryabereye Green Hills Academy aho n’ubundi iyi kipe isanzwe ikorera.

Nyuma y’umunsi wa mbere hateganyijwe umunsi wa kabiri uzaba muri Kamena 2023 ndetse no mu Kwakira hazaba umunsi wa 3 ari na wo wa nyuma ubundi hagateranywa amanota hakabona gutangwa imidali.

Byitezwe ko umunsi wa nyuma uzanitabirwa n’amakipe yo hanze y’u Rwanda ariko ntabwo azaba ari mu makipe ahatanira imidali kereka abyifuje akazitabira irushanwa rya 2024.

Ku munsi wa mbere w’iri rushanwa hitabiriye abakinnyi barenga 100 baturutse mu makipe y’imbere mu gihugu arimo Vision JN yo mu Karere ka Rubavu, CS Karongi, CS Kigali na Mako Sharks yariteguye.

Aba bakinnyi bahatanye mu byiciro bitandukanye bitewe n’imyaka bafite, abari munsi y’imyaka 10 kugeza ku bakuru mu nyogo zitandukanye zirimo Gukura umusomyo 'Freestyle', Koga Bunyugunyugu 'Butterfly', Koga Makeri 'Breaststroke' no Koga Ngarama 'Backstroke'.

Uretse abakinnyi bahatanye ku giti cyabo habayemo guhatana mu rwego rw’amakipe aho bavanga inyogo.

Umuyobozi w’ikipe ya Mako Sharks, Bazatsinda James yateguye iri rushanwa yavuze gutegura irushanwa muri ubu uburyo babibonye mu bindi bihugu byateye imbere mu mukino wo koga na bo basanga ari uburyo bwiza na bo barabukopera.

Ati “ni igitekerezo cyavuye uko ahandi bakina shampiyona, n’ahandi birakorwa si mu Rwanda gusa, turavuga byaba byiza tugize shampiyona idakinwa umunsi umwe kuko uko umwana akina imikino myinshi ni ko azamura ubumenyi bwe mu koga, turavuga ngo reka dutangize iri rushanwa mu rwego rwo kuzamura ubushobozi bw’abana mu koga.”

Perezida w’ishyirahamwe ry’umukino wo Koga mu Rwanda 'RSF', Girimbabazi Rugabira Pamela yashimiye ikipe ya Mako Sharks yateguye iri rushanwa avuga ko n’andi makipe akwiye kuyigiraho akajya ategura amarushanwa mu rwego rwo guteza imbere uyu mukino mu gihugu ndetse no ku rwego Mpuzamahanga.

Ku bafite impungenge ko harimo umwanya munini hagati y’agace ka mbere n’aka kabiri ndetse n’aka gatatu ni uko atari yo marushanwa yonyine ahari kuko n’ishyirahamwe ry’umukino wo koga mu Rwanda hari andi ryateguye ndetse 'Mako Sharks Swimming League' yateguwe hagendewe ku ngengabihe ya “RSF”.

Abasaga 100 bitabiriye iri rushanwa

Girimbabazi Pamela umuyobozi wa RSF, yashimiye Mako Sharks kuri iri rushanwa bateguye

Umuyobozi wa Mako Sharks, Bazatsinda James yavuze ko ari uburyo bakopeye ahandi bateye imbere muri uyu mukino

Umukinnyi w’umunyarwanda uheruka gusinyira ikipe ya Al Ta’awon muri Libya akomeje kwitwara muri iyi kipe yagiyemo mu ntangiriro z’uyu mwaka.

Haruna Niyonzima, umukinnyi ntasimburwa muri iyi kipe, mu mukino uheruka yahembwe nk’umukinnyi w’umukino nyuma yo gutanga imipira ibiri yavuyemo ibitego.

Ni mu mukino wa shampiyona banganyijemo na Al Akhdar 2-2 ku wa Gatandatu w’icyumweru gishize tariki ya 25 Werurwe 2023.

Ibitego 2 byose Al Ta’awon byabonetse ku mipira yari itanzwe na Haruna Niyonzima usanzwe ari kapiteni w’ikipe y’igihugu Amavubi ariko akaba amaze iminsi adahamagarwa.

Nyuma y’uyu mukino akaba yaratoranyijwe nk’umukinnyi w’umukino ndetse aranabigemberwa.

Kugeza uyu munsi iyi kipe iri ku mwanya wa 8 n’amanota 13 mu gihe Al Nasr ya mbere ifite 22.

Haruna Niyonzima yahembwe nk’umukinnyi w’umukino

Umunyarwanda ukinira Lille U19, Hakim Sahabo yaraye afashije iyi kipe gutsinda PSG U19 muri shampiyona maze igitego agitura Nyirakuru uheruka kwitaba Imana.

Hakim ukina mu kibuga hagati ariko asatira, yari kumwe n’ikipe y’igihugu Amavubi yanganyije na Benin 1-1 muri Benin, igitego cy’Amavubi kikaba cyaratsinzwe na Mugisha Gilbert ku mupira yari ahawe na Sahabo.

Uyu mukinnyi ntabwo u Rwanda ruzaba rumufite ku mukino wo kwishyura uzaba ku wa Gatatu i Kigali kuko yabonye ikarita itukura agahita asubira mu Bufaransa.

Ejo hashize ikipe ya Lille y’abatarengeje imyaka 19 yakinaga na Paris Saint-Germain y’abatarengeje imyaka 19.

Lille U19 yaje gutsinda uyu mukino igitego kimwe ku busa bwa PSG U19, iki gitego kikaba cyaratsinzwe na Hakim Sahabo.

Abinyujije ku rukuta rwe rwa Instagram ahajya ubutumwa bumara amasaha 24, Sahabo yashyizeho ifoto yishimira iki gitego agaragaza umupira yambariyemo imbere uriho ifoto ya Nyirakuru, yaherekejwe n’amagambo amwifuriza kuruhuka mu mahoro.

Ati “kugarukwa kwiza nyuma yo kuva mu ikipe y’igihugu. Nyogokuru ruhukira mu mahoro.”

Sahabo yafashije ikipe ye gutsinda PSG igitego agitura nyirakuru uheruka kwitaba Imana

Ikipe y’Intare FC yanze gukina umukino wo kwishyura wa 1/8 cy’igikombe cy’Amahoro na Rayon Sports bituma FERWAFA iwusubika.

Ni nyuma y’uko iyi kipe ibwiye FERWAFA ko mu gihe idasobanuriwe impamvu uyu mukino utabaye tariki ya 10 Werurwe 2023 nk’uko byari biteganyijwe itazawukina.

Hari nyuma y’uko uyu mukino wagombaga kuba warabaye tariki ya 8 Werurwe kuri Stade Muhanga waje kwimurwa habura amasaha 24 (kuko iyo tariki hagombaga kubera ibirori byo kwizihiza umunsi w’abagore) ugashyirwa i Bugesera maze Intare na zo zirabyanga zivuga ko amasaha arimo atari ahagije kugira ngo umukino wimurwe.

Ku wa Gatatu (tariki ya 8 Werurwe) Rayon Sports yitegura kujya ku kibuga ni bwo yandikiwe na FERWAFA iyimenyesha ko umukino washyizwe ku wa Gatanu tariki ya 10 Werurwe kubera ko hari kubera imikino 2 kandi bishoboka ko bari kugera mu minota y’inyongera hakanaterwa penaliti kandi iki kibuga nta matara gifite. Rayon Sports na yo ihita yandika isezera mu irushanwa.

Nyuma yo kuganira na FERWAFA, Rayon Sports yatangaje ko ibyari bibabangamiye byakemutse yemeye kugaruka mu irushanwa.

Ku wa Gatandatu w’icyumweru gishize tariki ya 25 Werurwe 2023, FERWAFA yatangaje ko uyu mukino uzaba ku wa Mbere tariki ya 27 Werurwe 2023 mu Bugesera saa 15h00′.

Intare zikaba zarateye utwatsi iki cyemezo zafashe nk’agasuzuguro, zandikira FERWAFA ziyimenyesha ko mu gihe cyose zitamenyeshejwe impamvu uyu mukino utabaye itariki yari iteganyijwe, zititeguye kuwukina ahubwo FERWAFA yazaba ari yo ikina na Rayon Sports.

Iti “Twasanze iby’umukino uteganyijwe mu ibaruwa no137/FERWAFA/2023 twe bitatureba, kuko inama zose zijyanye na wo nta n’imwe twatumiwemo, impande zitabiriye zikaba ari zo zizawukina.”

FERWAFA ikaba yamaze gukuraho uyu mukino aho uyu munsi tariki ya 27 Werurwe 2023 saa 15h ku biro bya FERWAFA hateganyijwe inama igomba guhuza impande zose (Rayon Sports, Intare FC na FERWAFA) ziga kuri uyu mukino.

Intare FC zanze gukina na Rayon Sports umukino urasubikwa

Ni umuhigo bihaye kuri iki Cyumweru, tariki ya 26 Werurwe 2023, mu Nteko Rusange y'Umuryango FPR-Inkotanyi ku rwego rw'Intara y'Iburasirazuba.

Ni inama yitabiriwe n'abanyamuryango basaga 1800 baturutse mu turere twose. Mu bayobozi bayitabiriye harimo Komiseri ku rwego rw'Igihugu, Sheikh Harelimana Abdul Karim.

Muri iyi nteko beretswe bimwe mu bikorwa bishimira byakozwe mu kwizihiza imyaka 35 uyu muryango umaze uvutse birimo inzu zisaga 650 zubakiwe abatishoboye, inka zirenga 600 zahawe abaturage, kurwanya imirire mibi n'ibindi bikorwa bitandukanye.

—  Abanyamuryango bagaragaje ipfunwe baterwa n'umubare munini w'abana basambanywa

Abanyamuryango ba FPR-Inkotanyi bagaragaje ko baterwa ipfunwe no kugira umubare munini w'abangavu baterwa inda.

Imibare iheruka gutangwa na Minisiteri y'Uburinganire n'Iterambere ry'Umuryango, MIGEPROF na Minisiteri y'Ubuzima igaragaza ko kuva muri Nyakanga 2022 kugeza mu Ukuboza 2022, abangavu bafite kugeza ku myaka 19 babyaye bangana n'ibihumbi 13 ku rwego rw'igihugu. Intara y'Iburasirazuba ifitemo 4797 bangana na 37%.

Umunyamuryango wa FPR-Inkotanyi ubarizwa mu Karere ka Rwamagana, Munyandida Emmanuel, yavuze ko hari ikibazo kibatera igisebo buri gihe cyo kugira abana benshi baterwa inda zitateganyijwe, ashimangira ko gikwiriye gushakirwa igisubizo kirambye.

Yakomeje ati 'Niba turi benshi abatera inda bariya bana ni bamwe mu banyamuryango cyangwa ni abana bacu, ni abakozi bacu. Ndumva rero icyo cyasha dukwiriye kugikuraho kuko iyi ntara birazwi ko irimo abanyamuryango bafatika kandi bakora, mureke rero tugishyiremo imbaraga.'

Umutoni Noella wo mu Karere ka Bugesera, yavuze ko imibare y'abana basambanywa mu Burasirazuba ikiri hejuru ugereranyije n'izindi ntara ari na yo mpamvu bibatera icyasha.

Yakomeje avuga ko bashyizeho ingamba zo kwigisha imiryango ifitanye amakimbirane muri buri mudugudu no kwigisha abana bo mu mashuri yisumbuye ngo birinde ababashuka.

Nsengiyumva Jacques wo mu Karere ka Kayonza we yagaragaje ko kureberera iki kibazo bidakwiye.

Yagize ati 'Ikibazo cy'abangavu baterwa inda ni igisebo ku ntara yacu, ni igisebo no ku gihugu cyacu bikaba n'igisebo ku muryango kuko abangavu ni rwo Rwanda rw'ejo. Ni bo bakwiriye kuvamo ba mutima w'urugo b'ejo rero kumva ko abenshi bari kubyara bakiri bato ni igisebo gikomeye.'

Yakomeje avuga ko hakwiriye imbaraga nyinshi mu kurushaho kuganiriza abana by'umwihariko ndetse imiryango ifitanye amakimbirane na yo ikitabwaho cyane ngo kuko abenshi mu bana baterwa inda ariho usanga baturuka.

Abanyamuryango ba FPR-Inkotanyi biyemeje kwishakamo ibisubizo ku buryo ngo iki kibazo bakirandura burundu Iburasirazuba ntihazongere kuza ku isonga mu kugira imibare y'abana benshi batewe inda.

Komiseri muri FPR-Inkotanyi ku rwego rw'Igihugu, Sheikh Abdul Karim Harelimana, yavuze ko ikibazo cy'abangavu baterwa inda impamvu gikomeza kuremera cyane bituruka ku kibazo cy'imyumvire agasanga igihe kigeze ngo abantu bahinduke bagikurikirane bahereye mu mizi.

Ati 'Iki cyari igisebo kuva kera mu Banyarwanda, byari amahano nta muntu watinyukaga gusambanya umwana, umwana muto buri gihe yafatwaga nk'umwana wawe. Kugira ngo bikemuke ni ukwigisha n'ibihano bikongerwamo imbaraga kandi bigakurikizwa rimwe na rimwe abantu hari ubwo bitwaza ngo nta bimenyetso dufite, nta wareze ibi nabyo bikwiriye gusuzumwa bigacika.'

Abanyamuryango ba FPR-Inkotanyi biyemeje gushyira imbaraga mu kubaka Umuryango Nyarwanda utekanye uzira amakimbirane no gukurikirana ibibazo byose bibangamiye imibereho myiza y'abaturage kugira ngo buri Munyarwanda abeho atekanye kandi yishimye.

Abagera ku 1800 kuri iki Cyumweru, tariki ya 26 Werurwe 2023, itabiriye Inteko Rusange y'Umuryango FPR-Inkotanyi ku rwego rw'Intara y'Iburasirazuba

Abanyamuryango ba FPR-Inkotanyi biyemeje kurandura ikibazo cy'abangavu baterwa inda imburagihe mu Burasirazuba

Nsengiyumva Jacques yavuze ko bibatera ikimwaro kuba ikibazo cy'abangavu baterwa inda kidakemuka burundu

Umutoni Noella yavuze ko bashyizeho uburyo bwo kwigisha abangavu mu mashuri