Author: webrwanda

Ni imurikabikorwa ryateguwe n'Inama Nkuru y'amashuri makuru na za Kaminuza mu Rwanda, HEC, ryahuje ibyo bigo, abanyeshuri, abikorera n'ibigo bya Leta, harebwa urwego uburezi bugezweho n'uko bwahabwa imbaraga kugira ngo bwungukire abaturage binyuze mu bushakashatsi.

Ryanagaragayemo n'amarushanwa mu bijyanye na siyansi, ikoranabuhanga, engineering n'imibare (STEM) aho imishinga itatu yo muri IPRC Kigali n'indi ibiri yo muri IPRC Kitabi na ICK yahawe ibihembo.

Umuyobozi Mukuru wa UTAB, Padiri Dr Munana Gilbert, yavuze ko nubwo basanzwe bafite ikoranabuhanga mu masomo batanga, bagiye kongeramo imbaraga cyane. Yavuze ko banasabye Ikoranabuhanga nk'ishami ukwaryo.

Akomeza avuga ko Kaminuza zitera imbere haba mu bushakashatsi n'ibindi iyo zimenye ibyo zakwigira ku zindi, uko zaterana inkunga n'uko zakorana ubushakashatsi buhuriweho cyane ko bose baba bita ku baturage bamwe.

Ati 'Muba mugomba guhanahana ubunararibonye kuko hari kaminuza ziba zikuze n'izimaze igihe gito. Binabaha kumenya umwihariko wa buri kaminuza izindi zikigira kuri utwo dushya.'

Akomeza ati 'Twamenye ko Kaminuza igomba kureka ibintu byo guhunika ubumenyi mu bitabo ahubwo twerekwa ko tugomba kubushyira mu bikorwa, rya terambere rishingiye ku bumenyi n'ubuhanga leta yagize intego tukayifasha kurigeraho vuba.'

Muri iri murika, iyi kaminuza yamuritse umushinga ujyanye n'ifumbire y'imborera, ugamije guteza imbere ubuhinzi. Ntabwo wabashije guhembwa mu ihiga indi.

Ati 'Yego ubuhinzi twigisha buza muri STEM ariko ubu, nibwo turi kwimakaza ubushingiye ku ikoranabuhanga.”

Kugeza ubu abanyeshuri ba UTAB bamaze kuba intyoza mu kwita ku matungo aho bayabaga iyo yarwaye bakayasubiza ubuzima buzira umuze.

Padiri Dr Munana Gilbert yavuze ko ikoranabuhanga bagiye gutangiza nk'ishami rizongera ireme mu bumenyi batanga ndetse n'uburyo babushyira mu bikorwa burusheho kugira imbaraga.

Padiri Dr Munana akomeza agira ati “Turakomeza guteza imbere amasomo, ubushakashatsi n'imishinga biganisha ku Ikoranabuhanga no guhanga udushya dufite aho duhuriye n'ibyo abaturage b'igihugu bakeneye.”

Yashimiye HEC ku gikorwa gikomeye yateguye yerekana ko ari 'ibikorwa by'ingirakamaro ku babyeyi, abashaka abakozi ndetse na za kaminuza kuko ubwazo zihana ubunararibonye.'

Umwarimu akaba n'Umushakashatsi muri UTAB wakurikiranaga umunsi ku wundi iryo murikabikorwa, Dr Havugimana Alexis, yavuze ko babonye byinshi nk'abarezi ndetse babyigiraho amasomo atandukanye, asaba abikorera kwegera izo kaminuza kuko ifite abahanga ariko badafite aho gushyirira ibyo biga mu bikorwa hahagije.

Mugenzi we ushinzwe ishami ry'Ubuhinzi n'ubworozi no kubungabunga Ibidukikije n'ingufu zisubira, Dr Rugwiro Patrick, yavuze ko mu gufasha abahinzi baturiye Kaminuza kongera umusaruro, ubu bababonera imbuto y'ibirayi n'ingano byatuburiwe mu butaka bwa kaminuza.

Ubwo hasozwaga imurikabikorwa ry'ayo mashuri Makuru na za Kaminuza, Umuyobozi Mukuru wa HEC, Dr Rose Mukankomeje, yagize ati 'Uku kwari ugukangura amashuri no kubwira Abanyarwanda ko ibintu bihari. Igisigaye buri mashuri bitewe n'ibyo yigisha ubwayo yashobora kwihamagarira abantu bakaza. Nubwo atari ngombwa kubitegura buri mwaka ariko bizaterwa n'imishinga yari ihari.'

Yagaragaje ko ibigo binyotewe no kubona abanyeshuri bahanga imishinga isubiza ibibazo bifite, kandi ko nibabikora, 'ntakabuza bazabona ababafasha.'

Mu 2022 habarurwaga ko mu mashuri makuru na za kaminuza mu Rwanda hari abanyeshuri 88.448, barimo 51.271 biga mu mashuri makuru na za kaminuza byigenga.

UTAB ubu ifite abanyeshuri bagera ku bihumbi 11, bivuze ko ugereranyije n'uwo mubare w'ababarizwa muri ibyo bigo byigenga iyi kaminuza y'i Byumba ifitemo 21.45% umubare ishaka kubyaza umusaruro binyuze mu gushyira mu bikorwa ubumenyi babahwa.

Ifumbire itegurwa n’abo muri UTAB iherutse guhembwa nka NIRDA bijyanye n’uko idakungura ubutaka kandi iba igizwe n’ibimera

Isingizwe Yolande wiga muri UTAB yagaragaje ko imurikabikorwa ry’amashuri makuru na za kaminuza yarikuyemo ubumenyi agiye azifashisha mu gushyira mu bikorwa amasomo ahabwa na Kaminuza

Mu marushanwa ya HEC ajyanye n’imishinga ishingiye kuri siyansi yahize indi yarahembwe

Mu byo UTAB igiye kongeramo ingufu, ikoranabuhanga ni ryo riza ku isonga

Umuyobozi wa UTAB, Padiri Girbert Munana, yagaragaje ko ikoranabuhanga rigiye gutezwa imbere muri UTAB kuko hari na gahunda yo kuritangiza nk’ishami ryihariye

Tumukunde Marie Josée wiga muri UTAB yasabye iyi kaminuza kongera ahantu ho gukorera ubuhinzi bugezweho

Uretse gutubura ingano n’ibirayi, UTAB yeza n’ibindi bihingwa birimo inanasi

Urusenda ni rumwe mu musaruro Kaminuza ya UTAB yaserukanye mu imurikabikorwa ryateguwe na HEC

Abanyeshuri ba UTAB bagaragaza ko bagira uruhare mu kwigisha abaturage uko bakwimakaza ubuhinzi bugezweho

Bafashijwe n’abarimu babo abanyeshuri ba UTAB bamaze gukora umuti wica udukoko twangiriza imyaka, bifashishije ibimera

---

Source : http://igihe.com/amakuru/u-rwanda/article/utab-yiyemeje-gushyira-imbere-ikoranabuhanga-irateganya-gutangiza-ishami-ryaryo

Ubuhinzi ni ingeri itunze benshi mu rwego rw'ubukungu kandi iyo bwifashe neza bituma n'ubundi buzima buhenduka.

Heifer International ibinyujije muri AYuTe Africa Challenge yashyizeho amarushanwa y'urubyiruko rwifashishije ikoranabuhanga rugashakira ibisubizo ibibazo abahinzi bato bahura na byo.

Umuyobozi Mukuru wungirije ushinzwe Porogaramu zireba Umugabane wa Afurika muri Heifer International, Adesuwa Ifedi, yavuze ko aya marushanwa afasha urubyiruko rwo mu Rwanda rwahanze udushya kubona amafaranga yo kongerera ingufu mu mishinga yabo.

Yagize ati 'Aya marushanwa aha amahirwe urubyiruko rwahanze udushya mu Rwanda, rukabona amafaranga kandi rukigaragaza kurushaho kugira ngo rwagure imishinga yarwo y'ikoranabuhanga mu buhinzi, bityo ibisubizo byarwo bikagera kuri miliyoni z'abahinzi muri Afurika hose.'

'Mu buhinzi ku Mugabane wa Afurika harimo amahirwe menshi y'iterambere ry'ubukungu no gutanga akazi, ariko hakenewe mu buryo bwihuse ibitekerezo bishya n'ikoranabuhanga. Ni umwanya w'urubyiruko rujijukiwe n'ikoranabuhanga ngo ruhange udushya mu nzira yo guhindura iyi ngeri y'ubuhinzi.'

Abazatsinda muri aya marushanwa bazahembwa ibihumbi 20 by'amadorali ya Amerika, [ni ukuvuga asaga miliyoni 22 z'Amafaranga y'u Rwanda], n'amahugurwa afasha mu kunoza ibitekerezo n'ingufu urubyiruko rwashyize mu gushaka ibisubizo mu buhinzi ngo bitange umusanzu ufatika ku bahinzi bato no guteza imbere ubushabitsi bw'abatsindiye ibyo bihembo.

Ibigo bizahatana bigomba kuba ari iby'urubyiruko, bikorera mu Rwanda kuva mu myaka itatu ishize.

Umuyobozi wa Heifer International mu Rwanda, Betty Tushabe, yavuze ko aya marushanwa azashyigikira ibigo, abantu ku giti cyabo n'amatsinda afite udushya mu gushaka ibisubizo ku bibazo byugarije abahinzi bato, baba abakiri gutangira n'abamaze kufata icyerekezo mu bikorwa byabo.

Ati 'Binyuze muri aya marushanwa, twizeye kongerera ingufu imishinga y'ikoranabuhanga mu buhinzi yakozwe n'urubyiruko, tubaha amafaranga n'izindi serivisi zijyanye n'ubushabitsi. Dufite intego yo guhindura ibitekerezo n'umuhate by'urubyiruko bikavamo ibisubizo bifatika ku baturage dukorera mu Rwanda no hanze yarwo.'

Kwiyandikisha mu marushanwa byatangiye ku wa 3 Gicurasi 2023, bizasozwa ku wa 26 Gicurasi hahita hakomeza amarushanwa, azageza muri Nyakanga 2023.

Amarushanwa ya AYuTe Africa Challenge yatangijwe mu 2021, aho buri mwaka hahembwa amafaranga n'ubujyanama imishinga itanga icyizere mu gukemura ibibazo byugarije ubuhinzi.

Kuva mu 1944, Heifer International yakoranye n'imiryango miliyoni 40 ku Isi mu bikorwa byo guhangana n'inzara n'ubukene binyuze mu gushaka ibisubizo birambye.

Mu myaka 48 Heifer International imaze ikorera mu bice by'icyaro muri Afurika, ifasha abahinzi n'abatunganya ibikomoka ku buhinzi kubaka ubukungu butajegajega no gukora imirimo itanga inyungu.

Abatsinze bahabwa amafaranga abafasha guteza imbere imishinga yabo

Imishinga izahembwa igaragaza icyizere mu kubonera abahinzi bato ibisubizo by’ibibazo bafite

Urubyiruko rwahanze udushya mu mishinga y’ikoranabuhanga mu buhinzi ruhembwa amafaranga n’ubujyanama mu bushabitsi

---

Source : http://igihe.com/amakuru/u-rwanda/article/asaga-miliyoni-22-frw-yashyizwe-ku-meza-y-urubyiruko-rwatangije-imishinga-y

Bibiliya, Gutegekwa kwa kabiri 22:5 Umugore cyangwa umukobwa ntakambarane n'umugabo, kandi umugabo ntakambarane n'umugore, kuko ukora atyo wese ari ikizira Uwiteka Imana yawe yanga urunuka.

Si ikintu gishya kwambara amapantalo ku gitsinagore haba inaha mu Rwanda n'imahanga.

Nubwo haba hari impamvu ba nyir'ukuyambara bagaragaza, inyandiko na zo ntizibura kwerura ko kwambara imyenda y'abagabo ku bagore n'iy'abagore ku bagabo ari ikizira mu maso y'Uwiteka.

Umuryango.rw Twifashishije Bibiliya Yera, igitabo Ibihamya by'Itorero n'urubuga amredeemed.com hose hagaragaza ko ari umugambi wa Satani ko abagore n'abakobwa bambara amapantalo.

1.Satani ashaka ko bambara amapantalo kugira ngo babere ibigusha abababona

Imyambaro y'amapantalo myinshi y'abagore ikannye ku buryo ikora ku ntekerezo z'abagabo. Amaso yabo agwa ku bice by'ibanga. Ibi bituma habaho kujya kure mu ntekerezo bikaba intandaro y'icyaha. 1 T 456-458

2. Satani yifuza ko abagore n'abakobwa bambara amapantalo kuko yanga irema

Satani yanga urunuka iremashusho ry'umugabo n'umugore. Ntakunda ubugore (femininity), yifuza ko bwavaho umugabo n'umugore bagasigara bameze kimwe. Nubwo umubare w'abagore n'abakobwa bambara amapanto urushaho kwiyongera ntabwo Imana inezezwa na byo. Kandi n'abagore na bo ni

uko ndashaka ko bambara imyambaro ikwiriye bakagira isoni birinda… 1 Timoteyo 2:9
3. Satani ashaka ko wambara ipantalo kuko yanga umuryango wawe

Ahakana ukwera k'ubukwe. Yanga umugambi w'Imana ko umugabo ari we mutwe w'urugo. Ashaka ko n'abagore baba umutwe w'urugo. Azi ko igihe umugore yambaye ipantalo yubahwa n'umugabo, ibi bitera amakimbirane ashobora kuvamo gutandukana (Divorce). Na none kandi birema urujijo mu bana, bakura batabona ishusho nyayo y'umurongo Imana yashyiriyeho utandukanya ibitsina.

4. Satani ashaka ko abagore bambara amapantalo kuko yanga umwimerere w'ibitsina

Ashaka guteza imbere kuryamana kw'abahuje ibitsina. Azi neza ko umugore wambaye ipantalo atera urujijo ku bijyanye n'imibinano mpuzabitsina bigatuma habaho kwiyongera kw'ibyaha. Satani ashaka ko abagabo babonamo abagore iby'imibonano mpuzabitsina aho kubahirwa ubuntu buri mu kuba ari abagore. (4T 460)
5. Satani ashaka ko wambara ipantalo kuko arwanya uruhare rw'Imana muri wowe

Mu gitabo Ibihamya by'Itorero cy'Icyongereza umuzingo wa 4 urupapuro rwa 634 havuga ko bamwe bambara nk'ab'isi kugira ngo bahindure abatizera, ariko bakora ikosa. Niba koko bafite ukuri kandi bashaka kugumana uruhare rw'Imana, reka kwizera kujyane n'imirimo yabo maze berekane itandukaniro hagati y'Ubukiristo n'Ubupagani. Amagambo, imyambaro n'ibikorwa nibivugire Imana. Hanyuma urwo ruhare rwera ruzagera kuri abo bandi.

6. Satani ashaka ko abagore bambara amapantalo kugira ngo bange inshingano

Ibi yabishyiriyeho gufasha abagore guhakana inshingano bahawe n'Imana yo gukora mu rusengero no kurwanya umugambi wayo.
7. Satani ashaka ko abantu bamuramya

Abagize umuryango wa Satani uhakana ubugore n'abamaze kwemera ibi bose bahurira hamwe bagashimira kandi bakaramya Satani. Imyuka mibi ni yo ishishikariza abagore kwambara amapantalo. Igitekerezo cyaturutse ku Mubi kandi abayemera bose baramuramya nta kabuza. Kwabara ipantalo biha urwaho Satani mu buzima bw'uyambara.

Abashyigikira ibi bose bitwaje ko ari uburenganzira bw'abagore kwambara amapantalo binjira muri iryo shyirahamwe batabizi.

Bibiliya iravuga iti 'Aya mategeko ngutegeka uyu munsi ahore ku mutima wawe. Ujye ugira umwete wo kuyigisha abana bawe, ujye uyavuga wicaye mu nzu yawe, n'uko ugenda mu nzira n'uko uryamye n'uko ubyutse' Gutegekwa 6:6-7.

Muramutse mushaka kumenya byinshi ku mugambi wa Satani wo kwambara amapantalo ku gitsinagore, mushobora gukoresha igitabo Testimonies for the Church (Ibihamya by'Itorero) umuzingo wa 1,4 n'uwa 5.

Source : https://umuryango.rw/ubuzima-115/udushya/article/dore-umugambi-wa-satani-n-impamvu-7-ashaka-ko-abagore-n-abakobwa-bambara

Nyuma yo kwigisha inyigisho z'ubuyobe abarega 100 bakahasiga ubuzima , Pasiteri Ezekiel Odero n'Itorero rye New Life Prayer Centre and Church urukiko Rukuru muri Mombasa rwemeje ko rukomeza gufatira konti ze za banki zigera kuri 15.

Ibi byabereye ahitwa Shakahola muri Kilifi. Umucamanza Olga Sewe, kuri uyu wa Mbere yemeje ko icyemezo cyo gufatira izi konti kigumaho, atera utwatsi ibyasabwe na Pasiteri Ezekiel byose keretse kwemerera abayoboke be kujya mu rusengero ruri ahitwa Mavueni bagasenga.

Umucamanza kandi yateye utwatsi ubusabe bwe bwo kongera gufungurirwa Televiziyo ya World Evangelism TV.

Mu nyandiko ze, Pasiteri Ezekiel ukurikiranyweho ibyaha bitandukanye birimo na Jenoside, yanenze icyo yise itotezwa n'iyicarubozo yakorewe na Leta.

Source : https://umuryango.rw/amakuru/mu-mahanga/ubuzima/article/wa-mu-pasiteri-w-igishije-ubuyobe-bugahitana-amagana-hafatiriwe-konti-ze-zigera

Nk'uko biboneka mu nyandiko basinye yatangajwe na Minisitiri Lutundula, we na Minisitiri Kayisire bahujwe na Grandi, mu byo bumvikanye harimo;

Kubahiriza amasezerano yo muri 2010,Gutangira ibiganiro bigamije gufasha gucyura impunzi, Kwemera uburenganzira bwo gutaha ku bushake mu mutekano, Kwita ku mutekano w'abatahuka no guhanahana amakuru ku hantu bahungukiye.

Ikindi ibihugu byombi byemeranijweho ni uguhurira i Nairobi mu kwezi gutaha mu nama tekinike yo gushyira mu bikorwa iyi myanzuro.

Impunzi ziri mu bihugu byombi zifatwa na bamwe nk'irindi pfundo ry'amakimbirane hagati y'ibi bihugu, ikibazo cyazo cyongeye guhuza abategetsi ba DR Congo n'u Rwanda bagifataho imyanzuro.

Ku butumire bwa Filippo Grandi, umukuru w'ishami rya ONU rishinzwe impunzi (UNHCR), Minisitiri w'ububanyi n'amahanga wa DRC Christophe Lutundula na Minisitiri Marie Solange Kayisire ufite impunzi mu nshingano mu Rwanda bahuriye i Genève mu Busuwisi kuwa mbere.

Filippo Grandi yatangaje ko yatumiye aba bategetsi ngo 'baganire ku gucyura impunzi ku bushake' ziri kuri buri ruhande.

Imibare ya UNHCR yo muri Werurwe (3) 2023 ivuga ko mu Rwanda hari impunzi 75,041 z'Abanyecongo naho muri DR Congo hari impunzi 208,297 z'Abanyarwanda.

UNHCR ivuga ko impunzi nshya 6,608 z'Abanyecongo zageze mu Rwanda hagati y'Ugushyingo(11) 2022 na tariki 04 Gicurasi(5) 2023.

U Rwanda, DR Congo na UNHCR, mu 2010 byasinye amasezerano yo gufatanya gucyura impunzi ku bushake yashyiriweho umukono i Goma n'i Kigali muri uwo mwaka.

Ayo yari akubiyemo; ubushake bw'ibihugu byombi mu gushyiraho ibituma impunzi zitaha ku bushake no kuzakira nta mbogamizi.

Yarimo kandi ko 'nta ugomba gucyurwa ku ngufu ajyanwa aho umutekano n'ubuzima bwe bishobora kujya mu kaga'.

Source : https://umuryango.rw/amakuru/mu-mahanga/politiki/article/rwanda-na-drc-bemeranijwe-uburyo-5-buzifashishwa-mu-gucyura-impunzi-z

Perezida Paul Kagame yavuze ko isomo rikomeye mu buzima kugira ngo umuntu agere ku cyo ashaka, ari ukutemera ko hari imbaraga zimusubiza hasi uko zaba zimeze kose.

Yabitangaje mu kiganiro yahaye abanyeshuri ba Harvard Business School, Ishami ry'ubucuruzi rya Kaminuza ya Harvard yo muri Leta Zunze Ubumwe za Amerika.

Amashusho yashyizwe hanze binyuze kuri Twitter y'Ibiro by'Umukuru w'Igihugu, agaragaza Perezida Kagame aganira n'abo banyeshuri muri Village Urugwiro i Kigali kuri uyu wa Mbere tariki 15 Gicurasi 2023.

Perezida Kagame yabwiye abo banyeshuri ko icyatumye u Rwanda rwongera kwiyubaka rukaba rugeze aho ruri uyu munsi nyuma ya Jenoside yakorewe Abatutsi, ari uko rwanze gukomeza kuba insina ngufi.

Yagize ati 'Igihugu twasanze cyasenyutse burundu. Abantu barazaga bagatangara bati 'Ese ubu aba bantu bazongera kubyutsa umutwe?' Na bamwe muri twe ni ko bibazaga.'

Yavuze ko no mu buzima busanzwe ariko bigenda, kuko hari aho bigera umuntu akisanga yasubiye hasi, gusa agaragaza ko nta mpamvu yo gucika intege uko byagenda kose.

Ati 'Isomo rya mbere ni uko uko washyirwa hasi kose n'uwo ari we wese cyangwa icyo aricyo cyose, ntuzemere kuguma hasi, shaka uburyo wongera guhagarara.'

Perezida Kagame yavuze ko kutemera guheranwa n'ibibazo ari ko kwihesha agaciro.

Yavuze ko iyo umaze kwiyemeza kudaheranwa n'ibibazo cyangwa ngo ube insina ngufi, hakurikiraho gukora kugira ngo uve aho wari uri.

Ati 'Icya kabiri ni ukwibaza ngo nabigeraho nte? Hari ibintu bikwiriye kuba bihari kugira ngo bigufashe kugera kuri izo ntego. Hari ubwo bwisanzure bugufashe kujya ku ishuri, kugira uburenganzira ku buzima, kubona ibyo kurya, uburenganzira bwo gutekereza ugatanga umusaruro.'

By'umwihariko ku Rwanda, Perezida Kagame yavuze ko icyatumye hari byinshi bigerwaho nyuma ya Jenoside yakorewe Abatutsi, ari ugukorana n'abaturage bakagira uruhare mu bibakorerwa.

Perezida Kagame ni umwe mu bayobozi bakunze gutanga imbwirwaruhame ku banyeshuri ba Harvard Business School, agaragaza urugendo rwo kongera kwiyubaka k'u Rwanda nyuma ya Jenoside yakorewe Abatutsi.

Source : https://umuryango.rw/amakuru/mu-rwanda/uburezi/article/ntuzemere-kuguma-hasi-perezida-kagame-aganira-n-abanyeshuri-ba-harvard-business

Iyo raporo yakozwe n'umunyamategeko udasanzwe washyizweho mu 2019, John Durham ivuga ko iperereza rya FBI ryakozwe nta sesengura ryimbitse ryabanje gukorwa, kuko nta bimenyetso bihagije byari bihari bikwiriye gutuma hatangizwa iperereza kuri Trump.

Durham muri raporo ye avuga ko amakuru FBI yagendeyeho atari ashingiye ku butasi bwizewe, ngo bunononsorwe neza.

Mu makosa kandi FBI ishinjwa ubwo yatangizaga iperereza, ni ugutangira 'yemeza' ko Trump yafashijwe n'u Burusiya gutsinda, ku buryo abakoze iperereza baritangiye babogamye mu myumvire.

Bavuga ko urebye uburyo FBI yitwaye muri iki kibazo, bitandukanye n'uko ijya yitwara mu zindi dosiye zikomeye.

Bavuga ko nko mu matora yo mu 2016, Hillary Clinton wari uhanganye na Trump n'abandi babanje kumenyeshwa na FBI urutonde rw'abantu bashobora kwibasirwa n'ibihugu by'amahanga, bishaka kubanyuraho ngo bazambye amatora, nyamara Trump we ntabwo yabimenyeshejwe.

FBI yisobanuye ivuga ko hari amabwiriza igenderaho yagiye ahinduka nyuma ya 2016 ku buryo iyo aba ahari icyo gihe iba yarakoze inshingano zayo neza.

Iperereza FBI yakoze ku ruhare u Burusiya bwaba bwaragize mu itorwa rya Trump, ryatumye hari bamwe batabwa muri yombi ndetse n'ibirego ku bahoze bakorana na Trump.

Icyakora iryo perereza ntabwo ryigeze rigaragaza uburyo u Burusiya bwaba bwarafashije Trump n'abamwamamazaga, kugira icyo bahindura ku byari kuva mu matora.

Iyi raporo ikimara gusohoka, Trump yanditse ku rubuga rwe nkoranyambaga Truth Social, ko Abanyamerika babeshywe ku manywa y'ihangu, ubwo bumvishwaga ko yafashijwe n'u Burusiya gutsinda amatora.

Iperereza kuri Trump ryatumye hatabwa muri yombi abantu batatu barimo umukozi wa FBI ushinjwa kumviriza umwe mu bamamazaga Trump. Hari abandi babiri bagizwe abere bashinjwaga kubeshya FBI.

Source : https://umuryango.rw/amakuru/mu-mahanga/politiki/article/fbi-yaba-yarahubutse-ubwo-yashinjaga-uburusiya-kugira-uruhare-mu-itorwa-rya

UMUHESHA W'INKIKO W'UMWUGA, ARAMENYESHA ABANTU BOSE KO AZATEZA MURI CYAMUNARA UMUTUGO UTIMUKANWA UGIZWE N'ISAMBU IRI MUKIBANZA GIFITE UPI:5/07/05/02/3171 IFITE N'UBUSO BWA 23744sqm IHEREREYE BUGESERA-MAYAGE-KAGENGE-GAKINDO.

IPIGANWA MU CYAMUNARA MU BURYO BW'IKORANABUHANGA RIZATANGIRA TARIKI YA 25/05/2023 I SAA SABA Z'AMANYWA KUGEZA 01/06/2023 I SAA SABA Z'AMANYWA.

WIFUZA IBINDI BISOBANURO YASOMA ITANGAZO RIRI HANO HASI CYANGWA SE AGAHAMAGARA KURI:+2507885881602

Source : https://umuryango.rw/amatangazo/article/itangazo-rya-cyamunara-y-umutungo-utimukanwa-ugizwe-n-isambu-iherereye-bugesera

Impuzamshyirahamwe y’Umupira w’Amaguru ku Isi (FIFA) yanzuye ko ikirego cya Adil Erradi Mohammed wahoze atoza APR FC yareze iyi kipe kumuhagarika binyuranyije n’amategeko ko nta shingiro gifite.

Ni icyemezo cyafashwe n’akanama gashinzwe uburenganzira bw’abakinnyi n’abatoza tariki ya 9 Gicurasi 2023, aho kateye utwatsi iki kirego cya Adil Erradi Mohammed.

Tariki ya 14 Ukwakira 2022, Adil yahagaritswe n’iyi kipe iminsi 30 bitewe n’umwuka mubi wari umaze kuza mu ikipe, yibasira abakinnyi mu itangazamakuru.

Uyu mutoza utarihanganiye uku guhagarikwa yahise agana muri FIFA kurega APR FC ngo imwishyure hafi imyaka 2 kuko yari amaze iminsi yongereye amasezerano.

Adil na Global Sports Consulting bamwunganiraga mu mategeko bareze bavuga ko yahagaritswe binyuranyijwe n’amategeko kandi ko umutoza atajya ahagarikwa iyo atari mu kazi ubwo aba yirukanywe.

Aba banatanze ibimenyetso by’uko yagiye mu kazi akagirwa kwinjira ku kibuga.

Mu ntangiriro z’uyu mwaka nibwo FIFA yasabye APR FC kwiregura ku byo iregwa. Iyi kipe yari yunganiwe na Serge Vitozz yagaragaje ko yahagaritswe kugira ngo igarure umwuka mwiza mu ikipe kuko wari umaze kuba mubi.

Yongeyeho ko itamwirukanye kandi iminsi 30 yahagaritswe yayihembewe ndetse yanamusabye kugaruka mu kazi nyuma y’ibihano akanga.

Aka kanama kafashe umwanya wo kwiga kuri iki kirego maze gasanga ibyo Adil Erradi aregera nta shingiro bifite.

Kamenyesheje impande zombi ko uwaba yifuza kubona ibyagendeweho hakemurwa iki kibazo ko kwishyura bitarenze iminsi 10 ubundi akabihabwa.

Adil Erradi yatsinzwe urubanza yarezemo APR FC

Source : http://isimbi.rw/siporo/article/ibya-adil-erradi-mohammed-wahoze-atoza-apr-fc-byarangiriye-mu-marira

Kuwa Gatandatu w’icyumweru gishize, kuri sitade ya Kigali Pele Stadium, habaye umukino wa 1/2 wo kwishyura mu mikino y’igikombe cy’Amahoro, umukino warangiye ikipe ya Rayon Sports yari yakiriye, inganyije na Mukura Victory Sports igitego 1-1, ndetse Rayon Sports ihita igera ku mukino wa nyuma ku giteranyo cy’ibitego 4 kuri 3.

Uyu mukino warebwe n’ingeri zitandukanye zirimo n’abatoza b’ikipe y’igihugu Amavubi, ndetse n’abatoza b’amakipe akina icyiciro cya mbere n’icyiciro cya kabiri mu Rwanda. 

Ahagana mu mbavu z’imyanya y’icyubahiro, mu kaboko k’iburyo, hagaragagaye umutoza Rwasamanzi Yves usanzwe utoza ikipe ya Marine FC, ari kumwe na Gatera Mussa utoza ikipe ya Gorilla FC.

Gatera Mussa arimo kwereka Rwasamanzi intege nke za Rayon Sports 

Nk’umunyamakuru wabakurikiranye, akenshi aba batoza bombi bagaragaye bari kuganira ku biri kubera ku kibuga, ndetse no ku mikinire ya Rayon Sports. Gatera Mussa niwe mutoza waherukaga gutsinda Rayon Sports, aho yayitsindiye kuri Kigali Pele Stadium ibitego 3-1, ndetse Rayon Sports ihita iva ku gikombe cya shampiyona.

Marine FC, ubwo shampiyona iraba igarutse mu mpera z’iki cyumweru, irakirwa na Rayon Sports mu mukino si musiga, Marine FC igomba gutsinda kugira ngo yizere kuguma mu cyiciro cya mbere.

Aba batoza bombi bicaranye iminota 90 ndetse barebera hamwe umukino 

Abatoza b’ikipe y’igihugu Amavubi nabo bari bitabiriye uyu mukino bicaye inyuma ya ba Gatera 

Gatera yanyuzagamo akongera akereka Rwasamanzi uko byakagenze  

Aba batoza bombi baraziranye kuko bakoranye mu makipe y’abato umwe yungirije undi 

Umukino warangiye Rayon Sports inganyije na Makura igitego kimwe kuri kimwe

Gatera Mussa ni we wakuye Rayon Sports ku gikombe cya shampiyona 2022-23

Source : https://inyarwanda.com/inkuru/129413/rwasamanzi-yves-yaje-i-kigali-kwiga-uko-batsinda-rayon-sports-amafoto-129413.html