Author: webrwanda

Harabura amasaha make APR FC igacakirana Pyramids FC yo mu Misiri mu mukino wo kwishyura w’ijonjora rya 2 rya CAF Champions League, umukino umutoza Froger ashobora gukora impinduka mu bakinnyi yabanjemo ku mukino ubanza.

Ni umukino uteganyijwe ku isaha ya saa 17h00′ z’i Kigali mu Rwanda bikaba saa 18h00′ zo mu Misiri, urabera kuri ’30 Juin Stadium’.

Umukino ubanza wabereye i Kigali amakipe yombi yanganyije 0-0 ni mu gihe iyi kipe y’Ingabo z’Igihugu isabwa gutsinda cyangwa kunganya birimo ibitego.

Abakinnyi APR FC yahagurukanye mu Rwanda bose bameze neza uretse Nshimirimana Ismail Pitchou ushindikanywaho kubera imvune yakuye mu Rwanda.

Urebye nta mpinduka nyinshi uyu mutoza ashobora gukora kuri uyu mukino uretse Victor Mbaoma ushobora kwicara hakabanzamo Nshuti Innocent.

Abakinnyi APR FC ishobora kubanzamo kuri uyu mukino

Pavelh Ndzila, Omborenga Fitina, Ishimwe Christian, Nshiyimiyimana Yunusu, Salomon Bindjeme Charles Banga, Taddeo Lwanga, Sharaf Eldin Shiboub Ali Abdelrahman, Niyibizi Ramadhan, Kwitonda Alain Bacca, Ruboneka Boasco na Nshuti Innocent

Mu kiganiro Minisiteri ya siporo n’ishyirahamwe ry’umupira w’amaguru mu Rwanda FERWAFA, bagiranye n’itangazamakuru kuri uyu wa Kane, irerero rya Bayern Munich yari ingingo nyamukuru, aho hagaragajwe ibikorwa by’irerero aho bigenze ndetse n’umusaruro wavuye mu bana batoranyijwe.

Ni ikiganiro cyari kiyobowe na Minisitiri wa Siporo,Aurore Mimosa Munyangaju ndetse harimo umuyobozi wa FERWAFA n’abandi bakorana bya hafi. Muri raporo y’ibanze Minisitiri wa Siporo Aurore Mimosa Munyangaju yavuze ko igikorwa cyo gutoranya abana cyari cyagenze neza ariko hakaza kubamo ikibazo cyo kubeshya imyaka. Yagize ati' Mu guhitamo abana twarebye ku bushobozi bwabo kandi bose bari beza. Nyuma yo kubahitamo twongeye kureba neza imyaka yabo hakurikijwe amategeko ariko dusanga hari ibyakozwe n'ababyeyi bifuzaga ko abana babo batoranywa.”

Minisitiri wa siporo Aurore Mimosa yemezako iri rerero ryitezweho kuzatanga umusaruro w’ikitegererezo mu bakinnyi b’abanyarwanda 

Tariki 17 Nzeri 2023 ni bwo kuri Stade ya Bugesera abatoza ba Bayern Munich bafatanyije na bamwe mu batoza bazwiho kureba impano z’abana mu Rwanda bahisemo abana 43 bazajya muri Academy ya Bayern Munich.

Vice Perezida wa kabiri wa FERWAFA ,Mugisha Richard nawe wari muri iki kiganiro, yashimangiye ubu buriganya bw’imyaka bwabaye, nk’umuyobozi wari ukuriye iki gikorwa.

Yagize Ati” “Twatoranyije abana 100 baturutse mu Rwanda hose ariko twemeza ko 43 ari bo bagomba gukomeza, kongeraho barindwi basimbura abagira ikibazo. Abo uko ari 50 ntibagezeyo bose kuko harimo ibibazo.”

“Dufatanyije na REB [Urwego rw'Igihugu rushinzwe guteza imbere Uburezi bw'Ibanze mu Rwanda] na NIDA [Ikigo cy'Igihugu gishinzwe Indangamuntu] twarebye ibyangombwa by'abatoranyijwe dusanga 20 barabeshye. Hari ababikoze mbere yo gutoranywa ndetse n'ababikoze nyuma yo kubafata. Tubimenye twahise tubasezerera.”

Vice Perezida wa kabiri wa FERWAFA, Mugisha Richard avuga ko bashakaga abana bavutse 2010 na 2011, ariko bakaba barasanzemo n’abavutse 2007 

Usibye aba bana kandi, hatoranyije n’abana 10 bazajya mu Gikombe cy'Isi gihuza amakipe y'abana baturuka mu bihugu bifitanye imikoranire na Bayern Munich 'FC Bayern Youth Cup' kizaba mu Ukwakira 2023.

Irerero rya Bayern ryaje risanga irerero rya PSG rimaze imyaka isaga ibiri, aho rikorera mu Karere ka Huye. Aya marerero yabayeho biturutse ku masezerano aya makipe yombi yagiranye n’u Rwanda binyuze mu Rwego rw’Igihugu rw’Iterambere (RDB).

Rwamasanzi Yves utoza Marine FC ari mubatoza bagize uruhare mu gutoranya aba bana 

Abanyamuryango b’amakoperative yibumbiye mu kigega 'SPF' gifasha abahinzi kubatuburira imbuto y’ibirayi, barinubira imikoreshereze mibi y’umutungo wabo aho bavuga ko ushobora kuba ugenda unyerezwa buhoro buhoro na bamwe mu banyamuryango barimo abayobozi bayo.

Ikigega, SPF, gihuza amakoperative y’abahinzi b’ibirayi bo mu turere twa Musanze , Burera na Gicumbi mu Ntara y’Amajyaruguru ndetse n’ayo mu Karere ka Nyabihu na Rubavu mu Ntara y’Uburengerazuba.

Bamwe mu banyamuryango b’iki kigega baganiriye n’ikinyamakuru ISONGANEWS.COM dukesha iyi nkuru, bavuze ko kuva batangirana n’ icyo kigega, ubwo batangaga umugabane shingiro w’ibihumbi magana abiri na mirongo itanu (250.000 frw) ngo nta na rimwe barahabwa inyungu kuri ayo mafaranga bakibaza niba batunguka bikabayobera.

Bavuga kandi ko umutungo w’ icyo kigega wayobejwe na Perezida witwa Karegeya Appolinaire n’ushinzwe imikorere n’imicungire yacyo ( Manager ), ubu bivugwa ko yamaze gusezera akigira ku mugabane w’Uburayi.

Umwe muri bo yagize ati ' Twakomeje kwibwa tureba , tukicecekera ariko igihe kirageze ngo duhaguruke , tubishyire hanze, turwanire uburenganzira bwacu n’inyungu zacu.'
Mugenzi we yagize ati ' Nk’ubu icyo kigega cya SPF kimaze imyaka ine giterwa inkunga na Leta ibinyujije muri Minisiteri y’ubuhinzi n’ubworozi (MINAGRI) kandi iyo nkunga ikaba itubutse kuko buri mwaka ngo hashyirwamo milliyari imwe n’ibihumbi magana atanu (1.000.500.000 frw ) kandi hakaba hashize imyaka ine itangwa ariko amenshi akigira mu mifuka ya bamwe.'

Bivugwa ko Karegeya Appolinaire ukiyoboye, amaze kwigwizaho imitungo y’ inzu nyinshi mu Mujyi wa Musanze no mu Mirenge ya Nyange na Kinigi , amasambu n’ imodoka nziza ndetse n’uwari Manager witwa Mbarushimana Salomon bivugwa ko yamaze gusezera no gusohoka mu gihugu akigira i Burayi.

Aba banyamuryango kandi batunga agatoki uyu muyobozi wabo Karegeya ko abayoboza inkoni y’icyuma kuko ushatse kugira ibibazo byinshi ababaza bamuhindura nk’umusazi ndetse bamwe bagakangishwa guhagarikwa, abandi bakemeza ko nta bumenyi buhagije afite bwo kubayobora kuko nta mashuri na mba azwi yize.

Ibi byateje ingaruka mbi zo kubura ku imbuto y’ibirayi muri aka gace gakunze kweramo ibirayi byinshi ku buryo hari na bamwe mu baturage bahisemo kureka kubihinga bakihingira urubingo abandi bagahinga itabi aho babihingaga.

Byatumye n’ibiciro ku masoko bizamuka cyane kuko ibirayi ubu biri kwigondera umugabo bigasiba undi kuko mu Kinigi na Musanze yose hasanzwe hafatwa nk’ikigega cy’igihugu mu birayi ubu biri kugura hagati ya 750 na 850 ku kilo kimwe naho Kigali ho bikajya hagati ya 1000 na 2000.

Karegeya Appolinaire uvugwa muri iki kibazo ubwo twamubazaga kuri iki kibazo yavuze ko kuba ibirayi biri guhenda byaturutse ku mihindagurikire y’ikirere n’ibiza byibasiye igihugu ariko ko bafite ingamba zo gukemura iki kibazo.

Yagize ati 'Impamvu y’ihenda ry’ibirayi ni imihindagurikire y’ibihe by’umwihariko ibiza byibasiye Intara y’Amajyaruguru n’iy’Iburengerazuba muri Gicurasi uyu mwaka. Icyo gihe abahinzi bari bafite ibirayi mu mirima byarahombye ku kigero cya 80% nyuma y’aho bitwawe n’amazi, ibisigaye urubura rurabicoca.'

'Ibyo byabaye by’umwihariko mu Mirenge ya Nyange na Kinigi mu gihe byari byitezwe ko bazasarura muri Kamena na Nyakanga. Icyo kivuyeho haje izuba rihera muri Kamena rigeza mu itangiriro za Nzeri. Abashyize imbuto mu butaka icyo gihe aho kumera yahiriye mu butaka kubera ko imvura ya Nyakanga itabonetse.

Akomeza agira ati 'Kugeza uyu munsi umusaruro w’ibirayi ntawo dufite bitewe n’izo mpamvu ebyiri, ari cyo gituma n’ibiciro bigenda bizamuka, ariko mu meza make ari imbere ibirayi bizaba byabonetse ibihe nibigenda neza n’ibiciro bigabanyuke.'

Umukozi wa RAB , Dr. Rucagu yijeje abahinzi ko hari umushinga uteganijwe kuzakorana n’abahinzi mu kubagezaho amafaranga azabafasha kugura ibikoresho byo kwifashisha mu kuhira ; mu gihe Umutesi Solange nk’uwaruhagarariye MINAGRI , yavuze ko kuba ubuhinzi bufite ubwishingizi bizatuma n’ibigo by’imari bishobora gutanga inguzanyo, bityo n’umuco wo kuzigama ukazamuka.

Abagabo babiri baturuka muri Repubulika Iharanira Demokarasi ya Congo batawe muri yombi bakekwaho kwiba ibikoresho by’Abanyeshuri bo muri INES-Ruhengeri.

Nk’uko bivugwa n’ubuyobozi bw’ibanze bwo mu Kagari ka Ruhengeri Umurenge wa Muhoza, ngo ubu bujura bwakozwe mu ijoro ryo kuwa 26 Nzeri 2023, ubwo binjiraga mu nzu icumbikamo abanyeshuri babiri biga muri Ines Ruhengeri bakiba ibikoresho birimo imashini ya Laptop, imyambaro n’amavarisi.

Abo banyeshuri bakimara kumva ko batewe n’abajura, batabaje irondo rirabatabara, babiri muri abo bakekwaho ubujura bahita bafatwa.

Umunyamabanga Nshingwabikorwa w’Akagari ka Ruhengeri, Ally Niyoyita, yemeje ko babiri bamaze gutabwa muri yombi, bakaba bamaze gushyikirizwa Polisi Sitasiyo ya Muhoza.

Ati 'Abo banyeshuri bakimara guterwa n’abajura, batabaje irondo rihita ribatabara, bamwe mu bakekwaho ubwo bujura barafatwa, aho bamaze gushyikirizwa Polisi Sitation ya Muhoza, bimwe mu byo bari bibye nabyo byafashwe.'

Kugeza ubu, imyambaro n’amavarisi nibyo byamaze gufatanwa abo bakekwaho ubwo bujura, mu gihe Laptop yo igishakishwa kuko bikekwa ko abo bajura bari kumwe n’abandi batarafatwa.

Kuri uyu wa Gatatu tariki ya 27 Nzeri 2023, Minisitiri w’Ingabo,Juvenal Marizamunda, ari kumwe n’Umugaba Mukuru w’Ingabo z’u Rwanda, Lt Gen Mubarakh Muganga , bakiriye Ambasadri wa Israel mu Rwanda, Einat Weiss,bagirana ibiganiro byo kunoza ubufatanye busanzwe buhari.

Nk’uko byatangajwe ku rukuta rwa X rw’Ingabo z’u Rwanda, Minisitiri Marizamunda n’Umugaba Mukuru w’Ingabo z’u Rwanda Lt Gen Mubarakh bakiriye Ambasaderi H.E Ms Einat Weiss baganira ku buryo bwo gushimangira ubufatanye buriho mu bya gisirikare.

Ibihugu by’u Rwanda na Israël bisanzwe bifitanye umubano mwiza w’ubufatanye bya gisirikare, ubuhinzi, iterambere n’ibindi.

Muri Mata 2019 nibwo iki gihugu cyafunguye Ambasade yacyo mu Rwanda hagamijwe kurushaho kunoza ubufatanye mu ngeri zitandukanye ndetse umubano mwiza uza gushimangirwa na Dr Romas wari Ambasaderi wa Israël wagizeuruhare rufatika ndetse akaza no gushyigikira bikomeye gahunda ya Girinka.

U Rwanda na Israël byatangiye imibanire mu 1962 ubwo rwabonaga ubwigenge. Mu 2014 rwabaye igihugu cya mbere cyo muri Afurika cyasinyanye amasezerano y’umubano na Israël ndetse mu 2015 rufungura Ambasade ifite icyicaro i Tel Aviv.

Muri Mutarama 2019 ibihugu byombi byashyize umukono ku masezerano yemerera sosiyete z’ubwikorezi ku mpande zombi gukoresha ibibuga by’indege no kugenderana mu ngendo zidahagaze.

Muri uwo mwaka kandi nibwo RwandAir yatangiye ingendo zigana i Tel Aviv muri Israel mu gihe mu 2016, Minisitiri w’Intebe w’iki gihugu, Benjamin Netanyahu, yasuye u Rwanda.

Ishuri Mpuzamahanga rya Wisdom School ryatangije ko ryatangiye kwandika no kwakira abanyeshuri bufuza kwiga ibijyanye n’Ubuforomo, Associate Nursing Program, n’abandi banyeshuri bifuza kuharererwa mu bindi byiciro n’amashami atandukanye.

Ubu buyobozi kandi buvuga ko bwiteguye no kwakira abanyeshuri bashya bazahiga mu mwaka w’amashuri 2023-2024 mu byiciro byose kandi ko abanyeshuri bazahiga bafite amahirwe menshi yo kuzakomereza amasomo yabo mu mashuri akomeye ku Isi afitanye imikoranire n’iri Shuri..

Umuyobozi Mukuru wa Wisdom Schools, Nduwayesu Elie avuga ko bahisemo gutangiza iri shami ry’ubuforomo ryiyongera ku yandi mashami ya siyansi basanganywe bagamije gutanga umusanzu wabo mu kuzibya icyuho cy’abakora mu rwego rw’ubuzima bakiri bake nk’uko Leta yabigaragaje.

Yagize ati 'Si mu Rwanda gusa ahubwo n’Isi yose ifite icyuho ku bakozi bo mu buvuzi, ababyeyi n’abana nibatugane turiteguye kubaha uburezi n’uburere kuko ubuwo bushobozi turabufite kandi n’imyanya irahari ihagije.'

Akomeza agira ati 'Turasaba ababyeyi ko bakomeza kutugirira icyizere nk’uko bakomeje kukitigaragariza, barabizi ko tutabatenguha kandio naho turiteguye dufite n’ubushobozi, dufite inyubako zihagije, ibikoresho n’aho abana bidagadurira n’aho bakorera ubushakashatsi harahari.'

Muri Wisdom Schools hari icyiciro cy’amashuri y’inshuke, abanza n’ayisumbuye icyiciro rusange n’abiga mu mashami ya Siyansi (Sciences), ubuforomo n’icungamutungo aho umwana uharangije wese abona amanota amwemerera gukomeza muri kaminuza ndetse hari n’ababa bafite amahirwe yo gukomereza amashuri yabo mu mahanga.

Umwihariko wa Wisdom Schools ni uko abana baharererwa batozwa gukora cyane no gufata neza ibikoresho byabo, kurya neza kuko ibihingwa byinshi bikenerwa babyiyezereza, kunywa amata y’inka biyororeye, ubusitani bwiza bwo mu bigo bufasha abana kuruhuka no kwigiramo byinshi ibibuga by’imikino n’imyidagaduro bihagije ndetse itegura egura abana gukora ibizamini bya Leta ndetse n’ibizamini mpuzamahanga.
Bafite kandi laboratwari zigezweho zibafasha gushyira mu bikorwa ibyo biga kuko mu gihe cy’umwaka umwe gusa uwaharerewe aba azi gukora isabune z’ubwoko bwose, amarangi ndetse n’amavuta, imodoka zibafasha mu ngendo zirimo n’ingendoshuri bajya kureba ibyo bize mu bitabo ndetse bakagira umwihariko wo gutoza abana kubaha Uwiteka Imana Umuremyi wa byose no gukunda Igihugu yabahaye.

Mu gushimangira uburere n’uburezi bufite ireme butangirwa muri Wisdom Schools, ku bana bose ariko cyane cyane ku biga mu mashuri yisumbuye, nta mwana w’ikirara uhaboneka kuko batozwa disipiline iri hejuru ariho bashishikariza ababyeyi kubasura bakirebera.

Ishuri Mpuzamahanga rya Wisdom School ryagabye amashami Kanzenze, Rubengera, Ngororero, Nyamasheke, Runda, Muyumbu, Nyagasambu, Rwamagana, Kayonza, Kabarore, Kiramuruzi na Nyagatare yiyongera kuya Musanze, Burera, Mukamira na Rubavu.

Wisdom School isaba ababyeyi bose kudatesha abana babo amahirwe kuko yo kuyigamo kuva mu mashuri y’inshuke kugeza muyisumbuye S6 kuko batanga uburezi n’uburere bifite ireme bakabyigisha neza mu ndimi z’Ikinyarwanda, Igifaransa, Igiswahili, Icyongereza n’Igishinwa.
Wisdom Schools yakira abana bose baturuka ku Isi hose aho bashishikariza ababagana ko babasura ku rubuga rwabo rwa Wisdomschoolsrwanda.com cyangwa bakabahamagara kuri 0788478469, 0782407217 na 0784188101 bagahabwa ibisobanuro birambuye.

Zabron & Deborah bamaze imyaka 3 babana nk’umugabo n’umugore kuko basezeranye kubana akaramata tariki 05/12/2020. Mbere y’uko Zabron yimukira muri Amerika, yaririmbanaga n’umugore we muri Korali Nyota ya Alfagili ya ADEPR Gatenga.

Ubwo umugore we yamusangaga muri Amerika, banzuye kuririmbana nk’itsinda ry’umugabo n’umugore, biyongera ku matsinda y’ama Couple nka James & Daniella, Papi Clever & Dorcas, Ben & Chance, Emmas & Salem, Eric & Yael ndetse na Cheric [Eric Kwizera & Chemsa Niyonsaba].

Umwaka umwe urashize kuva Zabron na Deborah batangiye kuririmbana nka ‘couple’. Bahereye ku ndirimbo bise “Ineza y’Imana”, bakurikizaho “Kwizera Yesu” yakunzwe cyane dore ko imaze kurebwa n’abarenga ibihumbi 60 mu mezi, none bamaze gushyira hanze indi bise “Umugisha”.

“Indirimbo umugisha ni ubutumwa bushingiye kuri ‘True story’ bikaba ari byo byabaye intandaro yo kwandika iyi ndirimbo. Ni indirimbo twanditse ku bwo kuzirikana ineza y'Imana mu isezerano yaduhaye kandi ikarisohoza!” Zabron Ndikumukiza ubwo yaganiraga na inyaRwanda.

Yakomeje avuga ko umwana ugaragara mu mashusho y’iyi ndirimbo ari uwabo, akaba yitwa Gianna Mugisha, ati “Bifitanye isano n’indirimbo Umugisha. Niwe mwana wa mbere, indirimbo tukaba twayishyize hanze bihuriranye n’isabukuru ye y’amavuko kuko yavutse kuri 28 Nzari 2022”.

Yavuze ko mu bihe bitoroshye bya Covid muri Werurwe 2020 byasanze barimo gutegura ubukwe, “ibyo bidahagije umwe mu babyeyi afatwa n’indwara ya stroke, dusuhuza imitima, twibaza ibibaye biratuyobera; ni bwo Imana yadusanze iduha isezerano ko ibyo twateguye bizagenda neza byose ndetse no kurusha uko twabipanze”. 

Ati: “Itubwira ko irinze umubyeyi; itubwira ko kandi ko ari Imana y'imigisha no hagati y'imiyaga nimiraba; iduha ikimenyetso cyo kuzibaruka mu gihe gito nyuma y'ubukwe ndetse na nyuma yuko izaba yarahuje umuryango (aho umwe yari atuye mu Rwanda undi ari muri USA), aho ni bwo twahawe n’izina ry'umwana Mugisha nk’ikimenyetso cyo kwibuka isezerano ry'Imana”.

Zabron arashima Uwiteka mu buryo bukomeye kuko uko yabigambiriye ni ko yabikoze. Avuga ko niyo mpamvu “twahisemo kwandika indirimbo y'uburyo intambwe ku yindi Imana yagendanye natwe ikaduha umugisha wayo mu bihe twatekerezaga ko byari bikomeye!!”.

Zabron na Deborah bamaze imyaka 3 bakoze ubukwe

Zabron na Deborah bamaze gushyira hanze indirimbo eshatu bakoze nka couple

Imfura ya Zabron na Deborah yabaye intandaro y’indirimbo “Umugisha”

Bari mu mashimwe akomeye nyuma yo kwibonera n’amaso yabo ibyo basezeranijwe muri Covid-19

Indirimbo yabo “Umugisha” yasohotse ku munsi imfura yabo Mugisha yizihiza isabukuru y’umwaka umwe w’amabuko

Mugisha wa Zabron na Deborah yavutse ku munsi nk’uyu

Umuryango wa Zabron na Deborah uri mu mashimwe akomeye yo gusohora kw’amasezerano

REBA INDIRIMBO NSHYA “UMUGISHA” YA ZABRON & DEBORAH

Ni umukino wabereye mu nzu y’urubyiruko ya Kimisagara, ari na ho ikipe ya Relax VC ikinira imikino yayo, ikaba ari nayo yatumiye ikipe ya Minisiteri y’ubuzima. Uyu mukino wari ugamije ubukangurambaga bwo kubungabunga iterambere ry’u Rwanda rw’ejo, warangiye Relax VC itsinze Minisiteri y’ubuzima amasezerano 3-1.

Amezi agiye kuba ane Minisiteri y’ubuzima itangije ubukangura bwa #TunyweLess, bugamije gusaba abanyarwanda kunywa inzoga ziri mu rugero.

Ikipe ya Relax VC ikinamo bamwe mu bahoze bakina umukino wa Volleyball ndetse n’abakunzi bawo 

Nyuma y’uyu mukino Kapiteni wa Minsante VC, Jean Pierre Kwizera  akaba  n’umukozi w’iyi Minisiteri ushinzwe amasoko, yasabye abanyarwanda by’umwihariko urubyiruko kunywa inzoga ziri mu rugero cyangwa bakazireka kuko zigira ingaruka nyinshi ku buzima bwa muntu.

Yagize ati: “Ubusanzwe kunywa inzoga ntabwo ari bibi, ahubwo ikibi ni ukunywa inzoga nyinshi zirengeje urugero zishobora gutuma ubuzima bwawe bujya mu kaga. 

Ntabwo ari ubuzima gusa, ushobora kunywa inzoga nyinshi zikagukenesha, inzoga nyinshi zishobora guteza amakimbirane mu rugo, gusa ikiruta ibindi ni uko kunywa inzoga nyinshi bitwara ubuzima bwa muntu.”

Kwizera kandi yasobonuye impamvu gahunda ya TunyweLess yahereye mu rubyiruko, avuga ko ari uko ari imbaraga z’igihugu. Ati: “Turimo kubaka u Rwanda twifuza. Uyu munsi byakugora kumvisha umusaza wakuze anywa inzoga ko agabanya uramutse ari we ushyizeho imbaraga. 

Ariko twahereye mu rubyiruko kukugira ngo nibura tubikore nk’isomo bamenye ibibi by’inzoga, kugira ngo babashe gutegura ejo heza, kuko uribyiruko rwiza, ni imbaraga nziza z’igihugu.”

Ikipe ya Minisante yagerageje ariko nk’uko bakinaga babivuga, bagowe n’ikibuga 

Mu mpera za Kamena uyu mwaka, ikigo cy’igihugu cy’ubuzima (RBC) cyashyize ahagaragara ibyavuye mu bushakashatsi bushya bwerekanye ko kunywa inzoga mu gihugu, byavuye kuri 41 ku ijana muri 2013, bigera kuri 48 ku ijana mu 2022.

Abantu bakunze kunywa inzoga nyinshi bavuga ko bari kurwana n’ubwigunge, kwiyibagiza ibibazo, gusa ugasanga ahubwo biteje ibibazo biruta ibyo bari bafite kubera kunywa inzoga.

Abahanga mu by’ubuzima bavuga ko umwe mu muti wo kureka inzoga cyangwa kuzigabanya, ufata wa mwanya wanywagamo inzoga ugashaka ikindi uhugiramo kirimo gukora siporo, gusoma ibitabo no kwiga ubumenyi bushya.

KANDA HANO UREBE AMAFOTO MENSHI

“>

“>