Author: webrwanda

The Ben watangiye umuziki mu ntangiriro za 2009 akiri mu mashuri yisumbuye, avuga ko muri iki gihe ahugiye mu myiteguro y'ubukwe bwe buzaba ku wa 23 Ukuboza 2023 muri Kigali Convention Center (KCC) mu Mujyi wa Kigali.

Mu kiganiro yahaye Radio Rwanda kuri uyu wa Gatandatu tariki 15 Ukwakira 2023, The Ben yavuze ko ubukwe bwe buzabanzirizwa n'umuhango wo gusaba no gukwa uzaba ku wa 15 Ukuboza 2023 mu busitani buherereye hafi na Intare Conference Arena i Rusororo.

Ati 'Ikintu kiri kunshimisha cyane ni uko ndi mu rugo. Nta byiza nko kuba ndi mu rugo, ikindi nacyo nshimishijwe n'iminsi iri imbere iri gutegura ubukwe bwanjye. Ndi umuntu wishimiye cyane.'

Ku gicamunsi cyo kuri Gatanu tariki 14 Ukwakira 2023, ni bwo The Ben yasohoye amashusho amugaragaza ari kumwe na Uwicyeza Pamella yandikaho tariki 23 Ukuboza 2023. Nta kindi yarengejeho, ariko abakunzi be ibihumbi n'ibihumbi bahise bamwifuriza kuzagira urugo rwiza.

The Ben wamamaye mu ndirimbo zirimo 'Ndaje' avuga ko yandika buriya butumwa yari azi ko abivuze mu marenga, ariko yasanze abantu babitahuye.

Yavuze ko iriya tariki we na Pamella ariyo bahisemo kugira ngo bazahurize hamwe inshuti n'abavandimwe mu gutangira urugendo rw'urugo rwabo.

Ati 'Tariki 23 Ukuboza ni wo munsi njyewe ndetse n'umutambukanyi [Pamella] twahisemo ko twaha ibirori ababyeyi ndetse n'abanyarwanda.'

Uyu munyamuziki ukorera ubushabitsi muri Leta Zunze Ubumwe za Amerika, avuga ko gutangariza ubukwe bwe ku mbuga nkoranyambaga biri mu murongo wo gutumira Abanyarwanda bose n'abandi bamushyigikiye mu muziki we amazemo imyaka irenga 18.

Ati 'Uyu ni umunsi wabo! Ndi umuhungu wabo bareze muri iyi myaka yose ishize. Ndumva nta kindi kintu nabitura usibye kubaha ubwo butumire n'ubwo tutazabona aho tubashyira. Ni nko kubabwira ngo ni umunsi wanyu, muzadushyigikire.'

Mu myaka itatu ishize The Ben ari mu rukundo na Pamella witabiriye Miss Rwanda 2019, baza imbere muri 'couple' z'ibyamamare zigarukwaho cyane ku mbuga nkoranyambaga. Ibihe bagiranye bakabisangiza abakunzi b'abo bituma benshi bahora babahanze ijisho.

The Ben avuga ko nk'undi wese witegura kurushinga hari byinshi byahindutse mu buzima bwe. Yasobanuye ko afite urutonde rurerure rw'ibintu byahindutse mu buzima bwe nyuma y'uko afashe icyemezo cyo kurushinga n'umukunzi we Uwicyeza.

Avuga ko impinduka zabaye mu buzima bwe zigaragarira buri wese. Akavuga ko yagutse mu bitekerezo ndetse no mu nshuti. Akomeza ati 'Kwaguka mu bikorwa bifatika. Ntabwo nabivuga byose, ariko habayeho impinduka kandi nziza.'

The Ben asanzwe atuye muri Amerika ari naho akorera ubushabitsi bushamikiye ku buzima n'ubwo atabitangaza mu buryo bweruye. Yabajijwe aho azatura n'umugore we Uwicyeza Pamella, asubiza ko ari hose ariko cyane cyane mu Rwanda. Yavuze ati 'Tuzaba hombi! Kuko aha ni mu rugo, turahafite.” 

Tariki 28 Ugushyingo 2020, The Ben yashyize amashusho y'amasegonda abiri kuri konti ye ya Instagram amugaragaza ahobeye Pamella amuturutse inyuma, mbese yamwiyegamije mu gituza.

Aya mashusho yafatiwe muri Tanzania aho The Ben yari agiye kumara iminsi ari kumwe na Miss Pamella. Bigaragara ko aya mashusho yafashwe na Miss Pamella ndetse humvikanamo indirimbo y'umuhanzi byakugora guhita umenya.

Urukundo rwa The Ben na Pamella rwitamuruye nyuma y'igihe cya Guma mu Rugo. Amafoto n'amashusho by'aba bombi byasakaye ku mbuga nkoranyambaga mu bihe bitandukanye, benshi batangira kubakeka amababa.

Nta gihe kinini kandi cyari gishize Pamella afashe ifoto ari kumwe na The Ben, yandikaho agira ati 'Uwanjye'. Gusa n'ubwo byari bimeze gutyo, bombi ntiberuraga ngo bavuge ko bakundana dore ko nta n'umwe wari wakabyemerera itangazamakuru ku nshuro nyinshi bagiye babibazwaho, gusa uko iminsi yahitaga indi igataha, bagendaga baca amarenga y'urwo bakundana.

Ku wa 09 Mutarama 2020, The Ben yizihije isabukuru y'amavuko. Mu bamwifurije isabukuru nziza y'amavuko barimo na Miss Pamella wavuze ati 'Uri umunyamutima mwiza, ugira urukundo, uri umuntu wo kwizerwa ndetse umutima wawe ni munini kukurusha. Imana ihe umugisha undi mwaka wawe.'

Miss Pamella ari mu bakobwa bavuyemo Miss Rwanda 2019, ndetse yanabaye igisonga cya Mbere cya Miss Zuri Africa Queen. Ni mu gihe The Ben amaze imyaka 18 ari ku gasongero k'abanyamuziki, nk'uko benshi babivuga.

The Ben wabonye izuba mu 1988, yamenyekanye mu ndirimbo zirimo 'Amaso ku Maso' yasohotse mu 2008, 'Uzaba uza (yaririmbanye na Roger)', 'Imfumbyi', 'Wigenda', 'Sinzibagirwa', 'Amahirwe ya Nyuma', 'Zoubeda' n'izindi ziri kuri Album ye ya mbere yise 'Amahirwe ya Mbere' yasohotse mu Ukwakira 2009.

Yagiye muri Amerika asohoye indirimbo zirimo 'Ese Nibyo'. Indirimbo ya mbere yakoreyeyo yitwa 'Turi Kumwe' ayikoranye na Mike Ellison.

 

The Ben yatangaje ko kuva yakwinjira mu rukundo na Pamella yahindutse mu buryo bw'ibitekerezo n'ibikorwa bifatika 

The Ben yavuze ko ashimishijwe no kuba agiye kurushinga na Uwicyeza Pamella bamaze igihe mu munyenga w'urukundo

The Ben yavuze ko ku wa 15 Ukuboza 2023 azatanga inkwano mu muryango wa Pamella 

Ku wa 31 Kanama 2022, The Ben yasezeranye imbere y’amategeko n’umukunzi we Uwicyeza Pamella

   

KANDA HANO UREBE AMASHUSHO Y'INDIRIMBO 'WHY' YA THE BEN NA DIAMOND

“>

Kuri uyu wa gatandatu, mu karere ka Rubavu habereye ibirori bya MTN Iwacu Muzika Festival 2023 nyuma y’uko ibi bitaramo byari bimaze kuzenguruka uturere tw’igihugu dutandukanye turimo Burera, Musanze, Huye, Ngomana Nyabihu.

Iwacu Muzika Festival yatangiye mu mwaka wa 2019. Mu mwaka wa 2020 byahise bikomwa mu nkokora n’icyorezo cya Corona Virus bikajya binyura kuri Televiziyo y’u Rwanda. Byaciye kuri televiziyo mu mwaka wa 2020 na 2021 naho mu mwaka wa 2022 ntabwo ibi bitaramo byigeze biba.

Nyuma y’umwaka bitaba, muri uyu mwaka bazanye imbaraga zidasanzwe ndetse MTN yiyemeza kuba umufatanya bikorwa mukuru mu myaka 5 bituma ibi bitaramo bihindurirwa izina byitwa MTN Iwacu Muzika Festival.

Ku ikubitiro ibi bitaramo byahereye mu ntara y’amajyaruguru hakurikiraho amajyepfo bikomereza mu ntara y’uburasirazuba. Hatahiwe intara y’uburengerazuba aho ku munsi w’ejo abahanzi 8 barimo bazenguruka u Rwanda bahaye ibyishimo abatuye mu karere ka Nyabihu.

Uyu munsi abahanzi 8 barimo Bruce Melodie, Bushali, Riderman, Bwiza, Chris Easy, Alyn Sano, Niyo Bosco ndetse na Afrique. Iki gitaramo cyabereye kuri Sitade ya Nengo hafi y’ikiyaga cya Kivu.

Umuhanzi Afrique niwe wabaye uwa mbere yinjira ku rubyiniro atangira kuryohereza abitabiriye ibi bitaramo bari bahageze ku bwinshi bategereje koza amaso yabo. Afrique yahise ahera ku ndirimbo Akanyenga akomereza kuri My Boo ari nako abafana be bakomeza kwinjira neza mu mujyo w’igitaramo.

Afrique wari ufite ababyinnyi babiri bamufashaga gususurutsa abitabiriye iki gitaramo, yasoreje ku ndirimbo yatumye amenyekana hose yise ‘Agatunda’ yatangiye kuririmba ahagana saa 15;12 ubona ko abantu bayishimiye cyane dore ko uko yaririmbaga yajyanaga n’abafana be ijambo ku rindi.

Nyuma ya Afrique, Niyo Bosco na gitari ye yahise yinjira ku rubyiniro agaragiwe n’abakobwa b’ababyinnyi ndetse n’awo bafatanya kuririmba bahita bahera ku ndirimbo Buriyana imaze umwaka igiye hanze akaba ari nayo ndirimbo Niyo Bosco aherutse gusohora.

Nyuma y’uko Niyo Bosco avuye ku rubyiniro amaze kuririmba indirimbo ye Seka, Bwiza yahamagawe ku rubyiniro aza azanye n’abasore bari bafite umuriro mu kanwa no mu ntoki nk’uko yabigenje ubwo yari mu gitaramo aherutse gukorera i Huye.

Bwiza yahise ahera ku ndirimbo ye Rumours ibyinitse akabifashwamo n’abasor be babyina yari yazanye bikongera morale mu bafana nabo bakiterera mu birere bararyoherwa cyane. Indirimbo Do me niyo yaririmbye mbere yo gusimbukana n’abafana be hanyuma agahita ava ku rubyiniro.

Nyuma y’umuhanzikazi Bwiza, yusta Band yarimo icuranga yahise icumbikira aho hanyuma Symphony Bnad imwe mu zikunzwe mu Rwanda mu gucuranga, yahise yerekeza ku rubyiniro itangira gucuranga banyuzamo banaririmba zimwe mu ndirimbo zabo.

Chris Easy yahise aza akurikiye Bwiza yinjirira ku ndirimbo Edeni abantu bamwereka urukundo rwinshi dore ko bari bakiri mu mujyo Bwiza yabasizemo. Ubu nibwo igitaramo cyari cyigeze mu mahina n’uwaje afashe ukuboko umukunzi we yamaze kukurekura arimo asimbuka.

Chris Easy wari wihagije utazanye ababyinnyi, nyuma yo kuririmba Stop yahise akomerezaho Inana abantu bakomeza kujya mu bicu ari nabwo yahitaga ava ku rubyiniro akurirwa mu ngata na Alyn sano winjiye ku rubyiniro aririmba indirimbo Urumuri yanifashishije itorero rubyina kinyarwanda.

Yifashishije zimwe mu ndirimbo ziri kuri album ye yise ‘Urumuri’, AlynSano wari wambaye mu buryo gugezweho yashimiye abantu bitabiriye iki gitaramo kubera urukundo bamweretse mu ndirimbo zose yaririmbye wabonaga ko bamufasha kandi bari bizihiwe.

Nyuma ya Afrique, Niyo Bosco, Bwiza, Chris Easy na Alyn Sano, hari hasigaye abahanzi batatu ari nabo bari mu bategerejwe cyane muri iki gitaramo. Muri abo batatu bahise babimburirwa na Bushali winjiriye ku ndirimbo ye ‘Ku gasima’.

Uretse kuba afite indirimbo zo mu njyana ya Kinyatrap zibyinitse, Bushali yasanze n’abafana be hanyuma bamwereka urukundo rwinshi ari nako babyina cyane. Bamwe mu bafana ba Bushali bari bazanye ibyapa byanditseho amazina ye uko yaririmbaga ari nako abafana be bazamura ibyapa.

Kubera ko hari hamaze kwira, Bushali yasabye abafana be gucana amatara ya telephone zabo hanyuma bafata ifoto. Bakimara gufata ifoto, Bushali yabisikanye na Riderman nta mwanya uciyeho dore ko bwari bwatangiye kwira kandi hari bamwe bari butahe kure kuko umubare w’abantu bari bahari batari baturutse mu mujyi wa Rubavu gusa.

Riderman yahereye ku ndirimbo ye Cugusa imaze imyaka 9 igiye hanze ariko ikaba icyumvikana nk’aho ari nshya mu matwi y’abafana be. Nyuma yo kuririmba indirimbo ye ‘Abanyakirori’ bashimiye abitabiriye igitaramo cye mu karere ka Rubavu hanyuma ahabwa impano y’inkoni n’umwe mu bafana be.

Mbere yo kwakira ku rubyiniro Bruce Melodie, MC Buryohe na Bianca bashimiye Muyango, Dj Briane na Coach Gael bari baitabiriye iki gitaramo cyabereye mu karere ka Rubavu. Mu gihe abantu bari bagikoma mu mashyi yo gushimira ibyo byamamare, Bruce Melodie yahise yinjira ku rubyiniro aririmba indirimbo ‘Ndumiwe’.

Kuva ku ndirimbo Ndumiwe, Funga macho, a laise, ikinya, ikinyafu, saa moya, akinyuma, ndakwanga, Bruce Melodie yatanze ibyishimo ku bakunzi be mu karere ka Rubavu hanyuma Dj Pius ahita yinjira ku rubyiniro mu buryo butunguranye baririmbana indirimbo bise ‘ubushyuhe’.

Bwiza yatanze ibyishimo ku baturage mu karere ka Rubavu.

Afrique niwe winjiye ku rubyiniro bwa mbere

Niyo Bosco yinjiranye ku rubyiniro na Guitar ye akora ibyo abanyaRubavu bamwifuzagaho.

Chris Easy yanejeje abafana be i Rubavu.

Riderman ntiyatengushye abafana be mu karere ka Rubavu.

Bushali akomeje guca impaka.

Abafana bitwaje icyapa cyanditseho Bushali.

Alyn Sano yaserutse aririmba indirimbo Urumuri yitiriye album ye.

Bruce Melodie yaraje neza abafana be mu karere ka Rubavu

“>

Wari umukino w’umunsi wa 7 wa shampiyona, aho Gasogi United yari yakiriye Amagaju FC. Gasogi United yari yakoze impinduka aho nka Malipangu Theodore umukinnyi uhagaze neza muri Gasogi United yari yabanje ku ntebe. 

Izi mpinduka zatumye Amagaju FC mu gice cya mbere yoroherwa n’umukino, birangira ku munota wa 45 ibonye n’igitego kuri Kufura yatewe na Rukundo Abdoulhiman. Igice cya mbere cyarangiye Amagaju FC ayoboye n’igitego kimwe ku busa bwa Gasogi United.

Mu gice cya kabiri, Gasogi United yatangiye kwikamata, ndetse ikina ishaka kwishyura, ariko igitego kirabura Malipangu Theodore yaje kwinjira mu kibuga ku ruhande rwa Gasogi United gusa uburyo bw’igitego bukomeza kwanga.

Umukino waje kurangira Amagaju FC agifite igitego kimwe ku busa bwa Gasogi United. Amagaju FC yahise agira amanota 13 inganya na Musanze FC iri ku mwanya wa kabiri.

Amars Niyongabo umutoza wa mukuru wa Amagaju FC 

KNC uyobora Gasogi United ntabwo yari yishimiye imikinire y’ikipe ye

Uwimana Jeannette azakorana n'uyu muryango mu gihe cy'umwaka umwe nk'uko byatangajwe kuri uyu wa Gatanu tariki 14 Ukwakira 2023.

Ku myaka 26 y'amavuko, Uwimana Jeannette ni we mukobwa wa mbere ufite ubumuga bwo kutumva no kutavuga wateye intambwe yitabira Miss Rwanda. Yize amashuri yisumbuye mu kigo gifasha abafite ubumuga cya HVP-Gatagara.

HI bagiye gukorana ni umuryango Mpuzamahanga udaharanira inyungu, ukora ibikorwa by'ubutabazi n'iby'iterambere mu bihugu birenga mirongo itandatu ku isi.

Mu bihe byashize, uyu muryango wakomeje kwagura ibikorwa byawo, nko guteza imbere imishinga yo gukumira ihohoterwa rishingiye ku gitsina binyuze mu buryo bwo kubungabunga ubuzima bwo mu mutwe bishingiye ku mbaraga z'abaturage, guteza imbere uburezi budaheza, kurinda abana ihohoterwa, kubungabunga ubuzima bwo mu mutwe no kwita kubafite ubumuga mu nkambi z'impunzi ziri mu Rwanda.

Abagera ku 70,000 bafite ubumuga nk’uko bitangazwa n’Ihuriro ry’abafite ubumuga mu Rwanda, NUDOR.

Mu kiganiro na InyaRwanda, Uwimana Jeannette yavuze ko yishimiye kuba agiye gukorana n'uyu muryango mu bukangurambaga bugamije gukuraho inzitizi abafite ubumuga bagihura nazo.

Yavuze ko umushinga we yatanze muri Miss Rwanda atari wo azashyira imbere mu gihe agiye kumara akorana n'uyu muryango. Ati 'Umushinga wanjye n'uwa HI ntaho bihuriye. Hari umushinga wa HI wo gukora ubuvugizi ku bantu bafite ubumuga kugirango bazajye bigirira icyizere n'umushinga wanjye bwite ntaho bihuriye.'

Akomeza ati 'Nzafata gahunda nzajye nkora ku mushinga wanjye, hanyuma ngire n'ibikorwa bya HI nkoraho.'

Uwimana yavuze ko azakorana n'uyu muryango mu gukorera ubuvugizi abafite ubumuga mu bijyanye na serivizi bakenera, no kugirango bagire ubuzima bwiza.

Mu gihe cy'umwaka umwe, avuga ko azifashisha imbuga nkoranyambaga ze, kandi azakorana na HI mu bukangurambaga bw'ubuvugizi ku bafite ubumuga.

Ati 'Ubu twasinye amasezerano y'umwaka umwe na HI yo kuba Ambasaderi wayo ariko bizaterwa, tuzareba umwaka umwe nturangira ese tuzaba tugeze he? Nshobora njyewe gusa kongerwa ayo masezerano kugirango niba hari ibyo tuzaba tutagezeho ijana ku ijana noneho tubigereho ijana ku ijana.'

Uwimana Jeannette avuga ko kwemeza ururimi rw'amarenga mu ndimi zikoreshwa mu Rwanda, ari imwe mu ntambwe yatuma abantu bashishikarira kwiga ururimi rw'amarenga.

Yavuze ko ururimi rw'amarenga rwemejwe, byatangira kwigishwa mu mashuri, ku buryo umubare munini wamenya ururimi rukifashishwa cyane muri sosiyete.

Mu kiganiro n'itangazamakuru, Umuyobozi wa HI mu Rwanda, Mélanie Geiser, yavuze ko gukorana na Miss Jeannette ari ibyo kwishimira kuko bahuje intumbero yo kurengera abafite ubumuga.

Yavuze ati 'Gukorana na Miss Jeannette ni iby’agaciro kuri twe kuko twasanze duhuje intumbero n’indangagaciro mu rwego rwo guharanira uburenganzira bw’abafite ubumuga.'

Akomeza ati 'Koko rero indangagaciro yacu yo kugira ubumuntu (Humanity) no guharanira ko buri muntu wese yagira uburenganzira kuri serivisi zose zitangwa nta numwe uhejwe (Inclusion) nizo ngingo zibanze ibikorwa byacu byose bishingiyeho, zikaba n’inkingi ya gahunda y’ubuvugizi tuzafatanya na Miss Jeannette kugirango ntihagire umuntu n’umwe usigara inyuma mu nzego zose z’ubuzima, haba mu burezi, iterambere n’imibereho myiza muri rusange.'

Kuva mu 1996, igihugu cyagize ibihe by'imibereho myiza, politiki ndetse n'ubuyobozi. Kuva icyo gihe HI yagize uruhare mu iterambere ry'igihugu igamije kuzamura imibereho y'abatishoboye – cyane cyane abafite ubumuga. 

Miss Uwimana Jeannette ashyira umukono ku masezerano y'umwaka umwe n'umuyobozi wa HI, Mélanie Geiser mu rugendo rw'ubukangurambaga bwo kurengera abafite ubumuga

Uwimana yavuze ko mu gihe cy'umwaka umwe azakoresha ijwi rye mu kumvisha sosiyete kwita ku bafite ubumuga no kumenya ururimi rw'amarenga

Jeannete Uwimana niwe mukobwa wa mbere ufite ubwo bumuga watinyutse kujya mu irushanwa ry’ubwiza rya Miss Rwanda

Uwimana asanzwe afite ikamba rya Miss Innovation yatsindiye muri Miss Rwanda 2022, byamuhesheje ku gukora ku mushinga w'ubworozi bw'ingurube

Ndayisaba Jean Damascène wabaye Perezida w’Ikipe ya AS Muhanga, yitabye Imana azize uburwayi.

Damascene yitabye Imana mu ijoro rishyira kuri uyu wa 14 Ukwakira, azize uburwayi akaba yaguye i Kigali mu Bitaro Byitiriwe Umwami Faisal hari nyuma y’uko avuye kwivuriza muri Kenya akongera akarwara.

Uyu mugabo wayoboye AS Muhanga hagati ya 2017 na 2023 akaba yari arwaye Kanseri y’Umwijima yari amaranye amezi abiri.

Uretse kuba Umuyobozi wa AS Muhanga, Ndayisaba yari umukunzi ukomeye wa Rayon Sports aho yanayifashije cyane iri i Bujumbura mu 2018 ubwo bamwe mu bayobozi bayo batabwaga muri yombi mbere yo gukina LLB Académic.

Damascene yitabye Imana azize uburwayi

Nyuma yo gutsinda igitego cyo ku munota wa nyuma cyahesheje intsinzi APR FC, Victor Mboama yashimiye Imana avuga ko ari yo yabikoze.

Hari mu mukino w’umunsi wa 7 wa shampiyona y’icyiciro cya mbere mu Rwanda umwaka w’imikino 2023-24 APR FC yaraye itsinzemo Mukura VS 1-0.

Uyu mukino wabereye kuri Kigali Pelé Stadium ku mugoroba wo kuri uyu wa Gatanu tariki ya 13 Ukwakira 2023, ntabwo woroheye ikipe y’Ingabo z’Igihugu kuko byayisabye gutegereza umunota wa nyuma.

Ubwo imitima y’abafana yari yahagaze, bakeka bagiye ku gubana amanota na Mukura VS, ku munota wa nyuma kapiteni w’iyi kipe, Omborenga Fitina yahinduye umupira mwiza maze rutahizamu wa APR FC ukomoka muri Nigeria, Victor Mboama nta kosa yakoze yahise ashyira awushyira mu rushundura ahagurutsa abafana b’iyi kipe. Umukino warangiye ari 1-0.

Ni igitego yishimiye cyane ku buryo no kukishimira mu buryo asanzwe akora bwa “Siuu” buzwi kuri Cristiano Ronaldo byamunaniye.

Victor Mbaoma yabwiye ikinyamakuru ISIMBI ko yishimye cyane kuba ahesheje ikipe ye amanota 3, gusa ngo byose ni Imana yabikoze.

Ati “Ndumva nishimye cyane, ndishimye cyane. Ndashima Imana kubera ko Imana niyo yatumye biba. Byanshimishije cyane guhesha ikipe yanjye amanota 3.”

Victor Mbaoma agize ibitego 3 mu mikino 6 ya shampiyona y’icyiciro cya mbere mu Rwanda amaze gukina.

Igitego yaraye atsinze kikaba cyahise gihesha ikipe ye ya APR FC kuyobora urutonde rwa shampiyona n’amanota 14.

Victor Mbaoma yashimiye Imana aho yavuze ko ari yo yabikoze

Nyuma yo kongera gusinyira Rayon Sports, Muhire Kevin yavuze ko ari amahirwe yagize kubera ko n’ubundi amakipe yagombaga kwerekezamo byasaga n’ibyanze.

Ku wa Kane w’iki Cyumweru tariki ya 12 Ukwakira nibwo Rayon Sports yemeje ko yongeye kugarura Muhire Kevin. Azayikinira kugeza muri Mutarama 2024, adasohotse nibwo yazongera amasezerano y’igihe kirekire.

Nyuma yo gusinyira iyi kipe, yabuze ko hari amakipe yagombaga kwerekezamo ariko ntibyakunda, agize amahirwe Rayon Sports iramuvugisha ahita ayisinyira.

Ati “Nari mfite amakipe menshi nakwerezamo nk’uko nabivuze, nanagombaga gusubira muri Kuwait ariko habaho kutumvikana hagati yanjye n’umutoza mushya bari bazanye mpitamo kuguma mu rugo, ngize amahirwe Rayon Sports iramvugisha mpitamo gusinyira Rayon Sports.”

Ku kuba asinyiye iyi kipe atinze kandi amaze igihe kinini nta kipe afite, yavuze ko yagombaga kubanza kureba iby’amakipe barimo bavugana aho bigana.

Ati “Nari mfite amakipe menshi tuvugana ngomba gutegereza, narayategereje ariko hazamo kutumvikana bitewe n’amafaranga bampaga, buri muntu aba afite intego ze n’ibintu yashyizeho bituma asohoka mu gihugu, ibyo bampaga nabonaga bitanyura mpitamo gusigara mu rugo.”

Gushyira hamwe, bakumvikana hagati yabo nk’abakinnyi nicyo abona kizabafasha kwegukana igikombe cya shampiyona cya 2023-24.

Ati “Haracyari kare, dufite abakinnyi beza, dufite umutoza mwiza rero ahasigaye ni ahacu ho gukora no kumvikana hagati yacu, icyizere kirahari nidukorera hamwe byose birashoboka.”

Muhire Kevin yatangiriye umupira w’amaguru mu Isonga FC yavuyemo 2015 ajya muri Rayon Sports yakiniye kugeza 2019.

Muri Mutarama 2019 nibwo yerekeje mu ikipe El Makasa mu Misiri yahise imutiza muri El Dakhlia mu gihe cy’amezi 6 nayo yo muri iki gihugu.
Muri Mutarama 2020 ikipe ye ya El Makasa yaje kongera kumutiza umwaka muri El Gaish.

Muri Werurwe 2021 ubwo yari asoje amasezerano ye yahise yerekeza muri Saham Club yamazemo ukwezi kumwe maze muri Mata 2021 agaruka muri Rayon Sports yakiniye kugeza muri Kanama 2022 ubwo yerekezaga muri Al- Yarmouk yakiniye umwaka umwe.

Muhire Kevin yavuze yahisemo kuguma mu Rwanda kubera ko amakipe yamwifuzaga yamuhaga amafaranga make

Umugabo wo mu gihugu cya Nigeria yagize gutya nk’ibisanzwe yitekera igi ry’inkoko mu mazi atetse. Nyuma y’uko igi rihiye, nta kindi yari gukora uretse kubanza kurihoza akoresheje amazi akonje kugira ngo biriya bishishwa by’inyuma bitamutwika.

Igi rimaze guhora, umugabo yagiye kurifata ngo atangire arikoreshe icyo yaritekeye(kurirya), n’uko atangira kuritonora nk’ibisanzwe bya bishishwa, akimara kuryaho gato, yahise akubitana n’irindi ‘Igi’ ririmo imbere ndetse rifite n’ibishishwa byaryo.

Byamutaye mu rujijo rukomeye yibaza ibyo ari kubona biramuyobera, niko guhita yikoza ku mbuga nkoranyambaga atangira kubaza abantu ibyo bintu niba bo baba bazi ibyo aribyo.

Gusa ariko abantu bamwe na bamwe bagendaga bamubwira ko nabo bagiye bahura nabyo, ugasanga utonoye igi watangira kurirya aho kugira ngo uhure n’igice cy’umuhondo, ukongera ugahura n’irindi (Igi) rifite n’ibishishwa.

Nyuma yo gutonora igi yatunguwe no gusangamo irindi mo imbere

Comfort People Ministries yasohoye iyi ndirimbo kuri uyu wa Gatandatu tariki 15 Ukwakira 2023, nyuma yo gutangira gukorana mu buryo bw'umuziki n'inzu ifasha abahanzi mu bya muzika 'Label' yo muri Leta Zunze Ubumwe za Amerika bita J-3:16 Records ihagarariwe na AnthonyESullivan.

Umuyobozi wa Comfort People Ministries, Ndayishimiye Jean Damascène yabwiye InyaRwanda ko bagize igitekerezo cyo gukorana iyi ndirimbo 'My Prayer' nyuma y'ibiganiro bagiranye n'umuyobozi wa Label wabo biyemeza kuyikora ibyinitse kandi ihimbaza Imana.

Avuga ko umuyobozi w'iyi Label ari nawe wagize uruhare mu kubahuza n'umuhanzi Kinq Jamez bakoranye indirimbo. Ibaye indirimbo ya kabiri Kinq Jamez akoze nyuma y'uko atangiye gukorana n'iyi Label.

Ndayishimiye ati 'Umuyobozi wacu niwe wampaye igitekerezo ko nk'itsinda dushobora gukora iyi njyana tukarema ikintu gishya kandi giherekejwe n'ubutumwa bwiza. Kubera ko ari we uduhagarariye yanadufashije guhuza imbaraga na Kinq Jamez wo muri Nigeria.'

Iyi ndirimbo yakorewe muri Rwanda, muri Nigeria ndetse no muri Leta Zunze Ubumwe za Amerika. Ni indirimbo avuga ko itaboroheye mu kuyikora, kuko byasabye ko bafata amashusho yayo inshuro ebyiri, bitewe n'uko amashusho ya mbere bafashe bayabuze.

Akomeza ati 'Twafashe amashusho inshuro ebyiri zitandukanye. Twari twakoranye n'abantu badafite ibyangombwa tutabizi bakoresheje 'Drone' bidusaba kuyisubiramo bidutwara imbaraga. Byageze aho ducika intege ariko dukomeza kugerageza kugeza ubwo indirimbo isohotse.'

Amashusho y'iyi ndirimbo agaragaramo umukinnyi wa filime wamamaye cyane mu mazina ya Nzovu. Muri iki gihe agaragara cyane mu biganiro binyuranye atanga ku miyoboro itandukanye ya Youtube.

Muri rusange iyi ndirimbo ishingiye ku kugaraagza imbaraga ziva mu gusenga. Mu mashusho y'iyi ndirimbo, itangira abaririmbyi bari mu rugendo bihuta mu mudoka bagaharikwa na Police, batakaza ibyiringiro by'uko urugendo rw'abo rukomeza, ariko barasenga cyane.

Damas akomeza ati 'Duta ibyiringiro ariko bamwe muri twe barasenga nyuma Imana idukorera igitangaza umupolisi araturekura tujya mu gikorwa twari dufite igitaramo kandi byagenze neza.'

Comfort People Ministries ni itsinda ry'abaramyi rigizwe n'abantu babarizwa mu matorero atandukanye. Rifite isura nshya n'impinduka mu mikorere, cyane ko rigizwe n'abantu bakomoka mu Rwanda no muri Repubulika Iharanira Demokarasi ya Congo.

Bafite intumbero yo kwagura imipaka no guhuza abantu batari abo mu gihugu kimwe gusa ahubwo muri Afurika no ku Isi yose. Bagamije gutanga ihumure no gushyira imbere kwamamaza ubutumwa bwiza bwa Yezu Kristo.

Comfort People Ministries yasohoye amashusho y'indirimbo 'My Prayer' bakoranye na Kinq

Comfort People Ministries ivuga ko itorohewe cyane n'igikorwa cyo gufata amashusho y'iyi ndirimbo kuko habayeho kubura aya mbere

Umuraperi Kinq Jamez wo muri Nigeria utanga icyizere yahuje imbaraga na Comfort People Ministries mu Rwanda

Umukinnyi wa filime wamamaye nka Nzovu ari mu bakinnyi b'imena bagaragara muri iyi ndirimbo

Amashusho y'iyi ndirimbo yakorewe mu bice bitandukanye by'u Rwanda

Anthony, umuhanzi akaba Producer utuye muri Leta ya California muri Amerika washinze Label ibarizwamo Comfort Ministries People

KANDA HANO UREBE AMASHUSHO Y'INDIRIMBO 'MY PRAYER' YA COMFORT MINISTRIES NA KINQ JAMEZ

“>

Uyu muhanzi ukora umuziki mu Karere ka Ngororero mu Burengerazuba bw'u Rwanda, yasohoye iyi ndirimbo ku mugoroba wo kuri uyu wa Gatanu tariki 14 Ukwakira 2023, nyuma y'iminsi yari ishize ayirarikiye abantu.

Nsengimana Justin yabwiye InyaRwanda ko yanditse iyi ndirimbo mu rwego rwo kugaragaza uburyo Abanyarwanda bishimiye imiyoborere myiza ya Perezida Kagame.

Ati 'Usanga abaturage benshi nyuma y'uko Perezida Kagame yemeye ko 2024 ari umukandida, intero n’inyikirizo ni imwe bati 'tukuri inyuma Paul Kagame mu muvuduko n’icyerekezo cy’iterambere mwaduhaye.'

'2024 ni 100% kubera ibikorwa mwasezeranyije abanyarwanda byagezweho hakaba hari n’ibyikubye. Kuri mwe, imvugo ni yo ngiro mu Rwanda nta kidashoboka. Umuturage yivuriza kuri 3000 Frw umwaka wose.'

Uyu mugabo avuga ko yanditse iyi ndirimbo nyuma yo gukusanya ibitekerezo mu banyarwanda batuye imbere mu gihugu n'abatuye hanze y'u Rwanda.

Yanashingiye ku bitekerezo asangiye n'urubyiruko rukoresha imbuga nkoranyambaga binyuze mu itsinda bashinze bise 'Muze turwubake'.

Uru rubyiruko ruherutse gukorera ingendo mu turere dutandukanye, aho bahuye n'abaturage banyuranye bagaragaza ko bishimira ibyo Perezida Kagame yabagejejeho.

Nsengimana Justin ati 'Abaturage baturiye utwo turere mu buhamya batanga iyo babaga bagiye gusoza basorezaga ku ijambo rigira riti Perezida wacu bwite Tumuri inyuma.'

'Akomeze atuyobore, atugeze kuri byinshi kuko turacyamukeneye, 2024 tumuri inyuma. Nibwo twahisemo gukora iyindirimbo kugirango tumugaragarize ko tumuri nyuma rwose kuko indirimbo igerakure hashoboka kuruta kuvuga ubutumwa Nyakubahwa Perezida w’abanyarwanda Paul Kagame abyumve abanyarwanda tumuri inyuma.'

Muri iyi ndirimbo, uyu muhanzi agaruka ku bikorwaremezo birimo nk'amashanyarazi yageza mu bice bitandukanye by'u Rwanda, imibereho myiza y'abanyarwanda, umutekano usesuye n'ibindi biri mu bituma abanyarwanda batekanye.

Nsengimana ati 'Umuriro w’amashanyarazi ntukiri uw’abifite gusa nk’uko byahoze mbere. Imibereho myiza y’Abanyarwanda muri iki gihe ni yo yatumye icyizere cyo kubaho cyiyongera.'

'Leta yashyize imbaraga mu buhinzi bugezweho aho henshi hifashishwa imashini mu kuhira bituma n’umusaruro wiyongera, imidugudu igezweho yubakiwe abatishoboye.'

'Umugani wa wa muhanzi uyu ni Salomo wavukiye i Rwanda Nyakubahwa Perezida wacu twitoreye Imana idufashe ikuduhere impagarike n’ubugingo ubundi utuyobore kugeza, ibikorwa birivugira turekane n’ibigarasha bajye bahora bavuza induru nicyo bashoboye n’ubundi.'

Ku wa 19 Nzeri 2023, nibwo Perezida Kagame yatangaje ko aziyamamaza kuri manda ya Kane mu matora ya Perezida ateganyijwe kuba muri Kanama 2024.

Mu nkuru yasohotse mu kinyamakuru Jeune Afrique, Perezida Kagame yavuze ati 'Yego, rwose ndi umukandida.” Akomeza ati '[…] Nshimishijwe n’icyizere Abanyarwanda bangaragariza. Nzabakorera buri gihe, igihe cyose nzaba mbishoboye…'

Nsengimana Justin wakoze iyi ndirimbo 'Tukuri inyuma Perezida Kagame' avuga ko yakuze yumva afite impano yo kuririmba mu bwana bwe, ariko aza kubikora nk’umwuga mu 2017.

Yamenyekanye mu zindi ndirimbo zirimo izo kwibuka Jenoside yakorewe Abatutsi 1994 zirimo iyitwa Abandi(Ibitenge), Muvandimwe, Mama Yaranyishe n’izindi zitandukanye zakunzwe cyane.

'Tukuri inyuma' ni indirimbo yakozwe mu buryo bw’amajwi na Rudahezwa, amashusho akorwa na Director Shaffy.

Nsengimana Justin yasohoye amashusho y'indirimbo yumvikanisha ko biteguye gushyigikira Perezida Kagame mu matora

Nsengimana avuga ko indirimbo 'Tukuri inyuma Perezida Kagame' yayikoze ashingiye ku bitekerezo by'abanyarwanda baba mu gihugu no hanze

Nsengimana avuga ko ibikorwa Perezida Kagame yagejeje ku banyarwanda byivugira

KANDA HANO UREBE AMASHUSHO Y'INDIRIMBO 'TUKURI INYUMA PAUL KAGAME'

 “>