Webrwanda Backend

Author: webrwanda

  • Tumaini Byinshi yahuje imbaraga na Aime Frank… – #rwanda #RwOT

    “Humura” ni indirimbo yanditswe mu mwaka wa 2019. Amajwi yayo (Audio) yakozwe na Dayton pro, naho amashusho (Video) akorwa na 1SHOT ya Licky Licky. Baririmbamo ko Umwami Imana ahindura amateka akayagira meza, ndetse bakaba ari abagabo bo kubihamya.

    Ni indirimbo irimo amagambo y'ubuhamya n'ihumure inibutsa abantu ko niba baravutse ubwa kabiri, ubuzima bwabo bakabuha Imana ntibazaterwe ubwoba n’ibihe kuko ubarimo arusho byose imbaraga kandi ni nawe ubihindura nk’uko bitangazwa n’aba baramyi.

    Tumaini yabwiye inyaRwanda ko nubwo yari maze igihe adashyira hanze indirimbo nshya ariko “ni uburyo bwiza bwo gutegura no kubisengera”. Avuga ko umushinga w’iyi ndirimbo “Humura” umaze hafi amezi atatu awutegura kandi “turashima Imana ko byose byagenze neza”. 

    Yunzemo ati “Dukomeje gushima Imana ko ikomeje kudukoresha dufite indirimbo nyinshi kandi nziza turi gutegura twizeye ko zizahembura imitima. Dufite ibikorwa byinshi Yesu aduhagurukije gukora turabibagezaho vuba mudukurikire kuri platforms zacu bizabageraho mu buryo bworoshye”.

    Tumaini Byinshi na Aime Frank bombi batuye muri Leta Zunze Ubumwe za Amerika. Tumaini akunzwe mu ndirimbo yise “Abafite Ikimenyetso” yarebwe n’abarenga Miliyoni 5. Aime Frank nawe si agafu k’imvugwarimwe mu muziki kuko indirimbo ye “Ubuhamya” imaze kurebwa na Miliyoni 1.6.

    Tumaini Byinshi na Aime Frank baririmbye ko ari abagabo bo guhamya ko Imana ihindura amateka

    Tumaini Byinshi yateguje izindi ndirimbo zinyuranye nyuma yo gukorana indirimbo na Aime Frank

    REBA INDIRIMBO “HUMURA” YA TUMAINI BYINSHI FT AIME FRANK

    REB INDIRIMBO “BFITE IKIMENYETSO” YA TUMAINI BYINSHI 

    Source : https://inyarwanda.com/inkuru/135953/tumaini-byinshi-yahuje-imbaraga-na-aime-frank-baratira-amahanga-imana-ihindura-amateka-vid-135953.html

  • Premier League: Manchester City yikoreye Manc… – #rwanda #RwOT

    Uyu ni umukino wabaye kuri iki cyumweru saa kumi n’imwe n’iminota 30 ku kibuga cya Manchester United Old Trafford.

    Abakinnyi 11 ba Manchester United babanje mu kibuga: Onana; Dalot, Evans, Maguire, Lindelöf; Amrabat, McTominay, Eriksen; Bruno Fernandes, Rashford na Hojlund.

    Abakinnyi 11 Manchester City babanje mu kibuga: Ederson; Walker, Stones, Rúben Dias, Gvardiol; Foden, Rodri, Bernardo Silva; Julián Álvarez, Haaland na Grealish.

    Uko umukino wagenze muri make

    Ikipe ya Manchester City yatangiye umukino iri hejuru cyane ugereranyije na Manchester United ndetse ku munota wa 7 yashoboraga gufungura amazamu aho Kayle Walker yahinduye umupira usanga Phil Foden ashyira ku mutwe maze Onana akozaho intoki umupira urongera usanga Haaland ariko Harry Maguire aratabara umupira awukuramo.

    Umukino wakomeje n’ubundi Manchester City ikomeza kwiharira umukino ariko Manchester United yo igategereza amahirwe ngo uwirukankane.

    Ku munota wa 24 umusifuzi yagiye kuri VAR kureba ikosa ryari ryabaye ku munota wa 14 aho Kayle Walker yarekuye kufura, Rasmus Hoejlund akurura Rodrigo agwa mu rubuga rw’amahina. Yavuyeyo atanga penariti, iterwa neza na Erling Haaland aba arayinjije igitego cya 1 kiba kirabonetse.

    Nyuma yo gutsindwa, Manchester United nayo yabonye uburyo buremereye bwashoboraga kuvamo igitego abo myugariro wa Manchester City yihereye umupira rutahizamu, Rasmus Hoejlund maze arawufata agenda yiruka yinjira mu rubuga acenga umuzamu agiye gutereka mu nshundura biranga.

    Igice cya mbere kigiye kurangira Onana yakuyemo igitego cyabazwe ku mutwe uremereye wari urekuwe na Erling Haaland bituma bajya mu kiruhuko Manchester City igifite 1-0.

    Igice cya kabiri cyatangiye Manchester United ikora impinduka mu kibuga havamo Sofian Amrabat hajyamo Mason Mount ngo ishake uko yakwishyura ariko biba iby’ubusa, ku munota wa 49 ihita itsindwa igitego cya 2 gitsinzwe na Erling Haaland akoresheje umutwe ku mupira yahawe na Bernardo Silva.

    Umukino wakomeje Manchester City yiharira umukino cyane ari nako abakinnyi nka Jack Grealish babona uburyo imbere y’izamu bwo gutsinda igitego cya 3 ariko ntibabubyaze umusaruro.

    Ku munota wa 70 Marcus Rashford yarase igitego aho yabonye umupira ari mu rubuga rw’amahina rwa Manchester City wenyine ariko arekuye ishoti rinyura hepfo y’izamu gato.

    Ku wa 77 Manchester City yabonye igitego cya 3 gitsinzwe na Phil Foden ku mupira mwiza yahawe na Erling Haaland. Umukino warangiye Manchester United ikubitiwe imbere y’abafana bayo ibitego 3-0.

    Umwe mu mipira iremereye Onana yakuyemo 

    Umukino warangiye Manchester United ikubiswe ibitego 3-0 na Manchester City

    Source : https://inyarwanda.com/inkuru/135952/premier-league-manchester-city-yikoreye-manchester-united-irekurira-mu-kinogo-135952.html

  • Kimenyi Yves yagize imvune ikomeye akurwa mu kibuga atumva #rwanda #RwOT

    Umunyezamu wa AS Kigali, Kimenyi Yves yagiriye imvune ikomeye ku mukino wa Musanze FC aho yakuwe mu kibuga atumva.

    Hari mu mukino w’umunsi wa 9 wa shampiyona wo Musanze FC yakiriyemo inatsinda AS Kigali 1-0.

    Nyuma y’igitego cyagiyemo ku munota wa 12, ku munota wa 26, umunyezamu Kimenyi Yves yagonganye na rutahizamu Peter Agbelov ari nabwo yahitaga avunika igufwa ry’ukuguru “Tibia”.

    Uyu mukinnyi yahise yihutanwa mu bitaro by’Akarere ka Musanze aho yagize ikibazo cya “Tibia na Pelon”.

    Kimenyi Yves akaba yahise azanwa i Kigali aho agomba kubagirwa ku munsi w’ejo mu Bitaro bya Gisirikare i Kanombe.

    Kimenyi Yves yakuwe mu kibuga atumva

    Source : http://isimbi.rw/siporo/article/kimenyi-yves-yagize-imvune-ikomeye-akurwa-mu-kibuga-atumva

  • APR FC na Rayon Sports zaguye miswi ya 0-0 mu mukino w'umunsi wa 9 – Uko imikino yose yarangiye #rwanda #RwOT

    Ubwo hakinwaga imikino y'umunsi wa 9 wa shampiyona y'u Rwanda mu kiciro cya mbere mu bagabo, ikipe ya APR FC yari yakiriye Rayon Sports umukino urangira amakipe yombi anganya 0-0.

    Ni umukino wabereye kuri Kigali Pele Stadium guhera ku isaha ya Saa cyenda zuzuye, aya makipe yombi akaba yari ategerejwe n'abatari bake bakunda ruhaho Nyarwanda.

    Uyu mukino wagiye kuba amakipe APR FC ihagaze neza kuko yari ku mwanya wa kabiri naho Rayon Sport yo yari ku mwanya gatandatu.

    Uyu mukino ukaba wakiniwe hagati cyane kuko ntakipe n'imwe yagize amahirwe yo kureba mu izamu kenshi ngo bibe byatanga igitego.


    Wari umukino ugiye kuba ikipe ya APR FC iheruka gutsindwa na Rayon Sports mu mikino itatu iheruka kubahuza.

    Uyu mukino warangiye ari ubusa ku busa, wagaragayemo abakinnyi b'anyamahanga ku ruhande rw'ikipe y'ingabo z'igihugu akaba aribwo bwa mbere mu myaka isaga 11 iyi kipe idakoresha abanyamahanga.

    Usibye uyu mukino wabaye uyu munsi, dore uko indi yakinwe ku munsi wa 9 yagenze:

    Gorilla FC 2-3 Marine FC

    Kiyovu SC 6-1 Etoile de l'Est

    Police FC 1-0 Gasogi United

    Mukura VS 2-1 Etincelles FC

    Bugesera FC 2-2 Amagaju FC

    APR FC 0-0 Rayon Sports

    Sunrise FC 0-1 Muhazi United

    Musanze FC 1-0 AS Kigali

    The post APR FC na Rayon Sports zaguye miswi ya 0-0 mu mukino w'umunsi wa 9 — Uko imikino yose yarangiye appeared first on RUSHYASHYA.

    Source : https://rushyashya.net/apr-fc-na-rayon-sports-zaguye-miswi-ya-0-0-mu-mukino-wumunsi-wa-9-uko-imikino-yose-yarangiye/?utm_source=rss&utm_medium=rss&utm_campaign=apr-fc-na-rayon-sports-zaguye-miswi-ya-0-0-mu-mukino-wumunsi-wa-9-uko-imikino-yose-yarangiye

  • APR FC yaguye miswi na Rayon Sports mu mukino hibutswe La Galette (AMAFOTO) #rwanda #RwOT

    APR FC yaguye miswi y’ubusa ku busa na Rayon Sports mu mukino wa shampiyona hibutswe n’umufana wa APR FC waraye yitabye Imana.

    Wari umukino w’umunsi wa 9 wa shampiyona y’icyiciro cya mbere mu Rwanda umwaka w’imikino 2023-24, APR FC yari yakiriyemo Rayon Sports kuri Kigali Pelé Stadium kuri iki Cyumweru tariki ya 29 Ukwakira.

    Ni umukino APR FC itari ifite Sharaf Eldin Shiboub Ali Abdelrahman ukirutse Malaria ndetse na Niyibizi Ramadhan ufite ikibazo cy’imvune .

    Rayon Sports nayo ntabwo yari ifite Nsabimana Aimable umaze iminsi ufite ikibazo cy’imvune.

    Imikino 3 yaherukaga guhuza amakipe yombi yose Rayon Sports yarayitsinze.

    Ni umukino APR FC yagiye gukina mu ijoro ryakeye yapfushije umwe mu bakunzi bayo bakomeye, Mike Feller uzwi nka La Galette wazize Kanseri yo mu muhogo, abakinnyi ba APR FC basohotse bambaye imipira iriho ifoto ye ndetse n’umusifuzi Twagirumukiza Abdul Karim mbere yo gutangiza umukino hafashwe umunota wo kumwibuka.

    Rayon Sports yatangiye igice cya mbere ishyira igitutu kuri APR FC ndetse mu minota 2 yari imaze kubona koruneri 2 n’igitego cyatsinzwe na Esenu ariko umusifuzi avuga ko yari yaraririye.

    Ku munota wa 5 Luvumbu yahinduye umupira mwiza imbere y’izamu ariko habura ushyira mu izamu, abakinnyi ba APR FC bawohereza muri koruneri itagize icyo itanga.

    Ojera yagerageje ishoti ku munota wa 7 ariko umunyezamu Pavelh Ndzila arawufata.

    Pavelh Ndzila yarokoye APR FC ubwo Madjaliwa yatangaga umupira Esenu agasigara arebana na Ndzila ariko yatera mu izamu akawukuramo.

    Niyigena Clement yakuye umupira ku kirenge Esenu ubwo yiteguraga gutera mu izamu ku munota wa 13.

    Kubera guhagarara nabi ku bwugarizi bwa Rayon Sports, ku munota wa 23 Mugisha Gilbert yacomekewe umupira mwiza yisanga asigaranye na Tamale, awuteye awukuramo Pitchou asubijemo unyura hanze y’izamu.

    Ku munota wa 25, APR FC yabonye andi mahirwe aho Tamale yashotse Mbaoma umupira ugenda ugana mu izamu ariko ku bw’amahirwe make unyura iruhande rw’izamu.

    APR FC wabonaga isatira, Ruboneka Bosco yagerageje ishoti rikomeye ku munota wa 27 ariko Simon Tamale awukuramo.

    Ruboneka Bosco yongeye kugerageza ishoti rikomeye ku munota wa 31 ariko unyura hanze gato y’izamu.

    Ikarita ya mbere y’umuhondo yatanzwe muri uyu mukino yatanzwe ku munota wa 35 yahawe Muhire Kevin ku ikosa yakoreye Pitchou wahise unavunika ava mu kibuka asimburwa na Niyomugabo Claude. Igice cya mbere cyarangiye ari 0-0.

    Rayon Sports yatangiye igice cya kabiri ikora impinduka, Kalisa Rashid aha umwanya Charles Baale.

    Kwitinda Alain Bacca yazamukanye umupira yinjira mu rubuga rw’amahina ku munota wa 48 ariko ateye mu izamu Tamale awukuramo.

    Ku munota wa 57, Ojera yahinduye umupira mwiza imbere y’izamu ariko Esenu ashyizemo umutwe unyura hejuru y’izamu.

    Ku munota wa 79 APR FC yakoze impinduka 2, Niyigena Clement wagize imvune na Mugisha Gilbert basimbuwe na Salomon Banga Bindjeme Charles na Apam Assongue

    Ku munota wa 83, Rayon Sports yakoze izindi mpinduka Musa Esenu aha umwanya Iraguha Hadji ni nako ku munota wa nyuma Prince yasimbuye Charles Baale. Umukino warangiye ari 0-0.

    Uko umunsi wa 9 wagenze

    Ku wa Gatanu tariki ya 27 Ukwakira 2023

    Gorilla FC 2-3 Marines FC
    Kiyovu Sports 6-1 Etoile del’Est

    Ku wa Gatandatu tariki 28 Ukwakira 2023

    Bugesera FC 2-2 Amagaju FC
    Mukura VS 1-0 Etincelles FC
    Gasogi United 0-1 Police FC

    Ku Cyumweru tariki ya 29 Ukwakira 2023

    APR FC 0-0 Rayon Sports
    Sunrise FC 1-2 Muhazi United
    Musanze FC 1-0 AS Kigali

    Source : http://isimbi.rw/siporo/article/apr-fc-yaguye-miswi-na-rayon-sports-mu-mukino-hibutswe-la-galette-amafoto

  • Umunyamakuru wa Siporo yatangiye akazi k’ubutoza #rwanda #RwOT

    Umunyamakuru w’imikino, Habimana Sadi yatangiye akazi k’ubutoza mu ikipe y’abato ya AS Kigali.

    Uyu munyamakuru yatangiye urugendo rw’ubutoza nyuma yo kubona License D y’ubutoza ya FERWAFA.

    Habimana Sadi akaba ari umutoza wungirije mu ikipe y’abato y’Umujyi wa Kigali ari yo AS Kigali.

    Umukino we wa mbere akaba ari buwutoze kuri iki Cyumweru tariki ya 29 Ukwakira 2023 kuri Tapis Rouge aho bari bube bakina na Impeesa FC.

    Habimana Sadi ni umunyamakuru w’imikino wandikira Umuseke.rw, yakoreye ibitangazamakuru bitandukanye nka Isango Star, Voice of Africa, Funclub, Igihe n’ibindi.

    Sadi Habimana yinjiye mu kazi k’ubutoza

    Source : http://isimbi.rw/siporo/article/umunyamakuru-wa-siporo-yatangiye-akazi-k-ubutoza

  • Ingabire Diane yegukanye Tour du Burundi, u R… – #rwanda #RwOT

    Kuri uyu wa Gatandatu mu gihugu cy’u Burundi mu mujyi wa Bujumbura, nibwo hasojwe isiganwa ngarukamwaka rya Tour du Burundi aho abanyarwanda biyeretse amahanga bihagije.

    Iri siganwa ryabaya ku nshuro ya gatatu, ryari rimaze hafi icyumweru abakinnyi bazenguruka ibice bitandukanye by’u Burundi. 

    Kuri uyu wa Gatandatu nibwo hakinwe agace ka nyuma kazengurukaga umujyi wa Bujumbura, aho abakinnyi baciye ahazwi nko kwa Ndadaye, baca imbere ya Hotel Source du Lac Tanganyika, bakanyura kuri Cercle hippique bakagera kuri Asiatique. Utu duce batuzengurutse inshuro 30 zingana n’ibirometero 75.

    Ku mwanya wa mbere haje Ingabire Diane, Nirere Xaveline aza ku mwanya wa kabiri, Zayed Ahmed ukomoka mu Misiri aza ku mwanya wa 3, Nzayisenga Valentine aza ku mwanya wa kane, naho Ndayishimiye Violette aza ku mwanya wa 5.

    Ku rutonde rusange, Ingabire Diane yabaye uwa mbere akoresheje amasaha 7 iminota 55 n’amasegonda 30, Mukashema Josiane yabaye uwa kabiri arushwa amasegonda 13 n’uwa mbere, Nirere Xaveline aza ku mwanya wa gatatu arushwa umunota n’amasegonda 17 n’uwa mbere. 

    Ku ruhande rw’ibihugu, u Rwanda ni rwo rwabaye urwa mbere, Benin iba iya kabiri, u Burundi buba ubwa gatatu, Misiri iba iya kane, DR Congo iba iya gatanu naho Cameroon iba iya gatandatu. 

    Tour du Burundi yatangiye hakinwa gusiganwa n’ibihe ariko ku ruhande rw’ibihugu  

    Mu gace ka nyuma nibwo umukinnyi utari umunyarwanda yabashije guhagarara ahahemberwa

    Source : https://inyarwanda.com/inkuru/135948/ingabire-diane-yegukanye-tour-du-burundi-u-rwanda-rufata-umwanya-wa-mbere-rusange-135948.html

  • Bwiza yahishuye ko yaraye adakarabye intoki n… – #rwanda #RwOT

    Bwiza Emerance ni we wavuze ijambo ahagarariye abahanzi nyarwanda bahuye na Perezida Paul Kagame ku itariki 22 Ukwakira 2023 nyuma y’itangwa ry’ibihembo bya Trace Awards 2023. Avuga ko abari bashinzwe gahunda ari we batoranyije ngo avuge ijambo. 

    Ariko rero yari yarigeze kubona Perezida Kagame mu gihe cy'amatora yo mu 2017. Ati: 'Nigeze kumubona mu matora mu Birambo yaje i Karongi ariko yari kure cyane ntabwo nabashije kumubona neza'.

    Akomeza avuga ko bwari ubwa mbere amubonye neza n'amaso ye begeranye. Ni amashusho yacaracaye cyane aho Bwiza yabwiye Perezida Kagame ko 'Twebwe abahanzi tuzaguhesha ishema'. 

    Bwiza yabwiye umunyamakuru Irene Murindahabi ko akimenya ko agiye guhura na Perezida Kagame, yabuze icyo yambara. Ati: 'Nafataga imyenda nkafata indi, Manager wanjye yanzaniye imyenda ariko byari byiza, ni ibintu nakwifuriza buri muntu wese'.

    Bwiza wamamaye mu ndirimbo “Ready” imaze kurebwa n’abakabakaba Miliyoni 3, avuga ko se byamushimishije kuba umukobwa we yarahuye na Perezida Kagame. Ati: 'Papa yarambwiye ngo ntewe ishema nawe'.

    Bwiza avuga ko kuba ari gukora ibidasanzwe mu muziki mu gihe cy'imyaka ibiri awumazemo,'Iyo igihe kigeze Imana irabikora'. Akomeza avuga ko kuva yabaho ari ubwa mbere yari yishimye bidasanzwe. 

    Avuga ko gusuhuza Perezida Kagame byamushimishije cyane ndetse ngo yatashye ku munsi ukurikiyeho yanga koga. Ati: 'Noze umunsi ukurikiyeho, izi ntoki zari zakoze ku mugisha'. Asoza avuga ko amahirwe yose afite ayakesha abafana. 

    Bwiza yari mu bahanzi bahataniye igihembo cy'umuhanzi wahize abandi mu Rwanda muri Trace Award 2023. Afite umuzingo yise My Dream uriho indirimbo 14. Amaze igihe azenguruka mu bitaramo by'iserukiramuco MTN Iwacu Muzika Festival byageze mu ntara 4 z'igihugu.

    Bwiza, Olivier Laouchez nyiri Trace na Rema

    Ijoro asuhuzamo Perezida Kagame ntabwo yikojeje amazi kubera “Umugisha” yakuye mu biganza bye

    Bwiza yarotoye inzozi asuhuza Perezida Kagame, ni bwo yari agize ibyishimo mu buzima bwe kuva yavuka

    Bwiza yijeje Perezida Kagame ko abahanzi bazahagararira neza u Rwanda bakaruhesha ishema i mahanga

    Ish Kevin yagize amahirwe yo guhura na Perezida Kagame

    Abahanzi nyarwanda bari kugenda berekana ko umuziki ari umwuga ukwiriye kubahwa

    Kivumbi King yahuye na Perezida Kagame


    Bwiza ari kugenda asohora amashusho y’indirimbo zigize Album ye

    INKURU WASOMA: Perezida Kagame yahawe igikombe yakira abitabiriye Trace Awards-AMAFOTO 150

    REBA HANO NO BODY YA BWIZA NA DOUBLE JAY

    REBA “READY” YATUMYE BWIZA YAMAMARA

    Source : https://inyarwanda.com/inkuru/135935/bwiza-yahishuye-ko-yaraye-adakarabye-intoki-nyuma-yo-gusuhuza-perezida-kagame-135935.html

  • Birengagije amafaranga batunze bigira abafana… – #rwanda #RwOT

    Ufite telefoni ari kurwana no gucyura urwibutso ari na ko barusha kuririmba Boyz II Men kuko bisa nk’aho turi mu giterane hamwe buri mukristu aba azi indirimbo zo mu gitabo. Igitaramo cy’abakunda Boyz II Men kirarimbanyije. Cyabreye muri BK Arena kuri uyu wa 28 Ukwakira 2023.

    Nibura umuntu ufite imyaka iri munsi ya 30 byagorana kwisanga yaryohewe kuko uhereye ku meza y’abajejetafaranga ari imbere y’urubyiniro agura Miliyoni 5 Frw kugeza ku myanya byitwa ko isanzwe itike yaho iragura 50,000 Frw mu gihe waba ukoresha ikarita ya BK Arena Prepaid wishyura 35,000 Frw. 

    Urebye abateraniye muri BK Arena ni abantu bakuze kandi batunze amafaranga afatika kuko rwa rubyiruko rwajyaga rwitabira ibitaramo bya ba bahanzi b’ubu ntabwo babasha kwigondera itike, nubwo bayigondera nta byishimo babona kuko umwuka uhari ni ukubyina uwa babiri (ingwatira) bitandukanye na bimwe tumenyereye byo kwikoza mu bicu no gusimbagurika. 

    Andy Bumuntu yuriye urubyiniro ahamagawe na Isheja Regis uyoboye iki gitaramo cy’amateka ku bariho muri za 1985. Ku rubyiniro yazanye ababyinnyi bamufashije gutarama. Yamaze iminota 50 ku rubyiniro ashimisha abantu batari binjira neza mu gitaramo kuko hanze baracyaza.

    Saa tatu zishyira saa yine z’ijoro, abantu baracyinjira. Ku itapi itukura baracyahanyura, abakeneye amafoto y’urwibutso ndetse aho bafatira ibyo kunywa naho haruzuye dore ko udafite ikintu mu ntoki kumuca iryera bigoye. 

    Ni igitaramo ubona ko umutekano wakajijwe bitandukanye n’uko bisanzwe. Hari aho umunyamakuru atemerewe kugera ndetse bamwe mu banyacyubahiro bamaze kugera muri BK Arena aho baje kureba Boyz II Men itajya ikora ibitaramo bihendutse. 

    Minisititi wa Siporo, Madamu Aurore Munyangaju Mimosa yakurikiye uko Andy Bumuntu yaririmbye. Si we gusa kuko yicaranye n’abandi banyacyubahiro. Andy Bumuntu ageze ku ndirimbo ‘Igitego”, yazanye itorero bacinya umudiho. 

    Ni umuhanzi ubona ko yateguye neza urubyiniro ku buryo ibyo tujya tubona abahanzi bo hakurya y’inyanja bakora ku rubyiniro yabikoze ndetse ubona ko abandi bahanzi bo mu Rwanda bakwiriye kumwegera akajya abafasha gutegura urubyiniro “stage preparation and performance”. 

    Yamaze iminota 50 yatangiye saa mbili kugeza saa 20:50, asoza ubona agishaka gutarama bitandukanye n’abahanzi baririmba iminota 10 bakahagira bitewe no kudakora imyitozo ngororamubiri no kutita ku majwi yabo.

    Urubyiniro rwubatse ku buryo bigoye ko umuhanzi yakora mu ntoki abafana keretse amanutse akabasanga. Ariko amajwi ameze neza nta makaraza ‘noise’ yumvikana. 

    Urabona ko ubuyobozi bwa East African Promoters bwateguye neza ibjjyanye n’amajwi, amatara ku rubyiniro, abantu bereka abafana aho bicara, hateguwe aho kugurira ibyo kunywa henshi ku buryo bigoye kwitwaza ko wabuze icyo kunywa. 

    21:24 Boyz II Men yuriye urubyiniro abaguze imeza ya Miliyoni 5 Frw bashyize hasi icyubahiro cyabo bahaguruka nta muntu ubibasabye. Abanyacyubahiro bibwirije barahaguruka kuko abahanzi bakunda bari bageze ku rubyiniro. 

    Ni abagabo bahuza ku majwi meza ku buryo baririmba ukagira ngo ni korali. Nararanganyije amaso muri BK Arena mbura umuntu wicaye. Bitandukanye n’ibyo nsanzwe mbona aho umuhanzi aba ari kuririmba abafana bibereye muri telefoni cyangwa barangaye. 

    Indirimbo za Boyz II Men abantu bari muri K  Arena barazibarusha. Ntabwo wamenya ko ari abafana wagira ngo bakoranye imyitozo yo kuziririmba. Boyz II Men bamaze imyaka 38 mu muziki. Ni itsinda rishimirwa guteza imbere R&B kandi bakaba barashyiriweho inyenyeri i Hollywood Walk of Fame.

    Ni ikimenyetso cyerekana ko icyamamare cyakoze ibikorwa by’indashyikirwa. Nta gihembo cyatanzwe mu bihe byabo badafite mu kabati. Bakoze album 15 baca uduhido two gucuruza ibihangano kuri miliyoni zirenga 60 ku isi hose. 

    Amatike yo kubareba akunze gushira mbere bitewe nuko n’ubundi urungano rwabo ari rwo rufite amafaranga menshi mu nguni zose z’isi. Imbere muri BK Arena biragoye kubona abantu bagendagenda kuko wagira ngo bakurikiye igiterane kiza kuberamo ibitangaza. 

    Boyz II Men ni urugero rwiza ku bahanzi bo muri iki kiragano bifuza gukora umuziki udasaza. Mbese ushaka kubaka ahazaza he yakwibanda ku muziki w’abanyamafaranga. 

    Hasohotse inkuru z’uko amatike ya 100,000 Frw yashize, abantu bagirango ni urwenya ariko intebe zigenewe abaguze amatike ya 100,000 Frw, itike za 70,000 Frw hari ababuze aho bicara kandi batari bujye kwicara ahasanzwe. Bahisemo guhagarara. 

    Nabanje kwicara mu myanya 70,000Frw mbona abantu inyuma yanjye babuze aho bicara. Ndebye ahandi mbona abahagaze bararuta abicaye. Boyz II Men yavuze ko “u Rwanda ni rwiza, turabashimira ko mwaje muri benshi”. 

    Ntabwo Boyz II Men iri kuvuga ngo abafana bumve kuko ni urusaku gusa rw’ibyishimo. Icyakora abakiri mu myaka y’ubuto byabacanze kuko abakuru baguye ahashashe. Mbese bari kuririmba za ndirimbo zabafashije kubyiruka zirimo The End of the road, A Song For Mama, n’izindi. 

    Ubundi byakugora kumva ko abantu bakuze bafana bavuza akaruru k’ibyishimo ariko ni byo biri kubera muri BK Arena. Boyz II Men barahenze kubatumira ku buryo u Rwanda ari igihugu cya 4 bajemo muri Afurika nyuma yo gutaramira muri Kenya, Uganda na South Africa. 

    Andy Bumuntu yatanze isomo ku bahanzi nyarwanda

    Source : https://inyarwanda.com/inkuru/135940/birengagije-amafaranga-batunze-bigira-abafana-basanzwe-ibiri-kubera-muri-bk-arena-bizavugw-135940.html

  • Umufana ukomeye wa APR FC n’Amavubi yitabye Imana #rwanda #RwOT

    Umudage, Mike Feller benshi bazi nka “La Galette” wari umukunzi ukomeye cyane wa APR FC n’ikipe y’igihugu Amavubi, yitabye Imana azize uburwayi.

    Mu ijoro ryo kuri uyu wa Gatandatu tariki ya 28 Ukwakira 2023 nibwo iyi nkuru y’incamugongo yamenyekanye ko uyu mugabo nyiri “La Galette” ari nayo yitiriwe yitabye Imana.

    Amakuru ISIMBI yakuye mu bantu b’inshuti za hafi z’uyu mugabo ni uko yari amaze igihe ajya kwivuza iwabo mu Budage, gusa akaba yitabye Imana ari mu Rwanda.

    La Galette akaba yazize Kanseri yo mu muhogo yari amaze iminsi arwaye aho buri mezi 3 yajyaga mu Budage kwivuza.

    Ni inkuru yababaje benshi mu bakunzi ba Siporo mu Rwanda kuko ni umwe mu bagabo bagaragaje ko bakunda ikipe y’igihugu Amavubi cyane, byari bigoye kuba Amavubi yakina ntarebe umukino wayo yaba mu Rwanda ndetse no hanze yarwo yayiherekezaga.

    Yari kandi n’umukunzi ukomeye w’ikipe ya APR FC nayo yarebaga imikino yayo myinshi.

    La Galette yitabye Imana

    Source : http://isimbi.rw/siporo/article/umufana-ukomeye-wa-apr-fc-n-amavubi-yitabye-imana