Author: webrwanda

Kuva mu 2005 urubuga rwa YouTube rwagiye rufasha abahanzi bose ku Isi mu kumenyekanisha no kuzamura ibihangano byabo. Kugeza n’ubu kandi uru rubuga ruri mu zambere zituma umuhanzi runaka agira aho ava n’aho agera ndetse umuziki we ukaba mpuzamahanga bitewe n’umubare w’abantu bareba ibihangano bye 'Views'.

Ibi ariko binagendana n’umubare w’abamukurikirana kuri YouTube 'Subscribers', ari nabo banagira uruhare mu kuzamura umuziki we dore ko usanga buri uko umuhanzi ashyizeho igihangano gishya, aribo bafata iya mbere mu kukireba no kugisangiza abandi. Ni nayo mpamvu usanga hari abahanzi benshi bahitamo kugura umubare w’abantu bareba ibihangano byabo n’ababakurikirana umunsi ku munsi kuri uru rubuga.

Nubwo abahanzi nyarwanda bakiri hasi mu kugira abantu benshi babakurikira kuri Youtube ugereranije n’abahanzi bo mu bindi bihugu bimaze gutera imbere mu muziki, ntabwo hakwirengagizwa ko kugeza ubu hari ikiyongereye kuri iyi mibare muri uyu mwaka wa 2023.

InyaRwanda yakoze urutonde rw'abahanzi10 bafite ababakurikira 'Subscribers' benshi kuri Youtube mu Rwanda:

1. Meddy

Ngabo Medard Jobert, wamamaye mu muziki nka Meddy, ni umwe mu bahanzi bakunzwe cyane mu Rwanda ndetse unamaze imyaka irenga 10 mu muziki yanagizemo uruhare runini mu kuwuteza imbere. Uyu mugabo nubwo amaze igihe ntagihangano gishya ashyira hanze  ndetse akaba yaranatangaje ko yinjiye mu muziki wo kuramya no guhimbaza Imana, niwe uri ku mwanya wa mbere kuri uru rutonde.

Kugeza ubu Meddy niwe muhanzi wa mbere mu Rwanda ufite abamukurikira benshi bangana na Miliyoni 1.19, byumwihariko akaba ari nawe muhanzi Nyarwanda ufite indirimbo nyinshi zimaze kurebwa na bantu benshi kuri YouTube.

2. Ambassadors of Christ

Korali Ambassadors of Christ yo mu itorero ry’Abadivantisite b’Umunsi wa Karindwi, niyo iza ku mwanya wa Kabiri kuri uru rutonde ndetse ikaba ari nayo Korali yonyine mu Rwanda iyoboye izindi mu gukurikirwa cyane kuri Youtube.

Iyi korali yagiye ikundwa na benshi bitewe n’ibihangano byayo bihimbaza Imana binakunze kugaruka ku butumwa bw’ihumure, ifite abantu Miliyoni 1.1 cy’ababakurikirana umunsi ku wundi ku rubuga rwa YouTube.

3. Israel Mbonyi

Kuba benshi bamaze kwibona no gukunda umuziki wa ‘Gospel’ wo mu Rwanda, byagizwemo uruhare n’abahanzi bakora indirimbo zihimbaza Imana batandukanye barimo na Israel Mbonyi, benshi banafata ko ariwe wa mbere mu bahanzi bakora Gospel.

Uyu muhanzi wakunzwe cyane kuva yasohora album ye ya mbere yise ‘Number One’ yasohoye mu 2015, kugeza n’ubu aracyakunzwe ndetse ni nawe muhanzi rukumbi wa Gospel uhagaze neza kuri YouTube. Kugeza ubu  afite abantu bangana n’ibihumbi 617 (617 K) bamukurikirana kuri Youtube.

4. Bruce Melody

Umuhanzi Bruce Melody uherutse guhabwa igihembo cya ‘Trace Awards’ nk’umuhanzi mwiza wahize abandi mu Rwanda, n’ubundi ari mu bahanzi bahagaze neza ku rubuga rwa YouTube. Uyu muhanzi uri mu bayoboye mu muziki nyarwanda amaze kugira ibihumbi 502 (502K) by’abantu bamukurikira kuri YouTube.

5. Juno Kizigenza

Umuhanzi Juno Kizigenza uri mu bahanzi bake mu Rwanda babashije kumenyekana mu gihe gito, dore ko amaze imyaka 3 gusa akora umuziki, wanahiriwe n’ibihe bya ‘Covid-19’ yagiye asohoramo indirimbo zigakundwa cyane, niwe uri ku mwanya wa Kane n’abantu ibihumbi 272 (272 K) bamukurikira kuri Youtube.

6. Clarisse Karasira

Uyu muhanzikazi wahoze ari umunyamakuru kuri Flash Tv &Radio, kuri ubu ubarizwa muri Leta Zunze Ubumwe za Amerika, ni we uri ku mwanya wa Gatandatu, aho afite abamukurikira ibihumbi 230. Byumwihariko kandi Clarisse Karasira ukora gakondo, niwe muhanzikazi wa mbere mu Rwanda ufite aba ‘Subscribers' benshi ndetse akaba ariwe muhanzikazi rukumbi uri mubahanzi nyarwanda 10 bahagaze neza kuri YouTube.

7. Niyo Bosco

Umuhanzi Niyo Bosco uzwiho kugira impano yo kwandika indirimbo zuzuye ubutumwa bwubaka sosiyete no kugira ijwi ryiza, yamenyekanye cyane mu ndirimbo nka ‘Ubigenza Ute’, Piyapuresha’, ‘Seka’ hamwe n’izindi zagaragaje ubuhanga bwe. Uyu muhanzi mu gihe gito amaze mu muziki, afite abantu ibihumbi 219 bimukurikira kuri YouTube.

8. Andy Bumuntu

Umuhanzi Andy Bumuntu usigaye yarayobotse itangazamakuru kuri Radio ya Kiss FM, ni umwe mu bahanzi bakora injyana ya R&B bakunzwe mu Rwanda nubwo amaze igihe ntagihangano gishya arasohora gusa indirimbo ze nka ‘Valentine’, ‘On Fire’, ‘Snack’ n’izindi ziracyakunzwe ndetse ninako zifite benshi bamaze kuzireba kuri YouTube afiteho abantu ibihumbi 218 bamukurikira kuri uru rubuga.

9. The Ben

Umuhanzi w’icyamamare Mugisha Benjamin benshi bazi ku izina rya The Ben, uri mu bamaze igihe mu muziki ndetse unari mu bahirimbaniye umuziki nyarwanda mu myaka icumi ishize, kugeza n’ubu akaba agikomeje kwigaragaza aho aherutse gukora igitaramo cy’amateka i Bujumbura,  The Ben benshi bavuga ko ari muri ‘Top 5’ y’abahanzi b’ibihe byose mu Rwanda, afite abantu ibihumbi 198 bamukurikirana kuri YouTube.

10. Chrissy Eazy

Uyu muhanzi ukiri muto unamaze igihe gito mu muziki gusa wahise azamuka mu buryo bwihuse, Chrissy Eazy uri mu bakora cyane, ndetse wanahiriwe no gukora indirimbo zigafata mu mitima ye benshi zirimo nka ‘Inana’, ‘Amashu’ hamwe n’izindi. Kugeza ubu uyu muhanzi amaze kugira abantu ibihumbi 197 bamukurikirana kuri YouTube.

Muhire Hassan aherutse gutandukana n’ikipe ya Sunrise FC imushinja umusaruro muke, mu gihe ku ruhande rwe atemeranywa nabyo kuko yivugira ko hari byinshi byari guhinduka iyo bamuha igihe.

Mu kiganiro uyu mutoza umaze imyaka isaga 20 yagiranye na InyaRwanda avuga ko atigeze ajya mu biganza byiza ubwo yageraga Nyagatare ndetse biri mu byatumye akazi katagenda neza.

Ati” Ikintu gikomeye cyane cyamperekeje, n’uburyo ninjiye mu kazi. Burya iyo winjiye mu kazi, byabayemo induru. Ninjiye abantu bavuga ngo, uyu mutoza mutuzaniye ntabwo ariwe wari ukwiye, umutoza uvuye muri Rugende FC, umutoza wiberaga kuri Mikoro (Micro), mbese ninjiye hari abantu batabyumva neza. “

Muhire Hassan akomeza yemeza ko ikibazo cyo kumushidikanyaho cyamuherekeje no mu kazi. Ati” Iki kibazo cy’uburyo ninjiye mu ikipe cyaramperekeje no mukazi kandi akenshi cyavaga kuri mwe abanyamakuru. Itangazamakuru ntabwo mwumva ko umuntu ashobora kugaragara atanga ubusesenguzi kandi ari n’umutoza.”

Ibi Muhire Hassan yabisobanuye asa nk’ubabaye ndetse yifashisha ingero zigaragaza ko ibyo akora n’ahandi babikora, avuga ko na José Mourinho atarajya muri As Roma yari umusesenguzi yewe na ba Wayne Rooney basanzwe babikora.

Muhire Hassan yemeza ko uburyo yinjiye mu ikipe ya Sunrise FC byari bigoye cyane kuko byanamuherekeje  kugera mu ndunduro 

Muhire Hassan yaje kwimuka agaruka ku buryo yagiranye ibiganiro n’ubuyobozi bwa Sunrise FC ariko banga kumwumva.Ati” Ndemeza ko mu gutandukana na Sunrise FC ntabwo cyari ikibazo cy’umusaruro kuko bwari bukiri ku manywa. Mu kiganiro nagiranye nabo naberetse uko urutonde ruhagaze, kuko icyo gihe twari dufite umukino wa Muhazi United. Njye ubuyobizi narabubwiye nti murebe ukuntu amanota yegeranye, turatsinda uyu mukino, turazamukaho imyanya ine, igitutu dufite ni icyiki? Mwatuje tugakora akazi. Icyo gihe barambwiye ngo ntabwo biri bishoboke kuko ntacyizere dufite ko bizakunda ”.

Muhire Hassan yemeza ko ibigwi bye byatokojwe, ariyo Mpamvu muri Sunrise FC babayhoe batamwizeye ndetse akemeza ko hari n’abantu bamufata uko hanze aha.

Ese ubundi Muhire Hassan ni muntu ki mu butoza?

Muhire Hassan amaze imyaka isaga 20 mu mwuga w’ubutoza, aho yatangiye aka kazi ari umutoza wa Kaminuza y’u Rwanda, akaza kuhava ajya gutoza iyahoze ari  KIST. Mu 2005 Muhire Hassan yabaye umutoza wungirije wa Kiyovu Sports ubwo yari yungirije Jackson Mayanja ubu uri gutoza Sunrise FC, ndetse nyuma aza no kuba umutoza wungirije w’ikipe y’igihugu Amavubi.

Muhire Hassan yakomeje urugendo rwe mu makipe atandukanye arimo Gasabo United, Rugende FC, Rwamagana City ubu yabaye Muhazi United, atoza ikipe ya Bugesera FC ndetse Miroplast FC. Muhire Hassan afite impamyabushobozi ya License B ya CAF imwemerera gutoza mu cyiciro cya mbere mu Rwanda.

KANDA HANO UREBE IKIGANIRO CYOSE 

Muhire Hassan yemeza ko ibyabaye byose bitatuma ahagarika umuhamagaro we kuko yiteguye, igihe icyaricyo cyose hari ikipe yamwifuza yagenda agakora akazi 

ahagana mu 2002 Muhire yari yaratangiye akazi k’ubutoza aha akaba ari mu ikipe ya KIST 

Muhire Hassan asanzwe ari umutoza w’abatoza ubifitiye ubushobozi n’ibyangombwa

Mu mpera za 2022 umuyobozi mukuru wa Grammy Awards, bwana Harvey Mason Jr, yari i Kigali aho yari yitabiriye itangwa ry'ibihembo bya GUBA(Grow,, Unite, Build Africa) byari bitanzwe ku nshuro ya 13. Muri Nzeri 2022 Mbabazi Rosemary wari Minisitiri w'Urubyiruko n'Umuco yagiranye ibiganiro na Harvey Mason Jr bigamije ubufatanye mu guteza imbere uruganda rw'imyidagaduro mu Rwanda. Ni ibiganiro byaje nyuma y'uko uyu mugabo aganiriye n'Urwego rw'igihugu rw'Iterambere'RDB'.

Inkuru dukesha allafrica.com  ivuga ko u Rwanda rushobora kuzakira itangwa ry'ibihembo bya Grammy Awards mu 2025 cyangwa se mu 2026 bitewe n'umwaka ubuyobozi bwa Recording Academy itegura Grammy Awards uzaba wemeranyije na Leta y'u Rwanda.

Kigali ni umwe mu mijyi 5 yo mu bihugu by'Afurika yatoranyijwe mu mijyi ishobora kwakira ibirori bya Recording Academy itegura Grammy Awards. Ni ibihembo bimaze imyaka 64 bibera i New York muri Leta zunze Ubumwe za Amerika.

 Muri Afurika hatoranyijwe imijyi 5 ishobora kwakira ibi birori. Kigali (Rwanda), Johanesburg(South Africa), Nairobi (Kenya), Lagos na Abidjan (Nigeria). Iyi mijyi niyo izatoranywamo umwe uzaberamo Grammy Awards. 

Abidjan yatoranyijwe nk'umujyi uzaba urimo icyicaro cya Grammy ku bahanzi b'Abanyafurika bo mu bihugu bikoresha ururimi rw'Igifaransa.

 Kugeza ubu Beyonce niwe ufite Grammy nyinshi dore ko yibitseho 32. Abahanzi bo muri Afurika 12 barimo Angelique Kidjo wibitseho Grammy 5 nibo batwaye ibi bihembo bifatwa nk'ibya mbere mu Isi y'umuziki. 

Mariam Makeba (South Africa) niwe wabaye inkomarume mu 1966 atwara igihembo cya mbere cya Grammy agikesheje album yise 'An Evening with Makeba/Belafonte.'

 

Grammy Award iba ikoze muri zahabu

Mu Karere ka Gicumbi Umurenge wa Bukure, mu Ntara y’Amajyaruguru, habereye ijonjora ry’umunsi wa gatanu wa shampiyona isoza umwaka muri Kung Fu Wushu (Rwanda Kung Fu Wushu Shampionship 2023 Edition).

Nyuma yo gusoza amajonjora mu Ntara zitandukanye z’u Rwanda, nk’Iburengerazuba,Intara y’Amajyepfo, Intara y’Iburasirazuba ndetse n’Umujyi wa Kigali, hari hatahiwe Intara y’Amajyaruguru mu gushaka abazahagararira iyi Ntara mu mikino ya nyuma isoza umwaka w’imikino muri kung Fu Wushu.

Ni irushanwa ryabaye ku Cyumweru tariki ya 05 Ugushyingo 2023, rikaba ryarabereye mu Murenge wa Bukure maze rihuza ikipe yaje ihagarariye Akarere ka Musanze ari yo Musanze Shaolin Tample n’ikipe ya Red Dragon Gicumbi yari ihagarariye Akarere ka Gicumbi.

Nyuma y’aya majonjora, abakinnyi 4 muri Taolu barimo umukobwa umwe, ni bo babashije gutsinda, mu gihe muri Sanda abakinnyi 4 ari bo batsindiye kuzahagararira Intara y’Amajyaruguru.

Abakinnyi babashije gutsindira guhagararira intara zabo

Mu Burasirazuba hakomeje amakinnyi 5 muri Sanda n’abakinnyi 15 muri Taolu harimo akobwa 2.

Mu Ntara y’Amajyepfo hakomeje abakinnyi 4 muri Sanda, n’aho muri Taolu nta mukinnyi n’umwe wabashije gukomeza.

Mu mujyi wa Kigali hatambutse abakinnyi 6 muri Sanda hanazamuka abakinnyi 4 muri Taolu harimo abakobwa 2.

Intara y’Amajyaruguru hatambutse abakinnyi 4 muri Taolu harimo umukobwa 1,
Muri Sanda hakomeza abakinnyi 4.

Intara y’Iburengerazuba hakomeje abakinnyi 4 muri Taolu n’abakinnyi 5 muri Sanda.

Abakinnyi bose bazahurira ku munsi wa nyuma wa shampiyona y’uyu mwaka muri Kung Fu Wushu mu Rwanda.

Muri Taolu ibizwi nko kwerekana ubuhanga bw’uyu mukino hazahatana abakinnyi 27 harimo abagabo 22 n’abakobwa 5.

Muri Sanda ibizwi nko kurwana hakazahatana abakinnyi 24.

Imikino yogusoza shampiyona y’igihugu muri uyu mukino biteganyijwe ko izabera i Kigali tariki ya 12 Ugushyingo uyu mwaka hakazahurizwa hamwe abitwaye neza mu mikino y’amajonjora y’ibanze, iyi mikino ikazabera ku kibuga cya STECOL.

Myugariro wa Rayon Sports akaba na kapiteni wa yo, Rwatubyaye Abdul avuga ko akurikije ahantu ikipe ye iri, n’amakipe abari imbere amanota abarushaa ndetse n’imikino imaze gukinwa n’isigaye, Gikundiro akinira ahamya ko ifite amahirwe menshi yo kwegukana igikombe cya shampiyona.

Ni nyuma y’uko itagize intangiriro nziza za shampiyona kuko mu mikino 9 bamaze gukina, batsinzemo 4 batsindwa umwe banganya imikino 4.

Rwatubyaye Abdul yabwiye ikinyamakuru ISIMBI ko ikipe ye ifite amahirwe yo kwegukana igikombe cya shampiyona umwaka w’imikino 2023-24 kuko amakipe abari imbere atabarusha amanota menshi kandi shampiyona ikaba ikiri mbisi.

Ati “Kwegukana igikombe cya shampiyona birashoboka cyane urebye dufite n’ikirarane, mu mikino 9 tumaze gukina n’amanota dufite twatakaje umukino umwe tunganya imikino 4 urebye birashoboka cyane amakipe ntabwo arushanwa amanota menshi, imikino hafi 6 isigaye ngo igice kibanza cya shampiyona kirangire, ushyizeho n’imikino yo kwishyura biracyashoboka cyane.”

Imikino ine yatsinze ni Gasogi United 2-1, Etoile del’Est 2-1, Sunrise FC 3-0 na Mukura VS 4-1. Yatsinzwe na Musanze FC 1-0. Yananyije na Gorilla FC 0-0, Amagaju 1-1, Marines FC 2-2 na APR FC 0-0

Kugeza ku munsi wa 10 wa shampiyona (Rayon Sports ariko ifitie ikirarane cya Police FC) iyi kipe iri ku mwanya wa 4 n’amanota 16, Musanze FC ya mbere ifite 23, APR FC 21 na Police FC ifite 19.

Rwatubyaye Abdul avuga ko amahirwe ari menshi ku gikombe cya shampiyona