Author: webrwanda

Umunyarwenya Atome uherutse guhurira na Samuel Eto’o Fils mu giterane cya pasiteri Ndikumana Chris muri Côte d’Ivoire yagaragaje ko uyu muvugabutumwa ari umuntu ushobora ku kwigisha isomo ryo guca bugufi ushingiye ku myitwarire ye gusa.

Ku wa Gatandatu tariki 6 Ukuboza 2025, imihanda migari n’iy’imigenderano yo mu murwa mukuru Cotonou muri Benin , yari yafunzwe kuva mu gitondo kubera igiterane cy’ivugabutumwa cyari kiyobowe na Pastor Chris Ndikumana, ukomoka mu gihugu cy’u Burundi.

Usibye uwahoze ari rutahizamu wa FC Barcelona na Inter Mian, ubu akaba ari Perezida w’Ishyirahamwe ry’Umupira w’Amaguru muri Cameroun, Samuel Eto’o, indi mbaga y’abantu basaga ibihumbi 150 barimo n’Umunyarwenya Ntarindwa Diogène wamenyekanye nka Atome cyangwa Gasumuni yari yitabiriye iki giterane kidasanzwe.

Mu kiganiro na ISIMBI; uyu munyarwenya yasobanuye uburyo uyu muvugabutumwa ukomoka mu gihugu cy’u Burundi yicisha bugufi ku kigero bamwe babona ko ashobora kuba arimo gukabya ariko abikomora ku itabaza ry’amavuta yasizwe n’Imana.

Ati 'Pasiteri Ndikumana aratangaje cyane gusa niba hari abantu bake bashobora kukwigisha isomo ryo guca bugufi ushingiye ku myitwarire yabo ari mu ba mbere wareberaho. No mu murimo w’Imana ni abantu bake wamugereranya nawe.'

Atome yakomeje agaragaza ko Pasiteri Chris yahisemo kugenda agabanya icyubahiro ahabwa na sosiyete uko yagendaga azamurwa n’Imana mu ntera yo kuba yakora ibitangaza bidasanzwe birimo no gukiza abantu batabashaga kugenda burundu.

Ati 'Kubera ko yatangiye kubona mu mbaraga arimo kuzamurwa mu ntera kuko aba yaganirijwe n’Imana akamenya ko umurimo ari bwo ugitangira we yahisemo kongera uguca bugufi kwe uko yazamurwaga.'

Uyu mupasiteri w’imyaka 51 amaze igihe agaragara nk’umwe mu bayobozi b’ivugabutumwa bakunzwe cyane, by’umwihariko binyuze kuri muri porogaramu yashinze asangizaho abantu amasengesho, inyigisho n’ubuhamya, bikurikirwa n’abantu bagera kuri miliyoni imwe.

Si aho bigarukira gusa, kuko Pasiteri Chris Ndikumana yanashinze urubuga ritwa Kanguka, itambutsa ibiganiro byibanda ku gukangura umutima n’imyemerere ya gikristo.

Chris Ndikumana ni umupasiteri w’Umurundi usengera abantu bagakizwa

Atome yavuze ko Chris Ndikumana ari umuntu ukora ibitangaza

Samuel Eto’o Fils ni umwe mu bitabiriye isengesho rye

Urwego rw’Igihugu rw’Ubugenzacyaha (RIB) rwashyikirije Ubushinjacyaha dosiye iregwamo abantu batanu bakekwaho icyaha cyo kugayisha agaciro k’ifaranga ry’Igihugu n’umutungo utaziwi inkomoko, barimo Heradi Sefu Josué wamamaye ku mbuga nkorambaga ku izina rya Prophet Joshua.

Iyi dosiye yashyikirijwe Ubushinjacyaha ku wa 23 Ukuboza 2025, nk’uko byemejwe n’Umuvugizi wa RIB, Dr. Murangira B. Thierry wabyemereye ikinyamakuru Igihe.

Abandi bari muri iyi dosiye ni Mbabazi Winny, Niyigena Deborah, Murekatete Alice na Umutesi Salima Linda.

Aba bose bakurikiranyweho icyaha cyo kugayisha agaciro k’ifaranga ry’Igihugu, mu gihe Prophet Joshua we akurikiranyweho ibyaha bibiri birimo no kudasobanura inkomoko y’umutungo.

Icyaha cyo kudasobanura inkomoko y’umutungo Prophet Joshua akurikiranyweho, amategeko yemeza ko ugihamijwe ahanishwa igifungo kitari munsi y’imyaka irindwi ariko kitarenze icumi, n’ihazabu yikubye inshuro eshatu kugeza ku nshuro eshanu z’agaciro k’umutungo atabasha kugaragaza inkomoko yawo mu buryo bwemewe n’amategeko.

Icyaha cyo kugayisha agaciro k’ifaranga ry’Igihugu giteganywa n’ingingo ya 221 y’itegeko nimero 68/2018 ryo ku wa 30 Kanama 2018, rigena ibyaha n’ibihano muri rusange.

Kuri iki cyaha, amategeko ateganya igifungo kitari munsi y’umwaka umwe ariko kitarenze imyaka ibiri, ndetse n’ihazabu y’amafaranga atari munsi ya miliyoni imwe y’amafaranga y’u Rwanda ariko atarenze miliyoni eshatu.

Iperereza kuri aba bafashwe rigaragaza ko bagiye bakoresha inoti z’amafaranga y’u Rwanda mu gutaka 'gateaux’ n’indabo byo mu birori bitandukanye maze bakabyamamaza ku mbugankoranyambaga zabo zirimo TikTok, Instagram na YouTube.

Mu kiganiro n’itangazamakuru cyo ku wa 19 Ukuboza 2025 ubwo yanasobanuraga byinshi ku itabwa muri yombi ry’aba, Dr. Murangira B. Thierry yibukije ko RIB itazihanganira na gato ibikorwa byose bisuzuguza ifaranga ry’Igihugu, haba mu kurimbisha, mu kwishimisha, mu gutanga impano cyangwa mu kugaragaza ubukungu mu buryo bunyuranyije n’amategeko.

Yagize ati 'Abantu bose basabwa kubireka burundu, kuko uzabifatirwamo azahanwa n’amategeko.'

Yanashishikarije abaturage kujya batanga amakuru aho babonye cyangwa bakeka ibikorwa nk’ibyo, agaragaza ko uruhare rw’abaturage ari ingenzi mu kurwanya ibyaha no kubungabunga ubukungu bw’Igihugu.

Prophet Joshua dosiye ye yashyikirijwe Ubushinjacyaha

Umutoza w’Ikipe y’Igihugu y’u Rwanda, Adel Amrouche yasuye abakinnyi bane b’abanyarwanda bakina muri Azerbaijan barangajwe imbere na Mutsinzi Ange Jimmy.

Ni mu rwego rwo kureba aba bakinnyi uburyo bahagaze kugira ngo aganire nabo cyane ko bamwe batarakinira ikipe y’igihugu anabaganirize babe bakwemera kuzaza gukinira Amavubi.

Mu bakinnyi yabonanye nabo barimo myugariro Mutsinzi Ange Jimmy ukinira Zira FK, we asanzwe ari umukinnyi uhamagarwa ndetse unabanzamo mu Mavubi.

Abandi bakinnyi batatu bakaba bavukana aho bavuka kuri se w’umunyarwanda, nabo bakina mu cyiciro cya mbere muri Azerbaijan.

Umwe ni rutahizamu usatira anyuze ku mpande, Joy-Lance Mickels ukinira Sabah FK akaba yari yanahamagwe mu Kwakira 2025 ariko ntiyitabira ubutumire kuko yahise agira imvune yatumye ataza.

Impanga ye Joy-Slayd Mickels ikaba yo ikinira Karvan Yevlakh kimwe n’umuto muri bo Leroy Mickels ukinana na Mutsinzi Ange muri Zira FK babonanye n’umutoza Adel Amrouche.

Amakuru avuga ko atagarukira aha ahubwo ari bukomeze agasura n’abandi bakinnyi b’Abanyarwanda bakina i Burayi.

Joy-Slayd Mickels (ubanza ibumoso), Leroy Mickels (ukurikiraho wa mbaye nimero 28), Adel Amrouche (wa gatatu), Mutsinzi Ange Jimmy (wa kabiri uturutse iburyo) na Joy-Lance Mickels (ubanza iburyo) ubwo bari basuwe n’umutoza

Umuraperi Ish Kevin uri mu bagezweho mu Rwanda yatumiwe kuzasusurutsa abazitabira iserukiramuco ryiswe 'Africa Mother Festival’, rigamije kwimakaza umuco nyafurika mu ngeri zawo zose bigiye kubera i Kigali.

Mu kiganiro ISIMBI yagiranye na Karl Lewis, Umuyobozi Mukuru wa Africa Mother Festival, yagaragaje ko iyi festival itagenewe itsinda runaka gusa, ahubwo igamije guhuriza hamwe abantu b’ingeri zose, baturuka mu bihugu bitandukanye batuye mu Rwanda n’abandi bazaturuka hanze yarwo.

Karl Lewis yavuze ko impamvu nyamukuru yatumye Ish Kevin atoranywa nk’umwe mu bahanzi bazatarama muri iri serukiramuco, ari uko ahagarariye neza urubyiruko rw’u Rwanda binyuze mu njyana ye ya Hip Hop no mu buryo yitwara mu buhanzi bwe, rimwe na rimwe bugaragaramo ubutumwa bushishikaje kandi bwigisha.

Ati 'Ish Kevin ni umuhanzi ukundwa n’urubyiruko cyane kubera ubutumwa bwe bwigisha, bukurura urubyiruko ndetse n’umuziki w’injyana zigezweho.'

Yanongeyeho ko Ish Kevin afitanye umubano wa hafi n’umuhanzi w’Umunya-Gabon ukorera mu Rwanda witwa Bibiboi ndetse aba bombi bakaba baranakoranye ku mishinga y’indirimbo itandukanye.

Uyu muyobozi yemeje ko Bibiboi na we azatarama ndetse hakaziyongeramo abandi bahanzi bakomeye baturutse muri Gabon, barimo Gemstone wageze mu Rwanda vuba aha, ndetse n’abandi bazaturuka muri Côte d’Ivoire, Tchad na Centrafrique.

Iri serukiramuco riteganyijwe kuba tariki ya 24 Ukuboza 2025, rikabera ahazwi nko kuri Copenhagen, Kicukiro mu murenge wa Niboye, inyuma ya Maison Noir.

Africa Mother Festival ifite intego yo guteza imbere umuco nyafurika mu buryo butandukanye burimo umuziki, ubuhanzi, ibiribwa gakondo, imbyino, ubukorikori n’imigenzo, byose bigahurizwa mu birori bigezweho.

Nk’uko Karl Lewis yabivuze, iri serukiramuco rigamije no kwizihiza ubumwe bw’Abanyafurika no kugaragaza Afurika nk’umugabane wishimye, uhuje abantu kandi wuje umuco wihariye ku isi.
Itike yo kwinjira iri ku mafaranga ibihumbi icumi by’amafaranga y’u Rwanda, mu gihe uzayagura ku muryango azaba ari ibihumbi cumi na bibiri.

Ish Kevin yatumiwe mu iserukiramuco ryo kwerekana ubudasa bwa Afurika