Author: webrwanda

Nyuma yuko harangijwe gukina imikino yo mu matsinda ya Champions League ku gicamunsi cyo kuri uyu wa Mbere taliki 18 Ukuboza 2023 habaye tombora y’uko amakipe azahura muri 1/8.

Iyi ni tombora yabereye i Nyon muri Switzerland ku cyicaro cy’Impuzamashyirahamwe y’umupira w’amaguru ku mugabane w’Iburayi (UEFA) n’ubundi isanzwe itegura iyi mikino.

Amakipe yabaye aya mbere mu matsinda yarimo yatomboye ayabaye aya kabiri kandi nta kipe yari yemerewe gutombora iyo banyuze mu itsinda rimwe cyangwa se iyo baturuka mu gihugu kimwe. 

Uko tombora yagenze:

Ikipe ya Arsenal yo mu Bwongereza yatomboye FC Porto yo muri Portugal 

Atlético Madrid yo muri Espagne yatomboye Inter Milan yo mu Butaliyani 

FC Barcelona yo muri Espagne yatomboye Napoli yo mu Butaliyani 

FC Bayern Munich yo mu Budage yatomboye Lazio yo mu Butaliyani 

Borussia Dortmund yo mu Budage yatomboye PSV Eindhoven yo mu Buhorandi 

Manchester City yo mu Bwongereza yatomboye FC Copenhagen yo muri Denmark 

Real Madrid yo muri Espagne yatomboye kuzahura na RB Leipzig yo mu Budage 

Real Sociedad nayo yo muri Espagne itombora itombora kuzahura na Paris Saint-Germain yo mu Bufaransa 

Muri iyi tombora twavuga ko ikipe ya FC Barcelona ariyo yatomboye ikipe isa nk’ikomeye ya Napoli bitewe nuko yari yageze muri 1/4 mu mwaka ushize.

Ku ikipe ya Paris Saint-Germain yari yabaye iya kabiri mu itsinda twavuga ko yagize amahirwe bitewe nuko yashoboraga gutimborwa n’ikipe y’ikigugu ariko yatombowe na Real Sociedad.

Biteganyijwe ko imikino ibanza ya 1/8 izakinwa taliki 13, 14, 20 na 21 Gashyantare 2024 naho iyo kwishyura izakinwe taliki 5, 6, 12 na 13 Werurwe 2024.

Dr. Ignace Niyigaba uherutse kwegukana igihembo cy'umwanditsi mwiza w'umwaka wa 2023 mu marushanwa yateguwe n'Urugaga rw'Abanditsi mu Rwanda, yatangaje ko yanditse igitabo kiri mu rwego rwa filozofiya ishingiye ku myemerere y'idini n'ubumenyi (Sciences).

Aganira na InyaRwanda, Dr. Ignace Niyigaba yatangaje ko inganzo yo kwandika iki gitabo yaje nyuma yo kunyoterwa no kumenya amavu n'amavuko y'ijambo 'Ubwenge' ndetse no gushaka gusesengura neza akamaro k'ubwenge ndetse n'isooko yabwo.

Yavuze ko kwandika igitabo yise 'Ubwenge n'imitekerereze bya muntu mu buzima tubayemo mu Isi' yabitewe n'uko yabonaga abantu benshi batumva neza igisobanuro cy'ubwenge, ndetse bamwe ugasanga barabwitiranya n'ubumenyi, amashuri menshi n'ibindi kandi mu by'ukuri ari ibintu bitandukanye cyane.

Akomoza ku bitabo yifashishije yandika iki gitabo yagize ati: 'Nagiye nifashisha ibitabo binyuranye harimo na Bibiliya. Gusa ntabwo nasesenguye ubwenge gusa ahubwo nasesenguye n'ijambo imitekerereze, aho nakoze ubushakashatsi ndetse nkagaragaza abahanga babayeho ku Isi bagize imitekerereze yubatse Umuryango mugari w'abantu, nkagenda nerekana  ibitekerezo bya buri wese muri bo.

Nasobanuye neza aho ubwenge n'ubumenyi bihurira n'aho bitandukanira.'

Dr. Ignace yongeyeho ko muri rusange, buri muntu wese yaba umunyarwanda, umunyafurika n'undi wese utuye ku Isi, akeneye kumenya uko ubwenge bushakwa, uburyo bukoreshwa, ndetse n'icyakorwa kugira ngo budahungabana nko kuburinda ibiyobyabwenge n'ibindi nkabyo. Yashimangiye ko iteka ubwenge bwagakwiye kubungabungwa, bugafumbirwa ndetse bugakoreshwa mu bikorwa bifitiye abatuye Isi umumaro.

Yavuze ko yandika iki gitabo, yari agamije ko buri wese amenya imitekerereze ibereye umuntu waremwe n'Imana, akamenya imitekerereze ikwiriye kwirindwa, cyane cyane nk'icyangiza ubwenge bwa muntu kuko bigira ingaruka kirimbuzi ku Isi n'abayituye.

Uyu mwanditsi, yatangaje ko nta muntu n'umwe iki gitabo kidafitiye akamaro haba abato, abakuru, abanyamadini, abanyapolitiki n'abandi, aboneraho no gusaba buri wese kugitunga ndetse no kugikoresha mu buzima bwe bwa muri munsi.

Yavuze ko kandi abona amarushanwa gusa adahagije ngo akundishe abakiri bato gusoma no kwandika ibitabo, ahubwo byagakwiye kuba umuco batozwa kare bakawukurana.

Yagize ati: 'Icyakorwa kugirango umuco wo gusoma no kwandika ibitabo utere imbere bive mu marushanwa gusa ahubwo bibe umuco, ni uko haba ababyeyi, abarezi, ndetse n'ubuyobozi bw'igihugu muri rusange cyane cyane abafite aho bahuriye n'uburezi,  bagira uruhare mu gushishikariza buri wese gutoza abakiri bato umuco wo gusoma no kwandika nk’imwe mu nkingi y'igihugu yo kubaka ubukungu bushingiye ku bumenyi, ndetse bikaba ibintu bihoraho kandi biranga umunyarwanda nk'uko dufite izindi ndangagaciro z'Abanyarwanda zidutandukanya n'abo mu bindi bihugu, uyu muco nawo ugahinduka imwe mu ndangagaciro z'abanyarwanda.'

Kuri ubu, nibwo iki gitabo cyitwa “Ubwenge n’imitekerereze bya muntu mu buzima tubayemo mu Isi” kiri gukwirakwizwa mu masomero atandukanye nka Library Caritas, Ikirezi, n’ahandi, aho mu minsi micye kizaba cyamaze kugera hafi mu masomero yose mu gihugu, ugishaka akakibona ku mafaranga 35,000Frw gusa.

Mu ntangiriro y'iki gitabo, haraho Dr. Ignace avuga ko hari imiziro y'ubwenge usanga kenshi na kenshi iba mu bibangamira imico mbonera y'ubumuntu, birimo: Ubwirasi, agasuzuguro, kutita ku bababaye, kunywa ibiyobyabwenge, kwiroha mu bikorwa by'ubugizi bwa nabi, gukora ibikorwa bibangamira umudendezo wa rubanda n'ibindi.

Yongeyeho ko kandi iyo miziro ari byaha Imana yabujije ikiremwa muntu ndetse ko ubikora aba yikururiye akaga gakomeye kamugeza ku rupfu rw'iteka ryose, naho uwitondeye iyo miziro, akazabona ibihembo byo kuzaragwa ubugingo buhoraho butazigera bupfa iteka ryose.

Uyu mwanditsi asoza intagiriro y'igitabo cye, abwira abasomyi ko igikwiye kwiganza kurutaho, ari ubwenge bukomoka ku Mana kuko ari bwo buyihesha icyubahiro kandi bukanaha amahoro nyira bwo. Asobanura kandi ko kuba umunyabwenge nyawe, biba byiza kandi bikagira umumaro iyo bifatanyije no kubaha Imana no guharanira ituze, amahoro n'urukundo mu bantu yaremye.

Umwanditsi Dr. Ignace Niyigaba yavuze ko igitabo cye kigamije gusobanurira abantu ubwenge nyakuri ubwo ari bwo

Cyanditswe hifashishijwe ibindi bitabo birimo na Bibiliya

Dr. Ignace Niyigaba yavuze ko gusoma no kwandika bikwiye kuba imwe mu ndangagaciro z’abanyarwanda

Iki gitabo kiri mu biherutse kumuhesha igihembo cy’Umwanditsi mwiza w’umwaka wa 2023

Ari mu baherutse guhembwa n’Urugaga rw’abanditsi mu Rwanda ku bwo kugira uruhare mu guteza imbere umuco wo gusoma no kwandika ibitabo

Kuri iki Cyumweru twasoje tariki 17 Ukuboza, ni bwo habaye shampiyona yo gusiganwa ku magare mu bakiri bato aho hakinwe ibyiciro bisaga 4 mu bahungu n’abakobwa.  Iyi shampiyon yari igamije gushaka abakinnyi beza bahiga abandi mu bakiri bato, kuva ku myaka 6 kugera ku myaka 19.

Abasiganwa bazengurutse muri Parikingi ya Kigali Pele Stadium aho bari bashyizemo inzira zigoranye ndetse zirimo amakorosi menshi, bigamije kwigisha abana gukata.

Icyiciro cya mbere cyatangiye gusiganwa ahagana saa 09:30 Am. Mu bari munsi y’imyaka 11 mu bagabo, Sano Francis ukinira Muhazi Cycling niwe wabaye uwa mbere aho ku ntera ya Kirometero 5.6, yakoresheje imikino 13 n’amasegonda 3.

Karambizi Cyoga Akram ukinira Cine Elmay Cycling Club yabaye uwa kabiri akoresheje iminota 14’30, naho Ndayishimiye Albert ukinira Bugesera Cycling Team aba uwa gatatu, akoresheje iminota 14’30.

Sano Francis ni umwe mu bana bakiri bato batanga icyizere mu mukino w’igare, bigendanye n’ubuhanga agaragaza 

Mu bakobwa, Karambizi Ganza Akiah ukinira Cine Elmay Cycling Club yabaye uwa mbere, akoresheje iminota 16’09, Beza Teta aba uwa kabiri akoresheje iminota 20’50, naho Munezero Gentile aba uwa gatatu akoresheje iminota 23’28.

Ganza Akiah niwe wegukanye shampiyona mu batarengeje imyaka 11 mu bakobwa 

Mu batarengeje imyaka 13, mu bahungu, Ishimwe Sano Prince ukinira Cine Elmay Cycling Club yabaye uwa mbere, aho ku ntera ya Kirometero 5.6, yakoresheje iminota 13’30”, Uhiriwe Samuel nawe wa Cine Elmay Cycling Club yabaye uwa kabiri akoresheje iminota 13’46″16, ibihe yanganyije na Hategeka Clinton ukinira Kangaroo Cycling Club. 

Mu bakobwa, hakinnye abakinnyi 2 gusa, aho Johovaire Lisa ukinira Ndabaga Women Cycling Team yabaye uwa mbere akoresheje imikino 13’53” ibihe yanganyije na Umwamikazi Joy Cynthia ukinira Benediction Cycling Club.

Ishimwe Sano niwe wegukanye shampiyona mu bahungu batarengeje imyaka 13, ndetse akaba yashimishije abari bitabiriye shampiyona, bigendanye n’ubuhanga afite ku igare 

Lisa ukinira Ndabaga niwe wegukanye shamiyona mu bakobwa batarengeje imyaka 13 

Mu batarengeje imyaka 15, bakoze intera ya Kirometero 13.6, Shema Emmanuel wa Les Amis Sportifs niwe wabaye uwa mbere akoresheje iminota 28’52”, Gisubizo Issa nawe wa Les Amis Sportifs yabaye uwa kabiri akoresheje iminota 29’05” ,Habumuremyi Cyusa wa Les Amis Sportifs yaje ku mwanya wa gatatu akoresheje iminota 30’06”.

Mu bakobwa Ishimwe Cynthia wa Bugesera Cycling Team yabaye uwa mbere akoreshe iminota 30’16”, Niyomukiza Claudine wa Bugesera Cycling Team aba uwa kabiri, akoreshe iminota 30’30” naho Nyiribambe Akelyne nawe wa Bugesera Cycling Team aba uwa 3 akoresheje iminota 41’02”.

Mu batarengeje imyaka 17, bakoze intera ya Kirometero 25.6, aho mu bahungu Byusa Pacific ukinira Les Amis Sportifs yabaye uwa mbere akoresheje iminota 46’17”, Twagirayezu Didier ukinira Kayonza Young Stars Cycling aba uwa kabiri akoresheje iminota 46’25”, Niyotwizera Lambert wa Cine Elmay Cycling Club aba uwa gatatu akoresheje iminota 46’56”. 

Mu bakobwa bakoze ibirometero 13.6,  Masengesho Yvonne ukinira Ndabaga Women Cycling Team aba uwa mbere, akoresheje iminota 29’29”, Ishimwe Giselle ukinira Cine Elmay Cycling Club yabaye uwa kabiri akoresheje iminota 30’39” Niyotwizera Clementine wa Bugesera Cycling Team aba uwa 3 akoresheje iminota 32’52”.

Mu batarengeje imyaka 19 ari nacyo cyiciro cya nyuma umukinnyi acamo kugira ngo ajye mu bakuru bakoze ibirometero 32. Nshutiraguma Kevin wa Cine Elmay Cycling Club yabaye uwa mbere akoresheje iminota 50’40”, Rugemintwaza Janvier ukinira Java Inovotec yaje ku mwanya wa kabiri akoresheje iminota 50’50”, naho Niyonkuru Saddam ukinira Muhazi Cycling aba uwa gatatu akoresheje iminota 51’05”. 

Mu bagore, bo bakoze ibirometero 25.6, Iragena Charlotte ukinira Bugeseta Cycling Team yabaye uwa mbere akoresheje iminota 31’56”, Bukusenge Mariathe bakinana aza ku mwanya wa 2 akoresheje iminota 31’10”, naho Ingabire Domina nawe ukinira Bugesera Cycling Team aza ku mwanya wa gatatu akoresheje iminota 32’19”.

Aba bakinnyi bose batsinze bazamara umwaka ari bo bayoboye abandi, kugeza mu irishanwa ry’umwaka utaha

Mbere y’uko umwana yandikwa mu bitabira irushanwa agomba kuba ari kumwe n’umubyeyi cyangwa se umutoza, ndetse bakerekana icyangombwa cy’amavuko 

Umuhango wo gutanga ibihembo bya Isango na Muzika Awards  wabimburiwe n’indirimbo nziza z’abanyeshuri bo mu ishuri ry’umuziki rya Nyundo, bagerageje kuririmba indirimbo z’amoko yose haba izigezweho ndetse n’izakanyujijeho mu minsi yo hambere.

Nyuma y’uko aba banyeshuri bari barangije kuririmbira abantu bari bitabiriye ibi birori, hakurikiyeho ijambo ry’Umuyobozi wungirije wa Isango na Muzika Awards  yakira abashyitsi.

Itsinda rya Moriox Kid niryo ryahaye ikaze abantu bari bitabiriye ibi birori ribyina hanyuma umuhango wo gutanga ibihembo utangira ku mugaragaro bahera ku cyiciro cya Best Cultral Awards.

Dore urutonde rw’abegukanye ibihembo mu Isango na Muzika Awards.

Mu cyiciro cya Best Cultural Act cyegukanywe n’Itorero Inyamibwa.

Mu cyiciro cya Best New Artist cyegukanywe n’umuhanzi Yago Pondat wahageze yatinze agasanga Ndimbati yakimufatiye.

Best Music Producer ni icyiciro cyegukanywe na Producer  Prince Kiiz ukorera muri Country Records ya Noopja.

Best Gospel Artist ni icyiciro cyegukanywe na Israel Mbonyi uri kwitwara neza muri iyi minsi.

Best Video Director cyatwawe na Director Gad.

Best collabo of The Year cyegukanywe na Alyn Sano utari uhari  kubera ko atari mu Rwanda igihembo cye yakiriwe na murumuna we.

Best album of the year cyegukanywe na Tom Close abikesha album ye yise Essence.

Best Female artist cyegukanywe na Bwiza nyuma y’uko mu mwaka ushize yegukanye igihembo cya Best new artist.

Best Male artist of the year ni igihembo cyatwawe na Israel Mbonyi.

Dram T niwe wegukanye  igihembo cya Best Burundian Artist.

Itorero Inyamibwa niryo ryahize  andi  uyu mwaka mu bihembo bya IMA

Yago yahawe igihembo cy’umuhanzi mushya  muri uyu mwaka 

John Elarts  niwe wafatiye Dram T igihembo 

Israel Mbonyi yegukanye  ibihembo  bibiri birimo n’icy’umuhanzi w’umwaka mu bihembo bya IMA

Director Gad niwe wahize abandi mu bihembo bya IMA

Album ya Tom Close niyo yahize izindi 

Bwiza  yegukanye  igihembo cya Best Female Arist 

Producer Kiiz wo muri Country Records niwe wahize abandi

Murumuna wa Alyn Sano niwe wafashe igihembo cya mukuru we utari mu Rwanda

KANDA HANO UREBE AMAFOTO YARANZE  UYU MUHANGO

“>

“>
“>
“>

AMAFOTO:Freddy Rwigema/InyaRwanda.com

Umuvugabutumwa akaba n'umushoramari kabuhariwe Pastor Hortense Mazimpaka, ni umwe mu bavugabutumwa b'abahanga bakunzwe cyane n'urubyiruko bitewe n'uko ahanini akunze kwigisha ingingo zibakoraho cyane.

Asangiza ubuhamya bwe abari bitabiriye umugoroba wahariwe imiryango muri gahunda yatangijwe na Hubert Sugira yitwa 'Kigali Family Night' yabaga ku nshuro yayo ya mbere, Pst Hortense yavuze ukuntu yamenye bwa mbere ko nk'umugore afite inshingano zimureba mu muryango, amaze imyaka ine ashinze urugo.

Yagize ati: 'Ndibuka ahantu nakirijwe mu 1998, habaga amateraniro y'abadamu noneho bakigisha. Ni ubwa mbere nari numvise ko umugore afite inshingano mu rugo. Hari igihe ugira ibyago ukaba mu muryango ariko bigashoboka ko ababyeyi bagenda kare cyangwa se nabo bakaba batazi gutegura abana babo. Ni ubwa mbere nari menye ko hari ibintu bindeba mu rugo nagiyemo kandi nari narashatse mazeyo imyaka ine.'

Pst Hortense yatanze ubuhamya bw'ibyamubayeho ashaka kugaragaza ikibazo gikomeje kuba intandaro yo gusenyuka kw'ingo nyinshi. Yavuze ko muri iki gihe usanga umusore cyangwa inkumi biyemeza kubana gutyo gusa, ariko mu by'ukuri batazi inshingano zabo n'ibibategereje byose mu rushako.

Yasobanuye ko icyaba cyiza ari uko urubyiruko rwakwigishwa umuryango hakiri kare aho kuwigishwa bawugezemo kuko ahanini birangira usenyutse.

Ati: 'Abasore n'abakobwa bacu nibigishwa hakiri kare bizafasha umuryango. Mu by'ukuri muri iki gihugu turi abantu barimo bashaka iterambere, turiga mu bukecuru, turiga mu busaza, abantu bahora biga ibintu bitarangira kuko bidufitiye umumaro.

N'umuryango rero, abantu bakeneye kuwiga. Kera abantu babyigiraga mu muryango, igihugu cyacu gihura n'ibibazo imiryango iratagarana, abantu barirera, umuntu akura adafite icyitegererezo.'

Uyu muvugabutumwa yakomoje no ku isura itari nziza ku muryango iri mu mutwe y'abakiri bato, aho bamwe bazi ko ari ibibazo gusa biriyo abandi bakavuga ko ari ukwizirikaho igisasu.

Yahaye abari aho umukoro ugira uti: 'Ubuzima ubayeho ni ubutumwa ku bantu ibihumbi. Rero bana neza n'umugore wawe, ubanhe neza n'umugabo wawe kuko ni ubutumwa ku bandi. Ikindi iyi umuntu yatandukanye n'uwo bashakanye, na none aba atanze ubutumwa ku bavandimwe be n'abandi bagize umuryango we. 

Rero, ibyiringiro birahari ariko twibwire twese ko bitureba kuzamura ijwi, kubaho ubuzima bushobora kuba icyitegererezo ku wundi muntu. Rero ingo nziza zibaho ntabwo zitunganye, ariko zaba nziza twese tubigizemo uruhare.'

Yibukije urubyiruko rwitegura kubaka imiryango kugenda biteguye ko bagiye gufatanya bakunganirana muri byose, aho kumva ko bagiye kwicara bagahabwa gusa nyamara bo ntacyo bakora.

Ati: 'Icya mbere ni ukumenya ko hari icyo ugiye kumara hariya hantu, kuko akenshi iyo umuntu ashatse aba yumva ariwe bagiye kugira icyo bamarira; bamukunde bamukundwakaze bamuheke bamuterure ariko iteka ukumva ari wowe bazabiha. Rero navuga ko icyo umuntu akwiye kwiga mbere yo gutangiza umuryango, ni ukumenya ko hari icyo agiye gutanga muri uwo muryango.'

Yongeyeho ko kuri we, urushako arufata nk'igihango aho umugabo yagakwiye kujya mu rugo azi neza ko agiye kwegurira ubuzima bwe umugore, umugore nawe akamuha ubwe, buri wese akabaho ku bwa mugenzi we kugira ngo umuryango ubeho neza.

Pst Hortense Mazimpaka yahishuye ukuntu yamaze yamaze imyaka ine mu rugo atazi inshingano ze nk’umugore

Yatangaje ko kuba ari umupasiteri bidakuraho ko yubahiriza inshingano ze nk’umugore mu rugo 

Pst Hortense yavuze ko urubyiruko rukwiye kwigishwa ibijyanye n’urushako mbere yo kurugeramo

Ni umwe mu bavugabutumwa bagezweho muri iki gihe

Yari yaherekejwe n’umugabo we

Yabajijwe impamvu atakidefiriza cyangwa ngo yirimbishe nk’abandi bagore, ahita abaza umugabo we niba abona ari mwiza maze nawe abihamya adaciye ku ruhande

Kanda hano urebe ikiganiro cyose Pastor Hortance Mazimpaka yagiranye n’abitabiriye ”Kigali Family Night Edition I”

Mu gihe amakipe ari mu karuhuko k’igice kibanza cya shampiyona ya 2023-24, amwe ahugiye mu kureba uburyo yazagarukana amaraso mashya.

Ku ikubitiro n’ubundi amakipe aba ahabwa amahirwe ku gikombe cya shampiyona, Rayon Sports na APR FC ni yo yavuzwe ku isoko cyane.

APR FC ifite imyanya 4 y’abakinnyi igomba kongeramo, gusa Chairman wa yo Lt Col Richard Karasira yavuze ko bigenze neza bababonye banabatwara mu irushanwa rya Mapinduzi Cup cyane ko iri rushanwa ribemerera gutwara abakinnyi bifuza kugerageza.

Ati “dufite imyanya ine tugomba kuzuza, bigenze neza twabatwara cyane ko irushanwa rya Mapinduzi Cup ryemera ko ikipe yakinisha abakinnyi yifuza kugerageza.”

Bivugwa ko iyi kipe mu bakinnyi yari isanganywe izahagurukana anakinyi byibuze batatu bashya bazaba baje kongeramo imbaraga.

Haravugwamo Kategeya Elie ukina inyuma y’umwataka muri Mukura VS, uyu mukinnyi w’umunyarwanda bivugwa ko umutoza wa APR FC yamwishimiye cyane.

Bivugwa ko yazajyanwa muri Mapinduzi Cup bakamugerageza basanga atari ku rwego akaba yasubizwa muri Mukura VS agasorezamo shampiyona akazaza muri APR FC mu mwaka w’imikino utaha.

Bivugwa ko kandi iyi kipe y’ingabo z’igihugu iri mu biganiro na Kiyovu Sports ngo ibe yagura amasezerano y’amezi 6 ya Mugiraneza Frodauard ngo asigaranye abe yaza guhatanira unwanya n’umugande, Taddeo Lwanga.

Si aba bakinnyi gusa kuko havugwamo na rutahizamu w’umunya-Ghana, Peter Agblevor wa Musanze FC n’Umunya-Centrafrique, Malipangu wa Gasogi United, gusa aba bakinnyi, Chairman wa APR FC yavuze ko nta biganiro bagiranye.

Muri Rayon Sports na yo harimo inkuru z’igura aho yo bagomba guhera ku mutoza mukuru.

Imikino yo kwishyura ya shampiyona 2023-24 Rayon Sports igomba kuyitangira ifite umutoza mushya, ni nyuma y’uko yatandukanye na Yamen Zelfani Alfani imikino yari isigaye igatozwa na Mohamed Wade, gusa ntabwo azakomeza kuyitoza nk’umutoza mukuru mu mikino yo kwishyura.

Bivugwa ko ubu Rayon Sports iri mu biganiro n’umutoza Patrick Aussems watoje amakipe nka Simba SC muri Tanzania na AFC Leopards yo muri Kenya.

Iyi kipe kandi igomba kongeramo rutahizamu mushya ugomba kuza gufasha abahari, havugwamo rutahizamu wa Musanze FC ukomoka muri Ghana, Peter Agblevor, iyi kipe imwifuzamo miliyoni 20.

Kategeya Elie wa Mukura VS aravugwa muri APR FC

Frodauard ni irindi zina rivugwa muri APR FC

Malipangu na we yavuzwe muri APR ariko ubuyobozi burabihakana

Agblevor aravugwa muri Rayon na APR FC

Patrick Aussems ni we mutoza Rayon Sports yifuza