Webrwanda Backend

Author: webrwanda

  • Abakinnyi 11 beza bagize ikipe y’umwaka wa 20… – #rwanda #RwOT

    Mu mwaka wa 2023 mu Rwanda hakinwe imikino y’amarushanwa atandukanye irimo iya shampiyona ndetse n’iyi gikombe cy’Amahoro.

    Taliki 28 z’ukwezi kwa 5 APR FC yegukanye igikombe cya shampiyona cya 2022/2023 inganya amanota na Kiyovu Sports agera kuri 63 ariko yo ikayirusha ibitego izigamye 26 mu gihe Kiyovu Sports yo yari izigamye ibitego 17.

    Taliki 03 z’ukwezi kwa 6 Rayon Sports nayo yegukanye Igikombe cy’Amahoro cya 2023 itsindiye APR FC ku mukino wa nyuma igitego 1-0 cya Ngendagimana Eric.

    Taliki 18 Kanama kandi hatangiye gukinwa imikino ya shampiyona y’icyiciro cya mbere ya 2023/2024 ndetse imikino 15 yashyizweho akadomo APR FC ariyo iyoboye urutonde n’amanota 33.

    Tugendeye kuri iyi mikino yakinwe, abakinnyi 11 bitwaye neza kurusha abandi n’umutoza wabo ni aba bakurikira:

    Umunyezamu: Nicolas Sebwato

    Nta gushidikanya ko uyu munyezamu ukinira ikipe ya Mukura VS ariwe witwaye neza kurusha abandi muri 2023, yafashije ikipe ye kurangiriza ku mwanya wa 7 muri shampiyona ndetse no ku mwanya wa 3 mu gikombe cy’Amahoro.

    Uko Mukura VS ihagaze kugeza ubu muri shampiyona iri ku mwanya wa 5 n’amanota 23. 

    Umunyezamu yari ahanganye nawe ni Kimenyi Yves witwaye neza muri shampiyona ya 2022-2023 afasha Kiyovu Sports kurangiza ku mwanya wa 2 muri no ku mwanya wa 4 mu gikombe cy’Amahoro.

    Ariko nyuma yaje guhindura ikipe ajya muri AS Kigali itari iri kwitwara neza muri shampiyona ndetse yaje guhura n’ikibazo cy’imvune ntiyarangiza imikino ibanza ya shampiyona.

    Ba myugariro bo ku mpande, Fitina Ombolenga na Ishimwe Christian

    Fitina Ombolenga ukina yugarira anyura iburyo niwe mukinnyi witwaye neza kurusha abandi bose bakina banyura kuri uruhande bijyanye n’uburyo yafashije ikipe ye ya APR FC kutinjizwa ibitego byinshi ndetse akanayifasha mu buryo bwo kubitsinda ahindura imipira myiza ivamo ibitego imbere y’izamu.

    Umukinnyi Ombolenga yari ahanganye nawe kuri uyu mwanya ni Serumogo Ally witwaye neza muri shampiyona ya 2022/23 ari muri Kiyovu Sports ariko kuva yakwerekeza muri Rayon Sports yasubiye inyuma dore ko byatumye no mu ikipe y’Igihugu y’u Rwanda, Amavubi atakaza umwanya ubanzamo.

    Ishimwe Christian ukina anyura ku ruhande rw’ibumoso nawe yitwaye neza mu mwaka wa 2023 aho yafashije APR FC mu buryo bwo kugarira neza ndetse no gutsinda binyuze cyane ku mipira y’imiterakano.

    Abakinnyi Ishimwe Christian yari ahanganye nabo kuri uyu mwanya ni Bugingo Hakim witwaye neza muri Gasogi United na Rayon Sports yamuguze mu mpeshyi ndetse na Ganijuru Ishimwe Elie muri Rayon Sports gusa ntabwo bamurusha imibare myiza nibyo bagejeje ku makipe yabo.

    Ishimwe Christian niwe mukinnyi wugarira anyura ku ruhande rw’ibumoso witwaye neza kurusha abandi muri 2023

    Abakinnyi bakina bugarira hagati inyuma: ni Rwatubyaye Abdul na Mitima Isaac

    Kapiteni wa Rayon Sports mu mwaka wa 2023 nibwo yagarutse mu bihe byiza bye nyuma yo kugira ikibazo cy’imvune kigatuma asubira inyuma naho Mitima Isaac nibwo yabaye myugariro mwiza biza no gutuma ahamagarwa mu ikipe y’Igihugu y’u Rwanda, Amavubi atari asanzwe ahamagarwa.

    Abakinnyi bakina mu kibuga hagati: ni Nshimirimama Ismael Pitchou, Bigirimana Abedi na Heltier Luvumbu Nzinga 

    Umukinnyi ukina hagati afasha mu kugarira uzwi nka nimero 6 ni umurundi Nshimirimama Ismael Pitchou, yafashije ikipe ya Kiyovu Sports kurangiza ku mwanya wa 2 muri shampiyona no kuwa 4 mu gikombe cy’Amahoro ndetse naho ari muri APR FC kugeza ubu naho ari kwitwara neza cyane.

    Ukina nka nimero 8 ni Bigirimana Abedi, nawe yakoze akazi gakomeye muri Kiyovu Sports bijyanye n’ibitego yatsindaga ndetse n’ubu aho ari muri Police FC yakomerejeho dore ko ari ku mwanya wa 5 mu bamaze gutsinda ibitego byinshi bigera kuri 7.

    Ukina nka nimero 10 ni Heltier Luvumbu Nzinga, Uyu mukinnyi ni umwe mu bakoze akazi gakomeye kugira ngo Rayon Sports itware igikombe cy’Amahoro ndetse n’ubu aho iri ku rutonde rwa shampiyona abifitemo uruhare rukomeye kuko niwe umaze kuyitsindira ibitego byinshi bigera kuri 6.

    Heltier Luvumbu Nzinga wa Rayon Sports 

    Abasatira: Léandre Onana, Victor Mbaoma na Muhadjiri

    Léandre Onana wakiniraga ikipe ya Rayon Sports ariko akaza kuyivamo mu mpeshyi y’umwaka ushize yerekeje muri Simba SC yo muri Tanzania aza mu bakinnyi 3 beza basatira ba 2023. 

    Niwe watsinze ibitego byinshi kurusha abandi bakinnyi muri shampiyona bigera kuri 15 ndetse anatsinda 5 mu gikombe cy’Amahoro.

    Victor Mbaoma usatira mu ikipe ya APR FC nubwo yakinnye amezi macye muri 2023 ariko yerekanye ubuhanga budasanzwe bijyanye n’ibitego yatsinze mu mikino 15 ibanza ya shampiyona bigera kuri 12 ndetse akaba ari nawe uyoboye abandi ba rutahizamu bose kugeza ubu.

    Hakizimana Muhadjiri nawe aza mu bakinnyi 3 beza b’Imbere bitewe n’uburyo yitwaye neza muri shampiyona ya 2022-2023 ndetse n’ubu mu mikino 15 ibanza yitwaye neza kuko aho Police FC iri kumwanya wa 2 abifitemo uruhare rukomeye.

    Leandre Onana yatsinze ibitego 15 muri shampiyona na 5 mu gikombe cy’Amahoro

    Umutoza Mukuru : Haringingo Francis

    Uyu mutoza w’Umurundi niwe witwaye neza bitewe nuko yafashije Rayon Sports kwegukana igikombe cy’Amahoro ndetse ikanarangiriza ku mwanya wa 3 muri shampiyona irushwa amanota 2 gusa na APR FC nubwo nyuma yaje gutandukana nayo.

    Undi mutoza yari kuba ahanganye nawe Adil Mohammed ariko yaje gutandukana n’ikipe imikino ya shampiyona n’iyi gikombe cy’Amahoro itarangiye birangira asimbuwe na Ben Mousaa wari umwungiriza.

    Umwungiriza wungirije : Afahmia Lotfi 

    Uyu mutoza yatozaga umwaka wa mbere muri shampiyona ya 2022/23 aho yaje asanga Mukura VS iri mu bihano byo kutemererwa kugura abakinnyi ariko agakoresha abahari biganjemo abakiri bato bikarangira ikipe yitwaye neza ikarangiriza ku mwanya wa 7 muri shampiyona ndetse ikaba n’iya 3 mu gikombe cy’Amahoro.

    No muri shampiyona ya 2023/24 akomeje kwitwara neza kubera ko kugeza ubu Mukura VS iri ku mwanya wa 5 n’amanota 23.

    Victor Mbaoma ari mu bakinnyi basatira bitwaye neza muri 2023

    Kapiteni wa Rayon Sports nawe ari mu bakinnyi bitwaye neza muri 2023

    Ismael Pitchou ukina mu kibuga hagati niwe witwaye neza kurusha abandi ku mwanya we muri 2023

    Abakinnyi bitwaye neza mu mwaka wa 2023 mu Rwanda mu mboni z’abanyamakuru ba InyaRwanda.com

    Source : https://inyarwanda.com/inkuru/138165/abakinnyi-11-beza-bagize-ikipe-yumwaka-wa-2023-mu-rwanda-138165.html

  • Abenshi biragije Imana! Ubutumwa bwibyamamar… – #rwanda #RwOT

    Kuva mu masaha ya saa sita z'ijoro ubwo umwaka waraswaga hirya no hio ku isi, abantu bagiye bajya ku mbuga nkoranyambaga zabo bakandika ibyo bishimira bagezeho mu mwaka ushize, bakanasengera ibyo bifuza kugeraho mu mwaka mushya.

    Umwaka wa 2023, ni umwaka waranzwe n'ibikorwa byinshi mu myidagaduro haba mu Rwanda no mu mahanga. 

    Ni muri urwo rwego, ibyamamare bitandukanye bikomeje kwishimira ko imwe mu mihigo yabo bashoboye kuyihigura banasezeranya abakunzi babo kubagezaho ibyiza kurushaho umwaka utaha.

    1.     Sheebah

    Umuhanzikazi ukomoka mu gihugu cya Uganda, Sheebah Karungi, yatangiye umwaka ashimira abafana be bamubaye hafi bakamutera imbaraga mu mwaka wa 2023, ashimira abamufashije mu bikorwa bitandukanye yakoze barimo aba-Producers, abamwambitse, abanditsi b'indirimbo , ibitangazamakuru byamushyigikiye n'abandi bagize uruhare mu kwagura umuziki we, abizeza ibyiza byinshi mu mwaka mushya wa 2024.

    2.     Nick Dimpoz

    Umuhanzi akaza n'umukinnyi wa filime nyarwanda nawe yatangiye umwaka yiragiza Nyagasani hamwe n'umuryango we. Abinyujije ku rubuga rwe rwa Instagram yanditse ati: 'Akira amashimwe yacu Mana Data wa twese turagushimiye.'

    3.     Umukundwa Cadette


    Uyu mukobwa wamamaye mu mashusho y'indirimbo zakunzwe cyane mu bihe byatambutse harimo n'iyitwa 'Munda' y'umuhanzi         Kevin Kade, nawe yashimangiye ko umwaka wa 2023 wamubereye agahebuzo, avuga ko yiringingiye ko n'umwaka wa 2024 uzaba mwiza kurushaho. Cadette yavuze ko atangiye umwaka mushya nawe ari mushya hamwe, yifuriza abamukurikira bose umwaka muhire.

    4.     Clarisse Karasira

    Umuhanzikazi w'indirimbo gakondo, Clarisse Karasira usigaye ubana muri Amerika n'umugabo we ndetse n'imfura yabo, Kwanda, yifashishije indirimbo yo mu gitabo cy'indirimbo maze yiragiza Imana mu mwaka mushya. Yagize ati: Mana wadutabaraga mu minsi yak era, nanone uzaturengere tugeze ku mpera.'

    5.     David D

    Umuhanzi nyarwanda, Davis D ari mu byamamare byinjiranye akanyamuneza mu mwaka mushya kuko yawusangiye na bamwe mu bakunzi be. Yagize ati: 'Nishimiye kugaruka ku mihanda ya Biryogo aho natangiriye umuziki ngo nsangire n'abakunzi banjye umwaka mushya wa 2024.'

    6.     Kevin Kade

    Umuhanzi Kevin Kade wakoze indirimbo yitwa 'Munda' igakundwa n'abatari bacye, yasoje umwaka ataramana n'abakunzi be, maze ajya ku rubuga rwa Instagram arandika ati: 'Imvura y'imigisha yangezeho iri joro ndagukunda Mana warakoze!'

    Arongera ati: 'Nsozanije umwaka n'abafana nkunda cyane.'

    7.     Tiwa Savage

    Umwamikazi w'injyana ya Afrobeats nawe ari mu bishimiye umwaka wa 2023, maze mu butumwa bwe yiragiza Imana ayisaba ko umwaka wa 2024 wazamubera mwiza kurushaho.

    8.     Bwiza

    Umwe mu bahanzikazi bigaragaje mu mwaka ushize wa 2023, Bwiza yafashe umwanya ashimira buri wese wamufashije akamushyigikira mu rugendo rwe rwa muzika, abashimira ku bw'icyizere bamugiriye, abifuriza umwaka mushya muhire kandi yibutsa abakunzi be ko abakunda.

    9.     Spice Diana

    Umuhanzikazi wo muri Uganda, Spice Diana yatangajwe n'uburyo umwaka wa 2023 wihuse cyane, avuga ko ariwo mwaka wamubereye mwiza mu buzima bwe, yifuriza abamukurikira kuri Instagram umwaka mwiza wa 2024.

    10.     Louise Mushikiwabo

    Umunyamabanga Mukuru w'Umuryango uhuza ibihugu bikoresha ururimi rw'Igifaransa (OIF), Louise Mushikiwabo yifurije abanyarwanda ubunane bwiza, abifuriza ibyiza byose mu mwaka mushya, birimo ubuzima bwiza, ibyishimo bisendereyem, amata n'ubuki n'ibindi byose biryoshye.

    Source : https://inyarwanda.com/inkuru/138162/abenshi-biragije-imana-ubutumwa-bwibyamamare-byinjiranye-akanyamuneza-mu-mwaka-mushya-138162.html

  • Abihariye batunguranye mu birori nibitaramo… – #rwanda #RwOT

    Bimwe mu bihe bitazibagirana ni ukubona Perezida Kagame mu bikorwa binyuranye by'imyidagaduro, ibintu byazamuraga amarangamutima ya benshi bamukunda.

    Ubwo Perezida Kagame yitabiraga ibitaramo byagendanye n'iserukiramuco rya Giant Of Africa [GOA], biri mu bihe bitazibagirana mu byaranze umwaka wa 2023 kuko byizihiye benshi.

    Muri ibi bitaramo Perezida Kagame yagaragaye anyura mu bafana igitaramo kigasa nk’aho gihagaze, abafana bakaririmbira rimwe ubutitsa ko bamukunda.

    Yahaye kandi umwanya abahanzi nka Diamond Platnumz icyo gihe bwo yari no kumwe n'umufasha we, umukobwa wabo Ange Kagame wari kumwe n'umwuzukuru wabo. Yanahuye kandi anasuhuzanya na Bruce Melodie uri mu bahanzi bihagazeho muri iki gihe mu Karere.

    Perezida Kagame yarishimiwe cyane abitabiriye ibirori n’ibitaramo yagiyemo bagafata umwanya wo kumwibutsa ko ari we bahisemo kandi bamushima intambwe akomeza guteza abanyarwandaMadamu Jeannette Kagame ni we wari umushyitsi mukuru mu birori mpuzamahanga byo Kwita Izina bikomatanya imyidagaduro n’ubukerarugendo

    Minisitiri w'Urubyiruko n'Iterambere ry'Ubuhanzi, Dr Utumatwishima Abdallah na we yatumye igitaramo cya Yago Pon Dat kirushaho gushyuha yaba mu gihe haburaga agahe gato ngo kibe ubwo yatangazaga ko uyu muhanzi yamutumiye.

    By’akarusho kandi yitabiye iki gitaramo ari kumwe n'umugore we n'abana babo babiri, ibintu nabyo byagarutsweho cyane. Abahanzi bagaragaje ko ari intambwe kuba bafite aho babarizwa na Minisitiri nyirizina ubafite mu nshingano akaba atangiye kwitabira ibitaramo byabo.

    Minisitiri w’Urubyiruko n’Iterambere ry’Ubuhanzi, Dr Utumatwishima Abdallah n’umuryango we bitabiriye igitaramo cya Yago Pon Dat

    Umunyamabanga Mukuru wa Francophonie, Madamu Louise Mushikiwabo yatunguranye mu gitaramo cya Rumata wa Musomandera cya Ruti Joel, ibintu byakoze ku mutima abakunzi b’imyidagaduro.

    Umunyapolitike uri mu b’imbere ku isi, Madamu Louise Mushikiwabo yashyigikiye Ruti Joel mu Igitaramo aheruka gukora

    Kate Bashabe uri mu bari n'abategarugori b'igikundiro cyo hejuru ariko badakunze kugaragara mu ruhame, na we kumubona mu gitaramo cya Ruti Joel byazamuye amarangamutima ya benshi.

    Kate Bashabe ari mu bitabiriye Rumata wa Musomandera igitaramo cya Ruti Joel cyabereye muri Intare Conference Arena

    Miss Rwanda 2016, Mutesi Jolly nubwo ari mu badasiba mu nkuru zitandukanye ariko ni gacye agaragara mu mu birori n’ibitaramo. Kumubona mu gitaramo cya Danny Nanone byatunguye benshi ariko binanyura abatari bacye bamufatiraho urugero kumubona yishimanye n’abandi mu ruhame.Miss Mutesi Jolly yari yizihiwe cyane mu gitaramo cya Danny Nanone cyaririmbyemo n’inshuti ye magara Butera Knowless

    Byinshi mu birori n'ibitaramo byagiye biba, byitabiriwe na Minisitiri wa Siporo Munyagaju Mimosa cyane ko wasangaga bishamikiye kuri gahunda z'imikino.

    Minisitiri Munyagaju yagiye yitabira byinshi mu birori n’ibitaramo dore ko byinshi byabaga binashamikiye kuri siporo

    Source : https://inyarwanda.com/inkuru/138157/abihariye-batunguranye-mu-birori-nibitaramo-bya-2023-bikizihira-benshi-amafoto-138157.html

  • Na The Ben koko? Bisobanuye iki kubura kwiby… – #rwanda #RwOT

    Kenshi ibyamamare mpuzamahanga bigenderera u Rwanda ukumva hari abafite aho bahuriye n'ubuhanzi bavugira mu matama ko batahawe rugari ngo babashe kuganira bungurane ibitekerezo banamenyane.

    Urugero rwa hafi ni igihe Kendrick Lamar aheruka i Kigali. Bamwe mu bahanzi nyarwanda bagaragaje ko hari hakwiriye kubaho uburyo bwo kubahuza na we biranakorwa nubwo bitageze kuri bose, n'ubu bamwe bakaba bakimyoza.

    Gusa nubwo bimeze gutyo, ubwo Zari aheruka i Kigali bisa nk’aho haje igihu mu byamamare by'i Kigali, amahirwe aza abasanga ariko baburirwa irengero aho uyu muherwekazi ufite izina rikomeye yari.

    Ubwo Zari yageraga i Kigali yakiriwe n’abarimo Galstony umujyanama we wari umaze iminsi mu Rwanda ashyikirizwa indabo na Inzora Protocol n’abasore b’inkorokoro bashinzwe umutekano bo muri The Wave Lounge

    Kuvuga ko Zari yamaze gushinga imizi mu myidagaduro ndetse ko kuba ufite icyo ukora gifatika gishamikiye kuri yo guhuza na we byakugirira umumaro, ntabwo byaba ari ugukabya.

    Uhereye hafi uyu mugore afite filimi ihuriwemo n'ibyamamare nyafurika inyura ku rubuga rurangiranwa rwa Netflix, si bibi kuba abanyarwanda nabo bakwisanga muri uwo mushinga we.

    Si ibyo gusa ni umuntu uvuga rikijyana mu bihugu bigoranye ku banyarwanda kuba babasha kwigonderamo imishinga yaba irebana n'umuziki, sinema, imideli n'ibindi.

    Muri ibyo harimo Leta Zunze Ubumwe z'Amerika aho ari umuntu wa hafi wa Rick Ross icyamamare mu muziki w'injyana ya Hip Hop n'ubushabitsi ndetse na kompanyi zihagazeho nka Belaire usanga zitera inkunga ibyo akora.

    Mu Bwongereza ahantu yize mu myaka ya za 2000 ajya anahakorera imishinga inyuranye irimo n'ibirori bya Zari All White.

    Muri Nigeria, Ghana, South Africa naho ni uko kuko benshi mu bakinnyi bakina muri Young, Famous&African ni ho bakomoka. Iyo bigeze muri Tanzania ho boba ibindi kuko abafitiye abuzukuru.

    Ni we mugore mukuru wa Diamond Platnumz (mu bo uyu muhanzi yemera), kandi byafashe imyaka irenga 10 kugira ngo umunyarwanda yongere kuba yakorana indirimbo na Diamond nimero ya mbere mu Karere.

    Indirimbo ya mbere uyu muhanzi yakoranye n'umunyarwanda ni iyo muri 2012 yakoranye na Mico The Best, icyo gihe uyu muhanzi yari ataragera kure cyane ariko na none yari mu bahagaze neza.

    Undi uheruka ni The Ben na we utarabashije kuboneka mu birori Zari yakoreye i Kigali nubwo kenshi yagiye yumvikana avuga ko ari inshuti.

    Birashoboka cyane ko haba harabayeho kugendera mu kigare kwa benshi no kwanga kwiteranya ku bantu babana umunsi ku wundi aribo Kigali Boss Babes yari ifite ibirori byabereye muri Century Park.

    Ni birori byari bifite imimerere neza neza nk'iyi bya Zari All White Party nubwo bo babyise Black Elegance Party. Ikindi byombi byanabereye umunsi umwe tariki 29 Ukuboza 2023. Ibyamamare byinshi mu Rwanda byari byibereye mu birori bya Kigali Boss Babes.

    Ntawavuga ko ari umushinga mubi kubara amahirwe no kuyuririraho bakagaragaza ihangana n'icyamamarekazi muri Afurika. Gusa mu bundi buryo hari isura byatanze itari nziza mu myidagaduro nubwo ntabidashira mu bucuruzi n’ubuzima muri rusange.

    Zari akanyamuneza kari kose ubwo yinjiraga muri The Wave Lounge aho yakoreye ibirori byitabiwe n’abanyabirori b’abasilimu b’i Kigali

    Ibirori bya Zari nubwo byarimo udutego tego mu buryo bugaragara, byabashije kugenda neza abantu bitabira ku bwinshi kandi wabonaga ko banyotewe no guhura na we banishimiye kumubona nyuma y'imyaka igera ku 10 kuko yaharukaga muri 2014.

    Nubwo nta byamamare byinshi byarimo yaba mu mideli no mu muziki, gusa abari bahari bari bishyuye banagira ibihe byiza, ahantu haruzura, ibyo kunywa bihenze n'ibyo kurya birasangirwa, umuziki urabyinwa karahava.

    Ibirori bya Kigali Boss Babes by’abambaye umukara byateguwe mu gihe gito bisa nk’ibyatumye benshi mu byamamare babura amahitamo nubwo baba barabonaga ko kugirana ubucuti na Zari hari icyo byabungura

    Ubona ko Zari icyo ashyize imbere ari ugushimisha abakunzi be. Kumenya niba mu birori bye harimo ibyamamare, wavuga ko atari abyitayeho cyane ko ari bacye wavuga ko azi.

    Nk’uko yabitangaje akigera ku kibuga cy'indege, Zari yabashije kwishimana n'abanyabirori bamukunda batari bacye bari bahari bafata amafoto n'amashusho y'urwibutso.

    Ibyabaye ni ibintu byareberwa mu ndorerwamo ebyiri y’uwambaye ikirezi utamenya ko cyera cyangwa se no kwihesha agaciro abantu bateza iby'iwabo imbere.

    Birashoboka kandi kuba abahanzi, abanyamideli n'abandi batarabashije kureba inyungu bashobora kungukira mu kujya gushyigikira Zari cyangwa se batekereje ku z'igihe kirekire zo gushyira itafari ku mushinga Kigali Boss Babes [KBB] ngo nushinga imizi bazabibuke.

    Ariko burya na none hazirikana imfura kandi “Iyo menya” ni ijambo benshi babitse mu mutima.

    Nubwo abafite amazina azwi mu myidagaduro nyarwanda babaye iyanga kwa Zari, abantu barakubise baruzura abasilimu barishyura kugera no ku meza ya Miliyoni 1.5FrwThe Ben ntiyakandagiye mu birori bya Zari kandi byari bizwi ko bafitanye ubucuti bukomeye na cyane ko yakoranye indirimbo na se w’abana be, Diamond, wamuhaye amahirwe yimye abandi bahanzi nyarwanda mu myaka 10 ishize

    Ntawavuga ko gushyigikirana ari bibi ariko nta n’uwahakana ko hari amahirwe yanyuze mu myanya y’intoki ibyamamare byo mu Rwanda

    AMAFOTO: Rwigema Freddy na Ngabo Serge-inyaRwanda

    Source : https://inyarwanda.com/inkuru/138161/byaba-ari-ukwanga-kwiteranya-bisobanuye-iki-kubura-kwabahanzi-nabanyamideli-bakomeye-mu-bi-138161.html

  • Gafotozi wa Rayon Sports yatoranyije amafoto meza 10 yaranze ibihe byiza Rayon Sports yagize mu mwaka 2023 – AMAFOTO  – YEGOB #rwanda #RwOT

    Umufotozi w'ikipe ya Rayon Sports witwa Delphin UMURERWA yatoranyije amafoto meza 10 yaranze ibihe byiza Rayon Sports yagize mu mwaka 2023.

    Source : https://yegob.rw/gafotozi-wa-rayon-sports-yatoranyije-amafoto-meza-10-yaranze-ibihe-byiza-rayon-sports-yagize-mu-mwaka-2023-amafoto/

  • U Rwanda rwungutse Intumwa y’Imana Sebagabo C… – #rwanda #RwOT

    Pastor Sebagabo Christophe ni ko yari asanzwe yitwa, akaba ari Umushumba Mukuru w’Itorero Calvary Wide Fellowship Ministries. Kuri uyu wa Gatandatu tariki 30 Ukuboza 2023, yasutsweho amavuta y’Intumwa mu muhango wayobowe na Apotre Dr. Paul Gitwaza uyobora Zion Temple ku Isi.

    “Amavuta y’Intumwa amutembeho, yamanutse mu mutwe wa Aroni, agera ku bwanwa bwe”. Ni ko Apotre Dr. Gitwaza yavuze ubwo yimikaga uyu mukozi w’Imana Sebagabo Christophe. Yamwatuyeho kuzajya asengera abarwayi bagakira.

    Ati “Mu izina rya Yesu, azakize abarwayi, azirukane abadayimoni, abazure abapfuye, azamanure imvure, azategeke ibicu, azacemo Yorodani, azakore ibihambaye, intege nke zihinduke imbaraga zawe, umukoreshe”.

    Yahise atangira kumuhanurira ati “Umwuka w’Uwiteka akuriho, agusize amavuta ngo ubwirize ubutumwa abakene”. Yanateye indirimbo ivuga ngo “Amavuta asa n’izahabu y’imyerayo amutembaho”. 

    Christophe yambitswe ikimenyetso cy’Ubushumba mu ishati, “Ni ikiziriko cyo mu Ijosi, ni imbata ya Kristo”. Yambitswe kandi umwambaro w’umweru ugera ku maguru, anakenyezwa umushumi/umukandara usobanura ukuri. Gitwaza ati “Uzabwirize ukuri, ntuzace ku ruhande”. 

    Nyuma yo kumwambika igishura cy’umweru, Apotre Gitwaza yagize ati “Umwambaro w’umweru ni igishura cyo gukiranuka, uzakiranuke mu byo uvuga, mu byo ukora byose mu murimo w’Imana uhawe”. 

    Yongeyeho ati “Hanyuma azahabwa icyubahiro kuko akorera Imana”. Yahise amwambika furari, umusaraba ndetse n’impeta isanzwe yambarwa n’abashyingiranywe, ati “Uyu munsi ushyingiwe n’Itorero Calvary n’umubiri wa Kristo wose. Iyi ni impeta y’ubu Bushop n’Ubushumba”.

    Apotre Christophe yahawe kandi inkoni y’ubutware nk’ikimenyetso cyo kuragira umukumbi w’Imana. Inkoni yahawe irimo ebyiri; inkoni igarura izagiye kure “ukazigarura, abananiwe n’abarushye uzabagaruze ineza kuko uri umwungeri”, ndetse n’inkoni yo kurinda umukumbi aho azayikoresha mu kurwanya umwanzi”.

    Mbere yo kumushyigikiriza Bibiliya, Apotre Dr. Gitwaza yabwiye Sebagabo ati “Ntukiri Christophe usanzwe uri Intumwa Christophe Sebagabo. Ibyo twavuze byose biri muri iki gitabo. Iki gitabo kirimo amagambo y’ubugingo, kizakuyobore, amagambo akirimo uzayabwire isi yose.

    Uzarinde umukumbi nk’uko Umwuka Wera agushyiriyeho kuba umushumba wabo, uzakomeze abizira, ugarure abasubiye inyuma, wubake umubiri wa Kristo. Emera iki gitabo kizabe isoko wowe n’abo uyobora muzavomeramo amazi y’ubugingo”.

    Apotre Christophe Sebagabo anafite impano yo kuramya Imana, ndetse yigeze gushyirwa ku rutonde rw’abantu 10 bazi gusirimba cyane ku Isi. Mu byo ateganya harimo no gukora indirimbo ze bwite nk’uko yabihamirije umunyamakuru wa InyaRwanda mu mpera za 2022.

    Itorero Calvary Wide Fellowship Ministries (CWFM) rikorera Kimironko – Zindiro. Ni umuryango ushingiye ku kwizera Imana watangijwe n’umukozi w’Imana Sebagabo Christophe, tariki 17 Gicurasi 2017. Ryatangiriye mu Rwanda mbere y’uko ryaguka.

    Icyerekezo cyaryo ni ubuzima bwuzye (Imana, Abantu, Umutungo) mu kwigana Yesu Kristo nk’umwami n’umukiza wabo n’umukoresha mukuru (1 Abakorinto 11:1). Inshingano biyemeje harimo guteza imbere umwuka w’ububyutse (kwihana, kwiyiriza ubusa no gusenga);

    Kubwiriza ijambo ry’Imana no kurera urubyaro n’ingabo z’abinginzi kugira ngo baharanire kugaragara k’Ubwami bw’Imana ku isi, no guteza imbere impinduka nziza z’abantu mu bice byose by’ubuzima (Umwuka, ubukungu n’imibereho myiza).

    CWFM ifite amatorero (Parish) mu migabane ibiri Afrika n’Uburayi ndetse na E-Church (Diaspora) mu migabane yose. Ifite amatorero (Parush) 12 akorera mu Rwnda, DR Congo, Kenya na Uganda. Ifite abashumba 20 bakorera umurimo w’Imana muri ayo matorero atandukanye. Ifite abayoboke barenga 3,000 ku Isi yose.

    Mu bikorwa by’iterambere bamaze gukora harimo kubaka inyubako y’Itorero rya CWFM icyicaro gikuru Zindiro-Kimironko, byahagaze Miliyoni 300 Frw. Bubatse kandi inyubako y’itorero rya CWFM Paruwase ya Bugesera, ifite agaciro ka Miliyoni 20 Frw. Bubatse umuhanda wa kaburimbo ufite metero 200 ku mafaranga Miliyoni 17 Frw. 

    Banafashije ama Paruwase gusana inyubako bateraniramo; Bukavu, Nairobi, n’ahand. Byahagaze hejuru y’ibihumbi 50 by’amadorali ya Amerika (ararenga Miliyoni 60 Frw). Banagize ruhare mu bikorwa bitandukabye by’ubugiraneza nko gtanga mituweli ku batishoboye, no gusangira n’abatishoboye mu bihe bitandukanye.

    Apotre Christophe Sebagabo yasabwe kwita ku mukumbi w’Imana ahamagariwe kuyobora

    Apotre Christophe yimitswe na Apotre Gitwaza wa Zion Temple

    Apotre Christophe Sebagabo amaze imyaka 6 atangije Calvary Wide Fellowship Ministries

    Apotre Sebagabo Christophe hamwe na Apotre Dr. Paul Gitwaza

    Source : https://inyarwanda.com/inkuru/138155/u-rwanda-rwungutse-intumwa-yimana-sebagabo-christophe-wimitswe-na-apotre-gitwaza-amafoto-138155.html

  • Uwicyeza, Bashabe, Miss Nishimwe na Element m… – #rwanda #RwOT

    Umugore wa Mugisha Benjamin [The Ben], Uwicyeza Pamella yifurije abantu umwaka mushya muhire wa 2024 yifashishije amashusho ari kumwe n'umugabo we bafatiye muri Kigali Convention Center.

    Ni amashusho yafashwe ubwo bari bitabiriye ibirori bisoza umwaka wa 2023, Perezida Kagame yakiriyemo abantu bari mu nzego zitandukanye, maze yifuriza abantu ibyiza.

    Uwicyeza yagize ati: 'Kuva ku banjye kugera ku banyu, umwaka mushya muhire bantu b'igikundiro.' 

    Kuwa 23 Ukuboza 2023 ni bwo Uwicyeza na The Ben bemeranije kubana akaramata mu birori byatigishije imyidagaduro nyarwanda.

    Uwicyeza yazirikanye abakunzi be mu ntangiriro z’umwaka abifuriza ishya n’ihirwe

    Nk’uko byagenze mu gusoza 2022 yinjira muri 2023, n'ubungubu Miss Nishimwe Naomie yinjiye mu mwaka ari kumwe n'umukunzi we Michael Tesfay. Yasangije amashusho bari kumwe, yongeraho ati: 'Gutangirana umwaka n'urukundo rw'ubuzima bwanjye.'

    Miss Nishimwe yeretse abamukurikira ko yatangiriye umwaka mu maboko meza ari kumwe n’uwo yihebeye 

    Umuhanga mu gutunganya indirimbo usigaye yaraninjiye mu gukora ize, Element wahiriwe mu bigaragara na 2023, yakomoje ku mwaka urangiye anavuga ko utangiye ari uw'ibikorwa bidasanzwe.

    Ati: '2023 wabaye umwaka ukomeye kandi mwiza mu gihe kimwe, 2024 urakoze kunyakira ngiye kukugira umwaka mwiza wanjye, sinzatuma uhumeka. Umwaka mushya muhire. Imana niyo nkuru.'

    Element yashimye Imana ku bwa 2023 avuga ko 2024 azarushaho gukora kandi yizeye ko izabimushoboza

    Umwari wahiriwe n'imyidagaduro akanayibyaza umusaruro mu nguni zose, Kate Bashabe na we yifurije abamukurikira ibyiza anashima Imana imukomereje amabo.

    Mu magambo ye yagize ati: 'Reka njye mu rusengero mfitiye ubutumwa Imana ihoraho, ntewe ishimwe n’ibyo yankoreye byose. Mbifurije mwese umwaka mushya muhire n'imigisha myishi kuri mwese.'

    Kate Bashabe yinjiranye muri 2023 amashimwe yifuriza abantu imigisha myinshi no kuzahirwa

    Miss Cadette, umukobwa wamamaye mu marushanwa y'ubwiza akaza no kwinjira mu bushabitsi wasozanije 2023 imodoka nshya kandi ihenze, na we yifurije abantu ibyiza anagaragaza ko ntacyo ashinja Imana mu mwaka watambutse.

    Ati'Umwaka wa 2023 wambereye umwaka mwiza ndizera 2024 uzarushaho. Umwaka mushya njyewe mushya, inzozi zimwe n'intangiriro nshya umwaka mushya muhire.'

    Miss Cadette yashimye Imana ku byo yaboneye mu mwaka washyizweho akadomo avuga ko afite icyizere ko 2024 azarushaho gutera imbere

    Si aba gusa ahubwo abantu benshi bafite izina bakomeje kuzirikana ababakurikira babifuriza umwaka mushya muhire wa 2024 banagaragaza ishimwe ryo kuba babashije gusoza urangiye wa 2023.

    Source : https://inyarwanda.com/inkuru/138156/uwicyeza-bashabe-miss-nishimwe-na-element-mu-byamamare-byatangiranye-umwaka-nabafana-babo-138156.html

  • Ese u Burundi bwakongera bugafunga umupaka ubuhuza n’u Rwanda wigeze kumara imyaka 7 ufunze ? #rwanda #RwOT

    Yabitangaje mu cyumweru gishize mu kiganiro n’itangazamakuru, ko inyeshyamba zigize umutwe wa RED Tabara zifashwa n’u Rwanda.

    Gusa u Rwanda na rwo rwahise rubinyomoza, ruvuga ko ntaho ruhuriye n’abarwanyi abo ari bo bose barwanya u Burundi, ruboneraho kwibutsa ko hari ab’uyu mutwe wa RED Tabara bigeze gufatirwa ku butaka bwarwo, rukabashyikiriza iki Gihugu.

    Muri uko gushinja u Rwanda ibyo gufasha uyu mutwe, Perezida Ndayishimiye yavuze ko nubwo ibi byabaye, Igihugu cye cyari cyemeye gufungura imipaka igihuze n’u Rwanda kuko rwari rwagaragaje umuhare wo gucyemura ibibazo.

    Yagize ati 'Nyuma y’iyo mihati yose, Igihugu cy’u Rwanda cyemeye kubisubiza ibubisi. Icyo twiyemeje ni ugufata ingamba zose zishoboka kugira ngo abana b’u Burundi ntibongere kwicwa bunyamaswa n’ibyo birara.'

    Avuze ibi nyuma y’umwaka urenga iki Gihugu cyongeye gufungura imipaka igihuza n’u Rwanda, yari imaze imyaka irindwi ifunze kuko yari yafunzwe muri 2015 ubwo na bwo u Burundi bwashinjaga u Rwanda gukingira ikibaba abagerageje guhirika ubutegetsi bwa nyakwigendera Pierre Nkurunziza.

    Amagambo ya Perezida Evariste Ndayishimiye yumvikanyemo kwicuza kuba Igihugu cye cyarongeye gufungura imipaka nk’uko bamwe mu basesenguzi babivuga, ndetse bakavuga ko yaciye amarenga ko iki Gihugu cyo mu majyepfo y’u Rwanda gishobora kongera gufunga imipaka.

    Perezida Ndayishimiye kandi akomeje kugaragaza ubucuti afitanye na Felix Tshisekedi wongeye gutorerwa kuyobora Repubulika Iharanira Demokarasi ya Congo, wakunze kugaragaza kenshi ko afite umugambi wo gutera u Rwanda.

    Ndayishimiye ari mu ba mbere bagaragaje ko bishimiye intsinzi ya Tshisekedi, nubwo kugeza ubu igishidikanywaho.

    UKWEZI.RW

    Source : http://www.ukwezi.rw/Mu-mahanga/article/Ese-u-Burundi-bwakongera-bugafunga-umupaka-ubuhuza-n-u-Rwanda-wigeze-kumara-imyaka-7-ufunze

  • Perezida Ndayishimiye mu ba mbere bagaragaje ko bishimiye intsinzi ya Tshisekedi yise umuvandimwe we #rwanda #RwOT

    Ni nyuma y’uko ku mugoroba wo kuri iki Cyumweru tariki 31 Ukuboza 2023, Komisiyo y’Igihugu y’Amatora muri Repubulika Iharanira Demokarasi ya Congo, itangaje ko Tshisekedi yatsinze amatora y’Umukuru w’Igihugu.

    Iyi Komisiyo yagaragaje ko Tshisekedi yatsinze amatora ku majwi 73,34% ; mu gihe umugwa mu ntege ari Moise Katumbi wagize amajwi 18,08%, mu gihe Martin Fayulu we yagize 5,33%.

    Nyuma y’ibi byatangajwe na Komisiyo y’Igihugu y’Amatora muri DRC, Perezida Evariste Ndayishimiye, yagaragaje ko yishimiye intsinzi ya Perezida Tshisekedi.

    Mu butumwa yanyujije kuri X Ndayishimiye yagize ati 'Ndashimira mushuti wanjye akaba n’umuvandimwe, Félix Antoine Tshisekedi ku bwo kongera gutorerwa kuyobora RDCongo nyuma y’ibyavuye mu matora .'

    Perezida Ndayishimiye, ariko yavuze ko mu gihe iby’amatora byaba bikomeje kugibwaho impaka nk’uko bimaze iminsi bimeze aho bamwe mu bakandida babyamaganira kure, hakwiyambazwa inzira z’amahoro.

    Perezida Ndayishhimiye yishimiye intsinze ya Tshisekedi, nyuma y’uko yeruye ko Igisirikare cy’Igihugu cye cyagiye gutera ingabo mu bitutu icya DRC mu rugamba gihanganyemo n’umutwe wa M23.

    UKWEZI.RW

    Source : http://www.ukwezi.rw/Mu-mahanga/article/Perezida-Ndayishimiye-mu-ba-mbere-bagaragaje-ko-bishimiye-intsinzi-ya-Tshisekedi-yise-umuvandimwe-we

  • Perezida Kagame yizeje Abanyarwanda ko ntakizatokoza umutekano wabo #rwanda #RwOT

    Yabitangaje mu ijambo ryo kwifuriza Abanyarwanda umwaka mwiza wa 2024 bamaze kwinjiramo, ryatambutse kuri uyu wa 31 Ukuboza 2023.

    Umukuru w’u Rwanda yatangiye agira ati 'Njye n’umuryango wanjye twifurije Abanyarwanda bose n’inshuti z’u Rwanda umwaka mushya muhire. Umwaka w’ibyishimo n’uburumbuke.'

    Yagarutse ku iterambere ryagezweho n’Abanyarwanda muri uyu mwaka basoje, byagize uruhare mu iterambere ry’Igihugu birimo ibikorwa by’imyidagaduro ndetse n’ibya siporo.

    By’umwihariko yavuze ku nama ya Women Delivery, iserukiramuco cya Giants of Africa, irushanwa rya Basketball rya BAL ndetse n’ibitaramo bya Global Citizen.

    Yagize ati 'Kwakira ibi birori, bitanga amafaranga n’akazi mu Banyarwanda, bigateza Igihugu imbere.'

    Muri uyu mwa kandi, u Rwanda rwafunguye ibikorwa bizarufasha mu iterambere, nk’ikigo cy’ubushakashatsi cya IRCAD, ndetse n’uruganda rwa BioNTech.

    Ati 'U Rwanda rukomeje kugaragara nk’ahantu heza ho guhanga ibishya mu buvuzi n’ubuzima kandi tuzakomeza kubyubakiraho. Icy’ibanze muri ubu bufatanye ni icyizere.'

    Yagarutse ku bibazo by’umutekano biri mu karere, byakunze kugaragara nk’ibishaka kototera umutekano w’u Rwanda, by’umwihariko ibyo mu burasirazuba bwa Repubulika Iharanira Demokarasi ya Congo, byatumye iki Gihugu cyibasira u Rwanda ndetse abategetsi bacyo bakarutuka, ndetse bakavuga kenshi ko bifuza kurutera.

    Perezida Kagame yaboneyeho guhumuriza Abanyarwanda, ati 'Ndagira ngo mbabwire ko dushobora kwihanganira kunengwa no kuvugwa nabi uko byaba bingana kose nubwo akenshi biba bidafite ishingiro. Twe tuzakomeza gukora ibikenewe kugira ngo Abanyarwanda bahore batekanye uko byagenda kose.'

    UKWEZI.RW

    Source : http://www.ukwezi.rw/Mu-rwanda/article/Perezida-Kagame-yizeje-Abanyarwanda-ko-ntakizatokoza-umutekano-wabo