Author: webrwanda

Uwiringiyimana Theogene wamamaye nka Theo Bosebabireba mu muziki wo kuramya no guhimbaza Imana, afatwa nk’umuhanzi wa mbere mu Rwanda mu bafite abafana benshi cyane. Arambanye ubwamamare mu muziki wa Gospel wamuhuje n’abakomeye.

Mu myaka irenga 20 amaze mu muziki, amaze gutaramira mu bihugu birenga 10. Amaze imyaka hafi itanu azengurukana ‘East Afrika’ n’umuryango A Light to the Nations [aLn] wa Ev. Dana Morey mu biterane bikomeye ndetse ubu baritegura kujya muri Uganda muri Gicurasi.

Theo Bosebabareba ukunzwe muri iyi minsi mu ndirimbo zirimo “Kubita utababarira”, avuga ko mu bihugu byose yataramiyemo, yasanze Polisi y’u Rwanda ari ntagereranywa. Biri mu byatumye afata ikaramu yandika indirimbo yise “Gerayo Amahoro” yahimbiye Polisi y’u Rwanda (RNP) mu rwego rwo gushishikariza abaturarwanda kumvira Polisi.

Ni indirimbo yageze hanze tariki 29 Werurwe 2024, ikaba irimo ubutumwa bukomeye busaba abatwara ibinyabiziga kujya bagabanya umuvuduko “kuko aho ugiye ntabwo ugiye kuzura umuntu wapfuye”. Avuga ko kumvira bizana umugisha, naho kutumvira bikazana amakuba. Ati “Polisi y’u rwanda ubahwa, Polisi y’u Rwanda nimwubahwe”.

Mu kiganiro na InyaRwanda, Theo Bosebabireba yahishuye ko indi mpamvu yatumye akora iyi ndirimbo, ni igihe yongeye gutunga imodoka, yibonera uburyo Polisi y’u Rwanda ikora akazi kayo neza cyane. Yahise abihuza na serivisi mbi yabonye zitangwa na Polisi zo mu bihugu yagezemo, yanzura gushimira Polisi y’u Rwanda binyuze mu ndirimbo. 

Ati “Ni indirimbo nakoze ya Polisi cyangwa ishishikariza abantu kumvira Polisi y’u Rwanda no gushimira Polisi imirimo ikora nkanjye nk’umuntu. Iki gitekerezo nakigize nk’uko umuntu agira ibintu bitekerezo bisanzwe, hanyuma ariko nakigize aho nongeye gutungira imodoka, ntangiye gukoresha umuhanda ndi mu kinyabiziga buri munsi;

Ndabanza ndeba uburyo Polisi yitwara mu muhanda, ndeba ukuntu babwira abantu no kuba nsanzwe nkunda n’igihugu, Polisi y’igihugu cyanjye nsanzwe n’ubundi nayishyigikira bibaye ngombwa ko nanayifasha wenda nubwo ntaba umupolisi ariko nyine habaye ubufasha bwanjye nabikora. Noneho no kuba ngenda mu bindi bihugu nkareba uko Polisi yaho yitwara, ibihugu maze kujyamo birenga 10 nagiye ndeba.” 

Arakomeza ati “Urumva iyo ugenda, ureba itandukaniro n’iby’aho uri n’iby’iwanyu. Nakomeje rero kugenda mbona Polisi y’u Rwanda ari ntagereranywa, bituma numva ngize amarangamutima yo kuba nanjye nayishyigikra cyangwa nkashyigikira ibikorwa ikora cyane ko ikorera igihugu kandi ishaka iterambere ry’igihugu cyangwa ry’abanyagihugu”. 

Theo Bosebabireba ukubutse mu biterane by’ivugabutumwa bya ALN byabereye mu Karere ka Kirehe na Ngoma kuwa 07-10 Werurwe na 14-17 Werurwe 2024, avuga ko yasanze akwiriye gushyigikira ibyiza Polisi y’u Rwanda ikora, “nkashyiraho itafari nk’umuntu uririmba, nkumva ibyo navuze byose byageze kure, ibimvuzweho byose bikagera kure”. 

Ati “Naravuze nti reka nanjye nzafatanye na Polisi y’igihugu, nanjye mbwire abantu nti kwirukanka ku muvuduko cyane si byiza, gutwara ikinyabiziga utabifitiye uruhushya si byiza, gutwara ikinyabiziga wanyoye ibisindisha si byiza, n’ibindi bintu Polisi ibuza si biza”. 

Uyu muhanzi yanavuze ko abantu baramutse bubahirije ibyo basabwa byose na Polisi, baba ari abakristo. Ati “Ubundi muri rusange ni uko wenda nimbivuga abantu bari bubyumve ukundi, ubundi ibintu Polisi ibuza byose, abantu babiretse baba ari abakristo. Ibyo Polisi ibuza, ni byo n’Imana ibuza, ni byo n’ubukristo bubuza”.

Ni ayahe magambo ari mu ndirimbo “Gerayo Amahoro” ya Theo Bosebabireba?

InyaRwanda iragufasha kumenya amagambo akubiye muri iyi ndirimbo nshya “Gerayo Amahoro” yakorewe Polisi y’u Rwanda, ikaririmbwa n’umuhanzi usanzwe aririmba Gospel. Theo Bosebabireba akiyishyira hanze, abakunzi be bamushimiye cyane bamwe banamusaba kuzakora indirimbo y’Ingabo z’u Rwanda (RDF) kuko nabo bamukunda. 

Theo Bosebabireba aterura agira ati “Gerayo amahoro, gera aho ugiye amahoro. Polisi y’u Rwanda ikwifurije kugerayo amahoro. Gabanya umuvuduko kuko aho ugiye ntabwo ugiye kuzura umuntu wapfuye, gerayo amahoro. Gerayo amahoro niyo ntego ya Polis y’u Rwanda. 

Kumvira bizana umugisha tubimenye. Naho kutumvira bikazana amakuba. Polisi y’u Rwanda ubahwa, Polisi y’u Rwanda nimwubahwe. Ntitwakubaka igihugu ngo tukigeze aho kigeze abo tucyubakira barimo bahitanwa n’impanuka kandi kwirinda impanuka nabyo bishoboka. 

Gutwara ibinyabiziga wanyoye ibisindisha kirazira, gutwara ikinyabiziga uvugira kuri telefone kirazira, gutwara ikinyabiziga udafite uruhushya rwo kugitwara nabyo birazira. Zirikana ubuzima bwawe n’ubwa bagenzi bawe. 

Gukunda igihugu ni ukwikunda ugakunda n’abagituye. Umutekano ni uwacu ubwacu, ibyo gucungana n’abaducunga tubyirinde. Nimukomeze ‘Discipline’ mwatojwe n’urwababyaye, maze uruhagararire iyo mu mahanga, muruheshe ishema, imidali muyizane hano mu rwatubyaye. 

Mutabara aho rukomeye, turabizirikana, muzimya inkongi y’umuriro, turabizirikana n’izindi nshingano nyinshi mukora nazo turazizirikana”.

Theo Bosebabireba yanyujije ishimwe rye kuri Polisi y’u Rwanda mu ndirimbo yise ‘Gerayo Amahoro’

Nyuma y’iminsi micye ishize Theo Bosebabireba abwiye inyaRwanda ko agiye gushyira hanze indirimbo itari iya Gospel ariko kandi itari na Secular, kuri ubu yasohoye “Gerayo Amahoro”

UMVA INDIRIMBO NSHYA YA THEO BOSEBABIREBA YISE “GERAYO AMAHORO”

Kuri uyu wa Gatanu Tariki 29 Werurwe 2024 ni bwo habaye ikiganiro n’itangazamakru gitegura igitaramo ‘Baba Xperience’ cya Platini P giteganyijwe kuri uyu wa Gatandatu Tariki 30 Werurwe 2024 muri Camp Kigali.

Muri iki kiganiro higanje ibibazo bigaruka ku mpamvu Platini P yafashe ahantu hato ho gukorera iki gitaramo aho ashinjwa na bamwe ko yafashe ahantu hato kandi afite abafana benshi ndetse ko yazanye abahanzi bakomeye akajya Camp Kigali kandi yakabaye ajya muri BK Arena.

Muyoboke Alex wabaye umujyanama w’itsinda Urban Boyz, Dream Boys n’abandi, yavuze ko ari mu ikipe irimo gutegura iki gitaramo ndetse yifuza gusubiza iki kibazo.

Ku ikubitiro Platini P yabajijwe niba yaregereye Minisiteri y’Urubyiruko n’Iterambere ry’Ubahanzi, avuga ko atigeze abegera abasaba ubufasha ahubwo yabatumiye ndetse ategereje ko bazaza.

Muyoboke Alex wabaye umujyanama w’abahanzi b’ibyamamare mu Rwanda, yavuze ko abahanzi bakwiriye koroherezwa kuko bigoye ko bahabwa amaboko igihe bakeneye ibikorwa remezo.

Yagize ati “Abahanzi bakwiriye guhabwa amaboko, iriya BK Arena ni iya BK, n’ubwo bavuga ko ari iy’abahanzi ariko ntabwo ari ko bimeze. N’ubwo hari icyo babafasha ariko bagomba guhabwa ubufasha, bakoroherezwa guhabwa serivisi. Kuko biracyagoye rwose kuko babaca amafaranga menshi batabasha kugaruza”.

Muyoboke Alex avuga ko n’ubwo abahanzi babwirwa ko ibikorwa remezo ari ibyabo, ntabwo bijya bikunda ko boroherezwa

Muyoboke Alex yatakambiye Leta kugira ngo yorohereze abahanzi

Eddy Kenzo nawe yari yitabiriye ikiganiro n’itangazamakuru cya Baba Xperience

Umutoza wa APR BBC, Maz Trakh avuga ko kuba muri shampiyona birimo kubagora ntaho bihuriye na BAL kuko yo bayiteguye neza ari yo bashyizeho umutima.

Ibi uyu mutoza babitangaje nyuma y’umukino baraye batsinzemo REG BBC bigoranye amanota 78-75.

APR BBC nk’ikipe izahagararira u Rwanda muri Basketball Africa League (BAL) benshi bavugaga ko uko izitwara imbere y’amakipe nka Patriots BBC na REG BBC ari byo bizatanga ishusho y’uburyo izatwara muri iri rushanwa.

Nyuma yo gutsindwa inarushwa na Patriots BBC, igitutu cyarazamutse cyane.

Maz abajijwe uko ikipe imeze n’uko biteguye iri rushanwa, yabwiye ISIMBI ko ikipe ye iri mu bihe bigoye kubera shampiyona y’u Rwanda na BAL yabaye indirimbo.

Ati “Ndakeka ikipe yacu iri mu bihe bigoye kubera Shampiyona y’u Rwanda na BAL, buri wese aba avuga BAL, BAL, BAL. Ntabwo dushyize umutima cyane kuri shampiyona, turareba cyane BAL.”

Yakomeje avuga ko kuba muri shampiyona batameze neza cyane nta kibazo kirimo kuko bitwaye neza mu mikino ya gicuti.

Ati “Ntabwo tumeze neza muri shampiyona y’u Rwanda ni mu gihe twakinnye neza mu mikino ya gicuti, navuga ko tudashyize cyane umutima kuri shampiyona y’u Rwanda, Patriots na REG ni amakipe meza cyane, yombi twakinnye na yo turi abanyamahirwe kuba dutsinze uyu mukino.”

Yasabye abafana b’iyi kipe y’Ingabo z’Igihugu gutuza kuko mu byumweru 6 bazahinyuza buri umwe ushidikanya kuri APR BBC.

Ati “Abafana nababwira ko tumeze neza, muri ibi byumweru 6 tugomba kwereka buri umwe uburyo tumezemo neza.”

Maz Trakh yakomeje avuga ko kuba baratakaje umukinnyi nka Dixon bagiye kwitoza ibindi bakazabireba nyuma, gusa yavuze ko mu kwezi gutaha kwa Kane hari undi mukinnyi bazakira uzabafasha muri BAL.

Mu rwego rwo gukomeza kwitegura imikino yo mu gace ka Sahara kazakinira muri Sénégal kuva tariki ya 4 kugeza 12 Gicurasi 2024 bashaka itike ya ¼ cya BAL izabera mu Rwanda muri Kigali Arena, yemeje ko bagiye gukina imikino ya gicuti myinshi.

APR iri mu itsinda rimwe na AS Dounes yo muri Sénégal, US Monastir yo muri Tunisia na Rivers Hoopers yo muri Nigeria, kugira ngo izakine 1/2 birasaba ko izasoza mu makipe 2 ya mbere.

Marriot Hotel na Four Points By Sheraton ni ikipe yari yabukereye ishaka gutsinda RBA FC, ni ikipe kandi yatozwaga na Rutanga Eric uzwi nka myugariro wa Police FC.

Uyu ni umukino witabiriwe n’abafana benshi, batari barajwe ishinga no kureba umukino, ahubwo bashakaga kureba abanyamakuru bakunda bakorera ikigo cy’igihugu cy’itangazamakuru, RBA.

Umukino watangiye Kigali Marriott Hotel na Four Points By Sheraton ariyo iri kwiharira umukino, ariko ibyo yabyigize mu minota 10 ya mbere, kuko nyuma yayo Jean Claude Kwizigira n’abasore be bahise bahindura umukino barawiharira.

Abari bitabiriye uyu mukino wabereye ku Munena, bagumye kuryoherwa n’amagenga y’abanyamakuru nka Mugaragu David, Munyabarenzi, ndetse n’abandi.

RBA FC yagumye gukina neza nuko iza kubona amahirwe y’umutwe wa Raul Lionel Ntirushwa, gusa amahirwe aba make umupira ugonga umutambiko w’izamu.

RBA yagumye kwataka bikomeye cyane. Ubwo Gilles yari mu rubuga rw’amahina, yaje gukorerwa amakosa na myugariro wa Kigli Marriott Hotel na Four Points By Sheraton nuko umusifuzi atanga penaliti. Penaliti ya RBA yatewe neza na Mugaragu Kubiteka David, nuko abobera RBA igitego cya mbere, igitego cyabonetse ku munota wa 33.

Igice cya mbere cyarangiye RBA ifite igitego kimwe ku busa bwa Marriott Hotel na Four Points by Sheraton, igitego cya Mugaragu David.

Mu gice cya kabiri, RBA yagumye kwiharira umupira nuko iza kubona kufura yatsinzwe neza  na Yves ku munota wa 61.

Abakinnyi ba RBA bagumye kuzamura urwego uko umukino wagendaga ukura. Abanyamakuru nka Hubert Ndacyayisaba batangiye umukino urwego rw’imikinire ruri hasi, ariko yavuye mu kibuga ari rwego rwo hejuru.

RBA yaje kubona igitego cya gatatu cyatsinzwe na Munyabarenzi ku munota wa 79. RBA ikimara kubona igitego cya gatatu yatangiye gukina umupira ituje ari na ko iguma gushimisha abakunzi bayo bari bari ku Mumena.

Umukino warangiye RBA ya Jean Claude Kwizigira itsinze ibitego bitatu ku busa bwa Marriott hotel na Four Points by Sheraton yatozwaga na Rutanga Eric myugariro wa Police.

Nubwo abari ku kibuga bishimiye intsinzi ya RBA, bagumye kwijujuta kubera ko batabonye bamwe mu banyamakuru bihebeye nka Reagan Rugaju, Rugangura Axel, Ruvuyanga n’abandi. 

Four Points By Sheraton yifatanyije na Marriott hotel, zatsinzwe na RBA FC ibitego bitatu ku busa 

Abakinnyi babanje mu kibuga ku ruhande rwa RBA FC 

Abakinnyi babanje mu kibuga ku ruhande rwa Marriott hotel na Four Points By Sheraton 

Abafana bari bose ku Mumena, baje kureba uko abanyamakuru bogeza umupira bawukina

Kwizigira Jean Claude umutoza wa RBA FC 

Raul Lionel Ntirushwa ubwo yageragezaga gucika ba myugariro ba Marriott Hotel na Four Points By Sheraton 

Abafana ba Marriott hotel na Four Points By Sheraton 

Hubert Ndacyayisaba ku mupira, ari gucenga abakinnyi ba Marriott hotel na Four Points By Sheraton 

David Mugaragu ku mupira ari gucenga abakinnyi ba Marriott hotel na Four Points By Sheraton 

Ku Mumena abafana bari bakubise buzuye 

AMAFOTO: Rwanda Magazine

Amakipe ya APR mu bagabo n’abagore mu mukino wa Basketball, mu mikino itari yoroshye yatsinze aya REG.

Yari imikino ya shampiyona y’icyiciro cya mbere muri Basketball yari yakomeje kuri ku wa Gatanu, aho mu bagore APR WBBC yatsinze REG WBBC amanota 77-75 ni mu gihe mu bagabo APR BBC yatsinze REG BBC 78-75.

REG BBC ni yo yinjiye mu mukino neza aho ibifashijwemo n’abakinnyi nka Shyaka Olivier begukanye agace ka mbere ku manota 24-17.

Abasore ba APR BBC bagarutse mu gice cya kabiri bashaka gutsinda ndetse biranabahira aho babifashijwemo n’abarimo Nshobozwabyosenumukiza bagatsinze 27 -12. Bajya kuruhuka APR BBC iri imbere n’amanota 44-36.

APR BBC yahuye n’uruva gusenya aho REG BBC yayicanyeho umuriro maze ibifashijwemo n’abarimo nka Pitchou Manga, Antino Alvarezes wabonaga ari mu mukino neza, bayitsinze amanota 19 itaratsinda inota na rimwe. APR BBC yabonye inota rya mbere ubwo hari hasigaye iminota 3 n’amasegonda 28 ngo aka gace karangire. Ni inota ryatsinzwe na Zion Style kuri ‘Free throw’. Aka gace REG BBC yakegukanye ku manota 25-11.

APR yaje mu gace ka nyuma ikina ari ugupfa no gukira, Nshobozwa na Adonis mu minota ya 3 ya gace ka nyuma bari bamaze kugabanya ikinyuranyo hasigayemo amanota 3 muri 6 barushwaga.

Gusa Pitchou wa REG yahise atsinda amanota 2 na Antino Alvarezes atsidna 3 hahita hajyamo amanota 8 y’ikinyurabyo.

Styles na Adonis batsinze amanota 2 buri umwe, Nshobozwa atsinda 3 bifasha APR gusatira REG aho ku minota ibiri ya nyuma hari hasigayemo inota 1.

Amanota abiri ya Zion Styles yatsinze kuri “free throw” habura amasegonda 18, yafashije APR kuyobora irusha REG inota rimwe (byari 76-75).

Uyu musore wigaragaje cyane mu gace ka nyuma, habura amasegonda abiri, ku makosa y’abakinnyi ba REG BBC, Zion Styles yakiriye umupira mwiza yahawe na Ntore Habimana maze atsinda andi manota 2 kuri “dunk”. Byari bivuze ko ishyizemo amanota 3 y’ikinyuranyo. Aka gace APR BBC yagatsinze ku manota 23-14. Umukino warangiye APR BBC iwegukanye ku manota 78-75.

Antino Alvarezes wa REG ni we watsinze amanota menshi 22, yakurikiwe na Kambuyi Manga Pitchou bakinana watsinze 20 ni mu gihe Nshobozwabyosenumukiza Jean Jacques Wilson wa APR yatsinze 19.

Uyu mukino wari wabanjirijwe n’uwo APR WBBC yatsinzemo REG WBBC amanota 77-75. Uyu mukino bakaba bitabaje iminota 5 y’inyongera kuko 40 isanzwe yarangiye amakipe yombi anganya 64-64.

Abahanzi bakomeye mu bihangano byo kuramya no guhimbaza Imana bahurijwe mu gitaramo cyateguwe n'Umuryango wa Bibiliya mu Rwanda, BSR.

Iki gitaramo kizaba kuri Pasika umunsi isi yose iba yizihiza izuka rya Yesu Kristo. Kizaba tariki 31 Werurwe 2024 muri BK Arena.

Minisitiri w'Urubyiruko n'Iterambere ry'Ubuhanzi, Utumatwishima Abdallah, yabanje gusobanura ko ‘Ewangela’ bisobanura ‘Ubutumwa bwiza’, asaba abantu kutacikanwa n’iki gitaramo.

Yagize ati: 'Rubyiruko mwikwirengagiza se, dore aho muzizihiriza Pasika.' Yavugaga muri iki gitaramo cya Pasika gitegerejwe na benshi bakunda kuramya no guhimbaza Imana.

Yongeraho ati: 'Ni umwanya mwiza wo kwiyeza, gushimira Imana no gutegura imitima tukinjira mu cyumweru cyo Kwibuka ku nshuro ya 30 Jenoside yakorewe Abatutsi, tumeze neza.'

Igitaramo cya ‘Ewangelia Easter Ewangelia Celebration Concert’ kizaba kuwa 31 Werurwe 2024, kizaririmbamo amatsinka nka Christus Regnat, Shalom choir, Jehovah Jireh na Alarm Ministries.

Hazaririmba kandi abaramyi bakunzwe bitangaje mu Rwanda ari bo James na Daniella na Israel Mbonyi, bakaba nabo batangaza ko biteguriye gutaramira abazitabira iki gitaramo.

Iki gitaramo kizabera muri BK Arena aho kwinjira ari 5,000Frw, 10,000Frw, 15,000Frw, 20,000Frw na tabule ya 200,000Frw.

Ushaka kugura tike wayisanga ku nsengero zitandukanye ariko no mu buryo bw'ikoranabuhanga wakwifashisha urubuga www.ticqet.rw 

Amasaha arabarirwa ku ntoki ngo abakunzi b’ibihangano by’umwuka bahurira mu gitaramo cy’amateka muri BK ArenaAmatike arik ugurishwa mu buryo bw’ikoranabuhanga ndetse hari n’insengero zitandukanye wayasangaho

Minisitiri Dr Utumatwishima yasabye abantu kuzitabira igitaramo cya Ewangelia avuga ko ari ahantu hakwiye ho kwizihiriza Pasika

Kimwe no mu yandi mezi yatambutse, abahanzi nyarwanda bakomeje gushimangira ko 2024 nta kujenjeka ndetse ko biyemeje guha abanyarwanda umuziki mwiza kandi ku gihe.

Mu gihe kwa gatatu k'umwaka kubura amasaha macye ngo gushyirweho akadomo, InyaRwanda yaguteguriye indirimbo 10 z'intoranwa zagufasha gukomeza kuryoherwa n'impera z'ukwezi, ari nako winjirana akanyamuneza mu mpera muri weekend kandi wizihiza neza Umunsi wa Pasika.

1.     AbaTwin — Chiboo

“>

Abakurikirana Junior Giti kuva mu mwaka ushize wa 2023, bakunze kumubonana n’umusore witwa Freddy Chiboo usanzwe ari umuhanzi. Akenshi aho ubonye ikipe ya Giti Business Group, Junior Giti na Chriss Eazy, uhabona n’uyu musore witwa Freddy Chiboo. Hari amakuru ko baba bamaze igihe bagerageza gukorana.

Imihanzi Chiboo amaze iminsi ibiri gusa ashyize hanze indirimbo ye nshya ikomeje gukundwa cyane ku mbuga nkoranyambaga yise 'AbaTwin' nyuma y'igihe ayamamaza.

2.     Ingabe — Impakanizi

“>

Umuhanzi Iradukunda Yves [Impakanizi] usanzwe ubarizwa mu Itorero Ibihame, yashyize hanze indirimbo yise 'Ingabe,' nyuma yo gutaramira imbere y'abarimo Perezida Paul Kagame na Madamu Jeanette Kagame cy'Itorero Inyamibwa bise 'Inkuru ya 30' cyabaye ku wa Gatandatu tariki 23 Werurwe 2024 mu nyubako y'imyidagaduro ya BK Arena.

3.     Exit — AY ft Hollix, Taz & PoppA

“>

Umuraperi AY yahurije hamwe abandi baraperi bagenzi be bakomeje kuzamuka neza mu njyana ya Hip Hop mu Rwanda barimo Hollix, Taz na PoppA mu ndirimbo nshya bise 'Exit.'

4.     Nonese Mpeze? – Yee Fanta

“>

Yee Fanta ni umwe mu ba-producer bakiri bato ariko bamaze gukora ku mishinga ikomeye hano mu Rwanda. Uyu musore w'imyaka 21 y'amavuko, amaze iminsi atangiye gukora n'indirimbo ze ku giti cye. Kuri ubu, yamaze gushyira hanze iyo yise 'Nonese Mpeze?' ikubiyemo ibimaze iminsi bivugwa mu myidagaduro ku mihanda, harimo n'amakimbirane avugwa hagati ya The Ben na Bruce Melodie.

5.     Step in Like – Angell Mutoni

“>

Umuhanzikazi Angell Mutoni ukunze kuririmba indirimbo ziganjemo iziri mu rurimi rw'Icyongereza avanga n'Ikinyarwanda, mu mwaka ushize  yashyize hanze Extended Play [EP] yise 'For Now' yakoranye na Dr Nganji wo muri Green Ferry Music, iri mu nzu zitunganya imiziki zafashije benshi barimo Bushali, B-Threy n'abandi batandukanye bamaze kubaka amazina. Kuri ubu yashyize hanze indi iri mu rurimi rw'Icyongereza yise 'Step in Like.'

Angell Mutoni uri mu batanga icyizere asanzwe ari umuraperi akaba n'umuririmbyi wandika indirimbo. Aririmba Afro-Hiphop, RnB na Pop.

Uyu mukobwa afite mixtape eshatu ndetse na EP ebyiri. Ari mu bahanzi 10 bitabiriye RFI Prix Découvertes, mu 2016. Yagiye kandi agaragara mu maserukiramuco atandukanye muri Afurika y'Iburasirazuba birimo Blankets & Wine, Kigali Up, Amani Festival, Bayimba n'ayandi.

6.     Twaramugabiwe — Ben & Chance

“>

Imwe muri couple zikunzwe cyane muri Gospel haba mu Rwanda no mu mahanga ya Ben & Chance, yamaze gushyira hanze indirimbo yabo bise 'Twaramugabiwe.'

7.     Ni irihe Shyanga — True Promises Ministries

“>

Itsinda ry'abaririmbyi b'indirimbo zo kuramya no guhimbaza Imana, True Promises Ministries ryatangiye urugendo rwo gukora zimwe mu ndirimbo zizaba ziri kuri Album yabo ya mbere biri mu mpamvu bateguye igikorwa cyo kuzifatira amashusho kizaba tariki 15 Nyakanga 2024. Kuri ubu, bamaze gushyira hanze indirimbo bise 'Ni irihe Shyanga.'

8.     Naona Pendo Kubwa — Papi Clever & Dorcas

“>

Couple ya Papi Clever & Dorcas imaze gukundwa m'abatari bacye kubera gusubiramo indirimbo zo mu gitabo cy'indirimbo, bamaze iminsi bakora n'indirimbo ziri mu rurimi rw'Igiswahili, aho ubu bashyize hanze iyitwa 'Naona Pendo Kubwa.'

9.     Yesu Niwe Mwungeri Mwiza — Siloam Choir

“>

Imwe muri korali zo mu Itorero rya ADEPR mu Rwanda ikunzwe cyane mu ndirimbo bise 'Warandondoye,' ubu noneho yamaze gushyira hanze indirimbo nshya yise 'Warandondoye.'

10. Ta Bonte – Laetitia Mulumba

“>

Laetitia Mulumba wamenyekanye mu ndirimbo zirimo “Kwizera”, akaba umugore wa Producer Gates Mulumba [Bill Gates] umwe mu bashyize itafari ku muziki wa Gospel mu Rwanda, yasohoye indirimbo nshya iri mu rurimi rw’Igifaransa cy’Abafaransa, atangaza ko ari gahunda azakomeza bijyanye n’uko Imana izamushoboza.

Umuramyi Laetitia Mulumba utuye mu Bufaransa yatangiye urugendo rwo kuririmba mu Gifaransa ahereye ku ndirimbo yise “Ta bonté” yavomye mu Amaganya ya Yeremiya.

11. Insinzi ya Yesu – Boaz Choir Samuduha

“>

Korali Boaz ikorera umurimo w’Imana muri ADEPR Samuduha muri Paruwasi ya Kicukiro, nyuma y'uko ishyize hanze indirimbo zirimo “Uri Uwera,” “Mutima wanjye,” basoje ukwezi kwa Werurwe bashimangira 'Insinzi ya Yesu,' mu ndirimbo bashyize hanze mbere y'uko Pasika yizihizwa.

12.  Ninjye Ubivuze — Eleda Sanze

“>

Umuhanzi Sanze Eleda ubarizwa mu Itorero ry'Abadivantisiti rya Gisozi,yashyize hanze amashusho y'indirimbo yise 'Ninjye Ubivuze,' ashimangira ko Imana itajya ibeshya isohoza ibyo yakoze ku bayiringiye.

13.  Ntuma — Mado Okoka Esther

“>

Hakomeje kuboneka impano nshya mu muziki wo kuramya no guhimbaza Imana. Mado Okoka Esther ni umwe mu banyempano binjiye mu muziki wa Gospel mu 2023. Mado Okoka Esther, atuye ku mugabane w'uburayi mu gihugu cya Danmark, akaba asengera muri Zion Temple. Uyu muhanzikazi amaze umunsi umwe ashyize hanze indirimbo nshya yise 'Ntuma.'

14.  Shimwa — Gisa Claudine

“>

Gisa Claudine uri mu bahanzi bakizamuka mu ndirimbo ziramya zigahimbaza Imana, batanga icyizere cy’ejo heza, yashimye Imana mu ijwi ryeruye mu ndirimbo nshya yise “Shimwa”.

15.  Burya — Elisa & Chantina

“>

Umuhanzi w'indirimbo zo kuramya no guhimbaza Imana Muhayimana Elisa Claude [Elsa Cluz] wamamaye muri Korali Yesu Araje, yinjije umugore we Chantina muri uyu muziki, bakorana indirimbo 'Burya' igaragaramo n'umwana wabo.

Ni umukino wabaye kuri uyu wa Gatanu saa cyenda ubera kuri sitade mpuzamahanga ya Huye.

Abakinnyi 11 b’Amagaju FC babanje mu kibuga:

Ndikuriyo Patient

Bizimana Ipthi-Hadji

Dusabe Jean Claude 

Abdel Matumona Watonda 

Tuyishime Emmanuel

Masudi Narcisse

Nkurunziza Seth

Rukundo Abdul Rahman

Ndayishimiye Edouard

Irumva Justin

Malanda Destin Exauce

Abagabo bihinduje 

Abakinnyi 11 ba Marine FC FC babanje mu kibuga:

Tuyizere Jean Luc 

Ishimwe Jean Rene

Mutangana Derrick

Ilunga Ngoyi Alvine

Sibomana Sultan Bobo

Gikamba Ismael

Usabimana Olivier

Byiringiro Gilbert

Raul Vyamungu

Nkundimana

Nzau Mbuangi Ginola

Uyu mukino watangiye utinzeho iminota 5 bitewe n'inshundura zari zagize ikibazo. Ukimara gutangira, Amagaju FC yabonye kufura yari iteretse ahantu heza ku ikosa Byiringiro Gilbert yarakoreye Irumva Justin, yatewe neza na Rukundo Abdourahman iragenda ijya mu nshundura umunyezamu wa Marine FC Tuyizere Jean Luc ntiyamenya uko byagenze igitego kiba kirabonetse.

Nyuma yuko Marine FC itsinzwe ku munota wa mbere yahise itangira gushaka uko yakwishyura igerageza kurema uburyo imbere y'izamu gusa umukinnyi wayo unyura ku ruhande rw'ibumoso,Olivier Usabimana akabupfusha ubusa.

Ku munota wa 32  myugariro wa Marine FC, Ilunga Ngoyi Alvine yagoganye na Malanda Destin w'Amagaju FC yikubita hasi arababara cyane bituma ahita asimbuzwa Hirwa Jean De Dieu.

Binyuze ku bakinnyi barimo Kapiteni wayo Masudi Narcisse Amagaju FC yakomeje gukina neza binashoboka ko yabona igitego cya 2, ku munota wa 33 Amagaju FC yongeye kubona  kufura nziza ku ikosa ryari rikorewe Rukundo Abdourman aba ari nawe wongera kuyitera ariko rutahizamu Vyamungu arataba akura umupira mu izamu akoreshe umutwe.

Igice cya mbere cyarangiye Amagaju FC ikiyoboye n'igitego 1-0. Mu gice cya kabiri Marine FC yaje ikora impinduka mu kibuga, Nzau Mbwangi ava mu kibuga hajyamo Amadou Kada Moussa inatsa umuriro imbere y'izamu abakinnyi nka Vyamungu barekura amashoti ariko ntaboneze mu izamu.

Ku munota 60 Amagaju FC nayo yakije umuriro imbere y'izamu Irumva Justin na Rukundo Abdourahman barekura amashoti aremereye gusa ntiyajya mu izamu neza.

Umutoza w'Amagaju FC, Niyongabo Amaris yaje gukora impinduka mu kibuga ku munota wa 70 havamo Irumva Justin na Ndayishimiye Eduard hajyamo Niyitegeka Omar na Iradukunda Daniel. Umukino ugiye kurangira Marine FC yabonye kufura izamurwa na Gikamba Ismail maze Vyamungu ashyiraho umutwe ariko umunyezamu w'Amagaju FC ahita awufata.

Umukino warangiye Amagaju FC atsinze igitego 1-0 bituma ihita ijya ku mwanya wa 6 n’amanota 35 mu gihe Marine FC yo iri kumwanya wa 11 n’amanota 28.

Imikino ya shampiyona yo  ku munsi wa 25 irakomeza gukinwa mu mpera z’iki Cyumweru, ku munsi w’ejo kuwa Gatandatu Mukura VS ikina na Rayon Sports, Gorilla FC na Police FC, Kiyovu Sports na Musanze FC mu gihe mu Cyumweru APR FC izakina na Muhazi United, Sunrise FC na AS Kigali ndetse na Bugesera FC na Etincelles FC.

Nyura hano urebe igitego cyiza Amagaju FC yatsinze

 

Abakinnyi 11 b’Amagaju FC babanje mu kibuga 

Abakinnyi 11 ba Marine FC babanje mu kibuga 

Ibi, Daphne Joy yabitangaje nyuma y'amakuru avuga ko 50 Cent yashakaga kurera umuhungu wabo wenyine nyuma y'uko ajyanwe mu rukiko na Sean Diddy Combs.

Mu butumwa burebure yashyize kuri Instagram, Joy yamaganye 50 Cent avuga ko amufata nk'umubyeyi utakiriho ku muhungu wabo Sire, amushinja kumusambanya ku gahato no kumukubita mu mugihe gihe cyose bamaranye.

Yagize ati: 'Twimukiye i New York kugira ngo tuguhe amahirwe yo kuba se w’umuhungu wawe kandi wamubonye inshuro 10 mu myaka 2 twamaze tuba kure yawe ho ikirometero 1. Ndambiwe gushyigikira no kurinda isura y'umuhungu wacu utigeze wifuza kurinda.”

Akomoza ku by'ihohoterwa yamukoreraga yagize ati: 'Reka dushyire ahabona ibikorwa byawe bibi byo kumfata kungufu no kumpohotera ku mubiri. Ntukintegeka kandi Imana yanjye izamporera kuri iyi ngingo. 

Wamaze kwangiza burundu icyizere nari ngufitiye nk'umukuru w'umuryango wacu wagombaga kundinda amagambo y'ibinyoma yamvugwagaho. Wangije imitima yacu mu bihe bya nyuma.'

Hagati aho, 50 Cent yamaganye ibirego bya Joy mu butumwa bwihuse bwashyizwe ahagaragara n'umuvugizi we. Yavuze ko ibirego bya Joy byose byatewe n’icyemezo cye cyo gushaka kurera umuhungu wabo w’imyaka 12 wenyine.

Iri tangazo riragira riti: 'Ibirego bya Daphne Joy bidafite ishingiro aherutse kuncinja biragaragara ko ashaka ko nemera icyemezo cye cyo gushaka kurera umuhungu wanjye wenyine. Umwana wanjye Sire, ni cyo kintu k'ingenzi kuri njye kiza ku mwanya wa mbere kandi kumugumisha hantu yumva atekanye nicyo nibandaho muri iki gihe.”

50 Cent yasobanuye ko gufata icyemezo cyo kurera umuhungu wabo wenyine ari ugushaka kumurinda, atanga atanga impamvu y'uko uwo babyaranye uyu mwana ari mu bijyanye n'ikirego cya Lil Rod yarezemo Diddy.

Daphne Joy akomeje gushinja umuraperi 50 Cent babyaranye umwana w’umuhungu

Joy nawe ari gushinjwa kuba inshoreke ya Diddy

Bombi bakomeje kwitana ba mwana ku gushaka kwikubira umwana wabo