Author: webrwanda

Guhera kuwa Kabiri w’iki Cyumweru kugeza kuwa Gatanu hakinwaga imikino ya shampiyona y’icyiciro cya mbere mu Rwanda yo ku munsi wa 26, gusa imwe mu mikino yari itegerejwe na benshi ni iy’amakipe ari kurwana no kutamanuka mu cyiciro cya 2 dore ko iby’igikombe byo byarangiye kikaba cyaramaze kubona nyiracyo.

Kuwa Kane Saa cyenda Rayon Sports yari yakiriye Etincelles FC yo mu karere ka Rubavu nayo irwana no kutamanuka, ni umukino wabereye kuri Kigali Pelé Stadium. 

Mbere y’uyu mukino umutoza wa Etincelles FC, Bizimuremyi Radjab yari yavuze ko Rayon Sports nta cyo iharanira bityo ko bagiye kuyitegura bikomeye kugira ngo bazayitsinde.

Aya magambo yaje guhinduka impamo maze Etincelles FC ifata Murera iyiterekamo ibitego 3-1 abantu baratungurwa.

Ibi byahise bituma iyi kipe yo mu karere ka Rubavu igira amanota 29 iva ku manota 26 ndetse ihita iva ku mwanya wa 14, ijya kuwa 12.

Mbere yuko uyu mukino uba amakipe yarwanaga no kutamanuka yari 5 ariko nyuma yawo yahise aba 7. 

Benshi bari biteze ko Etincelles FC itsindwa ikagumana amanota 26 igakomeza kurwana na Sunrise FC, Bugesera FC ndetse na Etoile de l’Est.

Ariko ibintu byahise bihinduka hiyongeramo na Gasogi United, Marine FC ndetse na Gorilla FC yari yatsinze Etoile de l’Est kuwa Kabiri igasa nk’aho ivuye muri iki cyiciro.

Ubwo bivuze ko muri aya makipe buri yose yakora amakosa mu mikino 4 isigaye ishobora kumanuka mu cyiciro cya kabiri.

Ni nde wigiza nkana muri aya makipe?

Nyuma yuko Etincelles FC itsinze Rayon Sports, birasa nk’aho mu mikino 4 isigaye kuri aya makipe arwana no kutamanuka, ikipe isigaje gukina n’amakipe adafite icyo arwanira ariyo ifite amahirwe yo kuguma mu cyiciro cya mbere kurusha andi.

Gasogi United

Iyi kipe kuri ubu iri ku mwanya wa 10 n’amanota 29 ikaba irimo umwenda w’ibitego 6, gusa nubwo iri kuri uyu mwanya irebye nabi yakwisanga yamanutse bitewe n’imikino isigahe gukina aho ifite imikino 2 izahuramo n’amakipe nayo arwana no kutamanuka.

Isigaje kwakira Sunrise FC, APR FC, gusura Mukura VS mu karere ka Huye ndetse no kwakira Etincelles FC kuri Kigali Pelé Stadium.

Gorilla FC

Iyi kipe kuri ubu iri ku mwanya wa 11 n’amanota 29 n’umwenda w’ibitego 6, gusa yo ntabwo ifite imikino 2 cyane kubera ko usibye 1 naho indi izaba ikina n’amakipe adafite kinini arwanira cyane.

Isigaje kwakira Musanze FC, gusura Sunrise FC kuri Gorogota Stadium, gusura APR FC kuri Kigali Pelé Stadium ndetse no kwakira Mukura VS kuri Kigali Pelé Stadium.

Etincelles FC

Iyi kipe yo mu karere ka Rubavu kuri ubu iri ku mwanya wa 12 n’amanota 29 ikaba ifite umwenda w’ibitego 7, gusa nayo ntabwo isigaje imikino ikomeye bitewe nuko izakina n’amakipe adafite kinini aharanira.

Isigaje kwakira Muhazi United, kwakirwa na AS Kigali, kwakira Kiyovu Sports kuri sitade Umuganda ndetse no kwakirwa na Gasogi United kuri Kigali Pelé Stadium.

Marine FC

Iyi kipe nayo yo mu karere ka Rubavu iri ku mwanya wa 13 n’amanota 29 n’umwenda w’ibitego 9 gusa isigaje gukina imikino ikomeye kubera ko ifitemo imikino 2 y’amakipe arwana no kutamanuka.

Isigaje kwakira Police FC,gusura Etoile de l’Est, kwakira Musanze FC ndetse no gusura Sunrise FC.

Sunrise FC

Iyi kipe ibarizwa mu karere ka Nyagatare iri ku mwanya wa 14 n’amanota 26 ikaba ifite umwenda w’ibitego 14, gusa nayo isigaje imikino ikomeye kubera ko izakinamo n’amakipe 3 nayo arwana no kutamanuka.

Sunrise FC izasura Gasogi United, yakire Gorilla FC, isure Amagaju FC ndetse inakire Marine FC.

Bugesera FC

Iyi kipe yo mu karere ka Bugesera iri ku mwanya wa 15 n’amanota 24 ikaba irimo umwenda w’igitego 1, gusa yo ntabwo isigaje gukina imikino ikomeye cyane bitewe nuko izakina n’amakipe 3 asa nkaho adafite icyo aharanira.

Isigaje kwakira Rayon Sports, gusura Police FC, kwakira Muhazi United ndetse no gusura Etoile de l’Est.

Etoile de l’Est

Ikipe ya Etoile de l’Est iri ku mwanya wa nyuma n’amanota 22 ikaba ifite umwenda w’ibitego 19, gusa n’ubundi isigaje imikino ikomeye nubwo isa nk’aho yamanutse.

Isigaje kwakirwa n’Amagaju FC, kwakira Marine FC, gusura Police FC ndetse no kwakira Bugesera FC.

Bijyendanye n’iyi mikino isigaye ikipe ya Etoile de l’Est n’ubundi iracyafite amahirwe menshi yo kumanuka ndetse na Sunrise FC naho andi makipe yo ashobora kuzabona amanota ayemerera gukomeza gukina shampiyona y’icyiciro cya mbere.

Gutsindwa kwa Rayon Sports byatumye amakipe ajya mu bibazo aba menshi

Etincelles FC ikomeje kurwana no kutamanuka mu cyiciro cya 2

Kuwa 07 Mata 2024, guhera ku isaha ya saa munani z'umugoroba ni bwo urugendo rwo kwibuka ku nshuro ya 30 Jenoside yakorewe Abatutsi ruzatangira.

Abazitabira uru rugendo bazahagurukira ku Inteko Ishingamategeko ku Kimihurura, urugendo rukaba ruzasorezwa kuri BK Arena, ari naho hazakomereza Ijoro ryo #Kwibuka30.

Perezida wa PLP [Peace&Love Proclaimers], Israel Nuru Mupenzi yavuze ku mpinduka zabayeho muri iki gikorwa kigiye gusubukurwa.

Yagize ati: 'Bwa mbere iki gikorwa cyari gisanzwe kibera muri Stade Amahoro yakira ibihumbi 25, ariko kuri ubu cyimuriwe muri BK Arena hazakira ibihumbi 3.'

Mupenzi yavuze ko impinduka zabayeho mu birebana n’abari basanzwe bitabira ari ukubera ubushobozi bwagabanutse bw’ahazabera iki gikorwa.

Biteganijwe ko iki gikorwa kizitabirwa n'Abavuga rikijyana n'Abayobozi mu Nzego zo hejuru za Guverinoma y'u Rwanda.

Urugendo rwo kwibuka Jenoside yakorewe Abatutsi, rwatangiye kuba guhera mu 2009, akaba ari igikorwa cyatangijwe n'Urubyiruko rubarizwa muri PLP.

Iki gikorwa cyatangijwe hagamijwe intego zinyuranye zirimo kurushaho gufasha urubyiruko kumenya amateka yaranze Jenoside yakorewe Abatutsi no guharanira ko itazasubira.

Hakaba harimo kandi na gahunda yo kurufasha kumenya uburyo bwo guhangana n'abahakana bakanapfobya Jenoside yakorewe Abatutsi.

Umuyobozi w’Inama y’Ubutegetsi ya Rwanda Premier League, Mudaheranwa Hadji Youssuf akaba Umuyobozi w’Inama y’Ubutegetsi ya Shampiyona y’u Rwanda (Rwanda Premier League Board) yavuze kubera ibihe byo Kwibuka Jenoside yakorewe Abatutsi muri Mata, ibihembo by’abakinnyi bitwaye neza muri Mata na Werurwe 2024 bizatangwa muri Gicurasi.

Ni ibihembo Rwanda Premier League itanga buri mpera z’ukwezi aho baba bahemba abakinnyi n’abatoza bitwaye neza.

Binyuze mu butumwa Rwanda Premier League yanyujije ku mbuga nkoranyambaga za yo, Umuyobozi w’Inama y’Ubutegetsi ya Shampiyona y’u Rwanda, Mudaheranwa Hadji Youssuf yavuze ko kubera ibihe bidasanzwe byo Kwibuka Jenoside yakorewe Abatutsi muri Mata 1994 u Rwanda n’Isi yose muri rusange bagiye kwinjiramo, ibi bihembo byimuwe bikazatangirwa rimwe muri Gicurasi.

Ati 'Nk’uko mubizi mu bihe tugiye kwinjiramo, u Rwanda n’Isi yose tuzibuka Jenoside yakorewe Abatutsi mu 1994. Ibikorwa twajyaga dukora byo guhemba abakinnyi n’umutoza bitwaye neza, icyo gikorwa muri Mata ntikizakorwa kizimurirwa muri Gicurasi.'

Yakomeje agira ati 'Ibyo bizadufasha guhemba abitwaye neza muri Werurwe na Mata. Ndasaba abasiporutifu bose muri rusange gukomeza gufata mu mugongo no gushyigikira abarokotse Jenoside tubaba hafi.'

Guhera ejo ku Cyumweru tariki ya 7 Mata 2024 hazatangira icyumweru cy’icyunamo aho Abanyarwanda, inshuti z’u Rwanda n’Isi yose muri rusange bazaba bunamira banibuka inzirakarengane zishwe muri Jenoside yakorewe Abatutsi muri Mata 1994.

Ibikorwa byo Kwibuka bizakomeza mu minsi 100. Jenoside yakorewe Abatutsi muri Mata 1994, mu minsi 100 gusa yari imaze gutwara ubuzima bw’abantu barenga miliyoni bazira uko bavutse.

Ibi bihembo byasubitswe

Kapiteni wa APR FC, Niyomugabo Claude yavuze ko bwa nyuma avugana n’umutoza wari ushinzwe kubongerera imbaraga, Dr Adel Zrane witabye Imana, yari yamubwiye ko hari ahantu agiye kujya gukarishya ubumenyi ku buryo umwaka utaha bazaba bakomeye kurushaho.

Ibi yabivugiye muri filime yerekana ubuzima bw’uyu mutoza ukomoka muri Tunisia yari abayemo muri APR FC mbere y’uko yitaba Imana, uko yari abanye n’abakinnyi, abayobozi b’ikipe ndetse n’abafana.

Hari mu muhango wo kwizihiza ubuzima bwe wabaye ku mugoroba w’ejo hashize ku wa Gatanu tariki ya 5 Mata 2024 mbere y’uko umubiri we ujyanwa iwabo muri Tunisia aho azashyingurwa.

Niyomugabo Claude akaba kapiteni wa APR FC, yavuze ko yaherukanaga n’uyu mutoza ku Cyumweru tariki ya 31 Werurwe 2024 ku mukino wa shampiyona banganyijemo na Muhazi United 1-1.

Claude wari wabanje ku ntebe y’abasimbura, yagiye kubashyushya we na Ramadhan [Niyibizi] ngo bajye mu kibuga maze Ramadhan agenda mbere ye asigarana na we.

Aha ngo yahise amubwira ko mu minsi mike hari ahantu agiye kujya kongera ubumenyi ku buryo umwaka utaha w’imikino amakipe azabumva.

Ati 'Claude hari ahantu nzajya kwiga, nzamure ubumenyi nongere ku bwo nari mfite, ku buryo iyi shampiyona nirangira, itaha tuzaba dufite imbaraga amakipe azatwumva, ndamubwira ngo umutoza uzahirwe natwe ubumenyi uzatuzanira buzadufasha buri munsi.'

Yakomeje avuga ko yari umuntu w’ingenzi ikipe ihombye ndetse akaba atazava mu mitima ya bo.

Ati 'Tubuze umuntu, ntabwo azava mu mitima yacu, ni umuntu wadufashaga, tubuze umuntu wadufashaga, ndihanganisha umuryango we. Imana imuhe iruhuko ridashira.'

Dr Adel Zrane yagizwe umutoza ushinzwe kongerera imbaraga abakinnyi ba APR FC mbere y’umwaka w’imikino wa 2023-24 utangira, yitabye Imana ku wa Kabiri w’iki cyumweru aho bamusanze mu nzu yitabye Imana, ku mugoroba w’ejo ubwo yasezerwagaho bwa nyuma mu Rwanda, Chairman wa APR FC, Col Richard Karasira yavuze ko yazize uburwayi aho umutima wahagaze mu buryo butunguranye.

Dr Adel Zrane yari afitiye imishinga migari APR FC

Niyomugabo Claude yavuze ibihe bya nyuma yagiranye n’umutoza wa Dr Adel Zrane

Muri iki cyumweru kiri kugana ku musozo, abahanzi nyarwanda biganjemo abakora umuziki wo kuramya no guhimbaza Imana, bashyize hanze indirimbo zinogeye amatwi kandi zihumuriza imitima ya benshi.

Mu ndirimbo zitari nkeya zasohotse muri iki cyumweru, InyaRwanda yaguhitiyemo 10 gusa muri zo zagufasha kwinjira neza muri weekend ya mbere ya Mata.

1.    Ndakomeye – Gabby Kamanzi

Nyuma y’igihe kirenga umwaka wose adashyira hanze indirimbo, Gabby Kamanzi yagarukanye indirimbo yise ‘Ndakomeye’ yo gusubizamo benshi ibyiringiro.

“>

2.     Asama Ndakuzuza — Chryso Ndasigwa

Umuramyi uri mu bakomeje kwigaragaza neza, yatangiye ukwezi kwa Mata ahumuriza imitima y’abantu, abibutsa ko Imana ariyo ibeshaho abayo n’aho baba babona bigoye cyane.

“>

3.     Ntujy'uhinduka — Prosper Nkomezi

Umwe mu bahanzi b’indirimbo ziramya zikanahimbaza Imana Prosper Nkomezi nawe yahamije ubudahangarwa bw’Imana buhoraho iteka ryose mu ndirimbo yise ‘Ntujy’uhinduka.’

“>

4.     Agakiza/Umuragwa — Jado Sinza

Umuramyi Jado Sinza uherutse gukora igitaramo cy’amateka cya ‘Redemption Live Concert’ agafatiramo amashusho y’indirimbo zinyuranye, yinjiye muri Mata ashyira ahagaragara imwe muri izo ndirimbo yise ‘Agakiza,’ igaruka cyane ku gisobanuro cya Pasika.

“>

5.  Ndi amahoro — Victors Gospel Band ft Papi Clever

Papi Clever na Dorcas bamenyerewe mu muziki wo kuramya no guhimbaza Imana, bahuje imbaraga n’itsinda rya Victors Gospel Band basubiramo indirimbo yo mu gitabo yitwa ‘Ndamahoro.’

“>

6.     Yanyishyuriye — Alarm Ministries

Itsinda rimaze guhamya ibigwi mu kwamamaza Kristo haba mu Rwanda no mu mahanga rya Alarm Ministries, bamaze gushyira ahagaragara indirimbo yo mu gitabo ‘Yanyishyuriye,’ bafatiye amashusho ubwo bari muri BK Arena mu gitaramo cya ‘Ewangelia Easter Celebration’ cyabaye kuri Pasika.

“>

7. Birakumvira – Richard Zebedayo 

Richard Zebedayo, umusore ukunzwe cyane mu gusubiramo indirimbo z’abandi baramyi akabikora mu buryo bwihariye, yashyize ahagaragara amashusho y’indirimbo ‘Birakumvira’ yahimbwe na Paccy Ishimwe afatanije na Innocent Tuyisenge.

“>

8.     Ni Heri Kuona Ndugu — Papi Clever & Dorcas ft Merci Pianist

Itsinda rya Papi Clever na Dorcas bafatanije na Merci Pianist bashyize ahagaragara amashusho y’indirimbo bashyize mu rurimi rw’Igiswahili bayita ‘Ni Heri Kuona Ndugu.’

“>

9. Yeriko – Fortran Bigirimana

Umuramyi w’umurundi ukunzwe cyane mu Rwanda, Fortran Bigirimana yashyize ahagaragara indirimbo ihumuriza abafite ibibazo yise ‘Yeriko.’

“>

10.  Proud — Molan Majesty

Umuhanzi ukomeje kuzamuka ku muvuduko uri hejuru, Molan Majesty, yatangiye ukwezi kwa Mata ashyira hanze indirimbo y'urukundo yise 'Proud.' Ayishyize ahagaragara nyuma y'izindi ebyiri yashyize hanze zirimo 'Ndabara Doo,' ndetse n’iyitwa 'Igisare' yamwinjije mu muziki.

“>

Mu ijoro ryo kuri uyu wa Gatanu tariki 05 Mata 2024, nibwo hafunguwe ku mugaragaro iduka ricuruza ibikoresho by'ikoranabuhanga birimo amatelefoni, za mudasobwa zigezweho kandi zikomeye, Printer, ndetse n'ibindi byinshi.

Umwihariko w'iri duka, ni uko rifite urubuga ushobora gusura ugasangaho ibindi bikoresho byose by'ikoranabuhanga, birimo televiziyo, 'ecouteurs,' firigo n'ibindi byose nkenerwa mu buzima bwa buri munsi, ari rwo www.techheaven.rw.

Umuyobozi mukuru w'iri duka, Manzi Eric, yatangarije InyaRwanda ko muri Tech Heaven batangiranye ibintu bishya gusa kandi biherekejwe n'ubwasisi budasanzwe bwa Pasika bugomba gusozanya n'uku kwezi kwa Mata.

Manzi yagize ati: 'Muri Tech Heaven byose ni bishya ahubwo, ni ijuru riri ku isi nk'uko izina ribivuga. Muri Tech Heaven dufite akarusho kuko turacyari mu bihe bya Pasika. Turi gutanga poromosiyo ukwezi kose, twagabanyijeho 20%.'

Mu bindi byiza byo kugurira ibikoresho muri Tech Heaven, harimo guhabwa garanti y'umwaka wose kuri buri gikoresho cyose. Ku bari guhaha bifashishije urubuga rwa Tech Heaven bo bashyizwe igorora, kuko iyo uguzeho igikoresho icyo ari cyo cyose ugabanyirizwa 20% ku giciro, bakakikugezaho ako kanya ku buntu aho waba uherereye hose mu gihugu.

Umuyobozi w'iri duka yagize ati: 'Icya mbere duha abakiliya bacu ni garanti, kugura igikoresho cyizewe kandi uzi n'inkomoko yacyo. Batazaguhangika ugasanga mu kanya imashini irazimye cyangwa telefoni irazimye nta garanti ufite. Ikindi ni uko muri serivisi zose dutanga dufite abantu b'inzobere muri byo, babifitiye impamyabumenyi n'impamyabushobozi, twarabyigiye dufite n'abakozi babyigiye.'

Ubudasa buri muri Tech Heaven ni uko ariho honyine hari igisubizo ku bantu bifuza gutumiza hanze ibikoresho bikomeye by'ikoranabuhanga birimo 'Gaming-Laptop,' 'Gaming-Desktop,' n'ibindi byose ushobora kubona ko bitari ku rwego rwo mu Rwanda. Utumye igikoresho cye muri Heaven Tech kigera ku cyicaro cy'iri duka nyuma y'iminsi itatu, hanyuma nyiracyo akagerayo akagihabwa.

Abakenera ibikoresho by'ikoranabuhanga mu kazi kabo ka buri munsi, barimo abayobozi b'ibigo bikomeye na za kampani, abiga amasomo y'ikoranabuhanga bakenera mudasobwa zikomeye, bose bahamagariwe kugana iri duka, kuko ubuyobozi bwaryo buri no kwiga ku cyakorwa ngo abarigana boroherezwe kwishyura mu byiciro.

Uramutse wifuza kugura ibikoresho by'ikoranabuhanga muri Tech Heaven aho waba uri hose mu gihugu, wabandikira ku mbuga nkoranyambaga zabo cyangwa ukabahamagara mu masaha ayo ariyo yose kuri telefoni igendanwa: 0788443277.

Tech Heaven iherereye mu Mujyi wa Kigali rwagati h'ino y'inyubako ya Makuza, ni ukuvuga ku muhanda uva ku Nkurunziza usa nk'ugana kwa Makuza, muri metero nka 500 gusa uba uhageze. Harangwa n'icyapa kinini cyanditseho Tech Heaven na serivisi zose batanga, haruguru y'umuhanda ku nyubako iri munsi neza y’icyicaro gikuru cya Banki ya Kigali.

Iduka rya Tech Heaven ricuruza ibikoresho by’ikoranabuhanga ryafunguye amarembo

Batanga serivisi zitandukanye zijyanye n’ikoranabuhanga

Umuyobozi mukuru wa Tech Heaven, Manzi Eric yahaye ikaze abifuza kugura no gutumiza ibikoresho byose by’ikoranabuhanga

Amahirwe yo guhahira muri Tech Heaven ni menshi

Bafite mudasobwa za mbere zikomeye kandi zihendutse

Abakenera mudasobwa zifite ubushobozi buhambaye bashyizwe igorora

Ubwoko bwose burahari

Ibikoresho byabo ni nta makemwa

Ibi bikoresho byose biba bifite garanti y’umwaka wose kuko birizewe

Muri ibi bihe bya Pasika hari igabanirizwa rya 20% kugeza ku mpera z’uku kwezi

Abakozi bose bakora muri Tech Heaven babifitiye impamyabumenyi ndetse n’impamyabushobozi

Nta mpungenge muri Tech Heaven

AMAFOTO: Freddy RWIGEMA – InyaRwanda