Author: webrwanda

Mu gihe u Rwanda n'Isi muri rusange bibuka ku nshuro ya 30 Jenoside yakorewe Abatutsi mu 1994, Tecno Mobile Rwanda nayo yifatanyije n'abanyarwanda bose muri ibi bihe, mu gikorwa cyo kunamira inzirakarengane ziruhukiye mu rwibutso rwa Nyanza ya Kicukiro, ahiciwe Abatutsi basaga 3,000.

Ubwo bunamiraga izi nzirakarengane, bamwe mu bakozi ba Tecno Mobile Rwanda bari bahagarariye abandi basobanuriwe muri macye amateka y'urwibutso rwa Nyanza ya Kicukiro.

Umukozi wa Ibuka, Gasigwa Gilbert yavuze ko uru rwibutso rufite umwihariko w'uko Umuryango w'Abibumbye wasize Abatutsi mu kaga bari babahungiyeho bazi ko bashobora kubarinda ariko bikaza kurangira bishwe muri Mata 1994.

Yagize ati: 'Abagize Umuryango w'Abibumbye bari hano mu Rwanda bafite inshingano yo kubungabunga amahoro, nicyo cyari cyabazanye ariko n'Abatutsi bahigwaga bari batuye hano mu Mujyi wa Kigali, Kicukiro, mu nkengero zaho, babahungiyeho bizeye ko bari bubone ubutabazi ariko ntabwo ari ko byagenze baje kubasiga birangira babishe.'

Yakomeje avuga ko uru rwibutso ari ikimenyetso kigaragaza ugutsindwa k'Umuryango w'Abibumbye cyangwa kunanirwa gushyira mu nshingano icyari cyabazanye mu Rwanda.

Nyuma yo gusangizwa incamake y'amateka akakaye y'urwibutso rwa Nyanza ya Kicukiro, itsinda ryaturutse muri Tecno ryagejeje ubutumwa bw'ihumure kuri bamwe mu bagize Umuryango w'abahoze ari abanyeshuri barokotse Jenoside yakorewe Abatutsi (GAERG).

Umukozi ushinzwe Itumanaho, Isakazamakuru ndetse n'ibikorwa bya Tecno, Muhire Léon Pierre yatangaje ko atari ubwa mbere Tecno ikoze igikorwa nk'iki, asobanura ko bahisemo kugenera abarokotse Jenoside yakorewe Abatutsi, ubwishingizi 'ubufasha bw'ubuzima' kubera ko iyo umuntu afite ubuzima abasha gukora n'ibindi byose.

Yagize ati: 'Twatekereje ko muri iki gihe twibuka ku nshuro ya 30 Jenoside yakorewe Abatutsi, hari benshi mu miryango iba ikeneye iryo humure no kwegerwa. Ni muri urwo rwego rero twatekereje kuza kwibuka nk'abakozi ba Tecno kandi nka Tecno muri rusange mu Rwanda hose, tukaza kwibukira hano i Nyanza nka hamwe hafi hatwegereye kuko dukorera muri Kigali, tukaza tukibuka, tukamenya amateka tukayiga, ariko tukarenga n'icyo kintu tugafasha n'Ababyeyi barokotse Jenoside yakorewe Abatutsi batuye muri aka gace.'

Umwe muri aba babyeyi bahawe ubwishingizi witwa Mukabaruta Herena, yatangaje ko bishimye cyane ku bw'ubu bufasha bahawe kandi bashimira Tecno yabatekerejeho.

Yagize ati: 'Turishimye, turabashimiye ku bw'uko baduhaye Mituelle de Sante muri iyi minsi yo kwibuka ku nshuro ya 30 twibuka Jenoside yakorewe Abatutsi mu 1994. Ubu ni ukuvuga ko Mituweli idahagarara, ahubwo irakomerezaho twivuza. Ubwo rero, ni ubuzima bwiza baduhaye uyu mwaka wa 2024 na 2025.

Turabashimiye rero Tecno, dushimira GAERG, dushimira Nyakubahwa Paul Kagame ku bw'urubyiruko aba yaratoje kwita ku babyeyi, babo Imana ibahe umugisha.'

Usanganwa Augustin nawe warokotse Jenoside yakorewe Abatutsi, yagize ati: 'Ka Mituweli rwose turagashima cyane, kubera ko buriya iyo ufite Mituweli uba ufite ubukire buhagije nta n'icyanagushobora. Buri ndwara yose yaba ikujeho ugomba kujya kuyivuza, cyangwa umwana yaba arwaye ukagenda ntugire icyo utinya. Nta bushobozi twe tuba dufite, muba mutwibutse nk'abantu bakuze b'intwaza, namwe rubyiruko rubyiruka ubungubu, Imana ibongere imigisha, mudushimira na Paul Kagame n'ubuyobozi bwiza.'

Ubuyobozi bwa GAERG bwashimiye byimazeyo Tecno Mobile Rwanda ku gikorwa cy’ingenzi yakoze, avuga ko ibi bishimangira ko u Rwanda ari igihugu cyiza kirimo abanyarwanda beza ‘bagenda muri wa mujyo n’icyerekezo Nyakubahwa Perezida wa Repubulika ashakamo umunyarwanda muzima.”

Nyuma yo gusoza iki gikorwa, Tecno yifatanije n'Umuryango wa Our Past wibutse ku nshuro ya 30 Jenoside yakorewe Abatutsi mu Rwanda.

Iki gikorwa cyitabiriwe n'urubyiruko rusaga ibihumbi bitanu, cyaranzwe n'imikino, ubuhamya, indirimbo ndetse n'ubutumwa bugaruka ku kwibuka ku nshuro ya 30 ndetse no guharanira kurwanya ingengabitekerezo ya Jenoside.

Tecno Mobile Rwanda yifatanyije n’Abarokotse kwibuka ku nshuro ya 30 abazize Jenoside yakorewe Abatutsi mu 1994

Ni igikorwa bakoreye ku rwibutso rwa Jenoside rwa Nyanza ya Kicukiro

Basobanuriwe amateka y’uru rwibutso ruruhukiyemo imibiri 105,600 y’abazize Jenoside yakorewe Abatutsi

Bamwe mu bakozi ba Tecno bashyize indabo ahashyinguye imibiri y’abazize Jenoside yakorewe Abatutsi

Bamwe mu babyeyi barokotse nabo bashyizeho ururabo

Bunamiye inzirakarengane za Jenoside zishyinguye mu rwibutso rwa Nyanza ya Kicukiro

Kuri uru rwibutso habashije kurokokera Abatutsi 100 gusa

Mu rwego rwo kurushaho kubakomeza, Tecno yahaye ababyeyi barokotse Jenoside bafashwa n’umuryango wa GAERG ubwishingizi mu kwivuza

Tecno kandi, yifatanije n’umuryango w’urubyiruko ‘Our Past’ mu gikorwa cyo kwibuka ku nshuro ya 30 Jenoside yakorewe Abatutsi mu Rwanda

Ni mu gikorwa nacyo cyabereye ku rwibutso rwa Jenoside rwa Nyanza ya Kicukiro

Cyitabiriwe n’urubyiruko rusaga 5,000

N’abanyamahanga bitabiriye uyu mugoroba wo kwibuka

Hacanwe urumuri rw’icyizere

Urubyiruko rwitabiriye iki gikorwa rwasabwe kubahiriza inyigisho rwahawe

Kanda hano urebe amafoto menshi yaranze iki gikorwa cyo kwibuka ku nshuro ya 30 Jenoside yakorewe Abatutsi mu 1994

AMAFOTO: Ngabo Serge – InyaRwanda

Ni igikorwa cyabaye mu gihe Abanyarwanda n’inshuti z’u Rwanda bari kwibuka ku nshuro ya 30 Jenoside yakorewe Abatutsi mu Rwanda muri Mata 1994 aho n’umuryango wa siporo nawo watakaje abakunzi bawo.

Uru rugendo rwabaye kuri uyu wa wa Kabiri, tariki ya 9 Mata 2024 rukaba rwatangiriye ku rusengero rwa New Life Bible ku Kicukiro Saa munani, abagize umuryango wa Rayon Sports bazamuka berekeza i Nyanza ku rwibutso, bunamira inzirakarengane ziharuhukiye, basura n’ubusitani bw’uru rwibutso, basobanurirwa amateka banakangurirwa kurwanya Ingengabitekerezo ya Jenoside.

Uwayezu Jean Fidèle usanzwe ayoboye umuryango wa Rayon Sports niwe wari urangaje imbere uyu muryango wari ugizwe n'abakinnyi b’ikipe y’abagabo, abakinnyi b’ikipe y’abagore, ndetse n’abafana b’iyi kipe muri rusange. Yavuze ko impamvu bakora uru rugendo ari ukugira ngo bifatanye n'abandi Banyarwanda kwibuka Jenoside yakorewe Abatutsi mu 1994.

Yagize ati: 'Nk’uko tujya tubikora muri ibi bihe, umuryango wa Rayon Sports dufata umwanya tugakora urugendo, tugasura rumwe mu nzibutso ziri mu gihugu kugira ngo twifatanye n'abandi Banyarwanda muri rusange mu kwibuka. Kwibuka kubera iki, twibuka muri rusange Abanyarwanda, Abatutsi bishwe muri Jenoside yakorewe Abatutsi mu 1994 kubera ko ni ngombwa nk'Abanyarwanda.”

“Umuryango wa Rayon sports uri mu bandi Banyarwanda, tugomba rero kubibuka kugira ngo tubasubize agaciro kabo. By’umwihariko rero nk'umuryango wa Rayon Sports, umuryango w'Abasiporutifu, abapfuye ni ababyeyi bacu, ni abavandimwe bacu, ni imiryango yacu. 

Abo nabo turabibuka ariko noneho no muri abo harimo abakunzi ba Rayon Sports, abanyamuryango se cyangwa n'abashinze Rayon Sports, abakinnyi bayikiniye, abasiporutifu n'abandi muri rusange. Abo nabo turaza tukabibuka tugakora iki gikorwa kugira ngo gikomeze kibere isomo n'abandi basiporutifu”.

Abayobozi ba Rayon Sports bunamira inzirakarengane zishyinguye mu Rwibutso rwa Nyanza ya Kicukiro

Uwayezu Jean Fideli yakomeje avuga ko muri aba basiporutifu harimo urubyiruko kandi mu gihe Jenoside yabaga mu bayigizemo  uruhare hakaba hari harimo urubyiruko akaba ariyo mpamvu bikwiye ko noneho hongera gukoresha  izo mbaraga z'urubyiruko hubakwa igihugu.

Yagize ati: 'Abasiporutifu cyane cyane harimo urubyiruko, igihe Jenoside yabaga muri iki gihugu imbaraga z'urubyiruko zakoze akazi gakomeye cyane mu gusenya igihugu, mu kwica abantu. Ubu rero na none ni byiza ko dukoresha izo mbaraga z'urubyiruko rwacu mu kongera kubaka igihugu, mu kongera kubaka siporo Nyarwanda kuko siporo ni urukundo, ni ugukundana, ni ugufatanya, ni ugufasha kubaka igihugu.”

“Abo rero, iyo tuje hano bahakura amasomo menshi cyane dore ko benshi bashobora kuba baravutse nyuma ya Jenoside yakorewe Abatutsi 1994. Iyo tuje na none hano hari amasomo tuhakura bakatuganiriza, bakatubwira urupfu abacu bapfuye, abanyarwanda bapfuye ku buryo tuhakura amasomo yo kwanga ikibi.

Nk’uko babidusobanuriye mwabyumvise ubu ikigezweho ni ukuyihakana, abayikoze barayiteguye barayikora ubu bageze igihe cyo kuyihakana. Urubyiruko rero twebwe, mwebwe n'abasiporutifu muri rusange ni inshingano zacu zo kurwanya abo ngabo bashaka kuyihakana bakoresheje imbuga nkoranyambaga, bakoresheje siporo' .

Urwibutso rwa Nyanza ya Kicukiro ikipe ya Rayon Sports yasuye rushyinguyemo imibiri  irenga ibihumbi 105, muri bo abasaga 3000 biciwe ku musozi wa Kicukiro. 

Ntabwo ari ubwa mbere iyi kipe ifite abafana benshi mu Rwanda ikoze iki gikorwa kuko mu mwaka ushize n’ubundi bari basuye uri Rwibutso rwa Nyanza ya Kicukiro mu gihe muri 2022 ho bari basuye Urwibutso rwa Ntarama mu Bugesera.

Abakinnyi ba Rayon Sports barimo Muhire Kevin, Mucyo Didier Junior, umutoza Julien Mette n’abafana basobanurirwa amateka ya Jenoside yakorewe Abatutsi mu 1994

Abafana, abakinnyi n’abayobozi ba Rayon Sports bari mu rugendo rwerekezaga ku Rwibutso rwa Nyanza ya Kicukiro

Mitima Isaac yunamura inzirakarengane ziruhukiye mu Rwibutso rwa Nyanza ya Kicukiro

VIDEO: Eric Munyantore – InyaRwanda Tv

Uyu muhango wabereye mu bihugu bitandukanye ahari abapolisi b'u Rwanda mu butumwa bwa Loni birimo; Repubulika ya Centrafrique, Sudani y'Epfo no mu Ntara ya Cabo Delgado muri Mozambique, aho inzego z'umutekano z'u Rwanda zoherejwe mu bikorwa byo kurwanya iterabwoba, urangwa no gucana urumuri rw'icyizere, urugendo rwo kwibuka no gufata akanya ko guceceka mu rwego rwo kunamira inzirakarengane zirenga miliyoni zishwe mu gihe cy’iminsi 100 mu myaka 30 ishize.

Umuhango wo kwibuka wabereye i Juba, mu murwa mukuru, witabiriwe na Visi Perezida wa Sudani y’Epfo ushinzwe uburinganire n'ihuriro ry'urubyiruko, Rebecca Nyandeng de Mabior, Ambasaderi w'u Rwanda muri Sudani y’Epfo ufite icyicaro muri Uganda, Col (rtd) Joseph Rutabana, uwungirije Intumwa yihariye y'Umunyamabanga Mukuru w'Umuryango w'Abibumbye mu butumwa bw'Amahoro muri Sudani y'Epfo (UNMISS), Guang Cong, abayobozi b’amadini, abahagarariye ibihugu byabo n’abandi.

Visi Perezida Nyandeng yagaragaje ko kuba harabaye Jenoside yakorewe Abatutsi, ari ugutsindwa kw'ikiremwamuntu muri rusange, kuko yabaye Isi yose irebera ntigire icyo ikora mu kuyihagarika.

Yashimiye u Rwanda intambwe rumaze gutera mu budaheranwa, ubwiyunge by'umwihariko no guha ubushobozi urubyiruko n'abagore mu kubaka igihugu no kuba ku isonga mu kubaka amahoro n'ubwiyunge.

Yashimangiye ko Sudani y'Epfo ishyigikiye u Rwanda mu kurwanya ingengabitekerezo ya Jenoside, ahamagarira abandi bayobozi b'Afurika guhagarara ku ijambo ryabo barwanya imvugo z'urwango, kutihanganirana n'amakimbirane akomeje kwiyongera.

Muri iki gihugu, umuhango wo kwibuka wabereye no mu Ntara ya Upper Nile, mu gace ka Malakal, ahakorera abapolisi b'u Rwanda bagize umutwe RWAFPU-1.

Uhagarariye Umuryango w'Abibumbye mu butumwa bw'Amahoro mu gace ka Malakal, Alfred Orono Orono yavuze ko mu gihe u Rwanda rwibuka ruba rwunamira abazize Jenoside yakorewe Abatutsi mu 1994 kandi rutanga urugero rwiza rw'amahoro arambye.

Yongeyeho ko u Rwanda ari urugero rwiza ku Banyasudani y’Epfo, aho ibihe bibi by'amakimbirane bishobora guhinduka bigasimburwa n’amahoro arambye.

Muri Repubulika ya Centrafrique

Abapolisi n'ingabo z'u Rwanda bari mu butumwa bw'Umuryango w'abibumbye bwo kubungabunga amahoro n'umutekano muri Centrafrique (MINUSCA) bahuriye mu muhango wo kwibuka wabereye mu kigo cya RWAFPU1-9 mu murwa mukuru Bangui. Uyu muhango wo kwibuka wayobowe n'Ambasaderi w'u Rwanda muri icyo gihugu, Kayumba Olivier.

Witabiriwe kandi n'Intumwa yihariye y'Umunyamabanga Mukuru w'Umuryango w'Abibumbye, Amb. Valentine Rugwabiza, Umuyobozi w'Ishami rya Polisi mu butumwa bw'Umuryango w'Abibumbye muri Centrafrique (MINUSCA), Commissioner of Police (CP) Christophe Bizimungu, Abanyarwanda baba muri icyo gihugu, abayobozi muri Guverinoma n'abakozi b'Umuryango w'Abibumbye bakomoka mu bindi bihugu bitanga umusanzu mu butumwa bw'amahoro.

Ambasaderi Kayumba yavuze ko u Rwanda rukomeje urugendo rwo guhindura amateka, asaba urubyiruko kwirinda ibikorwa byose bishobora gukurura urwango n’amacakubiri, ahubwo bakarushaho kugira uruhare mu kurinda ibyagezweho.

Yagize ati: “Urubyiruko rufite inshingano zikomeye zo gukomeza kubaka u Rwanda dushaka, kuko rufite imbaraga zo kubikora. Ibyagezweho murabibona, mugomba kubirinda, kubisigasira no kurushaho kubibyaza umusaruro.'

Mu kigo cy'Abapolisi b'u Rwanda bagize umutwe RWAFPU-3, giherereye mu Mujyi wa Bangassou, umuhango wo kwibuka witabiriwe n'abayobozi muri Guverinoma ya Centrafrique, abahagarariye amadini ndetse n'abakozi ba MINUSCA, waranzwe n'amasengesho n'ubutumwa bwagarutse ahanini ku buryo Jenoside yateguwe igashyirwa mu bikorwa amahanga arebera n'uko yaje guhagarikwa n'ingabo zahoze ari iza APR.

Mu butumwa bwe bwo kwibuka ku nshuro ya 30 Jenoside yakorewe Abatutsi mu 1994, Umunyamabanga Mukuru w'Umuryango w'Abibumbye, Antonio Guterres, yagize ati: “Mu 1994, miliyoni y'abana, abagore n'abagabo bishwe muri Jenoside yakorewe Abatutsi mu Rwanda.

Ntiduteze kuzibagirwa abavukijwe ubuzima cyangwa ngo twibagirwe ubutwari no kwihangana kw’abacitse ku icumu, umuhate wabo n’ubushake bwo kubabarira bikomeje kuba ikimenyetso cy'urumuri n’ibyiringiro.”

Dallaire agenda atanga ibiganiro bitandukanye, yanditse ibitabo, yifashishijwe mu ndirimbo na filimi bigaruka kuri Jenoside yakorewe Abatutsi muri Mata 1994 ,kenshi agaruka ku buryo u Rwanda rwatereranwe n'amahanga ubwo abatutsi bicwaga.

Uyu mugabo mu kiganiro kimwe yagiranye na The Globe and Mail, yagarutse ku buryo yatse ubufasha kenshi bwagombaga gukiza abicwaga ariko bikaba iby'ubusa mu gisubizo yatanze.

Mu gisubizo yatanze Dallaire yumvikanye agira ati'U Rwanda n'abaturage barwo n'ingabo narinyoboye mu butumwa bwa Loni bwo kugarura amahoro baratereranwe kugeza igihe bishwe.'

Yongeraho ati'Igihe nasabaga ubufasha nibutswaga ko nta peteroli iri mu Rwanda, nta diyama, nta n'ikindi kintu cy'ingirakamaro gihari. Hari ikiremwa muntu gusa, ubuzima bw'abirabura butari bufite agaciro na gato.'

Byinshi uyu mugabo yagiye agarukaho ndetse byemezwa ko ibihe yanyuzemo mu Rwanda byamugizeho ingaruka mu buryo bw'ubuzima tukaba twifuje kugaruka ku buzima bwe.

Dallaire yavukiye mu gace Denekamp, Netherland mu muryango w'abasirikare kuva kuri Roméo Louis Dallaire na Catherine Vermeassen.

Dallaire yaje kugera muri Canada afite amezi 6 hari mu 1946, yaje gukurira muri Montreal,yinjiye mu gisirikare, mu 1963 yinjira mu ishuri ry'abofisiye rya Saint Jean.

Mu mwaka wa 1970, yasoreje amasomo y'icyiciro cya Kabiri cya Kaminuza muri Royal Military College muri Canada, yakomeje kugenda yiga amasomo ya Gisirikare mu bice bitandukanye by'Isi.

Mu 1989 yagizwe Brig Gen ahita anahabwa kuyobora batayo ya 5, mbere gato yo koherezwa mu butumwa bw'amahoro mu Rwanda hagati ya 1990 kugera muri 1993 yakozeho mu ishuri rya gisirikare rya Saint Jean.

Mu 1993 ni bwo yahawe inshingano zo kuyobora abasirika b'Umuryango w'Abibumbye mu Rwanda, ibi bikaba byari no mu buryo bwo kureba uko zafasha mu ishyirwa mu bikorwa ry'amasezerano ya Arusha.

Muri icyo gihe ariko niko FAR yarikomeje kwitegura igura ibikoresho nubwo hari gahunda y’ukoizari Ingabo za  RPA zigomba kwinjizwa mu gisirikare ndetse hakabaho no kugabana ubutegetsi.Ari nako hakomeza kandi kugenda hatagwa ibya ngombwa bigaragaza ubwoko buri umwe aturukamo.

Bidatinze ku wa 06 Mata 1994 haje kumvikana inkuru y’uko indege ya Habyarimana wari kumwe na Perezida w'u Burundi n'abandi bakozi yahanuwe.

Aha niho akazi Dallaire yari afite mu Rwanda kakomereye kuko intagondwa z'Abahutu zahise zitangira kwica Abatutsi maze Dallaire asaba abasirikare b'Ababiligi ko bamufasha kurinda Minisitiri w'Intebe, Agathe Uwilingiyimana utari ushyigikiye politiki y'ivangura bidatinze ariko Agathe, umugabo we n'ababasirikare baje kwicwa bishwe na FAR [Ingabo za Guverinoma ya Habyarimana].

Iyicwa ry'aba basirikare ICTR yarihamije Col Theoneste Bagosora mu 2008, mu bihe bitandukanye Dallaire yandikiye Umuryango w'Abibumbye abasaba ko bakongera ingabo nyamara Akanama k'Umutekano karabyanze ahubwo basaba ko n’iziriyo zagabanywa.

Ubwo abasirikare biganjemo abo mu Bubiligi n'ibindi bihugu by'u Burayi bafataga rutemikirere bakava mu Rwanda rwarimo ruberamo Jenoside yakorewe Abatutsi, abari  basigaye bigabanyijemo amatsinda atandukanye bajya kurinda ahantu hanyuranye hari hahungiye Abatutsi.

Ibikorwa bya Dallaire bikaba bibarwa ko byakijije abagera ku bihumbi 32 mu gitabo uyu mugabo yanditse ashima byimazeyo umuhate w'abanya-Tunisia na Ghana mu gutabara ubuzima bw'Abatutsi bahigwaga.

Haje gufatwa umwanzuro n'Umuryango w'Abibumbye wo kohereza ingabo zigera ku bihumbi 5.5 ariko Dallaire akomeza kugaragaza ko bidakwiye ko Abafaransa bakoherezwa bitewe n'amateka y'iki gihugu n'u Rwanda muri ibyo bihe na mbere harimo no kuba bwari bushyigikiye ibyabaga.

Dallaire yanyuze mu nkiko za gisirikare nyuma ya Jenoside yakorewe Abatutsi abazwa ku rupfu rw'abasirikare b'Ababiligi ashijwa kuba yarabahaye inshingano zikomeye ari bake.

Mu kwisobanura ariko yagiye agaragaza ko yari yashyizeho uburyo baza gufashwa bibaye ngombwa ariko ko abasirikare ba Bangladesh yizeye batari bashoboye.

Mu gitabo yanditse Shake Hands with the Devil, Dallaire agaragza uburyo ubumuntu bwabuze mu bihe bya Jenoside yakorewe Abatutsi amahanga akarebera.

Ubwo yasubiraga muri Canada, yahawe inshingano zitandukanye hari imyanya itandukanye mu gisirikare muri Minisiteri zitandukanye kugera muri 1999 ubwo yagirwaga Umujyanama w'Umugaba w'Ingabo.

Yaje guhura ariko n'uburwayi bw'ihungabana mu 2000 gusa akomeza gukurikiranwa muri Mutarama 2004 yagiye gutanga ubuhamya bushinja Col Bagosora ku ruhare rwe muri Jenoside yakorewe Abatutsi.

Yagiye akomeza guhabwa inshingano zinyuranye zirimo kuba Umujyanama wa Guverinoma mu by'Intambara, yaje kugirwa Senateri muri Werurwe 2005.

Mu bihe bitandukanye yakomeje yiyambazwa ku bushakashatsi mu birebana n'intamabara ndetse na Jenoside ari nako yifashishwa mu biganiro, ibyegeranyo n'ibindi birebana na Jenoside yakorewe Abatutsi.

Dallaire yabaye inganzo y'indirimbo Kigali ya Jon Brooks, igaruka ku bihe bikomeye abasirikare bo muri Canada banyuzemo mu Rwanda.

Yagiye ahabwa imidali itandukanye ku ruhare yagize mu gukiza Abatutsi muri Jenoside anafatwa na benshi nk'umusirikare w'ibigwi by'ibihe byose mu gisirikare cya Canada.

Yahawe kandi impamyambumenyi z'ikirenga na Kaminuza zitandukanye zo mu bihugu bya Leta Zunze Ubumwe za Amerika na Canada.

Dallaire yamaze imyaka 36 mu gisirikare, asoza inshingano ageze ku ipeti rya Lt Gen, yashakanye na Elizabeth Roberge baje gutandukana mu 2019.

Kuva mu  2020 abana Marie Claude Michadu, uyu mugabo w'imyaka 77 afite abana 3 aribo Willem, Catherine na Guy.

Yagerageje ibishoboka nubwo ubufasha bw’Umuryango w’Abibumbye bwakomeje kuba ingumeYagiye ahabwa inshinganzo zitandukanye muri Guverinoma ya Canada yaba akiri umusirikare na nyuma yayoAkomeza kugenda atanga ibiganiro kuri Jenoside yakorewe Abatutsi ndetse, yagiye ahabwa impamyabumenyi mu birebana n’amategeko na Kaminuza zikomeye ku isiYasoje imirimo ye nk’umusirikare ageze ku ipeti rya Lt Gen mu bihe bitandukanye agenda ahabwa imidali y’ishimye n’ibihembo binyuranye

Mu gikorwa cyabaye ku ya 5 Mata 2024 ku Rwibutso rwa Jenoside rwa Kigali ku Gisozi, Umuyobozi Mukuru Ishami ry'Umuryango w'Abibumbye ryita ku Burezi, Ubumenyi n'Umuco [UNESCO], Audrey Azoulay, yashyikirije Guverinoma y'u Rwanda, icyemezo gihamya ko inzibutso enye za Jenoside yakorewe Abatutsi, zashyizwe mu Murage w'Isi iri shami rishinzwe kubungabunga.

Icyemezo cyo kwandika Inzibutso za Jenoside yakorewe Abatutsi mu Murage w'Isi mu Ishami ry'Umuryango w'Abibumbye ryita ku Burezi, Ubumenyi n'Umuco [UNESCO], cyafatiwe mu Nama ya 45 y'Inteko Rusange ya Komite yiga ku Murage w'Isi, ku wa Gatatu, tariki ya 20 Nzeri 2023.

Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascène, yavuze ko iki gikorwa kije cyiyongera ku bindi byakozwe, birimo nk'itangwa ry'ubutabera ryemejwe n'ishyirwaho ry'Urukiko Mpuzamahanga Mpanabyaha rwashyiriweho u Rwanda, kwemeza Jenoside yakorewe Abatutsi bikozwe n'Umuryango w'Abibumbye n'indi miryango ndetse n'ibihugu.

U Rwanda rwabonye icyemezo cy'uko izi nzibutso zashyizwe mu murage w'Isi wa UNESCO, nyuma y'imyaka 15 Leta y'u Rwanda ibisabye.

Dore ibyihariye ku nzibutso enye zashyizwe mu murage w’Isi wa UNESCO:

1. Urwibutso rwa Kigali

Urwibutso rwa Jenoside rwa Kigali ruherereye ku Gisozi ruri mu nzibutso nini mu Rwanda, rushyinguyemo imibiri y'inzirakarengane zishwe muri Jenoside yakorewe Abatutsi barenga ibihumbi 250 muri Mata 1994.

Kimwe mu byatumye uru rwibutso rushyirwa mu murage w'Isi, ni uko ruri mu Mujyi wa Kigali rukaba rwubatse mu Murwa Mukuru w'Igihugu, ahatuye abanyarwanda benshi baturuka hirya no hino mu gihugu ndetse n'abanyamahanga.

Kuba kandi muri Kigali hatuyemo ba kavukire ndetse n'abandi baturuka mu turere twose tw'igihugu, ni ikintu gikomeye kuko abahashyinguye ari inzirakarengane za Jenoside zakomokaga mu bice byose by'igihugu.

2. Urwibutso rwa Nyamata

Urwibutso rwa Jenoside yakorewe Abatutsi mu 1994 rwa Nyamata, ruherereye mu Karere ka Bugesera mu Ntara y'Iburasirazuba, rukaba rushyinguyemo imibiri y'Abatutsi barenga ibihumbi 45.

Uru rwibutso ni Kiliziya, aho abantu bahungiye bibwira ko badashobora kwicirwa mu nzu y'Imana, ariko nyuma leta iza gutanga itegeko ry'uko nta hantu na hamwe hagomba gusigara hatagabwe ibitero. 

Ubwo Minisitiri w'Ubumwe bw'Abanyarwanda n'Inshingano Mboneragihugu,  Dr Bizimana Jean Damascène yavugaga byimbitse ku cyatumye uru rwibutso rushyirwa mu murage w'Isi yaragize ati: 'Twagiye twerekana buri rwibutso n'umwihariko, Nyamata buriya ihagarariye abiciwe mu nsengero no muri Kiliziya zose.

Ariko noneho Nyamata, ukanerekana imiturire y'u Bugesera kubera ko cyari igice kidatuwe, Abatutsi bimuwe mu bindi bice by'igihugu, bahaba mu buzima bugoye, u Bugesera barabutunganya kugeza ubwo bahabiciye.'

3. Urwibutso rwa Bisesero

Urwibutso rwa Jenoside yakorewe Abatutsi mu 1994 rwa Bisesero ruherereye mu Karere ka Karongi, rwafunguwe ku itariki ya 7 Mata mu 1997, ruza kongera kuvugururwa rumurikwa ku mugaragaro ku ya 27 Kamena mu 2014. Muri uru rwibutso hashyinguye imibiri y'Abazize Jenoside barenga ibihumbi 50. 

Avuga kuri Bisesero, Minisitiri Dr. Bizimana yavuze ko iyari Perefegitura ya Kibuye yagushije ishyano rikomeye kubera ko muri Guverinoma y'abicanyi, yari iyifitemo abaminisitiri bane bose bayikomokamo harimo n'abakomokaga aha mu Bisesero, batije umurindi bikomeye Jenoside.

Urwibutso rwa Jenoside rwa Bisesero, hari amateka y'Abatutsi banze kwicwa batirwanyeho, bahangana n'ibitero bakoresheje intwaro gakondo, imisozi irabafasha. Uko kwanga gupfa rero, nabyo bifite isomo biha amahanga.

4. Urwibutso rwa Murambi

Urwibutso rwa Jenoside yakorewe Abatutsi mu 1994 rwa Murambi ruherereye mu Karere ka Nyamagabe, ruruhukiyemo imibiri y'Abatutsi bishwe muri Jenoside barenga ibihumbi 50. Uru rwibutso, rufite uwimihariko wo kuba rugaragaza uruhare rutaziguye rw'amahanga yahagarikiye Jenoside yakorerwaga Abatutsi, aho ingabo z'Abafaransa zari zarashyize ibirindiro mu cyiswe 'Zone Turquoise,' zarebereye abicwaga.

Ubusanzwe aha i Murambi hahoze ikigo cy'amashuri cyarimo cyubakwa kitararangira, kikaba cyari ishuri ry'imyuga rya ETO (Ecole Technique Officielle). Mu bihumbi 50 by'abari bahahungiye, harokotse abatageze kuri 40 gusa.

Uru rwibutso ni ahantu hari ishuri ariko igihe cya Jenoside kigeze, bahakusanyiriza Abatutsi, barabica. Icyo gihe abategetsi ba Perefegitura ya Gikongoro bahahurije Abatutsi benshi bababeshya ko bagiye kubarinda, ariko ku wa 20 no ku wa 21 Mata mu 1994 barabatsemba. Ni ahantu umuntu yavuga ko hahagarariye inzu zose za Leta n'iz'ubutegetsi ziciwemo Abatutsi mu 1994.

Ku wa Gatandatu w'icyumweru gishize tariki 6 Mata 2024, nibwo Ishami ry'Umuryango w'Abibumbye rishinzwe Uburezi, Ubumenyi n'Umuco, UNESCO, ryashyize ku Rwibutso rwa Jenoside yakorewe Abatutsi rwa Murambi mu Karere ka Nyamagabe, ikimenyetso cy'uko rwanditswe ku rutonde rw’Umurage w'Isi.

Umuyobozi Mukuru wa UNESCO, Audrey Azoulay washyize ikimenyetso kuri uru rwibutso, yagaragaraje ko biteye agahinda kuba aharimo kubakwa ishuri ngo ritange ubumenyi harahinduwe aho kwicira abantu. Yongeyeho ko ibi bitanga umukoro wo kwimakaza uburezi bwita ku kiremwamuntu aho kuba uburezi bwimakaza urwango.

Abasesengura amateka ya Jenoside, baremeza ko kuba hari inzibutso za Jenoside yakorewe Abatutsi zanditswe na UNESCO mu murage w’Isi, byashimangiye uburemere n’agaciro amahanga aha Abatutsi basaga Miliyoni bishwe mu gihe cya Jenoside bazira ubwoko bwabo.

Zimwe mu mpamvu Leta y’u Rwanda yashingiyeho mu gutanga iki gitekerezo, ni ukugaragariza Isi itegurwa n’ishyirwa mu bikorwa ry’umugambi wa Jenoside ndetse no guhangana n’abayipfobya bari hirya no hino ku Isi.

 

Ubuhanzi bwabaye igikoresho gikomeye cyenyegejeje umugambi wo kurimbura abatutsi. Indirimbo z'abarimo Bikindi Simon zumvikanye igihe kinini kuri Radio zihamagarira urwango no gushyira mu bikorwa umugambi wagejeje kuri Jenoside yakorewe Abatutsi.

Mani Martin wavukiye i Rusizi, ubwo yari mu kiganiro na InyaRwanda, yavuze ko yakuze afite amatsiko yibaza impamvu abahanzi benshi yakuze akundiraho ibihangano batakiriho, kuko yumva ashaka kuzahura nabo akamenya uko bakoresheje inganzo yabo.

Ni ibintu byakomeje kubyiganira mu mutima we kugeza ubwo ahuye na Cécile Kayirebwa bagirana ikiganiro kirambuye cyagejeje ku kumenya ko amateka asharira u Rwanda rwanyuzemo yanahitanye benshi mu bahanzi baririmbye amahoro n'urukundo.

Byahinduye imyumvire ye! Uyu muhanzi avuga ko yari yarakuze muri we atekereza ko kugirango azatere ikirenge mu cy’abahanzi yakuze akunda kandi akundira ibihangano, bizamusaba gukora ibihangano byinshi ‘ubundi nkapfa cyangwa nkajya kuba mu mahanga’.

Yavuze ati “Natekerezaga y’uko ariko bimeze! Kuko niko kuri nari nkuriyemo. Amaze kunsobanurira [Cécile Kayirebwa] ko abahanzi benshi bishwe muri Jenoside, abandi bari muri za Gereza kuko bagize uruhare muri Jenoside, abandi bahunze igihugu ariko hakaba hari n’abandi bahunze kubera ayo mateka n’ubundi yari yaratangiye mbere.”

Yavuze ko kuva uwo munsi aganira na Cécile Kayirebwa ari bwo yafashe icyemezo cyo gukoresha ubuhanzi bwe mu kubaka icyo ‘gihugu cyasenywe’.

Hagati aho ariko kandi, Kayirebwa yanabwiye Mani Martin ko hari abahanzi bari bafite impano ikomeye mu muziki bayikoresheje mu guhembera urwango, ndetse bakanahembera amacakubiri na mbere yaho.

Umunsi abazwa ibibazo bibiri byakomereye umutima we

Mani Martin yavuze ko igihe kimwe ubwo yari mu Bufaransa, yagiranye ikiganiro n’umunyamakuru waho, amubaza kuri we n'aho akomoka.

Uyu munyamakuru yamubajije ibibazo byamukomereye ku buryo kubisubiza byamusabye gutekereza kabiri, ariko kandi ntiyari azi byinshi kuko yari akiri muto.

Umunyamakuru yabajije Mani Martin niba avuka mu Rwanda, hanyuma amubaza ubwoko bwe. Ati “Nigeze kujya rimwe mu gihugu cy’u Bufaransa, umunyamakuru ambaza ibibazo bibiri byankomereye cyane, yarambajije ngo uva mu Rwanda ndavuga ngo yego, arambaza ngo uri Umuhutu cyangwa uri Umututsi, uri mu bishe abandi cyangwa uri mu bishwe.”

Mani Martin yavuze ko yakomerewe no gusubiza ibibazo kuko yari akiri umwana muto, ariko yabwiye uyu munyamakuru ko ari umuhanzi kandi ukomoka mu Rwanda.

Uyu munyamakuru yabwiye Mani Martin ko Abanyarwanda ‘bose nahuye nabo bamwe bari abatutsi abandi ari abahutu’.

Mani Martin yahise akebura uyu munyamakuru amubwira ko ‘uyu munsi ni umunsi wawe wo guhura noneho n’umuhanzi w’umunyarwanda’. Ati “Birashoboka cyane ko uhitamo umunyarwanda uri we uyu munsi. Kuko, twese ibituranga tubihitamo.”

Kuri Mani Martin, buri wese uri kuri iyi Si ni igihangano cya nyriibiremwa kandi gitandukanye n’ikindi.

Anabona ko abantu bafite byinshi bahuriyeho kurusha ibyo batandukaniyeho. Yavuze ko buri wese akwiye kumva ko adashobora kuba nk'undi.

Mani Martin yavuze ko buri wese ugitekereza kugira ingengabitekerezo ya Jenoside n’ibindi bitekerezo biyihembera  'arihemukira'.

Yavuze ko ‘urwango rubabaza cyane urufite’ kandi ‘ibintu byose utekereza ni ibihangano byawe bwite bikurimo’. 

Ati “Ni wowe wa mbere bibanza kugiraho ingaruka. Niyo ukoze igikorwa, cyangwa ugakwirakwiza amakuru ashobora gutuma byagira uwo bibangamira n’ubundi biranga bikakugarukira, kuko muri ubu buzima niko bimeze.”

Mani Martin avuga ko buri mubyeyi w’umunyarwanda wese afite inshingano zo kwigisha amateka abana be ndetse n’abandi ashobora guhura nabo kandi akayavuga uko ari n’uko yabaye.

Ni igihe cyo gufungurira abato bakarushaho kumenya no kwiga amateka mu nzira zose zishoboka kuko ‘ubutamenya buriya ni bubi’. 

Ati “Icyo umubyeyi wacu yatubwiye tugiha agaciro kurusha ikindi cyose […] Ni ngombwa cyane ku bwiza abana ukuri kw’ayo mateka.”

Uyu munyamuziki yagaragaje ko ubuhanzi ari intwaro ikomeye cyane mu kongera kubanisha abantu. Yavuze ko hari abantu bashobora kuba batumvikana mu buzima bwa buri munsi, ariko bakaba bahurira ku gukunda umuhanzi cyangwa igihangano kimwe.

Ati “Ni intwaro rero dukwiye kuba dukoresha cyane mbere na mbere mu guhuza abantu, kubera ko n’iyo tutabikoze tubigambiriye usanga ibikorwa byacu bihuza abantu.”

Yavuze ko buri muhanzi uhanga akwiye kubanza gutekereza ku gihangano agiye gushyira hanze, kandi agakora uko ashoboye nawe akabanza gukira ibikomere mbere y’uko atambutsa ubutumwa bwe mu nganzo aba yageneye rubanda. Ati “Turi ahantu turebwa n’abantu bose, turamutse dufite gukira gukomeye, n’abatwumva bakira.”

Mani Martin yagaragaje ko ari umugisha ukomeye kuba yarakuriye mu gihugu nk’u Rwanda, gitanga amahirwe kuri buri wese.

Ati “Nagize umugisha wo gukurira mu gihugu, aho nshobora kuva i Cyangugu nkagera Rusumo ntawe umbajije ngo uri uwahe? Kuba gusa mfite irangamuntu y’umunyarwanda bikaba bihagije. Rero ni ikintu cy’ingenzi.”

Yavuze ko kuba umuhanzi aririmba ubutumwa bwe bugasakara hirya no hino bimwongerera inshingano zo gukomeza gutanga ubutumwa agendeye mu murongo w’abakunzi be no guharanira guhindura sosiyete nziza kurusha uko yayisanze.

Mani Martin yatangaje ko Cécile Kayirebwa ariwe wamufashije kumenya amateka yaranze abahanzi mbere na nyuma ya Jenoside yakorewe Abatutsi

Mani Martin yavuze ko yakomerewe no gusubiza ibibazo by'umunyamakuru w’Umufaransa wamubajije ibijyanye n'ubwoko

Mani Martin yavuze ko yiyemeje gukoresha inganzo ye mu rugendo rwo kubaka u Rwanda 

KANDA HANO UREBE IKIGANIRO TWAGIRANYE NA MANI MARTIN

“>

Aba bombi batangaje ubutumwa bwabo bifashishije urubuga rwa Instagram, bagaragaza ko bari kumwe n'u Rwanda n'Isi muri iki gihe bibuka ku nshuro ya 30 Jenoside yakorewe Abatutsi yatwaye ubuzima bw'abarenga Miliyoni mu gihe cy'iminsi 100 aho bicwaga amahanga arebera.

Mu bihe bitandukanye Ali Kiba yakunze kugaragaza ko yumva neza amateka asharira Abanyarwanda banyuzemo, akifatanya nabo mu kuzirikana no kunamira inzirakarengane zishwe muri Jenoside yakorewe Abatutsi.

Ari mu bahanzi Mpuzamahanga basaba buri wese guharanira ko Jenoside itazongera kubaho ukundi. Uyu munyamuziki w’imyaka 37 y’amavuko wamenyekanye cyane mu ndirimbo zirimo nka ‘Mwana’, ‘Dodo’ yanditse avuga 'Turi kumwe namwe Rwanda muri ibi bihe'.

Ali Kiba ari mu bahanzi bubashywe muri Tanzania akaba umwanditsi w'indirimbo uri mu bakomeye wita cyane ku kuririmba indirimbo zubakiye ku mudiho wa Bongo Flava.

Ni umwe mu bakomoka mu gace ka Kigoma, ndetse yashinze inzu y'umuziki yise Kings Music label, aherutse no gutangiza Radio yise 'Crown Fm Radio'.

Arazwi cyane binyuze mu ndirimbo zirimo nka: Mwana, Aje, Chekecha Cheketua, Cinderella, Nakshi Mrembo, Usiniseme, Dushelele, Single Boy yakoranye na Lady Jaydee, Mapenzi Yana Run Dunia, Macmuga n'izindi.

Mu butumwa bwe bwo kuri Instagram, Ykee Benda wamamaye mu ndirimbo zinyuranye, yasabye buri wese guhora yibuka inzirakarengane zishwe muri Jenoside yakorewe Abatutsi no 'gukorera ibyiza abana bacu n'abazabakomokaho.'

Ykee Benda ari mu bahanzi bakomeye muri Uganda bagiye begukanye ibikombe byihariye mu muziki. Ni umwanditsi w'indirimbo akaba na Producer.

Mu bihangano bye yibanda cyane ku byubakiye ku njyana ya Afrobeats, Pop, Dancehall, R&B ndetse na Reggae. Inyandiko zinyuranye zivuga ko yatangiye umuziki mu mwaka wa 2015, kuva ubwo atangira kumenyekana.

Ni umwe mu bahanzi babarizwa mu inzu ifasha abahanzi mu bya muzika ya Mpaka Records abereye umuyobozi. 

Amaze gukorana indirimbo n'abarimo Jason Derulo (USA), Reekado Banks (Nigeria), Tekno (Nigeria), Jay Prayzah (Zimbabwe), Mr. Bow (Mozambique), Manzu (Sierra Leone) n'abandi.

 

Ali Kiba yifatanyije n'Abanyarwanda Kwibuka ku nshuro ya 30 Jenoside yakorewe Abatutsi

Ykee Benda yasabye buri wese guhora azirikana inzirakarengane zishwe muri Jenoside yakorewe Abatutsi mu rwego rwo gutegura ejo heza hazaza h'abana babo

Tariki 24 Gashyantare 2024 ni bwo Kenza yatangajwe ko yahigitse abandi bakobwa bari bahatanye muri Miss Belgique mu birori byabereye ahazwi nka 'Proximus Theater' mu Bubiligi.

Kenza Johanna Ameloot w'imyaka 22 ufite umubyeyi (nyina) w'umunyarwandakazi, kuri ubu niwe ufite ikamba rya Nyampinga w'u Bubiligi (Miss Belgique) w'umwaka wa 2024. Uwo mubyeyi we yitwa Gakire Joselyne akaba ari umunyarwandakazi, Se akaba ari Umubiligi.

Mu gihe abanyarwanda bari kwibuka ku nshuro ya 30 Jenoside yakorewe Abatutsi, Kenza Johanna Ameloot yagaragaje ko azirikana ibi bihe abanyarwanda barimo ashyira ubutumwa ku mbuga nkoranyambaga bugaragaza ko azirikana ibi bihe.

Ku ikubitiro, Kenza yabanje gushyira ku mbuga nkoranyambaga ze umunara w'i Paris urimo kwaka handitseho 'Kwibuka ku nshuro ya 30 Jenoside yakorewe Abatutsi' nyuma y'ubwo butumwa, yabuherekesheje ubundi bwo kwibuka.

Kuba yazirikanye akereka abanyamahanga ibihe igihugu cyamubyariye umubyeyi kirimo gicamo, ni ibintu by'ubutwari cyane ko hari abanyarwanda benshi bagera hanze y'Igihugu bagatangira kunenga ndetse abenshi bakaba babeshywa ku mateka nabo bagatana.

Kenza Ameloot asanzwe aza mu Rwanda gusura igihugu cyamubyariye umubyeyi ndetse mu minsi yashize yahazanye n'umukunzi we dore ko ubwo umukunzi we yagiraga isabukuru, Kenza Ameloot yamwifurije isabukuru akoresheje amashusho bafatiye mu Rwanda.

 

Kapiteni wa Police FC, Nshuti Dominique Savio yabwiye urubyiruko ko ubu igihe kigeze ngo na bo batange umutahe wo kubaka igihugu.

Ni ubutumwa uyu mukinnyi yatanze mu gihe u Rwanda rurimo Kwibuka ku nshuro ya 30 Jenoside yakorewe Abatutsi muri Mata 1994.

Nshuti Dominique Savio akaba yavuze ko imbaraga abavandimwe n’ababyeyi batanze ngo babeho neza zitagomba gupfa ubusa.

Ati “Imbaraga n’umurava tubikura kuri bo! Ababyeyi n’abavandimwe bacu banze guheranwa n’agahinda n’umubabaro batewe na Jenoside yakorewe Abatutsi muri Mata 1994 kugira ngo tubeho neza. Twe nk’urubyiruko nitwe mbaraga z’igihugu, igihe kirageze ngo natwe dukorere igihugu cyacu cyiza kizira ikibi. Twibuke Twiyubaka!”

Nshuti Dominique Savio yakiniye amakipe atandukanye mu Rwanda nka Rayon Sports, AS Kigali, APR FC na Police FC arimo uyu munsi.