Chérif Bayo, Umunya-Sénégal wakiniraga Kiyovu Sports yamaze kwandikira iyi kipe ayimenyesha ko yaseshe amasezerano kubera ko imaze amezi 2 itamuhemba.
Uyu mukinnyi wari wasinye imyaka 3 muri 2023, ejo hashize tariki ya 16 Mata 2024 yandkiye Kiyovu Sports inaha kopi FERWAFA iyimenyesha ko yamaze gusesa amasezerano.
Ati “Nshingiye ku kuba mutarubahirije ingingo ya 11 mu masezerano y’imyaka itatu nari nasinye, aho maze amezi abiri ntahembwa kandi nkaba mbayeho nabi i Kigali, ayo masezerano ararangira kuva igihe iyi baruwa ibagereraho ndetse ikagera no kuri FERWAFA.”
Chérif Bayo yasezeye Kiyovu Sports mu gihe habura imikino ine ngo umwaka w’imikino wa 2023/24 urangire. Bivuze ko atazakina umukino w’umunsi wa 27 na APR FC ku wa Gatandatu tariki ya 20 Mata 2024.
Bayo yamaze gusesa amasezerano yari afitanye na Kiyovu Sports
Biravugwa ko ubwo umwaka w’imikino wa 2023-24 uzaba urangiye mu ikipe ya APR FC izarekura umubare munini w’abakinnyi bitewe n’umusaruro utari mwiza batanze.
Nubwo iyi kipe y’Ingabo z’Igihugu imeze nk’iyamaze kwegukana igikombe cya shampiyona, ariko muri rusange ntabwo umwaka wa yo w’imikino wagenze neza kuko mu bikombe yahataniye bigera muri 5 isigaye kuri kimwe gusa.
Iyi kipe yari yagarutse kuri gahunda yo gukinisha abanyamahanga, ku ikubitiro yatangiye itakaza igikombe cya ‘Super Cup’ itsinzwe na Rayon Sports 3-0, yasezerewe muri CAF Champions League itarenze umutaru, isezererwa muri Mapinduzi Cup ndetse inatsindwa na Police FC ku mukino wa nyuma wa Heroes Cup na Police FC.
Amakuru avuga ko iyi kipe ubwo umwaka w’imikino uzaba urangiye izakora impinduka aho izahera ku mutoza Thierry Froger n’umwungiriza we Khouda Karim bazaba basoje amasezerano, nta mahirwe bafite yo kongererwa amasezerano.
Imitoreze y’aba bagabo ntabwo ivigwaho rumwe, imikinishirize y’abakinnyi bafite nabyo bikaba biteza impaka aho hari n’abavuga ko bamwe mu bakinnyi urwego rwa bo rwamanutse.
Uretse abatoza n’abakinnyi bazarekurwa ari benshi bahereye ku banyamahanga bamwe na bamwe. Uri ku mwanya wa mbere ni umunya-Cameroun wasinye muri Mutarama 2024 akaba yarabuze umwanya wo gukina, Sanda Soulei akaba agomba kwerekwa umuryango.
Undi ni Umurundi Ndikumana Danny wayijemo mbere y’uko uyu mwaka w’imikino wa 2023-24 utangira. Uyu mukinnyi utarabonye umwanya wo gukina uhagije bivugwa ko APR FC izamutiza muri Marines FC akaba azajyana n’abandi bakinnyi b’abanyarwanda bagera muri 5.
Undi mukinnyi ushobora gusohoka muri APR FC ni umurundi ukina mu kibuga hagati, Nshimirimana Ismail Pitchou, amakuru avuga ko yifuza kuba yatandukana na APR FC ko afite andi makipe hanze y’u Rwanda amwifuza.
Umutoza wa Police FC, Mashami Vincent ari mu bihe bitoshye aho asezerewe na Gasogi United mu gikombe cy’Amahoro yahita yirukanwa muri iyi kipe y’Abashinzwe Umutekano mu gihugu.
Uyu mutoza ni umwe mu batangiye shampiyona ahabwa amahirwe yo kwegukana igikombe cya shampiyona ndetse anitwara neza mu gice kibanza cya shampiyona ariko mu mikino yo kwishyura biba bibi cyane aho yatsinzwe umusubirizo aho mu mikino 11 yatsinzwemo imikino 7 anganya 2 atsinda 2.
Mashami yakabaye yarirukanywe ariko kuko yari akiri mu gikombe cy’Amahoro, ntaho ubuyobozi bwari guhera cyane ko n’amakuru avuga ko amasezerano ye avuga ko agomba gutwara 1 mu bikombe bikinirwa mu Rwanda.
Police Fc iri muri 1/2 cy’igikombe cy’Amahoro, amakuru avuga ko mbere y’uko iyi kipe ijya mu mwiherero witegura uyu mukino Gasogi United, ubuyobozi bwabwiye umutoza Mashami ko naramuka asezerewe na Gasogi United ko na we nashaka azahita asezera kuko bizagorana ko yatoza imikino ya shampiyona isigaye.
Byatangiye kuba bibi kuri uyu mutoza watoje ikipe y’igihugu Amavubi aho umukino ubanza yaraye atsinzwe 1-0 na Gasogi United, akaba asabwa gutsinda umukino wo kwishyura akagera ku mukino wa nyuma ndetse akanagitwara.
Masami Vincent yagizwe umutoza wa Police FC muri Nyakanga 2022, imikino ibanza ya shampiyona ya 2023-24 yayisoje ari ku mwanya wa 2 arushwa na APR FC amanota 2, ubu iyi kipe iri ku mwanya wa 5 n’amanota 39, APR FC ya mbere irayirusha amanota 21.
Masami Vincent yicariye ishyiga rishyushye muri Police FC
Uyu mugabo wapfuye ku myaka 82 y'amavuko, yamenyekanye cyane mu bucuruzi bw'itabi n'imitungo itimukanwa.
Yaherukaga mu Rwanda mu mwaka wa 2010, ubwo yaruvugamo nyuma bimenyekana ko yahungiye muri Afurika y'Epfo, igihugu yari asanzwe akoreramo ubucuruzi. Ni nyuma y'uko bitahuwe ko yanyerezaga imisoro ndetse agakorana n'abashaka guhungabanya umutekano w'u Rwanda, abatera inkunga.
Rujugiro wavukiye mu Rwanda ahagana mu 1941 yabaye mu Burundi igihe kinini nk'impunzi, ari naho yatangiriye ubucuruzi bw'itabi.
Akarere ka Kamonyi, Umurenge wa Rugalika, Akagari ka Sheri kuri uyu wa 16 Mata 2024 katangije ku mugaragaro Ubukangurambaga bw'umwaka wa Mituweli(ubwisungane mu kwivuza)2024-2025. Umwaka ushize wa 2023-2024 ibihembo bya mbere byegukanywe n'Umurenge wa Kayenzi mu gihe Akagari ka mbere ari aka Mukinga( bibaye imyaka 3 ntawe ugahiga) ko mu Murenge wa Nyamiyaga. Bahembwe Igikombe cy'Ubudashyikirwa n'icyemezo( Certificat) cy'Ubudashyikirwa. Ibanga ryo gutsinda babwiwe ko riri kwa'Mutwarasibo'.
Gutangira ibihembo mu Murenge wabaye uwanyuma mu kwishyura Ubwisungane mu kwivuza-Mituweri, byasobanuwe ko ari mu rwego rwo gutera ishyari ryiza abatsinzwe ariko kandi no kubavungurira ku ibanga abandi bakoresheje kugira ngo bibatere umwete. Umurenge n'Akagari byatsinze ni iby'igice cy'icyaro mu gihe Rugalika ya nyuma ari umwe mu mirenge itatu igize umugi w'Akarere ka Kamonyi.
Meya Dr Nahayo Sylvere, ni we washyikirije Umukozi w'Umurenge wa Kayenzi ibihembo by'Ubudashyikirwa nk'Umurenge wahize indi muri Mituweli.
Dr Nahayo Sylvere, Umuyobozi w'Akarere ka Kamonyi watangije ubu bukangurambaga yabwiye Abanyarugalika babaye abanyuma ko igikombe kibanyuze imbere kikagenda bareba gikwiye kubabera isomo ryo gukorana imbaraga no gushyira hamwe bakiha intego yo kuva ku mwanya wa nyuma, ko kandi babishatse nta cyabananira.
Yagarutse ku kamaro k'Ubwisungane mu kwivuza, abibutsa ko nubwo kuba uwa mbere ukabona amashimwe ari byiza, ariko ko bakwiye kumenya ko Ubwisungane mu kwivuza bufasha Kwivuza bitagoranye, ko uwarwara nta bwisungane byagorana cyane bigasaba ko abaturanyi n'inshuti biyegeranya bagashaka ubushobozi ku muntu wagakwiye kuba yarabyikemuriye bitagombye ko ajya kubera abandi Umuzigo.
Dr Nahayo Sylvere, ashyikiriza SEDO w'Akagari ka Mukinga ko mu Murenge wa Nyamiyaga ibihembo by'Ubudashyikirwa. Kamaze imyaka itatu kaza ku isonga mu tugari 59 tugize Kamonyi.
Ahereye ku ibanga ry'Akagari ka Mukinga kabaye aka mbere imyaka itatu yikurikiranya, yabwiye Abanyarugalika ko Ubuyobozi n'Abaturage byoroshye guhera kwa Mutwarasibo akegera ingo ze nkeya afite bakabiganira, bakabigira ibyabo cyane ko ari Ubuzima bwabo bityo igikorwa bakagikura mu nzira nta n'umwe usigaye bakesa Umuhigo ku buryo n'umwe usigaye babona atishoboye bamuzamura ubwabo bakamufasha bityo bakaba bamufashije gusigasira amagara ye.
Anastase Dushiminana, SEDO w'Akagari ka Mukinga kamaze imyaka itatu kiharira umwanya wa mbere muri Mituweli, yavunguriye ku Banyarugalika ibanga ryo gutsinda. Ati'Icyambere twakoresheje ni uko Abaturage bacu baziko Mituweli ari Ishema ry'Umuryango. Ikindi, Mituweli twayubakiye ku Isibo. N'aha rero ni muyubakira mu Isibo Abayobozi bakabegera ndabizi ubutaha, wenda nti muzaba aba mbere ariko muzaba aba Kabiri nyuma ya Mukinga'.
Umukozi w'Umurenge wa Kayenzi, Emmanuel Ruganintwari yabwiye Abanyarugalika ko kuba Abanyakayenzi barafashe umwanya wa mbere bahigitse Umurenge wa Nyamiyaga byabasabye kwicara baraganira bashyira imbaraga hamwe kandi bumva ko byose bishoboka bafatanije n'Abaturage.
Avuga kandi ko igikorwa bagitangiye hakiri kare, batangirana ubushobozi bujyanye n'uko buri muturage abashije ariko biha intego y'igihe. Avuga kandi ko habaye ugushyira hamwe kugera kuri Mutwarasibo ndetse n'umuturage basangaga bakamuganiriza, bamwereka ko Mituweli ari ukwibungabungira ubuzima.
Umukozi w'Akarere ka Kamonyi ufite Mituweli mu nshingano ze aganiriza Abanyarugalika uko bakwiye gukemura bwangu ibijyanye na Mituweli.
Kabera Innocent, Umukozi w'Akarere ka Kamonyi ufite Mituweli mu nshingano ze yibukije Abanyarugalika ko ibanga ryambere mu gutangira ku gihe Mituweli riri no mu gutangira kwishyura hakiri kare, ko kandi utayafite yose rimwe yiha intego agashyiraho make make mu gihe yihaye. Yabashishikarije kandi kujya mu bimina kuko byagaragaye ko nabyo ari imwe mu nzira zifasha mu gukemura byihuse iki kibazo cya Mituweli. Yababwiye ko uwatangira ubu byageza mu kwezi kwa 7 yabisoje ndetse yemerewe kwivuriza kuri Mituweli nshyashya.
Umwaka wa Mituweli ushize wa 2023-2024, Umurenge wa Rugalika niwo waherutse iyindi uko ari 12 igize Akarere ka Kamonyi. Utugari twawo uko ari 5, Nyarubuye niyo ibanziriza akanyuma mu tugari 59, ikurikirwa na  Kigese ya 57, Bihembe iya 55, Sheli iya 53, mu gihe Masaka ari iya 50 aho ari nako Kagari rukumbi gafite amanota ari muri 80%.
SEDO wa Mukinga, Anastase acigatiye igikombe n'icyemezo by'ishimwe.Umukozi w'Umurenge wa Kayenzi amaze gushyikirizwa ibihembo.Abaturage.Nubwo babaye aba Nyuma, bacinye akadiho ariko bahigira kuza ku isonga muri Mituweli batangiye.
Ahishakiye yagaragaje ko hakiboneka imibiri hirya no hino mu gihugu y'abishwe muri Jenoside yakorewe Abatutsi nyuma y'imyaka 30 ihagaritswe ariko haracyari itaraboneka.
Ati 'Kuva Jenoside yakorewe Abatutsi yahagarikwa, hari imibiri yagaragaraga Leta yashyizemo imbaraga irashyingurwa ariko hari itarabonetse. Kuva icyo gihe yaba mu bihe byo kwibuka no mu bihe bisanzwe abantu bakomeje kugenda basaba abaturanyi babo gutanga amakuru y'ahari ababo ariko bigenda biguru ntege.'
'Kugeza uyu munsi hari imibiri myinshi itaraboneka, hari abantu benshi bakivuga ko batarabona imibiri y'abacu ngo tuyishyingure. Ni ikintu gikomeye kuko nko mu myaka itanu gusa ishize hamaze kuboneka imibiri y'abantu barenga ibihumbi 125.'
Yagaragaje ko ahazwi nka Gahoromani hakuwe imibiri y'abantu bagera mu bihumbi 90 n'ahandi mu tundi turere hagiye haboneka imibiri myinshi yari itarashyingurwa mu cyubahiro.
Ati 'Ibyo bigaragaza uburemere bw'ikibazo gihari ariko icyo dushima ni uko nubwo twatangiriye kure hari intambwe igenda iterwa. Imbaraga zashyizwe mu kwigisha abaturage ntabwo zapfuye ubusa kuko n'iyo yagiye iboneka hari amakuru yabaga yatanzwe n'abaturage cyangwa indi ikaboneka ahagiye gukorwa ibikorwaremezo.'
Yagaragaje ko abaturage bazakomeza kwigishwa no gusabwa gutanga amakuru ku bayafite mu rwego rwo kugaragaza ahakiri imibiri y'abazize Jenoside yakorewe Abatutsi batarashyingurwa mu cyubahiro.
Yagaragaje ko urwo rugamba rukwiye gukomeza ariko kandi amadini n'amatorero akarujyamo mu mikorere yayo ya buri munsi mu kwibukiranya ku bakirisitu babo impamvu zo kuba bagaragaza amakuru nk'ayo nk'abakirisitu.
Ahishakiye yavuze ko mu mibiri yagiye iboneka hatanzwe amakuru n'urubyiruko rwavutse nyuma ya Jenoside yakorewe Abatutsi bityo ko rukwiye gukomeza kwigishwa no kwegerwa.
Umuyobozi Ushinzwe gukumira ibyaha mu Rwego rw'Igihugu rw'Ubugenzacyaha RIB, Ntirenganya Jean Claude yagaragaje ko hamaze guterwa intambwe mu myumvire bituma bashobora gutanga amakuru y'ahari imibiri.
Bamwe mu barokotse Jenoside yakorewe Abatutsi bagaragaje ko kuba amakuru y'ahantu hari imibiri y'abazize Jenoside ahishwa bishimangira ko ari igikorwa abagikoze bashakaga.
Umuturage wo mu Murenge wa Matyazo mu Karere ka Huye, ahahaherutse kubonwa imibiri irenga ibihumbi bibiri, yagaragaje ko benshi bagihishira amakuru banga ko bakurikiranwa.
Yagaragaje ko benshi nubwo bavuga ko bireze ariko batabikoze mu buryo bwuzuye kuko usanga badatanga amakuru ajyanye n'ahashyizwe imibiri y'abo bishe muri Jenoside.
Umunyamabanga Nshingwabikorwa wa IBUKA, Ahishakiye Naphtal yagaragaje ko mu myaka itanu ishize habonetse imibiri irenga ibihumbi 125
Mu Karere ka Nyabihu hafatiwe imodoka yo mu bwoko bwa Fuso yari ipakiye amabalo 52 y'imyenda ya caguwa ya magendu, hafatwa n'umugabo w'imyaka 47 ari na we nyir'iyo modoka.
Mu Karere ka Gicumbi hafatiwe umugore w'imyaka 40, wari utwaye amabalo 8 y'imyenda ya caguwa mu modoka itwara abagenzi rusange yerekezaga mu Mujyi wa Kigali.
Umuvugizi wa Polisi mu Ntara y'Iburengerazuba, SP Bonaventure Twizere Karekezi yavuze ko gufatwa kw'iriya magendu, byaturutse ku makuru yagiye atangwa n'abaturage.
Yagize ati 'Mu ijoro ryo ku Cyumweru, nibwo Ishami rya Polisi rishinzwe kurwanya abanyereza imisoro ryahawe amakuru ko hari imodoka ipakiye amabalo y'imyenda ya caguwa ya magendu yavaga mu Karere ka Nyabihu yerekeza mu Mujyi wa Kigali, mu kuyihagarika nibwo abantu babiri bari bayirimo bakibona abapolisi bahise bayivamo bariruka baracika.'
Yakomeje agira ati 'Abapolisi begereye iyo modoka basanga ipakiye amabalo menshi y'imyenda ya magendu, irimo n'ibyangombwa bya nyirayo, niko guhita batangira kumushakisha ku bufatanye n'abaturage, aza gufatirwa mu murenge wa Kanzenze wo mu Karere ka Rubavu ari naho asanzwe atuye.'
Akimara gufatwa yiyemereye ko iyo modoka ari iye, cyakora ahakana ko atari we wari uyirimo, ahubwo ko ari mugenzi we yari yayitije atagaragarije imyirondoro.
Ni mu gihe kuri uwo munsi, mu Karere ka Gicumbi mu murenge wa Manyagiro, akagari ka Kabuga, mu modoka yari itwaye abagenzi mu buryo bwa rusange yerekezaga mu Mujyi wa Kigali, hafatiwemo umugore wari ufite amabaro 8 y'imyenda ya caguwa ya magendu, nk'uko bitangazwa n'umuvugizi wa Polisi mu Ntara y'Amajyaruguru, SP Jean Bosco Mwiseneza.
SP Karekezi yashimiye abaturage muri rusange badahwema kugaragaza imikoranire myiza mu kurwanya ibyaha no kwicungira umutekano batangira amakuru ku gihe kuko biri mu bituma hakumirwa ibyaha n'abacyekwaho guhungabanya umutekano bagafatwa bagakurikiranwa.
Yibukije abakomeje kwijandika mu bucuruzi bwa magendu kimwe n'ibindi byaha ko bakwiye kubicikaho bagakora ibyemewe n'amategeko kuko bazakomeza gufatwa bagahanwa.
Iki gitero cyabaye mu ijoro ry'itariki ya 13 ishyira iya 14 Mata 2024, Amerika, u Bwongereza n'u Bufaransa byafashije Israel guhangana na Iran yavugaga ko iri kwihorera ku gitero Israel yagabye kuri ambasade yayo muri Syria kigahitana abantu barindwi mu ntangiriro za Mata 2024.
Umuvugizi wa White House mu by'umutekano, John Kirby ubwo yari abajijwe n'abanyamakuru niba ubufasha bwo guhanura ibitero by'umwanzi Amerika yahaye Israel bushoboka no ku bitero by'u Burusiya kuri Ukraine, yavuze ko ibyo bidashoboka kuko izo ari ingamba ebyiri zitandakanye.
Yagize ati 'Nari niteze iki kibazo. Aya ni amakimbirane atandukanye, ni ibirere bibiri bitandukane ndetse n'imiterere y'icyo bapfa iratandukanye. Gusa Perezida Biden yabivuze neza intambara igitangira ko Amerika itazigera yivanga muri ariya makimbirane mu buryo bwo kurwana.'
Iki gisubizo Amerika yatanze gisa kandi n'icyatanzwe na Minisitiri w'Ububanyi n'amahanga w'u Bwongereza, David Cameron na we wavuze ko kuba NATO yakwivanga mu ntambara y'u Burusiya na Ukraine ishaka guhangana n'u Burusiya byaba ari akaga gakomeye, ahubwo ko Ukraine ikeneye system z'ubwirinzi bwo mu kirere.
Ikinyamakuru RT cyanditse ko Uburengerazuba bw'Isi bwiteguye gukomeza gutanga ubundi bufasha bwose kuri Ukraine kugeza igihe cyose intambara izamara ariko ko kwinjira mu ntambara byeruye barwanira Ukraine byo bidashoboka.
N'u Bufaransa bwari bwavuze ko kohereza ingabo muri Ukraine bishoboka bwaje nyuma kuvuga ko ubufasha bundi bushoboka buzahabwa Ukraine ariko ko izakomeza kurwanisha ingabo zayo gusa.
John Kirby yavuze ko Amerika itajya mu byo guhanura ibisasu by’u Burusiya muri Ukraine
Ni igikorwa cyahuriranye no kwibuka imbaga y'Abatutsi yiciwe urw'agashinyaguro muri Kiliziya Gatolika ya Nyange bigizwemo uruhare na Seromba Athanase wari Padiri mukuru kuri iyo kiliziya.
Abakuze batuye ku musozi wa Nyange bavuga ko Jenoside yatangiye kugeragezwa mu 1959, yongera kugeragezwa no mu 1973.
Kiliziya ya Nyange iherereye mu yahoze ari Komine Kivumvu, Superefegitura ya Birambo, Perefegitura ya Kibuye, yiciwemo Abatutsi barenga 2000.
Tariki 15 Mata 1994, Abatutsi bari bahungiye muri iyi kiliziya batangiye kwicwa hakoreshejwe amasasu, Interahamwe zibona ibyo bidahagije zigira igitekerezo cyo kuyisenya Abatutsi bagapfiramo.
Mu rwego rwo gusigasira ibimenyetso n'amateka ya Jenoside yakorewe Abatutsi, Leta y'u Rwanda yashyizeho gahunda yo guhuza inzibutso, ni muri urwo rwego imibiri yari mu rwibutso rwa Bukiro yimuriwe mu rwibutso rwa Nyange.
Igikorwa cyo kwibuka ku nshuro ya 30 Abatutsi barenga 2800 biciwe mu Kiliziya ya Nyange no mu nkengero zayo no gushyingura mu cyubahiro imibiri yimuwe mu rwibutso rwa Bukiro no mu mirenge ya Nyange na Ndaro cyitabiriwe n'abayobozi barimo abagize Inteko ishinga amategeko na Minisitiri w'Ibidukikije, Dr Mujawamariya Jeanne d'Arc.
