Author: webrwanda

Ni mu mukino wo kwishyura wabaye kuri uyu Wakabiri saa cyenda ubera kuri Kigali Pelé Stadium aho ikipe ya Gasogi United ariyo yari yakiriye. Umukino ubanza wari warangiye Gasogi United itsinze igitego 1-0.

Ikipe ya Police FC yaje muri uyu mukino nta kindi isabwa usibye gutsinda kugira ngo ishobore kubona itike yo kugera ku mukino wa nyuma. Yaje kubigeraho ibona igitego gitsinzwe na Mugisha Didier ku munota wa 66.

Umukino waje kurangira Gasogi United yananiwe kubona igitego cyo kwishyura maze biba ngombwa ko hitabazwa penariti kubera ko ubwo amakipe yombi yanganyaga igitego 1-1 haba mu mukino ubanza nuwo kwishyura.

Kuri penariti ikipe ya Police FC yaziterewe na Muhadjiri arayinjiza,Niyonsaba Eric arayitera ikubita igiti cy’izamu,Ismail Morro ayitera mu biganza by’umunyezamu,Rutonesha Hesbon arayinjiza, Rutanga Eric arayinjiza na Akuki Djibrin biba uko.

Gasogi United yo yaterewe na Eric Mbirizi ayishyira mu biganza by’umunyezamu Iradukunda Axel arayinjiza,Hamiss Hakim arayinjiza,Mudei Akbar ayitera mu biganza by’umunyezamu ,Rugangazi Prosper arayinjiza naho Kabanda Serger ayitera mu biganza by’umunyezamu.

Police FC yinjije penariti 4 naho Gasogi United yinjiza 3 iba ikatishije itike y’umukino wa nyuma w’igikombe cy’Amahoro aho izahura na Bugesera FC yo yasezereye Rayon Sports.

Abakinnyi 11 ba Police FC babanje mu kibuga 

Abakinnyi 11 ba Gasogi United babanje mu kibuga 

Umutoza w’Amavubi,Frank Spitter ari kumwe n’umwungiriza we Jimmy Mulisa bari baje kureba uyu mukino 

Mbere yuko umukino utangira hafashwe umunota umwe wo Kwibuka Jenoside yakorewe Abatutsi mu 1994

Mugisha Didier yishimira igitego yatsinze 

AMAFOTO:Ngabo Serge – InyaRwanda

INYARWANDA ifite kopi y’impapuro eshanu zigaragaza mu buryo burambuye uko iki kirego giteye. Ni nyuma y’uko mu mpera z’icyumweru gishize, Fatakumavuta yifashishije imbuga nkoranyambaga ze yagaragaje ko yatsinze Noopja nyuma y’umwaka yari amaze rugeretse mu nkiko aburana nawe.

Mu magambo ye yumvikanishije ko Noopja bari bahaganye atishimiye imikirize y’urubanza, ndetse ngo yatangiye guhamagara umukoresha we ‘Jado Kabanda’ ku Isibo FM, asaba ko Fatakumavuta yahabwa ‘gasopo’, ntazongere kumuvugaho ukundi.

Hari aho yanditse agira ati 'Noneho wa mugabo nyuma yo gutsindwa mu rukiko yahamagaye umuyobozi wa Radio Isibo amusaba kunyirukana. Inshuti za Noopja n’abambari be bose bari mu rugamba rwo guhirika Fatakumavuta ndabasuhuje.”

Kopi zifitwe na InyaRwanda zigaragaza ko ku wa 29 Gicurasi 2023, ari bwo Noopja yandikiye ubugenzacyaha atanga ikirego. 

Ubwo yakirwaga n’umugenzacyaha ‘Rubagumya Methode’, Noopja yavuze ko yareze Sengabo Jean Bosco wiyita Fatakumavuta nyuma y’uko abonye ikiganiro yakoze “agisakaza hirya no hino kuri internet no kuri za Twitter avuga ko njyewe Nduwimana Jean Paul nshinja Mugisha Fred Robinson bakunda kwita Element kwica Niyonkuru Jean Claude bitaga Kinyoni.”

Mu kirego cye, Noopja akomeza agira ati “Ibyo bintu akaba yarabivuze ambeshyeye agamije kumparabika no kunteranya n’abantu bakurikira ibikorwa byacu kubera ko abo abereye umuvugizi ari bo studio yitwa 1:55 AM [Ya Coach Gael] dukora ibintu bimwe, akaba yarabikoze ashaka kwerekana ko ibyo dukora ari bibi.”

Yavuze ko Fatakumavuta yatangaje iri nkuru agamije “gushakira ikigo akorera igikundiro atesha agaciro ibikorwa byacu”.- Yumvikanishije ko Fatakumavuta ari ‘umuvugizi wa1:5 AM’.

Noopja yasobanuye ko Element ari ‘umwana’ wakoraga muri studio ye, nyuma y’uko amukuye mu giturage amutoza ibyo akora, kandi ko igihe cyaje kugera iyo studio yitwa 1: 55 Am yifuza kumukura muri studio ye ngo ijye kumukoresha ‘iza no kubigeraho’. 

Uyu mugabo yakomeje avuga ko ubwo yari muri Autriche tariki 17 Ugushyingo 2022, ari bwo umuvandimwe we ‘Kinyoni’ yitabye Imana.

Noopja yavuze ko amakuru y’ibanze yamenye ni uko umuvandimwe we yafashwe aribwa mu nda kandi “ubwo burwayi bumara nk’amasaha atatu ahita yitaba Imana.”

Yasobanuye ko ‘Kinyoni’ yabanaga umunsi ku munsi na Element, Irakoze Jean Pierre, Abimana Etienne ndetse n’undi witwa Honore.

Noopja yasobanuye ko mu gihe bari mu bihe by’ikiriyo ni bwo Element yimukiye muri studio ya 1: 55 AM biza no gutuma abantu ‘batandukanye cyane cyane abakurikirana amakuru y’imyidagaduro na muzika bishyiramo (gutekereza ko) Element bamushinja ko ibyo yakoze byo kuva muri studio ya Country Records yamuzanye ikamurera atari akwiye kubikora tukiri mu kiriyo’.

Yavuze ko “Nyuma y’aho ni bwo Fatakumavuta yatangiye guhaguruka asa n’uharanira kugaragaza isura nziza ya 1: 55 nayo yashyirwaga mu majwi kuba yari inyuma yo kuva kwa Element muri studio yacu.”

Umugenzacyaha yabajije Noopja niba hari ‘Link’ yakwerekana Fatakumavuta yatangarijeho ko Element ‘ariwe wishe Murumuna wawe’.

Mu gusubiza, Noopja yavuze ko kuri Twitter yo ku itariki ya 27 Mutarama 2023, ahagana saa 11: 42′, Fatakumavuta yanditsemo ko ‘Noopja ari gushinja Elleeh kwica Kinyoni’.

Yanavuze ko hari Link y’ikiganiro Fatakumavuta yakoze ku muyoboro wa Youtube 3D Tv Rwanda gifite umutwe ugira uti “FATAKUMAVUTA akoze ishyano, iby’uko Eleeh yaroze KINYONI agapfa ari gushinjwa na Noopja abivuye imuzi.”

Umugenzacyaha yabajije Noopja ihuriro riri hagati yo kuba Fatakumavuta yatangaje ibijyanye n’urupfu rwa Murumuna we no kumuteranya n’abantu bakurikira ibikorwa bye.

Mu gusubiza, Noopja yavuze ko ashingira ku kuba uruhande Fatakumavuta avugira [1:55 AM] ari ‘mucyeba wanjye mu byo dukora’. Yavuze ko iyo arebye ibikorwa bya Fatakumavuta agamije ‘gusenya no kwangisha abantu ibyo dukora’.

Ati “Njyewe iyo umvuze nabi uba ubangamiye ibikorwa byanjye. Kuko izina ryanjye n’ibikorwa byanjye birajyana. Ni muri urwo rwego kumvuga nabi uba unyangishije abankurikirana.”

Noopja yanavuze ko hari ikiganiro Fatakumavuta yatangajemo ko studio ya Country Records ntacyo yigeze imarira Element mu gihe yamaze akoramo. Nyamara, ngo Element yigeze kumvikana avuga ko ‘ntacyo yari kugeraho iyo adahura na Noopja’.

Mu kibazo cya Kane, Umugenzacyaha abaza Noopja ati “Kuba ukora ibintu bimwe na Studio yitwa 1: 55 Entertainment ubihuza ute n’amagambo Fatakumavuta yatangaje?

Noopja agasubiza agira ati “Mu biganiro bye aba apfobya ibiganiro byanjye agataka cyane ibya studio abereye umuvugizi ariyo 1:55 Entertainment.”

Yabajije icyo ashingiraho avuga ko Fatakumavuta ari umuvugizi wa Label ya Coach Gael, avuga ko nta gihamya afite ariko ‘biravugwa kandi bikagaragazwa n’ibiganiro bitandukanye akora’.

Ariko kandi yavuze ko ashingira ku kuba muri iki gihe Fatakumavuta asigaye avuga neza Bruce Melodie nyuma y’uko atangiye kuba umuvugizi wa 1:55 AM, ni mu gihe atarinjira muri iriya Label yamuvugaga nk’umuhanzi w’umunebwe, rimwe na rimwe akanyuzamo akamwigisha amasomo y’imibereho.

Abajijwe umuntu acyeka bafitanye ikibazo, Noopja yasubije ko ari Seromba ‘Karomba’ Gael ‘ushobora kuba adashimishwa n’ibikorwa studio yanjye igenda ikora’.

Muri iri bazwa, yabajijwe niba yarabashije kumenya icyishe Murumuna we ‘Kinyoni’, asubiza ko nta bimenyetso afite byavuye muri Laboratoire ariko ‘urupfu yapfuyemo rungaragariza ko yarozwe n’ubwo uwamuroze ntamuzi, kugeza ubu nta muntu nkeka’.

Mu kirego cye kandi, Noopja yavuze ko Fatakumavuta abinyujije kuri 3D TV Rwanda yakoze ikiganiro cyamwibasiye, amwita bihemu, aho agaragaza ko hari abantu barimo Motel y’i Rusizi ya Kamuzinzi Godfroid yambuye n’abandi bantu barimo abanyamakuru n’abo akodesha amazu. 

Yavuze kandi ko tariki 15 Mata 2023, Fatakumavuta yakoze ikiganiro yise ati “Fatakumavuta mu burakari bwishi ajugunye hanze amabara ya Muyoboke/Ibyo kwishyurwa na Coach Gael’.

Mu ibazwa rye, ku ngingo ya gatandatu, hari aho Noopja avuga ko Karomba Gael ‘Coach Gael’ ashobora kuba atishimira ibikorwa bye ‘bya Country Country’

Noopa yavuze ko muri kiriya kiganiro, Fatakumavuta yasebyaga studio ya Country Record, avuga ko ari akadomo, idafite ubushobozi bwo kwakira abantu batatu ‘arayiharabika ayangisha abakwifuza kuyigana bose’.

Noopja yavuze ko ibi bikorwa byose Fatakumavuta yakoze bimubangamiye kandi ‘byasubije Business yanjye inyuma biteza n’amakimbirane menshi, nkaba nifuza ko yakurikiranwa n’ubutabera’.

Muri Nyakanga 2023, Fatakumavuta yamenyeshejwe ko urubanza yarezwemo na Nduwimana Jean Paul ‘Noopja’ rwashyikirijwe Urukiko rw’Ibanze rwa Kicukiro, batangira kuburana tariki 5 Mutarama 2024.

Ku wa 20 Mata 2024, nyuma y’amezi asaga atatu, Umunyamategeko Fatikaramu Jean Pierre waburaniraga Fatakumavuta yamubwiye ko urubanza barutsinze.

Umwanzuro wa 21 w’urubanza uvuga ko urukiko “Rwemeje ko ikirego cyatanzwe n’ubushinjacyaha nta shingiro gifite.”

Umwanzuro wa 22 ukavuga ko “Rwemeje ko Sengabo Jean Bosco adahanwa n’icyaha cyo gutangaza amakuru y’ibihuha, agizwe umwere.”

Umwanzuro wa 23 wo uvuga ko “amagarama y’urubanza aherera mu isanduka ya Leta.”

Fatakumavuta yagaragaje ko yishimiye ‘ubutabera bw’u Rwanda buca imanza zitabera’, ariko kandi avuga ko hari amakuru afite y’uko Noopja yiteguye kujurira nubwo we ntacyo arabitangazaho mu itangazamakuru.

Ati “Ngo biteguye kujurira ngo byanze bikunze bagomba gushaka uko bamfungisha bazashyirwa ndi i Mageragere.”

Uyu mugabo yavuze ko Tom Close yifashishijwe nk’umuhuza muri iki kibazo ariko umuti ntiwabonetse. Ati “Tom Close yagerageje gushaka umuti w’iki kibazo mumumbwirire ko urubanza rw’inshuti ze rwarangiye.”    

Icyo itegeko rivuga

Ingingo ya 39 y'itegeko rihana icyaha cyo gukwirakwiza ibihuha, rivuga ko umuntu wese ukoresha mu buryo bwa mudasobwa asakaza ibihuha bigamije guteza rubanda ubwoba, bibangisha ubutegetsi buriho cyangwa biteza umwiryanye, yaba abizi cyangwa atabizi afatwa nk'uwakoze icyaha.

Iyo ubihamijwe n'urukiko, ahanishwa igifungo kiri hagati y'imyaka itatu n'itanu ndetse n'ihazabu y'amafaranga y'u Rwanda hagati ya miliyoni imwe (1, 000, 000Frw) na miliyoni eshatu (3, 000, 000Frw).

 

Ku wa 2 Kamena 2024, Nduwimana Jean Paul ‘Noopja’ yareze Fatakumavuta amushinja kumubeshyera ko ‘yavuze ko Element yagize uruhare mu rupfu rwa Kinyoni’

Noopja yavuze ko mu gihe bari mu kiriyo cy’umuvandimwe we, ni bwo studio 1:55 AM yageze ku mugambi wayo itwara Element

Noopja yavuze ko urupfu rwa Murumuna we ‘Kinyoni’ rumugaragariza ko yishwe n’uburozi n’ubwo bigoye kumenya uwamwishe
Noopja yavuze ko afata Fatakumavuta nk’umuvugizi wa 1:55 Am n’ubwo nta gihamya abifitiye

Munezero Adeline, umubyinnyi w'Itorero ry’Igihugu “Urukerereza” ndetse na Inganzo Ngari, yakomoje ku ngaruka n'imbogamizi urubyiruko rwavutse nyuma ya Jenoside yakorewe Abatutsi ruhura na zo, mu butumwa bukomeye yatanze mu gihe u Rwanda ruri mu minsi 100 yo kwibuka ku nshuro ya 30 Jenoside yakorewe Abatutsi mu 1994.

Mu kiganiro na inyaRwanda, yagize ati: 'Abavutse nyuma ya Jenoside yakorewe Abatutsi mu 1994, duhura n'imbogamizi nyinshi mu mibereho yacu. Dufite ubumenyi bucye ku miryango yacu, ku mateka yacu no ku mateka y’umuco wacu, kuko twatakaje benshi mu bari bagize imiryango yacu, abavandimwe, inshuti n'abaturanyi.'

Mu butumwa bwe, Munezero witabiriye irushanwa rya Miss Rwanda mu 2019, yakomeje avuga ko ibi byose bitera uru rubyiruko kutiyumvanamo, ihahamuka n'inkovu zo mu mitekerereze, nubwo mu by'ukuri batigeze bahura n'akarengane nk’ako abari bahari icyo gihe banyuzemo.

Ati: 'Nubwo tutigeze dukorerwa iryo hohoterwa mu buryo buziguye, turacyumva inkuru ndetse n'ubuhamya bw'ababyeyi bacu, abavandimwe n'igihugu, kandi uku guhura n'ihungabana bigira ingaruka ku marangamutima yacu.'

Yibukije urubyiruko ko abazabakomokaho nibakenera kumenya amateka ya ba sekuru na ba nyirakuru, uko barokotse n'uko abanyarwanda bongeye kwiyubakira igihugu, nta bandi bazabibaza kuko ni bo bazaba bafite nk’ababyeyi babo.

Ati: 'Tugomba kwigira ku mateka tugakwirakwiza amasomo y'amahoro n'ubwiyunge, agaciro k'uburezi no gushyigikira abanyarwanda, mu rwego rwo guca ukubiri n'ihohoterwa no guteza imbere imibereho myiza, kwihangana n'imbaraga zo gukira, nk'uko benshi muri twe bagaragaje ubushake n'imbaraga bidasanzwe byo kubaka umuryango nyarwanda no kwimakaza amahoro.'

Ni ingenzi cyane ku rubyiruko kwibuka no kuzirikana uruhare rwabo mu kubaka ejo hazaza h'ibisekuru bizaza kuko ari bo bazabigisha amateka yose yaranze igihugu.

Munezero yagize ati: 'Kwita ku nshingano zacu zo kurinda igihugu cyacu no kubaka ejo hazaza heza h’abana bacu n’abuzukuru bacu ni ngombwa, kandi amateka yacu yatweretse ko urubyiruko rufite imbaraga zo kugira icyo ruhindura.

Mu gihe dukomeza kujya mbere, ni inshingano zacu kumenya neza ko Jenoside itazongera kubaho ukundi. Nimuze twese dufatanye kubaka ejo hazaza heza h’abana bacu n'ah'igihugu cyacu.'

Munezero kandi, asanzwe ari ni n'umwanditsi w'ibitabo umaze kwagura imbibi. Kimwe mu bitabo bye kitwa 'Umwana Nyamwana,' kikaba gikubiyemo ubutumwa bushishikariza abana kwiga amateka y’igihugu cyabo cy’u Rwanda, abibutsa ko bitagenewe abantu bakuru gusa.

Mu mwaka ushize, Munezero Lisa Adeline ari muri ba rwiyemezamirimo bahawe ibihembo mpuzamahanga ku bwo guhugura no gutinyura urubyiruko mu bijyanye no kwikorera, bikaba byaratangiwe mu gihugu cy'u Bufaransa. 

Igihembo yahawe cyitwa 'Grand Prix Spécial de la formation professionnelle au Rwanda'. Yagihawe ku bwo guhugura urubyiruko ku bijyanye no kwikorera, akaba yaratangiye kubikora mu 2022, abinyujije  muri kompanyi ye yise ML Traders Ltd. 

Munezero Adeline yavuze ko urubyiruko rwavutse nyuma ya Jenoside na rwo ruhura n’ingaruka za yo

Munezero yasabye urubyiruko kwigira ku mateka kugira ngo bashobore kubaka igihugu cyiza kibereye abazabakomokaho     

Ese birakwiye ko ugaba cyangwa utera unkunga yatanga ibyo adafite kubera izindi nyungu rwihishwa ?

Ese ni iby’isi y’ubu, ni bya bandi uwagabiwe ahabwa Butamwa we akiyongereraho Ngenda ?

Mu gusesengura ibi, turagendera ku nkuru yasohotse umwaka ushize mu Ukuboza 2023, ubwo umuhanzi Yago Pon Dat usanzwe ari n’umunyamakuru wibanda ku biganiro akora kuri YouTube Channel ye izwi nka Yago TV Show, mu mpera z’umwaka ushize yashyize hanze album ye ya mbere yise 'Suwejo’.

Tumwe mu dushya twaranze iki gitaramo, harimo kuba uyu muhanzi Yago yarahawe ikibanza na Kompanyi isanzwe ibicuruza yitwa Marchall Real Estate, yamwemereye ubutaka bwo kubakaho mu Mujyi wa Kigali nyuma y’uko uwari uyihagarariye anyuzwe n’uburyo yitwaye ku rubyiniro.

Ariko ntibyateye kabiri kuko nyuma y’amezi agera kuri ane atarahabwa ibyo yasezeranyijwe, Uyu muhanzi akaba n’umunyamakuru Nyarwaya Innocent, yabajije abamwemereye ikibanza ubwo yakoraga igitaramo cya Suwejo Album Launch, cyabaye mu mwaka wa 2023, ababaza niba barakimwemereye bagamije kumwambura cyangwa kumushimisha gusa.

Mu butumwa Yago yanyujije ku mbuga nkoranyambaga, yagize ati 'Company yitwa Marchal Real Estate yatwemereye ikibanza mu Mujyi wa Kigali ubwo twari mu gitaramo cyo kumurika album (Suwejo)… Amaso ko yaheze mu kirere ni amahoro cyangwa ni ko mukora ?'

Uyu muhanzi wagaragaje ko asa nk’uwihebye ko atazabona uyu mutungo utimukanwa yemerewe n’iyi kompanyi, yasoje ubutumwa bwe agira ati 'Bimaze iki kwemera ikintu imbere y’imbaga ntugisohoze ?'

Ku ikubitiro umunyamakuru witwa CHITA wibanda ku biganiro akora kuri YouTube Channel ye izwi nka CHiTA MAGIC akaba n’umwe mu bakorana bya hafi na kompanyi ya Marchall Real Estate yahise asubiza YAGO ku rukuta rwa twitter ati “Bwana YAGO, mu gitaramo cyawe hagaragaye amakosa aho MC yavuze ko company itanze IKIBANZA ari KTN RWANDA”.

Muri uwo mwanya YAGO yagarutse asubiza Julius Chita ati :'Ndabona ari wowe muvugizi wa company…Ntunguwe cyane no kuba ibyo uvuze byose nta na kimwe narinzi ariko kuko wiyemeje kubeshya…Ngaho hangana n’abo ba Diaspora murimo gutuburira no kubiba utwabo njyewe ntegereje igihe muzatangira icyo kibanza !!! Murakoze !!'.

Nyuma yibyanditswe n’izo mpande zavuzwe haruguru, Marchal Ujeku nyiri kompanyi Marchall Real Estate yavuze ko adateze kujya mu mitsi na Yago, n’ubwo ibyo yavuze kuri sosiyete ye atari byo.

Ati 'Ntabwo twajya mu mitsi n’abadafite ibyo bahomba, tureba icyo sosiyete ihomba n’icyo yunguka. Nibaza ko kujya mu mategeko byari ngombwa ariko sinibaza ko twajya mu mitsi n’abantu badafite ibyo bahomba'

Impaka nyinshi zakurikiye ibyo biganiro byabaye ku mpande zombi, byatumye abantu benshi bibaza impamvu hajemo izina rya KTN RWANDA muri ibyo bibazo kandi itarigeze igaragara mu baterankunga b’icyo gitaramo.

Ibyo byatumye twegera ubuyobozi bwa KTN RWANDA budutangariza ko nta hantu na hamwe bahuriye n’ibyabaye mu gitaramo cy’uwo muhanzi. Batubwira ko mu bisanzwe iyo bateye inkunga bigira inzira bicamo kandi bigakorwa mu mucyo kandi ibyo biyemeje bakabisohoza nta macyemwa.

KTN Rwanda nk’ikigo kimaze kumenyerwa kuva mu 2012 mu guhuza abagurisha n’abaguzi by’umwihariko mu mitungo itimukanwa, bwafatiyeho umwanya bunaburira Abanyarwanda kwitondera amasosiyete cyangwa abantu biyitirira KTN RWANDA mu gushaka gutanga serivisi zisa n’izabo. Bavuga ko umukozi wese wa KTN RWANDA aba yambaye umwambaro w’akazi wanditseho KTN RWANDA kandi anitwaje ikarita y’akazi y’icyo kigo, babasaba kuzajya bitondera abo batekamitwe kandi bakihutira kubimenyesha inzego z’umutekano zibegereye, ko kandi ubu wababariza mu nyubako ya MIC ihererye i Nyarugenge cyangwa ukabahamagara kuri +250783001414/ +250789000422 cyangwa ugasura urubuga rwayo rwa www.ktnrwanda.com ugahabwa serivisi yose wakenera.

Iyi nkuru ije yiyongera mu zindi nkuru zimaze iminsi zicicikana kuri murandasi zivuga ku bwambuzi bushingiye ku mafaranga, ubutaka n’amamodoka abanyarwanda bari guhuriramo nabwo. Hakaba hibazwa ku buryo haboneka igisubizo kuri icyo kibazo cyugarije sosiyete nyarwanda .

UMVA BYINSHI KURI IKI KIBAZO HANO :

https://twitter.com/Akasamutwe250/status/1782472411926933929

Bugesera FC yageze ku mukino wa nyuma w’igikombe cy’Amahoro nyuma yo gusezerera Rayon Sports ku giteranyo cy’ibitego 2-0.

Umukino ubanza wari wabereye i Kigali, Bugesera FC yawutsinze igitego kimwe ku busa.

Rayon Sports yagiye mu Bugesera ibizi ko ari umukino wo gupfa no gukira ishaka gusezerera Bugesera FC.

Wari umukino utoroshye kuko na Bugesera FC yari imeze nk’Intare yakomeretse kuko yashakaga kwihorera ibyo yayikoreye mu mpera z’icyumweru gishize iyitsinda muri shampiyona bikayisunikira mu makipe ajya mu cyiciro cya kabiri.

Bugesera FC yaje gushimangira intsinzi ya yo ku munota wa 50 ubwo Stephen Bonney yatsindiraga Bugesera FC igitego cya mbere. Umukino warangiye ari 1-0 maze Bugesera FC ikomeza ku mukino wa nyuma ku giteranyo cy’ibitego 2-0.

Undi mukino wo kwishyura wa 1/2 w’igikombe cy’Amahoro, Police FC yatsinze 1-0 bwa Gasogi United biba 1-1 bahita bitabaza penaliti.

Police FC; Moro, Niyonsaba Eric bazihushije ni mu gihe Muhadjiri, Rutonesha Hesbone, Rutanga Eric na Akuki bazinjije

Gasogi United; Mbirizi Eric, Muderi Akbar na Kabanda Serge bazirase, Axel Iradukunda, Hamiss, Rugangazi Prosper barazinjiza

Mu kiganiro kuri Radio 10 kuri uyu wa 23 Mata 2024, Mupiganyi yavuze ko Leta y'u Rwanda yashyizeho uburyo bwo gusaba ibyangombwa byo kubaka no gusana inzu, ariko ko abaturage baba bashaka kunyura mu nzira z'ubusamo.

Ubusanzwe umujyi wa Kigali ni wo utanga uruhushya rwo kubaka. Mupiganyi yasobanuye ko aba baturage bajya mu batabifitiye ububasha nk'abayobozi b'imidugudu n'utugari, bakabaha ruswa.

Ati 'Umuturage aracyafite ya myumvire ya kera, yumva ko natanga amafaranga k'ushinzwe umutekano, ku mudugudu na Gitifu w'akagari, akumva ko byaba birangiye. Abo ngabo bakubaka mu kajagari, hagira utuzuza ibyo yasabwe n'izo nzego z'ibanze, bakaza bakamusenyera.'

Mupiganyi yatangaje ko uyu muryango wakira dosiye nyinshi z'abaturage basenyerwa inzu ziri mu kajagari, ariko mu gihe ukurikiranye, ugasanga harimo abakoze ibihabanye n'ibyo basabye.

Ati 'Nk'umuturage akaza, ukabona bamuhaye uburenganzira bwo kubaka ubwiherero, ariko aragiye akubiseho ka annexe k'igikoni, ukibanza impamvu yabikoze. Ariko yakubwira ati 'Ushinzwe umutekano yansabye ibihumbi 100' ariko igihamya kiri he? Nta gihamya gihari.'

Mu myubakire ni hagaragara ruswa nyinshi mu mujyi wa Kigali. Ni imyitwarire ibangamire iyubahirizwa ry'igishushanyo mbonera, ariko yafatiwe ingamba hamwe n'ibindi byaha bya ruswa. Mu Rwanda cyashyizwe mu byaha bidasaza.

Umuyobozi wungirije w'umujyi wa Kigali, Urujeni Martine, yatangaje ko mu rwego rwo kuziba ibyuho bya ruswa mu myubakire, hamaze gushyirwaho ikoranabuhanga rifasha abaturage gusaba serivisi ziyerekeyeho no gukurikirana aho dosiye zabo zigeze.

---

Kuva ku munsi w'ejo ni bwo hatangiye kuvugwa amakuru y'uko haba hari abakozi ba RCS batangiye imyigaragambyo yo kwiyicisha inzara bavuga ko 'bafungiye ubusa mu gihe kigera ku mezi atanu'.

Amakuru yavugaga ko abo bacungangereza bagera ku 135 batangiye uko kwiyicisha inzara ku wa 19 Mata 2024, aho bafungiwe mu Ishuri ry'amahugurwa rya RCS riherereye mu Karere ka Rwamagana.

Umuvugizi wa RCS, CSP Kubwimana Thérèse, yemereye IGIHE ko hari abakozi bayo bari gukurikiranwa bitewe n'amakosa bakoze mu kazi, agaragaza ko ari ibintu bisanzwe bibaho nk'imwe muri gahunda y'uru rwego yo gukebura abaguye mu makosa, igihe cyagenwe cyarangira bagasubizwa mu kazi.

CSP Kubwimana yavuze ko aba bacungagereza badafungiye mu Igororero rya Rwamagana nk'uko hari abagiye babitangaza batyo, ahubwo ko bari mu Ishuri ry'amahugurwa i Rwamagana.

Ati 'Ku ishuri ry'amahugurwa rero ni ho haba n'ishami rishinzwe imyitwarire. Aha RCS ihashyira abakoze amakosa ikabigisha byaba ngombwa bakanahanwa.'

'Ubu rero abahari bariyo mu buryo bwemewe n'amategeko atugenga cyane ko turi n'Urwego rwihariye. Kuba hari abantu bakoze amakosa bari gukurikiranwa sinumva ko ari ikintu cyagakwiriye guhuruza inzego.'

Ku bijyanye no kwiyicisha inzara kw'abo bakozi, uyu muvugizi yavuze ko 'ibyo nta bihari' ndetse ari amakuru adafite aho ashingiye na cyane ko ari gutangwa n'abatarebwa n'icyo kibazo.

Ati 'Nibaza impamvu abatanga amakuru ari abatari mu bari guhanwa ahubwo byakabaye kuri ba nyir'uguhanwa ubwabo. Niba mwabonye inkuru yanditswe hari aho bigaragazwa ko mu byo bari kubazwa birimo no kugirana ubucuti bwihariye n'abagororwa. Ubwabyo ni amakosa'

'Ni ibisanzwe mu kazi iyo hari ukoze ikosa arabihanirwa, kuba bari gukurikiranwa ntibivuze ko RCS iri guhonyora uburenganzira bwabo. Kugirana ubucuti bwihariye n'abagororwa nk'uko inkuru yavugaga, nk'ababashinzwe ntabwo bikwiriye kuko bibyara amakosa ndetse byakomeza bikaba byaba n'ibyaha.'

Umuvugizi wa RCS yavuze ko Abanyarwanda bagomba kumenya ko RCS ari urwego rwihariye, ifite ububasha bwo guhana mu buryo bwihariye ku buryo uwakoze amakosa ukurikiranyweho imyitwarire idahwitse yakosorwa.

CSP Kubwimana yavuze ko uko gukurikina abagaragayeho amakosa gutandukanye na bimwe bisanzwe byo gukurikiranwa n'inkiko, kuko 'n'ubwo aba ari aho ngaho aba akibarwa mu kazi anahembwa kuko aba akiri umukozi.'

Yemeza ko ari ibintu bisanzwe ndetse nta mategeko byishe 'kuba uwakoze amakosa yakurikiranwa kuko atari ubwa mbere bibaye.'

Yongeye kwibutsa ko iyo bibaye ngombwa ko uwo mukozi adasubizwa mu kazi ku bw'amakosa yafashe indi ntera ajyanwa mu nkiko, gusa yongeraho ati 'mu by'ukuri twebwe icyo tuba tugamije ni uko umuntu yitekerezaho, agahindura imyitwarire.'

---

Ibiro by'Umukuru w'Igihugu, Village Urugwiro, byavuze ko aba bayobozi bombi bagarutse ku mubano w'ibihugu byombi, baganira ku musaruro ukomoka mu bufatanye busanzweho hagati y'u Rwanda n'u Bufaransa, ndetse n'uburyo bwo kurushaho guteza imbere ubu bufatanye.

Abakuru b'ibihugu byombi kandi baganiriye byimbitse ku bibazo biri mu Karere ka Afurika y'Uburasirazuba, birimo n'ibyo mu Burasirazuba bwa Congo aho ingabo za Leta, ibihugu bizishyigikiye n'imitwe yitwaje intwaro yiyise 'Wazalendo' bamaze igihe barwana n'umutwe wa M23.

Perezida Kagame na mugenzi we bongeye gushimangira ko inzira y'ibiganiro bya politiki ari yo yonyine ishobora gushyira iherezo ku bibazo by'umutekano muke n'intambara bimaze imyaka myinshi mu Burasirazuba bwa Congo.

Kugeza ubu hari inzira ebyiri zigamije gukemura ikibazo cy'Uburasirazuba bwa Congo binyuze mu biganiro, birimo ibiganiro bya Luanda n'ibya Nairobi, byose bifite intego yo gufasha Congo kwishakamo ibisubizo ku bibazo by'umutekano ifite.

Ni ibiganiro byagiye bizitirwa cyane n'uruhande rwa Leta ya Congo, rwakunze gutesha agaciro ibibazo by'abaturage bavuga Ikinyarwanda by'umwihariko Abatutsi bahohoterwa.

Congo yagiye yumvikana kenshi ivuga ko itazaganira na M23, bituma uwo mutwe urushaho gukaza imirwano wigarurira uduce twinshi twa Kivu y'Amajyaruguru.

---

Uko umukino uri kugenda umunota ku munota:

Igice cya mbere kirangiye amakipe yombi anganya 0-0

Igice cya mbere cyongeweho umunota umwe

44′ Rutahizamu wa Bugesera FC,Ani Elijah arase igitego kidahushwa ku mupira yarahawe na Ruhinda Farouk gusa agiye kurekura ishoti arawamurura

42′ Rayon Sports ibonye kufura nziza ku ikosa Nshimiyimana David akoreye  Tuyisenge Arsene maze iterwa na Muhire Kevin gusa ntiyagira icyo ibyara

37′ Kaneza Augustin azamuye umupira mwiza washoboraga guteza ibibazo Rayon Sports ashaka Olivier gusa Ganijuru Elie aratabara awushyira muri koroneri itagize icyo ibyara

35′ Rayon Sports iri gusatira ngo irebe ko yabona igitego,uwitwa Muhire Kevin azamukanye umupira acenga akandagira mu rubuga rw’amahina awushyira  kwa Charles Bbale gusa birangira awusubije inyuma

30′ Bugesera FC irase uburyo buremereye bwashoboraga kuvamo igitego ku mupira mwiza Ani Elijah yarazamukanye awushyira kwa Ruhinda Farouk maze arekura ishoti gusa riragenda rinyura hepfo y’izamu

25′ Rayon Sports yaribonye igitego habura gato ku mupira Muhire Kevin yashyize umupira ku mutwe gusa umunyezamu wa Bugesera FC aratabara awukuramo

22′ Ngendahimana Eric  hasi nyuma yo kugongwa na Ani Elijah

17′ Rutahizamu wa Bugesera FC,Ani Elijah arimo arakorerwaho amakosa cyane,nubu ari koreweho na Nsabimana Aimable umusifuzi atanga kufura gusa ntiyagira icyo ibyara

12′ Bugesera FC ibonye kufura ku ikosa ryari rikorewe Ani Elijah aba ari nawe uyitera ayinyuza munsi y’urukuta gusa Khadime Ndiaye ayikuramo nta nkomyi

10′ Abakinnyi ba Rayon Sports bari kugerageza gukina imipira miremire bashaka rutahizamu wabo,Charles Bbale gusa ba myugariro ba Bugesera FC bahagaze neza bari kuyikuraho itaramugeraho

7′ Nsabimana Aimable ahaye umupira Charles Bbale gusa arawutindana bituma umunyezamu wa Bugesera FC,Niyongira Patience amugeraho awutera nabi arawurenza

5′ Umukino uri gukinirwa mu kibuga hagati gusa abakinnyi ba Bugesera FC urabona bakina nta kibazo bafite bitewe nuko baziko bafite igitego 1 batsinze mu mukino ubanza

2′ Charles Bbale abonye umupira muremure ari mu rubuga rw’amahina gusa umunyezamu wa Bugesera FC awumukuraho nta cyo awubyaje

1′ Umukino utangiye Rayon Sports ishaka gutungurana gusa abakinnyi ba Bugesera FC bahagarara neza

Abakinnyi 11 ba Rayon Sports babanje mu kibuga:

Khadime Ndiaye

Nsabimana Aimable

Mugisha Francois 

Kanamugire Roger

Ishimwe Ganijuru Elie 

Muhire Kevin

Serumogo Ali

Ngendagimana Eric 

Bbaale Charles

Iraguha Hadji

Tuyisenge Arsene

Abakinnyi 11 ba Bugesera FC babanje mu kibuga:

Niyongira Patience

Ani Elijah 

Stephen Bonney

Ntakirutimana Theotime

Niyomukiza Faustin

Kaneza Augustin

Nshimirimama David

Ssentongo Farouk

Dukundane Pacifique

Tuyihimbaze Gilbert

Dushimimana Olivier

Umukino ubanza wakinwe kuwa Gatatu taliki 17 Mata 2024 ukaba warabereye kuri Kigali Pelé Stadium warangiye Bugesera FC itsinze igitego 1-0 cya Ssentongo Farouk ku munota wa 27.

Imibare yerekana ko iyi ari inshuro ya 5 aya makipe yombi agiye guhura muri iyi mikino y’igikombe cy’, Amahoro. 

Umukino wa mbere wabahuje mu gikombe cy’Amahoro wabaye tariki ya 27/03/2013 hakaba hari muri 1/8 . Waje kurangira Bugesera FC yatozwaga na Banamwana Camarade isezereye Rayon Sports yatozwaga na Didier Gomes Da Rosa iyitsinze ibitego 2-1 umukino wabereye kuri Stade Amahoro I Remera.

Iki gihe byateje impaka dore ko Bugesera FC yavuzweho gukoresha amarozi kugira ngo ibashe gutsinda kubera abafana ba Rayon Sports basanze inkoko y’isake mu mudoka y’iyi kipe.

Umukino wa Kabiri wabaye tariki ya 26/04/2022 ubwo hari muri 1/4 uza kurangira Rayon Sports itsinze Bugesera FC Igitego kimwe ku busa, kikaba ari igitego cyatsinzwe na Musa Esenu.

Umukino wo kwishyura ari nawo wa gatatu wabaye Tariki ya 03/05/2022 kuri sitade y’akarere ka Bugesera, ukaba wararangiye Rayon Sports itsinze ku bitego 2-0 bya Musa Esenu na Willy Essomba Leandre Onana.

Bugesera FC yageze muri 1/2 cy’igikombe cy’Amahoro isezereye Mukura VS muri 1/4 mu gihe Rayon Sports yo yari yasezereye Vision FC.