Author: webrwanda

Ni igikorwa cyabereye ku Rwibutso rwa Jenoside ruri mu Bitaro bya Caraes Ndera kuri uyu wa 26 Mata 2024, cyitabirwa n'abayobozi ndetse na bamwe mu Banyamuryango ba Love In Action Rwanda, n'abayobozi bo mu nzego z'ibanze mu Murenge wa Ndera.

Umuyobozi Wungirije wa Ibuka mu Murenge wa Ndera, Telesphore Murenzi yasobanuriye uru rubyiruko amateka ya Jenoside yakorewe Abatutsi by'umwihariko abiciwe mu Bitaro bya Caraes Ndera, akomoza ku kuntu Ingabo za Loni zari zishinzwe kubungabunga amahoro mu Rwanda (MINUAR) zatereranye Abatutsi.

Ati ''Abatutsi bahahungiye bazi ko bari bubone ubufasha, hari ibitaro by'abihaye Imana bizwi ko aho hantu abantu bahageraga bahabonaga amahoro, si ko byagendekeye abacu rero. Ikindi ni uko hari Ingabo z'Umuryango w'Abibumbye (MINUAR) zaje tugira ngo zije kuturinda ariko si ko byagenze, ahubwo bari baje kurinda abazungu babo. Rero Abatutsi bahahungira ari benshi, bamaze kuba benshi MINUAR ifata ba bazungu bayo isiga Abatutsi irigendera.''

''Hanyuma igeze no mu nzira yibuka ko yahasize imbwa, ni ikintu kitubabaje cyane kubona barasimbuje abacu imbwa, baraza bapakira imbwa zabo bapakira indege basiga Abatutsi bicwa, ni ibintu biteye agahinda mu by'ukuri.''

Mugabo Patricie w'imyaka 21 y'amavuko akaba Umunyamuryango wa Love In Action Rwanda, yavuze ko kimwe mu byatumye agira amatsiko menshi ku kumenya amateka ya Jenoside yakorewe Abatutsi, ari uko se umubyara ari umwe mu ngabo zayihagaritse, akaba yarakuze abona ibikomere ku mubiri we akagira amatsiko yo kumenya ibyabaye ku mubyeyi we.

Ati ''Nagiye menya imiryango idahari, ngira amahirwe yo kuvuka ku mubyeyi warwanye urugamba rwo kubohora igihugu mu 1994, noneho numva nshatse kubimenya, kuko na we hari ibyo namubonagaho mu buryo bw'umubiri bigaragara ko hari igihe cy'ubuzima yaciyemo kitoroshye. Hanyuma ndamubaza aransobanurira ibyabaye, numva amfunguye ku gushishishikarira kumenya ibindi.''

''Iyo ugenda ukura ukabona ibyabaye mu Rwanda amateka byasize, ukabona abapfakaye, ukabona imfubyi, ukabona abakibana n'ibibazo byaturutse kuri Jenoside yakorewe Abatutsi, uraguka mu mutwe. […] Twese turi Abanyarwanda kandi icyo duharanira ni kimwe, ni iki gihugu turimo, cyatureze cyadukujije, ni cyo tuzi. Nta bindi twebwe tuzi, dukomere ku byo tuzi.''

Umuyobozi w'Umuryango Love In Action Rwanda, Bayito Egide, yavuze ko bateguye iki gikorwa cyo gusura Urwibutso rwa Jenoside ruri muri Caraes Ndera kugira ngo banasobanukirwe amateka dore ko abagize uyu muryango benshi bavutse nyuma ya Jenoside yakorewe Abatutsi.

Yavuze ko bafite umukoro wo kwiga amateka yayo bakazagira uruhare mu kubaka u Rwanda rutarangwa ingengabitekerezo nk'iyaranze urubyiruko rwakoze Jenoside.

Uru rubyiruko rwasobanuriwe amateka y’uko Abatutsi biciwe mu Bitaro bya Caraes Ndera, bakajugunywa mu cyobo kiri muri ibi bitaro gifite metero zisaga 30

Uru rubyiruko rwakanguriwe kwiga amateka y’u Rwanda bakabona ibyo basubiza abakoresha imbuga nkoranyambaga bapfobya Jenoside yakorewe Abatutsi

Umuyobozi Wungirije wa Ibuka mu Murenge wa Ndera, Telesphore Murenzi, yavuze ukuntu Ingabo za MINUAR zatereranye Abatutsi bakicirwa muri Caraes Ndera

Umuryango Love In Action Rwanda wibutse abazize Jenoside yakorewe Abatutsi

Mugabo Patricie yavuze ko yakuze abona ibikomere ku mubiri wa Se, ibyatumye akangukira kumenya amateka y’u Rwanda

Iki gikorwa cyitabiriwe na bamwe mu bo mu nzego z’ibanze mu Murenge wa Ndera

Aba bana babuze tariki ya 24 Mata ubwo bari bavuye ku ishuri, bakaba ari abo mu Kagari ka Ndatemwa mu Murenge wa Kiziguro.

Aba bana bose uko ari batatu bafite imyaka itatu aho umukuru afite imyaka itatu n'amezi atandatu.

Umuyobozi w'Akarere ka Gatsibo, Gasana Richard, yemeje ko koko bakiriye ibirego ko aba bana babuze tariki ya 24 Mata, ubwo bari bavuye ku ishuri, mu gihe undi umwe yaburiwe irengero ari mu rugo.

Yakomeje agira ati 'Amakuru twamenye ni uko aba bana batatu bo mu midugudu yegeranye, babiri bavaga ku ishuri, amakuru dufite akigeragezwa kwegeranywa bavaga ku ishuri ntibagera mu rugo, bishoboke ko hari umuntu cyangwa itsinda ry'abantu ryabafashe rikagira aho ribajyana.'

Meya Gasana yavuze ko hari undi wabuze yakinaga na bagenzi be mu muharuro.

Ati 'Ababyeyi babo ejo bagejeje ayo makuru mu nzego z'ubuyobozi nka saa Sita natwe biza kutugeraho ku rwego rw'Akarere nka saa Cyenda ariko ntabwo abo bana turababona.'

Meya Gasana yavuze ko bakomeje guhuza amakuru mu nzego zose,kugira ngo abana baboneke vuba.

Uyu muyobozi yavuze ko mu gitondo cyo kuri uyu wa Gatanu baganirije abaturage bo muri iyo midugudu, aho ngo bakanguriye ababyeyi kugira amakenga, bagatanga amakuru hakiri kare ku kibazo cyose kiba cyabaye.

Ibiro by’Umurenge wa Kiziguro mu karere ka Gatsibo

Ishami ry'Umuryango w'Abibumbye ryita ku Buzima OMS, rigaragaza ko 94 by'abarwara Malaria ku Isi ari abo muri Afurika mu gihe hanabarizwa 94% by'abahitanwa na yo mu Isi.

Kuva tariki 21-27 Mata 2024 mu Rwanda hateraniye inama igamije gusuzuma aho urugendo rwo kurandura Malaria rugeze no kwigira hamwe ikoranabuhanga ryafasha mu kuyihashya.

Umuyobozi Mukuru wa Multilateral Initiative on Malaria, Prof Rose Leke yatangaje ko u Rwanda rwateye intambwe ikomeye mu kurwanya Malaria, rugabanya imibare y'abayirwara n'abo ihitana bitewe n'ingamba zitandukanye zirimo no gukoresha ikoranabuhanga.

Ati 'Twaje kuvugana na Minisitiri w'Intebe no kumusaba ko Guverinoma yadufasha kugeza ibyiza bakoze ku bindi bihugu, kugira ngo aho Malaria ikibereye umutwaro bashobore kwigira ku byo u Rwanda rukora kandi bizagabanya Malaria kuko ubu tugeze aho gutekereza kuyirandura.'

Yahamije ko ari ngombwa ko abaturage bagira uruhare muri uru rugamba rwo kurwanya Malaria.

Mu Rwanda abarwara malaria ku mwaka bavuye kuri miliyoni hafi eshanu mu 2017 bakagera ku bihumbi 627 mu 2023, bigaragaza igabanyuka rya 90%, mu gihe abo yahitanye ari 51 gusa.

Prof Leke ati 'Ingamba nziza u Rwanda rwafashe zikwiye gusangizwa ibindi bihugu bya Afurika bigashishikarizwa no kurushaho gukora uko byakoraga, bigashora amafaranga mu kurwanya indwara z'ibyorezo zitandukanye kandi u Rwanda rurabikora mu gihe ibindi bihugu bitabikora ahubwo bigatega amaboko abaterankunga gusa.'

Minisitiri w'Ubuzima Dr Sabin Nsanzimana, yatangaje ko u Rwanda rwiyemeje gutanga umusanzu warwo mu kurwanya Malaria imbere mu gihugu, muri Afurika no ku Isi muri rusange.

Yahamije ko igihugu cyakoze byinshi mu guhashya Malaria ariko hakiri indi ntambwe yo gutera kuko mu gihe umuntu ugabanyije imbaraga Malaria yakongera kwiyongera.

Ati 'Twari tugeze ku mibare myiza nubwo idahagije kuko urugamba ruracyakomeza kuko Malaria ni indwara urangara gato ikaba yakongera kuzamuka. Aho tugeze rero turashaka gukomeza, intego ni uko tuyirandura burundu ariko hari aho ugeza bikaba ngombwa ko ukorana n'abaturanyi kuko hari ibyo wakora ukageza ku mupaka imibu ishobora kuva hakurya ikarara ije ikongera igatangira ikindi kibazo.'

Icyorezo cya Malaria ubu kigaragara cyane mu bice by'Intara y'Amajyepfo y'igihugu cyane cyane mu mirenge ikora ku mupaka, ahanini bitewe n'ikibazo cy'imibu ituruka hakurya y'umupaka.

Dr Nsanzimana yagaragaje ko muri iyo mirenge hari gukoreshwa gahunda zikomatanyije mu kurwanya Malaria hakoreshejwe kurara mu nzitiramubu iteye umuti, gutera imiti hakoreshejwe drones zishobora gutahura ahantu imibu iri kororokera zikahatera imiti.

Inama ya Mpuzamahanga yo kurwanya Malaria imaze icyumweru ibera mu Rwanda yitabiriwe n'abantu 1700 barimo abashakashatsi kuri Malaria, abaganga n'abafatanyabikorwa mu kuyihashya baturutse mu bihugu 62 by'Isi.

Abayobozi bashinzwe kurwanya Malaria bashimye ingamba u Rwanda rwashyizeho mu kuyihashya

Prof Leke yashimye uburyo u Rwanda rwateguye inama ya MIM

Prof Leke yasabye ko u Rwanda rwakwigisha ibindi bihugu kurwanya Malaria

Minisitiri Dr Sabin Nsanzimana yavuze ko mu Majyepfo ari ho hari gushyirwa imbaraga mu kurwanya Malaria

Ni amavugurura ya Minisiteri y'Ubucuruzi n'Inganda (MINICOM) yashyizeho ku bufatanye na Irembo, ndetse izo mpinduka mu mitangire ya serivisi zikaba zizafasha abayikora, abateranya, n'abacukuzi gusaba gukurirwaho imisoro ku nyongeragaciro ku bikoresho fatizo, ibicuruzwa bisora n'imashini.

Kuba iyi serivisi yiyongereye kuzo Urubuga Irembo rutanga bijyanye na gahunda igamije gushyira kuri murandasi no koroshya inzira bicamo mu gusaba serivisi zitangwa n'ubuyobozi, ibizoroshya ibikorwa by'ubucuruzi ari na ko kandi byihutisha iterambere ry'ubukungu mu Rwanda.

Mu rwego rwo kubyaza umusaruro ubushobozi buhanitse bw'Urubuga IremboGov, abasaba bazagirira inyungu mu mikorere myiza yo gusaba serivisi kuri urwo rubuga, gukorera mu mucyo no gukoresha ikoranabuhanga mu gihe cyo gusaba gusonerwa umusoro ku nyongeragaciro.

Zimwe mu nyungu zijyanye no gusonerwa umusoro ku nyongeragaciro binyuze ku Irembo harimo gusora biciye kuri murandasi, aho usora yaba ari hose igihe cyose ,aciye ku rubuga www.irembo.gov.rw bizajya bimworohera.

Dosiye zisaba gusonerwa umusoro ku nyongeragaciro zitunganywa mu buryo bunoze, ibyihutisha itangwa ryayo bikagabanya ibihe byamaraga mu kubona iyi serivisi kandi bikagabanyiriza abacuruzi imitwaro byabashyiragaho batondaga imirongo mu nzego zitandukanye z'ubuyobozi bashaka izo serivisi.

Ubu buryo kandi buzarushaho gukorera mu mucyo no kubazwa inshingano, kuko abasaba babasha kwikurikiranira mu gihe nyacyo bakamenya aho dosiye bohereje zigeze.
Ibi biri mu gahunda ya MINICOM yo koroshya imitangirwe ya serivisi, ku buryo inyungu ziva mu gusonerwa umusoro ku nyongeragaciro zigera kuri benshi bakiteza imbere, kudaheza ndetse no gutanga uburenganzira bungana mu nganda n'uturere.

MINICOM ivuga ko guhuza serivisi so gusonerwa umusoro ku nyungu biciye ku Rubuga Irembo bishimangira umugambi wo gukoresha ikoranabuhanga mu guteza imbere ubucuruzi, kuba imbarutso y'ishoramari, no guteza imbere ubukungu burambye.

Ibi kandi biri gukorwa ku bufatanye n'iyi minisiteri kuko ifite inshingano zo gutegura no gushyira mu bikorwa politiki zigamije guteza imbere ubucuruzi, inganda, n'iterambere ry'inzego z'abikorera mu Rwanda.

Umuyobozi Mukuru wa Polisi y'u Rwanda CG Felix Namuhoranye yayoboye uyu muhango kuri uyu wa 26 Mata 2024 ari kumwe n'Umuyobozi Mukuru wa Polisi ya Repubulika ya Centrafrique Gen. Bienvenu Zokoue.

Aba bapolisi basoje amasomo y'amezi atandatu bize mu cyiciro cya 12. Bigiye mu Kigo cya Polisi cyigishirizwamo amasomo yo gukumira iterabwoba 'Counter Terrorism Training Centre' i Mayange mu Karere ka Bugesera.

Aya masomo ahabwa umubare w'abapolisi batoranyijwe, agamije kubongerera ubumenyi mu guhangana n'ibibazo no gukora mu bihe bigoye by'umutekano no kubasha kubyitwaramo neza.

Bagaragaje ubuhanga mu kugendera ku mugozi

Batozwa kurwana no kunyura mu bibazo bikomeye

Umuyobozi Mukuru wa Polisi ya Centrafrique Gen. Bienvenu Zokoue yari mu muhango wo gusoza amasomo y’abapolisi ba Special Force

Umuyobozi Mukuru wa Polisi y’u Rwanda CG Felix Namuhoranye

Uwahize abandi mu Banyarwanda na we yahembwe

Abayobozi batandukanye ba Polisi mu Rwanda no muri Centrafrique bakurikiye ibyo abapolisi bize

Abahize abandi mu bo muri Centrafrique bahembwe

Amafoto: RNP

Umwongereza w’imyaka 21 y’amavuko, Cole Palmer, ubu anganya na Erling Haaland wa Manchester City ibitego 20 muri shampiyona ya English Premier League.

Uburwayi bwe bwatumye adakina umukino wa Chelsea na Arsenal, aho Chelsea yakinnye ihuzagurika ikaza gutsindwa ibitego bitanu ku busa.

Nyamara nubwo Chelsea yatsinzwe ibitego bitanu ku busa Cole Palmer adahari, mu mukino wari wabaje Palmer yatsinze ibitego bine mu bitego bitandatu Chelsea yatsinze Everton.

Mu kiganiro n’itangazamakuru cyo kuri uyu wa Gatanu, umutoza wa Chelsea, Mauricio Pochettino yavuze ko Cole Palmer yamaze gukira, ndetse no mu myitozo akaba ari umukinnyi mwiza.

Yagize ati “Ni byo Cole Palmer yamaze gukira, kandi mu minsi ishize yitoje neza. Ndatekereza ko aza kugaragara ku mukino wa Aston Villa. Cole Palmer ni umukinnyi wamaze kutwemeza ko ari mwiza, kandi bimaze kugaragara ko iyo adahari umukino utugora cyane.”

Chelsea kugeza ubu ifite amanota 47 imaze gukina imikino 32. Mu mikino ibiri iheruka yaratsinzwe, kuko yatsinzwe na Man City igitego kimwe ku busa muri FA Cup, na Arsenal iyitsinda ibitego bitanu ku busa muri English Premier League. 

Cole Palmer usigaye ahetse Chelsea yamaze gukira uburwayi yari afite 

Cole Palmer na Erling Haaland wa Manchester City baranganya ibitego 20 muri shampiyona ya English Premier League 

“Sakwe Sakwe?” “Soma!” “Inka yanjye irisha ku muhanda ntawunyuraho atayishituye”, “Urutoryi.” Police FC na yo yabaye insina ngufi buri kipe yose ikuraho amanota uko yiboneye.

Impaka ni nyinshi hirya no hino mu bakunzi b’umupira w’amaguru mu Rwanda, bananiwe kwiyumvisha uburyo Police FC yasoje ku mwanya 2 mu mikino ibanza ya shampiyona ya 2023-24, aho mu mikino 15 yatsinzwemo 4 gusa ubu mu mikino 13 yo kwishyura ikaba imaze gutsinda imikino 2 gusa.

Ni ibintu bigoye gusobanura uburyo iyi kipe yahabwaga amahirwe ku gikombe cya shampiyona ubu iri ku mwanya wa 5 ishobora gutakaza mu gihe AS Kigali yatsinda umukino wa yo w’umunsi wa 28.

Hari ibyagiye bivugwa ku mbuga nkoranyambaga ko mu rwambariro rw’iyi kipe umwuka waba utameze neza hagati y’umutoza ndetse na bamwe mu bakinnyi bakuru, aho bagiye bashwana shwana.

Tutagiye mu byakera, reka dufate urugero rwa vuba, bivugwa ko kugira ngo myugariro w’umugande, Ndahiro Derrick afate umwanzuro wo kujya Uganda adasabye uruhushya, byatewe no gushanwa n’umutoza Mashami ngo wamusimbuje ku mukino wa Gorilla FC, aho yagaragazaga kugira ikibazo cy’imvune ariko we akavuga ko yumva ameze neza.

Gusa aho urujijo ruzira ni uko iyi kipe mu gikombe cy’Amahoro ho itsinda ndetse ikaba yarageze ku mukino wa nyuma, bivuze ko ibyo gushwana n’abakinnyi bishobora kuba atari byo.

Gusa kumvisha abantu ko Police FC ikina shampiyona igatsindwa n’umuhisi n’umugenzi ari yo ikina igikombe cy’Amahoro ikaba iri ku mukino wa nyuma, biragoye, wagira ngo ni amakipe 2 atandukanye.

Umutoza wungirije wa Police FC, Bisengimana Justin avuga ko impamvu Police FC imeze nk’ifite amakipe abiri, ikina igikombe cy’Amahoro na shampiyona, byatewe n’imvune ari na yo mpamvu yavuye kuri shampiyona vuba bahitamo gushyira imbaraga mu gikombe cy’Amahoro.

Ati “ntawutazi ibibazo twagiye duhura na byo, abakinnyi bacu bagiye bagira imvune, tumaze kubona ko shampiyona bigoye, twahisemo gushyira imbaraga ku gikombe cy’Amahoro ni yo mpamvu tugeze ku mukino wa nyuma.”

Police FC yagiye igira ibibazo by’imvune cyane cyane mu bakinnyi bakomeye nk’umunyezamu Rukundo Onesime, Bigirimana Abedi, Akuki Djibrine, rutahizamu Mugisha Didier, Peter Ogblevor utarakira n’uyu munsi.

Mu mikino 13 y’igice cya kabiri cya shampiyona “Phase retour”, yatsinzemo imikino 2, aganya 2 atsindwa imikino 9. Umukino wujuje imikino 9 ni uwo yatsinzwe na Bugesera FC uyu munsi 2-1.

Police FC intsinzi muri shampiyona yarabuze

Ni ibikubiye mu butumwa aherutse gutanga ubwo kimwe mu bigo byigenga mu Rwanda cyashyiraga ku isoko ry'umurimo abakozi bashya bacunga umutekano, akomoza ku kuba ibi bigo bikwiye gushyira imbaraga mu gutuma urwo rwego rukora kinyamwuga, bigizwemo uruhare no gufata neza abacunga umutekano.

Icyo gihe SP Bernard Gatete yasabye abasoje amahugurwa kuzitwara neza ubwo bazaba bageze mu mirimo, ariko anibutsa ikigo kibakoresha ko hamaze igihe havugwa imishahara mike kandi itangwa nabi mu bigo byigenga bicunga umutekano, avuga ko gucungisha umuntu umutekano ntumuhe iby'ibanze bidatanga umusaruro, kuko aba mu buzima bubi ntakore neza inshingano wamuhaye.

Ati ''Umusekirite utariye, umusekirite utahembwe, umusekirite utabonye amafaranga yo kugura 'cirage' ntabone amafaranga yo kugura 'colgate', aba ari umusekirite w'umurimbo. […] murabizi ko hamaze igihe havugwa ikibazo cy'imishahara itari myiza mu bigo byigenga bicunga umutekano, ndetse n'iyo mishahara ntibonekere ku gihe. Murasabwa rero kugira ngo ibyo bintu mubikosore.''

SP Gatete kandi yibukije ibigo byigenga bicunga umutekano mu Rwanda ko gukoresha akazi umuntu ntumuhembe nawe nta musaruro mwiza biguha, kuko uwo mukozi umubeshya ko umuhemba na we akakubeshya ko agukorera, ibishobora kugushyira mu gihombo cy'ibyo yakoreshwa n'inzara.

Ati ''Ibyo bintu uko ari bibiri, ikinyabupfura cyabo no gushyira imbaraga mu kuzamura imibereho myiza yabo, nibyo bizafasha gutuma uru rwego rutera imbere. Atari ibyo, baba bababeshya ko babakorera, namwe mukababeshya ko mubahemba. Mureke rero dufatanye, kugira ngo aka kazi k'umutekano gatangwa n'ibigo byanyu, karusheho kuba akazi ka kinyamwuga, kandi karusheho kuba akazi gatunga ugakora.''

SP Bernard Gatete yanahamagariye ibigo byigenga bicunga umutekano ko usibye guhembera abacunga umutekano no kutabambura, bikwiye kureba uko imibereho ihenze mu gihe cya none bakongera imishahara igenerwa abacunga umutekano, kugira ngo babashe kubaho mu buzima bujyanye n'igihe.

SP Gatete Bernard, yibukije ibigo byigenga bicunga umutekano bidahemba neza abo bikoresha, ko umukozi utariye aba ari uw'umurimbo

Turahirwa yabyutse yakamejeje, avuga ko igikapu cye bisa nk'aho kibanzweho n'imbwa zisaka ku Kibuga cy'Indege cya Kigali kiri i Kanombe.

Mu butumwa bw'amarenga yanyujije kuri X, yagize ati “Ngo imbwa igeze ku gikapu cyanjye iramoka iramokaaaaa baza kunkura ku ndege, ngereyo nsanga ikibuga cyose cyuzuye inzego z'umutekano.'

Yongeye kwandika kuri ubwo butumwa, asa nk'utabaza RwandAir, ati “Dear RwandAir ndabasabye icyo gikapu (bag) ntisigare, wallaih nisigara turisibaaaa…”

Nyuma y'igihe gito, RwandAir yasubije Turahirwa, imumenyesha ko igikapu cye nta kibazo gifite, iti “Dufite intego yo kugusubiza igikapu cyawe ukigera aho bitangirwa. Nutabona igikapu cyawe, ntutinye kubitumenyesha, Murakoze.”

Turahirwa nawe yasubije ubu butumwa agaragaza ko yanyuzwe n'uburyo RwandAir yakemuye ikibazo cye, ati “Muri aba mbere, igikapu cyangezeho.”

Abantu benshi, biganjemo abatebya, basubije ubutumwa bwa Turahirwa. Nka Mr Easy wagize ati 'Wagiye ubanza ukoga amazi ashyushye, igikapu cyawe ukacyogeshya essance kugeza imyotsi yose ishizemo!!! Kuko buriya hari impamvu, kwanza ubundi wavaga he ujya he!!!??'.

Uwiyise Yem na we yamusubije ati 'Buriya yumvisemo urumogi cg lubricants, cg pamper wabuze aho ujugunya?'

Shema Etienne na we yagize ati “Nta miyaga. Biba byavunnye umuntu gupakira imari.'

Turahirwa ari kuburana mu nkiko ku cyaha cyo gukoresha ibiyobyabwenge ashinjwa.

Dear @FlyRwandAir Ndabasabye iyo bag ntisigare, wallah nisigara turisibaaaa… https://t.co/0bcbr01bVp

— Moïse Turahirwa (@MosesTurahirwa) April 26, 2024

Turahirwa Moses ubaririzwa mu Muryango wa LGBTQ akomeje kurikoroza ku mbuga nkoranyambaga

Kuri uyu wa 26 Mata 2024, nibwo RIB yerekanye abasore babiri bavukana barimo ufite imyaka 29 na mukuru we bakekwaho kwiba ayo mafaranga.

Umuvugizi wa RIB Dr Murangira B. Thierry yagaragaje ko hibwe 9500$ nubwo atagarujwe yose.

Yakomeje agira ati 'Uwo wayibye yari umukozi wo mu rugo, aza gusanga umukoresha ahuze afata amafaranga mu isakoshi aho bakoreraga arirukanka. Yayatwaye ari amadorali 9500$ ajya kuyahisha kwa mukuru we.'

Nyuma yo kwibwa amafaranga nyirayo yahise yegera Urwego rw'Igihugu rw'Ubugenzacyaha ndetse abayibye barakurikiranwa barafatwa.

Dr Murangira yavuze ko kuri ubu abatawe muri yombi bakurikiranyweho ibyaha bitatu birimo kwiba, ubuhemu ndetse n'icyaha cyo guhisha ibintu bikomoka ku cyaha.

Itegeko riteganya ibyaha n'ibihano muri rusange riteganya ko uhamijwe n'urukiko guhisha ibintu bikomoka ku cyaha ahanishwa igihano kiri hagati y'umwaka umwe kugera kuri ibiri n'ihazabu iri hagati y'ibihumbi 300 Frw na 500 Frw.

Riteganya kandi ko icyaha cyo kwiba ugihamijwe n'urukiko ahanishwa igifungo kiri hagati y'umwaka umwe ariko kitarenze imyaka ibiri n'ihazabu ya miliyoni imwe ariko itarenze miliyoni ebyeri mu gihe icyaha cy'ubuhemu gihanishwa igifungo kiri hagati y'imyaka itu n'imyaka itanu ndetse n'ihazabu iri hagati y'ibihumbi 500 Frw kugera kuri 1 000 000 Frw.

RIB yagaragaje ko uwibye amafaranga akimara kuyafata hari ayo yakoresheje byatumye afatanwa amafaranga adahwanye n'ayo yari yibye.

Ubwo yari amaze kuyiba no kuyageza kuri mukuru we bamaze gusezerana ko bazayagabana biyemeje kuyahisha aho bayacukuriye munsi y'urugo, ahari igiti cy'umuvumu.

Nyuma yo kunoza umugambi, uwari umukozi wo mu rugo yongeye gusubira i Kigali ariko amaze kugenda mukuru we aza kwimura y'amafaranga aho bari barayatabye ayashyira mu nzu hafi y'umusarani ari naho RIB yayakuye.

Ubwo babazwaga mu bugenzacyaha, babanje kubihakana ariko bamaze kwerekwa ibimenyetso by'uko bayatwaye birangira mukuru we amwemeje ko bagomba kuyasubiza.

RIB yatanze ubutumwa busaba Abanyarwanda kwirinda ibyaha kuko hari ibishobora kwirindwa.

Ati 'Nubwo inzego z'umutekano zihari kandi zikora, nubwo inzego z'ubugenzacyaha n'inzego zishinzwe kurinda ibyaha zihari zifite ubushake n'ubushobozi bwo kubirwanya ariko hari ibyaha byakwirindwa. Mu byakirindwa harimo n'ibi byo kuba umuntu ashobora gutwara amafaranga. Turashishikariza abantu kwitabira gahunda ya Leta yo kutagendana amafaranga mu ntoki, bakayahererekanya bakoresheje uburyo bwashyizweho nka banki.'

Uwari wibwe ayo amafaranga yabwiye itangazamukuru ko Abanyarwanda bakwiye kwirinda kugendana ingano y'amafaranga menshi mu kwirinda ko byabakururira kwibwa cyangwa ibindi bibazo.

Yashimye RIB ko yamufashije kubona abari bamwibye, asaba n'abahura n'ibindi bibazo gutangira amakuru ku gihe.

Yibukije kandi ko abafite umutima wo gukora ibyaha bibwira ko batafatwa bibeshya, kuko byanze bikunze bazafatwa.

Dr Murangira kandi yibukije abacuruzi kwirinda no gushishoza mu mirimo y'abo kuko muri ibi bihe hari abantu benshi basigaye bakora uburiganya bitwaje ko basanzwe bakorana nabo bakaba bababeshya ko bishyuye ibintu runaka kandi batabikoze.

RIB yasabye abaturarwanda kwirinda ibyaha kuko ababyishoramo batazabura gufatwa n’inzego z’ubutabera

Abasore babiri bavukana bakekwaho kwiba ayo mafaranga batawe muri yombi