Webrwanda Backend

Author: webrwanda

  • Passy Kizito yifashishije Mbanda, Kade na Ele… – #rwanda #RwOT

    Passy yari amaze igihe ateguje abantu iyi ndirimbo, ni nyuma y'uko agiranye amasezerano na sosiyete ya 'Imigongo Labs' yo mu Mujyi wa London mu Bwongereza, izajya imufasha gusakaza ibikorwa bye by'umuziki mu bice bitandukanye by'Isi.

    Uyu muhanzi yabwiye InyaRwanda ko akora iyi ndirimbo yifuje kwifashisha aba bahanzi kubera ko yasabwaga 'amajwi y'abantu benshi baririmba mu nyikirizo turi kuririmba ijambo 'Golo'.

    Ati 'Ni abahanzi b'inshuti zanjye. Rero kubifashisha byaturutse ku kuba nari nkeneye abantu bamfasha mu kunoza neza iyi nyikirizo y'iyi ndirimbo.'

    Mu kwandika iyi ndirimbo, Passy yanifashishije Producer Element ndetse n'umuhanzi Diaz Dolla uri kugaragaza impano mu muziki muri iki gihe.

    Ati 'Diaz ni umuhanzi mushya, ukiri kuzamuka ariko ufite impano. Ni umwana abanyarwanda bagiye kuzamenya mu minsi iri imbere. Icyo twakoze njyewe nawe na Element twarahuje, dusangizanya ibitekerezo, hari amagambo arimo yagiye aduha, twumva ni meza turayakoresha.'

    Passy avuga ko Producer Element iyo akora indirimbo kenshi aba ari kumwe n'abantu benshi bumva, yagira uwo akenera akiyambazwa muri iyo ndirimbo.

    Ati 'Ni umwihariko we! Iyi ndirimbo yanjye ahubwo irimo abahanzi bacye, kuko hari izindi ndirimbo yifashishamo abantu barenga 10. Ni ibintu byiza, bibyara ikintu kinini, kubera ko iyo muhuje ibitekerezo mushyira hamwe. Buri muntu uzana icyiza cyimurimo.'

    Uyu muhanzi yashimye buri muhanzi wese wagize uruhare mu ikorwa ry'iyi ndirimbo ye, ndetse n'abagize uruhare bose mu ifatwa ry'amashusho ndetse n'ababyinnyi bagaragaramo.

    Yavuze ko ikorwa ry'amashusho y'iyi ndirimbo atari ikintu cyoroshye, kuko bisaba ubwitange, ndetse umuryango we (ababyeyi be na bashiki be) babigizemo uruhare.

    Yasobanuye ko atangira umuziki, umuryango we utabyumvaga neza kuko hari ibyo bamusabaga kubanza gukora.

    Ati 'Ndashimira n'umuryango wanjye, bashiki banjye, Papa wanjye na Mama wanjye bakomeje gushyigikira umuziki wanjye n'ubwo cyera bitari byoroshye ko bumva ibyo ndirimbo, ariko ubu basigaye babibona nk'akazi.'

    Akomeza ati 'Ibyo bansabye ku ruhande rwanjye njye narabyubahirije. Bashakaga ko ndangiza amashuri, ibyo narabyubahirije. Barabitinyaga mbere, ariko ubu basigaye babyumva, babihaye agaciro. Umuryango wanjye wose ndawushimira.'

     

    Passy Kizito yatangaje ko atangira umuziki byamusabye kumvira umuryango washakaga ko abanza kwiga

    Passy Kizito yavuze ko yifashishije Calvin Mbanda, Kevin Kade na Element mu nkikirizo y'iyi ndirimbo

    Passy yavuze ko Element afite umwihariko mu batunganya indirimbo

    KANDA HANO UREBE AMASHUSHO Y'INDIRIMBO 'GOLO' YA PASSY KIZITO

    “>

    Source : https://inyarwanda.com/inkuru/142382/passy-kizito-yifashishije-mbanda-kade-na-element-mu-ndirimbo-iherekejwe-nishimwe-ku-muryan-142382.html

  • Hagiye kuba iserukiramuco ryitiriwe Album ya… – #rwanda #RwOT

    Ku wa 17 Kanama 2022, ni bwo Yvan Buravan, umuhanzi wari umaze kuba icyamamare mu njyana ya R&B, yitabye Imana ku myaka 27 azize indwara.

    Kuri uyu wa Gatandatu tariki 27 Mata 2024, Buravan yari kuba yujuje imyaka 29. Yari umuhanzi w'impano zikomatinyije, watanze ibyishimo kuri benshi binyuze mu bitaramo yaririmbyemo, ibihangano byuzuye za Album yagiye ashyira hanze n'ibindi.

    Buravan yavukiye i Gikondo mu mujyi wa Kigali, yari bucura (umuhererezi) mu bana batandatu bava inda imwe nawe. Impano ya Buravan yamenyekanye ubwo yabaga uwa kabiri mu marushanwa ya muzika ku rwego rw'igihugu afite imyaka 14.

    Inshuti, abavandimwe, umuryango we n'abandi bifashishije imbuga nkoranyambaga bagaragaza icyuho n'urukumbuzi bafitiye uyu munyamuziki.

    Uncle Austin wabanye n'uyu muhanzi igihe kinini, yasohoye amafoto amugaragaza ari kumwe n'abarimo Nice Bundandi, Israel Mbonyi n'abandi, ubwo bari kumwe na Buravan yizihiza isabukuru.

    Mu butumwa bwo kuri Instagram yagize ati 'Isabukuru yo mu Ijuru murumuna wanjye. Nabuze inshuti n’umuvandimwe mu gihe wagiye nishimiye ko twahoraga dukata umutsima. Turagukunda man.'

    Ruti Joel, inshuti y'akadosohoka ya Buravan yanditse ubutumwa bugaragaza ishimwe afite kuri uyu muhanzi mu gihe bamaranye bakora umuziki. Yishimira ko Buravan ari mu ba mbere bumvise kandi bakabyina indirimbo ye 'Musomandera' yitiriye Album.

    Yavuze ati 'Isabutore nziza! Komeza utaramire ijabiro mwiza wanjye Yvan Buravan. Bintera ishema ko wabyinye 'Musomandera', inshuti yawe cyane.'

    Buravan yari afite inzozi zagutse birimo no kuzashyiraho ishuri ritoza abakiri bato kubyina Kinyarwanda. Binyuze mu muryango wamwitiriwe, iri shuri ryarafunguwe, ndetse muri Gicurasi 2024 baritegura gutangiza iserukiramuco ryitiriwe Album ye 'Twaje' iriho indirimbo zamamaye mu buryo bukomeye.

    Album ya Buravan iriho indirimbo 'Bwiza' yakoranye na Andy Bumuntu, 'Impore' yakoranye na Dj Marnaud na Ruti Joel, 'Twaje', 'Tiku Tiku', 'VIP' yakoranye na Ish Kevin feat Pro Zed, Gusaakara', 'Ye ayee', Ituro' , 'I Love you yoo' na 'Ni Yesu'.

    Umutoni Raissa, Mushiki wa Buravan yabwiye InyaRwanda ko iri serukiramuco bariteguye mu rwego rwo gushyira mu bikorwa inzozi za Buravan no kumuha icyubahiro.

    Ati 'Ni iserukiramuco twise 'Twaje Fest' rizaba rishingiye kuri Album ye ya 'Twaje' ariko turacyari kubitegura ku buryo mu minsi iri imbere tuzatangaza gahunda yose.'

    Akomeza agira ati 'Kuri uyu munsi we w'amavuko twari twifuje kubasangiza ko ari cyo gikorwa turi gutegura gukora.'

    Ubwo yari mu muhango wo gutaha ishuri ‘Twaje Cultural Academy’ ryitiriwe Buravan, Umutoni Raissa yavuze ko musaza we yari umuntu warangwaga n’urukundo rwinshi, ku buryo atari yarigeze abibona neza. Avuga ko yarangwaga n’umunezero, ku buryo nk’iyo umuryango wateranye, babona ko yasize icyuho cy’ibyishimo batakibona.  

    Mutoni yavuze ko basubije inyuma amaso basanga ntawigeze ahitiramo Buravan icyo azakora. Kuko ubwana bwe bwaranzwe no gukunda umuziki, kugeza ubwo yari afite imyaka 14 yitabiriye irushanwa ry’umuziki ryamuhesheje igihembo cya Miliyoni 1.5 Frw.

    Yavuze ko ubuzima bwa Buravan bumuha amasomo menshi. Kuko yisobanukiwe akiri muto. Ngo ubwo yari afite imyaka 14, yababwiye ko azakora umuziki mu buryo bw’umwuga, kandi ababwira ko adashaka kuwukora mu buryo bwo kwishimisha.

    Ubwo yari asoje amashuri yisumbuye ku myaka 18, Buravan yagiye mu itorero yiga kubyina, agejeje imyaka 20 atangaza ko yinjiye mu muziki mu buryo bweruye.

    Mutoni avuga ko Musaza we Mukuru we ariwe wafashije Buravan gutangira umuziki. Kandi ko ubwo yiteguraga kwinjira mu muziki yakoresheje ibirori byo gutangira urugendo rwe rw’umuziki.

    Buravan yari afite intego zo gukora umuziki, ariko kandi akubakira ku gukorana n’abandi kugeza umuziki w'u Rwanda ku rwego mpuzamahanga.

    Yavuze ko bitewe n’intego yari afite ‘ibintu bye byarihutaga’. Asobanura musaza we nk’umuntu ‘wabaniraga neza abandi ‘kugeza n’uyu munsi mukaba mukitubanira’. 

    Raissa anavuga ko ubwo musaza we yahatanaga muri Prix Découvertes RFI 2018, yavugaga ko azayegukana. Ati “Koko nk’uko yabivugaga arayitwara.”

     

    Hagiye kuba iserukiramuco ryitiriwe Album 'Twaje' ya Buravan

     

    Kuri iyi tariki, Yvan Buravan, umunyamuziki wakunze Igihugu yari kuba yujuje imyaka 29

    KANDA HANO WUMVE INDIRIMBO ZIGIZE ALBUM 'TWAJE' YA BURAVAN

    “>

    Source : https://inyarwanda.com/inkuru/142385/hagiye-kuba-iserukiramuco-ryitiriwe-album-ya-buravan-142385.html

  • Guverineri Kayitesi yanenze ubuyobozi bubi bwagejeje igihugu kuri Jenoside yakorewe Abatutsi – #rwanda #RwOT

    Ibi yabigarutseho ku wa 23 Mata 2024, ubwo hibukwaga ku nshuro ya 30 Jenoside yakorewe Abatutsi ku rwibutso rwa Jenoside rwa Kabuye, mu Murenge wa Ndora, Akarere ka Gisagara, byanahuriranye n'igikorwa cyo gushyingura mu cyubahiro imibiri 108 irimo iyimuwe n'indi yagiye iboneka.

    Guverineri Kayitesi yihanganishije ababuze ababo muri Jenoside yakorewe Abatutsi mu 1994, abasaba kwiyubakamo ubudaheranwa kuko ari byo bizagamburuza uwo ariwe wese wifuzaga ko bazima.

    Ati “Nimukomere, mukomeze kwihangana no kwiyubakamo ubudaheranwa kuko ari byo bizagamburuza uwo ariwe wese wifuzaga ko mwazima'.

    Yakomeje avuga ko abishwe muri Jenoside ari igihombo gikomeye igihugu cyagize, kandi ikibabaje bikaba byarakozwe n'ubuyobozi bubi bwayiteguye bukayishyira no mu bikorwa.

    Yagize ati' Aba bashyinguye muri uru rwibutso rwa Kabuye hamwe n'abandi bose, ni amaboko u Rwanda rwavukijwe n'abari bashinzwe kubarengera barimo uwari Perezida Sindikubwabo Theodore n'abandi bayobozi bafatanyije harimo abasirikare ba FAR, abajandarume n'Interahamwe n'abaturage kandi ntibyari bikwiye.''

    Yavuze ko kwibuka bitanga imbaraga zo kurwanya abapfobya bakanahakana Jenoside yakorewe Abatutsi, asaba buri wese ko igihe abonye ugaragara mu bikorwa bipfobya, akwiye gutanga amakuru kugira ngo uwo munyabyaha ahanwe n'amategeko.

    Abarokotse Jenoside yakorewe Abatutsi batuye mu Karere ka Gisagara nabo babwiye IGIHE ko n'ubwo amateka ya Jenoside yabakorewe asharira, ariko bataheranwe n'agahinda, bakaba bariyubatse mu mitima kandi ngo bakomeje urugendo rw'iterambere baharanira kudaheranwa n'ayo mateka.

    Umwe muri bo yagize ati 'Twaratesetse, ariko twakomeje gutwaza. Tuzi neza ko kwiteza imbere ari byo byonyine byahesha ishema abacu aho baruhukiye, ni yo mpamvu tudacika intege mu rugamba rwo kwiteza imbere, kandi turabibona ko n'ubuyobozi bwacu budushyigikiye.''

    Kuva ku itariki ya 20 Mata 1994, ni bwo Jenoside yakajije umurego mu cyahoze ari Perefegitura ya Butare na Gisagara yabarizwagamo. Ibi bikaba byarashobotse nyuma y'iyicwa ry'uwari Perefe wayo Habyarimana Jean Baptiste, ndetse n'ijambo ry'uwari Perezida wa Guverinoma yiyise iy'Abatabazi Dr Theodore Sindikubwabo.

    Amatariki y'ubwicanyi yibukwa cyane muri Gisagara ni iya 21 Mata, i Gishubi na Mugombwa, iya 22 Mata i Kibirizi, Kansi, Kigembe na Nyanza. Kuwa 23 Mata, ni i Kabuye muri Ndora, kuwa 24 Mata ni Mamba, mu gihe ubwicanyi bwakomeje i Save, Musha na Gikonko mu matariki ya 27 Mata 1994.

    Kugeza ubu, muri uru rwibutso rwa Kabuye hamaze gushyingurwa imibiri 47.214, irimo 108 yahashyinguwe ku wa 23 Mata 2024. Muri yo, harimo imibiri mishya 12 yabonetse mu Murenge wa Ndora; ndetse n'indi 96 yimuwe aho yari ishyinguye mu ngo izanwa mu rwibutso.

    Guverineri Kayitesi Alice, yavuze ko u Rwanda rwaburiye amaboko menshi muri Jenoside yakorewe Abatutsi yari kurwubaka rugatera imbere kurushaho.

    Gen (Rtd) Ibingira na we yifatanyije n’Abanya-Gisagara kwibuka Jenoside yakorewe Abatutsi i Kabuye

    Abayobozi batandukanye bari bitabiriye iki gikorwa cyo kwibuka i Kabuye mu Murenge wa Ndora

    Hanashyiguwe mu cyubahiro imibiri 108 irimo iyabonetse n’indi yimuriwe muri uru rwibutso

    Senateri Umuhire Adrie ubwo yashyiraga indabo ku mva ziruhukiyemo Abatutsi bishwe muri Jenoside

    Source : http://igihe.com/amakuru/u-rwanda/article/guverineri-kayitesi-yanenze-ubuyoboazi-bubi-bwagejeje-igihugu-kuri-jenoside

  • U Bwongereza bushobora kohereza inararibonye zizafasha u Rwanda mu kwakira abimukira – #rwanda #RwOT

    Nta gihindutse, byitezwe ko nibura abimukira ba mbere bazoherezwa mu Rwanda muri Nyakanga cyangwa Kanama, byatinda cyane bakahagera muri Nzeri.

    U Bwongereza bwamaze gutangaza ko nibura abantu 300 ba mbere bashobora guhita boherezwa mu Rwanda bamaze kuboneka, ikibura gusa kikaba ari uko iyi gahunda yatangira ubundi bagahita baza mu Rwanda aho bazakomeza gukurikiranira iby'ubusabe bw'ibyangombwa byabo.

    Uruhande rw'u Rwanda narwo rugeze kure iyi myiteguro ndetse iby'ibanze, birimo nk'aho bazacumbika, ibyo bazarya n'uko bazavuzwa, byose byamaze gutegurwa.

    Icyakora mu kurushaho gufasha u Rwanda rwitegura neza iby'iyi gahunda, u Bwongereza buri kwitegura kohereza abakozi b'inararibonye mu Rwanda, kugira ngo bazakomeze kurufasha muri iyi gahunda, cyane cyane mu minsi ya mbere.

    Amakuru avuga ko Minisiteri y'Umutekano w'Imbere mu Gihugu (Home Office) ari nayo ishinzwe gukurikirana iyi gahunda ku ruhande rw'u Bwongereza, yatangiye umugambi wo gushishikariza abakozi bakora mu gice gishinzwe gukurikirana abimukira, gutangira gusaba akazi mu Rwanda.

    Bivugwa ko igikorwa cyo gushaka aba bakozi cyatangiye mbere y'uko Inteko Ishinga Amategeko y'u Bwongereza yemeza uyu mushinga, ibisobanuye ko magingo aya, abakozi b'ibanze bashobora kuba baramaze kuboneka.

    Abakozi bazoherezwa mu Rwanda bazaba bakora mu nzego zirimo abafata ibyemezo, abashinzwe ibya tekinike, abashinzwe igenamigambi ndetse n'abayobozi bane bafite ubunararibonye mu kuyobora amakipe y'abakozi.

    Aba bayobozi bazaba bari mu Rwanda nyuma y'uko 'u Bwongereza busabwe gufasha mu bijyanye n'ishyirwa mu bikorwa ry'iyi gahunda, ndetse no gutanga ubunararibonye.'

    Aba bakozi bazaturuka mu Bwongereza bazaba bafite intego ebyiri z'ingenzi, zirimo gutanga ubujyanama n'amahugurwa kuri bagenzi babo bo ku ruhande rw'u Rwanda. Andi makuru avuga ko n'ubundi impande zombi zari zisanzwe zikorana cyane cyane mu bijyanye n'amahugurwa azafasha muri iyi gahunda.

    Abakozi bazoherezwa mu Rwanda bazajya bahamara 'ibyumweru' mbere yo gusubira mu Bwongereza, ubundi bagasimbuzwa bagenzi babo.

    Amakuru avuga ko iyi gahunda iri kwihutishwa cyane ndetse ngo nta gihindutse, abakozi ba mbere bashobora kuba batangiye kugera mu Rwanda mu ntangiriro za Gicurasi.

    Amakuru avuga ko u Rwanda rwari rwasabye ko rwazatangira rwakira abantu bake mu minsi ya mbere y'iyi gahunda, ari nako ruzaba ruri kurushaho kongera ubushobozi bwarwo mbere yo gutangira kwakira abimukira benshi icya rimwe.

    U Rwanda rwakemuye ibibazo byagaragajwe n'Urukiko rw'Ikirenga rw'u Bwongereza

    Mu Ugushyingo umwaka ushize, Urukiko rw'Ikirenga rwari rwagaragaje ko u Rwanda rudafite ubushobozi bwo kwakira abimukira kubera impamvu zirimo ubwoba bw'uko rushobora kuzabasubiza mu bihugu baje bahunga, aho bashobora kugirirwa nabi, ibintu bihabanye n'amasezerano mpuzamahanga agenga impunzi n'abimukira.

    Icyakora mu masezerano avuguruye, u Rwanda rwari rwakemuye iki kibazo, aho rwari rwasezeranyije abimukira ko nta muntu n'umwe uzasubizwa mu gihugu cye atabishaka, mu gihe azaba yoherejwe mu Rwanda.

    The i yatangaje ko u Rwanda ruzakorana n'umuhanga w'inararibonye mu bijyanye n'amategeko, uzatanga inama kuri Leta mu bijyanye n'ishyirwa mu bikorwa ry'iyi gahunda, aka kazi akazagakora nibura mu gihe cy'amezi atandatu.

    The Telegraph yo yari yatangaje ko uyu muntu ashobora kuba ari Umunyarwanda wubashywe ku rwego mpuzamahanga kubera ubunararibonye afite mu bijyanye n'amategeko, aho ndetse ngo yanabiminujemo muri Kaminuza ya Oxford iri mu zikomeye ku rwego rw'Isi.

    Mu minsi mike iri imbere, abimukira binjira mu Bwongereza mu buryo butemewe n’amategeko baratangira koherezwa mu Rwanda

    Inzira umwimukira azajya anyuzwamo mbere yo koherezwa mu Rwanda

    Abantu bazoherezwa mu Rwanda ntabwo ari impunzi zose ziri mu Bwongereza, ahubwo ni abimukira badafite ibyangombwa byo kuba muri icyo gihugu.

    Abo bantu kenshi bahagera banyuze mu Nyanja itandukanya u Bwongereza n'u Bufaransa, izwi nka 'English Channel.'

    Kenshi iyo bageze ku nkombe z'u Bwongereza bakirwa n'inzego zishinzwe umutekano, gusa kuva mu 2021, kugera mu Bwongereza muri ubu buryo byagizwe icyaha.

    Igihano cy'iki cyaha ni uko umuntu adashobora guhabwa ubuhungiro mu Bwongereza, ndetse akaba ashobora gusubizwa mu gihugu yaturutsemo cyangwa se akajyanwa mu kindi gihugu gifite umutekano, kuri iyi nshuro iki gihugu kikaba ari u Rwanda, nubwo amakuru avuga ko u Bwongereza bukomeje kuvugana n'ibindi bihugu birimo Botswana.

    Mbere y'iyi gahunda hagati y'u Bwongereza n'u Rwanda, ubusanzwe umwimukira wageze mu Bwongereza ntiyashoboraga gukora, icyakora yagombaga kubaho atunzwe na Leta. Aba bantu ntibatuzwaga mu nkambi, ahubwo bashyirwaga muri hoteli aho ikiguzi cyose cyishyurwaga na Leta y'u Bwongereza, ku giciro kirenga miliyari 5 z'ama-pound ku mwaka.

    Iyo iyi gahunda y'u Rwanda itaza kubaho, u Bwongereza bwari kuzishyura nibura miliyari 11 z'ama-pound kugera nibura mu 2026, aya mafaranga yose akagenda mu bikorwa byo kwita ku bimukira batanemerewe gukora.

    Dosiye z'aba bimukira rero zizajya zikurikiranwa, hanyuma izo basanze zifite inenge zikomeye, hafatwe icyemezo cy'uko bagomba koherezwa mu Rwanda. Magingo aya abagera kuri 300 basa nk'abamaze kwemezwa, uretse ko amakuru avuga ko abagera ku 2000 bashobora kuboneka mu gihe kidatinze.

    Umwimukira watoranyijwe koherezwa mu Rwanda azajya abimenyeshwa mbere y'iminsi irindwi. Nishira, azaba afite indi minsi itanu yo kwitegura. Muri rusange iyi ni iminsi 12. Muri iki gihe cyose, umwimukira azajya aba afite uburenganzira bwo kujya mu nkiko, agasobanura impamvu atifuza koherezwa mu Rwanda.

    Mu kujya inama n'abanyamategeko, birashoboka ko uyu mwimukira udashaka koherezwa mu Rwanda ashobora kubitinza, ahanini binyuze mu gusaba Urukiko guhabwa umwanya wo kwitegura urubanza, cyangwa se akaba yahitamo kuregera inkiko zo hejuru.

    Ibi byose bishobora gutwara ibyumweru bitatu, ndetse bishobora gutuma uyu mwimukira uri mu nkiko ashobora kuba akuwe ku rutonde rw'abemerewe koherezwa, gusa ibi ntibivuze ko aba atazaza burundu.

    Bwa nyuma na nyuma, umwimukira woherejwe mu Rwanda azajya ahabwa ibihumbi 3 by'ama-pound, nk'uko The Guardian yabitangaje.

    Bizaba bigoye cyane ko umwimukira watoranyijwe koherezwa mu Rwanda ashobora kubyanga, kuko nta mategeko ashobora kumurengera mu gihe yinjiye mu gihugu mu buryo butanyuze mu mucyo.

    Mu gihe cy'imyaka itanu izabarwa kuhera igihe agereye mu Rwanda, uyu mwimukira azahabwa iby'ibanze byose akeneye, mu gihe ikirego cye kizaba kiri kwigwaho n'inzego zibishinzwe.

    Birashoboka ko umwimukira wageze mu Rwanda ashobora gusubizwa mu Bwongereza, gusa ibi ni ikintu kizaba kigoye cyane hafi yo kudashoboka, ushingiye ku buryo inzira zo kubahitamo zizagenda. Gusubizwa mu Bwongereza kandi bizasaba ko Urukiko rubyemeza, indi ngingo izagorana kuko rutazapfa kubona ikirengera umuntu winjiye mu gihugu mu buryo butemewe n'amategeko, kandi yaroherejwe mu gihugu gitekanye, akazanitabwaho mu gihe cy'imyaka itanu.

    Birashoboka ko urugendo rushobora gusubikwa mu gihe abimukira hafi ya bose bari buze mu ndege imwe baba barahawe uburenganzira bwo gukomeza gukurikirana ibirego byabo mu nkiko, gusa gushoboka kwabyo bifite amahirwe make cyane.

    Igihe cyihuse gishoboka kugira ngo umwimukira avanwe kuri 'English Channel' agezwe mu ndege izamuzana i Kigali kizajya kiba ari ibyumweru bibiri.

    Gahunda yo kohereza abimukira mu Rwanda igamije gushakira umuti iki kibazo kiri mu bizengereje Isi

    Source : http://igihe.com/amakuru/u-rwanda/article/u-bwongereza-bushobora-kohereza-inararibonye-zizafasha-u-rwanda-mu-kwakira

  • Abakozi ba Akagera Business Group na Toyota Rwanda basobanuriwe amateka ya Jenoside yakorewe Abatutsi – #rwanda #RwOT

    Ni igikorwa cyabanjirijwe no gusura urwo rwibutso kuri uyu wa 25 Mata 2024, abacyitabiriye bakomereza aho ibyo bigo bikorera i Karuruma mu Murenge wa Jali mu Karere ka Gasabo, ahabereye ibiganiro bigaruka ku mateka ya Jenoside yakorewe Abatutsi.

    Umushakashatsi muri Minisiteri y'Ubumwe bw'Abanyarwanda n'Inshingano Mboneragihugu (Minubumwe), Mafeza Faustin, yakomoje ku buryo Jenoniside yakorewe Abatutsi itatunguranye kuko na mbere hagiye hakoreshwa icengezamatwara ry'amagambo y'urwango atesha agaciro Abatutsi, agaruka kuri bamwe mu bacurabwenge ba Jenoside barimo uwitwa Habyarimana Joseph Gitera.

    Ati ''Uyu Habyarimana Joseph Gitera yacengeje ingengabitekerezo y'urwango ku Batutsi, binyuze mu mategeko 18 y'Abahutu yahimbye akanatangazwa muri mitingi y'Ishyaka rye yabereye muri Butare ku itariki navuze ya 27 z'ukwa Cyenda mu 1959.''

    Iby'uko Abatutsi bakorewe ibikorwa bya kinyamaswa na mbere ya Jenoside yakorewe Abatutsi mu 1994, byashimangiwe na Mudenge Nicole watanze ubuhamya bw'uko yarokotse, akaba n'umwana w'umwe mu bari abakozi ba 'La Rwandaise' bibutswe none.

    Mudenge wari ufite imyaka 10 y'amavuko ubwo Jenoside yabaga, yakomoje ku kuntu abarimu batatinyaga no gufata abana b'Abatutsi ku ishuri ngo babateshe agaciro mu maso ya bagenzi babo bari bataranasobanukirwa iby'amoko.

    Ati ''Nigaga mu mashuri abanza, […] ndibuka hari umwarimu wanyigishaga witwaga Noëlle, uwo mwarimu twari duturanye ariko ari we unanyigisha ku ishuri. Ntabwo nibuka isomo twari turi kwiga, ariko nibuka ko yampamagaye njyenyine mu ishuri, njya imbere ntazi icyo ampamagariye.''

    ''Anshyira imbere y'abanyeshuri nari nambaye agakanzu k'ubururu […] impuzankano abanyeshuri biganaga cyera murazizi, kari gafite umushumi. Yafashe umushumi awuzirika mu nda cyane ageza aho ambabaza, hanyuma abwira abandi banyeshuri bose ngo barebe imbere, arababwira ngo 'ni uku abana b'Abatutsi basa'.''

    Umunyamabanga wa IBUKA mu Karere ka Gasabo witabiriye iki gikorwa, Mukanizeyimana Solange, yavuze ko abatari bahari mu gihe Jenoside yakorewe Abatutsi yategurwaga ikanakorwa bashobora kubifata nk'amateka yahise cyera cyangwa se ashushanyije wenda ikaba itarabayeho, ariko ko abarokotse Jenoside yakorewe Abatutsi ari abahamya b'uko yabayeho kuko ayo mateka bayabayemo.

    Umuyobozi wa Akagera Business Group, Senthil Ganesh Shenbagamoorthy, yavuze ko harebwe ku mateka ya Jenoside yakorewe Abatutsi mu Rwanda, Isi ifite umukoro wo kwigisha abato bavuka bagakurana urukundo, ku buryo jenoside idakwiye kugira ahandi iba.

    Umuyobozi wa Akagera Business Group, Senthil Ganesh Shenbagamoorth, yavuze ko Isi igomba kwigisha abato urukundo, mu gukumira ko hari ahandi haba jenoside

    Umushakashatsi muri MINUBUMWE, Mafeza Faustin yagarutse ku mateka yagejeje kuri Jenoside yakorewe Abatutsi

    Umunyamabanga wa IBUKA mu Karere ka Gasabo, Mukanizeyimana Solange, yavuze ko abarokotse Jenoside ari igihamya cy’uko yabayeho ko ntawe ukwiye kuyihakana

    Mudenge Nicole, umwana w’umwe mu bahoze ari abakozi ba La Rwandaise bibutswe, yatanze ubuhamya bw’uko yabashije kuroroka Jenoside

    Ubwo Abayobozi ba Toyota Rwanda bashyiraga indabo ahashyinguwe Abatutsi basaga 6000 mu Rwibutso rwa Jenoside rwa Ntarama ruri mu Karere ka Bugesera

    Abayobozi ba AGB bashyize indabo ahashyinguwe Abatutsi basaga 6000 bashyinguwe mu Rwibutso rwa Jenoside rwa Ntarama

    Abakozi ba AGB na Toyota Rwanda basobanuriwe amateka yagejeje igihugu kuri Jenoside yakorewe Abatutsi

    Ni igikorwa cyanitabiriwe n’abarimo abahagarariye inzego z’umutekano

    Ibikorwa byo Kwibuka abazize Jenoside yakorewe Abatutsi, AGB na Toyota Rwanda babitangiriye ku Rwibutso rwa Jenoside rwa Ntarama

    Source : http://igihe.com/amakuru/u-rwanda/article/abakozi-ba-akagera-business-group-na-toyota-rwanda-basobanuriwe-amateka-ya

  • Ugomba kubaha abahashyinguye: IBUKA yamaganye abifotoje amafoto adakwiriye ku Rwibutso rwa Jenoside – #rwanda #RwOT

    Inzibutso za Jenoside ziri hirya no hino mu gihugu ndetse abantu bakangukira kuzisura kugira ngo basubize agaciro Abatutsi bishwe urw'agashinyaguro muri Jenoside mu 1994, ariko bagacyura n'amasomo yo guharanira ko itazongera ukundi.

    Gusa ku mbuga nkoranyambaga hakwirakwiye amafoto y'abasuye urwibutso rwa Jenoside bivugwa ko ari urwa Kiziguro bifotoza amafoto agaragaza ko badashyize umutima ku gikorwa nyirizina cyari cyabajyanye, bifotoza nk'abari ahantu hasanzwe.

    Imwe mu mafoto yashyizwe ku rubuga rwa X, igaragaza abari basuye urwibutso baseka, bifotoza mu buryo butamenyerewe ku bari mu gikorwa cyo kwibuka.

    Uwitwa Noella Shyaka yagize ati 'Iyo bavuze kwibuka twiyubaka ni ibi baba bavuze? Kujya gu 'slayinga' mu rwibutso? Aya ni amahano mu yandi.'

    Koko bene aya mafoto arakwiye ahantu nkaha?
    Yego rwose ibintu byose nabonye twarabigize easy ngo ntaguheranwa nagahinda ariko c iyo bavuze kwibuka twiyubaka nibi baba bavuze? Kujya gu slaying murwibutso?
    Aya namahano muyandi! pic.twitter.com/CUREOJVDR7

    — Noella Shyaka (@noellashyaka) April 26, 2024

    Ibi ntibikwiye ndetse nino gutesha agaciro abacu ibi nabyo ngewe ndabibona nkipfobya kd ntanikigaragazako ababakobwa babikoze batabizi ibi rero @RIB_Rw rwose mukwiye kubikurikirana mwasanga babikoze babizi bakabihanirwa baba batari babizi bagahabwa uburere bwanyabwo murakoze pic.twitter.com/li1mRxPALS

    — kazitunga (@Pkg250) April 26, 2024

    Mwakoze igikorwa cy'indashyikirwa; mwagize ibiganiro mwumva n'ubuhamya. Mwibutse bamwe muri bagenzi banyu bifashe amafoto basa nkaho bagiye mûri party hejuru y'imibiri y'abacu ko bigize icyaha cyo gutesha agaciro inzibutso (profanation) https://t.co/VTuRxudadg

    — Chantal M. 🇷🇼🇨🇦 (@Mwiza123) April 27, 2024

    Dieudonne Ciza we yasabye ko bikumirwa 'hakiri kare, imyifatire ku nzibutso igakurikizwa, uru rubyiruko niruganirizwe ni ukuri.'

    Undi yagize ati 'Ntabwo bikwiye rwose … Kwibuka30 bikwiye kubahwa na buri wese kuko tuba twibuka ikibi ntabwo byakatunejeje ngo duse n'ababiryamo umunyenga.'

    Perezida wa IBUKA, Dr Gakwenzire Philbert, yabwiye IGIHE ko imyitwarire nk'iyaranze uru rubyiruko yatuma umuntu yibaza niba hari isomo rwigira ku mateka barebesha amaso cyangwa ibiganiro bihatangirwa.

    Ati 'Izi gahunda tuba turimo zo kwibuka ni ukongera gutekereza no kuzirikana ukibaza ngo mbese aha habereye iki cyangwa hashyinguye bande? Rwose ni ukugira ngo tubahe icyubahiro. Bariya bari bamaze gusura urwibutso, bakabaye baragize impinduka muri bo ariko ukareba ukabona bitandukanye n'ibyo umuntu yatekerezaga.'

    'Niba ibintu nka biriya bikorwa n'urubyiruko amaherezo turagana he? Ni uburyo bwo kwikebura, bwo kivuga ngo iyo turi muri ibi bikorwa intego tuba dufite turimo kuyigeraho?'

    Dr Gakwenzire yanavuze ko umuntu wese ugiye ku rwibutso rwa jenoside agomba kurangwa n'imyitwarire igaragaza ko yubashye abavukijwe icyo cyubahiro bazira uko baremwe ariko akanubaha uburenganzira bw'abakiriho.

    Ati 'Ugomba kubaha abashyinguye aho ngaho ariko ukaba uzarangwa no kubaha n'abakiriho. Imyitwarire nk'iriya ntabwo ikwiye.'

    Yahamije ko na nyuma y'iminsi 100 yo kwibuka Jenoside yakorewe Abatutsi abantu bakwiye gusubiza amaso inyuma bakisuzuma bakareba niba intego bari bafite mu gihe cyo kwibuka yaragezweho.

    Ati 'Tuzajye dusubiza amaso inyuma twibaze ngo ese ya gahunda tuvuyemo idusigiye iki? Dukwiye no kuzafata umwanya wo kwisuzuma, biriya na byo bituma duhita twibaza tuti intego turimo kuyigeraho cyangwa turagenda tugahita tukumva ko twasohotse hanyuma ibyo twabwiwe bikaba binyuze mu gutwi kumwe bigasohokera mu kundi?'

    'Ntabwo ari ukuvuga ngo tugiye kurangiza umwenda tubafitiye ngo birangirire aho ahubwo ni no kugira ngo bizadufashe no mu kuturanga mu buzima busanzwe. Aho turahagiye turize kuko akenshi haba hari ibiganiro bigahita ariko turanize mu byo twibonera n'amaso kandi dukuremo n'isomo ryo kubaha ikiremwa muntu no kubiharanira.'

    Ibyavuye mu ibarura rusange rya 2022 bigaragaza ko 75% by'Abanyarwanda bafite imyaka 35 cyangwa munsi yayo. Bisobanuye ko harimo abafite amakuru make kuri Jenoside yakorewe Abatutsi, abandi bavutse nyuma yayo.

    Minisitiri w'Urubyiruko n'Iterambere ry'Ubuhanzi, Jean Nepo Abdallah Utumatwishima abinyujije kuri X yanditse ko ari ngombwa kuganira mu muryango imyitwarire ikwiye kuranga abantu mu bihe byo kwibuka.

    Ati 'Mwakoze kwerekana aho bagenzi bacu batitwaye neza. Tugomba kunoza ibiganiro mu muryango, ku mashuri no matsinda y'abato. Abateguye gusura Inzibutso ntimucike intege. Mujye mwitwararika. Bariya tuzabaganiriza kibyeyi. Twemere ko kwigisha ari uguhozaho'

    #RwoX :

    Mwakoze kwerekana aho bagenzi bacu batitwaye neza.

    Tugomba kunoza ibiganiro mu muryango, ku mashuri no muri groups z'abato

    Abateguye gusura #Inzibutso ntimucike intege. Mujye mwitwararika.

    Bariya tuzabaganiriza kibyeyi.
    Twemere ko kwigisha ari uguhozaho #Kwibuka30

    — UTUMATWISHIMA (@jnabdallah) April 27, 2024

    IBUKA isaba ko kubaha uburenganzira bw'ikiremwa muntu byaba mu bantu iminsi yose, haba igihe basuye inzibutso cyangwa mu gihe bari mu bindi bikorwa.

    Mu cyumweru cyo kwibuka cyatangiye tariki 7 Mata kugeza kuri 13 Mata 2024, abantu 53 bakurikiranyweho ibyaha by'ingengabitekerezo ya Jenoside, urubyiruko rwari 13 [ni ukuvuga abafite imyaka 17-30] bangana na 24,5% mu gihe abafite imyaka iri hagati ya 31 na 44 ari 24 bangana na 45,3%.

    Dr Gakwenzire Philbert yamaganye urubyiruko rwaranzwe n’imyitwarire idahesha agaciro abashyinguye mu Rwibutso rwa Jenoside yakorewe Abatutsi ubwo bari bamaze kuhasura

    Source : http://igihe.com/amakuru/u-rwanda/article/ugomba-kubaha-abahashyinguye-ibuka-yamaganye-abagaragaje-imyitwarire-idahwite

  • Umusenateri yatunze agatoki Abafaransa bashyigikiye Jenoside n'abatazi inkomoko y'ibibazo by'u Rwanda na RDC – #rwanda #RwOT

    Mu kiganiro na Televiziyo Public Sénat kuri uyu wa 26 Mata 2024, Cadic yibukije ko u Bufaransa bwari buyobowe na François Mitterrand bwateye inkunga Leta y'u Rwanda yateguraga umugambi wa Jenoside yakorewe Abatutsi, ntibwagira ubushake bwo kuyihagarika no kwemera uruhare bwagize.

    Cadic yasobanuye ko mu gihe Jenoside yakorewe Abatutsi yabaga, Paul Kagame yategetse Ingabo za RPA Inkotanyi guhagarika ubu bwicanyi kuko 'u Bufaransa n'ibindi bihugu byemeye ko buba'.

    Ku bahakana n'abapfobya Jenoside yakorewe Abatutsi, bakavuga ko hari n'iyakorewe Abahutu, Cadic yatangaje ko abantu bakwiye kwitondera ibyo bavuga, asobanura ko Abahutu bishwe ari abageragezaga gutabara Abatutsi.

    Ati 'Ni Jenoside yakorewe Abatutsi. Ni ngombwa kwitondera amagambo tuvuga. Rwose hari Abahutu bashatse kurinda Abatutsi bicwaga ariko Abahutu si bo benshi bishwe. Mbese bari abantu bari bafite ubumuntu.'

    Yagaragaje ko, bitandukanye n'abandi bayoboye u Bufaransa, Perezida Emmanuel Macron we yageze mu Rwanda muri Gicurasi 2021, yemera uruhare ubuyobozi bw'igihugu cyabo cyagize muri aya mateka.

    Cadic ati 'Ubwo yajyaga mu Rwanda mu 2021, yari yagiye kwemera urwo ruhare ariko no guhamya ko u Bufaransa bugiye gukorana n'u Rwanda.'

    Nyuma ya Jenoside yakorewe Abatutsi, Leta y'u Rwanda yashyize imbaraga muri gahunda y'ubumwe n'ubwiyunge. Cadic yagaragaje ko kubanisha abagizwe ingaruka na Jenoside n'abayigizemo uruhare ari igikorwa gikomeye, gitanga umusaruro mu iterambere ry'iki gihugu.

    RDC icumbikiye abashaka gusubiramo Jenoside

    Bamwe mu bagize FDLR bahungiye muri RDC ubwo Ingabo za RPA zari zimaze kubohora u Rwanda no guhagarika Jenoside yakorewe Abatutsi. Raporo zitandukanye zishyirwa hanze n'imiryango mpuzamahanga, zigaragaza ko uyu mutwe ufite uruhare mu bwicanyi bukorerwa Abanye-Congo.

    FDLR ikora ibi byose mu gihe ikorana ndetse igahabwa ubufasha burimo intwaro n'igisirikare cya RDC kizwi nka FARDC, mu gihe impande zombi zifatanya mu kurwanya M23.

    Cadic yavuze kuri ubu bufatanya hagati y'Ingabo za Leta ya RDC na FDLR, agira ati 'Mu burasirazuba bwa RDC haracyari igice cy'Abahutu cyinjijwe mu gisirikare cya RDC, bashaka gusubirayo kugira ngo barangize akazi.'

    Nyuma y'imyaka 30 jenoside ihagaritswe, hari abatemera ko abayizize barenga miliyoni imwe, bagatsimbarara ahubwo bavuga ko abayizize ari ibihumbi 800. Cadic yagaragaje ko ibi bikorwa n'abashaka gusubiramo aya mateka.

    Yagize ati 'Aya ni amagambo mbona ko adaturuka mu Rwanda, ahubwo aturuka mu bantu bashaka gusubiramo amakimbirane. Muri RDC hari umutwe, hari abantu bakomeje gukuza imvugo y'abajenosideri bashaka kurangiza akazi.'

    Mu bakoresha izi mvugo harimo abayobozi bo muri RDC bashyigikiye FDLR. Nka Ambasaderi w'iki gihugu mu muryango w'Abibumbye, Zénon Mukongo Ngay, tariki ya 24 Mata 2024 yabwiye Akanama gashinzwe umutekano ko idakwiye kwitwa 'Jenoside yakorewe Abatutsi', ahubwo ikwiye kwitwa 'jenoside yo mu Rwanda.'

    Ambasaderi Mukongo yirengagije ibikorwa by'urugomo byakorewe Abatutsi kuva mu 1959, imihoro yinjijwe mu gihugu ikanakwirakwizwa n'izindi ntwaro zacuzwe mu itegurwa ry'ubu bwicanyi, avuga ko 'jenoside yo mu Rwanda' yatewe n'ihanurwa ry'indege ya Habyarimana Juvénal tariki ya 6 Mata 2024.

    Uyu mudipolomate yavuze aya magambo nyuma y'aho Minisitiri w'Itumanaho wa RDC akaba n'Umuvugizi wa Guverinoma, Patrick Muyaya, atangaje ko muri jenoside hishwe Abanyarwanda muri rusange, baba 'Abatutsi, Abahutu n'Abatwa'.

    Cadic yashimangiye ko umuryango mpuzamahanga ntacyo wakoze ngo uhagarike Jenoside yakorewe Abatutsi, asaba u Bufaransa n'ibindi bihugu gufatira abahakana n'abapfobya aya mateka, ingamba zatuma atisubiramo.

    Ambasaderi Mukongo aherutse kumvikana ku mvugo zipfobya Jenoside yakorewe Abatutsi

    Senateri Cadic yatangaje ko abakoresha izi mvugo bashaka gusubiramo jenoside

    Source : http://igihe.com/amakuru/u-rwanda/article/umusenateri-yatunze-agatoki-abafaransa-bashyigikiye-jenoside-n-abatazi-inkomoko

  • Dosiye ya Minisitiri w'Intebe w'Uburundi, Gervais Ndirakobuca, uvugwa mu guha intwaro FDLR, yabyukijwe. #rwanda #RwOT

    Iyi ni idosiye imaze imyaka 15 yarazinzitswe, ikaba ivugwamo abategetsi mu Burundi barigishije intwaro icyo gihugu cyari cyatumije mu mahanga, bo bakazihera abajenosideri ba FDLR.

    Uwitwa Ernest Manirumva wari Visi-Perezida w'ishyirahahmwe 'OLUCOME', urwanya ruswa n'akarengane mu Burundi, yagerageje gucukumbura iby'aya marorerwa n'abayagizemo uruhare bose, ariko mu ijoro ryo kuwa 08 rishyira uwa 09 Mata 2009, yicirwa i Bujumbura, umurwa mukuru w'u Burundi.

    Idosiye y'urubanza rujyanye n'ubwo bwicanyi yarigishirijwe mu Rukiko rw'Ikirenga, nk'uko bivugwa n' ibitangazamakuru ndetse n'amashyirahamwe aharanira uburenganzira bwa muntu mu Burundi.

    Raporo y'impuguke za Loni yasohotse muw'2010, igaragaza ko igipolisi cy'u Burundi cyatumije mu gihugu cya Maleziya imbunda 40.000, ariko zigejejwe i Bujumbura zihishwa mu rugo kwa Perezida Petero Nkurunziza, mbere yo koherezwa mu ndiri ya FDLR, mu burasirazuba bwa Kongo.

    Uburemere bw'iki kibazo bwatumye Urwego rw'Ubugenzacyaha rwa Leta Zunze z'Amerika, FBI, rukinjiramo, ndetse ruza no kugaragaza ko uretse Perezida Nkurunziza witabye Imana muw'2020, hari n'ibindi bikomerezwa muri CNDD-FDD byagize uruhare mu kuyobereza izo ntwaro muri FDLR, no mu iyicwa rya Ernest Manirumva. Imyanzuro ya FBI isaba gukurikirana abo bagizi ba nabi, ntiyigeze ihanwa agaciro.

    Muri ibyo bikomerezwa, harimo Gen.Gervais Ndirakobuca bakunze kwita 'Ndakugarika' kubera ubugome bwe ndengakamere, icyo gihe akaba yari icyegera cy'umukuru wa Polisi y'u Burundi. Ubu Gen. Ndakugarika ni Minisitiri w'Intebe w'u Burundi, kuva muri Nzeri 2022.

    Undi ni Gen. Alain Guillaume Bunyoni icyo gihe wari Minisitiri w'Umutekano, akaba ari nawe wari watumije izo ntwaro. Ubu Gen. Bunyoni ari mu ibohero atazira iyo dosiye, ahubwo kubera gushyamirana bikomeye na Perezida Evariste Ndayishimiye.

    Hari kandi Gen. Adolphe Nshimirimana wari umukuru w'iperereza mu Burundi igihe ibyaha byakorwaga, akaba yarapfuye muw'2015.

    Mu kwibuka imyaka 15 Ernest Manirumva amaze yambuwe ubuzima, ishyirahamwe'OLUCOME' yakoreraga rirateza ubwega, risaba ko umuryango wa nyakwigendera wahabwa ubutabera. Birasa no kugosorera mu rucaca ariko, kuko na OLUCOME izi neza ko ubutegetsi bwa CNDD-FDD bwimitse umuco wo kudahana, cyane cyane iyo abaregwa ari abambari bayo.

    Imikoranire hagati y'ubutegetsi bw'uBurundi n'abajenosideri ba FDLR rero si iya none. Magingo aya ntibikinagirwa ibanga, kuko n'ubu icyo gihugu cyohereje, ku mugaragaro, abasirikari ndetse n'Imbonerakure(urubyiruko rwa CNDD-FDD), gufatanya na Leta ya Kongo na FDLR gutsemba Abakongomani bo mu bwoko bw'Abatutsi, ndetse no kunoza umugambi wo guhungabanya umutekano w'u Rwanda.

    Abahoze mu mitwe y'iterabwoba nka FLN, FDLR n'iyindi, bakaza gufatirwa mu bikorwa byo guhungabanya umutekano w'uRwanda, babwiye inkiko uburyo abategetsi b'uBurundi bafashije iyo mitwe, mu kuyishakira no kuyitoreza abarwanyi, mbere yo kubaha intwaro n'inzira ngo batere u Rwanda.

    Itangazamakuru ryigenga ndetse n' abasesengura politiki ya CNDD-FDD rero, basanga imyitwarire ya Perezida Ndayishimiye, nko kwikoma ubuyobozi bw'u Rwanda no kurushinja ibirego adafitiye gihamya, ayiterwa n'ikimwaro, no kugerageza gusobanura impamvu akorana n'abajejeta amaraso ku biganza.

    The post Dosiye ya Minisitiri w'Intebe w'Uburundi, Gervais Ndirakobuca, uvugwa mu guha intwaro FDLR, yabyukijwe. appeared first on RUSHYASHYA.

    Source : https://rushyashya.net/dosiye-ya-minisitiri-wintebe-wuburundi-gervais-ndirakobuca-uvugwa-mu-guha-intwaro-fdlr-yabyukijwe/?utm_source=rss&utm_medium=rss&utm_campaign=dosiye-ya-minisitiri-wintebe-wuburundi-gervais-ndirakobuca-uvugwa-mu-guha-intwaro-fdlr-yabyukijwe

  • Kamonyi-Mugina/Kwibuka30: Abarokotse Jenoside yakorewe abatutsi barasaba kubakirwa urwibutso rwagutse rujyanye n'amateka #rwanda #RwOT

    Abarokotse Jenoside yakorewe abatutsi bo mu murenge wa Mugina, Akarere ka Kamonyi, basaba ko bakubakirwa urwibutso rwagutse rujyanye n'amateka y'ibyabereye muri iki gice cy'Amayaga. Hiciwe Abatutsi benshi nyuma yo kwicwa k'uwari Burugumesitiri wa Komine Mugina, Callixte Ndagijimana wari warabarwanyeho igihe kitari gito. Gusaba kubakirwa Urwibutso rujyenye n'amateka, babigarutseho mu gikorwa cyo kwibuka ku nshuro ya 30 Jenoside yakorewe Abatutsi cyabereye ku rwibutso rwa Mugina kuri uyu wa 26 Mata 2024.

    Mu kiganiro cyatanzwe na Depite Rwaka Pierre Claver, yibukije Abanyamugina(Amayaga) hamwe n'inshuti zabo zaje kubafata mu mugongo mu Kwibuka Abatutsi bahiciwe ko amateka akwiye gukomeza kuvugwa kugira ngo urubyiruko narwo ruzasigarane uwo murage, bazawutoze abazabakomokaho.

    Abaje Kwibuka, bunamiye kandi bashyira indabo ku rwibutso rwa Mugina.

    Yagize ati' Amateka akwiye gukomeza kuvugwa by'umwihariko tuyigisha urubyiruko kugira ngo bazayigishe abandi bazabakomokaho. Turizera ko urubyiruko rwumva kandi ko rufite umutima wo gukunda Igihugu no kugikorera, kuburyo bazigisha abato nabo bakamenya amateka ya Jenoside yakorewe abatutsi'.

    Kabano Charles umwe mu bari batuye muri iki gice cy'amayaga warokokeye mu karere ka Muhanga i Kabgayi, avuga ko Abatutsi bari batuye mucyahoze ari komine Mugina banyuze munzira y'umusaraba ikomeye. Avuga ko bishwe n'abari abavandimwe babo ndetse n'abaturanyi.

    Mu buhamya bwe, yagize ati' Ndabyibuka bankubise imihoro itatu, mbikorewe n'umusore wacuruzaga takataka ansaba kuryama hasi ndabikora, ngiye kumva numva umuhoro wa mbere uba wangeze ku kuboko arantema. Yakomeje kuntemagura ariko aransiga aragenda. Hashize akanya haza umuntu aravuga ati aracyahumeka, niko kunkubita ubuhiri mu mutwe, ntangira kuva amaraso ahantu hose bansiga aho baragenda. Nyuma imvura iguye ntangira kuribwa, ariko ndebye nsanga amaguru ntibayatemye, mpita njya ku kiliziya, nsanga Mama atarapfa, ansaba amazi ariko sinari kuyabona, birangira apfuye'.

    Yakomeje avuga ko Tariki 26 Mata 1994 ariyo yabaye imperuka kuko hari umusirikare wari majoro wazanye risanse(essence) yo gutwika Abatutsi. Nyuma batangiye gukoresha imashini za tingatinga bataba imibiri y'abamaze kwicwa kandi nawe yari arimo. Avuga ko abonye bagiye kumugeraho yagiye yandara mu mbaraga nke yari asigaranye agera mu Kiliziya ahingukira musakrisitiya ahabona Ukaristiya arazirya.

    Kabano, avuga ko mu mihangayiko yose Abatutsi banyuzemo, baje kugobokwa n'Inkotanyi zabasanze I Kabgayi zibaha ubuzima. Yashimiye Perezida wa Repubulika, Paul Kagame n'ingabo za RPF Inkotanyi yari arangaje imbere. Ahamya ko Inkotanyi ari ubuzima kuko iyo zitaba zo, tariki 02 Kamena1994 nta muntu n'umwe bari gusanga I Kabgayi.

    Pascal Sahundwa wavuze mu izina ry'abahagarariye imiryango yashyinguye ababo, yavuze ko ukurikije imiterere ya Mugina, nta bwinyagamburiro bari bafite. Ashima ingabo zari iza RPA zari  ziyobowe na Perezida Paul Kagame.

    Ati' Biragoye ko hari kugira abarokoka. Na bake barokotse basigaranye inkovu kumubiri no kumutima. Gusa turashima Perezida Paul Kagame n'ingabo yari ayoboye, ndetse tunashima abakomeje gutanga amakuru y'ahari imibiri y'abacu'.

    Pascal kandi, yasabye ko bakubakirwa Urwibutso rwagutse rujyanye n'amateka y'ibyabereye muri Mugina, ndetse ngo hakabaho no kurinda bimwe mu bigaragaza amateka y'ibyabaye ku iyicwa ry'Abatutsi mu gihe cya Jenoside yakorewe Abatutsi.

    Guverineri w'intara y'amajyepfo, Kayitesi Alice yavuze ko kwibuka ari umwanya mwiza wo kuzirikana ubupfura n'ubutwari bw'abibukwa.

    Guverineri Kayitesi Alice.

    Ati' Uyu mwanya wo kwibuka, tujye tuwukoresha tuzirikana Ubutwari, Ubupfura no gukunda Igihugu byaranze abo twibuka uyu munsi. Aba twaje kwibuka bari abana b'Igihugu kandi bagikunda, ariko Leta mbi yatumye bicwa. Turashima abarokotse Jenoside yakorewe Abatutsi ko mwemeye kubaho no kugira impano ikomeye yo gutanga imbabazi ndetse n'uruhare rwanyu mu kurangiza imanza za Gacaca'.

    Kukijyanye n'urwibutso rugaragaza amateka y'ibyabereye Mugina, Guverineri yavuze ko kubaka inzibutso ari inshingano za Leta, ko kandi ibyo bigiye kwitabwaho vuba.

    Muri uyu muhango kandi hashyinguwe mu cyubahiro imibiri 91, irimo 70 yabonetse mu murenge wa Mugina na Nyamiyaga, indi 21 yimuriwe muri uru rwibutso. Kwibuka Jenoside yakorewe Abatutsi muri iki gice cy'Amayaga ku rwibutso rwa Mugina bihuza Abaturage b'Umurenge wa Mugina n'ab'Umurenge wa Nyamiyaga yombi igize igice cy'Amayaga.

    Urwibutso rwa Mugina ruruhukiyemo imibiri y'Abatutsi 59,122 bishwe muri Jenoside yakorewe Abatutsi. Abahiciwe, ni Abatutsi bari batuye muri iki gice cy'amayaga ndetse n'abandi bahungaga bava mu bice bitandukanye by'Amayaga, Bugesera n'ahandi.

    Nyituriki

    Source : https://www.intyoza.com/2024/04/27/kamonyi-mugina-kwibuka30-abarokotse-jenoside-yakorewe-abatutsi-barasaba-kubakirwa-urwibutso-rwagutse-rujyanye-namateka/

  • Chryso Ndasingwa utegerejwe muri BK Arena yaz… – #rwanda #RwOT

    Chryso Ndasingwa yazegurutse imihanda ya Nyamirambo avuga inkuru nziza ya Yesu Kristo yanyujije mu ndirimbo ye nshya yise “Inkomoko” yasohokanye n’amashusho yayo, akaba aririmbamo ko “Nkomoka kuri Data, ndi icyaremwe gishya. Navutse ubwa kabiri, nagabiwe ya migisha yose, nababariwe ku bw'amaraso ya Yesu.

    Nogejwe ku bw'amaraso ya Yesu, nkomoka kuri Christo, ndi icyaremwe gishya, navutse ubwa kabiri, nagabiwe ya migisha yose nababariwe ku bw'amaraso ya Yesu. Nogejwe ku bw'amaraso ya Yesu, ndi umugisha ku bw'amaraso ya Yesu”.

    Ni indirimbo yagiye hanze mu gitondo cy’uyu wa Gatandatu tariki 27 Mata 2024. Agaragara ari mu mihanda ya Nyamirambo agaragiwe n’inshuti ze, aririmba urukundo rutangaje rwa Yesu Kristo wamugize icyaremwe gishya ku bw’amaraso ya Yesu wamupfiriye ku musaraba. Ati “Nababariwe ku bw’amaraso ya Yesu”.

    Chryso agaragara ari i Nyamirambu kuri 40, akongera kugaragara ari mu marange ndetse agafata n’icyo kurya [ubanza akunda akaboga], akerekeza no mu Mujyi muri Car Free Zone hafi n’aho inyaRwanda ikorera. Aha hose aba ari kuhagenda n’amaguru arimo kuririmba “Inkomoko”, gusa hari aho n’aho agaragara atega moto i Nyamirambo.

    Chryso Ndasingwa wiyegereje abaturage bo mu gace ka Nyamirambo akomokamo ndetse atuyemo, yabwiye inyaRwanda ko yanditse iyi ndirimbo “Inkomoko” agamije gutanga “ubutumwa bw'ukuntu Imana yiyunze natwe muri Kristo ku musaraba.” Amajwi yayo yakozwe na Boris, naho amashusho akorwa ndetse atunganywa na Oskados & Richard.

    REBA HANO INDIRIMBO “INKOMOKO” YA CHRYSO NDASINGWA

    Chryso Ndasingwa ari kwitegura kumurika Album ye ya mbere mu gitaramo cy’amateka yise “Wahozeho Album Launch” kizabera muri BK Arena tariki 05.05.2024. Yacyitiriye indirimbo ye yabaye intero n’inyikirizo ku bakunzi benshi b’umuziki wa Gospel, iyo akaba ari iyitwa “Wahozeho”.

    Mu kiganiro na InyaRwanda, Chryso Ndasingwa yabajijwe uko yiyumva kuba agiye gukorera muri BK Arena igitaramo cye cya mbere, asubiza ko ari inzozi ze zibaye impamo. Yagize ati “Ndumva nezerewe cyane kuko cyari icyifuzo maranye iminsi myinshi, none ndashima Imana ko yaduciriye inzira”.

    Album ye ya mbere agiye kumurika igizwe n’indirimbo 18 zikubiyemo ubutumwa bw’amashimwe menshi ku Mana nk’uko umwanditsi wazo abisobanura ati: “[Album] Isobanuye ikoraniro y'abantu batabarika bazanye intego imwe yo kuramya uwahozeho kandi uzahoraho”.

    Muri iki gitaramo Chryso Ndasingwa azaba ari kumwe n’abaramyi basizwe amavuta y’Imana barimo Aime Uwimana, Josh Ishimwe, Papi Clever na Dorcas, True Promises Ministries, Asaph Music International na Himbaza Club. Imiryango izaba ikinguye kuva saa kumi z’umugoroba.

    Amatike yo kwinjira muri uyu mugoroba w’amashimwe uzayoborwa na Tracy Agasaro, yamaze kugera hanze, akaba aboneka kuri www.ticqet.rw. Ushobora no guhamagara nimero zikurikira bakagufasha kubona itike byoroshye; 0784237492; 0788838879; 0788622852.

    Abari kugura amatike mbere y’uko igitaramo kiba bari kubyungukiramo cyane kuko ibiciro biri hasi. Itike ya Silver [mu myanya isanzwe] iragura 5,000 Frw mu gihe ku munsi w’igitaramo izaba igura 10,000 Frw. Itike ya Premium iragura 10,000 Frw mu gihe ku ku muryango izaba igura 15,000 Frw.

    Itike ya Gold iragura 12,000 Frw mu gihe ku munsi w’igitaramo izaba igura 17,000 Frw. Platinum iragura 15,000 Frw mu gihe izaba igura 20,000 Frw ku munsi w’igitaramo. Itike ya Diomond wagereranya na VVIP iragura 20,000 Frw mu gihe ku munsi w’igitaramo izaba igura 25,000 Frw.

    Chryso Ndasingwa umaze imyaka 3 gusa mu muziki agiye gukora igitaramo cy’amateka

    Chryso Ndasingwa agiye gukora igitaramo cy’amateka muri BK Arena

    Himbaza Club nabo bazifatanya na Chryso Ndasingwa muri ‘Wahozeho Album Launch’

    Amafoto agaragaza Chryso Ndasingwa mu ndirimbo ye nshya “Inkomoko”

    Source : https://inyarwanda.com/inkuru/142376/chryso-ndasingwa-utegerejwe-muri-bk-arena-yazengurutse-namaguru-imihanda-ya-nyamirambo-yam-142376.html