Author: webrwanda

Mu mwaka w'ingengo y'imari wa 2022/2023 u Rwanda rwohereje mu mahanga kawa irenga toni 20.000 yinjije miliyoni 115.9 $ [ni ukuvuga asaga miliyari 147 Frw], bigaragaza izamuka rya 53.39% ugereranyije n'umwaka wari wabanje aho yari yinjije miliyoni 75.5$.

Ikigo cy'Igihugu gishinzwe guteza imbere iyoherezwa mu mahanga ry'ibikomoka ku buhinzi n'ubworozi [NAEB] kigaragaza ko kuva muri Nzeri 2022 kugeza muri Kamena 2023, hatewe ingemwe za kawa zisaga miliyoni 11.9.

Umunyamabanga Uhoraho muri Minisiteri y'Ubuhinzi n'Ubworozi, Dr Olivier Kamana, yavuze ko iki ari ikimenyetso cy'ingufu kawa yahawe mu Rwanda kuko mu myaka 30 ishize hatinjizwaga agera kuri miliyoni 20 z'amadorali ya Amerika ku mwaka.

Yabigarutseho kuri uyu wa Gatandatu tariki ya 06 Nyakanga 2024, mu muhango wo gusoza amarushanwa y'ubwiza bw'ikawa y'u Rwanda 'Best of Rwanda 2024'.

Ni amarushanwa yateguwe na NAEB n'abafatanyabikorwa bayo, mu rwego rwo gushimira abahinzi, abatunganya ikawa n'abayohereza mu mahanga, ku muhate bagira mu guteza imbere ikawa y'umwimerere ndetse no kumenyekanisha iy'u Rwanda ku ruhando mpuzamahanga.

Dr Kamana yagize ati 'Gahunda dufite ni ugukomeza guteza imbere kawa cyane cyane twibanda ku bwiza bwayo.'

Mu ntangiriro z'uyu mwaka Minisitiri w'Ubucuruzi n'Inganda Dr Ngabitsinze Jean Chrysostome, yatangaje ko kugira ngo kawa yiinjirize u Rwanda amadovize menshi hagomba kuvugururwa ibiti bingana na 26% bimaze imyaka 30, n'ibindi ibirenga 44% byo bimaze imyaka 20.

Ubu Minisiteri y'Ubuhinzi n'Ubworozi iri kwinjira muri gahunda ya gatanu yo kuvugurura ubuhinzi. Dr Kamana yavuze ko hazitabwa cyane mu kuvugurura ibiti bya kawa dore ko hari n'ibimaze imyaka 40.

Ati 'Ibiti dufite mu Rwanda bimaze imyaka myinshi hari ibirengeje imyaka 20, 30, ndetse hari n'ibyo usanga bifite imyaka 40. Ibyo biti turimo turabivugurura dufite umushinga mushya ukorera muri NAEB, uzafasha abahinzi kubona ingenzwe nziza.'

Dr Kamana, yagaragaje ko iyi ari imwe mu nzira izatuma umusaruro wa kawa wiyongera cyane, ugakomeza gutanga umusanzu mu kubaka ubukungu bw'igihugu.

Ati 'Turateganya ko umusaruro wakiyongeraho byibura 10% mu myaka itanu iri imbere.'

Kugeza ubu imibare yo mu 2023 igaragaza ko ubuso buhinzeho kawa mu Rwanda bugera kuri hegitari 42,229 zavuye kuri hegitari 39,844 zari zihinzeho kawa mu mwaka w'ingengo y'imari wa 2020/2021. Umusaruro ku giti kimwe cya kawa ukaba warageze bilo 2.6 mu mwaka w'ingengo y'imari wa 2022/2023.

Umunyamabanga Uhoraho muri Minisiteri y'Ubuhinzi n'Ubworozi, Dr Olivier Kamana, yavuze ko Kawa yahawe agaciro mu Rwanda

Aya marushanwa yitabiriwe n’abantu batandukanye barimo abahinga kawa, inganda ziyitunganya ndetse n’abayohereza hanze

Mu mwaka w'ingengo y'imari wa 2022-2023 u Rwanda rwohereje mu mahanga kawa irenga toni 20,000 yinjije miliyoni 115,9 $

Mu Rwanda hari ibiti bya kawa bifite imyaka irenga 40 bikeneye kuvugururwa mu myaka itanu iri imbere hagamijwe kongera umusaruro

Ni isomo bahawe mu buryo bw'ikiganiro nyunguranabitekerezo ku wa 5 Nyakanga 2024, kikaba gitangwa muri gahunda yo gukarishya ubwenge ku banyeshuri, nka bumwe mu buryo bujya bukoreshwa mu kwigisha.

Ass.Pr Prosper Simbarashe Maguchu, impuguke mu mategeko wigisha muri Kaminuza ya Vrije yo mu Mujyi wa Amsterdam mu Buholandi, yasobanuriye abo banyeshuri uko ibyaha bya ruswa n'iyezandonke bihagaze muri iki gihe ndetse n'uburyo umunyamategeko akwiye kwitwara mu guhangana nabyo.

Yakomeje ababwira uburyo ikoranabuhanga mu guherekanya amafaranga naryo ryongereye amahirwe abakora ibyo byaha nubwo n'uburyo bwo kubagenzura bwakajijwe.

Ati 'Niba ufite nk'umukiliya ukwiyambaje ngo umwandikishirize inzu cyangwa indi mitungo mu mategeko, ugomba kuba maso ukamenya ngo ese amafaranga ari kuyakura hehe. Bisaba gushyira mu nyurabwenge, noneho wagira icyo umenya, ntukizinzike ukaba wabimenyesha inzego zibishinzwe agafatwa.''

Yasobanuye ko ubusanzwe umwunganzi mu mategeko agomba kurinda ibanga ry'umukiliya we, ariko iyo uwo mukiliya agaragayeho ibyaha, icyo gihe biba bitakiri ibanga ryo kubika.

Dr Magushu yanagaragaje ko ruswa n'iyezandonke bimunga ubukungu b'ibihugu cyane cyane ibyo muri Afurika, aho usanga imitungo myinshi y'abategetsi ikomoka muri za ruswa n'ubundi buriganya bikadindiza amajyambere y'ibihugu byabo.

Yagaragaje ko ibyaha bya ruswa n'iyezandonke kenshi bigaragaramo abantu b'intege mu butegetsi aho n'abacamanza bo mu bihugu byabo bataba babafiteho ububasha, ari nayo mpamvu hakomeje kwifuzwa urukiko mpuzamahanga rureba ku byaha bya ruswa.

Ati 'Kuva mu 2012, hakomeje gutekerezwa uko hajyaho Urukiko mpuzamahanga rurwanya ruswa. Abantu benshi bakomeye bagiye bashyigikira iki gitekerezo, barimo abakuru b'ibihugu na za guverinoma, abashakashatsi mu by'mategeko, abagiye batsindiira ibikombe by'amahoro (Prix Nobel) n'abandi.''

Bamwe mu banyeshuri bitabiriye iri somo baganiriye na IGIHE, bavuze ko bungukiyemo byinshi birimo kumenya uko bitwara ku bakiliya bashobora kuba bafite imitungo ikomoka ku mafaranga yabonywe mu buriganya n'ibikorwa bitemewe.

Umuyobozi ushinzwe amasomo muri ILPD, Bangayandusha Viateur yavuze ko ILPD isanzwe igira ubu buryo bwo kwigisha, aho batumira abarimu bo muri za kaminuza bo hirya no hino ku Isi, abashakashatsi cyangwa abayobozi b'ibigo bifite aho bihurira n'amategeko, bakaza kwigisha abanyeshuri mu buryo busa nk'imikorongiro, byunganira amasomo asanzwe.

Bangayandusha yanavuze ko usibye ibiganiro by'amasomo, muri ILPD habaho n'ingendoshuri aho abanyeshuri bajya gusura ibigo bitandukanye bifitanye isano n'amasomo biga, byose bigamije gukarishya ubwenge.

Abanyeshuri bo muri ILPD bakunze kwiga muri ubu buryo bwo kuganirizwa n’impuguke zitandukanye mu mategeko

Ni isomo ryari ryahuje abanyeshuri batandukanye bo muri ILPD, ishami rya Nyanza

Umunyeshuri uhagarariye abandi muri ILPD Nyanza, Karake Daniel yavuze ko bungutse byinshi ku myitwarire y’umunyamategeko imbere y’ibyaha bya ruswa n’iyezandonke

Ass.Pr Prosper Simbarashe Maguchu yasobanuriye abo banyeshuri uko ibyaha bya ruswa n'iyezandonke bihagaze ku Isi

Mu Rwanda, haritegurwa amatora ya Perezida n’ay’Abadepite azaba kuwa 14-15 Nyakanga 2024. Ubu hakomeje kuba ibikorwa byo kwiyamamaza, bizarangira tariki 13 Nyakanga 2024. Mu bari kwiyamamaza, harimo Richard Kananga ushaka kujya mu Nteko Ishinga Amategeko agakomeza kuvuganira abafite ubumuga.

Richard Kananga ni umugabo w’imyaka 48, akaba afite umugore umwe n’abana bane. Afite impamyabumenyi y’icyiciro cya gatatu cya Kaminuza (Master’s) mu Miyoborere n'Iterambere (Governance and Development) yakuye muri Kaminuza ya Antwerp mu gihugu cy'u Bubiligi. Arambye mu nzego zitandukanye zivuganira abafite ubumuga.

Ni umuhuzabikorwa (Programs Manager) mu Muryango Mpuzamahanga w’Abadage wita ku miyoborere n'imibereho myiza y'abaturage (FES: Friedrich Ebert Stiftung). Yakoze muri Komisiyo y'Igihugu y'Ubumwe n'Ubwiyunge mu gihe cy'imyaka 8, akora no mu miryango inyuranye itari iya Leta harimo iyo mu gihugu na mpuzamahanga.

Mu kiganiro na InyaRwanda, Richard Kananga yavuze ko amaze imyaka 13 mu nzego z’abafite ubumuga, akaba amaze gukora ibikorwa byinshi. Yifuza gukomeza iyi mirimo y’abafite ubumuga mu Nteko “kugira ngo dukomeze ubuvugizi twubakira ku byagezweho, tukarushaho guhindura imibereho y’abafite ubumuga. Ku by’umusanzu byo turabikora cyane”.

Uyu mugabo uri guhatanira guhagararira abafite ubumuga mu Nteko Ishinga Amategeko, yakoze igihe kinini mu nama y'Igihugu y'abantu bafite ubumuga, ubu akaba ari umuhuzabikorwa w'Inama y'Igihugu y'abantu bafite Ubumuga mu Karere ka Nyarugenge aho amaze igihe kigera ku myaka 8.

Kandinda- Depite Kananga Richard yabaye kandi Umuhuzabikorwa wungirije w'Inama y'Igihugu y'abantu bafite ubumuga mu Ntara y’Uburasirazuba muri manda ya mbere y’uru rwego rushyirwaho. Bimwe mu by’ingenzi yakoze muri uru rwego rw'abafite ubumuga by'umwihariko mu karere ka Nyarugenge, harimo kuvuza abantu barenga 240.

Abenshi muri aba bantu yavuje ni abana bafite ubumuga bukomatanyije bakenera ubuvuzi bwihariye kandi buhenze. Ingengo y'imari muri ibi bikorwa yarazamutse iva kuri Miliyoni ebyiri Frw ubu ikaba igeze hafi Miliyoni 40 Frw ku mwaka. Ati “Ibi tubikora dufatanyije n'ubuyobozi bw'Akarere ndetse n'abafatanyabikorwa batandukanye”.

Yashakiye amacumbi abantu bafite ubumuga bayakeneye aha twavuga nko gukora ubuvugizi muri buri ‘Model village’ ya Nyarugenge hakagaragaramo amazu y'abafite ubumuga, gukodeshereza abakeneye icumbi batishoboye ndetse no gusanira abafite ubumuga amazu yabo ashaje. Ingengo y'imari kuribi bikorwa irakabakaba Miliyoni 340 Frw.

Kananga Richard yashakiye abafite ubumuga Insimburangingo n'inyunganira ngingo bazikeneye ku buryo muri Nyarugenge icyo kitari ikibazo gihangayikishije. Yakoze ubuvugizi kugira ngo abafite ubumuga binjizwe muri gahunda zinyuranye z'igihugu zibafasha kwiteza imbere zirimo nka VIUP, Girinka.

Ku bufatanye n'inzego z'igihugu n'abafatanyabikorwa, Richard Kananga yahize ko nta muntu ufite ubumuga mu karere ka Nyarugenge utagira ubwisungane mu kwivuza. Yashakiye telefone abahuzabikorwa b’Utugari n'Imirenge ndetse na komite y'Akarere kugira ngo ubuvugizi ku bantu bacu bwihute.

Mu gihe cya Guma Mu Rugo yashakiye abafite ubumuga ibiribwa n'ibindi bintu nkenerwa bya buri munsi yifashije abafatanyabikorwa batandukanye. Yubatse imikorere y'amakoperative yatangiye ari amatsinda ubu arakomeye cyane.

Yatunganyije imikorere y'ikigega cya “Gira Ubucuruzi”, ubu kirakomeye ku buryo ubu kibarirwa Miliyoni zirenga 70 Frw zigurizwa zikanishyurwa neza mu gihe ubundi abantu bayafataga nk'impano bigatuma abandi batayabona.

Yateje imbere imikino aho biturutse mu buvugizi yakoze, yazamuye ingengo y'imari y'imikino ikava kuri Miliyoni 4 Frw ubu ikaba igeze kuri Miliyoni 40 Frw buri mwaka, ati “Ibi byaduhesheje ibikombe binyuranye”.

Yasuye ibikorwaremezo binyuranye hagamijwe gukora ubuvugizi hagakurwaho izitizi aho ziri zitorohereza abafite ubumuga kugera kuri service bifuza.

Yakoze ubukangurambaga yise “House to house” agamije kumenya abafite ubumuga cyane abana bahezwa bakanafungiranwa n'imiryango yabo, abikora agamije guhindura iyo myumvire no kwita kuri abo bantu amenya iby’ibanze bakenera”.

Yakomeje avuga ko mu karere ka Nyarugenge bafite ibigo by'amashuri bafata nk'icyitegererezo mu burezi budaheza harimo nk'ikigo cya Burema kiri i Mageragere, ikigo Semerdon kiri i Nyamirambo na ECD y’abana bafite ubumuga iri Kabusunzu.

Ati “Ibi bigo tubyifashisha mu bukangurambaga twerekana ko ibigo by'amashuri bikwiye kubigiraho, twakoze ubugizi kandi ibi bigo bigenda bibona inkunga zinyuranye z'abafatanyabikorwa”.

Yavuze kandi bakoze ubuvugizi mu masoko aciririrtse yubatswe mu karere ka Nyarugenge habonekamo imyanya y'abafite ubumuga basabirizaga bahabwa n’igishoro ndetse bahabwa n'igihe cy'imyaka 2 batishyura ubukode kugira ngo babanze bisuganye”.

Richard Kananga avuga ko Imigabo n'Imigambi ngera mu Nteko afite harimo “Uburezi budaheza” (haba mu bikorwa remezo, mu mfashanyigisho ndetse n'ubumenyi bwabarimu). Harimo kandi “Kugera ku buvuzi”, hakurwaho inzitizi haba ku bikorwaremezo, ubumenyi ku baganga, no kwegereza insimburangingo n'inyunganirangingo abafite ubumuga.

Avuga ko azashyigikira ndetse agateza imbere imishinga n'ibikorwa by'abikorera bitanga akazi ku bafite ubumuga. Azakomeza gukora ubuvugizi mu gushyiraho gahunda y'imyuga yorohereza abafite ubumuga mu byiciro bitandukanye.

Azakora ubuvugizi ku kigega kihariye gishinzwe guteza imbere ba rwiyemezamirimo bafite ubumuga kibaha inkunga n'inguzanyo kunyungu iciriritse ku mishanga yabo ibyara inyungu. Mi mihigo ye harimo gukora ubuvugizi ko gahunda ziteza imbere imibereho y'abaturage zigaragaramo ikiciro cy'abafite ubumuga n'imiryango yabo.

Avuga ko mu byo azashyiramo imbaraga natorwa ari uguharanira ko abafite ubumuga babona ubutabera bukwiye harimo no kubona ababahagararira/abunganizi mu butabera. Azanatangiza ECDs z’abana bafite ubumuga ndetse ashishikarize gufatanya n'izindi nzego mu gushyiraho gahunda zafasha kurandura umuco wo gusabiriza

Harimo kandi usaba ko ahatangirwa service zinyuranye nka Banki, Ubwiherero rusange, Ubwikorezi, Ibitaro, bikorwa by’imikino n’handi hahurira abantu benshi, “kuzirikana imyanya y'abafite ubumuga barindwa imivundo n’imirongo”.

Yongeyeho ati “Kuzirikana ko mu itegeko rirengera abantu bakuze ko abafite ubumuga bitabwaho mu buryo bw’umwihariko. Gufatanya n'inzego zibishinzwe mu gukora ubuvugizi ku ishyirwa mu bikorwa by'umushinga Gasabo/Kigali disability complex ndetse n’ahandi mu ntara”.

Richard Kananga avuga ko nagera mu Nteko Ishinga Amategeko, azaharanira ko Ikigega gishinzwe guteza Imbere Imishinga Mito n'Iciriritse, BDF, gishyigikira imishinga nta ngwate yatswe abafite ubumuga. Mu Ububanyi n'amahanga, azashyira imbere gusangira ubunararibonye, ndetse n’inama mpuzamahanga zitandukanye.

Ba Rwiyemezamirimo bato bashaka inguzanyo mu bigo by’imari, basabwa gutanga muri BDF umushinga bafite, buri umwe akagaragaza uruhare rwe rw’ingwate rwa 50%, BDF ikamwishingira 50%. Icyakora ku rubyiruko n’abagore birihariye kuko BDF ibongereraho ingwate ya 15%, bivuze ko ibishingira ingwate ya 75% yose hamwe, bakishakira 25% isigaye.

Kandida-Depite Richard Kananga asanga bidakwiriye kwaka ingwate abantu bafite ubumuga igihe bari gusaba inguzanyo mu bigo by’imari. Avuga ko biri mu byo azaharanira, abafite ubumuga bakajya bahabwa inguzanyo batatswe ingwate n’imwe muri BDF, ibyo akaba ari mu rwego rwo kubafasha gutera imbere binyuze mu gushyigikira imishinga yabo.

Agakeregeshwa ku mikorere ya BDF

BDF, ni ikigo cyashyizweho mu 2011 na Leta y'u Rwanda na Banki y’Amajyambere y' u Rwanda (BRD) mu rwego rwo gufasha no korohereza ba Rwiyemezamirimo bato n'abaciriritse kugera kuri serivisi z’imari. Ni kimwe mu bigo by'ingenzi bishyira mu bikorwa gahunda y'igihugu ishinzwe umurimo (National Employment Program), kandi imirimo yayo igendera ku murongo w’ibyo bikorwa.

Muri 2015, BDF yafunguye amashami mu gihugu hose hagamijwe kwegereza serivisi ba Rwiyemazamirimo hagendewe kuri gahunda y'igihugu ishinzwe umurimo (NSDEPS — National Skills Development & Employment Promotion Strategy).

Serivisi BDF itanga harimo ingwate ku nguzanyo, ubujyanama, ikodeshagurisha, kongerera ubushobozi SACCO, inguzanyo k’ubuhinzi n’ubworozi, ndetse n’inkunga. Zimwe muri zo zitangwa binyuze mu masezerano ifitanye n’ibigo by’imari; izindi zihabwa abagenerwabikorwa nta wundi muhuza.

BDF imaze gufasha imishinga 48,000, umugambi wayo ni ugutanga serivizi zinoze kuri b rwiyemezamirimo bato n’abaciriritse bo mu Rwanda. Icyerekezo cyayo ni ugukuraho imbogamizi kuri ba rwiyemezamirimo bato n’abaciriritse zibabuza kugera ku mari.

Nubw hari abumva ko BDF itanga amafaranga si ko bimeze ahubwo yo itanga ingwate ku mutungo utimukanwa, ikaba yemerewe ibigo byose bito n'ibiciriritse, abantu ku giti cyabo, amashyirahamwe na za koperative n'inzego z'ishoramari. 

Ingwate itangwa na BDF ihabwa ubwoko bwose bw'ishoramari bugejeje ku mwaka umwe, imitungo, inganda, ibikoresho, amasambu, inyubako, ibinyabiziga, ubworozi n'ubuhinzi. Itangwa mu gihe cy'imyaka 10. Mu buhinzi, ubworozi no mu bindi bikorwa binyuranye, BDF yishingira inguzanyo itarenze Miliyoni 500 z'amafaranga y’u Rwanda. 

Umukandida Depite mu cyiciro cy’abafite ubumuga, Kananga Richard avuga ko gutorwa kwe bisobanuye iterambere ry’abafite ubumuga kuko azarushaho kubavuganira. Bamwe mu bafite ubumuga yafashije barashishikariza abanyarwanda kuzamutora “kuko yatuvuganira kurushaho, kuko n’ubu akiri mu nzego zo hasi nta cyo atadukorera”.

Hatanzwe urugero rw’igikorwa cy’indashyikirwa Kananga yakoze. “Dufite impamvu nyinshi dushishikariza abantu kumutora, akora ubuvugizi cyane, uhereye no kuri bariya bana batumva ntibavuge ku ishuri rya Masaridone aho abasabira inkunga byibura ku mwaka bakabona nka miliyoni enye zifasha abo bana kwiga nta nkomyi.”

Umusore wo mu Karere ka Nyarugenge mu mujyi wa Kigali wahoze ari umwana wo ku muhanda ariko akaba yarahinduriwe amateka na Kananga Richard, avuga ko uyu mugabo ushaka kuba Umudepite yabasanze bandagaye ‘abenshi twari mu mihanda dusabiriza, nta cyizere cy’ubuzima twari dufite, twari ikibazo kuri Leta’.

Yavuze ko ubuzima bwaje guhinduka kuva aho Kananga Richard abereye ubuyobozi mu nzego zinyuranye za Leta, ati “Yakoze ubuvugizi mu nzego zose, abafite ubumuga tubasha kwibonamo icyizere, uyu munsi ntabwo tukiri ikibazo kuri Leta ahubwo natwe dusigaye turi abafatanyabikorwa.”

Kananga Richard yavuze ko ibyo yakoze byose yabigezeho ku bufatanye n’inzego z’igihugu, ‘zituba hafi buri gihe’. Ati “Ni yo mpamvu nsaba abatora, kugira ngo bazatore Kandida Depite Kananga Richard kugira ngo ibyo mwumvise byageze mu Karere ka Nyarugenge, bigere n’ahandi ku bufatanye n’inzego zacu ziduhora hafi”.

Kananga Richard amaze imyaka 13 mu nzego zifasha abafite ubumuga

Kananga Richard yifuza ko BDF yajya iha inguzanyo abafite ubumuga nta ngwate

Richard Kananga yaraswe amashimwe n’abafite ubumuga yahinduriye ubuzima

Kananga Richard yifuza kuba Umudepite bikamufasha gukorera ubuvugizi abafite ubumuga

Ibi birori byabereye ku cyicaro Gikuru cy'Ishami ry'Umuryango w'Abibumbye ryita ku Buzima (OMS). Byitabiriwe n'abahagarariye ibihugu byabo ndetse n'imiryango mpuzamahanga i Genève, Abanyarwanda batuye mu u Busuwisi ndetse n'inshuti z'u Rwanda.

Ambasaderi Uhagarariye u Rwanda mu Busuwisi ndetse no mu Muryango w'Abibumbye i Genève, James Ngango, yagarutse ku rugendo u Rwanda rwanyuzemo mu kwiyubaka mu myaka 30 ishize, anashima ubutwari, umurava ndetse no gukunda igihugu byaranze ingabo za RPA, zakuye u Rwanda mu icuraburindi zigahagarika Jenoside yakorewe Abatutsi mu 1994.

Yagize ati “Ku ya 4 Nyakanga 1994, ingabo z'Umuryango FPR-Inkotanyi, zari ziyobowe na Nyakubahwa Paul Kagame, Perezida wa Repubulika y'u Rwanda, wahagaritse Jenoside yakorewe Abatutsi mu 1994, bityo Abanyarwanda bongera kugira icyizere cy'ejo hazaza, biteza imbere, bubaka u Rwanda tubona none. Iyi ntsinzi ntiyarokoye ubuzima bwa benshi gusa, ahubwo yahaye amahirwe buri Munyarwanda yo kugira uruhare mu kwiyubaka ndetse no kubaka Igihugu.”

Ambasaderi Ngango yanagarutse kandi ku rugendo rutari rworoshye rwagejeje u Rwanda ku bumwe bw'Abanyarwanda, ukwihesha agaciro ndetse n'iterambere mu myaka 30 ishize.

Yagize ati 'Nyuma y'imyaka 30 rubohowe ingoyi y'amacakubiri, u Rwanda kuri ubu ruri mu bihugu biza ku isonga muri Afurika mu kugira icyerekezo cy' iterambere rirambye mu nzego zinyuranye, cyane cyane mu ishoramari, ubukerarugendo, ubuvuzi, uburezi n'ahandi.'

Yakomeje asaba abitabiriye ibyo ibirori gusura no gushora imari mu Rwanda igihe icyo ari cyo cyose, anabatumira ku kwitabira shampiyona y'Isi y'umukino wo gusiganwa ku magare mu 2025, izakirwa n'u Rwanda kuva ku ya 21 kugeza ku ya 28 Nzeri 2025.

Ni ku nshuro ya mbere iri rushanwa rikomeye ku Isi rizaba ribereye mu Rwanda no ku mugabane wa Afurika muri rusange.

Muri ibyo birori kandi, hanasojwe imurikagurisha ry'ibihangano byiswe “Fierce Femmes” ryaberaga muri Gallery Brulhart i Genève, rikaba ryarateguwe na Kakizi Jemima, mu rwego rwo kugaragaza ibihangano by'abahanzi b'Abanyarwandakazi batanu ari bo Cynthia Butare, Odile Uwera, Teta Chel, Crista Uwase, na Miziguruka.

Iri murikagurisha ryateguwe mu rwego rwo kwifatanya n'u Rwanda mu bikorwa byo Kwibuka ku nshuro ya 30 Jenoside yakorewe Abatutsi mu 1994 mu Rwanda, binyuze mu bikorwa by'ubugeni.

Kwizihiza Kwibohora ku nshuro ya 30 ni uguha agaciro ubutwari bw'abahagaritse Jenoside, hizihizwa ubudacogora bw'Abanyarwanda ndetse hanashyigikirwa ubuyobozi bwiza bushyira imbere ubumwe bw'Abanyarwanda, iterambere no kwigira.

Byari ibyishimo ku bitabiriye ibyo birori

Ambasaderi Ngango James yakira abitabiriye ibyo birori

Umuhamirizo w'Intore uri mu byasusurukije abitabiriye uyu muhango

Muri ibyo birori habayeho umwanya wo kugaragaza umuco nyarwanda

Muri ibyo birori kandi hasojwe imurikagurisha ry’ibishushanyo byakozwe n’Abanyarwanda

Urubyiruko narwo ruri mu bitabiriye ibi birori

Abayobozi batandukanye bifatanyije n’u Rwanda mu birori byo kwizihiza umunsi wo kwibohora

Amb. Ngango yashimye abitabiriye ibi birori

Dr Tedros Adhanom Ghebreyesus (uwa gatatu uturutse iburyo) uyobora OMS ari mu bitabiriye uyu muhango

Umuhamirizo w'Intore uri mu byasusurukije abitabiriye uyu muhango

Muri ibyo birori habayeho umwanya wo kugaragaza umuco nyarwanda

[email protected]

Ni icyemezo atangaje nyuma y'aho ishyaka ry'Abakozi (Labour Party) ryegukanye intsinzi ku bwiganze busesuye mu matora y'abagize Inteko Ishinga Amategeko y'u Bwongereza, bishyira iherezo kuri guverinoma y'abasigasira amahame y'Abongereza (Conservatives) yari iyobowe na Rishi Sunak.

Mu kiganiro n'abanyamakuru kuri uyu wa 6 Nyakanga, Starmer yasobanuye ko iyi gahunda yapfuye kare kuko ngo ntiyigeze ifasha guverinoma gukumira abimukira bakoresha ubwato buto.

Ati “Iyi gahunda yarapfuye, yaranashyinguwe mbere y'uko itangira. Ntabwo yigeze ikumira. Ntabwo niteguye gukomeza gahunda idakumira.”

Minisitiri w'Intebe w'u Bwongereza yatangaje ko abinjiza abimukira mu gihugu cyabo mu buryo butemewe bakomeje ibikorwa byabo kuko babonaga ko amahirwe yo kubohereza mu Rwanda ari make cyane, munsi ya 1%.

Intsinzi y'Ishyaka ry'Abakozi yabonetse nyuma y'imyaka ibiri Starmer usanzwe Umuyobozi Mukuru waryo ateguje ko aramutse ayoboye Guverinoma y'u Bwongereza yahagarika ishyirwa mu bikorwa ry'iyi gahunda ishingiye ku masezerano yasinywe bwa mbere muri Mata 2022.

Starmer uri ku isonga mu bavuga rikumvikana mu Bwongereza bitambitse iyi gahunda, muri Gicurasi 2024 yatangaje ko azayihagarika natsinda amatora kandi ngo bizafasha guverinoma iyobowe n'Ishyaka ry'Abakozi kuzigama miliyoni 75 z'Amapawundi mu mwaka wa mbere.

Uyu munyapolitiki yasobanuye ko naba Minisitiri w'Intebe w'u Bwongereza, azashyiraho urwego rushya rushinzwe umutekano wo ku mipaka ruzaba rugizwe n'abapolisi, abasirikare n'intasi; bazafasha guverinoma gukurikirana abatwara abimukira binyuranyije n'amategeko, yizeza ko ruzatanga umusaruro kurusha kohereza abimukira mu Rwanda.

Gahunda yo kohereza abimukira mu Rwanda yashyigikiwe na ba Minisitiri b'Intebe batatu b'u Bwongereza uko basimburanye, bose bo mu ishyaka rya Conservatives. Aba ni Boris Johnson, Liz Truss na Rishi Sunak.

Minisitiri w’Intebe ucyuye igihe, Rishi Sunak, yizeraga ko kohereza abimukira mu Rwanda byagira uruhare mu guhagarika ubwato bubatwara binyuranyije n’amategeko

Minisitiri w’Intebe mushya w’u Bwongereza, Keir Starmer, yatangaje ko atazohereza abimukira mu Rwanda

Umutoza wa APR Handball Club, Bagirishya Anaclet yavuze ko k’umunsi w’ejo biteguye gutsinda Police bakegukana igikombe kuko uyu munsi byari bimeze nk’aho ntacyo bakiniraga.

Ni nyuma yo gutsindwa na Police HC ibitego 34-27 mu mukino wa kabiri wa Playoffs yashoboraga gutsinda ikegukana igikombe cya shampiyona.

Umukino wa mbere bateye Police mpaga kubera kwikura mu kibuga batishimiye imisifurire.

Uyu munsi ni bwo hakinwe umukino wa kabiri wa kamarampaka (Playoffs) aho APR yasabwaga gutsinda ikegukana igikombe gusa siko byagenze.

Wari umukino utoroshye aho APR yagowe bikomeye kuko yatakaje abakinnyi babiri Nshumbusho yahawe ikarita itukura ni mu gihe na kapiteni wa yo Niyonkuru Shaffy yavuye mu mukino kubera kuva amaraso mu mazuru.

Igice cya mbere cyarangiye APR itsinzwe ibitego 16-13 ni mu gihe umukino warangiye ari ibitego 34-27 bya APR HC.

Nyuma y’uyu mukino umutoza wa APR, Bagirishya Anaclet utishimiye imisifurire, yavuze ko biteguye gutwara igikombe ejo kuko uyu munsi bakinnye ari nk’aho ntacyo bakiniraga.

Ati “Biratangaje ko twakinnye igikombe kitari aha kandi cyakagombye kuba gihari, ejo rero twebwe igikombe nikiba gihari, giteretse hariya tuzakina kuko uyu munsi nta kintu twakiniraga kandi ari k’umukino twashoboraga gutsinda tugatwara igikombe, ubu iyo dutsinda byari kugenda bite? Impamvu batakizanye ngo kibe kiri aha byateguwe tujye tuvugisha ukuri.”

Gusa amakuru ISIMBI yamenye nubwo igikombe kitari ku meza ariko cyari gihari ndetse n’imidari iyo APR itsinda cyari guhita kizanwa.

Ejo saa 15h30′ kuri Kigali Pelé ni bwo hazakinwa umukino wa 3 wa Playoffs aho ikipe izatsinda izahita yegukana igikombe.

Anaclet ntiyishimiye imisifurire

Wari umukino utoroshye