Author: webrwanda

Ubu tuvugana hasigaye ukwezi n’icyumweru kimwe kugira ngo shampiyona y’icyiciro cya mbere mu Rwanda mu mupira w’amaguru itangire. Ni shampiyona izakinwa n’amakipe 16 nk’ibisanzwe ndetse yose akaba yaramaze kumenyekana.

Amakipe azakina shampiyona y’uyu mwaka ni: APR FC, Rayon Sports, Musanze FC, Mukura Victory Sports, As Kigali, Police FC, Kiyovu Sports, Amagaju FC, Gasogi United, Marine FC, Muhazi United, Gorilla FC, Etincelles FC, Bugesera FC, Vision FC na Rutsiro FC.

Muri aya makipe 16 amakipe 12 niyo amaze gutangira imyitozo, mu gihe amakipe 4 ariyo ataratangira imyitozo.

Ikipe zimaze gutangira imyitozo

Mu makipe amaze gutangira imyitozo harimo ikipe ya Police FC yabimburiye izindi, APR FC yayiguye mu ntege, ikipe ya Musanze FC, Mukura Victory Sports, Gorilla FC, Gasogi United, Rayon Sports, Vision FC, Muhazi United, Rutsiro FC Marine FC na Amagaju FC yaraye atangiye.

Bite by’amakipe ataratangira imyitozo?

N’ubundi ni amakuru yenda gusa ku bijyanye n’amakipe ataratangira imyitozo, aho yose umuntu ahuriye ku kibazo cy’amikoro.

Ikipe ya Kiyovu Sports biteganyijwe ko izatangira imyitozo mu cyumweru gitaha nko ku wa Gatatu, ndetse iyi kipe ikaba iri kurwana no kuva mu bibazo by’amadeni ibereyemo abakinnyi. Ikipe ya AS Kigali ntabwo iramenya neza igihe izatangira imyitozo, gusa nayo birashoboka ko icyumweru gitaha cyarangira yarayitangiye.  

Ikipe ya Bugesera FC izatangira imyitozo tariki 16 Nyakanga, gusa ntabwo ibijyanye n’abatoza bayo birasobanuka. Ikipe ya Etincelles FC nta mutoza ifite, abakinnyi bayo ntibazi igihe batangirira imyitozo ndetse nta n’amakuru n’amwe ubuyobozi burabaha.

Police FC niyo kipe yatangiye imyitoza mbere aho yatangiye tariki 10 Kamena 2024 

Bugesera FC izatangira imyitozo tariki 16 Nyakanga 2024

Etincelle FC ntizi igihe izatangirira imyitozo 

AS Kigali ishobora gutangira imyitozo mu cyumweru gitaha 

Kiyovu Sports nayo iri kwihanagura ibibazo by’amadeni ya FIFA ubundi igatangira umwaka mushya w’imikino

Ni umwe mu bahanzi bigaragaje cyane mu myaka 10 ishize, ndetse ari kwitegura kuzataramira abanya-Kigali mu gitaramo cyo kuzizihiza imyaka ishize ari mu muziki mu rugendo yahuriyemo n’ibyiza ndetse n’ibibi.

Muri iki gihe afite ibitaramo bikomeye agomba gukorera muri Poland azahuriramo n'abarimo Ruger uri mu bakomeye muri Nigeria, ndetse ategerejwe mu gitaramo mu Bubiligi azahuriramo n'umunyarwenya Michael Sengazi na Turahirwa Moses washinze inzu y'imideli ya Moshions.

Davis D yanyuze mu maboko y’abarimo Alex Muyoboke, ndetse yabaye igihe kinini mu inzu ifasha abahanzi mu bya muzika ya Incredible Records ya Bagenzi Bernard.

N’ubwo yakunze gukoresha iri zina rya ‘Shine Boy’ ariko benshi ntibigeze bamenya ko ari izina ryari risanzwe rifitwe n’umuraperi Khalfan aza kurimwegurira kubera ko yarikunze.

Mu kiganiro na InyaRwanda, Khalfan yavuze ko yabaye inshuti y’igihe kirekire na Davis D biri mu mpamvu zatumye amwegurira izina rye ‘Shine Boy’ yari asanzwe akoresha.

Ati “Ni njye wise Davis D izina ‘Shine Boy’ kuko ‘Shine Boy’ ryari izina ryanjye. Ndi muri Label ya Incredible Records najyaga mvuga ngo ariko ku mazina yanjye uwazongeraho ‘Shine Boy’, icyo gihe rero nibwo Davis D yambwiye ati wambabariye ukarimpa, naravuze nti uri umuvandimwe wanjye rijyanye, ntakibazo. Ndamuremera.”

Uyu muraperi avuga ko Davis D amuzi nk’umuhanzi witondera cyane amashusho y’indirimbo ashyira hanze, kandi buri wese wafashe igihe cyo kwitegereza yarabibonye.

Ati “Niho nyine abera ‘Shine Boy’! Iryo zina rero kuba nararimwise rikamugirira akamaro numva y’uko ari ikintu kinini, dufitanye ubushuti n’igihango. Aho ageze biranshimisha cyane.”

Khalfan yavuze ko gukurira muri Incredible Records byamuhaye kuba uwo ariwe mu muziki muri iki gihe. Kandi ni umuryango azirikana ko wareze cyane bagenzi be Davis D, Danny Nanone, Aime Bluestone, itsinda rya Active n’abandi banyuranye.

Yasobanuye ko Bagenzi Bernard washinze iriya Label ari umuntu uzi guhitamo neza umuhanzi kandi akamenya n’icyo ashoboye. Ndetse mu bahanzi batangiye bakorana harimo na Ngabo Medard Jorbert wamamaye nka Meddy usigaye akorera umuziki muri Leta Zunze Ubumwe za Amerika.

Khalfan yatangaje ko ariwe wahaye Davis D izina rya 'Shine Boy' akoresha nk'akabyiniriro

Khalfan yavuze ko ari inshuti ya Davis D biri mu mpamvu yamweguriye izina rye 

KANDA HANO UREBE IKIGANIRO TWAGIRANYE N'UMURAPERI KHALFAN

 “>

KANDA HANO UREBE INDIRIMBO 'IGIKUMWE'

 “>

KANDA HANO UREBE INDIRIMBO 'MY DREAMS' YA DAVIS D NA MELISSA

“>

Ni mu mukino wa 1/2 wakinwe kuri uyu wa Kabiri Saa tatu z’ijoro kuri Signal Iduna Park. Umukino watangiye ikipe y’igihugu y’u Bwongereza ariyo ihererekanya umupira neza ariko u Buhorandi akaba ari bwo bugera imbere y’izamu.

Bigeze ku munota wa 7 gusa, Declan Rice yakoze amakosa atakaza umupira ari mu kibuga hagati wifatirwa na Xavi Simons ahita yigira imbere arekura ishoti riragenda rinyeganyeza inshundura igitego cy’u Buhorandi kiba kirabonetse.

Nyuma yo gutsindwa igitego, ikipe y’igihugu y’u Bwongereza yatangiye urugendo rwo gushaka igitego cyo kwishyura kiza kuboneka ku munota wa 18.

Cyari giturutse ku ikosa myugariro w’u Buhorandi, Denzel Dumfries yarakoreye Harry Kane ari mu rubuga rw’amahina bituma umusifuzi atanga penariti nyuma yo kuva kuri VAR n’ubundi iterwa n’uyu rutahizamu ariyinjiza.

Umukino wakomeje ubona buri kipe igerageza guhererekanya umupira nta n’imwe iwiharira ndetse yose akanarema uburyo imbere y’izamu.

Ku munota wa 30 u Buhorandi bwari butsinze igitego cya 2 habura gato ku mupira wari uhinduwe na Xavi Simons, Denzel Dumfries ashyiraho umutwe ukubita igiti cy’izamu.

Mbere y’uko igice cya mbere kirangira, ikipe y’igihugu y’u Bwongereza nayo yagiye irata uburyo binyuze kuri Phil Foden warekuraga imashoti akagenda agakubita igiti cy’izamu cyangwa se umunyezamu akayakuramo.

Mu gice cya kabiri, Ronald Koeman utoza u Buhorandi yaje akora impinduka mu kibuga akuramo Donyell Mallen naho Gareth Southgate utoza u Bwongereza we akuramo Kieran Trippier ashyiramo Luke Shaw.

Ku munota 62 ikipe y’igihugu y’u Buhorandi yabonye uburyo buremereye imbere y’izamu ku mupira Joe Veetman yazamuye maze Vrgir ashyiraho umutwe, gusa birangira Jordan Pickford atabaye.

Umunyezamu w’ikipe y’igihugu y’u Buhorandi, Jordan Pickford yakomeje gutabara u Bwongereza akuramo imipira iremereye yabaga itewe n’abarimo Xavi Simons.

Umukino ugiye kurangira ikipe y’igihugu y’u Bwongereza yaje kubona igitego cya 2 gitsinzwe na Ollie Watkins winjiye mu kibuga asimbuye ku mupira yahawe na Cole Palmer nawe wari winjiye asimbuye.

Byarangiye u Bwongereza butsinze u Buhorandi ibitego 2-1 buhita bwerekeza ku mukino wa nyuma aho buzakina Espagne ku Cyumweru taliki ya 14. U Bwongereza bugeze kuri ‘Final’ ya Euro 2024 nyuma y’uko butavugwagaho rumwe kuva mu mikino yo mu matsinda.

Phil Foden yagerageje uburyo bwinshi muri uyu mukino nubwo byarangiye adatsinze igitego 

Ollie Watkins yishimira igitego yatsinze 

Harry Kane atera penariti yavuyemo igitego cya 1 cy’u Bwongereza 

Ibikorwa byo kwiyamamaza birabura iminsi mike bikarangira hanyuma abanyarwanda bagahitamo umuyobozi uzabagirira akamaro mu myaka itanu iri imbere.

Mu bikorwa byo kwiyamamaza mu ishyaka  rya Green Party, none ku wa 10 Nyakanga bakomereje ibikorwa byo kwiyamamaza mu karere ka Gicumbi gaherereye mu majyaruguru y’Igihugu mu murenge wa Byumba.

Mu byo yijeje abaturage bo mu karere ka Gicumbi, Hon Dr Frank Habineza yatangaje ko nibatora Ishyaka Green Party ikibazo cy'ingurane zimara imyaka myinshi zibasiragiza kizarangira bakajya bishyurwa vuba kandi bagahabwa ingurane ikwiye.

Dr Frank Habineza yagize ati:”Nzi yuko inaha muri Gicumbi mufite ibibazo byinshi by'ingurane, hari ahantu hanyujijwe ibikorwa bya leta , Amashanyarazi, amazi, imihanda ariko ntimubone ingurane ikwiye ku gihe byose barabimbwiye ndabizi, icyo dushyize imbere nuko itegeko rya (appropriation) ryo kuriha ingurane ryavugururwa umuturage akajya ahabwa ingurane ikwiye kandi ku gihe bakurikije ibiciro biri ku isoko nimutugirira icyizere ibyo tuzabikora.”

Hon Dr Frank yakomeje ati “Kuko niyo bakubariye amafaranga y'ingurane ikamara imyaka 4 usanga ntacyo akumariye, turahsaka ko mujya mwishyurwa vuba kandi bikajyana n'ibiciro byo ku isoko.”

Si ibyo gusa, Hon Dr Frank Habineza yavuze ko mu gihe baba bamaze kumutorera kuyobora igihugu azubaka ikaragiro ry’amata rinini mu karere ka Gicumbi ku buryo umusaruro w’amata ava muri aka karere ka Gicumbi yajya ahatunganyirizwa akagurishwa atunganyije neza.

Yavuze kandi ko nagirirwa ikizere azubaka uruganda rukora ifiriti zo mu gitoki muri aka karere kuko ari kamwe mu turere dukungahaye ku musaruro w’ibitoki bityo bikaba byatunganyirizwa mu karere ka Gicumbi. 

Ibi bikazakorwa muri gahunda yo kubaka inganda muri buri gace bitewe n’umusaruro ako gace gakungahayeho.

Kandida Perezida, Hon Dr Frank Habineza yongeye kwitsa ku bantu bagungisha abandi ko mu gihe umuntu yaba afunzwe azira ubusa azajya afungurwa agahabwa ingurane hanyuma uwafungishije mugenzi we uzira ubusa akurikiranwe.

Kuri uyu wa kane, Dr Frank Habineza aragirana ikiganiro n’itangazamakuru kigarambuka ku mbuga nkoranyambaga zitandukanye mu rwego rwo kwiyamamaza mu banyarwanda bafite uburenganzira bwo gutora ariko batuye mu mahanga. 

Guca akarengane, guteza imbere ibikorerwa mu Rwanda ni bimwe mu byo ishyaka Green Party rishyize imbere cyane

Umunya-Ghana uheruka gusinyira APR FC, Seidu Dauda Yussif yavuze ko afite ubwonko bukora cyane bityo ko ntawagakwiye kwita ku gihagararo cye ahubwo barebe ibyo akora mu kibuga.

Hari nyuma y’umukino we wa mbere muri APR FC yakinnye ku wa Kabiri w’iki
cyumweru tariki 9 Nyakanga 2024 muri CECAFA Kagame Cup batsinda Singida 1-0.

Uyu mukinnyi ukina mu kibuga hagati yugarira, yinjiye mu kibuga ku munota wa 64 asimbura Mugisha Gilbert, ni umwe mu bagaragaje ko bafite impano kandi bazafasha byinshi iyi kipe y’Ingabo z’Igihugu.

Yavuze ko afite ubwonko bukora cyane bityo abantu bajye bita ku musaruro we atanga kurenza kuba bareba igihagararo.

Ati “Ubwonko bwange burakora cyane. Ntimukandebe igihagarararo icy’ingenzi ni ikiri mu mutwe. Ntabwo ari ibyo kuvuga gusa, ahubwo byose bigaragarira mu kibuga kugira ngo buri umwe wese arebe ibyo ushoboye'.

Yakomeje avuga ko we icyamuzanye ari ugufasha APR FC kuba yagera ku rundi rwego rurenze urwo iri ho uyu munsi

Ati 'Abafana nabwira ko nzaba mwiza kurusha uwo babonye. Ndahari turi nk’umuryango, tuzaba umwe, maze dutume abafana bose n’umuryango wa APR wishima. Njye ndi hano kugira ngo APR igere ku byiza birushijeho.'

Uyu mukinnyi w’imyaka 23, yageze muri APR FC avuye muri Smartex FC y’iwabo muri Ghana yari amaze guhesha igikombe cya shampiyona. Yatsinze ibitego 3 atanga imipira 3 yavuyemo ibitego.

Dauda Yussif yahaye isezerano abakunzi ba APR FC

Junior Elanga-Kanga ukomoka muri Congo Brazaville, yamaze kugera mu Rwanda aho aje gusinyira ikipe ya Rayon Sports.

Mu ijoro ryo ku wa Gatatu tariki ya 10 Nyakanga 2024, ni bwo Kanga yasesekaye ku kibuga cy’indege mpuzamahanga cya Kigali i Kanombe aho aje kurangizanya na Rayon Sports.

Uyu rutahizamu uheruka gutandukana na AS Vita Club yo muri DR Congo, aje kuzahura ubusatirizi bw’iyi kipe bwarumbyemo ibitego.

Junior Elanga-Kanga byitezwe ko nta gihindutse agomba guhita atangira imyitozo kuri uyu wa Kane tariki ya 11 Nyakanga 2024 mu rwego rwo kwitegura umwaka w’imikino wa 2024-25.

Aje yiyongera ku bakinnyi nka myugariro w’umunya-Senegal, Omar Gning, Omborenga Fitina, Kabange, Richard Ndayishimiye, Rukundo Abdoul Rahman, Niyukuri Patient, Niyonzima Olivier Seif bamaze gusinyira Gikundiro.

Junior Elanga-Kanga yamaze kugera mu Rwanda aho gukinira Rayon Sports

Iyi Expo imaze gukundwa n'abatari bake izatangira tariki ya 25 Nyakanga 2024 ikazarangira tariki ya 15 Kanama 2024, izaba ibaye ku nshuro ya 27.

Kuri ubu ibuhugu 18 birimo u Buhinde, Singapore, u Bushinwa, Koreya y'Epfo, Syria, Pakistan, na Iran biri mu byamaze gutangaza ko bizitabira iyi Expo.

Mu bihugu bya Afurika byamaze kwemeza kuzitabira iri murikabikorwa harimo Benin, Kenya, Uganda, Ghana, Senegal, Tanzania, Mozambique, Togo, Egypt na Nigeria, aho bizamurika ibikoresho binyuranye.

PSF, yatangaje ko abantu bari hagati ya 10,000 na 15,000 aribo bazajya basura aho isanzwe ibera, mu gihe muri weekend biteganyijwe ko hazajya hasurwa n'abari hagati ya 25,000 na 45,000.

Imiryango izajya ifungurwa saa 9:00 z'igitondo ifungwe saa 10:00 z'ijoro mu munsi isanzwe, mu gihe muri weekend, imiryango izajya ifungwa saa sita z'ijoro.

Imurikagurisha riheruka kuba ku nshuro ya 26 ryitabiriwe n'abamurika bose hamwe 403 baturutse mu bihugu 21, bari barimo abamurikabikorwa bo mu Rwanda 291. Muri rusange abantu barenga ibihumbi 300 nibo bitabiriye kugura ibicuruzwa na serivisi bitandukanye.

Ni imurikagurisha ryari rifite umwihariko wo kuba hari ibigo by'itumanaho n'iby'ikoranabuhanga byaje kumurika ibikorwa byabo.

Urwego rw’Igihugu rw’Iterambere (RDB) ruba ruhari ngo rusobanure serivisi rutanga zirimo n’z’ubukerarugendo

Abakunzi ba mushikaki nabo baba batekerejweho

Abacuruzi b’imbuto zitandukanye nk’izi nanasi, bitabira Expo

Abana bashyirirwaho uburyo bwo kwidagadura buhagije

Yavutse ku babyeyi b'Abanyarwanda bahunze mu 1959, avuka mu 1965, avukira mu Burengerazuba bwa Uganda ahazwi nka Toro mu Nkambi y'Impunzi ya Kahunge, aba ari naho we n'abavandimwe be bakurira.

Yavutse ari uwa nyuma, mu muryango w'abana umunani kuko yari afite bakuru be batatu na bashiki be bane. Amashuri abanza yayigiye mu bigo bya Mpanga Primary School na Rwengoro Primary School byo muri Toro.

Icyiciro rusange cy'amashuri yisumbuye yacyize muri St. Leo's College Kyegobe, mu Karere ka Kabarole, nyuma aza kwerekeza mu Mujyi wa Kampala gukomeza amasomo ajyanye n'Amateka, Ubukungu n'Iyobokamana, HED.

Mu kiganiro uyu mugabo yagiranye na Sanny Ntayombya, cyatambutse kuri The Long Form, yavuze ko yakuriye mu buzima bugoye cyane, ndetse na bamwe mu bo bari baturanye bataboroheye.

Ati 'Ubuzima bwo mu nkambi imwe ntago bwari butandukanye n'ubwo mu yindi, ubuzima bwari bugoye. Twari tumeze nk'ababa muri pariki kuko twabanaga n'amatungo, twabanaga n'ingurube, imparage, imbwembwe, n'andi matungo magufi. Abahageze mbere bo babonye n'izindi nk'inzovu.'

Lt (Rtd) Sabena, yavuze ko mu nkambi babagamo bari bakikijwe n'Abatoro ndetse n'Abakiga, bamwe muri bo bahora babatoteza babasaba gusubira iwabo, bigatuma babangamirwa ndetse ntibisanzure.

Yavuze ko hari ubwo mu mashuri bakorerwaga ihohoterwa n'abandi banyeshuri bazira kuba Abanyarwanda, ariko biza guhinduka mu 1979 ubwo Idi Amin Dada wari uyoboye Uganda imyaka icyenda, yahirikwaga ku butegesti, mu bamukuyeho hakabamo na Maj. Gen. Fred Gisa Rwigema.

Ati 'Ariko no ku butegetsi bwa Milton Obote, Abanyarwanda benshi barahohoterwaga, kandi kuri we byari igihombo kuko byatumye benshi berekeza mu ishyamba kujya gushyigikira Museveni.'

Lt (Rtd) Sabena, yavuze ko nubwo yari ari gukurikirana amasomo i Kampala, atigeze ayasoza kuko yahise afata icyemezo cyo kwerekeza mu gisirikare.

Yagize ati 'Mu 1987 nari meze nk'abandi benshi bashakaga kubohora igihugu cyacu. Nari ngeze mu mwaka wa gatanu. Ntiyari njye gusa kuko twari benshi bataye amasomo yabo kugira ngo bajye mu gisirikare.'

'Intego yacu yari ukujya mu gisirikare tukabona ubumenyi, kugira ngo nyuma tuzajye kubohora igihugu cyacu.'

Lt (Rtd) Sabena, yavuze ko hari impamvu nyinshi zari zihari zatumaga bagira ubushake bwo gutahuka.

Ati 'Icya mbere ababyeyi bacu bahoraga batubwira ko tutari Abagande, aho niho ibyo bitekerezo byo kujya mu gisirikare byaziye, byahereye mu rugo. Ikindi n'uko ihohoterwa twakorerwaga ryahoraga ritwibutsa ko aho turi atari iwacu.'

Yakomeje avuga ko bari bazi ko inzira y'intambara ari yo yonyine babonaga ishoboka kugira ngo bagaruke mu rwababyaye, bityo kuri we kwinjira mu ngabo z'Ishyaka rya NRM byari nk'amahirwe.

Ati 'Kubera ko ubutegetsi bw'u Rwanda bwariho bwatubuzaga kugaruka iwacu, bwari bufite igisirikare, ubwo rero kubona ubumenyi mu bya gisirikare byari nko gushyira ibintu mu rwego rumwe kugira ngo natwe tugaruke, Twari tubizi ko ari yo nzira ndetse na NRM yari yadufunguriye imiryango twese twagiyeyo.'

Lt (Rtd) Sabena, yagaragaje ko kimwe mu byabateye imbaraga ari Abanyarwanda bari bari mu buyobozi bw'igisirikare cya Uganda.

'Maj Gen Fred Gisa Rwigema, yaduteye imbaraga. Yabaga ari kumwe na Museveni. Twaramubonye rero turavuga ngo natwe tugomba kuyoboka igisirikare, turamukurikira. No kuba muri ibyo bihe haravugagwa ko u Rwanda rugiye kubohorwa nabyo byatumye twinjira igisirikare.'

Lt (Rtd) Sabena, yavuze ko ubwo yari ari mu gisirikare, yajyaga asohoka akajya guhura n'Intore z'Umuryango FPR-Inkotanyi [Cadres], ubwo zabaga ziri gukundisha Umuryango Abanyarwanda babaga mu mahanga.

Ati 'Hari ubwo nigeze kubabwira ko ndwaye nahimbye urupapuro rw'ikiruhuko cy'uburwayi, bampa ukwezi ndagenda mpura nabo. Nibwo nahuye na Tito Rutaremara, Musoni Protais, Mutoni Christine, ni benshi cyane. Ibi biganiro baduhaga byaberaga mu Mujyi wa Kampala mu mwanya w'ibanga.'

Abajijwe niba kuba umusirikare wa Uganda ari ibintu byamunyuze, Lt (Rtd) Sabena, yavuze ko yabyishimiye kuko ari kimwe mu byamuteguriye ejo hazaza.

Ati 'Ryari ipfundo ry'uburyo nifuzaga ejo hazaza, nishimiye kuhaba nk'umusirikare kubera impamvu z'ahazaza.'

Mu gitondo cya tariki 01 Ukwakira 1990, Ingabo za FPR Inkotanyi zatangije Urugamba rwo kubohora Igihugu, Lt (Rtd) Sabena, witeguriraga kuba umu ofisiye mu gisirikare cya Uganda, yari ari muri Leta zunze Ubumwe z'Abasoviyete, ari gukurikirana amasomo ya cadet.

Mu minsi mike yakurukiye, nibwo amakuru yamugezeho ko bagenzi be bateye u Rwanda, ndetse ko hari n'abatangiye gupfa bituma afata icyemezo cyo guhagarika amasomo ye.

Ati 'Nahagaritse kujya ku ishuri hanyuma nicara nk'iminsi mike. Amakuru y'uko Maj Gen Fred Gisa Rwigema, yitabye Imana yangezeho nkiri mu Burusiya, bindya mu mutwe cyane kuko ari umuntu nari nzi.'

'Nahise numva ngomba guhagarika ishuri ariko ngomba no kubona impamvu yatuma mva ku ishuri, kuko nari noherejwe n'igihugu, nkoresha imisoro y'abaturage njyayo none ngo njye mpite ngaruka. Naravuze nti ninsubirayo ntasoje amasomo bazamfunga.'

Lt (Rtd) Sabena, yavuze ko nta yindi mpamvu yabonye yumvikana yatanga, uretse kumva ko agomba gusezera igisirikare cya Uganda.

Ati 'Nicaye mu cyumba cyanjye, nandika ibaruwa yo gusezera, nandikira Perezida w'Igihugu mubwira ko nsezeye igisirikare, kubera ko ndi Umunyarwanda. Ni uko byaje.'

'Uwari uyoboye itsinda ryacu, yahise ajyana ibaruwa yanjye kuri Ambasade ya Uganda muri Moscow, bamusaba ko twajyana, ngezeyo mbabwira ko ndi Umunyarwanda, kandi ntacyo bari bafite cyo kubikoraho. Ambasade iravuga ngo nta kibazo jya mu rugo.'

Lt (Rtd) Sabena, yavuze ko akimara kugera muri Uganda, byamugoye kubonana n'abo muri FPR Inkotanyi kuko yumvaga ko bose bagiye mu Rwanda.

Ati 'Nyuma y'igihe nko muri Gashyantare 1991 nibwo nabashije guhura n'aba cadres mu kazu gato ahantu hamwe mu Mujyi wa Kampala, batungurwa no kumbona, mbabwira ko ncaka uburyo nakambuka umupaka ariko bansaba kugaruka umunsi ukurikiye.'

'Umunsi nagarutse, nta muntu wari uhari, inzu yari yambaye ubusa. Nagerageje kurungurukamo imbere ariko nsanga ntibagihari. Kumenya aho bahise bajya ni ibintu byangoye nabyo cyane, ariko ku bw'amahirwe nabashije kubona undi muntu unyereka aho bari bari mu cyanya cy'inganda i Kampala.'

Lt (Rtd) Sabena, yavuze ko yaje guhura na Late Cpt Buyitare, wari ushinzwe kuzana abantu mu Rwanda n'abasirikare babaga bavuye muri NRM.

'Ubwo twarazanye ngeze Mbarara turarana muri hoteli, tuhamara iminsi mike, mu 1991 nsanga bagenzi banjye mu Birunga, Late Cpt Gahinda niwe wahanjyanye.'

Yongeyeho ati 'Nubwo nasanze ubuzima butoroshye, hari abo nari nzi bapfuye, ariko nari nishimiye kubasanga. Nashakaga kurwana cyane kuko nicyo nifuzaga kandi naje kubigeraho kuko bahise banshira muri 'Charlie Battalion' yari iyobowe na nyakwigendera Mico yungirijwe na Nyakwigendera Karemangingo.'

Mu 1993 muri operasiyo 'Iya Munani', Lt (Rtd) Sabena, ni umwe mu basirikare banyuze mu Birunga, berekeza Ruhengeri. 'Uko twamanutse niko hari umwanzi wasigaye mu Birunga habaho nko kwivanga. Abari baturi inyuma nibo baduteye, baturasa.'

'Niho narasiwe urutirigongo bituma mba pararize mpita ngwa hasi, numvaga ari ibisanzwe, byari ibihe bigoye cyane kuko no gukururuka ntibyari byoroshye, naryamye aho amasaha menshi, abandi twari kumwe baza kugaruka nyuma kumfata.'

Yagize ati 'Iyo nza kuba mfite intwaro yanjye nari kwirasa kuko sinashakaga ko umwanzi angeraho.'

Nyuma byagaragaye ko Lt (Rtd) Sabena, afite ikibazo gikomeye, ajyanwa kuvurirwa mu Rubaya, ahari hari irwariro rinini rya RPA, aba ari naho abagirwa, arakira ariko bimuviramo ubumuga bwa burundu.

Mu 1994 ubwo ingabo za RPA zatangiraga gufata uduce tumwe na tumwe, Lt (Rtd) Sabena, n'abo bari barwaranye babakuye mu Rubaya, babajyana i Kiziguro, abandi bari barwaye byoroheje bajyanwa i Byumba.

Muri Nyakanga 1994, abari barwariye i Kiziguro, nibwo bajyanywe i Kanombe, nyuma yo kubohora Igihugu no guhagarika Jenoside yakorewe Abatutsi, yahitanye ubuzima bw'abarenga miliyoni.

Sanny Ntayombya aganira na Lt (Rtd) Sabena mu kiganiro The Long Form

Lt (Rtd) Joseph Sabena yagarutse ku bihe yanyuze byatumye agana urugamba rwo kubohora u Rwanda