Author: webrwanda

Nshuti Dominique Savio yasezeranye imbere y’amategeko n’umukunzi we Uwase Tracy Tricia bari bamaze imyaka irenga 7 bakundana.

Ni umuhango wabaye ku wa Kane w’iki cyumweru tariki ya 8 Kanama 2024 ukaba warabereye mu Murenge wa Remera.

Nyuma y’imyaka 7 y’uburyohe bw’urukundo, bakaba bahisemo kubana akaramata igihe basigaje ku Isi bakakimara bari kumwe.

Nshuti Dominique Savio na Umutesi Tracy Tricia bagiye bakunda kugaragarizanya urukundo ku mbuga nkoranyambaga babwirana amagambo meza y’urukundo.

Mu kiganiro kihariye Savio aheruka kugirana n’ikinyamakuru ISIMBI muri Gashyantare uyu mwaka yavuze ko urukundo rwe na Tricia rugeze aharyoshye ndetse ko Imana ibihaye umugisha uyu mwaka bakora ubukwe, akajya kwa Tracy kumusaba akanamukwa ubundi bakajya imbere y’Imana na yo ikabiha umugisha.

Ati 'Imana nibishaka n’uyu mwaka birashoboka, inzoga zanywebwa mbirimo cyane. Ni we (Tracy) tukiri kumwe nta wundi.'

Muri 2017 ni bwo aba bombi urukundo rwa bo rwatangiye kuvugwa cyane mu itangazamakuru ubwo Nshuti Savio yakiniraga Rayon Sports.

Nk’abantu bakundana hari ibyo bataje guhuza bituma batandukana aho muri 2019 Tracy yaje kubwira itangazamakuru ko afite undi mukunzi.

Aba bombi bari bazi icyo bapfuye ndetse banamaranye igihe, baje kwiyunga bongera gusubira mu rukundo ubu bakaba biyemeje kubana akaramata.

Nshuti Dominique Savio yamenyekanye cyane muri Rayon Sports yakiniye kuva 2015 ubwo yari avuye mu Isonga, yayikiniye kugeza 2017 ubwo yajyaga muri AS Kigali yakiniye umwaka umwe agahita ajya muri APR FC na yo ayikinira umwaka umwe ari na bwo muri 2019 yahitaga ajya muri Police FC aheruka gutandukana na yo.

Savio na Tracy bari bamaze imyaka irenga 7 bakundana

Byari ibyishimo bikomeye kuri Savio na Tracy

Nshuti Savio yasezeranye imbere y’amategeko

Perezida Kiir yakiriwe n'Umunyamabanga wa Leta ushinzwe Ubutwererane bw'Akarere, Gen (Rtd) James Kabarebe ubwo yageraga ku Kibuga cy'Indege Mpuzamahanga cya Kigali i Kanombe.

Perezida Salva Kiir kandi ni we uyoboye Umuryango wa Afurika y'Iburasirazuba (EAC), yaherukaga mu Rwanda muri Gashyantare 2024.

Perezida Sissoco yakiriwe mu mvura idakanganye

Perezida wa Guinée-Bissau, Umaro Sissoco Embaló, yageze i Kigali aho yitabiriye Irahira rya Perezida Paul Kagame yakirwa na Minisitiri w'Imari n'Igenamigambi Yusuf Murangwa.

Perezida Umaro Sissoco yageze mu Rwanda mu mvura nke yaguye nyuma y'iminsi myinshi y'impeshyi.

U Rwanda na Guinée-Bissau bifitanye umubano w'igihe kirekire, aho bisanganywe amasezerano mu nzego zitandukanye zirimo ubucuruzi, uburezi, ubukerarugendo n'ubwikorezi bw'indege.

Ku rundi ruhande Umugaba Mukuru w'Ingabo za Uganda, Gen Muhoozi Kainerugaba, na we yageze i Kigali aho yitabiriye ibirori by'Irahira rya Perezida Paul Kagame yakirwa na mugenzi we w'u Rwanda Lt Gen Mubarakh Muganga.

Perezida Munangagwa yakiriwe na Francis Gatare uyobora RDB

Perezida wa Zibwabwe Emmerson Munangagwa nawe yasesekaye I Kigali aho yitabiriye irahira rya mugenzi we w'u Rwanda Paul Kagame watorewe indi manda.

Perezida Munangagwa yakiriwe n'Umuyobozi w'Urwego rw'Igihugu rw'Iterambere RDB, Francis Gatare.

Umubano w'ibihugu byombi ku buyobozi bwa Paul Kagame na Munangagwa ntiwaranzwe n'inzinduko zo ku rwego rwo hejuru gusa, ahubwo habayemo n'isinywa ry'amasezerano y'ubufatanye arenga 26 afitiye inyungu abantu bacu mu nzego zitandukanye zirimo uburezi, ingufu, ubutabera, ubukungu, imibereho y'abaturage n'umuco.

Sénégal yahagarariwe na Minisitiri w'Intebe, Ousmane Sonko

Ku ruhande rwa Sénégal, yohereje Minisitiri w'Intebe wayo, Ousmane Sonko, waje ahagarariye Perezida Bassirou Diomaye Faye.

Sonko yakiriwe ku Kibuga cy'Indege Mpuzamahanga cya Kigali i Kanombe n'Umunyamabanga wa Leta muri Minisiteri y'Uburezi, Irere Claudette.

U Rwanda na Sénégal bimaze igihe bifitanye umubano mwiza mu nzego zitandukanye. Ambasade y'u Rwanda muri icyo gihugu yafunguwe mu 2011.

U Rwanda na Sénégal bifitanye amasezerano arimo ay'ubufatanye mu by'umuco yasinywe mu 1975, ay'ubutwererane rusange yasinywe mu 2004, ay'ishyirwaho rya Komisiyo ihoraho ishinzwe kugenzura umubano w'ibihugu byombi yasinywe mu 2016 ndetse n'amasezerano y'ubufatanye ari hagati y'Urwego rw'Igihugu rw'Itangazamakuru, RBA na Radio Television Sénégalaise.

Muri iki gihugu cyo mu Burengerazuba bwa Afurika hatuye Abanyarwanda benshi, yaba abajyanywe n'amasomo n'abandi barimo abagezeyo mu myaka 40 ishize.

Guhera mu 2016, RwandAir yerekeje amaso muri Afurika y'Iburengerazuba aho ikorera ingendo mu mijyi myinshi irimo Cotonou, Abidjan, Douala, Dakar [aho igana kuva mu 2017] n'ahandi.

Ku ruhande rwa Sénégal, yohereje Minisitiri w'Intebe wayo, Ousmane Sonko, waje ahagarariye Perezida Bassirou Diomaye Faye

Bamwe mu bagore n'abakobwa b'ibyamamare bazwiho gukora cyane no guharanira iterambere ryabo, bavuga ko nubwo abakobwa b'iyi minsi bimitse ubunebwe bakwiriye gutekereza kabiri bagakura amaboko mu mufuka bagakora kuko nta kiryoha nko kwishimira iterambere wowe ubwawe wavunikiye kuruta kugira ibyo uhabwa n'undi muntu ugasanga nawe asigaye agukoresha ibyo ashaka mu bundi buryo.

Umwe muri aba bagore b'abashabitsi waganiriye na InyaRwanda, ni Uwimpundu Sandrine umaze kwamamara nka Rufonsina muri Sinema Nyarwanda ariko kandi akaba abifatanya no kurara amajoro asusurutsa abantu mu tubari tunyuranye twa Kigali. Uyu, yashishikarije abakobwa b'iki gihe guharanira kwigira.

Yagize ati: 'Abakobwa bahanga amaso ku bagabo barambabaza cyane kubera ko umuntu arigira yakwibura agapfa. Iteka iyo umuntu akugize, ahora agukangisha ibituma nyine akugira. Urumva wowe ntabwo uba ukiri wowe ku giti cyawe uba ufite undi muntu ukugize. 

Kandi iyo umuntu akugize aba agufite mu biganza bye. Nta terambere wumva wifuza ushobora kugeraho, kuko ukubeshejeho agutwara uko yumva abyifuza. Rero gukora cyane birafasha kandi burya kurya ibyo waruhiye byavuye mu byuya byawe numva ari byo bishimishije. Gutega amaboko biravuna.”

Abakobwa b’iki gihe bashishikarizwa gukura amaboko mu mufuka bagakora, mu gihe u Rwanda rushimirwa n’amahanga ko rwateje imbere abagore cyane cyane mu nzego za politiki, aho abarenga 60% mu Nteko Ishingaamategeko ari abagore naho abarenga 50% bakaba bari muri Guverinoma.

Dore bamwe mu bagore n’abakobwa bazwiho gushabika cyane b’ibyamamare mu Rwanda:

1. Anita Pendo

Anita Pendo, ni umwe mu bagore b’ibyamamare nyarwanda babiriye icyuya ibyo bagezeho uyu munsi. Akunze kugarukwaho nk’umugore w’umuhanga kandi w’umukozi ku bw’urugendo rukomeye yanyuzemo ariko kandi agakomeza agahatana ndetse akaba amaze kubaka izina rikomeye mu myidagaduro. 

Usibye kuba ari umunyamakuru ukunzwe cyane, Anita ni umushyushyarugamba ubirambyemo ndetse akaba n’umuhanga mu kuvanga umuziki.

2. Butera Isheja Sandrine

Izina Isheja Sandrine rirazwi cyane mu itangazamakuru. Ni umugore w’umuhanga, ugira umuhate mu byo akora, aramamaza, ayobora ibirori n’inama zitandukanye n’ibindi byinshi bimwinjiriza agatubutse.

3. Muyango Claudine

Muyango Claudine wamamaye cyane mu irushanwa rya Miss Rwanda, ni umwe mu bagore baharaniye iterambere ryabo mu Rwanda kandi bazi gushakisha mu buryo bwose bushoboka. Kuri ubu, Muyango akora umwuga w’itangazamakuru, azi gususurutsa abantu, aramamaza, ndetse no mu minsi ishize yashinze na Kompanyi ikora ibya ‘protocole’ ye ku giti cye.

4. Mutesi Scovia

Mutesi Scovia, ni umwe mu banyamakuru b’ibyamamare akaba azwi mu gukora inkuru zicumbuye. Agaragaza ukwitanga cyane mu kazi akora, kandi usibye itangazamakuru uyu mugore akora n’ubucuruzi dore ko afite n’iduka ry’imyenda.

5. Kate Bashabe

Kate Bashabe uri mu nkumi zikundirwa ikimero, akagira umuhate mu bushabitsi akora, ni umucuruzi w’imideli, akora ubwubatsi, ubuhinzi n’ibindi bitandukanye akorana n’ibigo byo mu Rwanda no hanze. Yakuranye inzozi zo kuzaba umugore w’icyetegererezo cyangwa rwiyemezamirimo ukomeye.

6. Uwimpundu Sandrine [Rufonsina]

Uwimpundu Sandrine umaze kwamamara nka Rufonsina muri Sinema Nyarwanda, ni umwe mu bakinnyi ba filime bakunzwe n’abatari bacye kubera ubuhanga bwe n’impano ye yihariye. Usibye gukina filime, uyu mugore amaze no kumenyekana mu bijyanye no gususurutsa abantu mu tubari dutandukanye mu Mujyi wa Kigali.

7.Aline Gahongayire

Aline Gahongayire, ni umuhanzikazi w’indirimbo zo kuramya no guhimbaza Imana umaze kubaka izina riremereye haba mu Rwanda no mu mahanga. Usibye ubuhanzi, afite n’ibikorwa by’ubucuruzi akora, ndetse abantu benshi bamukundira umutima we ukunda gufasha abandi no kuzamura impano z’abato kuri we.

8. Tidjara Kabendera

Tidjara Kabendera [TK] uri mu banyamakurukazi bubatse izina mu Rwanda ndetse akaba akurikirwa n’abatari bacye ku mbuga nkoranyambaga, ni umwe mu bagore bazi gukora ndetse baharaniye iterambere ryabo bagezeho uyu munsi.

9. Queen Kalimpinya

Kalimpinya Queen, umunyarwandakazi uri kwigaragaza neza mu marushanwa mpuzamahanga yo gusiganwa mu modoka, yamenyekanye cyane mu myidagaduro nyarwanda mu 2017 ubwo yitabiraga irushanwa rya Miss Rwanda, aho yanakuye ikamba ry’Igisonga cya gatatu.

10. DJ Brianne

Kubera gukunda umurimo, umurava agaragaza n’ibiganiro bye byuzuyemo ukuri kose n’urwenya, DJ Brianne ari mu bakobwa bavanda umuziki bagezweho mu Rwanda bakunzwe kugarukwaho ku mbuga nkoranyambaga.

“Mbega Ijoro ryiza i Kigali, Yesu yahawe icyubahiro.” Ni ubutumwa Sinach yanyujije ku rukuta rwe rwa Instagram avuga kuri All Women Together 2024 yamubereye ubuki. Ni igiterane ngarukamwaka cyitabiriwe n’abagore babarizwa mu bihumbi barimo 1286 barutse hanze y’u Rwanda. Ni ku nshuro ya kabiri Sinach aririmbye muri iki giterane kuko na 2023 yari ahari.

Ubwo yari amaze kwakirwa na Apostle Mignonne Kabera wanamushimiye ku bw’umurimo ukomeye akora wo kuririmbira Imana, umuramyi Sinach yagaragaje ibyishimo byinshi atewe no kongera gutaramira mu Rwanda. Ijambo rya mbere yavuze, yagize ati “Mwiteguye guhimbaza Imana.?” Iteraniro ryose ryahise rihaguruka rifatanya nawe kuririmba.

Mu muziki mwiza w’umwimerere, Sinach yatambiye Imana mu gihe kingana n’isaha n’igice. Kandi kuva ageze ku ruhimbi, kugera aruvuyeho iteraniro ryose ryari rihagaze rifatanya nawe kuramya Imana nta mupaka. Yahereye ku ndirimbo “Rejoice” yashyize hanze mu myaja 9 ishize. Indirimbo ye “Victory is my name” imaze amezi 5 niyo yasorejeho, iryohera benshi.

“Wakoze kuza mu gihugu cyacu, wakoze, wakoze.” Ni ko Apostle Mignonne Kabera yabwiye Sinach mu kumushimira. Mignonne yavuze ko hari igihugu cyo hanze y’u Rwanda yahuriyemo na Sinach, abahesha umugisha mu buhamya bwe, amusaba ko yazaza mu Rwanda kuko yumvise ubuhamya bwe bwaryohera Abanyarwanda, undi aramwemerera.

Muri 2023 Sinach yaje i Kigali mu giterane All Women Together cyabereye muri Kigali Convention Centre ari na cyo cyanditse amateka ko kuba igiterane cya mbere cyitabiriwe na Madamu Jeannette Kagame. Icyo gihe Sinach yasabye abitabiriye kwiyaturaho amagambo meza yo gukira no kurushaho kugendererwa n'Imana mu myaka iri imbere. 

Mu 2024 yongeye agaruka muri All Women Together yabereye muri BK Arena, yizihira benshi bituma Apostle Mignonne amusaba ko yazagaruka n’ubutaha. Ni ubusabe uyu muramyi yakiriye neza. Mbere yo kujya kwicara, Sinach yafashe ifoto y’urwibutso na Worship Team ya Women Foundation Ministries. Hahise hakurikiraho Ben & Chance nabo batanga ibyishimo.

All Women Together 2024 yitabiriwe n’abagore bagera mu bihumbi 10 barimo abarenga 1200 baturutse mu bihugu hafi 50 ku migabane itandukanye. Yitabiriwe n’Abashumba mu matorero anyuranye n’Abayobozi mu nzego nkuru za Leta barimo Minisitiri wa Siporo, Aurore Mimosa Munyangaju n’Umuvugizi w’Urwego rw’Igihugu rw’Ubugenzacyaha (RIB) Dr Murangira B. Thierry.

Amateka ya Sinach umaze gutaramira mu Rwanda inshuro eshatu; 2017, 2023 na 2024

Tariki 30 Werurwe 1972 ni bwo Sinach yabonye izuba, avukira i Lagos muri Nigeria, ibivuze ko afite imyaka 52 y’amavuko. Yahisemo gukoresha izina ‘Sinach’ arikuye ku izina rye (Osinachi) bitewe n’uko ‘Sinach’ ari izina yasanze ryakorohera abantu benshi kurivuga no kurimuhamagara. Sinach ni umwana w’umukobwa wa kabiri mu muryango w’abana barindwi.

Tariki 28/6/2014 ni bwo yashakanye na Joseph Egbu uzwi nka Joe Egbu (Pastor Joe), ubukwe bwabo bubera mu itorero Christ Embassy Church ahitwa Ikeja mu mujyi wa Lagos muri Nigeria. Umugabo we Joseph Egbu ni umupasiteri mu itorero Christ Embassy Church ari naryo uyu muhanzikazi akoreramo umurimo w’Imana.

N’ubwo ari umuhanzikazi ukomeye mu muziki wa Gospel, Sinach yize Physics (Ubugenge) muri Kaminuza ya Port Harcourt iherereye muri Leta ya Rivers, imwe muri Leta 36 zigize igihugu cya Nigeria. Amashuri abanza n’ayisumbuye yayigiye i Lagos muri Nigeria.

Mu bwana bwe ni bwo yakiriye Yesu Kristo nk’Umwami n’Umukiza we, kuva ubwo ahinduka umukristo. Sinach yatangiye kuririmba ahereye muri korali, abitangira akiri umwana muto. Yahereye muri korali yo mu itorero Christ Embassy rikorera mu mujyi wa Lagos muri Nigeria.

Pastor Chris Oyakhilome, Umushumba Mukuru w’itorero Christ Embassy ari ryo Sinach abarizwamo kuva yakwakira agakiza, yavumbuye impano yo kuririmba muri Sinach, ahita amugira Umuyobozi Mukuru wa gahunda yo kuramya no guhimbaza Imana.

Ni umurimo yatangiriye muri Believers Love World izwi na none nka Christ Embassy itorero rikomeye cyane muri Nigeria ryatangijwe na Pastor Chris Oyakhilome mu 1987. Abarizwa muri ‘Label’ yitwa World Music Ministry ahuriramo n’abaramyi Frank Edward na Ada Ehi.

Sinach wamamye mu ndirimbo “Way Maker” na “I Know Who I am”, ni umuhanzikazi, umwanditsi w’indirimbo akaba n’umuyobozi wa gahunda yo kuramya no guhimbaza Imana (Worship leader) muri Christ Embassy Church. Ari mu baramyi b’abanyafrika banakunzwe cyane muri Amerika n’i Burayi.

Muri Afrika ho afatwa nk’umwamikazi mu muziki wa Gospel bigashimangirwa no kuba ari we muhanzikazi wa Gospel ukize cyane muri Afrika. Si muri Afrika gusa ahubwo kuri ubu ni na we nimero ya mbere mu bahanzikazi bakora umuziki wa Gospel bahagaze neza ku Isi ugendeye ku bafite indirimbo zarebwe cyane kuri Youtube

Mu bihe byashize, Tasha Cobbs yari ku mwanya wa mbere mu kugira indirimbo zarebwe cyane, ariko uyu munsi wa none Sinach wo muri Nigeria ni we muhanzikazi ufite indirimbo yarebwe kurusha izindi zose za Gospel ku Isi aho indirimbo ye “Way Maker” imaze kurebwa na Miliyoni 268, ibituma aza ku isonga mu bahanzikazi ba mbere muri Gospel.

Sinach akurikirwa na Tasha Cobbs wo muri Leta Zunze Ubumwe za Amerika. Indirimbo “Fill Me Up” ya Tasha imaze kurebwa na Miliyoni 213. Icyakora Tasha afite umwihariko wo kugira izirenze imwe zarebwe n’abarenga Miliyoni 200, ari zo “Your Spirit” [Miliyoni 201], You know my name [Miliyoni 210] na “Fill me up” [213], mu gihe Sinach afite imwe.

Sinach amaze kuririmba mu bihugu bitandukanye ku isi birimo: Nigeria, Ghana, Kenya, Afrika y’Epfo, Leta Zunze Ubumwe za Amerika, Antigua, Barbuda, Trinidad, Tobago, Grenada, Uganda, Barbados, U Bwongereza n’u Rwanda agiye gutaramiramo ku nshuro ya gatatu, ni ukuvuga 2018, 2023 na 2024 aho agarutse mu giterane All Women Together 2024.

Sinach ni we muhanzikazi mu muziki wo kuramya no guhimbaza Imana [Gospel Music] ukize kurusha abandi muri Afrika aho umutungo we ubarirwa hafi Miliyoni eshanu z’amadorali ya Amerika [Miliyari 5 z’amafaranga y’u Rwanda] nk’uko bitangazwa na Naijamusic.

Umwibuke muri Album zanyeganyeje Isi nka ‘WayMaker’, ‘I Know Who I Am’, ‘Great Are you Lord’, ‘Rejoice’,’He did it Again’, ‘Precious Jesus’, ‘The Name of Jesus’, ‘This Is my Season’, ‘Awesome God’, ‘For This’, ‘I stand Amazed’, ‘Simply Devoted’, ‘Jesus is Alive’, ‘Chapter One’;

I'm Blessed’, ‘Shout it Loud’, ‘From Glory to Glory’, ‘Sinach at Christmas’ na ‘Sinach Live in Concert’, ‘There's an Overflow’ yo mu mwaka wa 2018, ‘Best of Sinach’ yo mu mwaka wa 2018, ‘Great God (Live in London)’ yo mu mwaka wa 2019.

Sinach umaze kwandika indirimbo zisaga 250 no guhabwa ibihembo byinshi mu muziki. Mu 2008, ‘This is your season’ yabaye indirimbo y’umwaka, mu 2011 ahabwa igihembo cy’umuhanzi witwaye neza mu muziki wa Gospel muri Nigeria (Best Gospel Artiste of the Year) mu irushanwa rya Nigeria Entertainment Awards.

Mu 2012 yahawe ibihembo bibiri ari byo West Africa Best Female Vocalist (umuhanzikazi w’umuhanga mu ijwi muri Afrika y’Uburengerazuba) na Best Hit Single (Indirimbo ikunzwe cyane), ibyo byose abihabwa mu irushanwa Love World Awards.

Mu 2013, Sinach yabaye umuhanzi w’umwaka muri Nigeria mu muziki uhimbaza Imana (Best Gospel Artiste of the Year) mu irushanwa rya NIPUGA Awards. Mu 2013, yahawe igihembo cy’umuhanzikazi mwiza mu muziki wa Gospel (Best Female Gospel Artiste of the Year).

Yahawe nanone igihembo cy’indirimbo nziza y’umwaka (Best Song of the Year) n’icy’Umuhanzikazi mwiza mu ijwi (Best Female Vocal) mu irushanwa Nigeria Gospel Music Awards. Muri 2016, yahawe igihembo cy’umuhanzikazi mwiza w’umwaka (Best Gospel Artiste) mu irushanwa AFRIMMA Awards.

Mu 2016 yahawe igihembo gikomeye cya ‘Song Writer of the Decade Award’ mu irushanwa LIMA Awards nk’umwanditsi mwiza w’indirimbo, wagize uruhare rukomeye mu muziki wa Gospel aho indirimbo ze zaririmbwe mu bihugu byinshi ndetse zigahindurwa mu ndimi zitandukanye ku migabane yose y’isi.

Muri 2016 kandi yahawe igihembo cya African Achievers Award for Global Excellence igihembo yahawe nk’umuhanzi w’umunyafrika wubashywe ku rwego mpuzamahanga. Nanone muri 2016 yahawe igihembo nk’umuhanzi witwaye neza muri Afrika y’Uburengerazuba (West Africa Artist of the Year) muri Groove Awards.

Umuhanzikazi Sinach uri mu bihe bye byiza mu muziki usingiza Imana, yashyizwe na YNaija ku rutonde rw’abakristo 100 bo muri Nigeria bavuga rikijyana (Top 100 Most Influential Christians in Nigeria). Yari aruhuriyeho na Pastor Chris Oyakhilome na Pastor Enoch Adeboye, abapasiteri b’ibirangirire muri Afrika.

Yegukanye igihembo cy’indirimbo y’umwaka mu bihembo “Loveworld International Music and Arts Awards (LIMA)”, ikinyamakuru PulseNg kimugira nimero ya mbere mu bahanzikazi b’Ikinyacumi [Female artiste of the decade — 2019], anashyirwa mu bahatanira igihembo cy’umuhanzi mwiza muri Afrika muri Africa Gospel Award — 2019.

Indirimbo ye “Way Maker” yatumye mu 2020 yegukana igihembo cy’indirimbo y’umwaka muri Dove Awards – irushanwa rifatwa nk’irya mbere ku Isi mu muziki wa Gospel. Mu 2022 yabaye umunyamuryango wa Grammy Recording Academy nk’uzajya atora muri Grammy Awards. Mu 2023 yahawe igihembo na Commonwealth nka ‘Global Ambassador’.

Sinach yeretswe urukundo rwinshi i Kigali muri All Women Together 2024

Benshi bahembuwe n’indirimbo z’umuramyi mpuzamahanga Sinach

Ben na Chance batanze ibyishimo mu giterane All Women Together 2024

Apostle Mignonne Kabera yashimiye cyane Sinach ku bw’umurimo ukomeye akora

Sinach na Pastor Jessica Kayanja muri All Women Together 2024

Apotre Mignonne hamwe n’umugabo we Eric Kabera

Umuvugizi wa RIB, Dr Murangira Thierry yiziwe cyane muri iki giterane

Habayeho umwanya wo kwatura umugisha ku bagabo bose bitabiriye iki giterane cy’Abagore

Sinach yafashe ifoto y’urwibutso hamwe na Worship Team ndetse na Apotre Mignonne Kabera & Eric Kabera

Police FC yegukanye igikombe kiruta ibindi mu gihugu “Super Cup” itsinze APR FC kuri penaliti 6-5, ni nyuma y’uko iminota 90 y’umukino yarangiye amakipe yombi anganya ubusa ku busa.

Wari umunsi wo gukina igikombe kiruta ibindi mu gihugu (Super Cup 2024) akaba ari na wo mukino ufungura shampiyona ya 2024-25.

Uyu mukino wahuje APR FC yegukanye igikombe cya shampiyona ndetse na Police FC yegukanye igikombe cy’Amahoro.

Ni umukino watangiye wihuta umupira uva ku izamu rimwe rijya ku wundi, ku munota wa 9, Niyibizi Ramadhan yagerageje ishoti rikomeye ariko umunyezamu arawufata.

Ku munota wa 13 Niyomugabo Claude yahaye umupira mubi Pavelh Ndzila awukoraho n’umutwe ugaruka mu izamu Kilongozi awushyira mu izamu ariko ukubita igiti cy’izamu abakinnyi ba APR FC bawukuramo usanga Muhadjiri ateye mu izamu unyura hejuru ya ryo.

Police FC wabonaga irimo irusha APR FC muri iyi minota, ku munota wa 16 yabonye kufura ku ikosa ryakorewe Ani Elijah, yatewe na Muhadjiri ariko Pavelh Ndzila awushyira muri koruneri itagize icyo itanga.

APR FC yabonye kufura ku munota wa 25 yatewe na Ruboneka ariko umunyezamu Patience awushyira muri koruneri itagize icyo itanga.

Mugsiha Gilbert yagerageje ishoti rikomeye ku munota wa 27 ariko umunyezamu wa Police FC awufata byoroshye.

APR FC na yo wabonaga yamaze kwinjira mu mukino, Victor Mboama yagerageje guterera inyuma y’urubuga rw’amahina ariko abakinnyi ba Police bawohereza muri koruneri.

APR FC yongeye kurokoka ku munota wa 39 ubwo Muhadjiri yateraga kufura ku ikosa yari akorewe ariko ukubita umutambiko w’izamu wudunda mu izamu ntiwajyamo. Amakipe yagiye kuruhuka ari ubusa ku busa.

Mu gice cya kabiri amakipe yombi yagiye arema uburyo bw’ibitego ariko kuyabyaza umusaruro biragorana.

Ku munota wa 68 APR FC yakoze impinduka 2, Victor Mboama na Mugisha Gilbert bavuyemo Mamadou Sy na Richmond Lamptey ni nako Police FC yakuyemo Djibril Akuki hinjiramo Simeon Iradukunda.

Abakinnyi nka Ruboneka Bosco, Niyibizi Ramadhan ku ruhande rwa APR FC bagerageje amahirwe ariko umunyezamu Patience ababera ibamba.

Ni nako Police FC abarimo Ani Elijah, Hakizimana Muhadjiri bageraje ariko biranga.

Ku munota wa 87, Police FC yakoze impinduka Mugisha Didier yasimbuye Richard Kilongozi ni nako ku ruhande rwa APR FC, Niyibizi Ramadhan yahaye umwanya Tuyisenge Arsene. Ku munota wa 90, Dushimimana Olivier yahaye umwanya Aliou Souane. Umukino warangiye ari ubusa ku busa bahita bitabaza penaliti 6-5.

Ku ruhande rwa APR FC; Niyigena Clement, Mamadou Sy, Aliou Souane, Byiringiro Gilbert, Umunyezamu Pavelh Ndzila bazinjije, Yussif Seidu Dauda na Richmond Lamptey bazihushije umunyezamu yazikuyemo ni mu gihe Police FC; Hakizimana Muhadjiri, Ani Elijah, Nsabimana Eric Zidane, Mugisha Didier, Iradukunda Simeon na Bigirimana Abedi bazinjije Yakubu arayihusha yayiteye hejuru

Police FC ikaba yegukanye igikombe, imidali na miliyoni 10 Frw ni mu gihe APR FC yahawe imidali na miliyoni 5 Frw.

Richard Ngendahayo ari imbere mu bahanzi bakomeye ba 'Gospel' babashije gushyira hanze Album igakundwa mu buryo bukomeye, kugeza ubwo indirimbo ziyigize zigaruriye imitima ya benshi.

Mu bihe bitandukanye, abategura ibitaramo i Kigali bagiye bagerageza kumutumira ariko bikanga ku munota wa nyuma. Hari amakuru avuga ko mu mpera z'uyu mwaka, uyu muramyi ubarizwa muri Amerika ashobora kuzataramira i Kigali.

Umwibuke cyane mu ndirimbo zirimo nka: 'Mbwira ibyo ushaka', 'Ibuka', 'Gusimba Umwonga', 'Si Umuhemu', 'Yambaye Icyubahiro', 'Wemere ngushime', 'Ijwi rinyongorera', 'Unyitayeho', 'Sinzakwitesha' n'izindi.

Ngendahayo amaze imyaka isaga 12 muri Amerika. Ariko impano ye n'ibihangano bye byatangiye gucengera mu bantu kuva mu 2005, aho ibihangano bye byifashishwa cyane n'insengero zinyuranye.

Ari mu myiteguro yo kujya gutaramira ku nshuro ye ya mbere muri Canada binyuze mu ruhererekane rw'ibitaramo 'Amashimwe Concert' bya Alpha Rwirangira, bizaba ku wa 13 Ukwakira 2024, no ku wa 23 Ukwakira 2024. Ni ibitaramo bigiye kuba ku nshuro ya Kabiri. 

Mu kiganiro na InyaRwanda, Alpha Rwirangira yavuze ko yifashishije umuramyi Ngendahayo muri ibi bitaramo 'kubera impamvu nyinshi'. Ati 'Impamvu ya mbere ni uko Richard Ngendahayo ni umuntu mfatiraho urugero, muri 'Gospel' ni umuntu wakoze ibintu bikomeye.'

Arakomeza ati 'Ni umuntu waje akora Album yose. Ni umuntu urebye wakoze ibintu bikomeye muri 'Gospel' akora indirimbo nziza cyane, kandi twese twakunze. Ni umuntu wakoze Album ikamara imyaka yose ikunzwe kugeza n'ubu.'

Alpha Rwirangira yavuze ko Album 'Niwe' ya Ngendahayo yafashije abantu benshi kandi 'yaradukujije bamwe na bamwe mu buryo bw'agakiza'. Akomeza ati 'Twamwigiyeho byinshi'.' 

Yavuze ko 'Richard ndamukunda cyane akaba n'inshuti'. Ati 'Ni umuntu nifuje kuba natumira aranyemerera kwitabira ubutumire.'

Alpha Rwirangira yavuze ko yatumiye Ngendahayo mu gihe yari afite izindi gahunda mu Ukwakira, ariko bitewe n'ubushuti bafitanye n'indi mibanire 'yaranyemereye'. 

Ati 'Ni ubwa mbere azaba aje muri Canada, kuririmba hano. Ni iby'umugisha kubona Imana ishoboje kuba ndi mu ba mbere bamuzana hano cyangwa ndi uwa mbere umuzanye hano. Imana ihabwe icyubahiro ku bw'icyo.'

Mbere ya 2019, byavugwaga ko Richard azataramira i Kigali. Ndetse, icyo gihe mu rwego rwo kwitegura urugendo rwe yasohoye indirimbo eshatu zirimo nka: 'Nzaguheka','Intwari batinya' na 'Urera'.

Ariko siko byagenze kuko abantu barategereje amaso ahera mu kirere. Iriya ndirimbo 'Nzaguheka' yatunganyijwe mu buryo bw'amajwi na Producer Patrick Buta uzwi cyane nka Sly BUTA ukorera muri Kilulu 9 Production (K9P).

Rwirangira wahagarariye u Rwanda mu marushanwa ya 'Tusker Project', yavuze ko ategura ibi bitaramo agamije gufasha abatuye Canada guhimbaza Imana.

Ati 'Ibi bitaramo ni ngaruka mwaka, bibaka bigamije gushima Imana. Hari abandi bahanzi bazabana nanjye muri iki gitaramo cyo kuri iyi nshuro. Gusa tuzabimenyesha abantu mu minsi iri imbere.'

Yavuze ko mu byo ateganya muri uyu mwaka harimo no kugera i Kigali agasura umuryango we, ariko kandi bidakunze yagera i Kigali mu 2025. Ati 'Ndabiteganya cyane (kuza mu Rwanda) ni vuba cyane.'

Ni ku nshuro ya kabiri ibi bitaramo bigiye kuba. Kuri iyi nshuro byateguwe na Healing Lab. Ushingiye kuri ‘Affiche’ yagiye hanze, bigaragara ko Alpha Rwirangira azakora ibitaramo bibiri.

Igitaramo cya mbere kizaba ku wa 13 Ukwakira 2024 mu Mujyi wa Edmonton muri Canada, azakomereza mu Mujyi wa Ottawa muri Canada, ku wa 23 Ukwakira 2024. Mbere y'umunsi w'igitaramo ni ukwishyura amadorali 50, ni mu gihe ku munsi w'igitaramo ari ukwishyura amadorali 70.

Alpha Rwirangira ni umuhanzi w'umunyarwanda wabonye izuba ku wa 25 Gicurasi 1986. Ni umwanditsi w'indirimbo witabiriye amarushanwa anyuranye.

Akunze kuririmba indirimbo zubakiye ku mudiho wa Reggae, Soul R&B n'izindi. Kandi yita cyane ku ndirimbo ziri mu rurimi rw'Ikinyarwanda, Icyongereza n'igiswahili.

Yitabiriye irushanwa rya Tusker Project ndetse abasha kuryegukana, aho yari ahatanye n'abahanzi bakomeye mu Karere k'Afurika y'Iburasirazuba. Yanakoranye indirimbo n'abarimo umuraperi A.Y binyuze mu ndirimbo nka 'Songa Mbele, anafitanye indirimbo 'Come To Me' yakoranye na Bebe Cool.

Afite izindi ndirimbo zirimo nka: One Africa, Mama, Love yakoranye na Junior (Rwanda), This Child, Mwami, Happy Day yakoranye na Spax (Rwanda), Only you, Ndagukunda 'I Love You' yakoranye na Princes Priscilla (Rwanda) n'izindi.

Alpha Rwirangira yahaye Imana icyubahiro nyuma y'uko abashije gutumira Richard muri Canada

Richard Nick yigomye ibindi bikorwa yari afite mu Ukwakira yiyemeza gushyigikira Alpha

Alpha Rwirangira yavuze ko ibi bitaramo bigamije gufasha Abanyarwanda n'abandi batuye muri Canada gusabana n'Imana

Ibi bitaramo bizaba mu gihe cy'Iminsi ibiri, mu Mujyi wa Ottawa no muri Edmonton 

KANDA HANO UBASHE KUMVA ALBUM 'NIWE' YA RICHARD NICK NGENDAHAYO

“> 

Aba baririmbyi b’i Nyarugenge batangarije Isi yose ko Ijambo ry’Imana ari igisubizo ku bibazo byose biriho. Bakomeza bavuga ko rihindura amateka y’umuntu, rikarema ibitariho bikabaho, akaba ari ryo ryaremye Ijuru n’Isi. Bati “Iryo jambo ni ryo rituyobora, ni ryo ridukomeza, ni ryo ritubeshaho, ryishakira inzira aho rinyura nta cyaryitambika kuko rikomeye nka nyiraryo”. 

Bagarutse ku bo Yesu yagaburiraga imigati mu biterane bigari yakoreye ku Isi, bavuga ko habaga harimo n’abafite inzara nyinshi y’Ijambo ry’Imana riva mu kanwa ka Yesu. Nabo bitanzeho urugero bavuga ko bataje mu murimo w’Imana bakurikiye imigati gusa ahubwo banafite inzara n’inyota y’Ijambo ry’Imana.

Bati “Imigati yose ijya irangira, abayiriye bose bagashiraho. Amafi yose ajya arangira abayariye nabo bagashiraho, ibyo dutunze byose bijya bishira bikarangira, natwe tubitunze twese tugashiraho, ubwiza n’ikimero n’uko uteye bijya birangira, nawe ubifite rwose ugashiraho, ariko Ijambo ryawe Yesu we ntirishira, rihoraho. Ni ryo ridutunze ku manywa na nijoro, ni ryo ritubeshaho mu mvura no ku zuba”. 

Umutoza w’amajwi wa Korali Agape, Josue Manishimwe yabwiye inyaRwanda ko iyi ndirimbo yanditswe n’umwe mu baririmbyi ba Agape wahoze ari n’umutoza w’indirimbo. Yavuze ko bahora isenga Imana ngo Mwuka Wera atange igihimbano cyakora ku mitima y’abantu. Ati “Abahimbyi b’indirimbo rero turabasengera, kandi bigira umusaruro ko tubona indirimbo zacu zigira amagambo n’ubutumwa byihariye”.

Yavuze ko ubutumwa banyujije muri iyi ndirimbo bise “Ijambo”, ari ubwibutsa abantu ko baremwe n’Ijambo akaba ari naryo ribabeshaho. Ati “Mu by’ukuri nk’uko amagambo ari muri iyi ndirimbo avuga, tubona ko ibintu byose birangira, bigashiraho n’abantu bararangira, ariko Ijambo ryabiremye rikanaturema rihoraho. Mbese ni kwibutsa abantu ‘Orgine’ y’ibintu.” 

Yunzemo ati “Tunababwira ijambo riri mu Abefeso 3:20 (Ibasha gukora ibiruta ibyo dusana n’ibyo twibwira, nk’uko imbaraga zayo ziri, zidukoreramo). Ariko ibyo byose ni ijambo ryabiremye”. Yisuze Bibiliya, yagaragaje ko ab’iki gihe bakeneye Ijambo ry’Imana, anibutsa abakristo ko “agakiza kacu karatwegereye kuruta igihe twizereye”. 

Yagaragaje impamvu ijambo ari ingenzi muri iki gihe Isi iyobowe n’ikoranabuhanga. Ati “Isi y’iterambere igeze aho abantu bayoborwa n’ubwenge, ikoranabuhanga ndetse tugeze ku byo bita ‘Artificial Intelligence’ [ubwenge bw’ubukorano]. Turagira ngo abantu bongere bubakire ku Ijambo ry’Imana kuko ni ryo tangiriro n’iherezo. Ibibazo isi ifite byose, igisubizo kiri mu Ijambo”.

Josue Manishimwe umwe mu batoza b’amajwi b’abahanga cyane muri iki gihugu, yavuze ko nyuma y’iyi ndirimbo “Ijambo” yakiriwe neza cyane, Korali Agape itagiye kwicara ngo ishyire akaguru ku kandi ahubwo “tubafitiye izindi [ndirimbo] nyinshi kandi nziza. Tuzagenda dukora n’ibitaramo kugira ngo abantu barusheho guhemburwa n’Ijambo.”

Korali Agape igizwe n’abaririmbyi barenga 100. Yashinzwe mu 1997, itangira ari itsinda ry’ivugabutumwa (Groupe d’evangelisation). Mu 1999 ni bwo yabaye korali, gusa muri 2001 ni bwo yabaye korali mu buryo budasubirwaho. Izina ‘Agape’ barikuye muri Bibiliya aho iri jambo risobanura ‘Urukundo rw’Imana’. Intego y’iyi korali ni ‘Ukugira urukundo rw’Imana’. 

Agape choir yamamaye mu ndirimbo zirimo “Ukuboko Kwiza” yakunzwe bihebuje, iza no gusubirwamo n’umwana muto witwa Jessie, igera kuri bensh cyane. Izwiho gucuranga umuziki w’umwimerere na cyane ko ifite ibyuma byayo bwite bigezweho. Mu ndirimbo zayo yibanda ku gukomera kw’Imana n’ubundi butumwa bushoye imizi mu Ijambo ry’Imana.

REBA INDIRIMBO “UKUBOKO KWIZA” YA KORALI AGAPE

Korali Agape yamamaye mu ndirimbo “Ukuboko kwiza” yashyize hanze indi bise “Ijambo”

Igikorwa cyo kwishimira intsinzi y'abakandida b'Umuryango FPR Inkotanyi by'umwihariko Perezida Paul Kagame byabaye ku wa Gatanu, tariki 9 Kanama 2024 gihuzwa no kwakira komite nshya ya Task Force Ines Ruhengeri.

Bavuga ko bishimira byinshi bagezeho n'uruhare bagize mu bikorwa by'amatora kugeza ku ntsinzi y'abadepite b'Umuryango n'Umukuru w'Igihugu Paul Kagame bavuga ko bafitanye igihango kandi ko badateze kumutererana.

Umuyobozi w'Umuryango FPR Inkotanyi muri Ines Ruhengeri, akaba n'Umuyobozi Ushinzwe Amasomo n'Ubushakashatsi, Dr. Sindayigaya Samuel ahamya ko igihango bafitanye na Perezida Paul Kagame n'imiyoborere ye myiza babiheraho bubaka ibifatika n'umuryango.

Yagize ati “Ibyishimo byari ngombwa kuko mu mateka ya Ines yafunguwe ku mugaragaro na Perezida Paul Kagame ndetse dufite n'imodoka y'impano yaduhaye, muri icyo gihango twagiranye nabwo dushobora gutezuka ku gukora neza, gukorera igihugu ndetse bikaduha n'imbaraga kuko dufite umubyeyi nawe udukunda natwe twishimira.”

Yakomeje agira ati “Turi kugenda dutegura n'abana bagenda batugana muri kaminuza kugira ngo tugire ikiragano kizagenda gihereza ikindi ndetse tubone n'uko tuzakomeza gushyigikira imigambi ya FPR Inkotanyi mu buryo burambye buhoraho. Imihigo dufite ni ugukomeza manifesito no kureba imbere ku byiza byose by'Umunyarwanda haba mu bukungu, imibereho myiza, ubutabera n'umutekano u Rwanda rukaba indashyikirwa tubigizemo uruhare.”

Bamwe mu banyeshuri bo muri Ines Ruhengeri bakaba n'abanyamuryango ba FPR Inkotanyi, bavuga ko iterambere igihugu kigezeho nta gushidikanya ko barikesha Perezida Paul Kagame n'Umuryango FPR Inkotanyi kandi ko nabo bagomba guharanira ko bitazasubira inyuma.

Nishimwe Pacifique yagize ati “Nk'urubyiruko nishimira ko niga mu gihugu kirimo umutekano kandi umukobwa n'umuhungu bose biga kimwe nta busumbane, dufite amashuri, uburezi kuri bose, amavuriro n'ibindi.”

Yakomeje agira ati 'Urubyiruko bagenzi banjye icyo nababwira ni ugukunda igihugu bakabishishikariza n'abandi babana nabo tugafatanya no kurwanya abashaka guharabika igihugu cyacu cyane cyane ku mbuga nkoranyambaga tugaharanira ubumwe bw'Abanyarwanda.”

Mpinganzima Carine nawe yagize ati “Twishimira gushyira mu bikorwa amahame y'umuryango kuko watangiye ari icyerekezo ariko ubu ibyari inzozi byagiye mu bikorwa biraniyongera babigeza ku baturage. Agaciro duhabwa haba mu mahanga ni uko hari byinshi byakozwe, natwe rero tuzakomeza kubisigasira no guharanira kugira intego zagutse.”

Muri iki gikorwa cyahujwe no kwakira komite nshya ya Task Force Ines Ruhengeri, abasoje ikivi n'abinjiye mu nshingano nabo bishimira ibyagezweho bafatanyije ariko bagahamya ko urugamba rugihari kandi ko bagiye gukomeza gutanga umusanzu wabo mu guharanira iterambere ry'abaturage.
Kamanzi Ernest winjiye mu nshingano yakomeje kubyo bashyize imbere muri manda yabo.

Ati ” Ubu dushyize imbaraga ku kubonera abaturage batishoboye ubwisungane mu kwivuza, kububakira ubwiherero no gusana ubutameze neza mu buryo bwo kubafasha mu mibereho myiza.”

Yakomeje agira ati “Dutangiranye na manda ya Perezida wa Repubulika dufite inshingano zo gushyira mu bikorwa ibyo yemereye abaturage, ubu tugiye gutangirira ku gufasha abaturage 200 kubona ubwisungane mu kwivuza muri uku kwa cyenda kugira ngo bagire ubuzima buzira umuze.”

Umuyobozi w'Umuryango FPR Inkotanyi mu Ntara y'Amajyaruguru, Mugabowagahunde Maurice, yashimiye Ines Ruhengeri uruhare yagize mu kwamamaza abakandida b'Umuryango FPR Inkotanyi, avuga ko kuba hari urubyiruko rwitabira bigaragaza ko imbere ari heza.

Yagize ati “Ndabashimira uruhare mwagize mu bikorwa byo kwamamaza Umukandida Perezida Paul Kagame n'Abadepite byatanzwe na FPR Inkotanyi ndetse na nyuma yo kwamamaza mwongeyeho gutora neza ibi bikaba byaratumye Intara y'Amajyaruguru iba iya mbere mu gutora Perezida Paul Kagame.”

“Igihugu cyacu tugira amatora atabamo akajagari nk'ako twumva mu bindi bihugu kandi ibyo tubikesha ikinyabupfura Abanyarwanda bafite kuko batojwe n'Intore izirusha intambwe, Paul Kagame.'

Akomeza avuga ko igikurikiyeho ari ugukora ibyo bemereye abaturage kugira ngo iyi manda izabe iyo gusigasira ibyagezweho no guteza imbere abaturage.

Muri Ines Ruhengeri habarirwa abanyamuryango ba FPR Inkotanyi bagera mu 1500 bagiye bagira uruhare rukomeye mu guteza imbere imibereho myiza y'abaturage ndetse bagize n'uruhare rukomeye mu kwamamaza Umukandida Perezida n'Abadepite baje no kwegukana intsinzi ari nabyo bishimira.

Chairman Mugabowagahunde Maurice yashimiye Ines Ruhengeri uruhare yagize mu kwamamaza Abakandida ba FPR Inkotanyi

Umuyobozi wa Task force Ines Ruhengeri icyuye igihe Gisa Stiven yibukije ko urugamba rwo guteza imbere abaturage rukomeje

Muri Ines Ruhengeri habarirwa abanyamuryango ba FPR Inkotanyi bagera mu 1500

Icyo gihe Umwami w'u Rwanda yararashwe ngo arigitira muri aka gace hahita hamera igiti cy'umuguruka kidapfa kuboneka henshi.

Aya mateka aherereye mu Mudugudu wa Kiryango mu Kagari ka Nkungu mu Murenge wa Munyaga mu Karere ka Rwamagana. Iki gice cyahoze ari ku mbibi z'u Rwanda kuko ariho rwagabaniraga n'igihugu cy'i Gisaka.

Umukozi w'Inteko y'Umuco ushinzwe kubungabunga ahantu Ndangamurage, Nturo Chaste, avuga ko muri Nkungu ahari igiti cy'umuguruka kimaze imyaka irenga 60 cyasimbuye ikindi kinini cyari kimaze imyaka myinshi cyane ariho Umwami Ruganzu I Bwimba yatangiye ahasaga mu 1300-1400 aho yahageze aje nk'umutabazi w'umucengeri.

Umutabazi w'umucengeri ni imvugo ikoreshwa ku bikomangoma cyangwa Umwami mu gihe yabaga agiye kwitangira igihugu kugira ngo abe umutabazi wacyo mu gihe cy'urugamba.
Yajyagayo amaze kuragurizwa indagu zikerekana ko niyitangira igihugu amaraso ye azatuma batsinda umwanzi. Nawe ni gutyo yahageze avuye i Sasabirago muri Fumbwe ubwo u Rwanda rwarwanaga n'i Gisaka.

Nturo yavuze ko Umwami Ruganzu I Bwimba ageze muri aka gace ka Nkungu, umwanzi yaje kumurasa hanyuma bamwe ngo bakavuga ko yahise arigitira bityo hamera igiti cy'Umuguruka. Amateka avuga ko kandi ashobora kuba yarafashe akababi akakihanaguza aho akajugunye ngo hakamera igiti cy'Umuguruka.

Iki giti kuva icyo gihe cyari kigihari cyashengutse mu 2001 nyuma y'imyaka hafi 600. Cyareshyaga na metero 200 kikaba cyari gifite umubyimba wa metero zisaga zirindwi.

Mutsinzi Claver wavukiye ku musozi wa Nkungu mu 1963, yavuze ko yamenye ubwenge ahari igiti cy'umuguruka ari mu isambu yabo. Hari igiti kinini cyane aho bababwiraga ko iyo ugitemyeho gato kiva amaraso ariko byari ukubabeshya kugira ngo batazajya bagisagarira, ngo cyari igiti kinini cyane kuburyo munsi yacyo harimo umwenge munini wugamwagamo n'abahinzi mu gihe cy'imvura.

Mutsinzi yavuze ko iki giti cyaje kugwa mu 2001 ariko ko cyareshyaga na metero zirenga 200 z'uburebure ndetse kikagira umuzenguruko wa metero nk'esheshatu kuko cyari igiti kinini cyane.

Rwakagabo Anastace ufite imyaka 84 avuga ko koko nawe yakuze yumva amateka ko muri aka gace ka Kiryango ariho Umwami Ruganzu yarigitiye hagahita hamera igiti cy'Umuguruka kera ngo cyari igiti kinini cyane kuburyo cyasumbaga ibindi byose.

Rwakagabo yavuze ko kandi bajyaga barasa imyambi kera bagamije kuyirenza icyo giti cyari kirekire cyane, uwakirenzaga ngo yabaga arushije abandi intego.

Umurage abato bakura kuri aya mateka

Nturo yavuze ko umurage abato ndetse n'abayobozi bakura kuri aya mateka y'u Rwanda ari uw'ubutwari, bakumva ko bagomba gukotanira igihugu nkuko ibisekuru byinshi byabigenzaga.

Ati 'Nk'umurage uri hano ni uw'ubutwari, kuba Umwami w'Igihugu ubwe yarafashe umwanya akavuga ngo aho kwirirwa tujya gushaka undi mutabazi, akemera kwitangaho nk'umutabazi ni umurage w'ubutwari no kwitangira abo uyobora.'

Yakomeje agira ati 'Urubyiruko turarusaba kuwukomeza bagatera ikirenge mu cy'intwari zabanje, ubuyobozi bw'inzego z'ibanze bo turabasaba gukomeza kubungabunga ibi bimenyetso kugira ngo tugire ibimenyetso mpamya by'amateka.'

Kuri ubu abaturage bo muri aka gace ka Nkungu ya Munyaga, barasaba ubuyobozi kubungabunga aya mateka mu buryo bwiza kugira ngo abakiri bato benshi bajye bahigira umurage w'ubutwari bw'Abanyarwanda bo ha mbere.

Kuri ubu igiti cy’umuguruka gito gihari kihamaze imyaka 60

Iki giti bivugwa ko kimaze imyaka irenga 60

Igiti cy’umuguruka gihari kimaze imyaka irenga 60 aho ari cyo ubu kigaragaza amateka ya Nkungu

Aho iki giti cyashegukiye haracyagaragara

Aho igiti cya mbere cyashengukiye ni ho bakwereka

Ahahoze igiti kinini cy’umuguruka ubu hari umuzi wacyo, iyo uwushunnye ni uko usa bishoboka ko aribyo bitaga amaraso

Amafoto: Ingabire Nicole

Ni uruzinduko rwari rugamije kugenzura niba iyo mirimo iri gukorwa mu buryo bw'umwuga nk'uko bisanzwe.

By'umwihariko ibigo Minisitiri Twagirayezu yasuye ni ibya GS St Joseph Kabgayi na College Marie Reine byose biherereye mu Karere ka Muhanga, ashimira abakosozi ku kazi bakora kandi abasaba gukomeza gukora kinyamwuga.

Kuri GS St Joseph Kabgayi yasuye hari gukosorerwa ibizamini byo mu mashuri abanza, bigakorwa n'abakosozi 515 mu gihe kuri College Marie Reine hari abakosozi 510 bakosora ibizamini byo Cyiciro Rusange.

Minisitiri Twagirayezu yabwiye abo bakosozi ko akazi bakora ari ingenzi kuko bituma hamenywa uko ejo hazaza h'abanyeshuri hameze, bigafasha no mu igenamigambi.

Ati 'Mugomba gukosorana ubwitonzi n'ubushishozi kugira ngo hatagira umwana urengana. Abanyeshuri bacu bakoranye umuhate kugira ngo bagere ku cyiciro cyo gukora ibizamini bya leta. Ni inshingano zacu kubaha isuzuma ariko tukanabakosora neza. Nizeye ko ubwitange n'ubunyamwuga bwanyu, buzatuma tubigeraho.”

Uyu muyobozi kandi yasuye ibyumba by'amashuri bitandukanye bikosorerwamo ibizamini bya leta muri ibyo bigo, yihera ijisho uko buri kintu cyose kiri kugenda.

Yaganiriye byihariye n'abakosozi, yumva n'ibitekerezo byabo byafasha gukomeza kunoza akazi bakora, hagamijwe no kuzamura ireme ry'uburezi bw'u Rwanda.

Yakoranye inama kandi n'abayobozi b'amatsinda y'abakosozi, baganira ku ngingo zijyanye no kuzamura ireme ry'uburezi, agaruka ku kamaro k'ubufatanye mu kurinoza.

Yavuze ko gukosora ibizamini bya leta ari ngombwa mu rwego rwo kuzamura ireme ry'uburezi, ashimira ubwitange, ubudacogora n'ubufatanye abakosozi bakomeje kugaragaza mu rwego rwo kukinoza.

Ibizamini bya leta by'umwaka w'amashuri wa 2023/2024 biri gukosorwa n'abakosozi 14 720 bari hirya no hino mu gihugu mu bigo 34.

Ibyo bizamini byakozwe n'abanyeshuri 438 571 barimo abakobwa 241 433 n'abahungu 197 138 bo mu mashuri abanza, icyiciro rusange n'amashuri yisumbuye mu byiciro bitandukanye.

Minisitiri w’Uburezi Gaspard Twagirayezu yasuye ibigo byo mu Karere ka Muhanga biri gukosorerwamo ibizamini bya leta

Minisitiri w’Uburezi Gaspard Twagirayezu yaganiriye n’abakosozi ku cyatuma akazi kabo gakomeza kugenda neza

Umuyobozi Mukuru w’Ikigo cy'Igihugu Gishinzwe Ibizamini bya Leta n'Ubugenzuzi bw'Amashuri, NESA, Dr Bahati Bernard na we yari ahari gukosorerwa ibizamini mu Karere ka Muhanga

Minisitiri w’Uburezi Gaspard Twagirayezu (ubanza iburyo mu bahagaze) yasuye ahari gukosorerwa ibizamini asaba abarimu gukora kinyamwuga