Author: webrwanda

Dipolomasi yeruye, uyu muhanga mu by'ubuzima yayitangiye mu 1999 ubwo yari yoherejwe guhagararira u Rwanda muri Leta Zunze Ubumwe za Amerika.

Nk'umuntu wari uhawe inshingano bwa mbere, yagombaga kubanza kumenya uko ikorwa na cyane ko nta gitekerezo na kimwe yari ayifiteho.

Byakomereye ku kujyanwa mu gihugu cy'igihangange gifite runini gisobanuye ku bukungu bw'Isi nka Amerika.

Yoherezwa muri Amerika, Amb Dr Sezibera yari yahawe umukoro wo kujya kwereka abashoramari baho ko batagomba kwirengagiza u Rwanda mu gihe batekereza aho bashora imari.

Byari nko kurira umusozi muremure kuko icyo gihe nta myaka itandatu yari ishize Jenoside yakorewe Abatutsi ihagaritswe.

Icyo gihe u Rwanda rwari ruzwi gusa ku bwicanyi, umutekano muke, aho kubwira umuntu ngo narushoremo ari nko kuvugiriza ingoma abahetsi.

Mu kiganiro yagiranye na RBA ati 'Niyo mpamvu nari nabwiwe ko ngomba kugenda nkagira uruhare mu guhindura imyumvire abantu, bakumva ko mu Rwanda ari ahantu habereye ishoramari. Byari bigoye.'

Uko gukomera kwajyanaga n'uko u Rwanda ruri kwiyubaka ubwarwo, haba muri dipolomasi no ku baturage barwo, kuko buriya icyo gihe n'abo muri diaspora bari baracitsemo ibice.

Ati 'Icya mbere twabanjije kumvisha Amerika ibyabaye mu Rwanda nyuma tukajya no mu zindi nzego zitandukanye abaturage baho bakiyumvamo u Rwanda. Byari bigoye ariko twakoze uko dushoboye abashoramari baza mu Rwanda.'

Muri Amerika byabaye ngombwa ko avayo, aza gutanga umusanzu mu kugarura umutekano mu Karere k'Ibiyaga Bigari nk'Intumwa yihariye ya Perezida Kagame mu Karere na cyane ko hari intambara zitandukanye.

Ni ibihe intambara zari zirimbanyije mu Burundi, RDC, Angola, Repubulika ya Centrafrique, Uganda ifite ibibazo by'amakimbirane ku buryo wabonaga Akarere kageramiwe. Amb Dr Sezibera na bagenzi be babinyuzemo ibyinshi biracocwa, hashakwa ibisubizo.

Ati 'Ibyo byavuyemo Inama Mpuzamahanga y'Akarere k'Ibiyaga Bigari, na n'ubu iracyahari. Hasinywe amasezerano n'imishinga itandukanye ihuza ibihugu bikagize, imwe yashyizwe mu bikorwa ndestse indi iri gukorwaho.'

Nk'umuntu wari umaze kugira inararibonye muri dipolomasi byarangiye agizwe Umunyamabanga Mukuru w'Umuryango wa Afurika y'Ibirasirazuba, EAC aho naho yatanze umusanzu we ukomeye.

Uyu mugabo agaragaza ko ku giti cye yari yiyemeje guharanira imishinga ihuza EAC, biba ngombwa ko aganira n'abakuru b'ibihugu biyigize yumva imishinga bafite n'icyo bashaka kugeraho.

Nk'umuntu wari ufite manda y'imyaka itanu, ibyo biganiro byibanze ku kwita ku mishinga y'iyo myaka kugira ngo ayikurikirane ndetse ishyirwe mu bikorwa.

Umwe muri yo wari ugukora uburyo ibicuruzwa byanyura ku mipaka y'ibihugu bigize Akarere bidaciwe imisoro ya gasutamo, ndetse byagezweho.

Imishinga ye kandi yari irimo ibijyanye n'Isoko rusange.

Nubwo ryari rihari ariko ntabwo abaturage b'ibihugu bya EAC bari bemerewe kugenderana byoroshye muri ibyo bihugu.

Amb Dr Sezibera ati 'Ntabwo byari bisobanutse kuri njye. Uremerera ibicuruzwa gutambutswa nta nkomyi ariko ku baturage ntibyorohe.'

Icyakora na byo ku buyobozi bwe babikozeho, abaturage bava mu gihugu kimwe bajya mu kindi bitwaje indangamuntu z'ibihugu byabo gusa.

Byunganiwe no gushyiraho pasiporo ya EAC n'ibindi byoroshya imigenderanire byashyizweho, kugira ngo abaturage b'icyo gice bibonanemo bya kivandimwe.

Ikindi kwari ukwihuza kw'ibihugu bya Afurika y'Uburasirazuba, mu mishinga itandukanye, nk'ifaranga rimwe, guhuza imihanda n'ibindi ndetse na byo bikorwaho cyane, 'aho twumavaga ko bitarenze 2024 twasabwaga kuba twarashyizeho ifaranga rimwe.'

Icyakora kuba bitaragerwaho uko byari bipanze, uyu mugabo abona ko byatewe n'uko abaturage n'abayobozi bakomeje gutekereza ku nyungu z'ibihugu byabo gusa aho kuba akarere, icyakora akavuga ko ntawe uvuma iritararenga.

Mu byari biraje ishinga Amb Dr Sezibera byarimo no guteza imbere ibikorwaremezo.

Yatangije inama zitandukanye zo ku rwego rw'Abakuru b'Ibihugu bya EAC hagamijwe guteza imbere ibikorwa remezo 'nk'imihanda isanzwe, iya gare ya moshi n'inzira z'amazi. Ibyo biracyakomeje ariko hari ibyakozwe.'

Ni ingingo agaragaza ko ubu iri gutanga umusaruro, kuko ni bwo bwa mbere nyuma y'ubwigenge, muri EAC hongeye kubakwa imihanda ya gare ya moshi no kuvugurura iyo abazungu basize.

Amb Dr Sezibera agaragaza ko kuri we byari biteye ikimwaro kumva ko kuva mu myaka ya 1960 ubwo abakoloni batangiraga kubaka umuhanda wa gari ya moshi uhuza Uganda na Kenya, nta kindi gice yewe haba n'ikilometero kimwe cyongewe kuri uwo muhanda.

Ati 'Byari biteye isoni cyane. Kubera uko gushingira ku iterambere ry'ibikorwaremezo, ibihugu byatangiye kongera kubaka imihanda ya gare ya moshi. Urugero ni urwa Kenya aho hatangijwe uwa Mombasa wagombaga kugera mu Rwanda, mu Burundi na RDC, ndetse ntekereza ko bizakomeza.'

Iyo mishinga migari yagombaga kuzuzanya n'uwo kugira EAC igihugu kimwe, hagashyirwaho urwego rwa politiki, umushinga yavuye ku buyobozi umaze gutezwa intambwe.

---

Perezida Kagame yarahiriye kuri Stade Amahoro ahari hateraniye ibihumbi by'Abanyarwanda n'Inshuti z'u Rwanda, zirimo abakuru b'ibihugu 22, ba Visi Perezida bane, ba Minisitiri w'Intebe babiri, abayobozi b'Inteko zishinga Amategeko babiri, batanu bayobora imiryango mpuzamahanga, batatu bahoze ari abakuru b'ibihugu n'abandi banyacyubahiro batandukanye.

Mu ijambo yagejeje ku bitabiriye umuhango wo kurahira kwe, Perezida Kagame yavuze ko u Rwanda rushyigikiye amahoro mu karere, gusa anenga uburyo amahanga akomeje kurebera imyitwarire y'ubuyobozi bwa Repubulika Iharanira Demokarasi ya Congo (RDC), yo gutoteza no kubuza amahwemo abavuga Ikinyarwanda batuye mu Burasirazuba bw'icyo gihugu.

UKO UMUHANGO WAGENZE

18:30: Umuhango waberaga muri Stade Amahoro urahumuje.

17:45: Perezida Kagame ari gusezera abakuru b'ibihugu bitabiriye uyu muhango, abashimira ko baje kwifatanya n'u Rwanda.

Si njye njye nyine ahubwo ni twese hamwe – Perezida Kagame

'Mu bihe byo kwiyamamaza, twumvaga kenshi, kuri benshi, ya ntero yagiraga iti, 'ni wowe'. Ariko mu by'ukuri, si njye njye nyine ahubwo ni mwebwe, ni twese hamwe. Ubu rero, tugomba kongera kureba imbere ahazaza. Mu myaka 30 ishize, twageze kuri byinshi kandi byiza, ariko nanone, hari haracyari byinshi tutarageraho ariko tuzageraho mu myaka iri imbere.'

— Perezida Kagame yavuze ko muri iyi manda, urugendo rw'iterambere ruzakomeza.

Ati ' Iyi manda nshya ni intangiriro yo gukora ibirenze ibyo twifuza, tubigereho. Kuki se tutarenza ku byo twakoze? Kubitekereza ntabwo ari ukurota, birashoboka, bizashoboka. Twabikora kandi tuzabikora.

Icy'ingenzi muri byose turi hamwe. Ndagira ngo mbashimire cyane kongera kumpa icyizere ariko kandi munakinshyigikiramo. Mwampaye amahirwe y'icyo cyizere, yo kubakorera no gukorana namwe, ibyo twifuza byose tuzabigeraho. Rero mu by'ukuri, hari byinshi tugomba gukomeza gukemura, hari byinshi tugomba gukomeza guhuriraho, icyizere mumfitiye ni cyo mbafitiye.”

— Perezida Kagame yavuze ko inshingano ya mbere, ari uko abaturage babaho mu buzima bubahesheje agaciro. Ati ' Icy'ingenzi cyane kuri twe, ni ukubona abaturage bacu, babayeho mu buzima bubahesheje agaciro kandi batekanye. Ibi ntibigirwaho impaka, kandi ni inshingano udashobora guhunga cyangwa se gukura ahandi.'

Perezida Kagame yavuze ku kibazo cy'abimwa uburenganzira ku gihugu cyabo, nubwo ateruye yavugaga ku ihezwa ry'Abanye-Congo bo mu bwoko bw'Abatutsi mu Burasirazuba bwa RDC.

Ati 'Buri wese kugira ngo akore igikenewe ngo buri muntu agire amahoro, agire uburenganzira bwe, ntabwo bikwiriye kuba impuhwe abantu bagiriwe. Ni inshingano. Iyo ibyo bitabaye, nibwo abantu bahaguruka, bagaharanira uburenganzira.

Bikwiriye kumvikana ko ari ihame, kuko ni ikibazo kireba uburenganzira bw'abantu. Kandi ntabwo amahoro ya nyayo yaboneka mu gihe ubwo burenganzira butubahirijwe.

Ntushobora kubyuka mu gitondo, ngo uhitemo kwima uwo ushaka uburenganzira bwe bw'ubwenegihugu, ngo wumve ko birangira gutyo. Hagomba kubaho aho abantu bahuriza.

Iki ni igihe cyo gutekereza ku Isi dushaka ko abana bacu bazabamo […] Dufite byinshi duhuriyeho kurusha uko tubitekereza, kandi muri twe, twifitemo ubushobozi bwo gusana, kuvugurura no gutangira bundi bushya. Ntabwo bivuze ko tugomba kwemeranya kuri buri kimwe cyose, ariko tugomba kubaha amahitamo ya buri wese.'

— 'Amahoro mu karere ni ingenzi ku Rwanda'

Perezida Kagame yagize ati 'Muri uyu mwaka wa 2024, amacakubiri mu karere kacu n'Isi aragenda arushaho kwiyongera no kurema kutizerana kubera ubusumbane budashakirwa umuti no kugira indimi ebyiri.

Amahoro mu karere kacu ni ingenzi cyane ku Rwanda, nyamara amaze igihe yarabuze by'umwihariko mu Burasirazuba bwa Repubulika Iharanira Demokarasi ya Congo. Amahoro ntabwo yatangwa n'uwo ari we wese aho yaba aturuka hose, mu gihe abo bireba bo badakora iby'ingenzi. Ibyo bitabayeho, inzira z'ubuhuza ziri gushyirwamo imbaraga n'abayobozi b'akarere ntacyo zageraho'.

— 'Ibyo twagezeho mu myaka 30, ntibyasobanurwa mu magambo'

'Mu myaka 30 ishize, ibyo Abanyarwanda bagezeho birenze ibyo twari twiteze. Birenze ibyo umuntu yabasha gusobanura ukurikije aho twavuye. Amateka yacu mabi, yavuyemo ikibatsi cy'umuriro w'icyizere, ubudaheranwa n'ubutabera muri twe'.

16:55: Perezida Kagame atangiye kugeza ijambo ku bitabiriye uyu muhango, atangira ashima Abanyarwanda ku cyizere bamugiriye.

Ati 'Nishimiye kongera kubabera umuyobozi, ariwe Perezida muri iyi manda nshya dutangiye. Ibihe byo kwamamaza n'amatora tuvuyemo, byatubereye twese Abanyarwanda igihe cy'ibyishimo ndetse bigaragaza ko twanyuzwe.'

Miliyoni z'Abanyarwanda, bitabiriye ibikorwa byo kwiyamamaza kandi hafi ya bose baratoye. Ntabwo ari imibare gusa, ahubwo birenze ibyo twiboneye n'amaso n'ibyo twanyuzemo muri icyo gihe. Ukuri kurivugira.'

Abanyarwanda twagaragaje ubumwe n'intego duhuriyeho yo kwigenera ahazaza hacu. Iki ni cyo tumaze iyi myaka yose ishize duharanira.'

16:45: Itorero ry'Igihugu, Urukerereza, ni ryo rihawe umwanya kugira ngo risusurutse abitabiriye uyu muhango.

— Nyuma yo kurahira, Perezida Kagame yagenzuye Ingabo nk'Umugaba w'Ikirenga w'Ingabo z'u Rwanda

— Nyuma y'indahiro, Ingabo z'u Rwanda (RDF) zarashe imizinga 21 mu guha icyubahiro Perezida Paul Kagame, Umugaba w'Ikirenga w'Ingabo z'u Rwanda.

— Nyuma yo kurahira yashyikirijwe ibirango bya Repubulika y'u Rwanda, birimo Itegeko Nshinga, Ibendera rya Repubulika y'u Rwanda, Ikirangantego, ndetse Umugaba Mukuru w'Ingabo z'u Rwanda, amushyikiriza Inkota n'Ingabo nk'ibimenyetso byo kurinda ubusugire bw'igihugu.

Amafoto ya Perezida Kagame amaze kurahira

15:40: Perezida Kagame amaze kurahira

Perezida Paul Kagame yarahiriye kuyobora u Rwanda muri manda y'imyaka itanu. Yarahijwe na Dr Ntezilyayo Faustin, Perezida w'Urukiko rw'Ikirenga, mu birori byabereye muri Stade Amahoro.

Paul Kagame yagize ati ''Jyewe Kagame Paul ; ndahiriye u Rwanda ku mugaragaro ko ntazahemukira Repubulika y'u Rwanda; ko nzakurikiza nkanarinda Itegeko Nshinga n'andi mategeko; ko nzakorana umurava imirimo nshinzwe; ko nzaharanira amahoro n'ubusugire bw'igihugu; ko nzashimangira ubumwe bw'Abanyarwanda; ko ntazigera nkoresha ububasha mpawe mu nyungu zanjye bwite; ko nzaharanira ibyagirira Abanyarwanda bose akamaro. Nintatira iyi ndahiro nzabihanirwe n'amategeko. Imana ibimfashemo.'

15:30: Minisitiri w'Ububanyi n'Amahanga, Olivier Nduhungirehe, yahawe umwanya, yakira abakuru b'ibihugu na za Guverinoma bitabiriye uyu muhango.

15:20: Perezida wa Ethiopia, Sahle-Work Zewde, nawe yageze muri Stade Amahoro yitabiriye uyu muhango.

15:15:Perezida wa Madagascar, Andry Nirina Rajoelina, ari kumwe n'umugore we, Mialy Rajoelina, nabo bitabiriye irahira rya Perezida Kagame. Bageze muri Stade bakurikiranye na Perezida wa Botswana, Mokgweetsi Masisi ndetse na Perezida wa Ethiopia, Sahle-Work Zewde .

15:10: Perezida wa Sudani y'Epfo akaba n'Umuyobozi w'Umuryango wa Afurika y'Iburasirazuba (EAC), Salva Kiir Mayardit yageze kuri Stade Amahoro. Yakiriwe rimwe na Perezida wa Togo, Faure Gnassingbé ndetse na Perezida wa Congo Brazaville, Denis Sassou Nguesso.

15:07: Perezida Kagame na Madamu Jeannette Kagame bageze muri Stade Amahoro, bakiranwa urugwiro rwinshi. Abanyarwanda bari muri Stade Amahoro bose bavugiye rimwe, bati 'Ni wowe, ni wowe, ni wowe'.

15:05: Umwami Mswati wa Eswatini, yakiranywe urugwiro ubwo yageraga muri Stade Amahoro i Remera ahabereye umuhango w'irahira rya Perezida Kagame.

14:55 Perezida wa Centrafrique, Faustin-Archange Touadéra, yakiriwe muri Stade Amahoro aho ibirori byo kurahira byabereye.

14: 50: Perezida w'Inzibacyuho wa Sudani, Abdel Fattah al-Burhan Abdelrahman al-Burhan, yakiriwe muri Stade Amahoro. Akurikiwe na Perezida wa Mozambique, Filipe Nyusi.

14:40: Perezida wa Angola, João Lourenço, yageze kuri Stade Amahoro, aho yitabiriye umuhango wo kurahira kwa Perezida Kagame. Yitabiriye ibi birori nyuma yo kuganira na Perezida Kagame muri Village Urugwiro. Yakurikiwe na Perezida wa Ghana, Nana Akufo-Addo, wakiriwe mu cyubahiro nk'Umukuru w'Igihugu.

Umaro Sissoco Embaló, Perezida wa Guinea-Bissau na we yakiriwe muri Stade Amahoro, aho yitabiriye irahira rya Perezida Paul Kagame. Perezida Ismail Omar Guelleh wa Djibouti na we yakiriwe muri Stade Amahoro.

14:35: Lt Gen Mamady Doumbouya, Perezida w'Inzibacyuho wa Guinée Conakry, yakiriwe muri Stade Amahoro ku nshuro ye ya kabiri ageze mu Rwanda kuko yahaherukaga muri Mutarama 2024.

Yakurikiwe na Perezida wa Somalia, Hassan Sheikh Mohamud.

14:30: Perezida wa Seychelles, Wavel Ramkalawan, yageze muri Stade Amahoro yakirwa mu cyubahiro akwiriye nk'Umukuru w'Igihugu.

14:25: Perezida wa Zimbabwe, Emmerson Dambudzo Mnangagwa, ageze muri Stade Amahoro, yakirwa mu byishimo byinshi.

14:20: Perezida wa Tanzania, Samia Suluhu Hassan, yageze muri Stade Amahoro yakirizwa amashyi menshi n'ibihumbi by'Abanyarwanda byitabiriye uyu muhango. Yakurikiwe na Perezida wa Kenya, William Ruto, nawe wakiranywe urugwiro.

14:10: Abakuru b'ibihugu b'ibihugu batangiye kugera kuri Stade Amahoro. Perezida w'Inzibacyuho wa Gabon, Brice Oligui Nguema, ni we ubimburiye abandi.

Akurikiwe na Minisitiri w'Intebe wa São Tomé et Príncipe, Patrice Trovoada.

— Amafoto ya bamwe mu nshuti z'u Rwanda bitabiriye uyu muhango

— Umugaba Mukuru w'Ingabo za Uganda, Gen Muhoozi Kainerugaba, ubwo yageraga kuri Stade Amahoro.

— Umuyobozi wa Komisiyo y'Umuryango wa Afurika yunze Ubumwe, Moussa Faki Mahamat, yakirwa kuri Stade Amahoro.

— AMAFOTO na VIDEO: Akarasisi k'Ingabo z'u Rwanda kishimiwe n'abantu benshi bari muri Stade Amahoro

13:20: Akarasisi kamaze kugera muri Stade Amahoro. Kakozwe n'amasibo y'Ingabo z'u Rwanda n'Abapolisi b'u Rwanda yose hamwe 12. Kari gukorwa mu Kinyarwanda bitandukanye n'uko mu bihe byashize kakorwaga Cyongereza.

13:00: Abasangiza b'amagambo kuri uyu munsi ni Umuvugizi wungirije wa Guverinoma y'u Rwanda, Mukuralinda Alain n'Umuyobozi Mukuru wa Imbuto Foundation, Elodie Shami.

Ku rundi ruhande, Col Innocent Munyengabe ni we uri bube usobanura ibijyanye n'akarasisi n'indi mihango ya gisirikare.

Amafoto: Stade Amahoro yamaze yuzuye amasaha menshi mbere y'umuhango

— Mu 2010 mu irahira rya Perezida Kagame, Jeanne Chantal Ujeneza (iburyo) wari ufite ipeti rya Major mu Ngabo z'u Rwanda, ni we watwaye ibendera ry'u Rwanda ryashyikirijwe Perezida Kagame nyuma yo kurahira.

Kuri ubu Ujeneza ni Umuyobozi Mukuru Wungirije wa Polisi y'u Rwanda ushinzwe ubutegetsi n'imari. Afite ipeti rya Deputy Commissioner General of Police (DCG).

AMAFOTO: Abayobozi batandukanye muri Guverinoma bageze muri Stade Amahoro ahagiye kubera uyu muhango.

— Ingabo z'u Rwanda n'Abapolisi baserutse muri uyu muhango

12:05: Abahanzi batandukanye bashimishije abitabiriye uyu muhango muri Stade Amahoro. Muri bo, harimo Bwiza, umwe mu bahanzikazi bahagaze neza muri iki gihe.

12:00: Imbamutima z'abitabiriye kurahira kwa Perezida Kagame

Jean Pierre Mwenedata wo mu karere ka Rutsiro, yavuze ko ari iby'agaciro kuba yitabiriye ibirori byo kurahira kwa Perezida Kagame.

Yavuze ko ibyakozwe mu myaka 30 ishize ari igihamya cy'uko na manda nshya Perezida Kagame azakora ibidasanzwe.

Ati 'Ntekereza ko tumwitezeho ibindi byinshi cyane muri iyi manda kuko hari byinshi baba baratwemereye, amashanyarazi hose, amazi hose, imihanda, ibyo bikorwa by'iterambere ni byo twiteze ko bizakomeza.'

Kiribazera Anonciata wo mu karere ka Kirehe yavuze ko muri manda nshya Perezida Kagame bamwitezeho kubafasha kubona ibikorwaremezo byisumbuye.

Ati'Byose yabikozeho ariko urebye turifuza ko imihanda yakorwaho aho itaragera ikahagera, aho amazi ataragera akahagera, amashanyarazi aho ataragera akahagera, kuko byose uburezi yabugezeho, mbega agatera intambwe ku byo yari agezeho.'

Rev. Kareramanzi Callixte wo mu Itorero Eglise Vivante mu karere ka Kayonza yavuze ko uyu ari umunsi udasanzwe ku Banyarwanda.

Ati 'Uyu ni umunsi wo kuza kurahirira Igihugu y'uko agiye kutuyobora nk'uko twifuje nk'Abanyarwanda. Turifuza cyane cyane gusigasira ibyagezweho ariko twifuza nanone gutera imbere mu bisigaye imbere. Hari aho tuvuye hari n'aho dushaka kugera.'

— Uko gahunda y'Umunsi iteye

Ibirori nyir'izina byo kurahira kwa Perezida Kagame biratangira Saa Cyenda z'igicamunsi kuri Stade Amahoro i Remera, bigeze Saa Kumi n'imwe.

Harabanza kwakirwa abakuru b'Ibihugu bifatanyije n'Abanyarwanda mu irahira rya Perezida Kagame. Harakurikiraho kwakira Perezida Paul Kagame ubwo aba ageze kuri Stade Amahoro, hakurikireho umuhango wo kurahira.

Perezida Kagame narangiza kurahira, harakurikiraho kuririmba indirimbo yubahiriza igihugu. Perezida Kagame aragenzura ingabo, hakurikireho akarasisi.

Perezida Kagame nyuma yo kugenzura ingabo, Itorero ry'igihugu rirataramira abitabiriye, hakurikireho ijambo nyamukuru rya Perezida Paul Kagame. Ibirori birasozwa no kuririmba indirimbo yubahiriza igihugu.

Andi mafoto

10:55:Ibyishimo ni byose muri Stade Amahoro. Abahanzi batandukanye barimo Eric Senderi, Chris Eazzy, Ariel Wayz ni bo bari gususurutsa abitabiriye uyu muhango. Ibyishimo ni byose.

10:50: Wa mubyeyi witabiriye ibikorwa byo kwiyamamaza bya Perezida Kagame mu Karere ka Kicukiro yambaye agatimba, yitabiriye irahira rye yambaye imyenda iri mu mabara y'ibendera ry'u Rwanda.

AMASHUSHO:

Abaturage batandukanye bitabiriye umuhango wo kurahira kwa Perezida Kagame bishimiye kuba bagiye gukurikira imbonankubone uyu munsi mbonekarimwe mu mateka.

Abaganiriye na IGIHE bagaragaje imbamutima zabo n'icyo biteze kuri iyi manda y'imyaka itanu Perezida Kagame agiye kurahirira.

AMASHUSHO: Ibihumbi by’Abanyarwanda n’inshuti z’u Rwanda babukereye kuri Stade Amahoro, ahagiye kubera umuhango w’irahira rya Perezida Paul Kagame uherutse gutorerwa indi manda. pic.twitter.com/kujgkNrCGv

— IGIHE (@IGIHE) August 11, 2024

— Ibyitezwe kuri uyu munsi

Hitezwe akarasisi k'Ingabo z'u Rwanda n'indi myiyereko ibereye ijisho ya gisirikare. Kajugujugu z'Ingabo z'u Rwanda, ziraza guca mu kirere cya Stade Amahoro, zifite amabendera y'u Rwanda.

Umuhango wo kurahira byitezwe ko ugomba gutangira Saa Cyenda z'amanywa.

Uko byari bimeze mu 2017 ubwo Perezida Kagame aheruka kurahira

Andi matariki y'ingenzi Perezida Kagame yagiye arahiriraho

Ni ku nshuro ya kane Perezida Kagame agiye kurahirira kuyobora u Rwanda nka Perezida watowe. Ni inshuro imwe yarahiriye kuruyobora muri manda y'inzibacyuho.

Ubwa mbere arahira hari Ku wa Gatandatu tariki 22 Mata 2000. Yarahiye nka Perezida w'inzibacyuho asimbura Pasteur Bizimungu wari weguye. Mbere yo kurahira, Kagame yari Visi Perezida na Minisitiri w'Ingabo.

Yongeye kurahira kuwa Kane tariki 11 Nzeri 2003, nyuma yo gutsinda amatora yari yabaye muri Kanama uwo mwaka.

Kuwa Mbere tariki 6 Nzeri 2010, Perezida Kagame yarahiriye kuyobora u Rwanda muri manda ya kabiri nyuma yo gutsinda amatora. Mu 2015, Itegeko Nshinga ryaravuguruwe Paul Kagame yemererwa kongera kwiyamamaza, atorwa mu 2017 arahira Kuwa Gatanu tariki 18 Kanama 2017

Amafoto: Niyonzima Moise na Irakiza Augustin

---

Ni umuhango wabaye kuri iki Cyumweru tariki 11 Kanama 2024, ubera muri Stade Amahoro yavuguruwe igashyirwa ku rwego rwo kwakira abantu ibihumbi 45 birenga byicaye neza.

Uyu muhango wari witabiriwe n'abakuru b'ibihugu n'aba za Guverinoma baturutse mu bice by’Isi. 

Hari abakuru b'ibihugu 22, ba Visi Perezida bane, ba Minisitiri w'Intebe babiri, abayobozi b'Inteko zishinga Amategeko babiri, batanu bayobora Imiryango Mpuzamahanga, batatu bahoze ari abakuru b'ibihugu n'abandi banyacyubahiro batandukanye.

Abakuru b’ibibihugu bitabiriye uyu muhango ni Perezida w'Inzibacyuho wa Gabon, Brice Oligui Nguema,Perezida wa Tanzania, Samia Suluhu Hassan,Perezida wa Kenya, William Ruto,Perezida wa Zimbabwe, Emmerson Dambudzo Mnangagwa,Perezida wa Seychelles, Wavel Ramkalawan,Lt Gen Mamady Doumbouya, Perezida w'Inzibacyuho wa Guinée Conakry,Perezida wa Somalia, Hassan Sheikh Mohamud,Perezida wa Angola, João Lourenço, Perezida wa Guinea-Bissau ,Umaro Sissoco Embaló, Perezida wa Djibouti ,Ismail Omar Guelleh, Perezida wa Ghana, Nana Akufo-Addo,Perezida w'Inzibacyuho wa Sudani, Abdel Fattah al-Burhan Abdelrahman al-Burhan,Perezida wa Mozambique, Filipe Nyusi, Perezida wa Centrafrique, Faustin-Archange Touadéra, Umwami Mswati wa Eswatini.

Hari Kandi Perezida wa Sudani y'Epfo akaba n'Umuyobozi w'Umuryango wa Afurika y'Iburasirazuba (EAC), Salva Kiir Mayardit, Perezida wa Togo, Faure Gnassingbé , Perezida wa Congo Brazaville, Denis Sassou Nguesso, Perezida wa Madagascar, Andry Nirina Rajoelina,Perezida wa Botswana, Mokgweetsi Masisi na Perezida wa Ethiopia, Sahle-Work Zewde.

Saa Cyenda n’iminota 7 nibwo Perezida Kagame yageze kuri Stade Amahoro, yakiranwa urugwiro n'imbaga yari ihateraniye  yaririmbaga igira iti ' Ni wowe,ni wowe … Azabatsinda Kagame , Nta ndambara yandera ubwoba….

Saa Cyenda n’iminota 40, Perezida w’Urukiko rw’Ikirenga,Dr Ntezilyayo Faustin nibwo yatangiye umuhango nyirizina wo kwakira indahiro ya Perezida  Kagame.

Ku isaha ya Saa Cyenda n’iminota 42 nibwo Perezida Kagame yarahiriye kuyobora u Rwanda mu myaka 5 iri imbere agira ati 'Jyewe, Kagame Paul, ndahiriye u Rwanda ku mugaragaro: ko ntazahemukira Repubulika y'u Rwanda; ko nzakurikiza nkanarinda Itegeko Nshinga n'andi mategeko; ko nzakorana umurava imirimo nshinzwe; ko nzaharanira amahoro n'ubusugire bw'igihugu; ko nzashimangira ubumwe bw'Abanyarwanda;ko ntazigera nkoresha ububasha mpawe mu nyungu zanjye bwite; ko nzaharanira ibyagirira Abanyarwanda bose akamaro. Nintatira iyi ndahiro, nzabihanirwe n'amategeko, Imana ibimfashemo.'

Nyuma yo kurahira yashyize umukono ku ndahiro, Dr Ntezilyayo Faustin ahita amushyikiriza ibirango by'igihugu , naho Gen Mubarakh Muganga , umugaba mukuru w'ingabo amushyikiriza ibirango bya gisirikare.

Perezida Kagame wari umaze kurahira, yanakiriye indirimbo y'igihugu nka kimwe mu birango by'igihugu, iraririmbwa, nyuma abona kugenzura amasibo  12 y’ingabo n’Abapolisi bari biteguye gukora akarasisi, maze abaha uburenganzira berekana akarasisi bari bamaze igihe bategura.

Mu ijambo rye Perezida Kagame yashimiye Abanyarwanda ko bongeye kumugirira iCYizere ndetse nawe avuga ko yishimiye kongera kubabera Umuyobozi.

Ati” Ndagira ngo mbere na mbere nshimire Abanyarwanda mwese kuba mwongeye kungirira ikizereNishimiye kongera kubabera umuyobozi ariwe Perezida muri iyi Manda nshya dutangiye.Ibihe byo kwamamaza n’amatora tuvuyemo,twese Abanyarwanda byatuberete igihe cy’ibyishimo ndetse bigaragaza ko twanyuzwe.

Miliyoni z’Abanyarwanda bitabiriye ibikorwa byo Kwiyamamaza kandi hafi ya bose bataratoye. Ntabwo ari imibare gusa ahubwo birenze ibyo twiboneye n’amaso n4ibyo twanyuzemo muri iki gihe.

Ukuri kurivugira , Abanyarwanda twagaragaje Ubumwe n’intego duhuriyeho yo kwigenera ahazaza hacu. Iki ni cyo tumaze iyo myaka yose ishize duharanira”.

Perezida Kagame yatangiye kuyobora u Rwanda mu mwaka wa 2000 ubwo yari amaze kugirirwa iCYezere n'inteko ishinga amategeko nyuma yo kwegura kwa Pasiteri Bizimungu wari Perezida. Mu 2003 , Paul Kagame yongeye gutorerwa kuyobora u Rwanda, mu 2010 ndetse no muri 2017 nabwo biba uko.

Tariki 15 Nyakanga 2024 yongeye gutorerwa kuyobora u Rwanda muri Manda y’imyaka 5 akaba yaratsinze ku majwi angana na 99.18%

Perezida Kagame arahirira kuyobora u Rwanda mu myaka 5 iri imbere 

Umuhango witabiriwe n’abanyacyubahiro batandukanye

Ubwo Perezida Kagame yari akigera muri Stade Amahoro 

Ingabo z’u Rwanda mu karasisi

Stade Amahoro yari yuzuye 

Amafoto:RBA

Byabereye mu Mudugudu wa Kabingo, Akagari ka Kagarama, Umurenge wa Karambi mu Karere ka Nyamasheke ku wa 11 Kanama 2024.

Saa Kumi n'Ebyiri n'Igice (6:30) nibwo umuturage witambukiraga yabonye nyakwigendera munsi y'ikiraro kirekire yapfuye, ahita abimenyesha ubuyobozi bw'umurenge.

Nyakwigendera Kamashabi Eraste yabonetse yapfuye nyuma y'aho yari yajyanye n'umugore we gusenga ku Isabato, bataha agasigara mu isantere y'ubucuruzi aho afite inzu z'ubucuruzi. Amakuru avuga ko nta muntu uzwi bari bafitanye amakimbirane.

Ubuyobozi bw'Umurenge, Polisi y'u Rwanda, Urwego rw'Igihugu rw'Ubugenzacyaha RIB, Urwego rwunganira akarere mu gucunga umutekano DASSO bahise bajya aho byabereye.

Umunyamabanga Nshingwabikorwa w'Umurenge wa Karambi w'umusigire, Karemera Innocent yabwiye IGIHE ko inzego zibishinzwe zatangiye iperereza kugira ngo hamenyekane icyateye uru rupfu.

Ati 'Icyo twabonye ni uko nyakwigendera afite igikomere ku mutwe. Ntiharamenyekana niba yahanutse akagwamo, cyangwa niba ari abamwishe bakamutamo'.

Karemera yahumurije abaturage abasaba gukomeza kugira uruhare mu kwicungira umutekano, gutangira amakuru ku gihe no kwirinda urwikekwe.

Umurambo wa nyakwigendera wajyanwe ku bitaro bya Kibogora gukorerwa isuzuma mbere y'uko ushyingurwa. Asize umugore n'abana bane.

---

Drake uri mu baraperi bakomeye ku Isi ubusanzwe yitwa Aubrey Drake Graham. Graham ndetse ni na rimwe mu mazina Yolo The Queen yabwiye umwe mu bamukurikira ubwo yamubazaga uko umwana yabyaye yitwa.

Yolo ntabwo avuga se w'umwana gusa mu minsi yashize yagiye agaragara ari kumwe n'ibyamamare bikomeye mu Isi birimo Umuraperi Drake, Harmonize n'abandi.

Harmonize nawe yirutse inyuma ye kuko hari n'igihe bagaragaye bishimanye uyu mukobwa yamusuye mu rugo iwe muri Tanzania.

Mu mwaka ushize uyu muhanzi mu butumwa bw'uruhererekane yashyize kuri Instagram Stories yabanje kugaragaza Yolo The Queen, ari kuririmba indirimbo ye yise 'Single Again' arangije akurikizaho ubutumwa agira ati 'Uko uba wiyumva iyo utegereje imodoka yawe ya Range Rover.''

Aya magambo yakurikiwe n'amashusho arimo Ranger Rover, ikikijwe n'izindi modoka nyinshi ziri imbere y'inyubako ya Harmonize yise 'Konde Village'. Imbere iyi modoka yari yanditseho ngo 'BOSS YOLO''. Arangije ati 'Iyo mvuze ngo ndagukunda, amafaranga yanjye aba ari ayawe.'

Yakomeje yifuriza Yolo The Queen gukomeza gutera imbere avuga ko ibyiza byinshi biri imbere. Harmonize yakoze ibi nyuma yaho muri Gicurasi 2023 mu ndirimbo yahuriyemo na Bruce Melodie bise 'Nzanzibar', uyu muhanzi yumvikanamo aririmba Yolo The Queen.

Harmonize ni we utangira aririmba, akavugamo umukobwa w'igitangaza utuma ata ubwenge kubera 'Imiterere ye nk'iya Yolo The Queen'.

Mu ijoro ryo ku wa 7 Gicurasi 2023 nabwo, Harmonize yatumiye Yolo The Queen kuri Instagram 'Live' ngo baganire ku rukundo rwabo.

Ubwo bari Live kuri Instagram, Harmonize yavuze ko akunda cyane Yolo The Queen, ati “Impamvu mbizanye hano ni ukugira ngo buri wese amenye ko ngukunda cyane.”

Ni ikiganiro uyu muhanzi yatereteragamo uyu mukobwa amusabira urukundo ku karubanda, ibyo bamwe bafashe nko gushaka kureshya amarangamutima y'abakunzi b'umuziki w'u Rwanda.

Gusa, ubwo yabazwaga niba umwana we yaramubyaranye n'uyu muhanzi yabiteye utwatsi. Ndetse, akavuga ko atari uwa Drake yise izina rye, n'ubwo agaragaza ko bafite aho bahuriye.

---

Nyuma yo kurahirira kuyobora u Rwanda kuri uyu wa 11 Kanama 2024, Perezida Kagame yibukije abakuru b'ibihugu n'abandi bitabiriye ibi birori ko mu burasirazuba bwa RDC hari ikibazo cy'umutekano muke kandi ko cyatewe n'ubuyobozi bw'i Kinshasa.

Umukuru w'Igihugu yavuze ko amahoro muri aka karere u Rwanda ruherereyemo, by'umwihariko mu burasirazuba bwa RDC ari ngombwa, agaragaza ko ariko nubwo abafite imbaraga bagerageza kuyagarura, bakwiye kumenya ko bitashoboka mu gihe ubutegetsi bwa RDC burebwa na yo budakora ibyo busabwa.

Ibyo ubutegetsi bwa RDC busabwa n'umuryango mpuzamahanga ni ukuganira n'abenegihugu bafitanye amakimbirane na bwo, hashingiwe ku myanzuro yafatiwe i Nairobi muri Mata 2024. Uyu muryango ugaragaza ko ibi biganiro ari byo byabonekamo igisubizo kirambye ku mutekano wo muri iki gihugu.

Gusa ubu butegetsi bwanze kuganira n'umutwe witwaje intwaro wa M23 ugenzura ibice byinshi byo mu ntara ya Kivu y'Amajyaruguru, busobanura ko budashobora gushyikirana n'abaterabwoba.

Abarwanyi b'uyu mutwe bafite bene wabo bari mu buhungiro mu bihugu bitandukanye, abasigaye muri RDC bakorerwa itotezwa rishingiye ku bwoko. Kuva begura intwaro mu mpera za 2021, basobanuye ko icyo bashaka ari ukurwanirira uburenganzira bwabo kandi kuva ubwo bagaragaje ko bafite ubushake bwo gushyikirana na Leta.

Perezida Kagame yagize ati 'Amahoro mu karere kacu ni ngombwa ku Rwanda ariko yarabuze, cyane cyane mu burasirazuba bwa RDC ariko ntabwo amahoro yazanwa n'umuntu uwo ari we wese bitewe n'uko aturuka cyangwa imbaraga afite mu gihe abo bireba mu buryo butaziguye badakora ibyo basabwa.”

Perezida Kagame yasobanuye ko mu gihe ubutegetsi bwa RDC budakora ibyo busabwa, imbaraga z'ubuhuza bukorwa n'abayobozi bo mu karere nta musaruro ufatika zishobora kugeraho.

Yagize ati 'Ndagira ngo nshimire Perezida wa Angola, Lourenço uri kumwe natwe, na Perezida wa Kenya, William Ruto, n'abandi ku byo bakoze n'ibyo bakomeje gukora. Ntabwo amahoro aboneka atyo gusa, twese dusabwa gutanga umusanzu wacu, tugakora neza kugira ngo tugere ku mahoro arambye. Ntabwo bikwiye kubonwa nk'impuhwe kuba buri wese yakora ibikenewe kugira ngo buri wese abone amahoro, abone uburenganzira bwe. Ni inshingano.'

Umukuru w'Igihugu yavuze ko iyo buri wese adatanze umusanzu kugira ngo amahoro aboneke, abagirwaho ingaruka no kubura kwayo bahaguruka, bakirwanirira nk'uko Abanye-Congo bo mu bwoko bw'Abatutsi babigenje, nyuma y'imyaka myinshi abo mu miryango yabo bari mu buhungiro, abandi batotezwa.

Ati 'Iyo bitabaye, abantu bahaguruka, bakabirwanirira. Bikwiye kumvwa nk'ibiri ngombwa kuko ni ikibazo cy'uburenganzira bw'abantu kandi ntabwo haboneka amahoro ya nyayo mu gihe ubwo burenganzira butubahirizwa.'

Umukuru w'Igihugu yavuze ko ushaka kwambura abaturage uburenganzira ku bwenegihugu, bakwiye kumenya ko bizabagiraho ingaruka. Ati 'Ntabwo wabyuka umunsi umwe ngo uhitemo uwo ushaka kwambura uburenganzira bw'ubwenegihugu ngo utekereze ko uzabyikuramo.'

Intumwa za guverinoma y'u Rwanda n'iya RDC ziherutse guhurira i Luanda muri Angola tariki ya 30 Nyakanga 2024, bigizwemo uruhare na Perezida Lourenço. Zemeranyije ko kugira ngo ikibazo cyo muri RDC gikemuke, ari ngombwa ko hakomeza ibiganiro bya Nairobi n'ibya Luanda.

---

Ni umuhango witabiriwe n'Abanyarwanda ibihumbi 45 bari bateraniye muri Stade Amahoro. Witabiriwe n'abakuru b'ibihugu 22, ba Visi Perezida bane, ba Minisitiri w'Intebe babiri, abayobozi b'Inteko zishinga Amategeko babiri, batanu bayobora imiryango mpuzamahanga, batatu bahoze ari abakuru b'ibihugu n'abandi banyacyubahiro batandukanye ni bo bitezwe muri uyu muhango.

Perezida Kagame yarahijwe na Perezida w'Urukiko rw'Ikirenga, Dr Ntezilyayo Faustin. Umukuru w'Igihugu yari agaragiwe na Madamu Jeannette Kagame.

Paul Kagame yagize ati ''Njyewe Kagame Paul ; ndahiriye u Rwanda ku mugaragaro ko ntazahemukira Repubulika y'u Rwanda; ko nzakurikiza nkanarinda Itegeko Nshinga n'andi mategeko; ko nzakorana umurava imirimo nshinzwe; ko nzaharanira amahoro n'ubusugire bw'igihugu; ko nzashimangira ubumwe bw'Abanyarwanda; ko ntazigera nkoresha ububasha mpawe mu nyungu zanjye bwite; ko nzaharanira ibyagirira Abanyarwanda bose akamaro. Nintatira iyi ndahiro nzabihanirwe n'amategeko. Imana ibimfashemo.'

Amaze kurahira yahawe ibirango by'igihugu birimo Itegeko Nshinga, Ibendera ry'Igihugu, Ikirangantego cy'Igihugu n'Inkota n'Ingabo.

Ingabo z'u Rwanda (RDF) zarashe imizinga 21 mu guha icyubahiro Perezida Paul Kagame, Umugaba w'Ikirenga w'Ingabo z'u Rwanda.

Nyuma yo kuririmba indirimbo yubahiriza igihugu, Perezida Paul Kagame yagenzuye ingabo ahereye ku bakoze akarasisi bari bagizwe n'amasibo 12 barimo abo mu Ngabo z'Igihugu (RDF) na Polisi y'Igihugu (RNP).

Perezida Kagame yatsinze amatora yabaye ku wa 14-15 Nyakanga 2024 ku majwi 99,18%, bivuze ko yatowe n'Abanyarwanda 8 822 794. Dr. Frank Habineza w'ishyaka Democratic Green Party of Rwanda ni we waje ku mwanya wa kabiri n'amajwi 0,50%, mu gihe Mpayimana Philippe yaje ku mwanya wa gatatu n'amajwi 0,32%.

Amafoto: Niyonzima Moise

---

Ni ibihembo byitwa 'Africa Women Achievers Awards (AWA)' byatanzwe na 'Mayorkings Agency Group' isanzwe ihemba Abanyafurika b'ingeri zinyuranye.

Byatangiwe i Kigali ku mugoroba w'itariki 10 Kanama 2024 bihabwa abantu 100 bo muri Afurika harimo abagore 99 bateye intambwe ifitiye akamaro umuryango mugari n'umugabo umwe washyigikiye ihame ry'uburinganire rizwi nka 'He for She'.

Muri abo bantu 100 bahawe ibihembo harimo Abanyarwandakazi 36 bo mu ngeri zitandukanye bafite aho bageze ndetse ibi bihembo bikaba ari ubwa mbere bitazwe muri Afurika.

Bamwe mu bagore bahembwe nk'indashyikirwa kandi bongewe n'impamyabushobozi z'icyubahiro zo ku rwego rwa 'doctorat' bahawe na Kaminuza yitwa Prowess yo muri Amerika.

Umuyobozi Mukuru wa Mayorkings Agency Group, Umunya-Nigeia, Dr. Louis Temisan yavuze ko we n'abo bakorana baterwa ishema no guha agaciro ibikorwa by'indashyikirwa umuntu yakoze akiriho kugira ngo na we amenye agaciro kabyo kandi bimutere imbaraga.

Yavuze ko mu gutekereza aho gutangira ibihembo bwa mbere u Rwanda rwabaye amahitamo meza kandi ko nk'Igihugu cyabakiriye neza iki gikorwa kitazahabera rimwe gusa.

Ati 'Kudaheza abagore mu buyobozi ni ingenzi mu bikorerwa mu Gihugu kandi ni byo biri kuba hano mu Rwanda. Ni cyo cyatumye duhitamo iki Gihugu ngo cyakire itangwa ry'ibi bihemo ku shuro ya mbere. Ibyo bizafasha ibindi bihugu bya Afurika kwigira ku buryo ubuyobozi bw'u Rwanda bwita ku bagore na byo bibongere mu bindi bikorwa'.

Dr. Temisan yongeyeho ko ibi bihembo bizajya bitangirwa mu bihugu binyuranye bya Afurika ariko ko uburyo bakiriwe mu Rwanda byatumye bizahatangirwa no mu mwaka utaha ku nshuro yabyo ya kabiri.

Umunyamakuru Mutesi Scovia, nyuma yo guhabwa igihembo yabwiye IGIHE ko ari iby'agaciro kuba ibyo akora bigera aho abishimirwa gusa ko binamuha izindi nshingano.

Ati 'Buri muntu wahembwe aba yishimye kandi iyo umuntu ahembwe hari ibyo aba agezeho ariko ni n'igisobanuro cyo kuvuga ngo ugumane n'uwizeraga ko hari icyo ushoboye kugira atazavuga ko yibeshye ku muntu azi ko hari icyo ashoboye agasanga nta cyo ashoboye. Iyo hagize unshimira aba amapaye umukoro mushya wo kugira ngo nkore ibirenze ibyo. Rimwe na rimwe uba utanarusha abandi ariko amahitamo y'uhemba agasanga ari wowe ugezweho'.

Mutesi yongeyeho ko yishimiye kuba imyaka irindwi ya manda y'Umukuru w'Igihugu irangiye ashimirwa ibyo na we yagezeho muri icyo gihe akaba agiye gukomerezaho kandi ko binatera imbaraga barumuna be mu mwuga bakabasha kubona ko byose bishoboka hatitawe ku gitsina ahubwo ubunyamwuga.

Senateri Dr. Nyinawamwiza yavuze ko impinduka zabaye mu Gihugu zagizwemo uruhare rukomeye n'abagore ubu bikaba biri kubonwa n'amahanga akabishima.

Yavuze ko kandi we ubwe yishimira kuba ibyo yakoze akiri mu rwego rw'uburezi bikomeje guhabwa agaciro n'ubu yagize muri Sena y'u Rwanda.

Yongeyeho ko icyizere Perezida Paul Kagame yagiriye abagore bazakomeza kugikoresha berekana ubushobozi bwabo mu iterambere ry'Igihugu n'iry'umugabane wa Afurika muri rusange.

---

Perezida Ruto yageze ku Kibuga Mpuzamahanga cy'Indege cya Kigali yakirwa na Minisitiri w'Ubutabera akaba n'Intumwa Nkuru ya Leta Dr Ugirashebuje Emmanuel.

Uyu Mukuru w'Igihugu akimenya iby'ibanze byavuye mu matora ya Perezida wa Repubulika n'Abadepite, yahise ashimira Paul Kagame wagize amajwi ari hejuru ya 99%.

Yagize ati 'Twifatanyije namwe mu kwishimira amahitamo y'Abaturage b'u Rwanda kandi tukwifurije amahirwe mu rugendo ukomeje kuyoboramo igihugu mu nzira y'amahoro, ubukungu n'iterambere.'

'Nkwijeje kuzakomeza imikoranire haba muri gahunda z'Akarere n'iz'Afurika mu guteza imbere ubufatanye n'imibanire hagati y'abaturage ba Kenya n'ab'u Rwanda.'

Perezida Kagame na mugenzi we wa Kenya, William Ruto baherukaga kugirana ibiganiro tariki 29 Gicurasi mu 2024, nyuma y'uko Perezida Kagame yari mu ruzinduko muri Kenya, yitabiriye inama yateguwe na Banki Nyafurika y'Iterambere (AfDB) iri kubera i Nairobi.

Perezida wa Kenya, William Ruto, yamaze kugera mu Rwanda, aho ategerejwe mu muhango wo kurahira kwa Perezida Paul Kagame.
📹RBA pic.twitter.com/ktFjvMnUaK

— IGIHE (@IGIHE) August 11, 2024

Mu bandi bamaze kugera mu Rwanda harimo Perezida wa Somalia, Hassan Sheikh Mohamud, na we wakiriwe na Minisitiri w'Ubutabera Dr Ugirashebuja Emmanuel.

U Rwanda rusanganywe umubano na Somalia aho bafatanya mu ngeri zitandukanye zirimo n'ubutabera.

Ni mu gihe kandi Perezida wa Mozambique, Filipe Nyusi yamaze kugera ku Kibuga Mpuzamahanga cy'Indege cya Kigali, yakirwa na Minisitiri w'Ubuzima Dr Nsanzimana Sabin.

Uruzinduko rwa Perezida Nyusi rusa n'urushimangira ubufatanye burangwa hagati y'impande zombi, aho u Rwanda rufasha Mozambique kubungabunga umutekano mu Ntara ya Cabo Delgado binyuze mu masezerano yasinywe hagati y'impande zombi.

Ibihugu byombi kandi byasinye amasezerano y'ubufatanye mu ngeri zitandukanye zirimo no guhererekanya abakekwaho ibyaha n'ibindi.

Perezida wa Repubulika ya Congo, Denis Sassou Nguesso na we yageze mu Rwanda aho yifatanya n'abandi bakuru b'ibihugu mu muhango w'Irahira rya Perida Kagame, we yakiriwe na Minisitiri w'Intebe Dr Edouard Ngirente.

U Rwanda na Repubulika ya Congo ni ibihugu bisanzwe bifitanye umubano mwiza waranzwe no kugenderana kw'abakuru b'ibihugu byombi.

Muri Nyakanga mu 2023 nibwo Denis Sassou Nguesso yagiriye mu Rwanda uruzinduko rw'iminsi itatu, rugamije gushimangira umubano usanzwe hagati y'impande zombie. Rwaje rukurikira urwo mugenzi we w'u Rwanda yagiriye i Brazzaville muri Mata 2022.

Mu gushimangira umubano hagati y'ibihugu byombi, Congo-Brazzaville n'u Rwanda byasinyanye amasezerano menshi y'ubufatanye mu nzego zinyuranye zirimo umuco, uburezi, ibidukikije, ishoramari, imyuga, n'ubukungu.

Kuri ayo masezerano kandi haje kwiyongeraho ayerekeye ubuhinzi, ubucukuzi bw'amabuye y'agaciro, ubucuruzi, inganda n'ibindi.

Perezida wa Madagascar, Andry Rajoelina na we yageze ku Kibuga Mpuzamahanga cy'Indege cya Kigali yakirwa na Minisitiri w'Ubuzima Dr Sabin Nsanzimana.

U Rwanda na Madagascar bisanzwe bifitanye umubano mwiza, aho mu 2023 ibi bihugu byombi byasinyanye amasezerano y'ubufatanye mu bijyanye n'ubucuruzi n'ishoramari hagati y'inzego z'abikorera hagamijwe koroherezanya ku mpande zombi.

Perezida Andry Rajoelina aheruka guhura na Perezida Kagame muri Kanama 2023 ubwo yari ari mu ruzinduko rw'akazi rw'iminsi itatu mu Rwanda. Icyo gihe Perezida Andry Rajoelina yashimye uburyo Perezida Kagame yizerera mu kugira Afurika yishoboye, iteye imbere kandi ishobora kwikemurira ibibazo byaba iby'ubushomeri, umutekano n'ibindi.

Yavuze kandi ko icyo cyerekezo cya Perezida Kagame bagihuriyeho kandi ko igihugu cye cyiteguye gufatanya n'u Rwanda kugira ngo iterambere ry'ibihugu byombi na Afurika muri rusange rigerweho.

Perezida wa Angola, João Lourenço na we yageze i Kigali aho agiye gushyikira mugenzi we Paul Kagame, ndetse yakiriwe na Minisitiri w'Intebe Dr Edouard Ngirente.

U Rwanda na Angola ni ibihugu bisanzwe bifitanye amasezerano mu rwego rw'ubucukuzi bw'amabuye y'agaciro n'imigenderanire, aho byakuriranyeho Visa ku baturage babyo.

Angola ni yo muhuza mu bibazo by'ubwumvikane buke hagati y'u Rwanda na RDC ndetse mu myaka ishize yari n'Umuhuza mu bibazo rwari rufitanye na Uganda.

---