Webrwanda Backend

Author: webrwanda

  • CANAL+ yifatanyije n’abanya-Kicukiro mu Mugan… – #rwanda #RwOT

    Umuganda Rusange ukorwa na buri munyarwanda mu rwego rwo kwishakira bimwe mu bisubizo nk’uko abanyarwanda babyiyemeje. Abaturarwanda bose n’inzego zinyuranye yaba iza Leta ndetse n’iz’abikorera, bitabira umuganda rusange. Ni muri urwo rwego CANAL+ yifatanyije n’abanya-Kicukiro mu muganda usoza ukwezi k’Ukwakira 2024.

    Kuri uyu wa Gatandatu tariki 26 Ukwakira 2024, CANAL+ Rwanda yifatanyije n'abaturage b’Akarere ka Kicukiro n’izindi nzego zinyuranye mu muganda rusange wabereye mu Murenge wa Gahanga, mu karere ka Kicukiro, mu Mujyi wa Kigali. Muri uyu muganda, hatewe ibiti 10,000 mu rwego rwo kurengera ibidukikije.

    Muri iki gikorwa cy’Umuganda rusange, Sosiyete imaze kuba ubukombe ku Isi mu gucuruza ibijyanye n’amashusho ya televiziyo, CANAL+ yatanze ubwisungane mu kwivuza ku baturage 884 batishoboye, mu rwego rwo kwita ku mibereho myiza y'abaturage.

    Uyu muganda wahurije hamwe abakozi ba CANAL+, abashinzwe umutekano, ndetse n'abayobozi batandukanye baturutse mu nzego z'ubuyobozi. CANAL+ ikomeje kugaragaza uruhare rwayo mu kurengera ibidukikije no kwita ku mibereho myiza y'abaturage.

    Canal+ ikoze iki gikorwa nyuma y’iminsi micye ifunguye ishami rishya i Nyabugogo mu kwegereza abanyarwanda ibikorwa byayo. Iri shami ryaje risanga ayandi ari i Remera na Kicukiro, ryitezweho umusaruro mu gutanga serivisi yihuse kandi inoze ku bakiriya bayo.

    CANAL+ Rwanda yifatanyije n'abanyarwanda n’izindi nzego zinyuranye mu muganda rusange

    CANAL+ yatanze ubwisungane mu kwivuza ku baturage 884 batishoboye

    Source : https://inyarwanda.com/inkuru/148072/canal-yifatanyije-nabanya-kicukiro-mu-muganda-inatanga-mituweli-ku-baturage-884-batishoboy-148072.html

  • Gutsinda urugamba rwo kwibohora bisaba kwima amatwi ba mpatsibihugu #rwanda #RwOT

    Gutera umugongo amabwiriza y'urucantege akunze gutangwa na ba mpatsibihuguyu, ni umwanzuro wagiye ufatwa n'impirimbanyi nyinshi mu mateka, kandi uzifasha gutsinda intambara y'impinduramatwara.

    Ubundi intambara zo kwibihora ukoresheje intwaro, kenshi siyo aba ari amahitamo ya mbere, kuko zibanzirizwa no guteza ubwega, abahohoterwa basaba ko ikibazo cyabo cyumvikana, kikabonerwa umuti nta maraso amenetse. Uko gutakamba iyo kwimwe agaciro rero, ababoshye bisanga nta yandi mahitamo, bakayoboka inzira ya' nzapfa nzakira simbizi', urugamba rukarema!

    Iyo rumaze kwambikana rero, usanga aribwo ba mpatsibihugu bagatangira gukanga no guha gasopo abafashe intwaro ngo birwaneho. Abo ' bapolisi b'isi'baba banga ko ibintu byajya ko ibintu byahinduka atari bo babigennye, ariko cyane cyane batinya ko abagaragu babo batakaza ubutegetsi, inyungu bari barinze zigahungabana.

    Reka dufate urugero ku Rwanda. Mbere y'uko FPR-Inkotanyi itangira intambara yo kubohora igihugu, ntako impunzi z'Abanyarwanda zitagize ngo zihabwe uburenganzira bwo kugaruka mu gihugu cyazo, ariko amahanga avunira ibiti mu matwi. Nyamara isasu rya mbere rya FPR ryapfuye kuvuga, abo mu burengerazuba bw'isi bavuza induru ngo ' abanyamahanga' bateye uRwanda. Iyo FPR ikangwa n'iryo terabwoba ikareka urugamba rwo kwibohora, n'ubu izo mpunzi ziba zikizerera mu mahanga atazishaka, Abanyarwanda b'imbere mu gihugu nabo bakiri ku ngoyi y'ingoma-ngome ya Habyarimana cyangwa abandi nkawe.

    Iyo umugaba mukuru wa RPA yumvira gasopo yari ahawe yo kudahirahira ngo afate Butare, n'ubu muri ako gace Interahamwe ziba zikivuga rikijyana, kuko nta na rimwe ibyo bihangange byari kuzabwira Kagame 'ngo noneho genda ufate Butare'.

    Nyuma ya Jenoside yakorewe Abatutsi, abajenosideri bakoze ku ntwaro zabo bahungira muri Zayire y'icyo gihe. Bagezeyo bakomeje imyiteguro, ndetse amahanga akomeza kubaha ibikenewe ngo bagaruke ku butegetsi mu Rwanda. Reka dutekerereze rero nk'iyo uRwanda rutinya igitutu cy'umuryango mpuzamahanga, ntirujye gusenya inkambi z'abo bajenosideri, maze twibaze uko ubu umutekano wari kuba wifashe muri iki gihugu.

    birasa neza n'ibibera muri Repubulika Iharanira Demokarasi ya Kongo, aho bamwe mu bakongomani bari ku rugamba rwo guharanira uburenganzira bwabo. Iyo bamwe botsa igitutu M23 ngo nive mu birindiro yafashe, birengagiza ibihumbi amagana by' Abakongomani bavuga Ikinyarwanda, bamaze imyaka mu nkambi z'impunzi, nyuma yo kumeneshwa mu byabo n'abajenosideri ba FDLR, babifashijwemo na Leta ya Kongo.

    Niba ayo mahanga ntacyo yafashije aba Bakongomani ngo bave mu kaga k'ubuhunzi bamazemo imyaka, kuki nibura batabaha agahenge ngo birwaneho, ahubwo ugasanga Abanyamerika baravuza induru nk'aho ari Texas cyangwa Chicago yatewe, Abafaransa bagasizora uboshye ari Paris cyangwa Monaco M23 yagabyeho ibitero?

    Iyi myitwarire y'abo mu burengerazuba bw'isi, uretse kubungabunga inyungu zabo zirinzwe n'inkomamashyi Tshisekedi, ni na bwa bwibone n'irondaruhu, byo kumva ko Umunyafrika adafite ubushobozi n' uburenganzira bwo kwifatira ibyemezo biberanye n'ubuzima yifuza. Muri make ubukoloni ntaho bwagiye!

    Abategetsi b'Amerika, Ubufaransa, Ububiligi, Ubwongereza, n'abandi basohora buri munsi amatangazo ahungeta M23, bumva ari bo bagomba kugena imibereho y'Abakongomani, kuko ubwabo badafite ubushobozi bwo kwitekerereza. Ng'uko uko bategeka 'ihagarikwa ry'imirwano', rigomba kubahirizwa gusa na M23, ikaba igomba gutega umusaya Tshisekedi agakubita urushyi aho ashakiye!

    Icyiza ariko, M23 yamaze gusobanukirwa ko mpatsibihugu ashoborwa no kumwima amatwi, wowe ugakora ibyo wemeranywaho n'umutimanama wawe. Ubu M23 ntigitega agatwe ngo Tshisekedi ahondeho, ahubwo iyo ayishotoye, ahubwo irushaho kwagura ibirindiro. Gen. Makenga na Corneille Nangaa bamaze kumva ko induru n'amatangazo yamagana bitabuza inka gushoka.

    Tugarutse ku Rwanda, Perezida Kagame buri gihe asobanura ko ntawe azamenyesha cyangwa ngo amusabe uruhushya, igihe cyose bizaba ngombwa ko uRwanda rurengera ubusugire bwarwo. Nk'uko basanzwe hari ababyumvikanisha uko bashaka, ariko ntibikoma mu nkokora ingamba z'uRwanda zo kwirindira umutekano. Nimutekereze aho FDLR n'abandi bagome bari kuba batugeze, iyo uRwanda rubanza gutakamba no gusaba kugirirwa impuhwe.

    Kumvikana no kujya inama uRwanda rubishyira imbere, ari nayo mpamvu urusanga makoraniro n'imiryango myinshi y'ubufatanye. Kubaha ariko ntibikuraho ubwirinzi, rutitaye ku mabwiriza nk'ayo mu gihe cy'abakoloni.

    Kwanga gupfukama, ahubwo ugakora ibiri mu nyungu zawe kandi ntawe uhutaje, nibyo bizatsinda politiki ya 'humiriza kuyobore' ituganisha mu manga. Niko kwiha agaciro umuturage w'Afrika akeneye, bizamurinda ingorane ba rusahuriramunduru bamwifuriza.

    The post Gutsinda urugamba rwo kwibohora bisaba kwima amatwi ba mpatsibihugu appeared first on RUSHYASHYA.

    Source : https://rushyashya.net/gutsinda-urugamba-rwo-kwibohora-bisaba-kwima-amatwi-ba-mpatsibihugu/?utm_source=rss&utm_medium=rss&utm_campaign=gutsinda-urugamba-rwo-kwibohora-bisaba-kwima-amatwi-ba-mpatsibihugu

  • Cristiano Ronaldo akomeje kwandika amateka akomeye – YEGOB #rwanda #RwOT

    Umunya-Portugal Cristiano Ronaldo, umwe mu bakinnyi b'ibyamamare ku isi mu mupira w'amaguru, yatangiye ubufatanye bwimbitse n'Ikigo Bioniq , kizwiho gukwirakwiza imiti yongera intungamubiri. Ubu, agaciro k'iki kigo kamaze kugera kuri miliyoni 82 z'amadolari y'Amerika, nk'uko byatangajwe na Bioniq binyuze ku mbuga nkoranyambaga.

     

    Ronaldo yari asanzwe akorana na Bioniq kuva mu 2022, ariko kuri ubu iki kigo cyatangaje ko yamaze kuba umwe mu banyamigabane bacyo, nyuma yo gushoramo imari ifatika. Ibi bishimangira ko Ronaldo atagarukira gusa ku kuba umukinnyi w'intangarugero mu kibuga, ahubwo anategura neza ahazaza mu rwego rw'ubucuruzi, nk'uko yagiye abigaragaza ko nyuma yo kuva mu mupira azakomeza kwibanda ku ishoramari.

    Cristiano Ronaldo ni umwe mu bakinnyi bashora imari mu bikorwa bitandukanye, birimo amahoteli, ibibuga bya siporo, imyambaro, ndetse n'ibijyanye n'imibereho myiza. Ubufatanye bwe na Bioniq burerekana ko ashaka gukomeza kuba ku isonga mu bikorwa by'ubucuruzi ku rwego mpuzamahanga.

     

    Bioniq, izwiho gukora imiti yongera intungamubiri no gutanga serivisi zifasha mu mibereho myiza hifashishijwe ikoranabuhanga, yizeye ko ubufatanye na Ronaldo buzayifasha kwagura isoko. Ronaldo, ufite izina rikomeye kandi rikundwa n'abantu batandukanye ku isi, azagira uruhare mu kumenyekanisha ibikorwa by'iki kigo ku rwego mpuzamahanga.

     

    Uyu munyabigwi wubatse izina muri ruhago akomeje no kugaragaza ko abakinnyi bashobora gufungura indi miryango yo gutera imbere mu bucuruzi, bityo bakagira ahazaza heza nyuma yo kurangiza igihe cyabo mu guconga ka ruhago.

    Cristiano Ronaldo ni umwe mu bakinnyi bashora imari mu bikorwa bitandukanye.
    Ronaldo

     

    Source : https://yegob.rw/cristiano-ronaldo-akomeje-kwandika-amateka-akomeye/

  • Ibikorwa byo gutunganya ishyamba rizitirirwa MTN Rwanda birarimbanije – #rwanda #RwOT

    Ni igikorwa cyabaye ku wa 26 Ukwakira 2024 mu Muganda Rusange. Cyari cyitabiriwe n'abakozi ba MTN Rwanda ndetse n'abaturage baturiye umusozi wateweho ibiti.

    Ubwo iyi sosiyete yakoraga iki gikorwa, ku rundi ruhande, Umujyi wa Kigali wari uri gutangiza gahunda yo gutera ibiti bisaga miliyoni eshatu mu myaka itanu iri imbere mu murongo wo kugira 'Kigali Itoshye'.

    Umuyobozi w'Ishami rishinzwe Imikoranire n'izindi nzego muri MTN Rwanda, Kayitare David, yavuze ko iyi sosiyete yiyemeje gusubiza bimwe mu byo bungutse mu baturage hagamijwe kugira uruhare mu bikorwa bigamije iterambere.

    Ati 'Ubusanzwe MTN izwiho ibikorwa by'ubucuruzi ariko si byo ikora gusa kuko inakora n'ibindi bigamije guteza imbere abaturage mu nzego nyinshi. Tuzi akamaro k'igiti muri sosiyete, icyo dusaba abaturage ni ukubibungabunga.'

    'Mu mwaka ushize twahateye ibiti ibihumbi 25, ubu tuhateye 100. Intego ni uko hazahinduka ishyamba rya 'MTN Forest' ku buryo umuntu azajya ahicara akaharuhukira niba ashaka no kubona iyo Wifi ayihasange n'ibindi ku buryo byamufasha ariko hitiriwe MTN n'abaturage ba Kanyinya.'

    Umwaka ushize ubwo MTN Rwanda yizihizaga imyaka 25 ishize itangiye gukorera mu Rwanda, warangiye iteye ibiti ibihumbi 25 kuri uyu musozi wo mu Karere ka Nyarugenge.

    Umunyamabanga Nshingwabikorwa w'Umurenge wa Kanyinya, Dusabeyezu Emmanuel, yavuze ko iyi gahunda ya MTN Rwanda ari ingenzi mu kubungabunga ibidukikije, gufata neza imisozi ihanamye bifasha mu kurwanya isuri.

    Ati 'Mu biti byatewe umwaka ushize habaye ikibazo cy'izuba ryinshi bimwe muri byo birangirika ariko hari ibyabashije gukura, ubu nitugira amahirwe tukabona imvura nyinshi ibi biti bizafata kandi tubikurikirane ku buryo undi mwaka bizaba bimeze neza.'

    Mu nama yabaye nyuma y'uyu muganda, hagaragajwe ko hari abaturage baturiye uyu musozi bawuragiriraho amatungo, bikaba ariyo ntandaro y'iyangirika rya bimwe mu biti byatewe.

    Ubuyobozi bw'Umurenge bwongeye gukebura abaturage bugaragaza ko nta matungo yemerewe kuragirirwa hanze y'ibiraro kandi ko uzafatwa azahanwa n'amategeko.

    MTN Rwanda isanzwe igira uruhare muri gahunda z'iterambere binyuze mu nkingi zinyuranye zirimo iy'uburezi, ubuvuzi, kuzamura imibereho y'abaturage, ndetse na gushyigikira gahunda zimwe na zimwe za leta.

    MTN Rwanda yateye ibiti 100 ku musozi wo mu Murenge wa Kanyinya, aho yari yarateye ibindi biti 25.000 umwaka ushize

    Abakozi batandukanye ba MTN Rwanda bagiye bafata umwanya wo gutera ibiti

    Umuyobozi w’Ishami rishinzwe Imikoranire n’izindi nzego muri MTN Rwanda, Kayitare David [hagati] yavuze ko iri shyamba rizitirirwa MTN rizashyirwamo ibizafasha abantu kumererwa neza

    Umukundwa Christine Ushinzwe imibereho myiza y’abaturage muri MTN Rwanda, ategura igiti cyo gutera

    Shumbusho Ndabaga wa MTN Rwanda atera igiti

    Umukundwa Christine wa MTN Rwanda atera igiti

    Uyu musozi uzahindurwa uw’ubukerarugendo mu bihe bizaza

    Umunyamabanga Nshingwabikorwa w'Umurenge wa Kanyinya, Dusabeyezu Emmanuel, yavuze ko ibi biti bizakomeza kwitabwaho

    Nyuma yo gutera ibiti, habayeho n’igikorwa cyo gusibura imiyoboro y’amazi ku muhanda uri haruguru y’umusozi wateweho ibiti

    Nyuma y’umuganda wo gutera ibiti, abaturage bagiranye ibiganiro

    Abakozi ba MTN Rwanda baremeye umuturage wari ukeneye ubwisungane mu kwivuza

    Amafoto: Jabo Robert

    Source : http://igihe.com/amakuru/u-rwanda/article/ibikorwa-byo-gutunganya-ishyamba-rizitirirwa-mtn-rwanda-birarimbanije

  • Ibiciro byageze hanze byu mukino uzahuza u Rwanda na Djibouti – YEGOB #rwanda #RwOT

    Ikipe y'igihugu ya Djibouti yitegura kwakira u Rwanda mu mukino wo kwishyura mu majonjora y'irushanwa rya CHAN 2024, umukino uzabera kuri Stade Amahoro tariki ya 27 Ukwakira 2024, guhera saa cyenda z'amanywa (15h00). Djibouti ni yo izakira uyu mukino i Kigali, nyuma y'uko Stade yabo idakomeje guhabwa uburenganzira bwo kwakira imikino mpuzamahanga.

    Ishyirahamwe ry'umupira w'amaguru muri Djibouti (FDF) ryamaze gushyira ahagaragara ibiciro by'amatike y'uyu mukino, aho byateguwe mu byiciro bitandukanye kugira ngo byorohere abafana b'ingeri zose kwitabira no gushyigikira ikipe yabo.

    Ibiciro by'amatike byo kwinjira muri uyu mukino ni ibi bikurikira:

    Upper Bowl: 1,000 Frw ku batatinze kugura amatike, naho ku munsi w'umukino igiciro kizaba 2,000 Frw.

    Lower Bowl: 1,000 Frw mu bihe bya mbere, ariko ku munsi w'umukino igiciro kizaba 2,000 Frw.

    VIP: 10,000 Frw, byagumye uko ari n'iyo waba uguriye ku munsi w'umukino.

    VVIP: 30,000 Frw.

    Executive Suite: 50,000 Frw.

    SkyBox: 1,000,000 Frw.

    Amatike aragurishwa hakoreshejwe uburyo bwa telefoni aho ushobora guhamagara *939*31# cyangwa unyuze ku rubuga rwa gahunda.palmkash.com kugira ngo utangire ugureitike hakiri kare.

     

    Source : https://yegob.rw/ibiciro-byageze-hanze-byu-mukino-uzahuza-u-rwanda-na-djibouti/

  • Nyiri Radio Isano yavuye imuzi imvano y'ibibazo byatumye iva ku murongo igihe gito – #rwanda #RwOT

    Radiyo Isano yumvikanira ku murongo wa 92.0FM mu bice bya Rutsiro, Rubavu na Goma, yavuye ku murongo tariki 8 Ukwakira 2024 ubwo umuhesha w'inkiko w'umwuga yafatiraga ibikoresho byose yifashishaga kugira ngo bigurishwe hishyurwe umwenda yari ibereyemo Sabune Olivier wigeze kuyiyobora.

    Nyuma y'iminsi itatu, yongeye gusubira ku murongo nyuma yo gukemura ikibazo ba nyirayo bari bafitanye n'uwayiregaga agahabwa amafaranga yari aberewemo nk'uko IGIHE yabihamirijwe n'impande zombi.

    Umuyobozi Mukuru wa Radiyo Isano, Niyigena Sano François, yavuye imuzi ibyavugwaga byose ku bibazo byayiteye kuva ku murongo by'igihe gito n'ingamba bafite zo gukomeza gukemura bimwe mu bibazo byayivugwagaho.

    Ku bijyanye n'amadeni byavugwaga ko iyi Radiyo ibereyemo abantu batandukanye barimo n'abayikoreye, Niyigena Sano yemeye ko hari abo babereyemo imyenda ariko ko byaturutse ku bihombo batejwe n'abari barahawe kuyiyobora bagakora ibitandukanye n'ibyo bemeranyijwe ari byo byabaviriyemo no kwirukanwa, imanza zigatangira ubwo.

    Ati “Yego ariko ntabwo ibikoresho byigeze biva mu kigo. Nifuje ko nasobanura imvo n'imvano y'iki kibazo tukivuye imuzi kuko ni bwo Abanyarwanda baza gusobanukirwa neza ubugome n'ibihombo twatejwe n'abakozi twakoranaga bari bayobowe na Sabune Olivier.'

    Yakomeje agira ati 'Twari dufitanye ikibazo na Sabune Olivier aho twari tumaze imyaka irenga ibiri yarirukanywe ku nshingano yari afite mu kigo kubera kunanirwa kwesa imihigo yari yasezeranyije ikigo. Akimara kubona ko birimo kwanga yafashe iya mbere ashyira umwuka mubi mu bakozi nka bane, bishyira hamwe baharabika ikigo na ba nyiracyo kandi bari bagiteje igihombo.'

    Uyu Muyobozi yavuze ko hari aho abo bakozi bakoreshaga uburyo bwose bwo guhirika ubuyobozi burimo no guhimba bimwe mu bigize ibyaha ariko inzego zose bageragaho zabamaganiraga kure kuko zasangaga abareze bifuza kucyegukana batari ba nyir'imigabane.

    Ati 'Ibi byarabaye, ba nyir'ikigo tumaze kumenya izo nzira ndetse n'umugambi wabo ni bwo twatumije inama y'igitaraganya yabaye tariki 5 Mata, ni bwo twasobanuriye abakozi bose iby'iryo tsinda ryashinzwe mu kigo rigamije kudusenya no kutworeka mu bibazo bikatubana byinshi.'

    Yakomeza agira ati 'Twe nk'abantu bakora kinyamwuga twitaye mu kugarura isura y'ikigo no kuva mu bihombo bari bateje ikigo ndetse no kunoza ibyo dukora kugira ngo birusheho kugenda neza. Sabune ibyo avuga ko yadutsinze, ntiyatsinze kuko yaburanaga asaba ikigo kumwishyura miliyoni 40 Frw ngo na we akazakoresha radiyo ye bwite, ariko yahawe miliyoni 2,1 Frw.'

    'Twe rero twishimiye imikirize y'urubanza ndetse abari bamuhagarariye mu mategeko twahuye na bo twumvikana uko tugiye kwishyuramo izo mperekeza n'ibindi yakoresheje muri izo manza.'

    Umuyobozi Mukuru wa Radiyo Isano, Niyigena Sano François, yijeje abakunzi bayo ko kuri ubu iri gukora neza kandi ko bafashe ingamba zizatuma itongera guhura n'ibibazo yanyuzemo.

    Ati 'Twakoze n'igenamigambi ryabyo hanyuma dushyira imbaraga mu bijyanye no kuyicuruza cyane kandi byaraje kuko ubu aho tugeze ibasha kwitunga ndetse no kwishyura ibyo bisigisigi by'ibihombo twatejwe n'uwari umuyobozi wayo. Twamaze gufata icyemezo cyo kwiyoborera ikigo.'

    'Kuba twiyoborera ikigo nta kabuza ibintu byose bigenda neza kuko tuzi ingaruka zabyo, ikindi ijoro ribara uwariraye. Ndabizeza ko nta kongera kurangara no kwizera abantu badusubiza mu bihombo. Tubijeje gukomeza kugirana imikoranire myiza ahubwo irushijeho kuko natwe ibyo twisanzemo hari amwe mu masomo byadusigiye.'

    Mu zindi ngamba kandi ubuyobozi bwa Radiyo Isano bufite harimo gukomeza gukora cyane kurusha uko bakoraga, kwagura umushinga ndetse no gukomeza guha ibyishimo abakunzi bayo, ibyo byose bikajyana no gukomeza gukemura bimwe mu bibazo igifite.

    Sabune Olivier wayoboye Radiyo Isano aherutse kubwira IGIHE ko ibikoresho byafatiriwe, byari bishingiye ku rubanza yaregeye kuko umukoresha we yari amubereyemo umwenda w'imishahara.

    Ati ” Njye nakoze ndi umuyobozi wa radiyo mu 2021 mfite amasezerano y'imyaka itanu mara umwaka wose ntahembwa noneho nkakomeza kurwazarwaza nibwo natangiye kwishyuza ibirarane nabwo biranga ndandikira Akarere mbasaba ko badufasha gukemura ikibazo ahita anyandikira urwandiko rumpagarika.”

    “Nakomeje kwishyuza aza kuyanyishyura nabi, ibi byafatiriwe ni urubanza naregeye urukiko rwisumbuye rwa Rubavu rwo kunyirukana binyuranyije n'amategeko ndamutsinda kugeza igihe nteje kashe mpuruza urubanza ruba itegeko.”

    Inkuru bifitanye isano: Rubavu: Ibikoresho bya Radiyo Isano byafatiriwe kubera umwenda ibereyemo uwari umunyamakuru wayo

    Ubuyobozi bwa Radiyo Isano bwijeje abakunzi bayo ko yagarukanye ingamba nshya nyuma yo gusubira ku murongo

    Source : http://igihe.com/amakuru/u-rwanda/article/nyiri-radio-isano-yavuye-imuzi-imvano-y-ibibazo-byatumye-iva-ku-murongo-igihe

  • Gakenke: Gare yari itegerejwe imyaka itari mike yatangiye kubakwa – #rwanda #RwOT

    Akarere ka Gakenke ni kamwe mu dukungahaye cyane ku buhinzi kuko usanga abatari bake baturuka i Kigali, Musanze na Rubavu bakajya guhahira mu isoko rya Gakenke usangamo imyaka yose ifite umwimerere ku bwinshi kandi ibiciro byaho abenshi bakabyibonamo, bagahaha banezerewe.

    Ni Akarere gafite isoko usangamo ibijumba, imyumbati, amateke, ibitoki, ibirayi, ibigori n'ibihaza ku bwinshi, wagera ku mbuto ugasanga ni iwabo w'inanasi n'amatunda, hakiyongeraho n'imboga z'ubwoko bwose n'ibisheke, bigatuma kagira umwihariko mu kugira ibiribwa ku bwinshi.

    Ibi bituma abantu benshi baba bifuza kugura ibiribwa by'umwimerere bahayoboka ku buryo kubona aho guparika byari ingorabahizi cyane cyane mu minsi y'isoko. Hari bamwe wasangaga bahutazwa n'ibinyabiziga bikabakomeretsa, abandi bakibwa kubera umuvundo w'abashaka imodoka harimo n'ababuraga ibyo bahashye byitiranyijwe n'iby'abandi cyangwa byibwe.

    Kuri ubu hari gushakwa igisubizo cy'ibyo bibazo kuko hari igice cyari cyubatsweho inzu z'ubucuruzi cyatangiye gusenywa kugira ngo hubakwe gare igezweho ijyanye n'igihe kuko n'abarema iryo soko bagenda biyongera uko bukeye n'uko bwije.

    Umuyobozi w'Akarere ka Gakenke, Mukandayisenga Vestine, yemeje aya makuru, avuga ko kuri ubu babanje kuvanaho inzu zari ahazajya gare kuko izubakwa mu byiciro kandi ko bakomeje kuganira n'abashoramari kugira ngo irimo yihutishwe.

    Ati 'Gare izubakwa mu byiciro, Akarere kabanje kuvanaho inzu z'aho izajya, ba nyirazo bahabwa ingurane ikwiye, imodoka zikaba zivuye mu muhanda. Turi kuganira n'abikorera bashobora gushora imari bakayubaka neza no gushishikariza abacuruzi kugira ngo na bo bavugurure Umujyi wa Gakenke. Ntabwo Akarere ubwako kagiye kubaka gare none aha. Abashaka gushora imari ahubwo nibaze.”

    Ni igikorwa cyakiriwe neza n'abakunda kurema isoko rya Gakenke kuko abenshi wasangaga bahutazwa n'ibinyabiziga, abandi bakibwa ibyo bahashye ndetse no kuba hari ababyitiranyaga n'iby'abandi.

    Benimana Aloys ni umwe muri bo. Yagize ati 'Ku munsi w'isoko wasangaga hano hacucitse abantu, ibyo baguze, imodoka zikandagira ibirenge by'abantu, amagare agonga bamwe. Wasangaga nta wakwifuza kuhaza isoko ryaremye. Iyi gare izatuma tujya dukora twisanzuye, abantu hari aho bagenewe gufatira imodoka.'

    Musanabandi Enatha ugura ibiribwa akajya kubigurishiriza mu isoko ryo ku Mulindi wa Kanombe, yagize ati 'Buri gihe usanga natwaye umufuka urimo ibicuruzwa ntaguze, nanjye ibyo naguze byatwawe n'undi. Ntitwabura guhomba kuko niba naranguye imyumbati bakampakururira intoryi mba mpombye kuko si byo mba nashakiye isoko.”

    “Iyi gare izatubera igisubizo kuko ni hano mu Gakenke gusa twari dusigaye tuburira ibyo twaguze ariko ubu umuntu azajya aza yisanzuye abashe gukurikirana ibicuruzwa bye atabyigana n'ibinyabiziga n'ibisambo.'

    Icyasaga na Gare ya Gakenke cyegeranye n'isoko, ku munsi hanyurwagamo n'imodoka zirenga 400 ziva i Rubavu n'i Musanze zerekeza i Kigali ndetse n'iziba ziva i Kigali zerekeza muri ibyo bice, hakiyongeraho izikorera ingendo muri ako Karere n'iz'abitemberera badashobora kuhanyura batagize icyo bahaha.

    Gare ya Gakenke yari itegerejwe igihe kitari gito yatangiye kubakwa

    Inyubako zacururizwagamo zatanyiye gusenywa kugira ngo aho zari ziri hagurirwe gare

    Source : http://igihe.com/amakuru/u-rwanda/article/gakenke-gare-yari-itegerejwe-imyaka-itari-mike-yatangiye-kubakwa

  • Shaddyboo yemeje ibyurukundo na YeweH wakor… – #rwanda #RwOT

    InyaRwanda yahawe amakuru yizewe yemeza ako aba bombi bari mu rukundo rwitamuruye, kandi ko amafoto n'amashusho byagiye hanze bihamya neza umubano wabo umaze igihe kinini ariko utari waravuzwe mu itangazamakuru. 

    Mu bihe bitandukanye Shaddyboo yagiye agaragaza abakunzi be bashya, ariko ntibyagiye biramba. Yaherukaga kuvugwa mu rukundo na Manzi Jeannot ubarizwa muri Kenya, ariko ibyabo byashyizweho akadomo mu mwaka wa 2023.

    Kuva icyo gihe uyu mugore w'abana babiri ntiyongeye kuvugwa mu rukundo kugeza ubwo kuri uyu wa Gatanu tariki 25 Ukwakira 2024, yagaragaje ko yakunze YewëeH.

    Umubano w'aba bombi wagutse cyane kuva mu mezi ane ashize, kugeza ubwo bombi bifashishije konti zabo bagaragaje ko urukundo rugeze aharyoshye.

    Mu butumwa Shaddyboo yanyujije kuri konti ye ya X, yemeje ko yakunze byimazeyo Producer Yeweeh. Ati 'Mukunda muri benshi ariko agatima kanjye yaragatwaye.'

    Yeweeeh uri mu rukundo na Shaddbooy yigaragaje cyane kuva mu myaka ibiri ishize. Ariko muri iki gihe abitse imishinga y'indirimbo z'abarimo Eddy Kenzo, Otile Brown, The Ben, Mbosso, ndetse hari indirimbo yakoreye Bruce Melodie kuri Album ye.

    Uyu musore ari no kwitegura kujya mu gihugu cya Uganda kurangiza imwe mu mishinga y'indirimbo z'abahanzi bahabarizwa yabakoreye. Ndetse ari no kwitegura kwakira bamwe mu bahanzi bo mu Burengerazuba bw'Afurika bazagera i Kigali.

    YewëeH yakoze ku ndirimbo nka 'Ndotsa' yahuriyemo Uncle Austin, Platini P ndetse na Dj Pius. Yanakoze ku ndirimbo 'Mu Bigori' ya Papa Cyangwe, 'Far Away' ya Pasco na Pride, 'Igikumwe' yaririmbyemo Massamba Intore, Uncle Austin, Tom Close, Khlafan Govinda, Marina, Fireman ndetse na The Nature.


    Shaddyboo yemeje ko ari mu rukundo na Producer YewëeH nyuma y'igihe bacuditse

     

    Kuva mu 2022, Shaddyboo yagaragaje ko ari mu rukundo na Manzi, ariko baje gutandukana mu 2023, buri umwe aca inzira ze 



    Yeweeh amaze iminsi mu myiteguro yo kujya muri Uganda kurangiza imishinga y’indirimbo z’abahanzi yakoreye 


    Mu ndirimbo zigize Album ya Bruce Melodie, harimo imwe yakozwe na Yeweeh 


    Manzi yakundanaga na Shaddyboo yari yaramuhuje n’inshuti ze n’abo mu muryango we  

    KANDA HANO UREBE AMASHUSHO Y’INDIRIMBO 'NDOTSA' YAKOZWE NA YEWEEEH

    KANDAHANO UREBE AMASHUSHO Y'INDIRIMBO 'IGIKUMWE' YAKOZWE NA YEWEEH

      “>

    Source : https://inyarwanda.com/inkuru/148069/shaddyboo-yemeje-ibyurukundo-na-yeweeh-wakoreye-abarimo-eddy-kenzo-na-otile-brown-148069.html

  • 'Byatwaye imyaka 13' yose kugira Rafferty abone uburyo bwo kwigaragaza #rwanda #RwOT

    Myugariro wa Rangers yarangije ikinyejana cya kabiri cyagaragaye mu mikino mpuzamahanga muri Irlande y'Amajyaruguru banganyije igitego 1-1 mu mikino ibanza yo gukina imikino yo gushaka itike yo gukina Euro 2025 hamwe na Croatia.

    Na Rafferty, watangiye imikino 12 yikurikiranya ya NI, arashaka kwishimira ibirori byabereye i Varazdin. Rafferty yemeje ko bitamworoheye kwiyumvisha ko yageze ku ntambwe nk'iyi mbere yuko Tanya Oxtoby ashyirwaho, bitewe n'uko yari yarigeze kuba mu makipe yo muri Irilande y'Amajyaruguru no hanze.

    Uyu mukinnyi yongeye ati: 'Umupira urashobora gukora mu buryo budasanzwe kandi buhebuje, mpabwa amahirwe kandi ndabifata, byose ndabiha igihugu cyanjye.'

    Uyu musore wimyaka 28 yashimye kapiteni mushya washyizweho na Irlande y'Amajyaruguru Simone Magill kuba yarahaye akaboko kapiteni mu gihe rutahizamu wa Birmingham City yashakaga kwerekana urwego rw'umupira wamaguru kuri Rafferty.

    'Birashoboka ko byamugoye kuko aherutse gutangazwa nka kapiteni. 'Yavuga ko itsinda ryagize umwihariko, ni ijoro ni igihe ntazibagirwa.' Rafferty yemeye ko Irilande y'Amajyaruguru yagombaga 'gucukumbura cyane' kugira ngo itsinde igitego nka cyiriya igitego cyatsinzwe. 'Intego ye yari iteye ubwoba, ubwo igitego yishimiraga akiva ku ntebe Casey Howe abikora gutyo.'

    Ati: 'turashaka gushyira mu bikorwa no kugera mu cyiciro gikurikira.' Uyu mukinnyi yavuze ko ikibuga cyagize uruhare mu miterere y'imikino. 'Igice cya mbere ntabwo cyari kibi cyane ariko igice cya kabiri natwe ubwacu byaradutunguye rwose, twakoze uko dushoboye kose ntabwo cyari cyiza cyane, ariko twaje kubona ibisubizo by'umukino ari byiza.'

    The post 'Byatwaye imyaka 13' yose kugira Rafferty abone uburyo bwo kwigaragaza appeared first on KASUKUMEDIA.COM.

    Source : https://kasukumedia.com/byatwaye-imyaka-13-yose-kugira-rafferty-abone-uburyo-bwo-kwigaragaza/

  • Shaddy Boo mubishashi by'urukundo n'umunyamuziki Yeweeh #rwanda #RwOT

    Rwiyemeza mirimo Mbabazi Shadia wamamaye kwizina rya shadyboo na producer yeweeh, aba bombi bakaba babarizwa mugihugu cy'Urwanda bagaragaje amashusho kumbuga nkoranya mbaga bakoresha za instagrame.

    Kumbuga nkoranya mbaga zaba bombi, shaddyboo_92 na rreal_yeweeh bagaragaje amashusho barikumwe mucyumba bishimanye barebana icyoroshye, ibyo benshi bita akana komujisho.Bikaba bivugwa ko aba bombi bafitanye umubano wihariye.

    The post Shaddy Boo mubishashi by'urukundo n'umunyamuziki Yeweeh appeared first on KASUKUMEDIA.COM.

    Source : https://kasukumedia.com/shaddy-boo-mubishashi-byurukundo-numunyamuziki-yeweeh/