U Rwanda rwiyemereye kutazatererana Sudan y'epfo #rwanda #RwOT

U Rwanda rwongeye gushimangira ko ruzakomeza kugira uruhare mu bikorwa bigamije kwimakaza amahoro n'umutekano muri Sudani y'Epfo, ndetse no gufasha icyo gihugu gukomeza inzira ya politiki igamije kugarura ituze.

Ibi byagarutsweho na Minisitiri w'Ububanyi n'Amahanga n'Ubutwererane, Amb. Olivier J.P Nduhungirehe, wari uhagarariye Perezida Paul Kagame mu nama y'Itsinda ry'Umuryango wa Afurika Yunze Ubumwe rishinzwe gukurikirana ikibazo cya Sudani y'Epfo, rizwi nka C5 Plus.

Iyi nama yabaye hifashishijwe ikoranabuhanga ku wa 29 Nzeri 2026, iyobowe na Perezida wa Afurika y'Epfo, Cyril Ramaphosa. Abayitabiriye baganiriye ku miterere y'ibibazo bya politiki n'umutekano bikomeje kugaragara muri Sudani y'Epfo, ndetse banarebera hamwe ingamba zakomeza gufatwa mu gushimangira amahoro muri icyo gihugu.

Mu ijambo rye, Minisitiri Nduhungirehe yongeye kugaragaza ko u Rwanda rwiyemeje gukomeza gutanga umusanzu mu bikorwa bigamije gufasha Sudani y'Epfo kugera ku mahoro arambye. Yavuze ko u Rwanda ruzakomeza kugira uruhare cyane cyane binyuze mu bikorwa byo kubungabunga amahoro, ndetse no mu zindi gahunda z'ubufatanye zisanzweho hagati y'ibihugu n'inzego birebwa n'ikibazo cya Sudani y'Epfo.

Uruhare rw'u Rwanda rugaragarira kandi mu bikorwa byo kubungabunga amahoro, aho igihugu gikomeje kugira uruhare mu bikorwa mpuzamahanga bigamije gufasha ibihugu byugarijwe n'ibibazo by'umutekano kongera kugira ituze.

C5 Plus ni Komite Yihariye yo ku Rwego Rukuru ya Afurika Yunze Ubumwe ishinzwe Sudani y'Epfo. Igizwe n'ibihugu bitanu ari byo u Rwanda, Afurika y'Epfo, Algeria, Tchad na Nigeria. Iyi komite yashyizweho kugira ngo igire uruhare mu biganiro no mu ngamba zigamije gushakira ibisubizo ibibazo bya politiki, amahoro n'umutekano muri Sudani y'Epfo.

Mu gihe iki gihugu kigikomeje guhangana n'ibibazo bya politiki n'umutekano, ibihugu bigize C5 Plus bikomeje gushishikariza impande zitandukanye gukemura ibyo bibazo binyuze mu biganiro no mu nzira za politiki.

Kuri iyi nshuro, u Rwanda rwongeye kugaragaza ko ruzakomeza kuba mu ruhande rw'ibikorwa bigamije gufasha Sudani y'Epfo kubaka amahoro n'umutekano, rukoresheje ubunararibonye n'umusanzu warwo mu bikorwa byo kubungabunga amahoro ndetse n'ubundi bufatanye mpuzamahanga.

Source : https://flash.rw/2026/09/30/u-rwanda-rwiyemereye-kutazatererana-sudan-yepfo/