Imvura igwa mu Rwanda ikomeje kuba nke – #rwanda #RwOT

Ibi bikubiye mu kinyamakuru cya Meteo Rwanda kigenewe abahinzi n'aborozi, cyasohotse ku wa 13 Ukwakira 2026, gikubiyemo isesengura ry'imiterere y'ikirere kuva ku wa 1 kugeza ku wa 10 Ukwakira.

Meteo Rwanda yagaragaje ko mu bupimiro 44 bwafatiwemo ibipimo by'imvura, 34 bwagaragaje ko imvura yaguye yari munsi y'isanzwe igwa muri icyo gihe, hashingiwe ku mpuzandengo y'imyaka 30 ishize.

Ubupimiro 10 gusa ni bwo bwagaragaje ko imvura yaguye yari hejuru y'isanzwe igwa.

Nubwo imvura yabaye nke mu bice byinshi by'Igihugu, hari uduce twabonye imvura iruta isanzwe igwa, cyane cyane mu Karere ka Musanze, mu bice bimwe by'uturere twa Nyagatare, Gicumbi, Gisagara na Nyaruguru, ndetse no mu bice bito bya Burera, Gakenke na Huye.

Mu minsi icumi ya mbere y'Ukwakira, imvura yaguye hagati y'umunsi umwe n'iminsi umunani, bitewe n'agace.

Ubupimiro bwa Kansi bwo mu Karere ka Gisagara ni bwo bwagaragaje imvura nyinshi, aho hapimwe milimetero 73,1 mu minsi itanu.

Bukurikira ubupimiro bwa Kagitumba bwo mu Karere ka Nyagatare, aho hapimwe milimetero 69 mu minsi itanu, n'ubwa Kinigi bwo mu Karere ka Musanze, bwapimye milimetero 68 mu minsi irindwi.

Imvura nke cyane yapimiwe ku bupimiro bwa Mwiri bwo mu Karere ka Kayonza, aho hapimwe milimetero 3,1 gusa.

Muri rusange, uturere twa Musanze, Rusizi na Huye ni two twagaragayemo iminsi myinshi y'imvura, mu gihe Ngoma ari ko kabayemo iminsi mike.

Meteo Rwanda yagaragaje ko ubushyuhe bwari hejuru y'ikigereranyo gisanzwe mu bice byinshi by'Igihugu.

Ubushyuhe bwo hejuru bwinshi bwapimiwe mu Kibaya cya Bugarama mu Karere ka Rusizi, aho bwageze kuri dogere Selisiyusi 32,5.

Ubushyuhe bwo hejuru buke bwapimiwe i Kinigi mu Karere ka Musanze, bungana na dogere Selisiyusi 21,5.

Ku bipimo by'ubushyuhe bwo hasi, ubupimiro bwa Busogo-ISAE bwo mu Karere ka Musanze bwagaragaje dogere 11,9, naho ubwa Bugarama bupima dogere 22,1.

Meteo Rwanda yatangaje ko kuva ku wa 11 kugeza ku wa 20 Ukwakira 2026, hateganyijwe imvura iri hagati ya milimetero 22 na 105, ikaba iri ku kigero cy'impuzandengo y'isanzwe igwa muri icyo gihe.

Biteganyijwe ko iyi mvura izatuma ubuhehere bw'ubutaka bwiyongera mu bice byinshi by'Igihugu.

Iki kigo cyashishikarije abahinzi kwegera abashinzwe ubuhinzi kugira ngo babagire inama ku bikorwa bijyanye n'igihembwe cy'ihinga A 2027, ndetse no gufata ingamba zo kwirinda umuyaga mwinshi uteganyijwe.

Aborozi na bo basabwe kwegera abaganga b'amatungo kugira ngo babagire inama ku buryo bwo kuyabungabunga, hashingiwe ku miterere y'ikirere iteganyijwe.