Hari igihe umuntu anyura mu gihe ashidikanya ku Mana, akavangirwa. Nubona umuntu arimo gutaka, muri ijwi ryo kurwana intambara aho ashobora kubwira Imana ngo 'ni iki kikundekesheje?’ ahantu bikomeye gutya, muby’ukuri ntuzamucire urubanza, kuko hari igihe umuntu ageragezwa Imana yabyemeye. Ahubwo uzasengane nawe, uzamufate mu mugongo. Bibiliya igira iti'
Arasohoka ajya ku musozi wa Elayono nk’uko yamenyereye, abigishwa be baramukurikira. Agezeyo arababwira ati 'Nimusenge kugira ngo mutajya mu moshya.' Atandukana na bo umwanya ureshya n’ahaterwa ibuye, arapfukama arasenga ati 'Data, nubishaka undenze iki gikombe, ariko bye kuba uko nshaka, ahubwo bibe uko ushaka.'
Marayika uvuye mu ijuru aramubonekera, amwongera imbaraga kuko yari ababaye bikabije, asenga cyane, n’ibyuya bye byari bimeze nk’ibitonyanga by’amaraso bitonyanga hasi. Amaze gusenga arahaguruka ajya ku bigishwa be, asanga basinzirijwe n’agahinda. Arababaza ati 'Ikibasinzirije ni iki? Nimubyuke musenge kugira ngo mutajya mu moshya.' Luka 22:39-46
Mu nyigisho zijyanye n’amajwi akomeye(adasanzwe) yagiye agaragara mu isezerano rishya,: Twabonye ijwi ry’urangururira mu butayu, ijwi rya Yohana Umubatiza( ijwi ryo kwihana), Twabonye nanone ijwi ryahamirije Yesu avuye muri Yolodani Umwuka akamuzaho afite ishusho nk’iy’inuma, Imana ikavuga ngo 'Nguyu umwana wanjye nkunda kandi nkamwishimira (ijwi ritangira umuntu ubuhamya).'Twabonye kandi ijwi ryo ku musozi wo kurabagirana, aho Imana igera igaha umuntu ubwiza. Twagarutse no ku ijwi rya 4, ijwi ribeshaho( ijwi ritanga ubugingo).
Nkuko tubigezwaho na Pasiteri Habyarimana Desire, mu kiganiro 'Ubutumwa bukiza’ gitambuka kuri Agakiza Tv, by’umwihariko mu rukurikirane rw’ibiganiro bizibanda ku majwi akomeye (adasanzwe) yabayeho mu isezerano rishya, tugiye noneho kugaruka ku ijwi rya 5, ijwi ryo 'kurwana intambara'(ijwi umuntu ashobora kuvuga igihe arwana intambara)
Yesu yakoze umurimo we imyaka itatu n’igice, icyo gihe yarwanye na Satani bifatika. Twibuke ko igihe yarimo kugeragerezwa mu butayu, Satani yamueretse amuteze ikindi gihe, Satani ntabwo yahwemye. Rimwe na rimwe hari igihe twe twirara, abasirikare basanzwe mu bihugu bitandukanye byo ku isi mu gihe cy’amahoro, bo ntabwo birara ahubwo nicyo gihe boza imbunda, nicyo gihe bakora amakosi akomeye, nicyo gihe bagura intwaro kuko baba bazi ko igihe cyose hashobora kuba urugamba.
Abakristo nibo bantu birara ku kigero giteye ubwoba, iyo biri amahohoro bumva bari amahoro. Ariko intambara turwana na Satani mwibuke ko atureka aduteze ikindi gihe duhora turwana nawe, turwana n’isi na Satani, n’umubiri nawo uratugerageza. Niyo mpamvu dukwiye kugerageza kumenya uko turibwifate muri iyi ntambara.
Satani utaratinye Yesu arangije amasengesho y’iminsi mirongo ine, ntazatinya wowe. Satani ni umurwanyi yabigize umwuga kuko abo dukirana nabo si abafite inyama n’amaraso, ahubwo ni abatware n’abategeka iyi si y’umwijima.
Iri jwi Yesu yavuze ari i Getsemani mutagira ngo yari yorohewe, ntabwo yari yorohewe na buhoro! Kubera iki?, ari i Getsemani birasa nkaho filime yo gusoza urugendo rwe yamuje imbere, abona uko ari bukubitwe, uko aribwambare ubusa, abona uko ari bubambwe ku musaraba filime yose arayireba.
Iki gihe mwibuke ko Imana yari yamuteye umugongo mu gihe yari yishyizeho ibyaha byacu, yari intambara ikomeye mu by’ukuri. Hanyuma Yesu atangira kuva ibyuya bivanze n’amaraso, ni ukuvuga ngo ' yagize umubabaro w’indengakamere imitsi iraturika atangira kuva ibyuya bivanze n’amaraso, wari umubabaro urenze.
Bibiliya ivuga ko yasenze ngo 'Niba bishoboka iki gikombe kindenge’ hanyuma asigamo akantu keza kavuga ngo ' Ntibibe uko nshaka ahubwo ibyo ushaka abe ari byo bibaho’
Ese birashoboka ko umukristo aba mu ntambara?
Yego!, yego birashoboka cyane. Turwana n’isi na satani n’umubiri, hari ubwo turwana n’amajwi ya Satani. Kuba umukristo ni ukwiyemeza intambara, iyo usomye Bibiliya neza nayo ubwayo yanditse nka Filime y’intambara. Ibice bibiri bibanza by’itangiriro niho havuga ibintu byiza gusa, kuva adamu akoze icyaha intambara yaritangiye , wongera kubona ibintu byiza mu bice bibiri by’ibyahishuwe usoje Bibiliya. Bibiliya yose ni filime y’intambara.
Hari abantu rero bazi ko gukizwa ari umunyenga azahita abona imodoka, azahita agura inzu ko azahita ashaka, azahita abyara, azazamuka mu ntera mu kazi, nyamara ibyo nabyo ni byiza ariko ntibihagije. Hari abantu bazaga kuri Yesu ngo abahe imigati akayibaha, akabakorera igitangaza, ariko hashira iminsi akababwira ati 'ni jye mutsima w’ubugingo’, nta migati ihari.
Birasa nk’aho uru rugendo ari ukwiyemeza, ukavuga ngo 'niyemeje iki?, nkwiye gukora iki muri iyi nzira?. Mu by’ukuri uru rugengdo rurimo intambara, niba ugiye kurutangira ube uziko wiyemeje. Agakiza ni intambara, usibye urugamba ruvuye hanze nawe urwana n’isi, ukarwana n’umubiri wambaye. Ese uri umusirikare watojwe neza?
Ukwiye gukora iki muri uru rugamba?
Muby’ukuri hari ubwo umuntu arwana intambara ikomeye bikaba bisaba imbaraga nyinshi z’ubumana zamufasha, akageza igihe avuga 'ngo ntibibe uko nshaka, noneho bibe uko wowe ushaka’. Birashoboka ko : Uri mu ntambara urugo rwenda gusenyuka, birashoboka ko uri mu ntambara yo guhinduka ku ngeso, birashoboka ko urimo kurwana intambara y’akagambane mu kazi.
Birashoboka ko urimo kurwana intambara y’umubiri wawe ushaka kugusubiza mu byaha umubiri urarikira ibyo utemera, birashoboka ko udukurikiye urwana n’imyuka mibi uterwa n’abarozi, bakugabaho ibitero. Birashoboka ko udukurikiye wumva amajwi atandukanye.
Ntabwo ari wowe wambere bibayeho, na Yesu nawe yabinyuzemo, usibye ko we atakoze icyaha. Muri uru rugamba turwana na Satani rimwe na rimwe ashaka kutujyana mu byaha, ashaka kudukura mu byizerwa. Hari ikintu kimwe ukwiye kwitondera, ukwiye 'kugira umutima wera’. Ukwiye kugira umutima utunganye kuburyo bw’uko Satani atashingira ku byaha byawe, cyangwa ku ntege nke zawe kugira ngo akugushe cyangwa se akurege imbere y’Imana.
Iyo turi mu rugamba hari igihe dutakaza inshuti
Bibiliya ivuga ko abigishwa bajyanye na Yesu bamusinziranye. Umuntu yakwishimira kubana nawe mu birori ariko ni bake bakomeza kubana nawe mu ntambara. Iyo umuntu agitangira ibigeragezo muri uru rugamba, inshuti zigenda zimuvaho buhoro buhoro akazajya kurusoza ari wenyine.
Ntuzabahate kubana nawe mu gihe uri mu ntambara, Imana izaguhagurukiriza abashobora gusengana nawe, abagukomeza, ababana nawe mu gihe gikomeye. Nubona n’abagenda, ntuzabitindeho umuntu niko ateye.
Simoni yatwaje Yesu umusaraba nubwo atari we wawubambweho
Batangira umugenzi waturukaga imusozi witwaga Simoni w’Umunyakurene, ari we se wa Alekizanderi na Rufo baramuhata ngo yikorere umusaraba wa Yesu. Mariko 15: 21
Hari abantu mu buzima bakeneye ko ubatwaza umusaraba kubera bari mu ntambara, barimo bararwana intambara, umutima urataka!. Barababaye, bakeneye imbaraga , bakenye umuntu wabatwaza umusaraba, bakeneye umuntu wasengana nabo byibuze isaha imwe, akeneye umuntu byibuze wamuhamagara kuri terefone akamubwira ngo Yesu aracyagukunda.
Umuntu uri muri iyi ntambara arwana na Satani akeneye ijwi ryamuhumuriza bikunyuzemo. Byibuze wamuha ku biryo agafungura nubwo ikigeragezo kidahita kirangira. Uzi umuntu wahumurijwe, wabonye mwenedata umugeraho mu burwayi bwe, mu bukene bwe, abantu bamwanze, isi yamuhindutse, ibihombo byaje akabona umuntu umukomeza muri uwo mubabaro?. Erega ababiri baruta umwe, umwe iyo aguye undi aramubyutsa. Bakeneye ihumure ryawe, we kumva ko wihagije nawe uzamukenera kuko isi ihora ihinduka.
Uruta marayika ni Yesu, turasenga kugira ngo akongerere imbaraga aze mu buzima bwawe. Birashoboka ko mu ntambara urimo urwana na Satani wanakoze icyaha, ibyo ntabwo bibuza urukundo rw’Imana kukuzaho. Wakwihana kuko Imana ifite umugambi mwiza ku buzima bwawe.
Reba inyigisho yose ‘IJWI RYO KURWANA INTAMBARA’
Source: Agakiza Tv
[email protected]
