Rusheshangoga yasezeye kuri bagenzi be bakinana muri AS Kigali ku Cyumweru, ababwira ko agiye 'gutangira ubundi buzima' muri Leta Zunze Ubumwe za Amerika hamwe n'umufasha we Nakazungu Aimée 'Njungu' bashyingiranywe mu 2019.
Nshimiyimana Eric wamutoje mu Isonga FC, APR FC ndetse akaba yamutozaga muri AS Kigali, yavuze ko byabagoye kwakira ko batazakomezanya na we kuko ari umukinnyi bari bagikeneye.
Ati 'Tubyakiriye neza, icya ngombwa ni ukumusabira umugisha, navuga ko ari impamvu zitumye agenda, ntabwo yari ageze mu gihe cyo kurangiza umupira, ariko byari ngombwa ko agenda kuko ni ubundi buzima agiye gutangira.'
'Ni ukumwifuriza umugisha, azabe amahoro, ntabwo biba byoroshye, wabonye ko kubyakira na we yagaragaje imbamutima ze kuko kuba mu mupira yari amazemo imyaka igera ku 10 akina, biragoye guhita abyakira.'
Yakomeje agira ati 'Twari tukimukeneye nk'ikipe, yadufashaga, ariko tugomba kubyakira natwe tukamufasha gutangira ubwo buzima. Natwe byatugoye, ku myaka afite n'akazi dufite imbere, ariko ni ukubyakira.'
Ntamuhanga Tumaine 'Tity' usanzwe ari Kapiteni wa AS Kigali ndetse bakaba barakinanye muri APR FC, yavuze ko ari agahinda gutandukana na Rusheshangoga bari bamaranye hafi imyaka icyenda bakinana.
Ati 'Iyo mutandukanye na mugenzi wanyu mwari mumaze igihe kinini mukorana, biba ari agahinda kenshi. Dufite umutima ushavuye kuko dutandukanye na mugenzi wacu ariko ubuzima ni kuriya, agiye gutangira ubundi buzima, icyo twamwifuriza ni amahirwe mu byo azakora aho agiye.'
'Ni umukinnyi twabanye igihe kinini cyane, tumaze hafi imyaka umunani cyangwa icyenda dukinana, ni umwana mwiza, yari afite inshuti nyinshi, yabanaga neza, nanjye yari inshuti yanjye.'
Mu bandi bakinnyi bagize icyo bavuga ku gusezera k'uyu myugariro barimo Hakizimana Muhadjiri, Ndayishimiye Eric 'Bakame', Bayisenge Emery bakinanye kuva mu Isonga FC ndetse na Nkinzingabo Fiston.
Hakizimana Muhadjiri yagize ati 'Twakinanye ahantu henshi hatandukanye, ntabwo nabyakira neza kuko yari agifite ubushobozi bwo kuba turi kumwe hano mu ikipe, tuzamukumbura, ni umukinnyi wagira ishyaka mu kibuga, ni umukinnyi wabaga uri mu kibuga ukumva ko hari ikintu araza kugufasha.'
Ndayishimiye Eric 'Bakame' yavuze ko baganiriye mbere y'uko abasezeraho ndetse yamubwiye ibyo azitaho mu buzima agiye gutangira.
Ati 'Umupira navuga ko ugiye ku ruhande, twakunze kubiganira na we kenshi, twararanaga, arabizi. Namubwiye ko nagera hanze azashaka imirimo myiza hanze imunogeye.'
Bayisenge Emery wakinanye na Rusheshangoga kuva mu Gikombe cy'Isi cy'Abatarengeje imyaka 17, yagize ati 'Ku giti cyanjye birambabaje kuko ni umukinnyi twabanye kugeza ubu, kuva tukiri bato ndetse by'umwihariko yakinaga iruhande rwanjye. Gutandukana na we mu by'ukuri birambabaje. Ni umukinnyi wangiriye akamaro. Ndamushimira kuko yaramfashije, ndamwifuriza ishya n'ihirwe.'
Nkinzingabo Fiston na we yavuze ko 'Michel [Rusheshangoga] yari umukinnyi w'icyitegererezo kandi yari umukinnyi wubaha akazi ke, mbese yari umukinnyi w'intangarugero kuri bagenzi be.'
Rusheshangoga yari amaze umwaka umwe n'igice mu Ikipe y'Umujyi wa Kigali nyuma yo kuyigeramo mu mpeshyi y'umwaka ushize wa 2019. Muri Gicurasi uyu mwaka, yari yongereye amasezerano y'umwaka umwe.
Rusheshangoga w'imyaka 26 nk'uko bigaragara ku byangombwa akiniraho, ni umwe mu bari bagize Amavubi U-17 yakinnye Igikombe cy'Isi cyabereye muri Mexique mu 2011.
Yatangiye gukinira APR FC mu 2012 ubwo yayigeragamo avuye mu Isonga FC, ayifasha kwegukana ibikombe bitandukanye bikinirwa mu Rwanda.
Muri Nyakanga 2017, yerekeje muri Singida United yo muri Tanzania ahawe ibihumbi 50$, aho byavugwaga ko azajya ahabwa umushahara wa 3000$ ku kwezi, akanagenerwa andi 500$ mu gihe ashoboye gutanga umupira uvamo igitego.
Rusheshangoga yamaze umwaka umwe muri Tanzania, ahita agaruka mu Ikipe ya APR FC yasinyiye imyaka ibiri muri Kanama 2018, ariko nyuma y'umwaka umwe atandukana na yo, yerekeza muri AS Kigali.
Muri Nyakanga 2019 ni bwo yakoze ubukwe na Nakazungu Aimée 'Njungu'.
Rusheshangoga waherukaga guhamagarwa mu Amavubi yitegura irushanwa rya CHAN rizabera muri Cameroun, yasezeye kuri AS Kigali mu gihe ikomeje imyitozo yo kwitegura umukino wo kwishyura w'ijonjora rya kabiri rya CAF Confederation Cup izahuramo na KCCA FC yo muri Uganda.
Rusheshangoga Michel yasezeye bagenzi be ku Cyumweru
Umunyezamu Ndayishimiye Eric ‘Bakame’ na Nkinzingabo Fiston bateze amatwi ibyo Rusheshangoga yavugaga
Ikipe yose ya AS Kigali yafashe ifoto y’urwibutso na Rusheshangoga Michel
Hakizimana Muhadjiri yifotozanya na Rusheshangoga Michel
Team Manager wa AS Kigali, Bayingana Innocent yifotozanya na Rusheshangoga
Rusheshangoga arerekeza muri Leta Zunze Ubumwe za Amerika kuri uyu wa Mbere
Kalisa Rachid na Rusheshangoga Michel
Nkinzingabo Fiston na Rusheshangoga Fiston bifotozanya nyuma y’uko uyu myugariro yari amaze kubasezeraho
‘Staff’ ya AS Kigali yifotozanya na Rusheshangoga Michel wari umaze umwaka umwe n’igice muri iyi kipe
Amafoto: Umurerwa Delphin
 Reba indirimbo z'uyu muhanzi
