Blog

Muri iyi nteko rusange yabaye kuri iki Cyumweru tariki 27 Kamena 2021, Lt Gen Mubarakh Muganga wagarutse kuri bimwe mu biranga ikipe ya APR yaje ahagarariye dore ko ari umuyobozi wayo.

Yavuze ko hari abakinnyi batatu b’iyi kipe bamaze kugurishwa, bashobora gukurikirwa n’abandi barindwi nubwo ateruye ngo avuge amazina yabo bose.

Ati 'APR FC imaze kugurisha abakinnyi batatu hari n’abandi barindwi bari mu nzira bagenda. Buri umwe igiciro cye ni €130.000. Umupira kuba waba ubucuruzi birashoboka, kandi abana b’Abanyarwanda barashoboye.'

Bamwe mu bakinnyi bavuzwe ko bazerekeza hanze y’u Rwanda ndetse banamaze gusinyira amasezerano amakipe yabaguze, ni Byiringiro Lague uzerekeza mu cyiciro cya kabiri mu Busuwisi, Manzi Thierry bivugwa ko azerekeza muri Georgia mu Cyiciro cya mbere na Omborenga Fitina uri kuvugwa muri Simba SC.

Abandi bakinnyi bivugwa ko bazasohoka muri iyi kipe berekeza gukina hanze y'u Rwanda ni Mugunga Yves, Ishimwe Anicet, Nsanzimfura Keddy na Imanishimwe Emmanuel.

Lt Gen Mubarakh Muganga uherutse kuzamurwa mu mapeti mu ngabo z’u Rwanda agahita anahabwa inshingano nshya zo kuba Umugaba Mukuru w’Ingabo zirwanira ku butaka, yavuze ko akazi kari ku mubana kenshi.

Yagize ati 'Umwanya uri kugenda umbana muto. Muragenda munsunika ngana hanze, ariko hazaza n’undi General, igihugu gifite abajenerali benshi.'

Lt Gen Mubarakh Muganga wari wabaye Chairman wa APR FC muri Mutarama 2021, yaboneyeho gushimira Perezida Paul Kagame wamuhaye ziriye nshingano nshya zo kuba Umugaba Mukuru w’Ingabo zirwanira ku butaka.

UKWEZI.RW

Aba bantu batandatu bafashwe nyuma y’abandi 13 na bo bari bafatiwe muri Sauna iherereye mu Murenge wa Nyarugunga mu Karere ka Kicukiro.

Bariya batandatu bafashwe kuri iki cyumweru tariki ya 27 Kamena ubwo bari mu sauna iri mu rugo rw’umuturage witwa Gasana Vincent utuye mu Karere ka Kicukiro mu Murenge wa Kanombe.

Ubwo itangazamakuru ryageraga mu rugo rwa Gasana Vincent ryasanze muri urwo rugo harimo abantu 5 na Gasana wa Gatandatu ari nawe nyiri urugo.

Uyu Gasana yagerageje kuvuga ko bariya bantu batari muri Sauna ko ahubwo bari baje kumusura. Gasana yemereye itangazamakuru ko mu rugo rwe hari abantu benshi ndetse bamwe bikanze abapolisi basimbuka urugo baracika.

Yagize ati 'Aba bantu bari baje hano kunsura ndetse bamwe bikanze abapolisi bagira ubwoba bariruka basimbuka urugo. Nibyo abapolisi baje hano bansanga muri Sauna nyirimo njyenyine.'

Ubwo itangazamakuru ryageraga mu nzu ibamo iyo Sauna yo mu rugo rwa Gasana byagaragaye ko harimo ibyumba birimo ibitanda bitoya abantu baryamaho barimo no gukorerwa Massage.Binagaragara ko hari abantu bari bavuye muri iyo nzu.

Gasana yavuze ko asanzwe abizi ko Sauna zitemewe muri ibi bihe byo kurwanya icyorezo cya COVID-19, yakanguriye n’abandi baturarwanda kubahiriza amabwiriza birinda iki cyorezo kuko kirimo guhitana ubuzima bw’abantu benshi .

Umuvugizi wa Polisi y’u Rwanda, Commissioner of Police (CP) John Bosco Kabera yavuze ko bariya bantu bafashwe ku makuru yatanzwe n’abaturage. Gasana Vincent abonye ko afashwe agerageza kwiregura by’amatakirangoyi avuga ko bariya bantu batari baje muri iyo Sauna.

Yagize ati 'Twahawe amakuru n’abaturage ko mu rugo rwa Gasana harimo Sauna ndetse no mu rugo rwe harimo abantu baje muri iyo Sauna, bamwe bikanze Polisi basimbuka urugo bariruka bariya birabananira Polisi irabafata. Gasana ibyo avuga ni amatakirangoyi arimo gushakisha impamvu yatuma bimworohera kuko nta n’ubwo abasha gusobanura impamvu bariya bantu bose bari iwe ndetse nta nasobanura impamvu hari ababonye abapolisi bakiruka bagacika.'

CP Kabera yongeye gukangurira abantu kwirinda kurenga ku mabwiriza yo kwirinda icyorezo cya COVID-19, abibutsa ko igihe cyose bazajya babona bafatiwe mu makosa bazajya birinda kubeshya ahubwo bavugishe ukuri. Yagaragaje ko bamwe mu bantu barimo gufatwa barenze ku mabwiriza yo kwirinda COVID-19 aribo barimo gutuma imibare y’abandura iki cyorezo irushaho kwiyongera ndetse abandi bakaba barimo guhitanwa n’iki cyorezo.

Ati 'Ibikorwa bitemewe bagomba kubyirinda, hagiye hafatwa abantu benshi barenze ku mabwiriza yo kwirinda COVID-19 kandi n’ubu baracyafatwa ariko banze kubicikaho. Ubutumwa twabaha nibirinde ibikorwa bitemewe.Nibabirengaho Polisi izakomeza ibafate, aba batubahiriza amabwiriza nibo barimo gutuma imibare y’ubwandu ikomeza kwiyongera ndetse n’abahitwa n’iki cyorezo bagakomeza kwiyongera.'

Abafashwe bahise bashyikirizwa inzego zishinzwe guca amande abarenze ku mabwiriza yo kurwanya icyorezo cya COVID-19. Inzego z’ibanze zikaba zahise zifunga inyubako yakorerwagamo Sauna na Massage.

Ivomo : Urubuga/RNP

UKWEZI.RW

Ni we muntu muto iki cyorezo gihitanye mu Rwanda kuva cyahagera gusa mu minsi ishize cyari giherutse no kwica uruhinja rw’amezi abiri.

Uretse uru ruhinja rw’iminsi itanu rw’i Rubavu, COVID-19 yahitanye abagore batatu b’imyaka 81, 64, 61 b’i Kigali, abagore babiri b’imyaka 67 na 55 b’i Huye n’abagabo batatu b’imyaka 82, 59 na 49 b’i Kigali.

Imibare yatangajwe na Minisiteri y’Ubuzima igaragaza kandi ko kuri iki Cyumweru abantu 741 basanzwemo iki cyorezo cya COVID-19 bituma umubare w’abamaze kucyanduro bose ugera ku 36 627.

Abamaze gukira ni 27 090 mu gihe abakirwa ari 9 117 barimo 26 barembye cyane naho abo kimaze guhitana kuva cyagera mu Rwanda baka ari 420.

Imibare ya COVID-19 ikomeje gutumbagira mu Rwanda, icyumweru gishize kikaba ari cyo cyabonetsemo abarwayi benshi cyane kuva iki cyorezo cyagera mu Rwanda.

Ibi byanatumye Guverinoma y’u Rwanda ishyiraho ingamba zisumbuye ku zari zisanzweho aho kuva mu cyumweru gishize ubu hariho gahunda ya Guma mu Karere ndetse n’amasaha yo kugera mu rugo akaba yarigijwe imbere.

UKWEZI.RW

Bari mu gitambo cya misa cy’isakaramentu ryatangiye saa munani zuzuye ariko riza gukomwa mu nkokora n’inzego z’ubuyobozi bw’Umurenge wa Muko na Polisi y’u Rwanda ikorera muri uyu Murenge.

Ubwo Polisi yageraga kuri Santarari Gatolika ya Muko ibyari isakaramentu byahinduye isura kuko Abakiristu ndetse n’abaturage bahagurukiye rimwe bitambika Polisi na yo ikizwa n’amaguru hitabazwa Abasirikare maze bahosha ibyasaga n’imyigaragambyo.

Abaturage banze kuva iruhande rwa Santarari mpaka barekuye abaturage bose bari muri Kiliziya.

Habayeho ubwumvikane ku mpande zombi maze Abayobozi ba Kiliziya Gatolika 7 bari muri uwo muhango barimo na Padiri waturutse kuri (Cathedrale ya Ruhengeri) n’umuyobozi wa Santarari ya Muko burizwa imodoka bajyanwa muri Stade Ubworoherane mu Mujyi wa Musanze.

Aba bayobozi batwawe hitabajwe inzego za Gisirikare kuko Polisi n’ubuyobozi bw’Umurenge wa Muko bwasaga n’ubwananiwe iyi Operasiyo yitambitswe n’abaturage.

Umunyamabanga Nshingwabikorwa w’Umurenge wa Muko, Murekatete Triphase yavuze ko ibyabaye bitari imyigaragambyo nk’uko byafashwe na benshi ahubwo ari abaturage bashatse gutambamira inzego z’umutekano n’ubuyobozi bw’Umurenge ariko byahise bikemurwa.

Nyuma bariya bantu baje kurekurwa ari uko batanze amande y’ibihumbi 11 Frw kuri buri muntu naho santarari ya Muko icibwa 150 000 Frw.

UKWEZI.RW

Zari impera z’icyumweru nziza ku bakinnyi benshi b’abanyarwanda bakina hanze yarwo, Azam FC ya Ally Niyonzima niyo kipe ikinamo umunyarwanda yatakaje amanota 3 yose, ni mu gihe Yannick Mukunzi yari mu kibuga ikipe ye itanga isomo rya ruhago.

Muri Tanzania ntabwo bakinnye shampiyona ahubwo hakinwaga ½ cy’igikombe cy’igihugu(Azam Sports Federation Cup) aho ikipe ya Yanga ikinamo Haruna Niyonzima yakinnye na Biashara United ku wa Gatanu w’icyumweru gishize.

Yanga ikaba yaraje kubyitwaramo neza itsinda Biashara United 1-0 cya Yacouba Songné, rutahizamu ukomoka muri Burkina Faso. Ni umukino Haruna Niyonzima atari muri 18 bakoreshejwe.

Undi mukino wa ½ wahuje Simba SC ya Kagere na Azam FC ya Ally Niyonzima. Ally Niyonzima ntiyari mu bakinnyi ba Azam FC bakoreshejwe. Meddie Kagere yinjiye mu kibuga mu gice cya kabiri ndetse ikipe iza gutsinda ku munota 84 igitego cya Jose Louis Miquissone. Bivuze ko umukino wa nyuma uzahuza Yanga ya Simba SC zose zikinwamo n’abanyarwanda.

Kagere yinjiye mu kibuga asimbura ikipe ye itsinda Azam FC

Muri Kenya, ku wa Gatatu w’icyumweru gishize, Tusker FC ya Emery Mvuyekure utarimo gukina muri iyi minsi kubera ikibazo cy’imvune y’urutugu, yatsinze Western Stima 2-1.

Ku wa Gatanu tariki ya 25 Kamena, Bandari FC y’umutoza Cassa Mbungo Andre yanyagiye Kariobangi FC 4-1. Iyi shampiyona iyobowe na Tusker ifite amanota 44, Bandari FC ni iya 5 n’amanota 31.

Zanaco FC ya Nizeyimana Mirafa, yasoje shampiyona ku munsi w’ejo hashize ku Cyumweru ikina na Red Arrows aho Mirafa yari yabanje ku ntebe y’abasimbura, umukino warangiye ari 0-0. Iyi kipe yasoje ku mwanya wa 2 n’amanota 51, inyuma ya Zesco United ya mbere yegukanye igikombe ifite amanota 71.

Wari umukino wa mbere kuri Nizeyimana Mirafa

Mu cyiciro cya kabiri mu Misiri, Pharco FC ya Iranzi Jean Claude ku wa Gatanu yatsinze Bilaya ibitego 2-0 ihita ifata umwanya wa mbere ku rutonde rwa shampiyona n’amanota 61 inganya na Haras El Hodood, ikaba igomba gusoza shampiyona tariki ya 1 Nyakanga ikina Ben Ebeid.

Strommen IF y’umunyezamu Buhake Clement mu cyiciro cya kabiri muri Norway, ejo hashize ku Cyumweru yari yasuye Sogndal mu mukino w’umunsi wa 8 wa shampiyona, warangiye ari 1-1, Buhake Clement akaba yari ku ntebe y’abasimbura.

Mu cyiciro cya gatatu muri Sweden, Yannick Mukunzi yari mu kibuga ubwo ikipe ye ya Sandvikens IF ku munsi w’ejo yatsindaga Taby 4-1 ndetse ikomeza kuguma ku mwanya wa 2 n’amanota 29 ku rutonde ruyobowe na Brommapojkarna ifite amanota 33.

Yannick Mukunzi yari mu kibuga ikipe ye inyagira Taby