Blog

Batashye ibiro by’umudugudu biyubakiye

Abo baturage bari bazwi ku izina ry’abana b’inkware kubera kwihisha inzego z’ubuyobozi, bemeza ko ubu babaye abana b’Imana bagashyira hamwe bakaba bageze ku rwego rwo kugira uruhare mu bikorwa by’iterambere birimo no kwiyubakira ibiro by’umudugudu wabo.

Umuyobozi w’umudugudu wa Bisambu, Nyabyenda Jevenal, avuga ko umudugudu ayobora wacitse ku bujura n’ibiyobyabwenge ubu bakaba birinda amakimbirane kugira ngo babashe kwiteza imbere.

Agira ati “Mbere twitwaga abana b’inkware kuko umuyobozi yazaga hano ngo atuganirize abaturage bakigendera. Gukoresha ibiyobyabwenge ni byo byatumaga abaturage batumvira Leta ugasanga barwana, bakubita abagore ni bwo biswe abana b’inkare kuko zizi kwihisha cyane”.

Yongeraho ati “Ubu iwacu ni Bisambu ikeye, twaribohoye ibiyobyabwenge biracika ku bufatanye n’abaturage, nta makimbirane twese twashyize hamwe turakora kandi turwanya ibyaha na gahunda za Leta zigamije iterambere turazitabira. Twaribohoye kuko iyo tutibohora tuba tucyitwa abana b’inkware”.

Nyabyenda abuga ko abari abana b’inkware babaye abana b’Imana

Abaturage bo muri uwo mudugudu bavuga ko nyuma yo kwegerwa n’inzego zose byatumye babasha kwisubiraho ubu bakaba banamaze kwiyubakira ibiro by’umudugudu wabo watwaye miliyoni ebyi n’igice ari na byo bashingiraho bavuga ko bibohoye kuko bahindutse.

Umuyobozi w’Akarere ka Ruhango, Habarurerma Valens, avuga ko guhindura imyumvire y’abaturage byatangiye hashyirwaho ibigamije guteza imbere imidugudu ifite ibibazo kurusha iyindi maze biza kugaragara ko Bisambu nawo ufite ibibazo.

Gahunda zo gushingira iterambere ku mudugudu n’amasibo yatumye Bisambu itangira kwegerwa, harwanywa ibyaha, guta amashuri kugira isuku mu ngo no kwiteza imbere kandi kwegera umuturage ngo nibyo bituma biteza imbere.

Inzego z’ubuyobozi bw’akarere n’iz’umutekano zishimiye uburyo hashyizwe imbaraga mu guhindura imyumvire y’abaturage

Avuga kandi ko imihigo y’akarere isigaye ishingiye ku rugo kuko byagaragaye ko urugo ari rwo shingiro ry’iterambere.

Agira ati “Tuzabikomeza nuri buri muryango, umudugudu n’akagari hashyirwe imbaraga kugira ngo twese imihigo bikozwe nk’umuco kandi byose bigamije kwegerezwa abaturage”.

Umudugudu wa Bisambu ni umwe mu midugudu yarangwaga n’ibyaha ubu ukaba ugeze ku rwego rwo kwishyira hamwe kandi abaturage bagafatanyiriza hamwe kubaka igihugu.

Ibiro by’Umudugudu wa Bisambu

Ku bufatanye n’abaturage mu kwibohora ubukene kandi, Akarere ka Ruhango kubakiye abatishoboye inzu zisaga 110, amashanyarazi akaba yarageze ku ngo zisaga 4200, kugeza amazi meza ku baturage byose bigamije guteza imbere umuturage akarushaho kwibohora yiyubakira ubushobozi bwo Kwigira.

Iyi nzu yuzuye itwaye amafaranga y’u Rwanda asaga miliyoni 260

Ibi ni ibyatangajwe na bamwe mu bagize imiryango umunani y’abarokotse Jenoside yakorewe Abatutsi yo mu Karere ka Nyarugenge batujwe mu mudugudu w’icyitegererezo wa Rugendabari mu Kagari ka Nkuba mu Murenge wa Mageragere.

Ubwo yashyikirizwaga inzu yo guturamo irimo ibisabwa byose, umusaza Rwigema Etienne, wari usanzwe atuye ahazwi nko mu Cyahafi, yavuze ko ubuzima bw’ubukode yari abayemo butari bumworoheye ku buryo asanga igikorwa yakorewe
kirenze kwibohora.

Ati “Birenze kwibohora, ukuntu ari na byiza ni uko iyi tariki ya 04 nibwo bwa mbere nari ngeze hanze kuva Jenoside itangiye nibwo nari ndebye hanze, nanone nkaba mbonye n’inzu kuri izi tariki ni ho nayinjiyemo nkaba nishimye cyane”.

Mukaremera Delphine na we ni umwe mu miryango umunani yatujwe. Avuga ko mbere y’uko ahabwa inzu yararaga hanze.

Ati “Mbere y’uko mbona iyi nzu naraye hanze kuko nari mfite utuntu twose mu nzu, aho ntishyuye inzu bakatujyana, nari nsigaye nta kintu na kimwe ngira, n’ibi mureba hano ni ubuyobozi bwabimpaye”.

Bamwe mu baturage basanzwe batuye mu Kagari ka Nkuba bavuga ko bishimiye kuba barimo kugenda babona abaturanyi kandi biteguye kubana na bo neza kandi ko n’uzabakeneraho ubufasha biteguye kubumuha.

Umuyobozi Nshingwabikorwa w’Akarere ka Nyarugenge, Ngabonziza Emmy, avuga ko Kwibohora nyako ari ugufata ibyari ikibazo bikabyazwamo ibizima cyangwa ibyiza.

Ati “Uyu munsi wa none turimo guhangana n’ikibazo cy’ubukene cyangwa se imibereho mibi aho nibura twakwishimira ko nk’Akarere ka Nyarugenge by’umwihariko abaturage bari hejuru y’umurongo w’ubukene bamaze kugera kuri 83%, abari munsi y’umurongo w’ubukene ariko mu bukene busa nk’aho bukabije batarenze 4.6%”.

Abatujwe bahawe inzu irimo ibisabwa byose igizwe n’ibyumba bibiri, igikoni cya kijyambere kirimo buri kimwe ndetse n’ubwiherero hamwe n’ubwogero byose biri imbere mu nzu.

Inzu yatujwemo imiryango umunani yubatswe mu buryo bwa 8 in 1, ikaba yuzuye itwaye amafaranga y’u Rwanda miliyoni 261 harimo ayatanzwe n’ikigega cyita ku barokotse Jenoside yakorewe Abatutsi FARG n’andi yaturutse mu bafatanyabikorwa.

Iyi miryango umunani ikaba ije isanga indi miryango mirongo inani na yo yari yaratujwe mu bihe bitandukanye muri uyu mudugudu wa Rugendabari.

Nk’uko byatangajwe n’Abayobozi ba Police ndetse n’Abayobozi b’ibyo bitaro, hagabwe ibitero bibiri icyarimwe, kimwe kuri ibyo bitaro, ikindi kuri Polisi ikorera hafi yabyo, bikaba byabereye muri Leta ya Kaduna mu Mujyaruguru ya Nigeria.

Igitero cyagabwe kuri ibyo bitaro nk’uko byatangajwe n’umuvugizi wabyo, Maryam Abdulrazaq, aganira n’ibiro ntaramakuru by’Abongereza ‘Reuters’, cyabaye ku Cyumweru mu masaha ya mu gitondo, kimara nibura isaha imwe.

Uwo muvugizi w’ibitaro yavuze ko mu bashimuswe harimo abaturage batandatu, abaforomokazi babiri harimo umwe bajyananye n’umwana we ufite umwaka umwe, umukozi wo muri Laboratwari, ushinzwe gucunga umutekano aho ku bitaro ‘security guard’ n’undi mukozi umwe w’ibitaro.

Polisi yatangaje ko abashimuswe muri rusange ari abantu umunani. Kugeza ubu abo babashimuse ntibaratangira gusaba ingurane y’amafaranga cyangwa ikindi bashaka kugira ngo babarekure, nk’uko umuvugizi w’ibyo bitaro abivuga.

Abdulrazaq ati “Kugeza ubu, nta mafaranga turasabwa gutanga ngo barekurwe. Nta kintu na kimwe turumva gitangazwa n’ayo mabandi kuva yabajyana”.

Mu itangazo Polisi yasohoye, umuvugizi wayo i Kaduna witwa Muhammed Jalige yagize ati “Umubare munini w’abantu bitwaje intwaro baturutse muri iryo tsinda, bateye ku cyicaro cy’ishami rya Polisi ku masaha amwe n’ayo batereye ku bitaro, bagamije kuvanaho abapolisi bari ku kazi muri ayo Masaha”.

Jalige yavuze ko muri abo bantu bitwaje intwaro harimo abakomerekeye muri iyo mirwano na Polisi mu gihe yarimo ishaka gutabara abari bashimuswe ku bitaro.

Abantu bitwaje intwaro ngo baturuka mu mutwe uzwi ku izina rya ‘bandits’, bibasira cyane ibice by’Amajyaruguru no hagati mu gihugu cya Nigeria. Batera mu giturage, bakiba amatungo bagashimuta n’abantu cyane cyane abanyeshuri kugira ngo basabe amafaranga y’umurengera, babone kubarekura.

Guhera mu kwezi k’Ukuboza 2020, ngo abanyeshuri basaga 800 barashimuswe, 150 muri bo bakaba n’ubu baraburiwe irengero.

Abatujwe mu Mudugudu wa Buhoro bavuga ko bishimiye ubuzima bagiyemo

Abahawe inzu bavuga ko byari bigoranye gutura mu nzu bakodesha imyaka 27 yose ishize, bakaba bavuga ko bagiye kurushaho kwiteza imbere kuko ibyo batangaga mu bukode bazabishakamo ibindi bakeneye.

Umuryango wa Uwimana Abdul Karim wararokotse Jenoside yakorewe Abatutsi ugizwe n’abantu batanu, abana batatu n’umugore hamwe na we ubwe.

Uwimana avuga ko yari amaze imyaka 14 akodesha inzu we n’umuryango we baturamo mu mujyi wa Ruhango, ubundi agacumbikirwa n’abagiraneza ku buryo byari bimugoye mu kwiyubaka igihe nta hantu afite ho kuba.

Agira ati “Ba nyiri inzu bahoraga bantera hejuru ugasanga niba uyu munsi nabuze ay’ubukode ba nyirayo baransohoye najya ahandi ngo imuka imuka, kubona ubukode byansabaga guca inshuro n’umugore agaca inshuro ku buryo hari n’igihe najyana nibaza icyatumye ncika ku icumu”.

Imiryango yahawe inzu zirimo ibikoresho binyuranye, inahabwa ibiribwa

Umubyeyi washakanye na Uwimana avuga ko yibazaga ukuntu imibereho ye izaba imeze n’abana be igihe bakomeje gukura kandi ariko banakeneye ibyo kubitaho ku ishuri ngo agashenguka umutima, ariko akiyumanganya.

Agira ati “Najyaga nibaza ukuntu nzajya nimukana n’abasore n’inkumi ngashenguka umutima, ubundi twakoreraga inda ku buryo nta bushobozi bwo kubaka twari dufite, ariko ubu abana banjye na bo barishimye kuko na bo bafite iwabo”.

Ashimira ubuyobozi bwakoze ibishoboka kugira ngo babone icumbi kuko nibura bagiye gukomeza urugendo rwo kwiyubaka.

Umuyobozi w’Umuryango FPR Inkotanyi mu Ntara y’Amajyepfo, Vuganeza Aron, avuga ko mu rwego rwo gukomeza gufasha abanyamuryango n’abaturage muri rusange byabaye ngombwa ko bakusanya ubushobozi ngo aba bacitse ku icumu bafashwe kubona amacumbi.

Umuryango wa Uwimana ni umwe mu batujwe wari ufite ikibazo cy’icumbi

Ashimira kandi Abaturage muri rusange biyumvamo bagenzi babo bacitse ku icumu bakemera gufatanyiriza hamwe ngo batange umusanzu wabo mu kubabonera aho baba no kubafasha mu bindi bakeneye hakurikijwe ubushobozi buhari.

Vuganeza avuga ko intego nyamukuru y’Umuryango RPF Inkotanyi ari uguharanira ko ubuzima bw’umuturage bugira agaciro kandi bukarushaho kuba bwiza, ari na yo mpamvu yo kubakira abo baturage amacumbi meza.

Agira ati “Umuturage wacu agomba kubaho mu buzima bwiza kandi yishimye, ntabwo wakwishima urara ahantu hatameze neza. Turishimira ko nibura aba baturage babonye amacumbi meza tunashimira abaturage bacu bashyize hamwe ngo bafatanye kubabonera ibyo kubafasha”.

Vuganeza avuga ko Umuryango RPF Inkotanyi wifuza ko buri Munyarwanda gira imibereho myiza

Mu rwego rw’ibikorwa byo Kwibohora ku nshuro ya 27, abanyamuryango ba RPF Inkotanyi mu karere ka Ruhango bashyikirije kandi abaturage inkunga z’ibiribwa mu mirenge ya Kinihira na Bweramana, ndetse banagabira inka umuryango wa Gatare Innocent wo mu Murenge wa Mbuye wamugariye ku rugamba rwo kubohora igihugu.

Abahinzi b’ibirayi b’i Nyamagabe na Nyaruguru bizeye ko ishwagara bazahabwa izatuma beza kurushaho

Ni nyuma y’uko tariki 5 Mata 2021 ab’i Nyaruguru bari babwiye Minisitiri w’Ubutegetsi bw’igihugu, Jean Marie Vianney Gatabazi, ko Perezida wa Repubulika yabemereye ishwagara, nyamara bakaba batayihabwa.

Icyo gihe bamugejejeho icyifuzo cyo kuyihabwa kuri Nkunganire, nyuma y’uko hari abayihawe bagomba kwishyura ntibabikore, na we abemerera kuzabakorera ubuvugizi.

Guverineri w’Intara y’Amajyepfo, Alice Kayitesi, ubwo yaganiraga n’abaturage bahagarariye abandi mu Murenge wa Gatare mu Karere ka Nyamagabe, ku itariki 16 Kamena 2021, yababwiye ko ishwagara abahinzi bifuje bagiye kuyihabwa.

Yagize ati “Akarere ka Nyamagabe n’aka Nyaruguru mu Ntara y’Amajyepfo ni two twashyizwe muri gahunda ya Nkunganire ku ishwagara. Amafaranga mwagenerwaga yariyongereye kuko twayakuye mu tundi turere twose, kandi ishwagara tuzabaha si nk’iyo mwajyaga mugura ya kabiri. Ni iya mbere”.

Yanifuje ko abahinzi bazitabira kuyifashisha, kugira ngo ubuhinzi bwabo butere imbere.

Abahinzi basanzwe bifashisha ishwagara bakiriye neza iyi nkuru, cyane cyane bishimira kuba bagiye kujya bahabwa inziza kurusha izindi.

Jean Baptiste Habanabakize wo mu Murenge wa Gatare yagize ati “Ibirayi twari tugeze aho dusarura toni 25 gusubiza hejuru kuri hegitari, ariko nitubona iyongiyo nziza tuzageza no muri 30 ndetse no muri 35 nk’uko mu Ruhengeri beza”.

Narcisse Karengera, umuhinzi wabigize umwuga w’i Muganza mu Karere ka Nyaruguru, ari na we wagejeje icyifuzo cyo guhabwa ishwagara kuri Perezida w’u Rwanda ubwo yasuraga Akarere ka Nyaruguru, na we yishimiye kuba bagiye kujya bahabwa ishwagara kuri Nkunganire, kuko inziza urebye ngo yabageragaho ihagaze ku mafaranga 120/Kg, kandi bakenera toni 2.5 kuri hegitari, zikamaramo imyaka ibiri.

Agira ati “MINALOC baradusuye baranabimbwira ko bayitwemereye, ariko twateguye imirima, iyo itugeraho ubu tuba twaratangiye kuyishyira mu butaka kuko twamaze gutabira”.

Dr. Charles Bucagu umuyobobozi. mukuru wungirije ushinzwe ubuhinzi muri RAB, avuga ko ishwagara izagera ku bahinzi hagati muri Kanama, ku buryo bazayiteresha mu gihembwe cy’ihinga gitaha.