Blog

Mu bikorwa byaranze umunsi w’Intwari mu Ntara y’Amajyaruguru, ahenshi byibanze ku gufasha abaturage kugera ku iterambere borozwa amatungo, bahabwa umuriro w’amashanyarazi hifashishijwe imirasire y’izuba, hanatangwa ibiganiro bivuga ku butwari cyane cyane mu bigo by’amashuri.

Rulindo

Mu Karere ka Rulindo ku munsi w’Intwari hatanzwe amashanyarazi akomoka ku mirasire y’izuba, ahabwa imiryango umunani yo mu cyiciro cya mbere cy’ubudehe ituye mu Murenge wa Bushoki.

Ni igikorwa cyakozwe muri gahunda ya 'Cana Challenge’, aho ku bufatanye na Banki y’u Rwanda Itsura Amajyambere (BRD), mu Karere ka Rulindo hazatangwa amashanyarazi akomoka ku mirasire y’izuba ku miryango 304 yo mu cyiciro cya mbere cy’ubudehe.

Kuri uwo munsi kandi Akarere ka Rulindo katanze Gaz n’amashyiga 20 ku miryango yatujwe mu mudugudu w’icyitegererezo(IDP Model Village) wa Gatwa mu Murenge wa Shyorongi, mu rwego rwo kuborohereza kubona ibicanwa, ibyo bikorwa byombi bikaba byayobowe na Mukanyirigira Judith, Umuyobozi w’Akarere ka Rulindo afatanyije n’inzego z’umutekano muri ako karere.

Imiryango 20 ituye mu mudugudu w’icyitegererezo wa Gatwa yashyikirijwe Gaz

Ni ibikorwa byashimishije abaturage bavuga ko ibikoresho byifashishwa mu bicanwa bahawe, bigiye gukuraho ingorane bahuraga na zo mu kubona bibagoye ibicanwa birimo inkwi, ndetse n’uburyo bari basanganwe bukaba bwangizaga ibidukikije bikabagiraho n’ingaruka zabateraga indwara y’ubuhumekero, ari na ho bahera bashimira Leta y’u Rwanda ikomeje kwita ku baturage bayo.

Uwitwa Musoni Faustin yagize ati 'Nishimiye inkunga ya Gaz mpawe, twe dutuye uyu Mudugudu wa Gatwa, tuzaharanira ko Gaz n’amashyiga duhawe z’ibiro 12 n’amashyiga tuzakomeza kubyifashisha twishakamo ibisubizo, igihe gaz ishize ntidutegereze inkunga ya Leta natwe tukayigurira. Turashimira Leta kuko iturinze byinshi birimo uburwayi bw’ubuhumekero n’uburyo twabonaga ibicanwa bigoranye kandi bwangiza ibidukikije.

Umuyobozi w’Akarere ka Rulindo ashyikiriza abaturage Gaz

Umuyobozi w’Akarere ka Rulindo, Mukanyirigira Judith, yigisha abahawe Gaz uburyo zikoreshwa

Abaturage bo mu Karere ka Rulindo bishimiye Gaz bahawe

Mu Karere ka Rulindo ku munsi w’Intwari bahawe n’umuriro utangwa n’imirasire y’izuba

Burera

Mu kwizihiza umunsi mukuru w’Intwari z’u Rwanda, mu Karere ka Burera, nyuma y’ibiganiro byahawe abaturage n’urubyiruko, imiryango icyenda ibarizwa mu Mirenge ya Rusarabuye, Gatebe, Cyanika na Bungwe yorojwe inka muri Gahunda ya Girinka Munyarwanda.

Umuyobozi w’Akarere ka Burera, Uwanyirigira Marie Chantal, yasabye abahawe inka kuzitaho

Banahawe ibikoresho by’ibanze byo kuzitaho, birimo imiti yica uburondwe, bahabwa n’umunyu. Umuyobozi w’Akarere ka Burera, Uwanyirigira Marie Chantal, yabasabye kuzitaho na bo bakazitura abandi.

Mu Karere ka Burera ku munsi w’Intwari imiryango icyenda yorojwe inka

Gakenke

Ku munsi w’Intwari z’igihugu, mu Karere ka Gakenke hatanzwe ibiganiro bivuga ku byaranze Intwari z’Igihugu byabereye mu Murenge wa Ruli.

Mu Karere ka Gakenke ibiganiro ku butwari byayobowe na Guverineri Nyirarugero Dancille

Abitabiriye ibyo biganiro basabwe na Guverineri Nyirarugero Dancille wari uyoboye ibyo biganiro, kurangwa n’ubutwari bwubaka iterambere ry’u Rwanda uyu munsi no mu gihe kizaza.

Umuyobozi w’Akarere ka Gakenke na we ari mu batanze ibiganiro ku butwari

Abahawe ibiganiro mu Karere ka Gakenke basabwe guharanira umuco w’ubutwari

Gicumbi

Umunsi w’intwari z’Igihugu mu Karere ka Gicumbi waranzwe n’ibiganiro bivuga ku butwari byahawe abaturage hirya no hino mu mirenge, ndetse bitangwa no mu bigo by’amashuri.

Ibiganiro mu mashuri, byatangiwe mu bigo bicumbikira abanyeshuri babyigamo, aho byagarukaga ku bikorwa by’ubutwari bw’Abanyarwanda bagendeye kuri iyi nsanganyamatsiko y’uyu mwaka, igira iti 'Ubutwari mu Banyarwanda, Agaciro kacu'. Abanyeshuri banahawe umwanya wo kubaza ibibazo ku byo badasobanukiwe.

Kuri uwo munsi, Ubuyobozi bw’Akarere ka Rulindo n’inzego z’umutekano bifatanyije kandi muri ibyo birori n’abaturage bo mu Mudugudu wa Rugarama mu Kagari ka Nyarutarama mu Murenge wa Byumba mu biganiro byatanzwe n’abayobozi mu nzego zinyuranye.

Musanze

Mu Karere ka Musanze, na ho bizihije umunsi w’Intwari z’u Rwanda. Ubuyobozi bwagiye bukorera mu bigo by’amashuri ibiganiro bivuga ku byaranze ubutwari bw’Abanyarwanda.

Kuri uwo munsi, Umuyobozi w’Akarere ka Musanze, Ramuli Janvier, yasuye anatanga ikiganiro ku banyeshuri barererwa muri Ecole des Sciences de Musanze mu Kagari ka Rwambogo mu Murenge wa Musanze.

Mu butumwa bwatanzwe n’Umukuru w’Igihugu Paul Kagame, yasabye urubyiruko guharanira ubutwari avuga ko ari rwo ruhanzwe amaso mu kubungabunga umurage w’ubutwari.

Yagize ati 'Rubyiruko rwacu: tubahanze amaso ngo mukomeze kubungabunga uwo murage w’ubunyarwanda buzira kuzima'.

Arongera ati 'Umunsi Mwiza w’Intwari! Turazirikana ubuzima bw’intwari z’u Rwanda; abagabo n’abagore bitanze ngo dushobore kubaka igihugu gishyize hamwe kandi gifite agaciro dufite ubu. Ibi ni umwenda ukomeye kuri buri wese muri twe; dukore duharanira icyateza imbere igihugu cyacu'.

Nsabimana Callixte

Nsabimana yabwiye Urukiko ko Ubushinjacyaha bwagiranye na we amasezerano yo kubuha amakuru y’abaterankunga ba FLN hamwe no kuburana yemera ibyaha, na bwo bukamusabira “igihano gito gishoboka”, none ngo bwamwihakanye.

Mu mpamvu Nsabimana yajuririye icyemezo cy’Urukiko Rukuru rwamuhanishije igifungo cy’imyaka 20 mu mwaka ushize, harimo ko yifuza igifungo cy’imyaka itanu (havuyemo itatu amaze gufungwa), kugira ngo abone n’uburyo ashinga urugo hamwe n’umukunzi we ngo yasize mu gihugu cya Afurika y’Epfo.

Nsabimana yagize ati “Icyo twumvikanye n’Ubushinjacyaha ni uko Umushinjacyaha Mukuru yambwiye ati ‘Sankara uracyari muto, uri n’impfubyi, MRCD-FLN baraturembeje, dufashe natwe tuzagufasha tugusabire igihano gito cyane, gito, gito gishohoka, kugira ngo nawe usubire mu buzima busanzwe, wubake urugo, ariko natwe dufashe turengere inyungu z’Igihugu”.

Yakomeje avuga ko ibyago yagize ari uko Umushinjacyaha witwa Bonaventure Ruberwa, wari uri aho bagirana amaserano (yakozwe mu buryo bw’imvugo atanditse), ngo ari we urimo kumusabira igifungo cy’imyaka 25, kizatuma asaza adashakanye n’iryo ‘hogoza’ yasize muri Afurika y’Epfo.

Ubushinjacyaha bwasobanuriye Urukiko ko butigeze bugirana amasezerano na Nsabimana (Sankara), kugira ngo yemere kuvuga abo bakoranaga n’uburyo babigenzaga, ahubwo ko icyabaye ari uko yemeye ibyaha.

Umushinjacyaha Ruberwa yagize ati “Ubu buryo bwo kumvikana ku birebana no kwemera icyaha nta bwigeze bukoreshwa kuko amategeko ateganya ko iyo bibayeho, bukorwa mu buryo bw’inyandiko. Nimubireba murasanga ku migereka ikubiyemo ikirego Ubushinjacyaha bwatanze nta raporo y’ubwumvikane bwigeze bubaho, hagati ya Nsabimana n’Ubushinjacyaha, icyabayeho ni ukwemera icyaha”.

Nsabimana hamwe n’umwunganira, Me Rugeyo Jean, bavuga ko Itegeko rigenga amasezerano ryemera n’ayakozwe mu mvugo (atari ngombwa ko agomba kuba yanditse gusa).

Nsabimana waburanye yemera ibyaha asaba Urukiko rw’ubujurire kugabanya igifungo kuva ku myaka 20 yakatiwe kugera ku myaka itanu, rushingiye ku mategeko aha Umucamanza ubwigenge mu gufata ibyemezo, mu gihe habayeho impamvu nyoroshyacyaha.

Nsabimana ashingira kandi ku ngingo ya 49 y’Itegeko riteganya ibyaha n’ibihano, ivuga ko Umucamanza mu gutanga ibihano agomba kwita ku mibereho bwite y’uregwa.

Yongeraho ko imibereho bwite ye ishaririye kuko ari impfubyi ya Jenoside yakorewe Abatutsi, ndetse n’umurwayi w’umutima n’igifu.

Nsabimana yakomeje kubwira Urukiko rw’Ubujurire ko abayobozi bakuru ba FLN bakoranye ibyaha batafashwe ngo baze kwisobanura, akaba abifata nko kumurenganya mu kumukatira igifungo cy’imyaka 20.

Ubushinjacyaha buvuga ko Urukiko Rukuru rwagabanyije igihano Nsabimana yari guhabwa, kuko aregwa ibyaha bishobora gutuma afungwa burundu, ngo nta mpamvu y’uko yakomeza kukigabanyirizwa.

Muneza Jean Bosco, urutoki rumwinjiriza agatubutse buri kwezi

Muneza yakoze akazi gatandukanye harimo kuba umwalimu mu mashuri abanza ndetse no gutwara abantu n’ibintu kuri moto mu mujyi wa Kigali.

Iyo mirimo yose yaje kuyihagarika atangira kwiga kaminuza aho yigaga mu cyahoze ari INATEK mu ishami ry’Uburezi, aho yigaga ibijyanye n’ubukungu.

Avuga ko igihe yigaga yari afite gahunda yo kuzasoza amasomo yinjira mu kazi k’Uburezi, kuko yumvaga uwize wese agomba guhabwa akazi na Leta.

Nyamara ngo icyo gitekerezo cyo guhabwa akazi na Leta cyamuvuyemo mu mwaka wa 2008, ku ijambo ry’Umukuru w’Igihugu yabwiye abanyeshuri ba kaminuza y’u Rwanda icyo gihe.

Ati 'Igihe kimwe ndimo kumva amakuru, Perezida wa Repubulika yasuye abanyeshuri ba kaminuza i Butare, ababwira ko biga ariko intego nyamukuru ari uko ubumenyi bavana mu mashuri bazabubyaza umusaruro.'

Mu ijambo rya Perezida wa Repubulika avuga ko atazibagirwa, kandi ryatumye aba uwo ari we ubu, ngo yabwiye abanyeshuri ko Igihugu ari gito, kidakora ku Nyanja, nta yindi mitungo kamere gifite ko ubukungu bw’Igihugu ari abaturage bacyo byagera ku bafite ubumenyi bikaba akarusho.

Ngo yabwiye abanyeshuri ko biga bagamije gukorera igihugu no kwiteza imbere ubwabo, kwihesha agaciro no kwihangira akazi kuko Leta bose itari bubabonere akazi.

Muneza avuga ko acyumva iryo jambo yakangutse mu bitekerezo atangira gutekereza ku kazi azihangira.

Agira ati 'Iryo jambo nkimara kuryumva numvise ibitekerezo byanjye bikangutse n’ubwo yaribwiraga abiga i Butare, ariko yaribwiraga abanyeshuri bose nanjye ndimo kuko narigaga.'

Akomeza agira ati 'Guhera uwo munsi ijambo ryabaye iryanjye ntangira kurishyira mu bikorwa uwo munsi. N’amanota nabonaga yahise azamuka byihuse kuko nigaga nzi icyo nigira n’icyo ngomba gukora.'

Asoje kwiga ngo yumvise agomba gutangira urugendo rwe rwo kwihangira umurimo ahereye ku byo yari afite aribwo butaka bungana n’igice cya hegitare (1/2 hectare).

Ubwo butaka ngo bwari busanzwe buhingwamo imyaka ivangavanze harimo insina, imyumbati, ibijumba, amasaka ibigori n’ibishyimbo, ahita abikuramo byose ahitamo kuhakorera ubuhinzi bw’urutoki kandi insina zitanga umusaruro.

Kubigeraho ngo yatangiye gusura abahinzi b’urutoki batandukanye cyane, uwo batuye mu murenge umwe witwa Rutagarama Appolinaire, amukuraho ubumenyi ajya kubikorera mu butaka bwe.

Ati 'Aho hantu igitoki kinini nezaga nticyashoboraga kugeza ibiro birindwi ariko maze kubikora kinyamwuga, natangiye kubona igitoki cy’ibiro 50. Amafaranga nagurishaga ibitoki narayazigamaga nkagenda nguriraho ubundi butaka.'

Igice cya hegitari cyo mu mwaka wa 2010, ubu cyabyaye hegitari 10 z’urutoki, 10 z’ubutaka buteyeho ishyamba n’izindi 10 ahingaho imyaka isanzwe.

Muneza Jean Bosco urutoki rwe rugizwe n’insina z’Injagi, Kibogo, Nkazikamwa na Fiya.

Ku kwezi kumwe avuga ko asarura nibura toni 10 z’ibitoki, ikilo kimwe akaba akigurisha amafaranga y’u Rwanda 130.

Iyo akuyemo ay’ab’akozi n’ibindi yakoresheje avuga ko ku kwezi yihemba arenga 500,000Frw ku rutoki gusa.

Muneza ubu afite inzu mu mujyi wa Kabarore ifite agaciro ka miliyoni 72 n’indi mu mujyi wa Kigali ya miliyoni 40.

Atunze imodoka yo mu bwoko bwa FUSO akoresha mu kugeza imicanga, amabuye n’ibindi ku mukiriya umuhaye akazi.

Avuga ko adashobora kureka umushinga we w’ubuhinzi bw’urutoki ahubwo atekereza kuzongerera agaciro umusaruro w’ibitoki.

Ati 'Icyo ntekereza kuzakora ni ukongerera agaciro umusaruro uvamo, kuko ubu mbuze abaguzi byaneka ariko nshobora kubyumisha umuntu akazarya igitoki igihe ashakiye niyo haba hashize umwaka.'

Ashimishwa no kuba abaturanyi be barabonye akazi kuko afite abakozi 30 bamwe bahemberwa no kuri banki ndetse no kuba hari Abanyarwanda barya igitoki cye, n’ubwo baba bamuhaye amafaranga.

Agira inama abantu batunze ubutaka ariko bakaba batabubyaza umusaruro ko bitera Ubukene, kuko umutungo ukomeye kurusha iyindi ari ubutaka kandi bwateza imbere nyirabwo aramutse abukoresheje neza.

AS Kigali ni yo yaherukaga gutwara Igikombe cy’Amahoro

Mu kiganiro yagiranye na Kigali Today, Umunyamabanga w’Ishyirahamwe ry’umupira w’amaguru mu Rwanda (FERWAFA), Muhire Henry, yavuze ko mu gihe cya vuba basohora gahunda y’uburyo icyo gikombe kizakinwa.

Yagize ati 'Igikombe kirahari. Icyo dutegereje gutangaza vuba aha, ni igihe Igikombe cy’Amahoro kizatangirira kuko bifite inzego bigomba kunyuramo, bikemezwa na komite ya FERWAFA, ariko vuba aha turaba twabishyize ahagaragara.'

Ubuyobozi bwa FERWAFA buvuga ko nta gihindutse, nyuma y’imikino y’ibirarane ya shampiyona irimo gukinwa, aribwo hazashyirwa ahagaragara gahunda yose y’imikino y’igikombe cy’amahoro.

Ikipe ya As Kigali niyo iheruka gutwara Igikombe cy’Amahoro giheruka gukinwa mu mwaka w’imikino wa 2018-2019, itsinze Kiyovu Sports ibitego 2-1, ku itariki ya 4 Nyakanga 2019, mu gihe umwaka w’imikino wa 2019-2020 utararangiye na 2020-2021, wakinwe mu buryo budasanzwe byose kubera icyorezo cya Covid 19, icyo gikombe nticyakinwa.

Kuri uyu wa Gatatu ni bwo umutoza mushya wa Rayon Sports Jorge Manuel da Silva Paixão Santos uzwi ku zina rya Paixão yeretswe itangazamakuru n’abafana

Umutoza mushya wa Rayon Sports Manuel da Silva Paixão Santos

Ibyo wamenya ku mutoza mushya wa Rayon Sports

Ni umutoza wavukiye ahitwa Almada muri Portugal mu mwaka wa 1965, aho mu gihe cy’imyaka 11 yakinnye nk’uwabigize umwuga mu makipe y’icyiciro cya kabiri n’icya gatatu muri Portugal, aza gukina umwaka umwe mu cyiciro cya mbere mu ikipe yitwa Académica de Coimbra aho yakinnye nk’umusimbura mu mikino itatu.

Uyu mutoza Jorge Manuel da Silva Paixão Santos uzwi ku zina rya Paixão yanatoje kandi ikipe ya Braga yo mu cyiciro cya mbere muri Portugal, akaba yarayitoje imikino 10 gusa, nyuma aza gukomereza mu yandi makipe.

Aganira n’itangazamakuru, uyu mutoza yatangiye ashima u Rwanda uburyo yasanze rumeze, aho yavuze ko yatunguwe cyane no kubona uburyo cyateye imbere, gifite isuku ndetse n’umutekano.

Yakomeje agira ati 'Nje hano gutwara shampiyona n’ibindi bikombe, dukeneye inkunga yanyu, tuzakora ibishoboka byose ngo tubashimishe kuko abafana ni ingenzi kuri twe, igihe cyo gukora si igihe cyo kuvuga'

Perezida wa Rayon Sports Uwayezu jean Fidele, yatangaje ko icya mbere basabye uyu mutoza ari ukubahesha igikombe cya shampiyona, ndetse no gufasha Rayon Sports gusohokera u Rwanda mu marushanwa mpuzamahanga.

Yagize ati 'Tujya kumuzana twahereye ku nararibonye ye, yatoje ahantu hatandukanye, afite inararibonye, yarabyize, Rayon Sports murayizi ni ugutsinda, ni ugushokera u Rwanda mu marushanwa nyafurika'

'Rayon Sports igomba kugarura agaciro kayo, ikagarura ibigwi byayo, ubu turareba Rayon Sports itari iy’iyi shampiyona gusa, turareba imyaka myinshi iri imbere'

Uwayezu Jean Fidele, Perezida wa Rayon Sports

Umutoza Jorge Manuel da Silva Paixão Santos ufite impamyabumenyi yo gutoza yo ku rwego rwa mbere itangwa na UEFA 'UEFA Pro Licence', akazaba yungirijwe na mugenzi we Pedro Miguel nawe ukomoka muri Portugal.

Pedro Miguel, umutoza wungirije