Blog

Umunyamakuru Axel Horaho ukora mu kiganiro 'Urukiko rw'Ubujurire' kuri Fine FM, yirinze kuvuga byinshi ku bijyanye n'ahazabera gahunda z'ubukwe bwe kimwe n'ibindi avuga ko bizatangazwa mu minsi iri imbere.

Tariki ya 18 Werurwe 2021, ni bwo Axel na Masera basezeranye imbere y'amategeko, umuhango wabereye mu murenge wa Ngoma mu karere ka Huye. Axel na Masera bagiye kubana akaramata nyuma y'imyaka ibiri n'igice bakundana.

Masera wemeye kuba umugore wa Horaho, asanzwe atuye muri Leta Zunze Ubumwe za Amerika, ndetse hari n'amakuru avuga ko nyuma y'ubukwe n'uyu munyamakuru azahita asanga umufasha we aho asanzwe aba.

Amafoto yo mu bihe bitandukanye agaragaza uburanga bwa Masera Nicole ugiye kubana akaramata na Horaho Axel:

Nubwo atuye muri Amerika, Masera ntiyibagiwe umuco wa kinyarwanda

Umunsi Axel ajya kwakira umukunzi we ku kibuga cy’indege cya Kigali ubwo yari avuye muri Amerika

Masera asanzwe ari umufana w’ikipe y’igihugu Amavubi

Umunsi Masera yambitswe impeta y’urukundo na Axel

Masera Nicole ni inkumi nziza y’uburanga

Umunsi Axel na Nicole basezerana imbere y’amategeko

Nyuma y’ubukwe, biravugwa ko Axel azahita asanga umugore we muri Amerika

Iyo nama y’iminsi itanu yiswe Pan African Climate Justice Alliance (PACJA), yatangiye ku wa Kabiri tariki ya 1 Werurwe 2022, ikaba ibaye mbere y’uko habaho inama mpuzamahanga ku mihindagurikire y’ikirere, COP 27, izabera i Cairo mu Misiri mu mpera z’uyu mwaka.

Muri iyo nama, izo mpuguke zagaragaje ko ibihugu bya Afurika bitungukiye mu nama iheruka ku mihindagurikire y’ikirere, COP 26, yabereye i Glasgow muri Ecosse mu mwaka ushije, kuko amafaranga byizejwe n’ibihugu bikize ari na byo byohereza ibyuka byinshi mu kirere atabonetse.

Umuhuzabikorwa w’Imiryango Nyarwanda iharanira kurengera ibidukikije no guhangana n’imihindagurike y’ibihe, Vuningoma Faustin, avuga ko hashize igihe basaba ibihugu bikize gushyira mu bikorwa ibikubiye mu masezerano yo guha amafaranga ibihugu bikennye, agamije kubungabunga urusobe rw’ibinyabuzima n’ibidukikije muri Afurika.

Ibihugu biteye imbere byemeye ko buri mwaka bizajya bitanga miliyari 100 z’Amadolari ya Amerika ku bihugu bya Afurika, cyane ko ari byo bitangiza cyane ikirere kuko byohereza mu kirere ibyuka bihumanya bitageze no kuri 4%, gusa ayo mafaranga ntiyigeze atangwa, kuko na duke twabonetse ari intica ntikize.

Vuningoma agira ati 'Nta munsi n’umwe ayo mafaranga byigeze biyohereza, kandi twebwe nka Afurika ibyo dusabwa twarabikoze.'

Perezida wa Komite ishinzwe ibya Politiki muri PACJA, Augustine Njamnshi, avuga ko nta bushobozi ibihugu bya Afurika byabona kugira ngo bibashe kugabanya ibyuka bihumanya ikirere, ibihugu bikize bitabigizemo uruhare bitanga amafaranga akenewe.

Njamnshi avuga ko ku mwaduko wa Covid-19 mu ntangiriro za 2020, ibihugu bikize byihutiye gukusanya amafaranga yo gukumira icyo cyorezo, bihita bibona byihuse miliyari 7.2 z’Amadolari ya Amerika, kuko byari bizi ko icyorezo kidatoranya, akibaza impamvu bidakorwa no ku mihindagurikire y’ibihe muri Afurika.

Ati 'Ingaruka ziterwa n’imihindagurikire y’ibihe kuri Afurika ni nyinshi, ni zo zigomba gutuma duhaguruka, tugasaba guhabwa amafaranga ibyo bihugu byemeye kugira ngo duhangane n’icyo kibazo, ari na byo bizagarukwaho muri COP 27'.

Umunyamabanga Uhoraho muri Minisiteri y’Ibidukikije y’u Rwanda, Patrick Karera, avuga ko bifuza kugira ijwi rimwe nk’Abanyafurika, COP 27 izabe bafite imyumvire imwe ku ntego bifuza kugeraho.

Ati 'Guhangana n’imihindagurike y’ibihe Leta ntiyayikora yonyine, bisaba ubushobozi bwa za Leta n’Imiryango itari iya Leta kugira ngo bigerweho. Imyanzuro y’iyi nama turimo hano i Kigali, ni yo tuzajyana mu nama izabera mu Misiri'.

Umunyamabanga Uhoraho muri Minisiteri y’Ibidukikije y’u Rwanda, Patrick Karera

Muri iyo nama ibera i Kigali, abayitabiriye bavuze ko ingaruka zijyanye n’imihindagurike y’ibihe zatangiye kugaragara cyane mu bihugu byinshi bya Afurika, birimi cyane cyane Mozambique, Zimbabwe, Madagascar, Kenya n’ahandi, imyuzure yahitanye ubuzima bw’abantu benshi n’ibindi bintu birangirika birimo ibikorwa remezo.

Ku wa kabiri Schulze watanze isomo muri kaminuza y’u Rwanda ishami rya Gikondo, ari mu Rwanda muri gahunda ze zo gushyigikira ishingwa ry’inganda zikora inkingo muri Africa.

Ubwo yabwiraga abanyeshuri bari bamukurikiye yagize ati:' mu rwego rwo guhangana n’iki cyorezo, ningombwa cyane cyane abantu bo mu bihugu bikiri munzira y’amajyambere ko bagomba kubona inkingo.'

Yakomeje avuga ko ishami ry’Umuryango w’Abibumbye ryita k’ubuzima ryashyizeho intego yo kuba hakingiwe 70% y’abatuye isi hagati muri uyu mwaka wa 2022.

'Covid-19 yabaye imbarutso yereka isi ko idatekanye kugeza igihe Afurika izaba itekanye, dushobora gukemura ibibazo bikomeye nk’iki cyorezo binyuze mu bufatanye bw’isi, guhanga udushya, ndetse n’ubufatanye hagati y’abafatanyabikorwa. Kubona inkingo zingana ni inzira yo gusohoka muri iki cyorezo.'

Schulze agaruka ku ishoramari nk’irya BioNTech, yashimangiye ko inkunga y’inkingo ndetse niy’amafaranga muri Afurika atariyo nzira irambye yo kurwanya iki cyorezo.

Uruzinduko rwa Schulze mu Rwanda, n’urwa mbere muri Afurika nka Minisitiri, ruje mu gihe BioNTech yashyizeho gahunda yo gushinga uruganda rwa mbere rukora inkingo za Covid-19 muri Afurika, bikaba biteganijwe ko izakoresha ikoranabuhanga rya mRNA mu Rwanda na Senegali hagati muri uyu mwaka.

Minisitiri w’ubuzima w’u Rwanda, Dr Daniel Ngamije, yavuze ko iyi gahunda ijyanye n’icyerekezo cy’u Rwanda ati:'Ibi bihuye n’icyerekezo cy’u Rwanda cyo kwibanda ku kubaka ubukungu bushingiye ku bumenyi busobanura kongera ubushakashatsi no guhanga udushya binyuze mu guteza imbere ubunararibonye mu bushakashatsi no mu iterambere.'

Ubusumbane bw’inkingo bugaragara cyane muri Afurika kuruta ahandi.

Ngamije yagize ati: “Kubona abantu bafite ubumenyi muri siyanse, ikoranabuhanga, ubwubatsi, ndetse n’andi masomo ni ingenzi ku bihugu bya Afurika, gushyiraho ibikorwa remezo by’inganda kandi nibyo u Rwanda rukora.”

Abafatanyabikorwa b’Akarere ka Nyamagabe biyemeje gufasha mu bukangurambaga bwo kurwanya ibibazo bibangamiye imibereho myiza y’abaturage

Bwagaragaje icyo cyifuzo mu nama bagiranye tariki 28 Gashyantare 2022, itegura ubukangurambaga 'bw’Umuryango utekanye kandi ushoboye', butegura kwizihiza umunsi mpuzamahanga w’abagore. Ni ubukangurambaga bwatangiye kuri uyu wa Gatatu ku itariki 2 Werurwe 2022.

Umuyobozi w’Akarere ka Nyamagabe wungirije ushinzwe imibereho myiza y’abaturage, Agnès Uwamariya, nyuma yo kugaragaza mu mibare uko ibibazo bibangamiye imibereho myiza byifashe muri Nyamagabe, yagaragaje ko buri wese aharaniye ko bikemuka, yaba akoreye abandi ariko na we yikoreye.

Yagize ati 'Umwana w’umuturanyi iyo atagiye kwiga kandi ejo ejobundi ari we uzaba umukwe wawe uba wumva bizagenda gute? Umwana w’umuturanyi iyo bamuteye inda ari umwangavu, ejo ari we wari kuzaba umukazana wawe, wumva utaba uhombye?'

Yanagaragaje ko niba hari umuryango utagira ubwiherero, urarana n’amatungo mu nzu cyangwa ubaho nta suku muri rusange, abaturanyi n’abandi bafatanyabikorwa bari bakwiye kuwufasha nk’abikorera, kuko n’ubundi abana bo muri uwo muryango ari bo bazavamo abo ababo bazashakamo.

Yunzemo ati 'Niba hari umuryango wabuze ubushobozi, nkatwe twese nk’isibo ntabwo twagira icyo dukora? Niba tubona umuryango ubana mu makimbirane, kuki tutagira icyo dukora kugira ngo umwana wabo udasinzira abone ibitotsi, atazavaho ajya mu muhanda?'

Visi Meya Agnes Uwamariya arasaba abantu bose kumva ko barebwa no guca amakimbirane mu ngo n’imibereho mibi

Umuyobozi w’Akarere ka Nyamagabe, Hildebrand Niyomwungeri, yagaragaje ko ibibazo bibangamiye imibereho myiza bigenda bisobekerana, ku buryo umuryango ugira kimwe n’ibindi bikaziraho.

Urugero nk’umuryango ubana mu makimbirane, uzasanga ubaho mu bukene bukabije, bityo usange nta bwiherero buzima ufite ndetse uraza amatungo mu nzu.

Uzasanga kandi abana wabyaye barangwa n’imirire mibi ituma bagwingira, hanyuma ntibanajye ku ishuri, baramuka banarigiyemo ntibabashe gukurikira amasomo neza, kuko igwingira ryo ku mubiri rijyana n’iryo mu mutwe.

Yasabye rero abafatanyabikorwa b’akarere ubufatanye, cyane ko igikenewe kurusha ari ukwigisha, kuko ibibazo bibangamiye imibereho y’abaturage ahanini bishingiye ku myumvire.

Yagize ati 'Twese nitujyana ubutumwa bumwe, turizera ko bizatanga umusaruro kurusha uko umwe yajya ajyana ubwe, butandukanye n’ubw’undi.'

Abahagarariye amadini na bo bari mu bafatanyabikorwa basabwe ubufatanye, kandi na bo bavuga ko biteguye gutanga umusanzu wabo, banizeye kugera ku ntego.

Archidikon Vincent Habimfura uhagarariye ihuriro ry’imiryango ishingiye ku myemerere mu Karere ka Nyamagabe yagize ati 'Nigeze gukorera i Mata mu Karere ka Nyamagabe, kandi nari mu itsinda rishinzwe guhangana n’ibibazo bibangamiye imibereho myiza y’abaturage. Byabaye ngombwa ko ngenderera umuryango ku muryango, tukaganira ku bibazo bihari, kandi ibibazo byarakemutse.'

Icyo gihe ngo nk’umuyoboke basangaga afite ubwiherero butujuje ibya ngombwa, yaterwaga isoni n’uko umuyobozi we wa roho yamusanze, hanyuma agafata ingamba.

Meya Niyomwungeri yagaragaje ko ibibazo bibangamiye imibereho myiza bigenda bisobekerana

Kuva mu mwaka wa 2016 kugeza mu wa 2021, abangavu batewe ind i Nyamagabe ni 2411. Mu mwaka ushize wa 2021 wonyine, hasambanyijwe abangavu 76 kandi abashakanye bahohoteranye bazwi ni 88.

Muri ako karere kandi habaruwe ingo 940 zibanye nabi, 821 zifite ubwiherero butujuje ibisabwa, 46 zidafite aho kuba n’abana 31 bakirangwa n’imirire mibi.

Ibigega byatangiye kugezwa ku tugari

Umurenge wa Rwimiyaga nta bikorwa remezo by’amazi ugira, ahanini kubera ko watuwe nyuma ya 1994, mbere wari muri Pariki y’Akagera.

Umuyoboro w’amazi wahagejejwe muri 2019, ariko ntayo ufite kubera ko amazi asaranganywa ahantu henshi akaba macye.

Ubuyobozi bw’Akarere ka Nyagatare buvuga ko hari umushinga munini wo kwegereza abaturage amazi meza, cyane mu duce twatuwe vuba nk’umurenge wa Karangazi, Rwimiyaga, Musheri, Matimba n’ahandi.

Mu gihe uwo mushinga utari wagerwaho neza, mu Murenge wa Rwimiyaga hagiye kwifashishwa ibigega bizajya bishyirwamo amazi meza ya WASAC abaturage akaba ari yo bavoboma.

Umunyamabanga Nshingwabikorwa w’Umurenge wa Rwimiyaga, Bagabo Anthony, avuga ko ubu hamaze kuboneka ibigega umunani byashyizwe ku biro by’utugari, abaturage bakaba ariho bazajya bakura amazi meza, ariko bakishyura amafaranga macye kugira ngo haboneke agura andi.

Ati “Hamaze kuboneka ibigega umunani, twamaze kubishyira ku biro by’utugari, abaturage bazajya babona amazi meza azajya azanwa n’imodoka iyashyiremo bayabone, bayagure kuri macye kugira ngo haboneke amafaranga azagura andi.”

Kuri ubu ibigega byamaze kugezwa ku biro by’utugari, ariko hakaba hagishakishwa ibindi mu bafatanyabikorwa b’akarere.

Mu muganda rusange wabereye mu kagari ka Gacundezi, Umurenge wa Rwimiyaga abaturage bari bagaragarije ubuyobozi bw’akarere ikibazo cy’amazi mabi bakoresha, kuko bayakura muri valley dam.

Muri ibyo bikorwa harimo kubaka umudugudu uzaba ugizwe n’inzu zubatswe mu buryo butangiza ibidukikije.

Biteganyijwe ko muri iyo nkunga, agera kuri miliyari 33.8Frw azakoreshwa mu kubaka izo nzu, mu gihe andi arenga gato miliyari 29Frw, azakoreshwa n’Ikigega gishinzwe kurengera ibidukikije (FONERWA), mu gufasha imishinga myiza y’iterambere ariko inabungabunga ibidukikije.

Iyo nkunga y’u Budage ikubiye mu bufatanye icyo gihugu cyagiranye n’u Rwanda, bugamije kurufasha kugera ku ntego rwihaye mu kubungabunga ibidukikije, zirimo n’uko kugera mu 2030 ruzaba rwagabanyije 38% by’umwuka uhumanya ikirere.

Iyo mihigo ingana na miliyari 11 z’amadolari y’Amerika, azashorwa kandi mu bikorwa bigamije kubungabunga amazi, ubuhinzi, ubutaka n’amashyamba, imiturire ndetse n’ubuzima.

Minisitiri w’Imari n’igenamigambi, Dr Ndagijimana Uzziel, yavuze ko ubwo bufatanye buhujwe na gahunda y’u Rwanda yo kwihutisha iterambere (NST1).

Ati “Intego nyamukuru ni ukwihutisha iterambere ry’abikorera, hagamijwe kuzamura ubukungu no kongera umusaruro hibandwa ku kubungabunga ibidukikije, umutungo kamere biganisha u Rwanda ku bukungu bwifuzwa'.

Yagaragaje kandi ko kuzamura ibiganiro bigamije kurwanya imihindagurikire y’ikirere, bizafasha isi kugera kuri gahunda yayo yo guhangana n’imihindagurikire y’ibihe mu kinyejana.

Ibyo bigakorwa ku bufatanye n’abahanga mu kubungabunga ibidukikije, abikorera, imiryango itari iya Leta, kugira ngo gahunda zose zemezwa zibashe gushyirwa mu bikorwa.

Minisitiri ushinzwe ubufatanye mu bukungu n’iterambere w’u Budage, Svenja Schulze, yavuze ko ubufatanye bw’isi ari bwo buryo bwonyine bwo guhangana n’ikibazo cy’ihindagurika ry’ikirere.

Ati 'U Rwanda ni imbaraga zikenewe mu bufatanye bw’isi mu gushyira mu bikorwa gahunda yo kurwanya imihindagurikire y’ikirere. Twese hamwe, turashaka gutera imbere mu gihe kizaza, kidafite aho kibogamiye kandi kirambye '.