Blog

Umutwe wa FDLR washinzwe n'abari bamaze kugira uruhare muri Genocide yakorewe abatutsi mu Rwanda mu 1994, wagiye uteza umutekano muke u Rwanda. Ninako kandi wanagiye ugira abawuvugira n'abawutera inkunga batari bake. Ibi ariko byagiye bikomwa mu nkokora n'inzego z'umutekano mu Rwanda aho zagiye ziburizamo imigambi yawo yose. Mu bakunze kwigaragaza kumbuga nkoranyambaga, akwirakwiza icengezamatwara rya FDLR ndetse anigaragaza nk'udashyigikiye isenywa ryawo, ni Jean Luc Habyarimana umuhungu w'uwahoze ari Perezida w'u Rwanda, Juvenal Habyarimana.

Ikinyamakuru ' African Facts' cyakoze inkuru icukumbuye yerekana imikoranire ya hafi y'abo mu muryango wa Habyarimana wabaye Perezida w'u Rwanda na FDLR. Iyi nkuru niyo tugiye kubagezaho mu buryo burambuye.

Mu gihe cy'imyaka 3, intambara ikomeje guca ibintu muri Kivu ho mu Burasirazuba bwa Congo Kinshasa. Iyi ntambara ihuza leta ya Congo ifatanyije n'imitwe yitwaje intwaro yibumbuye mucyo bise 'Wazalendo'. Bakaba bahanganye ku urundi ruhande na Alliance Fleuve Congo na Mouvement du 23 Mars (M23) inafite ishami rya gisirikare. M23 kimwe muri byinshi basaba, ni uburenganzira bw'abaturage barimo abanye Congo bavuga ururimi rw'ikinyarwanda bagiye bicwa abandi bakagirirwa nabi, ibi bikaba byaragiye birushaho gukomera kuva mu 2017. Mu bagiye bigaragaza imbere muri iyi ntambara ku ruhande rwa Leta ya Congo harimo na FDLR. Ikaba yo iba yifuza gutaha kumbaraga aho inafite abayizeza ibitangaza birimo ubufasha.

Imikoranire ya hafi hagati ya FDLR n'abo mu muryango wa Habyarimana.

Ikinyamakuru African Facts kivuga ko ubucukubumbuzi bwacyo bwatangiye mu myaka 5 ishize. Kuwa 3 Kamena mu 2020, Urukiko rw'Ubujurire rw'i Paris mu Bufaransa, rwasuzumye umwanzuro wo koherereza Kabuga urukiko mpuzamahanga mpanabyaha rwashyiriweho u Rwanda. Uyu Kabuga akaba yarashinjwaga kuba umuterankunga ukomeye wa Genocide yakorewe abatutsi mu Rwanda. Mubitabiriye urubanza, harimo Leon Habyarimana umwana 5 mu bana 8 ba Juvenal Habyarimana, wabaye Perezida w'u Rwanda n'umugore we Agathe Kanziga.

Uwo munsi, Leon Habyarimana yari kumwe na Callixte Mbarushimana wahoze ari umunyamabanga nshingwabikorwa wa FDLR, umutwe witwaje intwaro washinzwe n'abasize bakoze Genocide mu Rwanda, umutwe washyizwe k'urutonde rw'imitwe y'iterabwoba ndetse ukanashinjwa ibyaha byibasira inyoko muntu wakoreye mu Burasirazuba bwa Congo Kinshasa. Abo bagabo bombi ngo bakomeje kugirana  ibiganiro bitandukanye imbere yiyo ngoro y'urukiko.

African facts yatangiye kwibaza niba ubushuti bwagaragaraga hagati y'umuhungu wuwahoze ari perezida n'umwe mubayobozi bakuru ba FDLR bwari ubw'impanuka cyangwa ahubwo bwari bushingiye kuwundi mubano wihariyewari uswanze hagati yabo. Kugira ngo imenye neza isano ritaziguye ryari hagati y'umuryango wuwuhoze ari perezida n'umutwe witwaje intwaro wa FDLR, African Facts byayisabye kujya Orleans.

Mu mujyi wa Jeanne d'Arc, Colonel Aloys Ntiwiragabo, umwe mubatangije FDLR ndetse akaniyibera umugaba w'ikirenga bwa mbere niho yaratuye mu buryo bw'ibanga. Muri aka gace akaba yarahabaye imyaka 14 mu ibanga rikomeye kugeza ibye bimenyekanye mu 2020 bivuye ku iperereza ryakozwe na Mediapart. Ubu akaba ari gukorewaho iperereza n'inzego z'ubutabera z'Ubufaransa ku byaha aregwa byo kugira uruhare muri genocide yakorewe abatutsi, mu 1994 mu Rwanda.

Nkuko byavuzwe na Gen (Rtd) Paul Rwarakabije wigeze no kuba umuyobozi muri FDLR, muri raporo y'iperereza kuruhare rw'Ubufaransa muri Genocide yakorewe abatutsi mu 1994, yatangajwe mu 2008, avuga ko Agathe Kanziga umugore wa Habyarimana, mu ntangiro z'umwaka w'i 2000, hari amafaranga yahabwaga n'urwego rukuru rw'Ubufaransa rushinzwe umutekano wo hanze y'igihugu, mu gashami gashinzwe ubutasi, yo gufasha FDLR. Nkuko Rwarakabije yabivuze ngo uwakiraga ayo mafaranga ntawundi uretse Aloys Ntiwiragabo akaba no mubashinze FDLR.

Numero ya telephone ya Col Ntiwiragabo yasanzwe mu nyandiko zandikishijwe intoki zari kwa Agata Kanziga ubwo urugo rwe rwasakagwa na Jandarumori y'Ubufaransa mu 2016. Izi nyandiko African Fact ikaba yarazigenzuriye ubwayo. Aha bikaba bigaragara ko Agatha Kanziga yari amaze imyaka 16 avugana na Col Ntiwaragabo wari warabaye mu basirikare bakuru mu Rwanda, warimo wihisha ubutabera, aho yaratuye mu igorofa ahitwa Jeane d'Arc nibura kuva mu mwaka w'i 2006.

Umuryango wa Habyarimana byagaragaye ko ufitanye umubano n'umuryango w'abanyarwanda batuye muri Oerleans washinzwe n'umugore wa Col Ntiwiragabo witwa ARAO (Association des Rwandais de l'Agglomeration Orleans). Kuva mu 2016, Clementine, mwisengeneza wa Agathe Kanziga yari mubagize inama y'ubutegetsi y'ishyirahamwe ry'abanyarwanda batuye muri Orleans. Clementine ni umukobwa wa Protais Zigiranyirazo uzwi nka 'Mr Z' musaza wa Kanziga. Uyu akaba yari mubantu bo hejuru batekererezaga umuryango w'umukuru w'igihugu icyo gihe. African Facts kandi yahishuye ko abandi 5 bagize iri shyirahamwe harimo na perezida waryo bose ari abantu bahafi ba Kanziga.

African Fact mugukomeza icukumbura ryayo yabonye kandi ukwandikirana kw'umuhungu muto wa Kanziga, Jean Luc Habayarimana. Uku kwandikirana kwasanzwe muri imwe muri mudasobwa yafashwe n'inzego z'umutakano z'ubufaransa mu nzu ya Habyarimana Jean Luc, aho harimo ubutumwa bwa email yandikiranye n'umwe muri babyara be kuva 2014.

Uwo bandikiranaga hari aho avuga izina 'Omar' na 'Orleans' ahandi ngo umwe 'waho ze ari umujandarume Kacyiru.' Nyamara kugeza mu 1994, Aloys Ntiwiragabo, wari colonel muri Jandarumori, yabaga mu kigo cyayo Kacyiru i Kigali. Naho Omar ni izina Col Ntiwiragabo yiyise mu kwiyoberanya igihe yabaga muri Sudan ndetse n'igihe yari umuyobozi mukuru wa FDLR.

Indi nshuti y'umuryango iva muri MRCD-FLN

African Facts yabonye list y'abashyitsi ndetse n'igiciro cyagombaga gutangwa kubirori byari byateguwe n'umuryango wa Habyarimana mu 2012. Ikirori cyagombaga guhuriza hamwe abo mu muryango wuwahoze ari perezida, abahoze bakomeye mu butegetsi, aba bakaba harimo abaciriwe imanza cyangwa abagikurikiranyweho ibyaha bya Genocide nka Jean Chrysostome Nyirurugo wari mubitabiriye uwo muhango.

Jean Chrysostome Nyirurugo, uyu wavukaga hamwe na Kanziga muri Giciye, yari directeur general muri minisiteri ishinzwe amashuri abanza n'ayisumbuye. Nyirurugo yahoze ari no mu ishyirahamwe ryayoborwaga na Bagosora Theoneste umucurabwenge wa genocide wanabihamijwe akaza gukatirwa imyaka 35 n'urukiko, rigahuriza hamwe abanya politike bakomeye nabamwe mubasirikare bakuru.

Raporo yo muri Nzeri 1994, yigeze gutangazwa n'umuryango utegamiye kuri leta uharanira uburenganzira bw'ikiremwa muntu, yagarutse kuri Jean Chrysostome Nyirurugo nkuwagize uruhare mu iyicwa ry'umuryango wose umwe i Kigali mu gihe cya Genocide. Icyaha ashinjwa kuba yaragikoranye n'abahungu be. Uyu musaza w'imyaka 85 ubu, atuye i Metz mu Bufaransa aho ndetse nta rwego na rumwe rwigeze rugira icyo rumubaza.

Izina Jean Chrysostome Nyirurugo rigaragara mu nyandiko iriho abantu bagiraga uruhare mugukangurira abantu kuba abanyamuryango b'ishyaka PDR (Partie pour la Democratie au Rwanda). Iri n'andi mashyaka bakaba bari barakoze ihuriro baryita MRCD (Mouvement du Rwanda pour le Changement Democratique).

iri huriro rikaba ryashinzwe na Paul Rusesabagina aho bari banafite ishami rya gisirikare ryitwa FLN. Aba bakaba barakoze ibyaha ubwo bagabaga ibitero bikica abaturage mu Rwanda. Iyi nyandiko ikaba yarabonywe n'igipolisi cy'Ububiligi ubwo mu Ukwakira, 2019 basakaga inzu ya perezida wa MRCD-FLN bwana Rusesabagina. Si Jean Chrysostome wo muri PDR bigaragara ko afitanye umubano wihariye n'umuryango wa Habyarimana kuko mubagize ishyirahamwe ry'abanyarwanda bo muri Orleans bakaba inshuti z'akadasohoka za Kanziga harimo na perezida wa PDR.

Nyuma y'ibitero byibasiye abasivile bigahitana bamwe, abenshi bagakomereka bikorewe kubutuka bw'u Rwanda mu 2018 ndetse no mu 2019, FLN yaciwe intege ku buryo bukomeye n'ifatwa rya bamwe mubayobozi bayo ndetse bakanagezwa imbere y'ubutabera bw'u Rwanda. Kuva icyo gihe FLN yacitsemo ibice 3 aho bikigaragara mubice bya Uvira na Fizi muri Congo ndetse n'i Burundi aho bakomeje ibikorwa byabo.

UMUBANO W'IGIHE KIREKIRE N'UMU JENERALI WA CONGO UYOBORA WAZALENDO.

Muri agenda ya Kanziga aho yandikaga amakuru ye, habonetsemo indi nkuru kandi itari ntoya na gato.Yagaragaje ko umugore w'uwahoze ari perezida, yaratunze numero ya telephone y'umusirikare mukuru mu ngabo za Congo. Uyu ni General Janvier Mayanga wa Gishuba.

General Mayanga yari mu batangije imitwe yitwaje intwaro y'abahutu i Masisi muri Kivu y'amajyaruguru mu 1993

Nyuma yo gusubizwa mu gisirikare cy'igihugu cya Congo, aho yabaye umwe mu ba Hutu bafite ipeti ryo hejuru, Mayanga yagize uruhare rukomeye mu gushyigikira umutwe witwajwe intwaro wari ugizwe ku bwinshi n'abahutu witwa PARECO hagati y'imyaka ya 2007 na 2009. Igice kimwe cya PARECO gifatanyije n'ingabo za leta kimwe na FDLR barwanyije kuburyo bukomeye CNDP ari nayo yaje kuvamo M23 y'ubu.

Mubuzima bwe, Janvier Mayanga wa Gishuba yagiye aba umuntu wa hafi wa w'umutwe wa FDLR aho ndetse mu bihe bitandukanye ni ukuvuga mu 2008 no mu 2009, inzobere z'umuryango w'abibumbye kuri Congo zabwiye akanama k'umutakano ka LONI ko Mayanga akorana bya hafi na FDLR. Uyu mugabo akaba yarashinjwaga gutera inkunga uyu mutwe muburyo bugaragara.

Mu kwezi kwa 12 mu 2023, Perezida wa Repubulika ya Demokorasi ya Congo, Felix Antoine Tshisekedi yagize Genarali Janvier Mayanga, umuhuzabikorwa ushinzwe ubutasi ku rwego rw'igihugu w'ihuriro ry'imitwe yitwajwe intwaro ryiswe Wazalendo. Biciye mu iteka rya perezida, aba bitwaje intwaro biswe Wazalendo bahawe kuba inkeregutabara z'igihugu, mubagizwe Wazalendo hakaba harimo FDLR ndetse n'abayikomokaho aribo Nyatura. Kuva muri Gashyantare 2025, ingabo za leta na Wazalendo batsinzwe na M23 bava muri Goma na Bukavu, General Mayanga n'ingabo ze ubu baherereye Uvira, ahabaye himukiye ibiro by'intara ya Kivu y'Amajyepfo.

Ubwo intambara yadukaga muri za Kivu mu 2022 ndetse na leta ya Congo igahitamo gukoresha inzira ya politike ishaje yo gukoresha amacakubiri, urwango n'ivangura, abahoze mu butegetsi bwo mu Rwanda babonye ari amahirwe batakitesha.

Amakuru African Facts ikesha isoko yayo yizewe ariko kandi yanemejwe n'inzego z'umutakano mu karere, avuga ko Jean Luc Habyarimana mu ibanga rikomeye yasuye Kinshasa hagati mu kwezi kwa 6 mu 2024. Amakuru akavuga ko yahuye n'abahafi ba perezida  wa Congo ndetse anabonana n'abayobozi mu nzego z'umutakano za Congo. Nubwo bitoroshye ku menya icyo Jean Luc Habyarimana yaganiriye n'inzego yahuye nazo, ntawakirengagiza uruhare agira mukuvugira FDLR ku mbuga nkoranyambaga.

Nyuma y'ukwezi kumwe Jean Luc Habyarimana asuye Kinshasa yakurikiwe n'inkuru idasanzwe aho inyandiko z'ibanga zanditswe muri Kanama 2024 zagiye hanze. Izi zikaba zaranditswe n'ibiro by'umukuru w'igihugu cya Congo aho azasabaga ko abantu 6 bahamijwe n'urukiko mpuzamahanga mpanabyaha kugira uruhare muri genocide, bakemererwa kujya kuba muri Congo Kinshasa. Umwe muri abo ni Protais Zigiranyirazo, Nyirarume wa Jean Luc Habyarimana na Capt Sagahutu washatse kujya muri FDLR mu 2017 umugambi we ugapfuba. Nyuma yuko uyu mugambi ibyawo bigeye hanze, Leta ya Congo yahagaritse iyi gahunda.

African Facts yacukumbuye iyi nkuru ivuga ko kuvugana na Janvier Mayanga na Jean Chrysostome Nyirurugo bitayikundiye.Yagerageje  kuvugana na Agathe Kanziga n'abahungu be Leon na Jean Luc Habyarimana. Muri bose ntanumwe wifuje kuvuga. Undi muhungu wa Kanziga we yayibwiye ko bavugana n'abunganizi babo mu matageko. African facts yabandikiye ibibazo byayo ariko nabo ntibayisubiza. Igendeye kubyo yavumbuye, yoherereje amajwi Aloys Ntiwiragabo, imusaba ko bagirana ikiganiro. Ntabwo yigeze abusibiza. Umunyamategeko we yabasabye kureka gutesha umutwe umukiriya we.

Iyi ni inkuru ya African Facts.

Ibi ni bimwe mu biri gukorwa n'Umuryango Never Again Rwanda, uharanira kubaka amahoro, wahuguye abayobozi b'inzego z'ibanze mu turere dukora ku mipaka harimo Rubavu, Huye, Gisagara, Nyagatare na Kayonza, hagamijwe gufasha abayobozi guhangana n'ibikomere by'ihungabana bifite imizi kuri Jenoside, n'amakimbirane akomeje kugaragara mu karere.

Ubushakashatsi bwa Never Again Rwanda bwo mu 2021 bugaruka ku ngaruka za Jenoside yakorewe Abatutsi n'amakimbirane ziteza mu miryango bwagaragaje ko 42% by'abantu bakigira ihungabana, biturutse ku kuba barabuze imiryango, abavandimwe n'inshuti zabo.

Ni mu gihe kandi mu miryango yose, igera kuri 19,9% ikibamo amakimbirane cyangwa gutotezanya gushingiye ku moko, naho 19,2% bahura n'ivangura rishingiye ku moko.

Umuyobozi ushinzwe ibikorwa byo kubaka amahoro mu muryango Never Again Rwanda, Claver Gatabazi, yavuze ko abaturage bo mu bice bituriye imipaka bakiri mu kaga ko kugirwaho ingaruka n'ingengabitekerezo ya Jenoside n'amagambo y'urwango akwirakwizwa n'Ibihugu by'abaturanyi, birimo Repubulika Iharanira Demokarasi ya Congo ndetse n'u Burundi.

Ati 'Abayobozi b'inzego z'ibanze bakeneye kumva neza ihungabana n'ibibazo by'ingaruka za jenoside bifite imizi mu mateka yacu, kuko hakiri ingengabitekerezo n'imvugo z'urwango byabase abaturage kandi ntihabura bamwe mu bayobozi bakibifite niyo mpamvu tubahugura ngo babanze gukira babone kujya gukiza abandi, kandi bizafasha abaturage kubaho batekanye.'

Yakomeje avuga ko abantu bashukwa babwirwa imvugo z'urwango batagakwiriye kubyizera, ngo bemere ibyo babwirwa na FDLR kandi bari mu gihugu.

Umukozi ushinzwe imiyoborere myiza mu Murenge wa Cyanzarwe, Hasingizwe Thierry ati 'Turacyakira bamwe mu baturage bagaragaweho n'ingengabitekerezo ya Jenoside ariko imibare igenda igabanyuka, n'abaturage babwira bagenzi babo imvugo zuzuyemo urwango, rero amahugurwa twahawe yatweretse aho tugomba gushyira imbaraga mu bukangurambaga bwa Ndi Umunyarwanda.'

Yakomeje avuga ko kuri ubu bashishikajwe no kwigisha abaturage uko baba umwe.

Mu gihe cy'iminsi 100 yo Kwibuka Jenoside yakorewe Abatutsi mu 1994, mu Karere ka Rubavu abaturage bahuye n'ihungabana bari 92, abagera kuri 59 bafashirijwe kuri site barataha mu gihe abafashirijwe mu bigo by'ubuvuzi muri rusange ari 33, naho abandi 15 bagezwa mu bitaro bya Gisenyi.

Bamwe mu bayobozi b’inzego z’ibanze mu Karere ka Rubavu bahuguwe ku guhangana n’ingengabitekerezo ya Jenoside yakorewe Abatutsi

Ni ikibazo cyamenyekanye tariki 12 Kanama 2025, ubwo Umuyobozi w'Akarere ka Rusizi, Sindayiheba Phanuel yari yasuye Akagari ka Murya, Umurenge wa Nzahaha ari naho iryo shuri riherereye.

Ubwo hari hagezweho umwanya wo kwakira ibibazo by'abaturage umwe mu baturage yavuze ko nk'ababyeyi bafite ikibazo cy'uko Umuyobozi w'Ishuri rya Ruhoko, Muhirwa Jean de Dieu asaba ababyeyi icyangombwa kivuye ku murenge kugira ngo yandike umunyeshuri mushya.

Ni ikirego Muhirwa yemeye atazuyaje, avuga ko yatanze itangazo rivuga ko ikigo cyatangiye kwandika abanyeshuri bashya bifuza kuhiga mu mwaka w'amashuri 2025-2026, bari hagati y'imyaka 4 n'imyaka 5 baza ari benshi cyane kandi asanganywe ikibazo cy'ubucucike mu mashuri.

Ati 'Maze kwandika abana 212 nashatse amakuru menya ko ibigo duturanye birimo Nyagahanga na Rwinzuki nta kibazo cy'ubucucike bifite. Mu kwikingira ikibaba ntangira gusaba ababyeyi ko ukeneye ko nandika umwana we azana icyemezo kivuye ku Murenge kimpa uburenganzira bwo kwandika umwana we'.

Umukozi ushinzwe uburezi mu Murenge wa Nzahaha, Imani Jotham yavuze ko impamvu ababyeyi benshi bajyana abana babo kuri GS Ruhoko kandi ibigo bituranye nayo bifite abanyeshuri bake ari uko kuri GS Ruhoko bigisha neza kurusha amashuri baturanye.

Ati 'Icyo umuyobozi w'ishuri atasobanuye neza, ni uko mu myaka ibiri ishize iki kigo cyahawe kwigisha abanyeshuri muri gahunda y'uburezi bw'ibanze bw'imyaka 9 (9YBE) ariko nticyubakirwe ibyumba bishya'.

Umuyobozi w'Akarere ka Rusizi, Sindayiheba Phanuel yashimiye ishuri rya GS Ruhoko ko rikora neza kurusha ayo bituranye asaba Umuyobozi wa GS Ruhoko gukomeza kwandika abanyeshuri.

Ati “Uyu muyobozi w'ishuri icyo twamusabye ni ugukomeza kwandika abana bose bageze igihe cyo kujya ku ishuri, hanyuma nitumara kubona umubare w'abana bose, tuzafatanya kureba andi mashuri ari hafi abana bayaturariye bashobora kujya kwigaho ariko nitubona umubare ukomeje kwiyongera, muri uyu mwaka w'ingengo y'imari hari ibyumba bike byateganyijwe kubakwa tuzabashyira mu bihutirwa kugira ngo twongere umubare w'ibyumba by'amashuri”.

Umwaka w'amashuri 2024/2025 warangiye mu Karere ka Rusizi habarurwa ibigo 175 byigaho abanyeshuri barenga ibihumbi 164, barimo ibihumbi 24 biga mu mashuri y'inshuke.

Ishuri rya GS Ruhoko ryigaho abanyeshuri 1213 bigira mu byumba 19, bivuze ko mpuzandengo icyumba cy'ishuri kigiramo abanyeshuri 63 mu gihe batakagombye kurenga 45.

Meya Sindayiheba yakebuye umuyobozi w'i Rusizi wahagaritse kwakira abanyeshuri kubera ubucucike

Ibi yabigarutseho kuri uyu wa Gatatu tariki ya 13 Kanama 2025, ubwo yifatanyaga n'urubyiruko rwo mu Karere ka Rwamagana kwizihiza Umunsi mpuzamahanga w'urubyiruko. Ni umunsi wabanjirijwe n'imurikabikorwa no kwerekana impano by'urubyiruko rwo muri aka karere.

Umutoni Sandrine yavuze ko u Rwanda rukomeje kubakira ubushobozi Abanyarwanda hibandwa ku rubyiruko, kugira ngo bagire uruhare rufatika mu kugeza u Rwanda ku ntego z'icyerekezo 2050 rwihaye.

Ati 'Iyo tuvuga iterambere rirambye, ni mwe tuba duhanze amaso. Gutera imbere kw'Igihugu bigirwamo uruhare runini n'abaturage bacyo bose ariko kuramba kw'iryo terambere bikenera urubyiruko, rwiteguye gukomereza aho bakuru babo baba bagejeje. Ibi rero kubigeraho bisaba ubufatanye bw'inzego zose, ariko by'umwihariko bigakenera ubushake bw'urubyiruko rwiyemeza kwagura inzozi zabo bagahanira no kuzigeraho uko byamera kose.''

Umutoni yavuze ko kwizihiza umunsi mpuzamahanga w'urubyiruko ari umwanya mwiza wo kongera gusubiza amaso inyuma hakishimirwa uruhare rugira mu buzima bw'Igihugu, haba mu nzego z'imirimo ya Leta n'iy'abikorera, mu nzego z'umutekano, mu nganda z'ubuhanzi, siporo n'ahandi.

Ati 'Twizeye ko umusanzu wanyu uzakomeza kwiyongera muhanga ibishya byinshi mu iterambere ry'ikoranabuhanga rigezweho, mutanga ibisubizo mu guhangana n'imihindagurikire y'ibihe mu gufata ibyemezo no kugira uruhare muri politiki zishyigikira iterambere ryanyu n'iry'Igihugu muri rusange.''

Nyirarukundo Dorcas uri guhugurwa mu bijyanye n'ikoranabuhanga muri Girls Tech, yavuze ko impanuro za Umutoni bazakiriye neza kuko ikoranabuhanga iyo urikoresheje neza rikubyarira inyungu.

Ati 'Nk'ubu aho natangiriye kwiga gukoresha ikoranabuhanga bya kinyamwuga, nsigaye nkorera abantu impapuro z'ubutumire bakanyishyura, nsigaye mfasha abantu gushaka serivisi ku Irembo. Ibyo byose namenye kubikoresha mu mezi make, ubu rero ngiye gushyira imbaraga mu gukoresha AI ariko mu buryo nayibyaza umusaruro.''

Mutoni Sandrine ukora mu bijyanye no kuhira imyaka, yavuze ko yifuza kubikoreshamo ikoranabuhanga mu gufasha abaturage kuhirira imyaka yabo neza.

Ati ''Turifuza no kugerageza uburyo bwo kuhirira imyaka umuntu adahari, igihingwa cyakenera amazi rya koranabuhanga rikikoresha ibihingwa bikabona amazi, turi kubigerageza nubwo bitari byakunda.''

Umunsi mpuzamahanga w'urubyiruko mu Karere ka Rwamagana waranzwe n'imikino ndetse n'imbyino zinyuranye z'urubyiruko, bataramiwe kandi n'umuhanzi Danny Nanone.

Minisitiri Umutoni yatangije imikino y'abana muri Rwamagana

Minisitiri Umutoni yanakurikiranye amasomo ari guhabwa abana mu biruhuko

Minisitiri Umutoni yasabye urubyiruko kwifashisha ikoranabuhanga mu guhanga ibishya

Ni ingingo yagarutseho ku wa 13 Kanama 2025 ubwo yari mu Karere ka Muhanga mu bukangurambaga bwa Gerayo Amahoro. Bwahuje abasaga 1500 bakorera mu bice bitandukanye bigize aka karere.

Hibanzwe ku kwibutsa abakora uyu mwuga wo gutwara abagenzi kuri moto; imyitwarire ikwiye kubaranga mu kazi kabo ka buri munsi mu rwego rwo kugahesha agaciro; bakoresha neza umuhanda, bagira isuku, ikinyabupfura no koroherana n'abandi basangiye umuhanda.

CSP Vincent Habintwari yashishikarije abamotari gucika burundu ku makosa akunze kubagaragaraho rimwe na rimwe akabateza impanuka za hato na hato.

Ati “Abatwara moto murabizi ko akenshi mukunze kwibasirwa n'impanuka cyane cyane ko muhura n'ibinyabiziga binini nk'amakamyo, ariko na none hari aho usanga bituruka ku makosa mukora nko kwiseseka mu bindi binyabiziga, kunyura mu cyerekezo kitari cyo, gutwara imizigo ibangamira urujya n'uruza n'ibindi. Aya makosa mugomba guca ukubiri nayo kugira ngo hirindwe impanuka zishobora kubavutsa ubuzima cyangwa zikabakomeretsa.”

CSP Habintwari yongeyeho ko umwuga bakora ari umwuga mwiza kandi utunze abanyarwanda benshi, ari nayo mpamvu bakwiye kuwukora bafite intego, bagatanga serivisi nziza ku babagana, bagira isuku, ubwishingizi, perimi, birinda guhisha pulake cyangwa guhindura imibare n'inyuguti zazo no kuzirikana kwambara umwambaro ubaranga.

Umuyobozi w'Akarere ka Muhanga, Kayitare Jacqueline, yashimiye abakora umwuga wo gutwara abagenzi kuri moto, kuba bitabira gahunda z'ibikorwa rusange by'iterambere, abasaba gukomeza gufata neza ibikorwaremezo no kwimakaza umuco wo kwitabira gahunda y'ubwisugane mu kwivuza.

Yashimiye Polisi y'u Rwanda ku mikoranire n'ubufatanye, asaba abakora umwuga wo gutwara abagenzi kuri moto bo mu Karere ayobora, kugaragaza uruhare rwabo mu gukumira impanuka zo mu muhanda n'imikorere myiza kugira ngo babashe kwiteza imbere, abasaba kandi kudapfusha ubusa aya mahirwe, barushaho kubahiriza ibyo basabwa mu rwego rwo kurinda ubuzima bwabo n'ubw'abandi basangiye umuhanda.

Umuyobozi w’Akarere ka Muhanga, Kayitare Jacqueline, yashimiye abakora umwuga wo gutwara abagenzi kuri moto

CSP Vincent Habintwari yaburiye abamotari biseseka mu bindi binyabiziga

Mu gice cya mbere cy'uku kwezi, hagati ya tariki ya 1-10 Kanama, mu bice bitandukanye by'igihugu haguye imvura nyinshi ugereranyije n'ikigero cy'impuzandengo y'imvura isanzwe igwa muri aya matariki, nubwo igipimo cy'ubushyuhe ari igisanzwe kimenyerewe muri ayo matariki.

Mu gice cya kabiri cy'ukwezi kwa Kanama 2025, hagati ya tariki 11-20, mu Rwanda hateganyijwe ibihe by'izuba risanzwe ry'impeshyi. Ubushyuhe bwo hejuru buteganyijwe buzaba buri hagati ya dogere Celcius 20 na 31 mu gihe ubushyuhe bwo hasi buzaba buri hagati ya dogere Celcius 7 na 17.

Ubu bushyuhe buteganyijwe buri ku gipimo cy'ubushyuhe busanzwe buboneka mu gice cya kabiri cy'ukwezi kwa Kanama.

Icyakora byitezwe ko hazagwa imvura mu bice bimwe na bimwe by'igihugu, ndetse imvura iteganyijwe iri hagati ya milimetero 0-50 mu bice bitandukanye by'igihugu.

Iyi mvura iri hejuru gato y'ikigero cy'impuzandengo y'isanzwe igwa muri iki gice ikunze kuba iri hagati ya milimetero 0-40.

Imvura iteganyijwe izaturuka ku bwiyongere bw'ubuhehere bw'umwuka buturuka ahanini ku miyaga iva mu burengerazuba bw'Inyanja y'u Buhinde yerekeza mu Karere u Rwanda ruherereyemo. Hateganyijwe ko aho imvura izagwa, iminsi izagwamo izaba iri hagati y'iminsi ibiri n'ine bitewe n'imiterere ya buri hantu.

Ubushyushye buziharira igice cya kabiri cya Kanama

Iyi gahunda yatangijwe kuri uyu wa Kabiri tariki ya 12 Kanama 2025 itangirira mu Murenge wa Mushikiri ahakemuwe ibibazo 20 by'abaturage. Muri iyi gahunda buri Murenge wagenewe iminsi ibiri, aho abayobozi bose bazajya bamanuka bafatanye mu gukemura ibibazo byose ndetse banaganirize abaturage bamenye ibikorwa bakeneye kugira ngo ako gace gatere imbere.

Umuyobozi w'Akarere ka Kirehe, Rangira Bruno, yabwiye IGIHE ko iyi gahunda ari uburyo bwabo bari gukoresha mu kwegera abaturage no kubakemurira ibibazo bamwe baba bafite.

Ati ''Muri iyi gahunda ahantu hari ibibazo hose, yaba ibibazo byo mu miryango, ibirebana na serivisi byose turi kubiganiraho tukabishakira ibisubizo kuko turashaka ko byose bikemurwa. Ibidakemuwe turahava tubihaye umurongo byakemurwamo.''

Meya Rangira yakomeje avuga ko bari kuganiriza abaturage bakanamenya ibijyanye n'iterambere bifuza,imibereho yabo n'ibindi byose. Yavuze ko kandi bari gufata umwanya bakaganiriza imiryango iri ku rutonde rw'abaturage bakennye n'uburyo bagira uruhare mu kwikura mu bukene.

Uyu muyobozi yavuze ko iyi gahunda itandukanye n'uburyo bajyaga bakoresha mu kwifashisha inteko z'abaturage mu gukemura ibibazo ahubwo ko ari gahunda bishyiriyeho muri aka Karere, izajya iba buri mwaka. Abayobozi bagasanga abaturage aho batuye hagamijwe kubakemurira ibibazo.

Uwihirwe Marie Claire yavuze ko byabanejeje kubona abayobozi bose bamanuka bakaza kubatega amatwi no kubakemurira ibibazo bidasabye ko babasanga mu biro.

Yagize ati ''Baje bareba uko umuturage abayeho, twabaganirije natwe turisanzura. Icyo nabwira ubuyobozi bwacu ni uko iyi gahunda yakomeza tukababwira imbogamizi tugira bakaba bazidufashamo no kuzikemura.''

Ntakirutimana Eugene we yashimiye ubuyobozi bwabegereye bukanabakemurira ibibazo bikomeye bari bamaranye igihe, yavuze ko nubwo hari ibitakemuwe byahawe umurongo ku buryo bizeye ko nabyo bizakemuka.

Kugeza ubu Akarere ka Kirehe gafite abaturage bari mu bukene 24 532.Muri iyi gahunda ya shyashyanira umuturage, abayobozi bari kuganiriza aba baturage bakennye bakarebera hamwe amahirwe babona yabafasha mu kwikura mu bukene babigizemo uruhare.

Abayobozi b'Akarere ka Kirehe ndetse n'abo mu nzego z'umutekano bitabiriye gahunda ya Shyashyanira umuturage

Abaturage ba Mushikiri bishimiye kwegerwa n'abayobozi bari kubafasha gukemura ibibazo birimo iby'ubutaka n'amakimbirane yo mu miryango