Blog

Uyu mukecuru witwa Bucyangenda Consolate yabwiye RADIOTV10 ko atewe impungenge n’umutekano we kuko abaturanyi be bakomeje kumushinja amarozi, akaba afite impungenge ko bamugirira nabi.

Uyu mukecuru uvuga ko akomeje gutotezwa yitwa umurozi bimubangamiye kuko kuva yabaho atazi nuko uburozi busa, akavuga ko ababimushinja babiterwa n’ishyari bamugirira.

Ati 'Niba umuntu azira ngo yibeshejeho, simbizi.'

Avuga ko atazi aharutse ibi ashinjwa byo kumwita umurozi, ati 'Nta muntu ndica ngo bamugaragaze ngo namwishe ariko buri gihe uwo mvuganye na we ngo ndi umurozi.'

Avugana umujinya mwinshi aterwa n’ibi birego kuko bimuhungabanya mu mutwe akagenda yumva adatuje, ndetse ko na we amaze kumva abirambiwe.

Ati 'Buri gihe uwo mvuganye na we ngo 'ndi umurozi’, umuntu uzongera kubimbwira nzamukubita umuhini mu mutwe njye bajye kumfunga.'

Bamwe mu baturanyi b’uyu mubyeyi bavuga ko na bo batazi ahaturutse ibihuha by’abamwita umurozi kuko baturanye kuva cyera kandi bakaba batamuziho iyi ngeso mbi.

Umwe muri bo yagize ati 'Narabyumvise, si rimwe si kabiri, ni kenshi babimubwira kandi njye mu buzima bwanjye nta muntu nzi yaroze kuko uyu mudamu twariganye ariko ubwo burozi simbuzi, sinzi impamvu babimutoteza.'

Impuzamiryango Iharanira Uburenganzira bwa muntu mu Rwanda (CLADHO ivuga ko nta muntu n’umwe ukwiye guhabwa akato cyangwa ngo ahohoterwe bamutwerera amarozi kuko amarozi afite uburyo apimwa n’abahanga kandi uhamijwe icyaha akagihanirwa.

Evariste Murwanashyaka ukora muri iyi mpuzamiryango agaruka ku bijya byitwazwa na bamwe mu baturage bashinja umuntu amarozi.

Ati 'Ukumva ngo 'kuri uriya mukecuru ni ku murozi’ ngo 'afite umuvumu uhamaze igihe kinini cyane’ ngo 'ni umukecuru ureba ukuntu’ ariko mu byukuri iyo urebye uba ubona nta shingiro bifite.'

Evariste Murwanashyaka wemeza ko hari bamwe mu bitwa abarozi bitewe n’impamvu zitandukanye zirimo 'munyangire’, avuga ko abahoza abantu nk’aba ku nkeke baba bakwiye kubihanirwa kuko hari ababahohotera ndetse bakanababwira amagambo akomeretsa.

Nyuma yuko ikipe ya Espoir FC itandukanye n’uwari umutoza wayo Gatera Musa, ariko ikavuga ko ishobora kumukurikirana kubera kuba ngo yaragiye yakira (…)

Ni cyo gice cyonyine cy’umubiri cyari gisigaye cy’uyu wabaye Minisitiri w’intebe wa mbere wa Congo, wishwe mu mwaka wa 1961 n’inyeshyamba zifatanyije n’abacanshuro b’Ababiligi, umubiri we ugashangurwa muri aside (acide).

Mbere, iri ryinyo rizajya mu mujyi yavukiyemo, wiswe Lumumbaville mu kumuha icyubahiro, nuko rijye i Kisangani, aho yatangiriye kuba impirimbanyi ya politiki, nyuma rijye i Lubumbashi, aho yiciwe.

Isanduku irimo iryo ryinyo nyuma yaho izashyirwa mu buruhukiro mu murwa mukuru Kinshasa, mbere yuko ku wa kane w’icyumweru gitaha Congo yizihiza imyaka 62 ishize ibonye ubwigenge.

Ibi byabereye mu ishyamba rya Kibira rifatanye n’irya Nyungwe ryo mu Rwanda muri komini Mabayi aha ni muntara ya Cibitoki, mu majyaruguru y’Iburengerazuba bw’u Burundi.

Abantu icumi barapfuye abandi benshi barakomereka mu mirwano hagati y’abasirikare n’inyeshyamba bavuga Kinyarwanda, mu gasozi ka Kibira, muri komini ya Mabayi mu ntara ya Cibitoke (mu majyaruguru y’uburengerazuba bw’u Burundi).

Imirwano ikaze yabaye mu minsi itatu ishize ku misozi ya Rutorero na Gafumbeti mu gace ka Butahana ko muri komini ya Mabayi mu ntara ya Cibitoke mu majyaruguru y’uburengerazuba bw’igihugu. Iyi mirwano yahitanye abantu icumi abandi umunani bo kuruhande rw’inyeshyamba barakomereka.

Nkuko byemezwa n’ingabo z’u Burundi kuri iki cyumweru nimugoroba, inyeshyamba za FLN zagaruriwe muri metero nkeya uvuye ku mupaka w’u Rwanda n’u Burundi.

Iyi mirambo rero biragaragara ko ari inyeshyamba za FLN, zishwe n’ingabo z’u Rwanda zirinda umupaka.

Bagaragaza kandi ko izi nyeshyamba za FLN zimaze igihe kinini zarashinze ibirindiro ku muozi wa Kibira ku ruhande rw’u Burundi muri Komini ya Mabayi na Bukinanyana iherereye mu Ntara ya Cibitoke aho baba bashaka kwinjira mu Rwanda.

Icyakora ntibashobora kwinjira mu Rwanda kuko buri gihe bahagarikwa n’abasirikare bacunga umutekano bo mu Rwanda. Igitangaje ni uko izo nyeshyamba zigaba ibitero kandi zikica mu Burundi.

Umusirikare mukuru mu ngabo z’u Burundi yatangarije abaturage ko biyemeje kurwanya izi nyeshyamba mbere y’uko zongera guhungabanya umutekano w’abaturage.

Amakuru aturuka muri Cibitoke, avuga ko izi nyehyamba zinjira mu Burundi mu ishyamba rya Kibira ziturutse muri Repuburika Iharanira Demukarai ya Congo ubundi zikazajya ziba abaturage ibyabo.

Umuyobozi wa Mabayi arasaba abaturage kongera ubushishozi no kwamagana ibikorwa byose biteye inkeke bikorwa n’inyeshyamba.

Ni ubwa mbere umuntu wo mu Muryango w'Ibwami mu Bwongereza yasuye u Rwanda. Ni uruzinduko rwabaye Igikomangoma Charles gihagarariye Umwamikazi Elizabeth wa II mu Nama ya CHOGM iri kubera mu Rwanda.

Igikomangoma Charles ni we uzaragwa ingoma mu gihe Umwamikazi Elizabeth II azaba atanze. Yageze mu Rwanda ku mugoroba wo ku wa Kabiri, tariki 21 Kamena 2022.

Ku munsi we wa mbere w'akazi, nyuma y'ibiganiro yagiranye na Perezida Kagame, yasuye Urwibutso rwa Jenoside rwa Kigali ruri ku Gisozi, ashyiraho indabo ndetse yunamira inzikarengane zirenga ibihumbi 250 zirushyinguyemo.

Igikomangoma Charles yari yambaye imyenda isa na kaki mu gihe Camilla w'imyaka 74 we yari yambaye ikanzu irimo amabara n'amaherena yakozwe n'uruganda rwo mu Bufaransa rwa Van Cleef & Arpels n'ibikomo bya Alhambra byose bifite agaciro kabarirwa ibihumbi bine by'ama-pound.

Nyuma yo gusobanurirwa amateka yagejeje u Rwanda kuri Jenoside yakorewe Abatutsi n'uko yahagaritswe, Igikomangoma Charles yavuze ko ibyabaye biteye agahinda.

Umugore we yavuze ko ibyabaye, bigaragaza ibyo ikiremwamuntu gishobora gukora.

Ku rwibutso, yahahuriye n'abapfakazi ba Jenoside, bamutekerereje ubuzima banyuzemo. Barimo nka Uzamukunda Walida wamusangije ubuhamya bw'uburyo Interahamwe zamufashe ku ngufu.

Bamushimiye ku bw'urugendo rwe, bamugaragariza ko barenze amateka mabi uyu munsi biyubatse kandi bafite intego z'ejo hazaza. Bamushyikirije impano y'igiseke, nko kumushimira.

Freddy Mutanguha wasobanuriye Igikomangoma Charles n'umugore we amateka ya Jenoside, yababwiye ko na we yayirokotse ariko ko aramutse abaze abantu bo mu muryango we bishwe, bagera kuri 80.

Avuye ku Rwibutso rwa Kigali ku Gisozi, yagiye ku rwa Nyamata mu Bugesera ahiciwe Abatutsi bari bahungiye mu rusengero. Urugezemo ubasha kubona n'amaso, imyambaro bari bambaye, indangamuntu za bamwe, ibikomo n'ibindi.

Ubutumwa Igikomangoma Charles yasize muri uru rwibutso bugira buti 'Tuzahora twibuka inzirakarengane zazize Jenoside yakorewe Abatutsi muri Mata 1994.''

I Nyamata mu gihe cya Jenoside hahungiye Abatutsi 10.000, hari urusengero bari bizeye gukiriramo.

Uru rusengero rwahindutse rumwe mu nzibutso esheshatu ziri mu Rwanda, ruruhukiyemo imibiri y'inzirakarengane irenga 45.000.

Igikomangoma Charles wari uherekejwe n'abayobozi mu nzego zitandukanye barimo Minisitiri w'Ubutegetsi bw'Igihugu, Gatabazi Jean Marie Vianney; uw'Ubumwe bw'Abanyarwanda n'Inshingano Mboneragihugu, Dr Bizimana Jean Damascéne na Meya wa Bugesera, Mutabazi Richard, yasuye 'Umudugudu w'ubumwe n'ubwiyunge' utuyemo abakoze Jenoside n'abo biciye none ubu babanye neza mu mahoro.

Yashimye imbaraga zo kubabarira zaranze abatuye muri uyu mudugudu uri mu Mudugudu wa Rwimikoni, Akagari ka Mbyo mu Murenge wa Mayange nubwo banyuze mu bihe bikomeye kandi bishaririye.

Urugendo rwe mu Bugesera, Igikomangoma Charles yarusoje asura umushinga wo gutera ibiti bivangwa n'imyaka hagamijwe guteza imbere imibereho myiza y'abaturage uzwi nka 'Agroforestry for Livelihoods'.

Uyu mushinga ufasha mu kurwanya imyuka ihumanya ikirere ushyirwa mu bikorwa n'Umuryango Albertine Rift Conservation Society (ARCOS Network) uharanira kubungabunga ibidukikije no guteza imbere imibereho myiza y'abaturage mu bihugu bihurira ku muhora wa Albert (Albertine Rift) ku bufatanye na Leta y'u Rwanda binyuze muri Minisiteri y'Ibidukikije n'ibigo biyishamikiyeho harimo icy'Amashyamba (RFA) n'icyo kurengera Ibidukikije (REMA), Uturere twa Rulindo na Bugesera n'abandi bafatanyabikorwa batandukanye, ku nkunga y'abashoramari bo mu Bufaransa bitwa Livelihoods Funds.

Perezida Kagame yakiriye Igikomangoma Charles

Yasuye Urwibutso rwa Jenoside rwa Kigali

Igikomangoma Charles yanunamiye inzirakarengane za Jenoside i Nyamata

Yakozweho n'ubuhamya bw'inzira y'ubumwe n'ubwiyunge yasangijwe n'abo muri Mbyo

Urugendo rwe mu Bugesera yarusoje asura imishinga yo kurengera ibidukikije

---

Gufungura ibiro muri Afurika byiswe Coventry University – Africa Hub, byahuriranye n'Inama yiga ku bucuruzi nk'imwe mu ziherekeje iy'Abakuru b'Ibihugu na za Guverinoma bigize Umuryango w'Ibihugu bikoresha Icyongereza (CHOGM), Commonwealth Business Forum.

Umuyobozi wa Coventry University – Africa Hub, Prof Silas Lwakabamba, yavuze ko gufungura ku mugaragaro ari intambwe ikomeye bateye.

Yagize ati “Ni intambwe ishimangira urugendo rwatangiye muri Mata 2020, ubwo Coventry University yatangizaga Africa Hub i Kigali mu Rwanda, kugira ngo habe igicumbi cy'ibikorwa byayo muri Afurika yo Munsi y'Ubutayu bwa Sahara, no kubaka ubufatanye n'izindi nzego.”

Umwe mu bitabiriye iki gikorwa, John Bosco Kalisa, uyobora East African Business Council, yagarutse ku bushakashatsi bwakozwe n'Ikigo PwC mu 2019.

Nibura 79% byagaragaje ko hari icyuho mu bumenyi mu bakozi, aho ubushobozi bavana muri za kaminuza budahagije, urebye ubukenewe ku isoko ry'umurimo.

Yabajije niba hari umusanzu Coventry University izatanga muri uru rugendo.

Umuyobozi wa Coventry Unoversity, Prof John Latham, yavuze ko urebye mu mirimo itandukanye, ubumenyi bukenewe bitoroshye ko hose bugerwaho mu bantu bakiva mu mashuri, kubera ko usanga imyigishirize idahuye n'ibyo ibigo bitanga akazi bikeneye.

Yakomeje ati “Kimwe mu bintu by'ingenzi cyane kuri Coventry University ni uko tuje gukorera mu karere, aho ari ingenzi kuvugana n'abakora mu nganda zitandukanye, urugero nko mu Rwanda, tukavugana na RwandAir ku bikenewe mu kuzamura ubumenyi.”

Yavuze ko bamaze igihe bakorana na Emirates Aviation University muri Dubai, bagatanga impamyabumenyi za Coventry University binyuze muri gahunda z'amasomo zishyirwaho, zijyanye n'ibikenewe ku isoko.

Yakomeje ati “Urwego rw'indege ni rumwe mu zo dukoramo cyane, kandi niba dushobora kubikora muri Dubai, dushobora no kubikora hano mu Rwanda, dushobora kubikora n'ahandi henshi. Icy'ingenzi ni ukumva ibikenewe kugira ngo ubashe gukora ibishakwa n'inzego zo hanze aha.”

Yavuze ko bifuza gukorana n'inzego za Leta n'iz'abikorera, bakazagenda bashyiraho gahunda z'amasomo zijyanye n'ibikenewe ku isoko, mu buryo bw'umwuga.

Prof Lwakabamba yavuze ko batazaba bafite icyicaro bakoreramo mu kwigisha cyangwa gukora ubushakashatsi nk'amashuri asanzwe ya kaminuza, ahubwo bazaba ari nk'abahuza ba za guverinoma, inganda, kaminuza n'ibigo by'ubushakashatsi.

Muri icyo gihe ngo umunyeshuri azaba ashobora kujya kujya kwigira muri Coventry University mu Bwongereza cyangwa akigira aho ari.

Yakomeje ati “Nk'urugero turifuza gukorana na Kaminuza y'u Rwanda, aho duteganya gutangiza porogaramu z'amasomo zitandukanye cyane cyane nko mu buvuzi na Engineering, aho umunyeshuri narangiza amasomo azaba ashobora kubona impamyabumenyi ebyiri, iya Kaminuza y'u Rwanda n'iya Coventry. Iyo ni gahunda dufite.”

“Icya kabiri ni ikijyanye n'ubushakashatsi, aho Coventry University imaze gutera intambwe. Icyo dukora ni ugushaka abafatanyabikorwa bagakora ku mishinga itandukanye mu bushakashatsi ishobora kuzana impinduka haba mu buvuzi, ibidukikije, ubuhinzi, ubumenyi n'ikoranabuhanga, tukahuza n'abahanga bo muri Coventry University. Icya gatatu ni ikijyanye no gufasha inganda.”

Ubwo bufatanye n'inganda ngo bufasha mu kuzamura no guhindura imikorere yazo hagendewe ku cyo zikeneye.

Prof Lwakabamba yakomeje ati “Icya kane, ni ugufasha abanyeshuri bacu, bakarushaho guhitamo inzira bifuza. Urebye muri Coventry University, abanyeshuri baho bose, kubera ko bagerageza kubahuza n'inganda, kugeza ku mwaka umwe dusanga nibura abanyeshuri 97% by'abanyeshuri bacu bahita babona akazi mu nganda.”

“Ni ijanisha rinini, kandi riterwa n'uburyo twigisha n'uburyo tunabahuza n'inganda. Ni ibyo rero tugiye gukora muri ibi bihugu byinshi tuzaba dukoreramo.”

Coventry University yatangiranye ubufatanye n'izindi nzego

Kuri uyu wa Gatatu, Coventry University – Africa Hub, yasinyanye amasezerano y'ubufatanye n'inzego zirimo Urwego rw'Iterambere (RDB), Minisiteri y'Ubuzima, Sosiyete y'Igihugu ishinzwe Ingufu (REG), Ikigo gishinzwe Ubwikorezi bw'Indege mu Rwanda (Aviation Travel and Logistics Holding ( ATL) Ltd na Kaminuza y'u Rwanda.

Ni amasezerano agena ubufatanye bw'izi nzego mu kuzamura ubumenyi mu nzego zitandukanye.

Minisitiri w'Ubuzima, Dr Daniel Ngamije, yabwiye IGIHE ko aya masezerano yasinywe hagati ya Coventry University, Kaminuza y'u Rwanda na Minisante afite intego yo guteza imbere uburezi bw'abakora mu nzego z'ubuzima, ni ukuvuga abaganga, abaforomo n'ababyaza.

Yagize ati “Ni ukugira ngo tubabone ku mibare ikwiriye, tuzibe icyuho dufite mu bijyanye n'umubare w'abakozi dukeneye mu nzego z'ubuzima, ariko tunababone bujuje ibisabwa twakwifashisha hano mu gihugu, ariko ku buryo twabifashisha no mu bihugu byo hanze.”

“Kuko tuzigisha abantu bakora mu nzego z'ubuzima, dushobora no gusagurira isoko ryo hanze ari uko tumaze kuzuza natwe abo dukeneye hano mu gihugu.”

Minisitiri Dr Ngamije yavuze ko aya masezerano azashyirwa mu bikorwa binyuze mu kunoza porogaramu Kaminuza y'u Rwanda yifashisha mu kwigisha abakora mu nzego z'ubuzima, mu byiciro bitandukanye.

Mu masezerano na RDB, hakubiyemo ibijyanye no gufatanya mu guteza imbere ubukungu nko kuzamura impano mu bijyany n'ibikorerwa mu nganda, ubuzima, ubwikorezi bugezwho, ingufu zisubira, gukurikirana abarangije amasomo n'ibindi.

Mu masezerano na Aviation Travel & Logistics Ltd (ATL), hakubiyemo ibijyanye no guteza imbere ubwikorezi bw'indege mu Rwanda, mu gihe ayasinyanywe na REG ajyanye no guhanahana ubumenyi.

---

Uyu mugabo ufite ubumuga bwo kutabona nk'ingaruka z'intambara yanyuzemo akiri muri RDC, kuri ubu yatashye mu Rwanda.

Mu 2018 ni bwo yageze mu Rwanda nyuma yo kurambirwa ubuzima bushaririye yacagamo. Yagejejwe i Mutobo aho yamaze amezi atandatu ahugurwa kuri gahunda zitandukanye z'ubuzima bw'igihugu mbere yo kwerekeza mu muryango, aho akomoka.

Inkuru ya Ndagijimana n'uko yagize ubumuga bwo kutabona kandi yaravutse ari muzima isobanura neza zimwe mu ngorane abakiri mu mitwe irwanira mu mashyamba ya RDC bahura na zo bitewe n'ubuzima babamo.

Mu kiganiro cyihariye na IGIHE yagarutse ku buzima yanyuzemo bwamugejeje ku kugira ubumuga bwamuviriyemo guhuma amaso biturutse ku ntambara zinyuranye yarwaniye muri RDC ahitwa Kabaro mu myaka isaga 20 yayabayemo.

Yagize ati 'Nageze i Kabaro, birangira mpakomerekeye bikomeye aho twahanganaga n'ingabo za Leta. Nta gihe nahamaze kuko nakomeretse bigafata amaso ahita uhuma burundu, n'ubuzima bwanjye bwose numva ko burangiye.'

Ndagijimana agikomereka yakomeje kwibera mu mashyamba aho yari mu buzima butoroshye, mbere yo kwanzura gutaha.

Ati 'Nageze mu Rwanda nakirwa neza, i Mutobo baramfashije haba mu kubona amafunguro, imyambaro, imirire, ibikoresho by'ibanze, yewe ndetse n'impumeko nziza yaho na yo ni ingenzi. Byabaye ngombwa ko dusubizwa mu bavandimwe, kandi icyo gihe bampaye impamba y'amafaranga ibihumbi 60 Frw yamfashije gutangira ubuzima.'

Nyuma yo kugera mu muryango nk'umuntu ufite ubumuga bwo kutabona ubuzima ntibwamworohereye.

Yahawe ubufasha na Komisiyo ishinzwe gusezerera no gusubiza mu Buzima busanzwe abahoze ari Abasirikare (RDRC) ku bufatanye n'Ishami ry'Umuryango w'Abibumbye ryita ku Iterambere (UNDP) ku nkunga yatanzwe n'u Buyapani yari igamije kubashyigikira mu guhangana n'ingaruka za COVID 19.

Ndagijimana yahisemo gukora imirimo y'ubuhinzi kugira ngo abashe kuva mu bukene ndetse anagura umurima ngo atangire ubuzima bushya.

Hashize igihe gito yifuje gushinga umuryango. Byatumye ashaka umugore ndetse ubu bibarutse umwana.

Yagize ati 'Nahisemo kuzanira umugore mu nzu y'ababyeyi ntegereje icyizere nahabwaga na Komisiyo (RDRC) cyo kuzanyubakira iyanjye. Baraje babaha ikibanza baranyubakira.'

Hubatswe inzu ijyanye n'icyerekezo kuko ifite agaciro ka miliyoni 20 Frw kandi aho iri mu Karere ka Gisagara iri mu zihagazeho.

Urugo ni ishuri

Nyuma yo gushaka, Ndagijimana yatekereje kwerekeza imbaraga ze mu buhinzi ku buryo byamushoboza kwiteza imbere no kubona ibitunga umuryango.

RDRC yongeye kumuha amafaranga yo kumutera ingabo mu bitugu, yigira inama yo kuyaguramo umurima.

Kuri ubu aho atuye ni umugabo ushobora kugira ijambo mu bandi kuko arangwa no gufata icyemezo kandi urugo rwe icyo rukeneye rukibona.

Muri Werurwe 2020 ni bwo icyorezo cya Covid-19 cyageze mu Rwanda, ibi byatumye ubukungu bw'igihugu buhungabana n'ibikorwa byinshi biradindira.

Ndagijimana yavuze ko inkunga yahawe yongeye kumurinda gusabiriza mu bihe Covid-19 yavuzaga ubuhuha ndetse igihugu kigashyiraho n'ingamba zikakaye mu kwirinda ikwirakwira ryayo zirimo na Guma mu rugo.

Ati 'Kubona ayo mafaranga byaramfashije kuko nabaga nibereye mu bikorwa byanjye, byandinze kwiheba kuko burya iyo ureba imirimo ukora bituma utiheba. Byampaga gutuza kandi kuko nabonaga ibyo nkeneye bikandinda kuba narenga ku mabwiriza yo kwirinda.'

Yahawe kandi amafaranga agamije kumushyigikira no kumurinda kwandavura akomeza kugura imirima n'amatungo magufi arimo inkoko kugira ngo umugore n'umwana babone amagi yo kurya bitabagoye.

Uretse Ndagijimana hari n'abandi batatu bafite ubumuga bagiriye mu mashyamba ya RDC bahawe inzu zo guturamo.

---

Minisitiri w'Intebe wa Canada, Justin Trudeau, yasesekaye ku Kibuga Mpuzamahanga cy'Indege cya Kigali i Kanombe ahagana saa Kumi n'Ebyiri n'Igice z'umugoroba.

Akihagera yakiriwe n'Umujyanama wa Perezida mu by'Ubukungu, Francis Gatare, mu cyubahiro gikwiye umuyobozi nk'uwo ku rwego rwe.

AMAFOTO: Minisitiri w'Intebe wa Canada, Justin Trudeau, yageze mu Rwanda.

Yitabiriye Inama ya #CHOGM2022.

📸 RBA pic.twitter.com/H1Qp8ooVL4

— IGIHE (@IGIHE) June 22, 2022

Minisitiri w'Intebe wa Canada, Justin Trudeau n'itsinda ry'abamuherekeje bahagurutse muri Canada mu rukerera rwo kuri uyu munsi.

Inama ya CHOGM bitabiriye iri kubera mu Mujyi wa Kigali kuva ku wa 20 Kamena, izasozwa ku wa 26 Kamena 2022.

Mu butumwa yanyujije ku rukuta rwa Twitter ye, Minisitiri w'Intebe wa Canada, Justin Trudeau yavuze ko mu gihe azamara mu Rwanda azaganira n'abayobozi mu gushaka ibisubizo by'ibibazo ibihugu byinshi bifite birimo ingaruka zatewe n'intambara y'u Burusiya muri Ukraine, imihindagurikire y'ibihe n'ubuzima burushaho guhenda.

Justin Trudeau, agiye gusura u Rwanda mu gihe mu minsi ishize yagiranye ikiganiro na Perezida Paul Kagame, cyibanze ku mubano w'ibihugu byombi n'ingingo zireba isi muri rusange, bifitemo inyungu.

Abayobozi bombi banaganiriye ku ngaruka Afurika yagizweho n'intambara u Burusiya bwagabye kuri Ukraine yatumye ibiciro bitumbagira by'umwihariko kuri uyu mugabane.

Inama ya CHOGM yitabiriwe n'abantu barenga 5000, baturuka mu bihugu 54 bigize uyu muryango wa Commonwealth uhuriza hamwe abaturage miliyari 2,6.

Canada ni kimwe mu bihugu byatangiranye na Commonwealth ubwo yashingwaga mu 1926, mu gihe u Rwanda rwinjiye muri uyu muryango mu 2009.

Amafoto: RBA

---