Blog

Kuva byamenyekana ko Buravan arwaye, inshuti ze, abavandimwe n'abandi bifashisha imbuga nkoranyambaga basaba Imana kumurebana impuhwe.

Uburwayi bwe ariko bwuririweho na benshi batangaza amakuru y'ibinyoma atari yo ku buzima bwe, bigakura benshi umutima.

Ku mugoroba wo kuri uyu wa Mbere tariki 15 Kanama 2022, ahagana saa kumi n'ebyiri kuri Kiliziya yitiriwe Mutagatigu Dominiko ku Kacyiru mu Karere ka Gasabo, habaye Misa yitabiriwe na bamwe mu bazi Buravan n'abandi.

Bamwe mu bitabiriye iyi Misa bari bazi ko ari iyo gusengera Buravan nk'uko byakomeje gukwirirakwira ku mbuga nkoranyambaga, kuva ku gicamunsi cy'uyu wa Mbere.

Ubwo Misa yari ihumuje, umwe mu bahereza yegereye Padiri amubwira ko hari abitabiriye iyi Misa bazi ko ari iyo gusabira Buravan wamamaye mu ndirimbo zirimo 'Malaika'.

Padiri Ngororabanga Benjamin yavuze ko batamenye neza gahunda yo gusengera Buravan, aboneraho no gutangaza ko uyu muhanzi akiri muzima bitandukanye n'ibyakwirakwiye ku mbuga nkoranyambaga mu ijoro ryo ku cyumweru, bivuga ko yitabye Imana.

Padiri Ngororabanga yifurije Buravan gukira vuba, amwereka Imana hanyuma asaba abakristu gufata hafi umwanya bazirikana Buravan mu isengesho. Yavuze ko muri iki gihe, bagiye gutegura Misa yihariye yo gusengera Buravan.

Muri iki gihe Buravan ari kubarizwa mu Buhinde, aho yagiye kwivuriza indwara amaranye igihe. Uyu muhanzi asanzwe ari umukirisitu muri kiliziya yitiriwe Mutagatigu Dominiko.

Aherutse kwifashisha imbuga nkoranyambaga ze, atangaza ko yagiye kwivuriza hanze y'u Rwanda, ashimira abakunzi be bakomeje kumusengera na Guverinoma y'u Rwanda yamuhaye ubufasha kugira ngo abashe kujya kwivuriza mu mahanga. 

Padiri Benjamin yatuye igitambo cya Misa, mu gusoza asaba abakristu kuzirikana Buravan mu isengesho 

Korali yifashishijwe muri iki gitambo cya Misa mu guhimbaza Imana 

Abakristu bafatanyirije hamwe mu isengesho ryabo basaba Imana kurebana impuhwe Buravan 

Buravan ni umwe mu basengera kuri kiliziya yitiriwe Mutagatigu Dominiko ku Kacyiru

AMAFOTO: Nathanie Ndayishimiye-INYARWANDA.COM

Nyuma y’ibindi bice by’ibirori bya Rayon Day, ahashyira i Saa 18:30, umusifuzi Uwikunda Samuel yatangije umukino hagati ya Rayon Sports ‘Gikundiro’ imwe mu makipe afite abafana benshi mu Rwanda na Vipers SC ‘The Venoms’ ikunzwe na benshi muri Uganda. 

Wari umukino wa mbere wa gicuti mpuzamahanga Rayon Sports ikinnye muri uyu mwaka, mu gihe Vipers SC yo yaje gukina nyuma y’iminsi micye ishize itsindiye Yanga SC muri Tanzania, nabwo mu birori bya ‘Yanga Day’. 

Habanje kwerekanwa abakinnyi ba Rayon Sports

Vipers itozwa na Robertinho wahoze muri Rayon Sports yakomeje gahunda yo gutsindira amakipe mu birori itateguye, itahana intsinzi y’igitego kimwe ku busa (1-0). 

Byasabye iminota 4 gusa, kugira ngo Bobosi Byaruhanga wakuze atozwa n’abanyarwanda i Kisoro arebe mu izamu rya Rayon Sports ryari ririnzwe na Hategekimana Bonheur, aho yateye ishoti rikomeye umupira ukaruhukira mu rushundura. 

Bobosi (18) na bagenzi be bishimira igitego

Iminota 45 y’igice cya mbere, yasoje Vipers iyoboranye igitego cyayo, ndetse ntabwo yaranzwe no gusatirana gukabije ku mpande zombi, aho umupira wakinirwaga mu kibuga hagati. 

Mu gice cya kabiri, Haringingo Francis utoza Rayon Sports yakoze impinduka zitandukanye mu kibuga, havamo Paul Were, Osalue Oliseh, Nkurunziza na Felicien, hinjira Mugisha François, Mucyo Didier na Tuyisenge Arsene. 

Rayon Sports yatangiye igice cya kabiri isatira ndetse rutahizamu Andre Onana abona uburyo bubiri bwabazwe ku minota ya 48′ na 53′, ariko bwose ntiyabubyaza umusaruro mu gihe yabaga ari hafi cyane y’izamu.

 

Aba-Rayon bari bacanye amatara

Ku munota wa 75, Tuyisenge Arsene na we yateye ishoti rikomeye ku izamu rya Vipers yotswaga igitutu, umupira ujya hanze y’izamu mbere y’uko na Mbirizi Eric ahusha uburyo bukomeye ku mupira yari ateresheje umutwe ukajya hanze y’izamu. 

Ku munota wa 89, Rayon Sports yakoze impinduka za nyuma mu kibuga, rutahizamu Musa Esenu wo muri Uganda asimbura Bavakure Ndekwe Felix, mbere y’uko hashyirwaho iminota 5′ y’inyongera, itagize icyo ihindura ku mukino. 

Ababanje mu kibuga ku mpande zombi:

Rayon Sports: Hategekimana Bonheur (GK), Ndizeye Samuel, Mitima Isaac, Ganijuru Elie, Nkurunziza Felicien, Osalue Oliseh, Mbirizi Eric, Ndekwe Felix, Boubakar Traore, Paul Were na Willy Onana 

Umutoza: Haringingo F. Christian 

Vipers SC: Fabians Mutombola (GK), Isa Mubiru, Ashraf Mandera, Hilary Mukundane, Livingstone Mulondo, Saraje Sentamu, Yunus Sentamu, Bright Anukani, Bobosi Byaruhanga, Ibrahim Orit, Milton Kalisa 

Umutoza: Robertinho Calmo

Yabigarutseho ku wa 15 Kanama 2022 ubwo yari i Kibeho mu Karere ka Nyaruguru mu kwizihiza Umunsi Mukuru wa Asomusiyo.

Jenoside yakorewe Abatutsi mu Rwanda mu 1994 yakoranywe ubugome n'ubukana ihitana abarenga miliyoni. Ifite umwihariko mubi kuko abaturage bashowe mu bwicanyi bica abaturanyi babo, inshuti n'abavandimwe.

Mu ijambo rye, Musenyeri Arnaldo, yabanje gushimira ubutumire yahawe bwo kujya i Kibeho kwifatanya n'abandi kwizihiza Asomusiyo.

Yagize ati 'Uyu munsi kandi turizihiza isabukuru y'imyaka 40 ya rya bonekerwa ryabereye hano i Kibeho mu 1982 kuri Asomusiyo ubwo hatangazwaga ubutumwa buteye ubwoba.'

'Iyo ubutumwa bwa Bikira Mariya buza kwakirwa abantu bakabwumva bakisubiraho ibyabaye mu 1994 [Jenoside yakorewe Abatutsi] ntibyashoboraga kuba kuko ayo mabonekerwa ari byo yahanuraga.'

Yavuze ko impamvu Bikira Mariya yabonekeye i Kibeho akaburira abantu bose ibintu biteye ubwoba kandi bibabaje ari uko ari muzima mu buzima bwa Kirisitu no muri Kirlziya kuko ari umubyeyi w'Imana n'uw'abantu bose.

Ati 'Papa Fancisco atwibutsa ko Bikira Mariya afite umwanya w'umwihariko. Ni umubyeyi w'abantu bose atitaye ku bwoko cyangwa ku gihugu runaka.'

Yavuze ko bityo abantu bakwiye kunga ubumwe nk'abavandimwe birinda amacakubiri.

Ntimukwiye gutahira ibirori gusa!

Musenyeri wa Diyoseze ya Gikongoro, Hakizimana Célestin, ni we wayoboye igitambo cya Misa yo kwizihiza Asomusiyo i Kibeho. Yasabye abakirisitu kugira impinduka nziza mu mibereho yabo ya buri munsi baharanira kubana neza no kudatahira ibirori bibera i Kibeho gusa.

Ati 'Ntabwo bakwiye gutaha amara masa ngo batahe uko baje ahubwo hari ikintu batahana. Bafite amahoro n'umutekano kandi buzuye imigisha Bikira Mariya yabahaye ariko cyane cyane batohagiye kuko turabuhira.'

Yavuze ko Bikira Mariya bamusabye gukomeza guha amahoro u Rwanda n'Isi muri rusange.

Ati 'Twamusabye ko yadukomereza amahoro kuko yatuburiye ku munsi nk'uyu nguyu kuri 15 z'ukwa Munani mu 1982 ubwo yaje arira afite agahinda yababaye avuga ko abantu batakira ubutumwa, ko abantu badahinduka ko abantu bashyamiranye. Twamusabye rero ko atagaruka arira ko yagaruka aseka yishimye, yishimira ko twahindutse twakiriye ubutumwa bwe kandi turi kugenda twigizayo ingeso mbi zose twimika indangagaciro za gikirisitu za kinyarwanda.'

Bamwe mu bakirisitu bitabiriye uyu munsi bavuze ko bishimiye ko bongeye guhura nyuma y'imyaka ibiri icyorezo cya Covid-19 kibabuza kuwizihiza neza.

Bavuze ko batahanye ibisubizo by'ibibazo bitandukanye baje bafite.

Uwamariya Marie Golette ati 'Nazanye ibyifuzo byanjye kandi ntashye nyuzwe nkurikije ukuntu mfite ubwuzu. Hari umwana wanjye uri muri Amerika ushaka kuzaza gukorera ubukwe mu Rwanda, yabimbwiye ngo mbimusabire umubyeyi Bikira Mariya azamuzane akorere ubukwe inaha.'

Bishimiye ko baje i Kibeho bagenda neza mu muhanda wa kaburimbo uherutse kubakwa.

Ijyanwa mu ijuru rya Bikira Mariya ryemejwe na Papa Piyo XII ku wa 1 Ugushyingo 1950. Muri Bibiliya, igice cy'Isezerano rya kera n'Irishya ntaho bavuga ko yaba yarajyanwe mu Ijuru ariko ibindi bitabo bitagatifu bya Kiliziya Gatolika birabyemeza.

Kiliziya Gatolika yemeje ko Bikira Mariya yabonekeye abakobwa batatu bigaga i Kibeho mu ishuri ryisumbuye kuva tariki 28 Ugushyingo 1981 no mu 1982 aho bagiye baganirizwa inshuro zirenze imwe na Bikira Mariya.

Kuri iyi nshuro abitabiriye kwizihiza Asomusiyo i Kibeho babarirwa hagati y'ibihumbi 40 na 50. Baturutse mu bihugu bya Uganda, u Burundi, Afrika y'Epfo, Tanzanie, u Bubiligi, Pologne, Kenya, Congo Kinshasa, Gabon, Leta Zunze Ubumwe za Amerika n'u Rwanda.

[email protected]

---

Yabigarutseho ku Cyumweru, tariki ya 14 Kanama 2022, mu birori byo kwizihiza Isabukuru y'imyaka 30 Diyoseze ya Shyogwe y'Itorero rya Angilikani ry'u Rwanda (EAR) imaze ishinzwe, yanahuriranye na Yubile y'imyaka 25 Musenyeri Dr. Kalimba Jered amaze ari umwepisikopi wayo.

Guverineri Kayitesi yashimye umuhate wa EAR mu kuzamura imibereho myiza y'abaturage, ashimangira ko ivugabutumwa ikora ritaba iryo mu magambo gusa ko ahubwa ibikorwa byayo byigaragaza.

Yagize ati 'Ivugabutumwa ryanyu ni iry'ibikorwa, si iry'amagambo. Dufatanya byinshi mu gufasha Umunyarwanda gutera imbere no kugira imibereho myiza, yaba mu isanamitima, mu kubungabunga ubumwe n'ubwiyunge, mu burezi, ubuvuzi n'ibindi bikorwa byinshi tubashimira kandi tuzakomeza gukorana kugira ngo byaguke.'

Yavuze ko ivugabutumwa nyaryo ari irishingira ku muryango, cyane ko igihugu gishingiye ku muryango, ndetse n'iterambere ryose rikaba rishingira ku muryango.

Yakomeje ati 'Ni yo mpamvu tutubatse itorero rizima, ntabwo twategereza kuzagira umuryango muzima cyangwa se igihugu kizima. Nitugira umuryango muzima tuzaba umusemburo mwiza w'impinduka aho dutuye no kubatureba.'

Mu butumwa bwe, yavuze ko Leta yifuza ko imyitwarire iranga umukirisitu mu rusengero, ari nayo yakomeza kugendana na yo mu mudugudu aho atuye.

Guverineri Kayitesi yavuze ko ubufatanye bwa Leta n'amatorero buhari ariko urugendo rukomeje kuko aho igihugu cyifuza kugera kitarahagera.

Yagize ati 'Hari intambwe nini yatewe kandi ubona dufatanya neza muri gahunda nyinshi za Leta, mu nkingi za guverinoma, yaba imiyoborere myiza n'ubutabera, yaba imibereho myiza ndetse n'ubukungu turafatanya, gusa aho twifuza kugera ntabwo turahagera.'

Umwepisikopi Mukuru w'Itorero rya Angilikani mu Rwanda, Rev. Dr. Laurent Mbanda, yavuze ko mu mirongo migari y'iri torero, harimo no gukorana n'inzego za Leta, mu kwita ku muturage ari na we wa mukirisitu w'itorero.

Yagize ati 'Turi kwiga uburyo bwo gukorana n'inzego z'igihugu cyacu, kugira ngo twite ku muturage ari we wa mukirisitu wacu. Ni umuntu umwe tureba twese, si benshi. Tugomba kuvuga ubutumwa buhindura imyumvire, bugahindura imitima, bugakura abantu mu byaha, dushishikariza abantu kwita ku bana bakiri bato, urubyiruko rukitabwaho, tukita ku muryango kugira ngo tugire umuryango mwiza uhesha Imana icyubahiro.'

Yavuze ko Itorero rya EAR ryafashe gahunda yo gufatanya na Leta mu buvuzi, uburezi mu ivugabutumwa rihindura, gukura mu bukene abaturanye n'ibindi bikorwa byinshi bizamura umuturage ariwe mukirisitu.

Umwepisikopi wa Diyosezi ya Shyogwe, Mgr. Dr. Jered Kalimba, wanagize Yubile y'imyaka 25 ayiyobora, yashimangiye ko mu yindi myaka 30 iri imbere bazaba barageze kuri byinshi bihambaye, birimo no kubaka umuryango utajegajega.

Yagize ati 'Mu yindi myaka 30 ni ugukomeza ibyo twatangiye kuko bifite umusingi ukomeye cyane. Twifuza ko amashuri y'imyuga ari muri diyosezi yacu agira intambwe ihagije, ibikoresho bihagije na buri mwana w'Umunyarwanda uzahaza azahavane ubumenyi buhagije. Kaminuza yacu iri mu Karere ka Nyanza na yo turashaka kuyishyira ku rwego ruhanitse. Ikindi dushaka gushyiramo imbaraga nyinshi ni ukubaka umuryango ukomeye cyane ndetse unahesha Imana icyubahiro.'

Diyosezi ya Shyogwe ihuje uturere tune two mu Ntara y'Amajyepfo, aritwo Muhanga, Kamonyi, Ruhango na Nyanza. Ifite icyicaro mu Karere ka Muhanga. Ibikorwa byayo bikora mu ngeri zitandukanye z'ubuzima binyuze mu mashuri, amavuriro n'ibindi bigamije kuzamura imibereho myiza y'abaturage.

---