Category: Uncategorized

Muri Gicurasi 2024 ni bwo yahawe amahugurwa na Sosiyete yitwa GoFun, nyuma y'igihe gito atangira gutwara abantu.

Nawe bishobora kugutangaza kubona umukobwa utwara abantu mu bwato cyangwa ukamushidikanyaho igihe ari we ugomba kukubera umusare.

Reba iyi video umenye inkuru irambuye ya Mutesi

Yabitangarije i Nyamasheke mu Ntara y'Iburengerazuba mu gikorwa cyo gusaba imbabazi no kuzitanga ku wa 17 Ugushyingo 2024, aho abagera ku icumi barangije ibihano bakatiwe kubera uruhare bagize muri Jenoside yakorewe abatutsi, bahabwaga imbabazi n'abo bahemukiye.

Binyuze mu nyigisho za Komisiyo y'Ubutabera n'Amahoro ya Kiliziya Gatolika, abarenga 1900 barimo abahemukiwe n'abahemutse, kuva mu 2008 bamaze gusoza urugendo rw'ubwumwe n'ubudaheranwa.

Nyirangirababyeyi Susanne w'imyaka 72, ni umwe mu bahawe imbabazi n'abo mu muryango yahemukiye. Mu 1994 yavuze aho umuturanyi yihishe uwo ahaye amakuru ahita ajya guhuruza igitero kiraza kica uwo mukecuru

Inkiko Gacaca nyuma yo kumuhamya iki cyaha, zamukatiye imyaka 28 irimo 14 yakozemo imirimo nsimburagifungo.

Mu kiganiro na IGIHE, Nyirangirababyeyi yavuze ko nubwo yari yararangije iki gihano, umutima wakomeje kumubuza amahoro, afata icyemezo cyo kujya kwiga inyigisho zamufashije kubohoka asaba imbabazi.

Ati “Narakomanzwe, najyaga kurya ibiryo n'iyo byaba biryoshye bite ngatekereza wa mukecuru. Ngatekereza ukuntu yajyaga ampa inzoga tugasangira, akampa ubunyobwa. Nyuma yo gusaba imbabazi Jurithe Nyiransabimana yarazimpaye n'abatari hafi nabo barambohoye ubu tubanye neza”.

Musenyeri Edouard Sinayobye yavuze ko umuhango wo gusaba imbabazi no kuzitanga ari umwanya wo kwishimira intambwe iba itewe mu gutsinda Jenoside.

Ati “Niyo mpamvu umwanya nk'uyu duhimbaza uwo mutsindo, ko imbabazi, ko urukundo, ko ubumwe bigamburuza Jenoside. Ntizongere kubaho yo gatsindwa n'Imana”.

Umuyobozi wungirije w'Akarere ka Nyamasheke ushinzwe imibereho myiza y'abaturage, Mukankusi Athanasie, yavuze ko iyi gahunda y'inyigisho z'ubumwe n'ubudaheranwa itanga umusanzu munini mu kubaka ubumwe n'ubudaheranwa no kurwanya ingengabitekerezo ya Jenoside.

Musenyeri Sinayobye yagaragaje ubumwe n’imbabazi nk’inzira yo gutsinda ingengabitekerezo ya Jenoside

Imbabazi zihabwa abagize uruhare muri Jenoside, zituma Abanyarwanda babana batishishanya

Visi Meya Mukankusi yavuze ko imbabazi zihabwa abakoze Jenoside n’abayikorewe zituma ingengabitekerezo ya Jenoside igabanuka

Byatangarijwe mu nama y'Ihuriro ry'Ubumwe n'Ubudaheranwa ku rwego rw'Intara y'Iburengerazuba yabereye mu Karere ka Karongi ku wa 20 Ugushyingo 2024.

Ni inama ibaye mu gihe mu mezi atatu ashyize mu gihugu hose abarokotse Jenoside batanu barimo umwe wo mu Karere ka Karongi bishwe, bigakekwa ko byaturutse ku ngengabitekerezo ya Jenoside.

Iyi nama yitabiriwe n'abayobozi b'Intara y'Iburengerazuba n'abigeze kuyiyobora, abayobozi b'uturere tw'Intara y'Iburengerazuba n'abigeze kutuyobora, abavuga rikumvikana muri iyi ntara n'abakomoka muri iyi Ntara bahoze ari abadepite.

Omer Mayobera, uyobora umushinga USAID Dufatanye Urumuri, ugamije kwimakaza ubumwe n'ubudaheranwa yavuze ko mu isesengura bakoze basanze hari abantu bakirebera mu ndorerwamo z'amoko n'uturere.

Ati “Ubibona cyane cyane mu buryo abantu bafite amazina ajimije bakoresha bashaka kuvuga umuhutu, umutwa cyangwa umututsi. Muriyo harimo Akeso, Umusozi muremure, Ba musana. Ba rejistre, Abahayiti, Abo mu mbaho, abo hepfo abo haruguru. Ibyo bintu twabonye ari bimwe mu bintu biganisha ku ngengabitekerezo ya Jenoside ariko cyane cyane biganisha no ku macakubiri”.

Hon. Mporanyi Théobald wabaye Umuyobozi w'Akarere ka Rusizi, mbere y'uko aba umudepite yavuze ko nubwo ibipimo bigaragaza ko ubumwe n'ubudaheranwa mu Banyarwanda bugeze kuri 94,7% ako 5,3% gasigaye habayeho kurangara kasubiza inyuma ibi bipimo.

Ati 'Abayobozi nibagende ubwabo babanze bisuzume, buri muntu age mu karere ke, mu murenge, mu kagari, mu mudugudu, barebe ahari ingengabitekerezo ya Jenoside. Nibamara kuhabona batubwire tugende tujye kwicarayo tuganirize abaturage. Nta misiyo tuzaka, nta mavuta y'imodoka. Icyo tudashaka ni uko ubumwe tubatse bituvunnye bwasenyuka turebera'.

Guverineri w'Intara y'Iburengerazuba, Dushimimana Lambert yavuze ko mu Ntara y'Iburengerazuba ingengabitekerezo igihari ndetse ko bajya babibona muri raporo z'uturere.

Ati 'Tugiye kwicara turebe aho iherereye nyirizina. Ese iri mu bafunguwe nk'uko biri kuvugwa? Ese iri mu bihe byiciro, noneho tuze kumenya uburyo tuzabaganiriza kuko turabona ibi biganiro bikwiye kugera mu matsinda mu byiciro bitandukanye bitewe n'aho tuzayibona nyinshi'.

Imibare ya Minisiteri y'Ubumwe bw'Abanyarwanda n'inshingano mboneragihugu igaragaza ko mu mezi atatu ashize, mu Rwanda hamaze kwicwa abarokotse Jenoside batanu mu buryo bugaragaramo ingengabitekerezo ya Jenoside, barimo babiri b'I Nyaruguru, umwe w'i Karongi n'uwo mu karere ka Ngoma wishwe agacibwa umutwe.

Mu bitabiriye iyi nama harimo n’abahoze mu buyobozi bw’uturere

Iyi nama yitabiriwe n’abayobozi b’uturere two mu Ntara y’Iburengerazuba

Mporanyi avuga ko nk’abagize Ihuriro ry’Ubumwe n’Ubudaheranwa ku rwego rw’Intara biteguye gutanga umusanzu mu kurwanya ingengabitekerezo ya Jenoside

Guverineri Dushimimana Lambert yavuze ko bagiye gukora isesengura ryo kumenya aho ingengabitekerezo ya Jenoside yiganje

Omer Mayobera ukorera Alert International avuga ko mu busesenguzi bakoze basanze hari abiyita amazina ajimije avuga amoko

Ni mu mukino wa gicuti wabaye kuri uyu wa Gatatu tariki ya 20 Ugushyingo 2024, ubera kuri stade ya Ngoma iherereye muri aka Karere. Witabiriwe n'abayobozi banyuranye bo mu ngabo z'u Rwanda, Guverineri w'Intara y'Iburasirazuba, Pudence Rubingisa, abayobozi b'uturere dutandukanye two muri iyi Ntara n'abaturage benshi.

Ingabo z'ibihugu byombi zahisemo kujya zikina umupira w'amaguru nka bumwe mu buryo bubafasha gusabana no kongera ubucuti ku mpande zombi dore ko ingabo ziba ziri gukina ziri no mu Ntara zihana imbibi.

Ingabo z'u Rwanda zibarizwa muri Diviziyo ya 5 zari zimaze imikino ibiri zitsindwa n'iza Tanzania ariko kuri iyi nshuro zabashije kuyigaranzura ziyitsinda ibitego 2-0.

Umuyobozi w'ingabo z'u Rwanda, Diviziyo ya 5 ikorera mu Ntara y'Iburasirazuba, Bri Gen Pascal Muhizi, yavuze ko intsinzi bayakiriye neza ariko ko ikigamijwe atari ugutsindana, ahubwo ari uguteza imbere umubano n'ubuvandimwe hagati y'abasirikare ba Tanzania n'u Rwanda.

Ati 'Nyuma y'Abakuru b'Ibihugu bashyiraho politki nziza, ikiba gisigaye ni uko abaturage babana neza, iyo abantu bakina rero ni ubuvandimwe, ni ubucuti no gukuraho rwa rwikekwe. Iyo abantu bakina rero baraganira abaturage bakagenderanirana bakumva ko ari inshuti, mu mukino niho hava bwa busabane n'urukundo kandi dukeneye kubana neza.'

Brig Gen Muhizi yakomeje abwira abaturage ko nyuma yo kubabanziriza nk'Ingabo z'Igihugu nabo bakwiriye gutera intambwe bagakina n'abaturage ba Tanzania kuko bahana imbibi. Yavuze ko babiganiriyeho n'abayobozi ba Tanzania kandi ko bizeye ko bizakorwa.

Col William Lovukenya wari uhagarariye ingabo za Tanzania, yavuze ko bamaze gukina n'ingabo z'u Rwanda inshuro eshatu bazitsinzemo inshuro ebyiri nazo zikaba zibatsinze inshuro imwe.

Yavuze ko iyi mikino yongera ubuvandimwe hagati y'abasirikare b'ibihugu byombi anashimangira ko igaragaza ko ibihugu byombi bibanye mu mahoro.

Kuri ubu abasirikare bo mu bihugu byombi bihaye intego zo kujya bahura buri mezi atatu mu kurushaho kurebera hamwe uko umubano wabo uhagaze ndetse no kurushaho gusangira amakuru y'ibyaha byambukiranya imipaka.

Abayobozi barimo Guverineri Pudence Rubingisa n'abo mu Ngabo z'u Rwanda bakurikiranye uyu mukino

Abayobozi b'uturere bari mu baje gushyigikira ingabo z'u Rwanda zibarizwa muri Diviziyo ya 5 ikorera mu Ntara y'Iburasirazuba

Umuyobozi wa Polisi mu Ntara y'Iburasirazuba, ACP Kanyamihigo yarebye uyu mukino

Bishimiye igikombe bahawe

Abahanzi bazaririmba muri iri serukiramuco bamaze gutangazwa, kandi benshi bagaragaza ko bubakiye umuziki kuri gakondo y'abanyarwanda. 

Barangajwe imbere na Ruti Joël uherutse mu bitaramo mu Bubiligi, Victor Rukotana, Chrisy Neat usanzwe ari Producer muri 'Studio' Ibisumizi, Umukiringitananga Siboyintore, Itorero Intayoberana, J-SHA [itsinda ry’impanga] ndetse na Himbaza Club yamenyekanye cyane mu ngoma z'i Burundi. 

Ni igitaramo ngarukamwaka. Kuri iyi nshuro kizaba tariki 07 Ukuboza 2024, muri Kigali Confence and Exhibition Village ahazwi nka Camp Kigali.

Biteganyijwe ko abazaririmba muri iki gitaramo bazacurangirwa umuziki wa 'Live'na Siblings Band, itsinda ry'abasore n'inkumi basoje amasomo yabo mu Ishuri ry'Umuziki ry'u Rwanda ryamamaye nka Nyundo Music School.

Iyo unyujije amaso ku mpapuro zamamaza iki gitaramo, ubona ko harimo ibyiciro bitatu by'amatike ushobora guhitamo kugura. Ni amatike bigaragara ko yitiriwe bimwe mu birunga bitatu by'u Rwanda.

Itike ya macye yiswe 'Bisoke' iri kugura 10.000 Frw, ikurikiyeho yiswe 'Muhabura' iragura 25.000 Frw naho itike iruta izindi yiswe 'Karisimbi' iragura 50.000 Frw.

'Bisoke' ni ikirunga gifite ubutumburuke bwa metero 3,711. Cyarazimye kuko giheruka kuruka muri Kanama 1957. Hejuru yacyo kiriho ishyamba ririmo ibiti byinshi cyimeza ndetse n'inyamaswa nto zitandukanye.

‘Karisimbi’ ni ikirunga giherereye mu Majyaruguru y'Iburengerazuba bw'u Rwanda, ku mupaka uruhuza na Repubulika Iharanira Demokarasi ya Congo. Ni ikirunga kiri ahirengeye, gihorana ubukonje igihe cyose(Amasimbi).

Iki kirunga kibarizwa mu birunga byazimye bitakiruka, kuko giheruka kuruka mu myaka 8050 mbere ya Yezu.

Ni mu gihe ikirunga cya 'Muhabura' giherereye mu Majyaruguru y'u Rwanda, mu turere twa Burera na Musanze, gifite amateka maremare yatumye cyitwa iryo zina kuko mbere atari ko cyitwaga.

Kalisa Rugano, umuhanga mu mateka y'u Rwanda, yigeze kuvuga ko icyo kirunga cyiswe iryo zina n'Umwami w'u Rwanda rwa kera witwa Kigeli Nyamuheshera, mu myaka ya 1600, ubwo yaguraga u Rwanda.

Mugabo Julius uri mu bari gutegura iserukiramuco rya Unveil Africa Fest, yabwiye InyaRwanda ko bahisemo kwitirira aya matike ibirunga by'u Rwanda kubera ko iki gitaramo gishingiye ku muco n'amateka by'u Rwanda.

Ati 'Muri iki gitaramo tuzaba twizihiza uburere mboneragihugu n'umuco, niyo mpamvu rero twatekereje kuri bimwe mu bitatse u Rwanda.'

Ibirunga by'u Rwnda bifite ubusobanuro bukomeye ku mateka yacu ndetse no ku bakurambere n'ubuzima bw'iterambere ry'Igihugu cyacu muri rusange. Niyo mpamvu rero twahisemo kwitirira ariya matike ibirunga byacu. Twifuje ko rimwe mu ijambo rizagarukwaho mu gitaramo cyacu (itike) twariharira amazina atatse u Rwanda.'

Yanavuze ko guhitamo aya mazina y'ibirunga bashakaga gufasha abazitabira iki gitaramo ndetse n'abakerarugendo kumenya amateka y'u Rwanda.

Ati 'Twanabikoze nka kimwe mu dushya twashakaga ko tuba umwihariko w'igitaramo cyacu, cyane ko ari amazina yiyubashye muri sosiyete nyarwanda.'

Mugabo yanavuze ko 'Uko ibirunga bisanzwe birutana mu ngano ni cyo twagendeyeho dukurikije agaciro twageneye buri tike.'

Amatike yo kwinjira muri iki gitaramo ‘Unveil Africa Fest’ ari kuboneka mu buryo bw'ikoranabuhanga unyuze ku rubuga www.noneho.com 

Ushobora kubona itike kandi mu bice bitandukanye muri Kigali nko kuri Legacy Studio, Uncles Restaurant & Lounge, Kigali Protocal Shop, Kigali Protocal Office ndetse no kuri Camellia – Makuza Plaza.

Umuhanzi Ruti Joel ukubutse mu Bubiligi ari kwitegura kuririmba muri iri serukiramuco rigiye kuba ku nshuro ya mbere 

Umuhanzi Victor Rukotana umaze igihe ari gukora kuri Album ye nshya ari mu bazaririmba muri iri serukiramuco 

Chrisy Neat usanzwe ari Producer ategerejwe muri iri serukiramuco rizaba ku wa 7 Ukuboza 2024 

Iri serukiramuco rya Unveil Africa Fest, rigamije guteza imbere umuziki wiganjemo uwa gakondo, rizabera muri Camp Kigali

Ni nyuma y'igihe kinini yari amaze atumvikana aho yavuze ko yari mu bikorwa by'umuziki we bitandukanye, birimo gusubiramo indirimbo ze zakunzwe kera ndetse n'umushinga wa album ye ya kane.

Ati “Maze iminsi mpugiye mu bikorwa bitandukanye by'umuziki. Nabanje gusubiramo izi ndirimbo za kera gusa ntibyahagaritse umushinga wa Album nshya yanjye ya kane ndi gutegura, ahubwo njye n'itsinda rimfasha mu murimo w'Imana twifuje kubanza gusubiza ibyifuzo by'abantu bahoraga badusaba izi ndirimbo za kera ariko natwe tugasanga ntazo dufite.'

Iyi album y'uyu muhanzi nshya yavuze ko izaba igizwe n'indirimbo zirindwi aho zose yazikoze mu buryo bwa 'Live Recording'. Ashimwe kandi atangaza ko ateganya kuyimurikira abakunzi be mu mwaka utaha.

Ati 'Ni album twakoze mu buryo bwa 'Live Recording'. Nimara guha abantu indirimbo zose za kera, nzabaha inshya kuri album yanjye ya kane nise 'Nzabana Nawe'. Nteganya ko mu mwaka utaha muri Kamena, nzakora igitaramo cyo kumurika iyi album.'

Iyi album ya kane y'uyu muhanzi izaba ije nyuma y'iyo yise 'Ari kumwe natwe' yakoze mu 2010, Iyitwa 'Umubavu' yasohotse mu 2013 n'iyo yise 'Urufatiro' iheruka.

Uyu muhanzi avuga ko izi ndirimbo ze za kera yasubiyemo, yabikoze kubera y'uko mu gihe yazikoraga nta bumenyi abahanzi benshi bari bafite bwo kuzishyira ku mbuga zicuruza umuziki n'iziwukwirakwiza zifashishwa uyu munsi nka YouTube, Sportify, Apple Music n'izindi.

Avuga ko hari shene yifashishwaga n'abahanzi hafi ya bose mu Rwanda, ariko ikaza gukurwaho ku buryo ibihangano by'abahanzi bamwe nawe arimo byabigendeyemo.

Ati 'Muri uyu mushinga wo kugarura izi ndirimbo zanjye zari zarabuze, reka mare abantu impungenge y'uko mu kuzitunganya turi kwigengesera kuri buri kimwe cyose kugira ngo indirimbo igumane umwimerere. Ibi bizafasha uwayikunze kera gukomeza kuyisangamo nk'uko yari imeze.'

Dominic Ashimwe n'itsinda rimufasha bashyize hanze indirimbo ya mbere kuri izi ndirimbo ze za kera, aho bahereye ku yitwa 'Nemerewe Kwinjira' iri kuri album ya mbere yahereyeho akora umuziki.

Reba Nemerewe Kwinjira ya Dominic Ashimwe yasubiwemo

Dominic Ashimwe ni umwe mu bahanzi bafite izina rikomeye mu ndirimbo zo kuramya no guhimbaza Imana

Dominic Ashimwe yateguje album ya kane izagira umwihariko wo kuba iriho indirimbo zivuguruye z’uyu muhanzi wakunzwe cyane

Ibi byifuzo babitanze kuri uyu wa Kabiri tariki ya 19 Ugushyingo, ubwo mu nteko z'abaturage hirya no hino muri aka karere hatangizwaga ibikorwa byo kwakira ibyifuzo bizashyirwa mu ngengo y'imari ndetse no mu mihigo.

Bucyana Ismael utuye mu Kagari ka Rukara mu Mudugudu wa Karamba yavuze ko yishimiye guhabwa umwanya ngo atange ibitekerezo kuko bigaragaza ko abaturage bagira uruhare mu bibakorerwa, ari nayo demokarasi yuzuye.

Ati “Ikintu cya mbere twifuza ni uburezi bumeze neza, hano turasaba ko twahabwa ikigo cy'imyuga kuko hano nubwo turi no kwaka agakiriro ntabwo kadufasha tudafite ikigo cy'imyuga bakwigamo. Turifuza ko baduha ikigo cy'imyuga cyakwakira abantu bose hatitawe ku myaka cyangwa amashuri bafite.'

Bucyana yavuze ko bifuza umuhanda mwiza uva Rukara ukagera mu Murenge wa Murundi kuko uhasanzwe udakoze neza, bikanatuma moto zibahenda cyane. Ati 'Umuhanda ukozwe neza wagabanya impanuka z'ibinyabiziga, ikindi ukozwe neza twanahabona imodoka nyinshi zitwara abagenzi.'

Undi muturage yasabye ko ingo zitari zahabwa amashanyarazi zayahabwa, izindi zifite umuriro ugenda gake nazo zigafashwa mu kubona umuriro ufite imbaraga kugira ngo iterambere ryihute.

Umuyobozi w'Akarere ka Kayonza, Nyemazi John Bosco, yavuze ko mu mirenge yose hakusanyije ibyifuzo by'abaturage, ibindi bigashyirwa mu mihigo y'Akarere, anatanga umurongo ku byifuzo byatanzwe.

Ati “Ikibazo cy'amazi, hari umuyoboro uri gukorwa ugeze kuri 60% aho amatiyo y'amazi n'ibindi byose bimaze gushyirwamo abaturage bashonje bahishiwe. Ku kijyanye n'amashanyarazi, dufite umushinga ku bufatanye na REG uzatanga amashanyarazi ku ngo ibihumbi 25, nta muturage uzasigara adafite amashanyarazi.'

Meya Nyemazi yavuze ko ku muhanda Kanyangese-Rugarama-Karambi-Rukara uwo mushinga uri gutegurwa, yizeza abaturage ko uzashyirwa mu bikorwa ndetse n'indi myinshi bagiye bagaragaza.

Abaturage bari bitabiriye ku bwinshi kugira ngo bagaragaze ibyo bifuza kuzakorerwa mu ngengo y’imari y’umwaka utaha

Abaturage bagaragaje ko batewe ishema no gutanga ibitekerezo by’ibyo bifuza kuzakorerwa

Umuyobozi w'Akarere ka Kayonza, Nyemazi John Bosco, yavuze ko mu mirenge yose hakusanyije ibyifuzo by'abaturage