Category: Uncategorized

Ibi bitaramo byabaye mu ijoro ryo kuri uyu wa Gatatu tariki 27 Ugushyingo 2024, bisanzwe bitegurwa n’umunyarwenya Alex Muhangi uheruka i Kigali mu bitaramo bya Gen-z Comedy byabereye muri Camp Kigali. 

‘Comedy Store’ yayitangije mu 2016, kandi byatanze umusaruro ukomeye mu kuzamura urugendo rw’urwenya muri iki gihugu, ndetse yahisemo ko bizajya biba rimwe buri cyumweru.

Bihuza cyane abanyarwenya bakizamuka n’abandi bubatse izina bakora ‘Stand-up Comedy’. Muri iki gitaramo, Element yaririmbye indirimbo ze zirimo nka ‘Fou de Toi’ yakoranye na Ross Kana na Bruce Melodie, aririmba indirimbo kandi nka ‘Milele’, ‘Kashe’, ‘Sikosa’ yakoranye na The Ben na Kevin Kade n’izindi. Yaririmbye mu buryo bwa ‘Play Back’.

Bamwe mu bakobwa banyuzwe n’uburyo uyu musore yabataramiye, kugeza ubwo bamwe muri bo bagiye bamupfumbatisha amafaranga mu rwego rwo kumushimira uko yabataramiye. Muri iki gitaramo, Element yari yambaye umupira wanditseho ‘Uganda’.        

Iki gitaramo cy’urwenya yagombaga kugihuriramo na Pasiteri Wilson Bugembe wagiye ugenderera u Rwanda mu bihe bitandukanye. Uyu mugabo w’umuvugabutumwa ubwo yari ageze ku rubyiniro, yagiye yigisha ijambo ry’Imana, nyuma anyuzamo yakira ku rubyiniro abarimo Bebe Cool wamamaye mu ndirimbo zinyuranye, ndetse byageze ubwo anahamagara MC Kats wavuzwe cyane ubwo yari mu rukundo n’umunyarwandakazi Fille Mutoni.

Iki gitaramo cy’urwenya cyanyuzemo abarimo Sammie na Shawa Dance, Merry Hearts, Madrat na Chiko, Happy Kyazze, Yeffe Band, Dj Lolah, Stream of Life Choir, MC Mariachi n’abandi banyuranye. Mu gihe cy’amasaha arenga ane, iki gitaramo cyayobowe na Kalela ndetse na Bree.

Inkumi zo muri Uganda zanyuzwe n'indirimbo zirimo 'Sikosa' zimuhangazaho amafaranga 

Element yaserutse yambaye umwambaro wa Uganda, mu gitaramo cyihariye kuri we 

Element yagaragaje ko yakozwe ku mutima ku mutima abiganjemo abakunzi b'urwenya muri ibi bitaramo 

Element yaririmbye muri iki gitaramo yishimye, kuko indirimbo ye 'Fou de Toi' yujuje abarenga Miliyoni 20 bayirebye kuri Youtube

Pastor Bugembe yahagamagaye ku rubyiniro Bebe Cool ataramira abantu mu gihe cy'iminota micye 

MC Kats [Ubanza ibumoso] wavuzwe cyane mu rukundo na Fille Mutoni wamaze kugaruka mu Rwanda

 

Alex Muhangi [Ubanza ibumoso] yatangije ibi bitaramo kuva mu 2016, kandi byatanze umusaruro wigaragaza

Abahanga bemeza ko mu gihe cy'ubushyuhe buringaniye, umuntu mukuru akwiye kunywa amazi ari hejuru ya litiro ebyiri ku munsi, kuko ubusanzwe umubiri w'umuntu utakaza Litiro imwe y'amazi mu nkari ndetse andi mazi angana atyo agatakara binyuze mu byuya, imyanda yo mu bwiherero ndetse no mu mwuka duhumeka.

Gusa banavuga ko umuntu aba akwiye kwitwararika mu gihe ari kunywa amazi.

Zimwe mu mpamvu udakwiriye kunywa amazi uhagaze:

Urubuga Health exchange ruvuga ko kunywa amazi uhagaze bibangamira igogogora, ibi bigatera kuribwa mu gifu ndetse na gaz  nyinshi bitera 'ikirungurira'.

Kunywa amazi uhagaze, bibangamira imisemburo yifashishwa mu gusya ibiryo mu gifu, ibi bikaba byagutera kugugarara cyangwa gutumba.

Iyo ugahaze, ukanywa amazi bihatira umutima gutera cyane, abahanga bagira abantu inama yo kwicara mu gihe bagiye kunywa amazi.

Ubushakashatsi bwakozwe n'urubuga rwa Healthxchange, bwagaragaje ko kugira ngo amazi unywa akugirire akamaro ari uko umenya igihe cyo kuyanywa, umuntu aba akwiriye kunywa amazi akimara kubyuka mbere yo kugira icyo ufata, nko gufata ifunguro rya mu gitondo n'ibindi.

Kunywa amazi mbere cyangwa nyuma yo kurya iminota 30, bifasha umubiri gukora igogora neza ndetse bikanawufasha gukura intungamubiri mu byo wariye.

Ni mu gihe kunywa amazi mbere yo kujya mu bwogero bigabanya umuvuduko w'amaraso ndetse no kunywa amazi isaha imwe mbere yo kuryama kuko bifasha mu gikorwa cyo kuvugurura uturemangingo mu gihe uryamye.

Ni gahunda igamije guhindura u Rwanda igihugu gifite ubukungu buhangana n'imihindagurikire y'ibihe kandi bubungabunga urusobe rw'ibinyabuzima.

Iteganya uburyo bwo gushaka inkunga no gushora imari mu mishinga irengera ibidukikije.

Biteganywa ko ingengo y'imari yayo ari miliyari 11$, azafasha mu gushyira mu bikorwa intego u Rwanda rwihaye mu kurengera ibidukikije no kugabanya imyuka ihumanya ziri mu mujyo w'amasezerano y'i Paris ku byerekeye imihindagurikire y'ikirere [Nationally Determined Contributions- NDCs], kugeza mu 2030.

Magingo aya hamaze kuboneka miliyari 4,5$ yagenewe ibikorwa byo kuva mu 2020 kugeza mu 2025. Haracyakenewe miliyari 6,5$ azakoreshwa kugeza mu 2030.

Umusingi w'iyi gahunda, ni uguharanira ko buri shoramari rikozwe, ryaba irya Leta cyangwa iry'abikorera, riba rihuye n'iyi ntego yo kubaka ubukungu butangiza ibidukikije kandi rigabanya imyuka ihumanye yoherezwa mu kirere.

Izibanda ku ngingo eshanu z'ingenzi: kongera ishoramari mu mishinga idahumanya ikirere kandi irwanya ingaruka z'imihindagurikire yacyo, imikoreshereze ihamye y'amafaranga ya leta mu bikorwa birengera ibidukikije, gukangurira abikorera gushora imari mu mishinga ibungabunga ibidukikije, korohereza abikorera bashora imari yabo muri iyi mishinga no kunoza uburyo bwo gukurikirana no kugenzura iryo shoramari.

Mu bizitabwaho harimo no kongera ishoramari mu mishinga idahumanya ikirere kandi irwanya ingaruka z'imihindagurikire yacyo

Ni muri urwo rwego muri MINECOFIN, hashyizweho Ishami rishinzwe kugenzura amafaranga yagenewe ibikorwa byo kubungabunga ikirere 'Climate Finance Department'.

Rizajya rigenzura imikoreshereze y'inkunga, ritegure imishinga, kandi rishyire mu bikorwa gahunda zijyanye no gushaka ubushobozi bwo gushyigikira ibikorwa bijyanye n'ibidukikije.

Biteganyijwe ko hagati ya 2024-2026 iri shami rizatangira ibikorwa ku mugaragaro.

Ubuhinzi bwihariye 33% by'umusaruro mbumbe w'igihugu kandi bukorwamo n'abaturage bagera kuri 70%, nabwo buzitabwaho muri iyi gahunda. Biteganyijwe ko hazahindurwa uburyo bwo guhinga bigatangira gukorwa mu buryo burengera ibidukikije aho bizasaba ishoramari ryihariye rya miliyari $6,5 kugera mu 2050, miliyari $5,6 zikava mu bikorera.

Urwego rw'ubukerarugendo rwinjije miliyoni $455 mu 2022, na rwo ruri mu zizibandwaho aho hazagurwa ibikorwa byo guteza imbere ubukerarugendo bushingiye ku bidukikije.

Iyi gahunda kandi iri mu murongo w'Icyerekezo 2050, aho u Rwanda rwifuza kuba rufite izamuka ry'ubukungu n'iterambere bijyana n'inzira y'imikoreshereze n'imicungire y'umutungo kamere mu buryo burambye, hubakwa ubushobozi bwo guhangana n'ingaruka z'imihindagurikire y'ikirere.

Kugera mu 2030, u Rwanda rwifuza kuzaba rwaragabanyije ku rugero rwa 38% by'umwuka wangiza ikirere rwoherezayo.

Leta y'u Rwanda iteganya ko amafaranga akenewe azaturuka mu bikorwa bitandukanye, birimo inkunga z'amahanga ndetse n'ibikorwa by'ishoramari rishyirwa mu kurengera ibidukikije.

Muri iyi gahunda urwego rw’ubuhinzi narwo ruzitabwaho

Ubukerarugendo bufatwa nk’inkingi ikomeye y’ubukungu bw’u Rwanda

U Rwanda ruhagaze he?

Mu 2016 u Rwanda rwemeje amasezerano y'i Paris ku byerekeye imihindagurikire y'ikirere. Akubiyemo ingamba zo kugabanya izamuka ry'ubushyuhe ku Isi rikaguma munsi ya dogere celsius 2 nk'uko byari bimeze mu bihe bya mbere y'inganda, no gukomeza gukaza ingamba mu kugabanya ubwo bushyuhe ku buryo butarenga dogere celsius 1,5.

Harimo ingamba zo kongera ubushobozi bwo guhangana n'ingaruka mbi z'imihindagurikire y'ibihe n'izo kugira iterambere ry'ubukungu riri mu mujyo wo kugabanya imyuka ihumanya ikirere kandi rishobora guhangana na yo.

Ubu hafi 5,4% [angana na miliyoni 217,6 z'amadolari y'Amerika buri mwaka hashingiwe ku ngengo y'imari ya 2023/2024] agenerwa urwego rw'ibidukikije, cyane cyane mu bijyanye no guhangana n'imihindagurikire y'ikirere na gahunda zo kurengera ibidukikije.

Ibi bivuze izamuka rya 2,1% ry'amafaranga agenerwa uru rwego ugereranyije n'imyaka yo hagati ya 2008-2012.

Bimwe mu bikorwa bishorwamo amafaranga menshi harimo gutunganya ibishanga by’ubuhinzi

Iyi gahunda ya CNFS yuzuzanya neza n'intego z'u Rwanda zatumye hashyirwaho Ikigega cya Fonerwa, kuri ubu kimaze gukusanya miliyoni 300$, yashowe mu mishinga inyuranye irengera ibidukikije.

Mu 2023, u Rwanda rwamuritse uburyo bw'imikorere y'isoko rya 'carbon market' mu gihugu.

'Carbon market' ni uburyo bumeze nk'isoko risanzwe, aho Leta zitanga impushya [permits] ku bigo by'ubucuruzi bigira uruhare mu kohereza umwuka wangiza ikirere.

Impushya ikigo cyahawe, ziba zingana n'ingano y'umwuka kitagomba kurenza, cyakenera kuwurenza, kikagura izindi mpushya ku bindi bigo by'ubucuruzi, ariko byabindi biba bifite impushya zirenze ibyo zikeneye bitewe n'uko byohereza umwuka wangiza ikirere muke ugereranyije n'uwo byemerewe.

Rwabaye igihugu cya mbere mbere muri Afurika gikoze igikorwa nk'icyo.

U Rwanda kandi rwashyizeho urutonde rw'ibikwiye kugenderwaho mu gushora mu bikorwa birengera ibidukikije [Green Taxonomy], mu murongo wo kurushaho kunoza no koroshya uburyo bwo gushora imari muri uru rwego.

Iyi gahunda izatuma u Rwanda rukomeza kuba urugero rwiza mu kubungabunga ibidukikije mu Karere ndetse no muri Afurika yose.

Ntiwavuga ibimaze kugerwaho ngo wirengagize ko mu minsi yashize ku nshuro ya mbere, ku isoko ry'u Rwanda hagezeho impapuro mpeshamwenda zigamije kurengera ibidukikije zizwi nka “Green bonds”. Zari iza sosiyete itunganya amazi ya Prime Energy.

Ikindi ni uko Guverinoma y'u Rwanda izahagarika kwandika moto zikoreshwa na lisansi zitwara abagenzi mu Mujyi wa Kigali muri Mutarama 2025, hakazajya handikwa izikoreshwa n'amashanyarazi gusa, mu rwego rwo guteza imbere gahunda zibungabunga ikirere.

Ibi bikiyongera ku cyemezo Guverinoma y'u Rwanda yafashe muri Kanama 2024, cyo kongera igihe ubworoherezwe ku batumiza imodoka na moto bikoresha amashanyarazi, kugira ngo bikomeze kwishyura amahoro ku bicuruzwa byinjira mu gihugu ku gipimo cya zeru.

Imodoka na moto bikoresha amashanyarazi byishyura amahoro ku bicuruzwa byinjira mu gihugu ku gipimo cya zeru

Hari ibimaze gukorwa..

Mu biganiro byabaye ku wa 27 Ugushyingo 2024, mu nama yigaga k'uko ibikorwa by'imari byarushaho kwegerezwa abaturage, Umunyamabanga wa Leta muri Minisiteri y'Imari n'Igenamigambi Ushinzwe Imari ya Leta, Richard Tusabe, yabwiye IGIHE ko muri miliyoni 4,5$ yabonetse yashowe mu gukumira ingaruka z'imihindagurikire y'ibihe no gushyira mu bikorwa imishinga ijyanye no kurengera ibidukikije.

Ati 'Natanga urugero nko muri Pariki y'Ibirunga aho nk'amazi aturuka mu Birunga harebwe ni gute hashorwa imari kugira ngo aganishwe aho atari bwangize ibikorwa by'iterambere bihari, atabangamira abaturage bafite ibyo bahakorera bibatunze.'

Yavuze ko mu ishoramari ryakozwe hari n'iryakorewe mu bishanga binyuranye bikorerwamo ubuhinzi kugira ngo bube bunoze bityo ibishanga bibungabungwe.

Hari iryo gutunganya ibishanga birimo bitanu byo mu Mujyi wa Kigali ku buryo bugezweho rya miliyoni 80$, rizasiga bigizwe nka Pariki ya Nyandungu iherereye mu Karere ka Gasabo.

Tusabe ati 'Ibyo byose bishingira ko twakoze isuzuma mu gihugu hose, tukareba ahantu hateye impungenge kurusha ahandi, haba habangamiwe n'ingaruka z'imihindagurikire y'ikirere.'

Umunyamabanga wa Leta muri Minisiteri y’Imari n’Igenamigambi Ushinzwe Imari ya Leta, Richard Tusabe, yavuze ko muri miliyoni 4,5$ yabonetse yashowe mu gukumira ingaruka z'imihindagurikire y'ibihe no gushyira mu bikorwa imishinga ijyanye no kurengera ibidukikije

Umunyamakuru Eugene Anangwe ni we wari umuhuza w’amagambo

Habaye ibiganiro bigaruka ku ngingo zinyuranye zirimo kurebera hamwe ibyakorwa ngo bidukikije bikomeze bisigasirwe kandi haharanirwa iterambere rirambye

Hagaragajwe ko hakwiye ubufatanye bw’abantu batandukanye kugira ngo ibikubiye muri gahunda ya CNFS bizagerweho mu gihe cyagenwe

Ibi biganiro byari byitabiriwe n’abantu b’ingeri zitandukanye

Amafoto ya IGIHE: Ingabire Nicole

Ni nyuma y'inkuru IGIHE yabagejejeho ku wa 24 Ugushyingo uyu mwaka, yavugaga ko mu Karere ka Kamonyi, Umurenge wa Runda, Akagari ka Gihara, Umudugudu wa Rukaragata, umugore witwa Mukandayisenga Françoise w'imyaka 32, bikekwa ko yishwe n'umugabo we witwa Tuyizere na we w'imyaka 28, amuteye icyuma, we agahita acika.

Amakuru yavaga mu baturanyi n'abo mu muryango wabo, yavugaga ko uyu muryango wabanaga mu makimbirane, ari nabyo byaje kuvamo urupfu.

Umuvugizi wa Polisi y'u Rwanda mu Ntara y'Amajyepfo, SP Emmanuel Habiyaremye, yabwiye IGIHE ko kuri uyu wa 28 Ugushyingo 2024, ukekwaho kwica Mukandayisenga Alphonsine wo mu Karere ka Kamonyi, Umurenge Runda, Akagari ka Gihara, Umudugudu wa Rukaragata yatawe muri yombi ageze mu Karere ka Nyagatare.

Ati 'Bigaragara ko yashakaga gutorokera mu gihugu cy'abaturanyi.''

Kugeza ubu, Tuyizere yamaze kugarurwa mu Ntara y'Amajyepfo, akaba afungiye kuri Sitasiyo ya Polisi ya Gacurabwenge, mu Karere ka Kamonyi kugira ngo ashyikirizwe RIB.

Nyakwigendera Mukandayisenga Françoise, yashyinguwe ku wa 25 Ugushyingo 2024.

Indi nkuru bifitanye isano:

https://mobile.igihe.com/amakuru/u-rwanda/article/kamonyi-arahigishwa-uruhindu-nyuma-yo-gukekwaho-kwica-umugore-we-amuteye-icyuma

Mukandayisenga Alphonsine, bikekwa ko yishwe n’uwari umugabo we, amuteye icyuma

Ni mu mikino yakinwe kuri uyu wa Gatatu taliki ya 27 Ugushyingo 2024. Umukino wari utegerejwe na benshi ni uwo Liverpool yari yakiriyemo Real Madrid kuri Anfield.

Uyu mukino watangiye Liverpool ariyo iri hejuru ndetse ku munota wa 4 yashoboraga kuba yabonye igitego ku ishoti ryari rirekuwe na Darwin Nunez maze Raul Asensio agiye kwitsinda umupira ugarukira mu murongo.

Umukino wakomeje Liverpool ikomeza kubona uburyo imbere y’izamu gusa kububyaza amahirwe bikaba ibibazo.  Real Madrid nayo yagiye inyuzamo ikagerageza gusatira binyuze kuri Kylian Mbappé ariko ba myugariro ba Liverpool bakamubuza gutambuka.

Ku munota wa 24 Liverpool yongeye kurata igitego ku mupira Darwin Nunez yari abonye imbere y’izamu ashyizeho ukuguru Thibaut Courtois aratabara.

Amakipe yombi yakomeje kubona amahirwe imbere y’izamu gusa kugira uwayabyaza umusaruro bikaba ikibazo.

Igice cya mbere cyarangiye ari 0-0. Mu gice cya kabiri Liverpool yaje isatira gusa umunyezamu wa Real Madrid akaba ibamba akuramo imipira iremereye.

Ku munota wa 52 Alexis Mac Allister yaje gufungura amazamu ku mupira yahawe na Conor Bradley. Nyuma yaho Real Madrid yaje kubona penariti ku ikosa ryari rikorewe Lucas Vasquez maze iterwa na Kylian Mbappé ariko umunyezamu wa Liverpool ayikuramo.

Ku munota wa 70 Liverpool nayo yabonye penariti ku ikosa Ferland Mendy yakoreye Mohamed Salah aba ari nawe uyitera ariko ayitera ruguru y’izamu.

Kuwa 77 ikipe ya Liverpool yabonye igitego cya 2 gitsinzwe na Cody Gakpo ku mupira yahawe na Mohamed Salah. Umukino warangiye Real Madrid itsinzwe ibitego 2-0.

Kuva muri 2009 ni bwo bwa mbere ikipe ya Liverpool itsinze Real Madrid mu mikino ya UEFA Champions League.

Mu yindi mikino yakinwe ikipe ya FK Crevena Zvezda yo muri Serbia yatsinze VFB Stuttgart yo mu Budage ibitego 5-1, Sturm Graz yo muri Australia itsinda Girona yo muri Espagne 1-0, AS Monaco yo mu Bufaransa itsindwa Benfica yo muri Portugal ibitego 3-2 naho Aston Villa yo mu Bwongereza inganya Juventus yo mu Butaliyani 0-0.

Ikipe ya Bologna yo mu Butaliyani yatsinzwe na Lille yo mu Bufaransa ibitego 2-1, Celtic yo muri Scotland inganya na Club Brugge yo mu Bubiligi 1-1, Dinamo Zagreb yo muri Croatia itsindwa na Borussia Dortmund yo mu Budage ibitego 3-9 naho PSV Eindhoven yo mu Buhorandi itsinda Shakhtar Donetsk yo muri Ukraine ibitego 3-2.

Nyuma yuko imikino yo ku munsi wa gatanu irangiye, Liverpool yakomeje kuba ku mwanya wa mbere n’amanota 15, Inter iba kuwa kabiri n’amanota 13 naho FC Barcelona ikaba iri kuwa 3 n’amanota 12.

Alexis Mac Allister yishimira igitego cya mbere cya Liverpool yatsinze 

Kylian Mbappé yongeye kwibazwaho nyuma yo kurata penariti 

Icyo gikorwa cyabereye i Kigali kuri uyu wa 26 Ugushyingo 2024 aho iyo banki yabanje gusobanurira abafite ibigo by'ubuvuzi uko izo nguzanyo ziteye.

Izo nguzanyo zikubiye muri gahunda Equity Bank Rwanda yatangije mu Ukwakira 2024 yo korohereza abashoramari mu by'ubuvuzi kugera kuri serivisi z'imari hagamijwe kawaguka no kunoza serivisi zitangwa.

Umuyobozi ushinzwe ubucuruzi buto n'ubuciriritse muri Equity Bank Rwanda, Havugimana Jean yavuze ko kubona serivise z'imari ku bikorera bakora ubuvuzi bikiri hasi bitewe n'imbogamizi zirimo ari zo iyo banki yashatse gukuraho.

Ati 'Mu rwego rw'ubuzima hakenerwamo ibikoresho bihenze nk'amamashini.Twabageneye inguzanyo iri ku rwunguko ruto rwa 16% kandi n'ingwate basabwa itandukanye na kumwe banki zisaba ingwate iri hejuru y'inguzanyo bahawe.Twe twaragabanyije niba dutanze nk'inguzanyo y'ibihumbi 100 Frw twemera ingwate y'ibihumbi 80 Frw'.

Havugimana yakomeje avuga ko hari n'inguzanyo batanga zidasaba ingwate nk'izo kugura imashini zo mu buvuzi aho iyo banki izifatira ubwishingizi ku buryo niyo yagira ikibazo bitahombya nyirayo kugira ngo azakomeze ayishyure.

Yavuze ko kandi muri izo nguzanyo zigenewe abafite ibigo byu'buvuzi harimo n'izo batanga mu gihe bategereje ko ubwishingizi bw'abakiriya bubishyura.

Ati 'Abafite ibigo by'ubuvuzi hari aho bibafata amezi bategereje ko ibigo by'ubwishingizi bibishyura. Icyo gihe rero akazi gasa n'agahagarara ugasanga kugura imiti no guhemba abakozi birabagoye. Rero batuzanira inyemezabwishyu tukabaha ayo mafaranga noneho bazabishyura na twe bakabona kutwishyura ariko akazi katahagaze'.

Yongeyeho ko hari n'inguzanyo ijyanye no kongera imiti mu mavuriro ku buryo abakiriya babona iyo bakeneye yose, inguzanyo yo kubafasha kugira inzu y'aho bakorera ubuvuzi n'izindi zitandukanye.

Ukuriye ishami rishinzwe ibicururuzwa muri Equity Bank Rwanda, Mukarutesi Joyce yagarutse ku nguzanyo zashyizweho muri gahunda y'iyi banki ya 'Ecosystem' igamije gufasha abakora ubucuruzi kwagura ibikorwa byabo.

Ati 'Muri iyo gahunda dutanga inguzanyo ku bigo binini bikaguka, bigacururuza byinshi bikabasha no gufasha abacuruzi bato bikorana.Izo nguzanyo kandi zifasha abafite ubucuruzi buto kubona ubushobozi bwo kurangura byinshi ubucuruzi bwabo bukazamuka.Ibyo bifasha rero abacuruzi baba abanini n'abaciriritse gutera intambwe ifatika kuri buri wese ukoramo'.

Umwe mu bafite ikigo by'ubuvuzi wari witabiriye icyo gikorwa yavuze ko bishimiye kuba Equity Bank yarafashe iya mbere ikegera abafite amavuriro yigenga ngo bakorane kuko hari hakirimo icyuho.

Ati 'Abikorera mu rwego rw'ubuzima haracyarimo ikibazo kuko nko kwishyurwa amafaranga y'ubwishingizi bica mu nzira nyinshi bigafata nk'amezi abiri cyangwa atatu ndetse n'ibiciro dukoreraho ugasanga biri hasi'.

Izo mbogamizi yagarutseho yavuze ko zishobora gukemuka mu gihe habayeho gukorana n'ibigo by'imari ariko avuga ko urwunguko ku nguzanyo rukiri hejuru na none.

Kuri icyo cy'urwunguko, Equity Bank yasobanuye ko izakomeza gukorana n'abandi bafatanyabikorwa mu kureba uko ku bafite amavuriro yigenga rwakomeza kumanuka.

Abafite ibigo by’ubuvuzi basobanuriwe uburyo bashobora kubona inguzanyo muri Equity Bank ku nyungu nto cyane

Umuyobozi w'ishoramari rizanira impinduka umuryango mugari muri Equity Bank Rwanda, Kirezi Alice, yasobanuye ibyiza byo gukorana na Equity Bank

Abafite amavuriro banyuzwe n’izo nguzanyo nshya Equity Bank yagennye

Inkambi zose ziri mu Rwanda zirimo ibikorwa remezo by'ubuvuzi ku buryo urwaye ashobora kwivuriza ku kigo nderabuzima gifite ibikoresho n'abaganga, bimwe bikiri mu maboko y'Ishami ry'Umuryango w'Abibumbye ryita ku mpunzi, mu gihe ibindi byamaze gushyikirizwa Minisiteri y'Ubuzima.

Mu biganiro Minisitiri Maj Gen (Rtd) Albert Murasira yagiranye n'Abasenateri bagize Komisiyo y'Ububanyi n'Amahanga, Ubutwererane n'Umutekano muri SENA kuri uyu wa 27 Ugushyingo 2024, yagaragaje ko hari gutegurwa gahunda yo gushyira impunzi zose mu bwisungane mu kwivuza ku bukoreshwa n'abaturage b'u Rwanda.

Minisitiri Murasira yavuze ko iyo gahunda barimo kuyisuzuma ku bufatanye na Minisiteri y'Imari n'Igenamigambi (MINICOFIN) ndetse n'Ishami ry'Umuryango w'Abibumbye ryita ku Mpunzi (HCR), hagamijwe kureba amafaranga impunzi izajya yishyura buri mwaka.

Yagize ati 'Impunzi ziba mu mijyi zose ziba muri Mituweli ariko n'Ishami ry'Umuryango w'Abibumbye ryita ku Mpunzi ribibafashamo, bishobotse mu mwaka utaha kuri gahunda, impunzi zose zigomba kujya zivuriza kuri Mutuelle.'

Imibare ya Minema igaragaza ko impunzi 9808 ziba mu mijyi zifashwa kwishyura ubwishingizi mu gihe babisabye mu gihe ababa mu nkambi bavurwa ku buntu.

Ati 'N'aho baba [impunzi] basanzwe bivuriza mu nkambi bavurirwa ku buntu ugasanga n'Abanyarwanda iyo bagiyeyo na bo babavura, na bo hari igihe badatanga Mutuelle bavuga ko baturanye n'inkambi bazakomeza kwivuza.'

Yahamije ko mu gihe iyi gahunda yatangira gushyirwa mu bikorwa yazorohereza HCR mu kuvuza impunzi.

Uretse inkingo abenshi bahawe, impunzi zirenga ibihumbi 75 zasuzumwe hepatite B, mu gihe abarenga ibihumbi 89 basuzumwe hepatite C.

Imibare igaragaza ko u Rwanda rufite impunzi zirenga ibihumbi 135, zirimo izo mu nkambi ya Mahama icumbikiye ibihumbi 68.115. Izindi nkambi zirimo abantu benshi harimo Kiziba icumbikiye 14,350, iya Kigeme irimo 14,868, Mugombwa irimo 11,980 na ho mu nkambi ya Nyabiheke harimo 11,480.

Minisitiri Maj Gen (Rtd) Albert Murasira yagaragaje ko impunzi zigiye kujya zivurirwa kuri Mituweli