Category: Uncategorized

Mu gihe imishinga minini ikomeje gutangizwa hirya no hino mu gihugu, abaharanira uburenganzira bw'abafite ubumuga barasaba ko 10% by'imirimo iboneka muri iyo mishinga yagenerwa abantu bafite ubumuga.

Ihuriro ry'imiryango yita ku bafite ubumuga mu Rwanda (NUDOR) ryashyigikiye iyi gahunda, rishingiye ku kuba abantu bafite ubumuga bashoboye gukora imirimo inyuranye, haba iy'ingufu cyangwa iy'ubwenge. 

Ibi byagarutsweho nyuma y'uko Umuryango w'Abafite Ubumuga bwo Kutumva ugize impungenge ko imishinga minini yo kubaka imihanda i Kigali idateganya uburyo bwo kubaha akazi.

Ku wa 24 Werurwe 2025, Ikigo cy'Igihugu Gishinzwe Iterambere ry'Ubwikorezi (RTDA) cyatangije umushinga wa Miliyoni 100 z'amadolari (asaga miliyari 140 Frw), ugamije kuvugurura imihanda minini ya Kigali no kugabanya ubucucike bw'imodoka. 

Uyu mushinga uzibanda ku kuvugurura imihanda ya Chez Lando, Gishushu, na Kicukiro/Sonatubes. Biteganyijwe ko uzaha akazi k'agateganyo abantu bagera kuri 400, aho 30% bazaba ari abagore. Gusa, ntabwo haratangazwa umubare w'imirimo izagenerwa abafite ubumuga.

Abanyamuryango ba NUDOR bavuga ko abafite ubumuga bafite ubushobozi bwo gukora imirimo myinshi kandi idasaba imbaraga gusa. Perezida wa NUDOR, Beth Mukarwego, yagize ati: “Hari abafite ubumuga bashoboye gukora imirimo y'ingufu ndetse n'iy'ubwenge. Ushobora kuba utumva cyangwa utabona, ariko amaboko yawe akora neza”. 

“Ibi bivuze ko n'imishinga yo kubaka imihanda ikwiye kubaha akazi. Dufite abahanga mu bwubatsi bafite ubumuga, ariko iyo bagiye gusaba akazi ntibibukwa. Bagomba kwitabwaho.”

Dr Mukarwego Beth umwe mu bahamya ko imishinga itegurwa ikwiye no kujya yibanda ku bantu bafite ubumuga

Franklin Murangira Gakuba, uhagarariye VSO Rwanda, yavuze ko hakenewe igitekerezo cyiswe “intersectionality tool”, gituma politiki zijyanye n'akazi zigira uruhare mu gushyigikira abafite ubumuga binyuze mu kureba uko imyirondoro yabo ihurira n'ibindi bibazo nk'imibereho n'ubushobozi.

Ati: “Ubushishozi mu gufata ibyemezo bigamije guteza imbere abafite ubumuga ni ingenzi. Niba dushaka ko abakozi bose bagira amahirwe angana, tugomba kwita ku mbogamizi zinyuranye abafite ubumuga bahura na zo, maze tukareba uko twabaha amahirwe mu mirimo itandukanye.”

Ku bw'ibyo, abafite ubumuga basaba ko mu mishinga minini, cyane cyane iy'ubwubatsi, hashyirwaho ingamba zibemerera kubona imirimo. Nk’uko biri gukorwa mu gutanga 30% y'imirimo ku bagore, abaharanira uburenganzira bw'abafite ubumuga barasaba ko 10% by'imirimo yagenerwa bo.

Gukomeza kubashyigikira mu kubona akazi bizatuma barushaho kugira uruhare mu iterambere ry'igihugu, kandi bigabanye ubusumbane bukigaragara ku isoko ry'umurimo.

Gahunda yo gushinganisha ibihingwa n'amatungo yatangijwe mu 2019 aho izwi nka 'Tekana Urishingiwe Muhinzi Mworozi' hagamijwe gufasha abahinzi n'aborozi kwirinda ibihombo bya hato na hato binyuze mu kwishyurwa ibyangiritse, gufashwa gukora kinyamwuga no kwizerwa n'ibigo by'imari.

Umworozi wo mu Murenge wa Shangasha mu Karere ka Gicumbi witwa Uzabakiriho Gervais, yavuze ko gahunda ya Tekana Urishingiwe Muhinzi Mworozi yamufashije gukora ubworozi bwe atuje kuko aba yumva inka ze zigize ikibazo yahita ashumbushwa.

Yavuze ko afite inka 15 zose yashyize mu bwishingizi agasanga impamvu ituma benshi batabugana ari ukubera kutamenya neza iyi gahunda.

Ati 'Mfite mushiki wanjye tuva inda imwe, haje icyorezo ino aha apfusha inka ze enye ariko kuko nta bwishingizi yari afite yarahombye, iyo aza kuba afite ubwishingizi aba yarishyuwe.''

Uzabakiriho avuga ko abatari bajya mu bwishingizi bari mu gihombo kuko mu gihe amatungo yabo yagira ikibazo bahomba burundu mu gihe uri mu bwishingizi we ahita ahabwa amafaranga akagura indi. Yasabye Leta gushyira imbaraga mu kwihutisha uburyo sosiyete z'ubwishingizi zitanga amafaranga mu gihe umworozi yahuye n'ikibazo.

Shirimpumu Jean Claude wororera ingurube mu Murenge wa Kageyo mu Karere ka Gicumbi we yavuze ko amaze imyaka irenga 15 akora ubu bworozi ariko ko ubwo gahunda y'ubwishingizi yazaga yabafashije cyane.

Yavuze ko kugeza ubu ingurube ze ebyiri ari zo zagize ikibazo bigatuma yishyurwa harimo iyapfuye ibwagura n'indi y'impfizi.

Kugeza ubu uyu mugabo afite ingurube 102 ziri mu bwishingizi aho avuga ko yatangiranye n'iyi gahunda mu 2019.

Umuyobozi wa Gahunda y'Ubwishingizi muri Minisiteri y'Ubuhinzi n'Ubworozi, Joseph Ntezimana Museruka, yavuze ko gahunda ya Tekana Urishingiwe Muhinzi Mworozi ubwitabire ari bwiza ariko ko butari bwagera aho Leta yifuza kuko bukiri munsi ya 10%.

Yavuze ko muri gahunda ya Leta y'imyaka itanu, Leta yifuza ko ubwishingizi bw'ibihingwa n'amatungo bwagira uruhare mu kuzamura inguzanyo zikava kuri 6% zikagera nibura ku 10% by'izitangwa.

Ati 'Turashaka ko abahinzi n'aborozi bose bamenya ko iyi gahunda ihari, ikindi ibiza biri kwiyongera kubera imihindagurikire y'ikirere, imvura iri kuboneka ubu yagwaga mu kwezi kwa Gashyantare rero turifuza ko umuhinzi agira umutekano w'ishoramari rye kuko azajya aba yishingiwe.''

Ibihingwa biri muri gahunda ya Leta y'ubwishingizi harimo umuceri, ibigori biribwa, ibigori by'imbuto, ibirayi biribwa, ibirayi by'imbuto, urusenda, imiteja, imyumbati, Soya n'ibishyimbo. Ni mu gihe amatungo arimo inka, ingurube, inkoko n'amafi.

Kuva gahunda ya Tekana urishingiwe muhinzi mworozi yatangira mu 2019, abahinzi 161.445 bafata ubwishingizi bwunganiwe na Leta buri mwaka. Ni mu gihe aborozi babufata ari 49.854.

Abahinzi n'aborozi bamaze gushumbushwa miliyari 6,4Frw, abahinzi bahawe arenga miliyari 3,4 Frw mu gihe aborozi bo bahawe arenga miliyari 2,9 Frw.

Leta y'u Rwanda imaze gutanga arenga miliyari 5 Frw mu myaka itandatu kugira ngo abahinzi n'aborozi babashe guhabwa ubwishingizi kuko buri wese imutangira nkunganire ya 40%.

Umuyobozi ushinzwe ubwishingizi muri Minisiteri y’Ubuhinzi n’Ubworozi, Museruka Joseph yasabye abahinzi n’aborozi kugana ubwishingizi kuko bubafasha kudahomba

Aborozi bashinganishije amatungo yabo bishimira ko iyo agize ikibazo bishyurwa bakagura andi

Ubu buhinzi bukorwa mu buryo burambye aho abahinzi bakoresha uburyo butandukanye bufasha kongera umusaruro w'imyaka no kurinda ibidukikije.

Ishuri Rikuru ryigisha Ubuhinzi n'Ubworozi bubungabunga ubutaka (Rwanda Institute for Conservation – RICA) ku bufatanye na Minisiteri y'Ubuhinzi n'Ubworozi (MINAGRI), ikigo Mennonite Cental Committee n'Umuryango Mpuzamahanga wita ku Biribwa (WFP) byateguye inama y'igihugu ya mbere ku buhinzi bubungabunga ubutaka.

Iyi nama yabaye ku wa 28 Werurwe 2025, yahuje abafatanyabikorwa mu by'ubuhinzi baganira ku ngamba zikwiye zo kwamamaza no gushishikariza abahinzi uburyo bwo guhinga babungabunga ubutaka, kuko ari cyo gisubizo kirambye ku bibazo byugarije Isi bituruka ku mihindagurikire y'ikirere no kuba ubutaka bugenda busaza ntibube bugitanga umusaruro uhagije.

Umuyobozi Mukuru Wungirije wa RICA ushinzwe ubushakashatsi no gukwirakwiza ubuhinzi bubungabunga ubutaka, Dr. Ndambe Nzaramba Magnifique, yavuze ko mu mahame shingiro y'ubuhinzi bubungabunga ubutaka harimo kutarima ubutaka cyangwa guhinga gake, kuko ari byo byongera umusaruro mu buryo burambye.

Ati 'Kurimagura, gutema amasinde cyangwa se gucoca ntabwo tubishishikariza abahinzi kubikora.'

Yakomeje avuga ko ibyo bikubiyemo gukoresha uburyo bwo kudahinga (no-till) cyangwa guhinga gake (minimum-till) mu gihe cyo gutera imbuto no kurwanya ibyatsi byangiza, bidasabye guhingagura umurima wose. Ibi bituma habaho kwiyongera kw'ibinyabuzima mu butaka kandi bukagumana umwimerere wabwo, bukabika amazi igihe kirekire, ndetse bikagabanya n'isuri.

Ihame rya kabiri ni ukuba ubutaka buhora butwikiriye. Ibi bikubiyemo gutera ibihingwa bitwikira ubutaka mu bihe bitandukanye by'ihinga, gusiga ibisigazwa by'imyaka mu murima nyuma yo gusarura no gukoresha isaso aho bishoboka. Gutwikira ubutaka bigabanya isuri n'igabanuka ry'intungagihingwa, bituma ubutaka bubika amazi bigafasha abahinzi guhangana n'amapfa.

Ihame rya gatatu ni ugusimburanya ibihingwa, umurima ugahingwamo ibihingwa bitandukanye. Ibi bikubiyemo guhinduranya ibihingwa mu bihe bitandukanye by'ihinga cyangwa kuvanga imyaka itandukanye mu murima umwe. Iyi mikorere ifasha kongera intungagihingwa mu butaka, kubugira bwiza, bikajyana no kongera umusaruro. Binabafasha gukumira kwiyongera kw'indwara n'ibyonnyi.

Dr Ndambe yagize ati 'Birwanya indwara n'ibyonnyi. Iyo ukomeje gutera ubwoko bw'ibihingwa bimwe mu murima umwe usanga za ndwara zikomeza kuba nyinshi, uko dusimburanya rero ibihingwa bigabanya ibyonnyi hamwe n'indwara bigatuma umuhinzi adatera imiti myinshi, adakomeza ahangayikishijwe n'uko yabura umusaruro kubera indwara n'ibyonnyi.'

Inama ya mbere y'igihugu ku buhinzi bubungabunga ubutaka yitabiriwe n'inzego za leta, impuguke muri kaminuza, abikorera, abafatanyabikorwa mu iterambere, abahinzi n'amashyirahamwe afite ibikorwa bifite aho bihuriye n'ubuhinzi.

Umuyobozi muri Minisiteri y'Ubuhinzi n'Ubworozi ushinzwe Guteza Imbere Ubuhinzi Buvuguruye, Dr. Karangwa Patrick, yavuze ko ubuhinzi bubungabunga ubutaka ari imwe mu nkingi zikomeye mu kubaka ubuhinzi burambye.

Yavuze ko kuri ubu ubutaka bungana na hegitari 1000 ari bwo bukorerwaho ubuhinzi bubungabungabunga ubutaka ariko bifuza ko uwo mubare wakwiyongera, nk'uko bigaragara muri gahunda ya Leta y'imyaka itanu yo kwihutisha iterambere ry'ubuhinzi (PSTA 5).

Ati 'Intego dushaka kugeraho ni hegitari nibura ibihumbi 100 muri iri genamigambi rya PSTA5. Turashaka kuzakuba hafi inshuro ijana ubuso buhingwa mu buryo bwo bubungabunga ubutaka kuko tububona nk'imwe mu nkingi zikomeye mu guteza imbere ubuhinzi.'

Umuhuzabikorwa wa gahunda zo kwihaza mu biribwa mu muryango utegamiye kuri Leta Mennonite Central Committee, Habanabakize Thomas, yavuze ko MCC yashyize ingufu n'ubushobozi mu gushyigikira no guteza imbere ubuhinzi bubungabunga ubutaka.

Imwe muri gahunda zihari ni iyo bise Imirima shuri (Farm Field School), yashyizwe hirya no hino mu gihugu. Buri murima shuri uhuriza hamwe abahinzi 30 bahabwa amahugurwa, nyuma bagakoresha ubumenyi bwabo mu mirima yabo ari na ko banatoza batanu mu baturanyi babo.

Habanabakize yagize ati 'Dufata abahagarariye abahinzi, tukabatoza, na bo bagatoza abandi. Mu myaka 10 ishize, ubu buryo bwatanze umusaruro mwiza. Ubu turimo gukorera mu turere icyenda turimo Nyaruguru, Nyamagabe, Karongi na Rutsiro, kandi turatekereza kwagura tukagera i Kayonza, Ruhango, Burera n'ahandi. Abahinzi benshi twakoranye babonye ko umusaruro wabo wiyongereye, bitewe no gukora ubuhinzi bubungabunga ubutaka.”

Kimwe n'abandi bafatanyabikorwa mu buhinzi bubungabunga ubutaka, n'Umuryango Mpuzamahanga wita ku Biribwa (WFP) na wo uvuga ko ubu buhinzi bamaze kubona ko ari bwo bwonyine bwafasha abaturage guhangana n'ibiza no kuboneza umusaruro, bityo ukaba waragiye utera inkunga gahunda zigamije kwimakaza ubu buhinzi.

Umukozi wa WFP Rwanda, Richard Makuza, yavuze ko uretse gutabara mu gihe cy'ibiza, amapfa n'imyuzure, bagiye banafasha abahinzi bato bato barenga 127,000 mu makoperative arenga 425 hirya no hino mu gihugu kugira ngo babashe kubona amasoko no gufata neza umusaruro nyuma yo gusarura.

WFP kandi, ishingiye ku ngaruka z'imihindagurikire y'ikirere, yakoranye na Leta muri gahunda zo kubaka ubushobozi bw'abahinzi bwo guhangana n'ibiza n'imihindagurikire y'ikirere, bityo bagakomeza kuboneza umusaruro n'igihe bari mu bihe bigoye. Ibi byatumye WFP ibona ko gukora no gushishikariza ubuhinzi bubungabunga ubutaka ari yo nzira n'igisubizo byizewe.

Makuza yongeyeho ati 'Ni yo mpamvu twakusanyije inkunga yo gushyigikira imishinga y'ubuhinzi bubungabunga ubutaka. Twatangiriye ku mishinga y'igerageza mu turere dutanu kandi ubu twinjiye mu cyiciro gishya cyo gushyigikira gahunda zihuje intego za PSTA5.”

Gakuba Jonas ni umuhinzi utuye mu karere ka Kirehe mu Murenge wa Nasho, umaze imyaka irenga itanu akora ubuhinzi bubungabunga ubutaka. Yavuze ko kuva mu 2018 ari bwo yayobotse ubuhinzi bubungabunga ubutaka kandi ko bimaze kumubyarira umusaruro ugaragara.

Ati 'Iyo twahingaga ibigori ntabwo twarenzaga toni imwe kuri hegitari, ibilo 800 by'ibishyimbo byo kuri hegitari, ariko ubu aho dutangiriye gukora ubu buhinzi bubungabunga ubutaka umusaruro warazamutse bwikuba nk'inshuro 2, cyane kubera ko tubona amazi ku gihe kandi noneho ubuhinzi bubungabunga ubutaka bwatumye ubutaka bwacu bwongera kugarura umwimemerere wabwo kubera bya bisigazwa bisigara uko dusaruye mu mirima buri gihe.'

Umuyobozi muri Minisiteri y'Ubuhinzi n'Ubworozi ushinzwe Guteza Imbere Ubuhinzi Buvuguruye, Dr Karangwa Patrick, yagaragaje ko ubuhinzi bubungabunga ubutaka ari inkingi ikomeye mu kubaka ubuhinzi burambye

Umuyobozi Mukuru Wungirije ushinzwe Iterambere ry'Ubuhinzi muri RAB, Dr. Uwamahoro Florence, yari yitabiriye iyi nama y’igihugu ku buhinzi bubungabunga ubutaka

Umuyobozi Wungirije muri RICA, Dr. Ndambe Nzaramba Magnifique, yasobanuriye abitabiriye iyi nama amahame shingiro y'ubuhinzi bubungabunga ubutaka, bashishikariza abahinzi kugira ngo babashe kongera umusaruro igihe kirekire

Umuyobozi wa RICA, Dr. Ron Rosati, yagaragaje ko intego nyamukuru z’iyi Kaminuza ari uguteza imbere ubuhinzi bubungabunga ubutaka

Abashinzwe iyamamazabuhinzi na bo bari bitabiriye

Abayobozi batandukanye bitabiriye iyi nama

Ni ukwezi kwatangiye ku wa 31 Werurwe 2025. Ibi bitaro bivuga ko hari abarwayi bagera ku 3500 bari bategereje izi serivisi, gusa ko uku kwezi kuzasiga 70% byabo babonye izi serivisi.

Muri uku kwezi hazatangwa serivisi zigera ku icumi zirimo kubagwa mu bwonko, mu rutirigongo, amagufa, indwara zo mu nda, indwara z'abana, kubagwa mu ruhago ndetse n'imiyoboro y'inkari ku bagabo, indwara zifata mu muhogo, mu kanwa, mu matwi n'ahandi.

Umuyobozi Mukuru wungirije wa CHUK, Prof. Nyundo Martin, yabwiye RBA ko kubaga ubwonko ari byo byari bifite abarwayi benshi bategereje, kuko hari abagera kuri 470 bategereje n'abandi 965 bategereje kubonana n'umuganga.

Ubundi burwayi bufite abantu benshi ari amagufa n'abagabo bafite ibibazo by'imiyoboro y'inkari.

Ati ' Mu bafite ibibazo by'imiyoboro y'inkari, dufite abarwayi 840 bategereje, dufite n'abarwayi 380 bategereje kubagwa.'

Prof. Nyundo avuga ko uku kwezi kuzafasha kugabanya abarwayi bamaraga igihe kinini bategereje.

Uku kubagwa kuzakorerwa mu byumba umunani bigirwemo uruhare n'abaganga bagera kuri 45.

Umuyobozi Mukuru wungirije wa CHUK, Prof. Nyundo Martin, yatangaje ko abarwayi barenga ibihumbi bibiri bagiye kubagwa mu kwezi kumwe

Umuvugizi wa Guverinoma y'u Rwanda, Yolande Makolo, yatangaje ko ubutegetsi bwa Repubulika Iharanira Demokarasi ya Congo bufite uruhare rukomeye mu mpfu z'Abanye-Congo n'ubuhunzi bwa bagenzi babo.

Yasubizaga Perezida Félix Tshisekedi wa RDC washinje ku wa 31 Werurwe 2025 'ibihugu by'abaturanyi birimo u Rwanda' n'imitwe yitwaje intwaro uruhare mu mpfu z'Abanye-Congo 'barenga miliyoni' kandi ngo ubu bwicanyi bwari bugambiriye ubwoko runaka.

Makolo yagize ati 'Kuri abo bose bapfuye n'abakomeje gupfira muri RDC, bigirwamo uruhare n'abayobozi bo muri RDC mbere na mbere. Aba bayobozi ni bo mpamvu kandi ntibakwiye gushakira urwitwazo cyangwa ibibazo ahandi. Ni bo kibazo.'

Umuvugizi wa Guverinoma y'u Rwanda yasobanuye ko impinduka cyangwa ibisubizo muri RDC bizava imbere muri iki gihugu, agaragaza ko ikibazo ari uko abayobozi b'iki gihugu badafite ubushake bwo kugikemura.

Ati 'Impinduka cyangwa igisubizo bizava imbere. Abapfuye, abava mu ngo zabo n'impunzi babarirwa muri za miliyoni babazwa aba bayobozi bo muri Congo batagaragaza uruhare mu gukemura ikibazo, ahubwo bagakomeza kwibeshya ko bafite imbaraga.'

Nubwo Tshisekedi avuga ko ibihugu birimo u Rwanda byagize uruhare mu mpfu z'Abanye-Congo barenga miliyoni 10, Umuvugizi w'Ingabo za RDC, Gen Maj Sylvain Ekenge Bomusa, we yigeze kugaragaza ko ibyo atari ukuri.

Mu kiganiro cyatambutse kuri Televiziyo ya Leta tariki ya 15 Mata 2024, Gen Maj Ekenge yatangaje ko umutwe w'iterabwoba wa FDLR wagize uruhare mu mpfu z'aba Banye-Congo mu myaka 30 ishize.

Yagize ati 'FDLR itera Abanye-Congo, yica Abanye-Congo. Mu barenga miliyoni 10 bishwe mu myaka 30 ishize, FDLR ifitemo ijanisha rinini mu guteza impfu hariya.'

Raporo zitandukanye zirimo iz'impuguke z'Umuryango w'Abibumbye zigaragaza ko FDLR yakomereje ubwicanyi mu Burasirazuba bwa RDC nyuma y'aho abarwanyi bayo bagize uruhare muri Jenoside yakorewe Abatutsi mu 1994.

Uyu mutwe w'iterabwoba ukorana n'Ingabo za Leta ya RDC mu kurwanya ihuriro AFC/M23 rigenzura ibice byinshi mu burasirazuba bw'iki gihugu, ndetse Tshisekedi yawusezeranyije kuwufasha gukuraho ubutegetsi bw'u Rwanda.

Iyo Tshisekedi abajijwe kuri ubu bufatanye, asubiza ko FDLR ari umutwe udafite imbaraga, ugizwe n'abasaza kandi ufite abarwanyi bake badakwiye gutera u Rwanda impungenge, ariko byagaragaye kenshi ko mu bafatwa na AFC/M23 harimo n'urubyiruko.

Tshisekedi yashinje ibihugu birimo u Rwanda uruhare mu mpfu z’Abanye-Congo “barenga miliyoni 10”

Yolande Makolo yavuze ko ubutegetsi bwa RDC bufite uruhare mu mpfu n’ubuhunzi bw’Abanye-Congo kandi ko budashaka gukemura ibi bibazo

Kimwe mu bibazo byugarije aborozi hirya no hino mu gihugu, harimo no kugorwa no guteza intanga mu buryo buboneye.

Impamvu ni uko iyi serivisi itangwa n'abavuzi b'amatungo bo mu turere no mu mirenge, bunganirwa n'abikorera ariko bakiri bake.

Mushimiyimana Diane wo mu Mudugudu wa Gisozi, Akagari ka Nyanza, Umurenge wa Ngera, mu Karere ka Nyaruguru, yavuze ko ikibazo cyo kutabonera intanga ku gihe kibahombya.

Yavuze ko iyo bakeneye umuganga w'amatungo ku murenge wabo, hari igihe basanga ari mu nshingano nyinshi, bikanagira ingaruka mu kwima kw'inka.

Ati 'Byatubayeho inshuro zigera muri eshatu, inka ikarinda tukabura uduterera intanga kuko ababikora ari bake kandi bafite inshingano nyinshi, noneho yaterwa intanga itinze bigatuma isesa ntifate, kandi twatanzemo amafaranga.'

Umuyobozi Mukuru wa RAB, Dr. Ndabamenye Télésphore, agaragaza ko nyuma yo kubaka ikigo gifasha mu gutunganya intanga z'inka za kijyambere bikorewe mu gihigu, ubu hakurikiyeho no gukwirakwiza abaganga b'amatungo hirya no hino kugira ngo bafashe no mu kuziterera abaturage maze ubworozi buruhesho kuzamuka.

Ati 'Gahunda yo gutunganya ikigo cy'ubushakashatsi cya RAB-Songa, igamije kuvugurura icyororo cy'inka zitanga amata n'iz'inyama, dukoresheje ikoranabuhanga. Ni umushinga wa RDDP2 dufatanyamo na IFAD, bikazatuma rero twongera umubare w'inka z'icyororo zitanga umusaruro ushyitse.'

Dr Ndabamenye yakomeje avuga ko kugira ngo bagere ku musaruro wifuzwa, bizajyana no kongera abaganga b'amatungo begereye aborozi ku buryo bagera no ku kagari.

Ati 'Turashaka ko intanga ziva aha zikagera ku borozi kandi mu buryo bwihuse, ari nzima kandi mu gihe bazikenereye. Tuzafatanya n'abafatanyabikorwa binyuze mu bigo by'abaganga b'amatungo bikorera ndetse byaranatangiye mu turere tumwe.'

Yavuze ko hazajya habaho amasezerano hagati y'abaganga b'amatungo bagiye gukorera mu kagari runaka, noneho RAB ikomeze ibaherekeze, kugira ngo serivisi zose zigere ku borozi byihuse.

RAB ivuga ko iyi gahunda yashyirwamo imbaraga ku buryo mu mwaka w'ingengo y'imari utaha, aba baganga b'amatungo bazaba bageze mu tugari twose.

RAB igaragaza ko ikoranabuhanga rikomeje kuvugururwa aho mu minsi iri imbere umworozi azajya atererwa intanga z'inka yifuza ko ivuka atari ukugenekereza ngo nitabyara inyana izabyara ikimasa.

RAB ivuga ko nibura abaganga b'amatungo bagera ku 1200 bamaze guhugurwa ku buryo buboneye mu gutera intanga, bakaba bamaze kugira ibimasa 30 bitanga intanga nziza zikwirakwizwa mu gihugu cyose, ariko intego ari iyo kugira ibimasa 60 mu gihe cya vuba, uko ubushobozi bugenda buboneka.

Imibare ya RAB igaragaza ko mu mwaka w'ingengo y'imari wa 2023/24, habonetse doze z'intanga ibihumbi 188, mu gihe ikigo gishya cya RAB nikimara gukora neza, kizajya gitanga doze zirenga 400.000 n'insoro ziterekwa mu nka 3.000 buri mwaka.

Ikigo cy'Ubushakashatsi cya RAB-Songa, giherereye mu Karere ka Huye, Umurenge wa Kinazi, cyatangijwe n'Umwami Mutara Rudahigwa mu 1937, nyuma aza kucyegurira ibikorwa by'ubushakashatsi ku bworozi bw'inka, ari na byo kigikorerwamo kugeza n'ubu.

Kibarirwamo kandi inka amagana zifashishwa mu bushakashashatsi, muri zo harimo n'inyambo zo hambere.

Umuyobozi w’Ikigega giteza imbere Ubuhinzi n’Ubworozi ku Isi (IFAD), Dagmawi Habte Selassie (ibumoso), avuga ko bashyigikiye iterambere ry’ubworozi bw’u Rwanda

Umuyobozi Mukuru wa RAB, Dr Ndabamenye Télésphore, yavuze ko uko intanga z’inka ziboneka bizanajyana no kuzegereza aborozi hafi yabo

Ubu ni ububiko bw’intanga aho ziva zoherezwa hirya no hino mu gihugu

Muri RAB Songa haracyanaboneka inka z’inyambo

Kimwe mu bimasa kiri mu gikorwa cyo gutanga intanga, aho kibikora kabiri mu cyumweru

Iki kigo cyitezweho kongera intanga z’inka zizazamura icyororo cya kijyambere mu Rwanda

RAB Songa ifite ubuso bunini bukorerwamo ubworozi bw’inka ari na ko zikorwamo ubushakashatsi

Kimwe mu bimasa 30 byazanywe muri RAB Songa bizatanga icyororo cy’inka z’inyama

Ibi bimasa biba byaravuye mu mahanga nk’u Buholandi n’ahandi. Hamaze kuboneka 30, ariko intego ari ukugeza kuri 60

Iki kigo giheruka kuzura, cyungutse ibikoresho bigezweho bipima ubuziranenge bw’intanga z’ibimasa mbere yo gukwirakwiza mu gihugu

Nubwo iyi nama itari igamije gusimbura inzira zisanzwe, zashyizweho zigamije gukemura iki kibazo kiri hagati y'ibihugu byombi n'intambara mu Burasirazuba bwa Congo, ariko ni intambwe ikomeye mu gukemura amakimbirane hagati y'ibihugu byombi.

Abakuru b'ibihugu bashimye intambwe imaze guterwa binyuze mu biganiro bya Luanda na Nairobi, hamwe n'ibyavuye mu nama yahuje EAC na SADC i Dar es Salaam muri Tanzania ku wa 8 Gashyantare 2025.

Qatar imaze kuba ubukombe mu kugira uruhare mu guhosha amakimbirane hagati y'ibihugu bitandukanye bitumvikanaga ku ngingo runaka ndetse ingero kuri iyi ngingo ni nyinshi.

Ni igikorwa gifite imizi mu myaka ya kera, kikabumbirwa mu mpamvu eshatu zirimo ubufatanye n'ibihugu bitandukanye, amateka yacyo n'umuco w'iki gihugu cy'Abarabu.

Mu myaka 1990 ku butegetsi bwa Sheikh Hamad bin Khalifa Al Thani akaba n'umubyeyi wa Sheikh Tamim bin Hamad Al Thani usanzwe ari Emir wa Qatar, ni bwo Doha yafashe umurongo w'ubuhuza nk'uburyo bwo gutuma igira ijambo mu Isi, binatuma iki gihugu kidakunda guheza inguni, ibigifasha kugira uruhare mu biganiro bihuza impande zishyamiranye.

Abenshi bibuka ibya Rusesabagina wakatiwe igifungo cy'imyaka 25 mu 2021 nyuma yo guhamywa ibyaha by'iterabwoba byakozwe n'Umutwe wa FLN ushamikiye ku ishyaka rye, MRCD.

Icyo gihe yarafunzwe ndetse Amerika ikora uko ishoboye ngo afungurwe birananirana, nyuma Rusesabagina yanditse asaba imbabazi, Qatar ibigiramo uruhare afungurwa muri Werurwe 2023 yerekeza muri Qatar aho yavuye agana muri Leta Zunze Ubumwe za Amerika.

Muri Mutarama 2025, Qatar yagize uruhare mu guhuza Israel n'Umutwe wa Hamas byari bimaze amezi 15 bihanganye mu ntambara.

Mu buryo butatekerezwaga na benshi, hagezwe ku masezerabo y'agahenge, Abanya-Israel bafashwe bugwate na Hamas batangira kurekurwa na Israel itangira kurekura ibihumbi by'Abanye-Palestine yari yarafunze ndetse ibyo biganiro binaba inzira yo gutanga ubutabazi bw'ibanze.

Mu 2024, Qatar na bwo yagize uruhare mu biganiro bigamije guhosha intambara Ukraine ihanganyemo n'u Burusiya byari bigamije kumvikana hagati y'impande ku kutagaba ibitero ku bikorwaremezo by'ingufu.

Mu 2020, Qatar yagize uruhare mu kwakira ibiganiro byagombaga guhuza Leta Zunze Ubumwe za Amerika n'Aba-Taliban ndetse bivamo amaseserano yasinyijwe i Doha.

Ayo masezerano yatumye Ingabo za Amerika zari zimaze hafi imyaka 20 ziva muri iki gihugu, binatuma abo muri Afghanistan baganira ubwabo, intambara Amerika yari imazemo igihe kinini ishyirwaho akadomo.

Mu 2010, Qatar yagize uruhare mu guhosha amakimbirane yari amaze igihe ahuza Sudani na Tchad, na bwo i Doha hasinyirwa amasezerano, ibyari intambara birahagarara, ibi bihugu binini mu buso Isi ifite byongera guhahirana.

Qatar kandi yagize uruhare mu guhuza na none Abanya-Sudani mu 2011 no mu 2020 hagamijwe gusangira ubutegetsi n'uburyo bwo kubona amafaranga yo gufasha abagizweho ingaruka no gutuza abari barakuwe mu byabo.

Iki gihugu cyo mu Burasirazuba bwo Hagati kandi cyagize uruhare mu buhuza bwatumye Amerika na Venezuela bihererekanya imfungwa. Hari mu Ukuboza 2023. Icyo gihe imfungwa 10 z'Abanyamerika zatashye iwabo na Washington itanga umuturage wa Venezuela yari yarafunze.

Mu 2023 na bwo Qatar yagize uruhare mu gusinya amasezerano yo guhana imfungwa hagati ya Amerika na Iran.

Icyo gihe Abanya-Iran batanu bari bafunzwe na Amerika bararekuwe ndetse Abanyamerika nk'abo bari bafunzwe na Iran bararekurwa. Muri ibyo biganiro, harimo no kurekura miliyari 6$ za Iran zari zarafatiriwe na Amerika.

Mu 2024 kandi Qatar yagize uruhare mu irekurwa ry'Umunya-Autriche wari warafungiwe muri Afghanistan.

Uwahoze ari Umunyamabanga wa Leta Zunze Ubumwe za Amerika ushinzwe Ububanyi n'Amahanga, Antony Blinken (ibumoso) ari kumwe na Minisitiri w’Intebe akaba na Minisitiri w’Ububanyi n’Amahanga wa Qatar, Sheikh Mohammed bin Abdulrahman bin Jassim al-Thani. Ifoto yafatiwe i Doha ku wa 24 Ukwakira 2024

Uyu mugabo usanzwe ubarizwa muri Leta Zunze Ubumwe za Amerika n'umuryango we, yagaragaje ko mu ndirimbo zizaba zigize Album ye harimo iyo yise 'Agakiza' ari nayo izajya hanze mbere y'izindi, ndetse ivuga cyane ku kwakira agakiza no kwiringira Yesu.

Mu myaka itanu ishize, Patient Bizimana yashyize imbere gukora indirimbo za 'Gospel', ndetse hari n'izo yagiye ahuriramo n'abandi bahanzi. Ni urugendo ariko rwatumye anatekereza gukora Album, kugira ngo abakunzi b'umuziki bajye bumva ibihangano mu buryo bukubiye hamwe.

Kuva yajya muri kiriya gihugu yakoranye cyane na ba Producers bo mu Rwanda kugira ngo bamufashe kurangiza iyi Album nk'intego yari yihaye.

Mu kiganiro na InyaRwanda, Bizimana yavuze ko Album ye izumvikanisha agakiza yakiriye, kandi izafasha benshi kurangamira Kristo.

Ni Album avuga ko byamusabye imbaraga n'ubushobozi kugira ngo abashe kuyikorana na Producer Mastola. Ati 'Navuga ko idasanzwe, kuko byansabye kuyikorera hano hanyuma nkajya mvugana Mastola ibyo twakoze akabihuriza hamwe. Kugeza ubu, sindemeza umubare w'indirimbo zo kuri Album, ariko zizarenga 10.'

Patient Bizimana asobanura ko gukora Album biri mu murongo wo kugira ngo ibitaramo azakorera hirya no hino byo kwizihiza Pasika bizafashe benshi kwegera Imana. Ati 'Album iba igizwe n'indirimbo nyinshi. Iyo isohotse buri wese agiraho indirimbo ye, no muri ibi bitaramo rero hari zimwe mu ndirimbo nzaririmba ziriho.'

Uyu muramyi wamamaye mu ndirimbo nka 'Iyo neza' yasobanuye ko indirimbo ye 'Agakiza' iri kuri Album izajya hanze mbere y'uko atangira urugendo rw'ibi bitaramo yise 'Easter Celebration 2025' bizabera muri Canada ku wa 19 Mata 2025.

Ni ibitaramo azahuriramo na Aime Frank wamamaye mu ndirimbo zinyuranye ndetse na Serge Iyamuremye, usanzwe abarizwa muri Amerika n'umugore we.

Patient Bizimana yagaragaje ko 'Edition' ya mbere y'ibi bitaramo mu mahanga izabera muri Canada, aho ku wa 19 Mata 2025 azataramira mu mujyi wa Montreal, ni mu gihe ku wa 20 Mata 2025 azataramira mu Mujyi wa Ottawa ari kumwe n'abahanzi yatumiye.

Ati 'Mu myaka irenga 10 byabereye mu Rwanda, kandi byatanze umusaruro. Kuva naza hano muri Amerika urumva ko bitari kunyorohera kubikorera i Kigali ntahari. Rero, nahisemo gutangira kubitegura mpereye muri Canada, hafi y'aho mbarizwa. Uko iminsi ishize indi igataha mbona abafanyabikorwa nzabigeza hirya no hino no muri Kigali birashoboka cyane.'

Uyu muhanzi wamamaye mu ndirimbo nka 'Ndaje', yavuze ko muri uyu mwaka yahisemo gutangirira muri Canada, kandi ko umwaka utaha nabwo azakora igitaramo nk'iki mu kindi gihugu mu rwego rwo gufasha Abakristo kwizihiza umunsi wa Pasika.

Ati 'Ndatekereza gukorera ibitaramo hirya no hino ku Isi. Kandi nzajya nkorana n'abahanzi banyuranye barimo abo nzajya ntangaza mu bihe bitandukanye. Ibi bitaramo urabizi ko byubakiye cyane ku kwizihiza umunsi wa Pasika, nk'uko natumiraga abahanzi mpuzamahanga, no muri ibi bitaramo niko bizajya bigenda.'

Patient Bizimana avuga ko ibi bitaramo Easter Celebration byamuhuje n'abantu benshi, kandi bimwereka ko umuziki w'indirimbo zo kuramya no guhimbaza Imana ufite ejo hazaza heza.

Hejuru y'ibi kandi, yabonye ko Abanyarwanda bashyigikira abahanzi babo. Ati 'Ishusho byampaye ni uko Abanyarwanda muri rusange bashyigikira abahanzi kandi hari bagenzi banjye b'abahanzi ba 'Gospel' byafunguye amaso babona ko bishoboka.'

Akomeza agira ati 'Kuko tubitangira harimo inzitizi nyinshi ku bijyanye n'abantu batumvaga impamvu twishyuza amafaranga ku muryango. Abaterankunga (Sponsors) nabo babaga batari bumva neza gutera inkunga igitaramo cya 'Gospel' ariko ubu bikaba byoroshye, bitakigoye.' 

Patient asobanura ko yakoraga ibi bitaramo agamije guhesha Imana icyubahiro ndetse, ahamya ko byahesheje ikuzo umuziki wo kuramya no guhimbaza Imana mu Rwanda. 

Yumvikanisha ko gutegura ibi bitaramo byari mu murongo wo kumvira ijwi ry'Imana, kuko iyo bitagenda uko yari kubihagarika nyuma y'uko mu 2016 yibwe amafaranga y'u Rwanda agera kuri Miliyoni 10 Frw yari yavuye mu matike ya bamwe mu binyije muri iki gitaramo cyabereye kuri Expo Ground i Gikondo tariki 27 Werurwe 2016. 

Ati 'Byansabye kureba kure no kumvira Imana. Nagiye mpura n'imbogamizi nyinshi zari gutuma ibi bitaramo mbihagarika ariko numviye umukiza. Niyo mpamvu rero mfite n'icyizere cy'uko bidatinze cyangwa se mu gihe runaka nshobora kongera gutegura ibi bitaramo bya Pasika.'

Mu bahanzi bakomeye Patient Bizimana yazanye mu Rwanda harimo: Solly Mahlangu wo muri Afurika y'Epfo, Marion Shako wo muri Kenya, Sinach wo muri Nigeria ndetse na Alka Mbumba wo muri Repubulika Iharanira Demokarasi ya Congo, RDC.

'Easter Celebration' ni bimwe mu bitaramo byashyushyaga Umujyi! Kuko buri mwaka Abakristo babaga biteguye gutaramana n'abahanzi mpuzamahanga babaga batumiwe, hayikongeraho n'abahanzi bo mu Rwanda bahuriraga ku rubyiniro imbere y'ibihumbi by'abantu.

Ibi bitaramo byasize amateka azahora yibukwa. Nko mu  2018, umunyamuziki Sinach wo muri Nigeria yataramiye muri Parikingi ya Petit Sitade i Remera, atanga ibyishimo ku mubare mununi w'abantu bari bahateraniye, imvura iri ku bitugu byabo.

Ku wa 5 Mata 2015, Patient Bizimana ni bwo yatangije ku mugaragaro uruhererekane rw'ibi bitaramo, icyo gihe igitaramo cya mbere cyabereye muri Kigali Serena Hotel muri uriya mwaka, icyo gihe yari yatumiye abahanzi bo mu Rwanda barimo; Simon Kabera, Aime Uwimana, Diana Kamugisha, itsinda rya The Sisters ndetse na Shining Stars. 

Kenshi yakunze gusobanura ko ‘Easter Celebration Concert’ ari ihishurirwa yagize ryo gukora igitaramo kuri buri Pasika. Cyaje guhuhira mu ngata icyo yari asanzwe akora buri mwaka cyitwa ‘Poetic Evening of Praise and Worship’ aho icya nyuma yagikoze mu 2014.

Tariki 21 Mata 2019 yakoreye igitaramo nk'iki i Gikondo kuri Expo Ground aho yari ari kumwe na Redemption Voice na Alka Mbumba wo muri Congo Kinshasa wamamaye mu ndirimbo 'Fanda Nayo'.

Patient Bizimana amaze imyaka irenga 16 akora umuziki wubakiye ku gusingiza Imana no kugarura abantu kuri Yesu. Kandi, yaguye igikundiro cye mu ngeri zose.

Uyu muririmbyi wamamaye mu ndirimbo nka 'Iyo neza' yakoreye ibitaramo mu bihugu bitandukanye byo muri Afurika, ndetse mu 2022 yataramiye mu Burayi.

Bizimana avuga ko yiyumvisemo impano yo kuramya mu 2002, yinjira mu muziki mu buryo bw'umwuga mu mwaka wa 2007 nyuma y'igihe cyari gishize yinjiye mu Itorero Restoration Church.

Yavukiye muri Repubulika Iharanira Demokarasi ya Congo ku itariki ya 1 Gashyantare 1987 akurira mu Rwanda. Bivuze ko yujuje imyaka 36.

Yize amashuri abanza kuri Umubano Primary School iwabo mu Karere ka Rubavu ho mu Burengerazuba bw'u Rwanda, akomereza ayisumbuye muri Saint Fidele. Yiga icungamari muri Kaminuza yigenga ya Kigali (ULK). Patient Bizimana yatangaje ko ari gukora kuri Album izaherekeza ibitaramo bya Pasika hirya no hino ku Isi

Patient Bizimana yavuze ko Album ye izaba iriho indirimbo zihamagarira abantu kumenya Kristo

Bizimana yavuze ko yifashishije Producer Mastola mu ikorwa ry'iyi Album izaba iriho indirimbo zirenga 10 

Patient Bizimana yagaragaje ko yatangiye kwitegura gushyira ku isoko indirimbo ye yise 'Agakiza' 

KANDA HANO UBASHE KUREBA ZIMWE MU NDIRIMBO ZA PATIENT BIZIMANA

 “>