Category: Uncategorized

Ibi Lt Col (Rtd) Nyirimanzi yabivugiye mu gikorwa cyo kwibuka abari abakozi ba Banki Nkuru y'Igihugu bazize Jenoside yakorewe Abatutsi cyabaye ku wa 10 Gashyantare 2025.

Yavuze ko kuva Ababiligi batangira gukoloniza u Rwanda bashatse uburyo bwo gutandukanya Abanyarwanda bitwaje amoko, babanza gushyigikira Abatutsi nkana ngo ni bwoko buruta ubundi barabatononesha mu burezi bariga.

Nyuma ariko kwa kwiga kwatumye Abatutsi batangira inzira yo guharanira ubwigenge mu myaka ya 1960 ubwo n'ibindi bihugu bya Afurika byari biri kububona.

Byatumye Ababiligi bahindukira na none bashyigikira Abahutu bagaragagaza ko ari bwo bwoko buruta ubundi.

Gusa muri icyo gihe cyo gutonesha Abatutsi ni bwo Rudahigwa yavutse bituma abasha kwiga ndetse byiyongeraho kuba yari umwana w'Umwami Musinga wayoboraga u Rwanda.

Umwami Musinga ariko we ntiyakoranye neza n'Ababiligi kuko yabarwanyije mu buryo bweruye bituma bamwivugana, bamwambura ingoma bamuca no mu Rwanda atangira i Moba muri Repubukika Iharanira Demokarasi ya Congo (RDC).

Nyuma yo kwambura ingoma no guca Musinga bikozwe n'Ababiligi, umuhungu we Rudahigwa yahise yima ingoma asimbura se, kuko we yari yarize kuvugana n'abakoloni bakumvikana ntibimugore.

Lt Col (Rtd) Nyirimanzi ati 'Musinga amaze gutangira hariya i Moba mu 1944, Rudahigwa ntako atabahedahenze ati 'ndashaka gucyura data rwose ngira ngo nta cyo akibatwaye noneho yaripfiriye.' Baramubwiye bati 'amafaranga [byasaba] ni menshi ntabwo wayabona, na we ati 'mwebwe nimunyemerere gusa wenda nzayabure' bati 'ngaho yashake'.

Yavuze ko Rudahigwa yaje agatwerereza mu batware ngo acyure se, bidatinze abona amafaranga, ariko baramumwima.

Lt Col (Rtd) Nyirimanzi ati 'Yamaze kuyabona arayabaha ariko umugogo wa se [aho kuwumuha] bawunyuza hejuru y'u Rwanda bawujyana i Burayi.'

Lt Col (Rtd) Nyirimanzi yavuze ko uretse kwimwa umugogo wa se wari wazize kurwanya abakoloni, na we batangiye gukorana nabi ubwo yayoboraga inkundura yo gushaka ubwigenge.

Ibyo byaje gutuma Rudahigwa na we bamwivugana ubwo bamutegaga umutego ngo ajye i Bujumbura, bategure iby'urugendo yagombanga kugirira mu mahanga, ku kagambane umuganga we w'Umubiligi amutera urw'ingusho apfa mu 1959.

Mu 2017 uwari Visi Perezida w'Inteko Ishinga Amategeko Umutwe wa Sena, Gakuba Jeanne d'Arc yasabye inzego zibishinzwe gukora uko zishoboye ngo umugogo w'Umwami Yuhi V Musinga wajyanywe n'Ababiligi ugarurwe mu Rwanda.

Musinga yatwaye u Rwanda kuva mu 1896 kugeza mu 1931, yari se wa Kigeli V Ndahindurwa wabaye umwami wa nyuma w'u Rwanda akaba n'umuvandimwe wa Mutara III Rudahigwa watwaye mbere ye.

Ku wa Mbere tariki 7 Mata 2025 ubwo hatangizwaga iminsi 100 yo Kwibuka ku nshuro ya 31 Jenoside yakorewe Abatutsi mu 1994, Minisitiri w'Ubumwe bw'Abanyarwanda n'Inshingano Mboneragihugu, Dr Bizimana Jean Damascène, yagaragaje ko u Bubiligi bufite uruhare rukomeye mu mateka asharira y'u Rwanda yagejeje no kuri Jenoside yakorewe Abatutsi mu 1994.

Yakomeje avuga ko kimwe mu bibabaje ari uko iki gihugu cyavanguye Abanyarwanda, kigatangira no kwica Abami babo.

Ati 'U Bubiligi bwinjije irondabwoko mu Banyarwanda nk'iryari iwabo hagati y'Abafurama n'aba-Walloons, hatangizwa impinduramatwara hagati ya 1926 na 1932 yayobowe n'Ababiligi. Umwami Musinga yarabirwanyije bamucira muri Congo, tariki 12 Ugushyingo 1931 bimika umwana we, Rudahigwa nyuma y'iminsi ine.'

'Rudahigwa yahisemo kutarwanya abazungu, arabatizwa mu 1943, anegurira u Rwanda Kirisitu Umwami mu 1946, Papa Pio XVI byaramushimishije amugenera impeta ayambikwa tariki 20 Mata 1947. Byatumye Ababiligi bamworohera, afata ibyemezo bica akarengane ariko aharanira ubwigenge bw'igihugu birabarakaza.'

Ababiligi biyemeje gusimbuza Rudahigwa birangira bafashe icyemezo kibi cyo kumwica, atanga muri Nyakanga 1959.

Bizimana ati 'Nta kindi gihugu cya Afurika abakoloni biciye Abami babiri, umubyeyi n'umwana we ku maherere.'

Nyuma yo kwica Rudahigwa, u Bubiligi bwakurikijeho gushyira ku butegetsi ishyaka rya Paremehutu ryubakiye ku irondabwoko.

Mutara III Rudahigwa nta ko atagize ngo Ababiligi bamuhe umugogo wa se Yuhi V Musinga ngo ashyingurwe mu Rwanda, baranga bawujyana i Burayi

Ibi babisabwe ku wa 10 Mata 2025 ubwo bari mu gikorwa cyo kwibuka ku nshuro ya 31 Jenoside yakorewe Abatutsi mu 1994, mu murenge wa Nyarugenge, cyabereye muri Camp Kigali.

Tariki ya 10 Mata 1994 ni yo yishweho Abatutsi benshi mu Murenge wa Nyarugenge kuko nko mu Biryogo, abari mu Bitaro bya Kaminuza bya Kigali bishwe bigizwemo uruhare n'abasirikare ba Ex-FAR babaga mu kigo cya gisirikare cya Camp Kigali.

Muri Nyarugenge kandi haracyagaragara imibiri y'Abatutsi bishwe muri Jenoside mu 1994 itarashyingurwa mu cyubahiro. Nko mu minsi mike ishize hari imibiri 15 yakuwe ku biro bya Caritas ndetse no mu Murenge wa Kanyinya haboneka indi ine.

Ubuyobozi bw'Akarere ka Nyurengenge buvuga ko hari abinangiye bakanga gutanga amakuru y'ahajugunywe imibiri y'Abatutsi bishwe muri Jenoside, bagasabwa kuva ku izima kugira ngo iyo mibiri ishyingurwe mu cyubahiro.

Perezida wa IBUKA mu Karere ka Nyarugenge, Safari Hamudu, yavuze ko iyo umuntu ashyinguye uwe mu cyubahiro bimufasha kumva aruhutse mu mutima.

Yashimiye Ingabo zahoze ari iza RPA zakoze ibishoboka byose zigatabara Abatutsi bahigwaga muri Jenoside yakorewe Abatutsi mu 1994.

Umuyobozi Nshingwabikorwa w'Akarere ka Nyarugenge, Ingangare Alexis, yasabye abaturage binangiye kandi bazi aho imibiri y'Abatutsi bishwe iri, kuhavuga bagashyingurwa mu cyubahiro.

Yagize ati 'Haracyari imibiri yagujunywe hirya no hino ikeneye gushyingurwa mu cyubahiro, icyo twasaba ni uko umuntu wese uzi aho iyo mibiri iherereye ko yatumenyesha kugira ngo na yo ishyingurwe.'

Yanavuze ko bibabaje kuba ku nshuro ya 31 hibukwa Jenoside yakorewe Abatutsi, hari ahakigaragara ingengabitekerezo ya Jenoside, asaba abaturage kwirinda ibikorwa byose bibangamira abarokotse Jenoside, basigasira ubumwe mu Banyarwanda.

Yagize ati 'Tumaze kubona ibikorwa nk'ibi byo gupfobya Jenoside no kubangamira abakorotse Jenoside yakorewe Abatutsi mu 1994 ahantu hane. Ibyinshi tubona ni inyandiko zikorerwa ku mbuga nkoranyambaga n'amagambo akomeretsa abwirwa Abacitse ku icumu, ibi birimo ubutumwa bunyuzwa kuri telefone n'ababibabwira imbonankubone.'

Yavuze ko umuntu uwo ari we wese uzagaragaraho ingengabitekerezo ya Jenoside atazihanganirwa na gato.

Depite Kalisa Jean Sauveur ashyira indabo ku rwibutso rwa Jenoside yakorewe Abatutsi rwa Nyarugenge

Abafite imiryango ishyinguye muri uru rwibutso bashyizeho indabo

Urubyiruko rw’i Nyarugenge rwatambukije ubutumwa bukubiyemo amateka yaranze u Rwanda kuva ku ngoma ya cyami kugeza ubu

Perezida wa IBUKA mu karere ka Nyarugenge, Safari Hamudu, yasabye abinangiye banze gutanga amakuru y’ahari imibiri y’abishwe muri Jenoside yakorewe Abatutsi mu 1994, ko bava ku izima bakavuga aho iri igashyingurwa mu cyubahiro

Abayobozi bo nzego zitandukanye bifatanyije n’abaturage kwibuka abazize Jenoside yakorewe Abatutsi mu 1994 bo mu Murenge wa Nyarugenge

Abayobozi n'abakozi ba Hotel, Park Inn by Radisson Kigali bifatanyije n'abaturage b'Umurenge wa Nyarugenge mu kwibuka ku nshuro ya 31 Jenoside yakorewe Abatutsi 1994

Umuyobozi Nshingwabikorwa w'Akarere ka Nyarugenge, Ingangare Alexis yasabye abaturage binangiye bazi aho imibiri y'Abatutsi bishwe iri bavuga aho yarengeye bagashyingurwa mu cyubahiro.

Amafoto: Willy Rusa Prince

Ni imirimo inganda zifashwamo n'abiganjemo urubyiruko n'abagore ndetse abatangiye aka kazi mu myaka yashize harimo abakuyemo amatungo, abandi babasha kwiyubakira inzu.

Abasore n'inkumi bahawe akazi n'inganda zitunganya umusaruro w'ikawa barabyishimiye ndetse ngo bari gukora bizigama kugira ngo amafaranga bahembwa azababere umusingi w'iterambere rirambye.

Mu kiganiro na IGIHE, Musabyemariya Valentine w'imyaka 24, umaze imyaka ibiri ahawe aka kazi, avuga ko amafaranga yahembwe yayaguzemo ingurube n'inkoko ndetse ko afite intego y'uko bizagera muri Nyakanga afite inka.

Ati 'Amafaranga duhembwa ku munsi ntabwo ari amafaranga make ku muntu wayacunze neza. Urubyiruko rusuzugura akazi icyo nabagiraho inama ni ugukura amaboko mu mifuka bagakora bakiteza imbere.'

Tuyizere Emmanuel w'imyaka 26 afite inka ifite agaciro k'ibihumbi 600 Frw yaguze mu mafaranga yakuye muri aka kazi ko gujonjora ikawa.

Ati 'Intego mfite muri uyu mwaka ni ukugura inka ya kabiri. Hano baduhemba mu minsi 15. Iyo baduhembye nkuraho 5000 Frw nkayizigama mu itsinda, asigaye ngakuraho ayo ngura ibiryo by'amatungo, andi nanjye nkayarya.'

Niyogisubizo Jacques w'imyaka 25 avuga ko afite ingurube eshatu mu rugo iwabo.

Ati 'Intego mfite mu myaka iri imbere ni ukugura amabati nkubaka inzu, ngashaka umugore nkagira umuryango.'

Ni imirimo yahaye akazi abaturage benshi biganjemo urubyiruko, bakabasha kwiteza imbere binyuze mu kwizigamira no gukorana n'ibigo by'imari.

Intumbero z'urubyiruko rwahawe akazi mu mirimo yo kujonjora ikawa rufite intego yo kurushaho kwiteza imbere

Uwineza Divine avuga ko amafaranga ahembwa ayabyaza umusaruro binyuze mu kwizigamira no gukorana n’ibigo by’imari

Ibi yabigarutseho mu gikorwa cyo kwibuka ku nshuro ya 31 abahoze ari abakozi ba BNR bishwe muri Jenoside yakorewe Abatutsi cyabaye ku mugoroba wo ku wa 10 Mata 2025.

Ni igikorwa cyabereye ku cyicaro gikuru cya BNR hashyirwa indabo ku rwibutso rw'abagera kuri 22 bakoreraga iyi banki bazize Jenoside yakorewe Abatutsi.

Abari bitabiriye uwo muhango bunamiye izo nzirakarengane ndetse bacana urumuri rw'icyizere.

Guverineri wa BNR yihanganishije imiryango y'abahoze bakorera BNR kuko bagiye Igihugu kikibakeneye kandi bazira uko bavutse ariko anenga Leta yariho yeteguye Jenoside ikanayishyira mu bikorwa ndetse n'amahanga yarebeye abantu bicwa.

Yashimye Inkotanyi zahagaritse Jenoside ndetse n'intambwe Igihugu kimaze gutera iva ku miyoborere myiza ariko yibutsa Abanyarwanda ko bafite inshingano ikomeye yo gukomeza kunga ubumwe.

Ati 'Nk'Abanyarwanda twese dufite inshingano zo gusigasira ibyagezweho, twimakaza ihame ry'ubumwe n'ubudaheranwa, twirinda ivangura iryo ari ryo ryose kandi duharanira ko nta Jenoside izongera kuba mu Rwanda ndetse no ku Isi hose. 'Never Again Genocide' ntibibe imvugo gusa ahubwo bijye mu bikorwa.'

Perezida wa IBUKA, Dr. Gakwenzire Philbert yashimye BNR yakiye neza ubusabe uwo muryango wayihaye bwo kwita kuri bamwe mu barokotse Jenoside bafite ibikomere bya Jenoside bidakira kuko bakomeretse ku mubiri no ku mutima cyangwa abageze mu zabukuru kandi ari ba nyakamwe.

Dr. Gakwenzire ariko yibukije umuryango nyarwanda ko ubutabera ku bakoze Jenoside butarangiranye n'imirimo y'Inkiko Gacaca.

Ati 'Ubutabera ntibwarangiranye n'Inkiko Gacaca mu 2012 kuko itegeko risoza imirimo yazo ritegeka ko abakekwaho ibyaha bya Jenoside bagomba gushyikirizwa inzego z'ubutabera zisanzwe. IBUKA ishishikariza uwo ari we wese waba ufite amakuru ku muntu ukekwaho kugira uruhare muri Jenoside yaba ari mu Rwanda cyangwa mu mahanga kuyageza ku nzego z'ubutabrea cyangwa ku bakozi bacu.'

Uwimana Ignace Marie uhagarariye imiryango y'abishwe muri Jenoside bakoreraga BNR yavuze ko umugabo we yishwe Jenoside igitangira ku itariki 7 Mata 1994 ndetse nyuma n'abana bose bari barabyaramye barabica asigara wenyine.

Yashimye uburyo we n'abandi bo mu miryango y'ababuze ababo bakoreraga BNR bitaweho nyuma ya Jenoside, iyi banki ikabaha ubufasha bwari bukenewe ariko agaragaza ko hari aho bagikeneye kunganirwa.

Yagize ati 'Mwaduteye inkunga ariko twese twari tubayeho nabi benshi imishinga bari batangiye yagiye ihagarara kuko inkunga yadufashije gukemura ibindi bibazo twari dufite harimo inzara ubukene, uburwayi no kutagira aho kwikinga. Imishinga twari twatangiye ntiyagenze uko byagombaga kugenda. Turabasaba kongera kudutekerezaho.'

Hashyizwe indabo ku rwibutso rw’abakoreraga BNR bishwe muri Jenoside

Guverineri wa Banki Nkuru y'Igihugu (BNR), Hakuziyaremye Soraya yasabye Abanyarwanda ko Ntibizongere (Never Again) idakwiye kuba imvugo gusa

Perezida wa IBUKA Dr. Gakwenzire Philbert yibukije umuryango nyarwanda ko ubutabera ku bakoze Jenoside butarangiranye n'imirimo y'Inkiko Gacaca

Uwimana Ignace Marie uhagarariye imiryango y'abishwe muri Jenoside bakoreraga BNR yasabye iyo banki kongera kubaha ubufasha

Amafoto: Nzayisingiza Fidel

Yabitangaje mu kiganiro yagiranye na InyaRwanda, muri iki gihe u Rwanda n'Isi yose bibuka ku nshuro ya 31 Jenoside yakorewe Abatutsi, aho abarenga miliyoni bishwe bazira uko baremwe. 

Ishimwe Clement yavuze ko amateka yerekana uburyo ubuhanzi bukoreshwa mu buryo bubiri butandukanye: bushobora kubiba urwango, ariko nanone bukagira uruhare rukomeye mu kubaka amahoro arambye.

Mu gihe Jenoside yakorewe Abatutsi yategurwaga ndetse inashyirwa mu bikorwa, ubuhanzi bwarifashishijwe mu gukwirakwiza ingengabitekerezo yayo. Indirimbo zimwe zarakoreshwaga mu gukangurira urubyiruko kwica, mu gusakaza urwango no guheza bamwe mu Banyarwanda.

Ati 'Nk’uko ubuhanzi bwakoreshejwe mu gihe cya Jenoside yakorewe Abatutsi mu kwigisha amacakubiri, inzangano, ubwicanyi, n’ibindi bibi byinshi, ni na ko tugomba kubukoresha, tuvuga urukundo, ubumwe, no kubana mu mahoro.'

Yakomeje avuga ko ibi bikwiye kuba isomo rikomeye ku bahanzi b'iki gihe n'abazaza, agasaba ko inganzo y'uyu munsi ikwiye kuba iy'ubumwe, urukundo n'ihamagarira abantu kubana mu mahoro.

Aragira ati 'Ikindi cy’ingenzi kurushaho, nk’uko ijwi ry'umuhanzi rigera kure, ryakoreshwa nk'intwaro mu kurwanya abapfobya n’abahakana Jenoside yakorewe Abatutsi, cyane cyane muri iyi si y'imbuga nkoranyambaga.'

Umuhanzi afite ijwi rigera kure, ashobora kuvugira benshi, akaba intumwa y'amahoro n'ubumwe mu gihe hari abahakana bakanapfobya Jenoside yakorewe Abatutsi.

Ishimwe Clement yavuze ko by'umwihariko muri iki gihe Isi yugarijwe n'imvugo zibiba urwango ku mbuga nkoranyambaga, ari ingenzi cyane ko abahanzi bafata iya mbere bagatanga ubutumwa bushingiye ku kuri kw'amateka.

Mu Isi y'imbuga nkoranyambaga, amagambo mabi akwirakwira vuba. Ariko ni na ho ijwi ry'umuhanzi rifite ubushobozi bwo kugera kure, rikavuga ukuri, rikamurikira abashobora kuyoba.

Ubuhanzi ni ururimi rusange, rushobora kugera ku mitima y'abantu benshi mu buryo bworoshye. Mu gihugu cyahuye n'amateka akomeye ya Jenoside, ubuhanzi bufite imbaraga.

Indirimbo, imivugo, ubugeni n'ibindi bishushanya amateka, bifasha mu kubika ukuri ku byabaye, bikarinda ko byibagirana.

Ubutumwa bwubaka butangwa mu bihangano bikoze neza bushobora gusibanganya imvugo z'urwango ziba zikwirakwizwa.

Inganzo ishingiye ku bumwe n'ubwiyunge yongera icyizere, itera urubyiruko gukunda igihugu no kurwanya icyatuma habaho amacakubiri.

Abahanzi bashobora gutanga ubutumwa bugera ku bantu batari bake ku Isi, bityo bakamenya ukuri ku byabaye mu Rwanda.

Ishimwe Clement yasoje avuga ko ubuhanzi budakwiye gufatwa nk'ikirangaza, ahubwo bukwiye kwitabwaho nk'urubuga rw'ingenzi mu kubaka igihugu cyubakiye ku kuri, kwibuka no gukumira ko Jenoside itazongera kubaho ukundi.

Ishimwe Clement yatangaje ko ubuhanzi bukwiye kwifashishwa nk'intwaro ikomeye mu rugamba rwo guhangana n'abahakana bakanapfobya Jenoside yakorewe Abatutsi

Ubutumwa bwa Ishimwe Clement muri iki gihe cyo kwibuka ku nshuro ya 31 Jenoside yakorewe Abatutsi

Ni ubutumwa yanyujije ku rubuga rwa Instagram, aho yavuze ko nta na rimwe Abanyarwanda  bazigera baceceka imbere y’amacakubiri, urwango n’ipfobya rya Jenoside yakorewe Abatutsi.

Yagize ati: “Twiyemeje kurwanya ikibi, duharanira ukuri, dukangurira urubyiruko kumenya amateka nyayo, tugahaguruka igihe cyose twumvise cyangwa tubonye abashaka gusibanganya amateka yaranze igihugu cyacu.”

Miss Aurore Kayibanda yakomeje avuga ko kubaha inzirakarengane za Jenoside yakorewe Abatutsi, bisaba kurinda ukuri kw’ibyabaye, no kuzirikana ko kwibuka atari igikorwa cy’iminsi 7 gusa ahubwo ari inshingano z’iteka.

Kuva mu 2012 yakwambikwa ikamba rya Miss Rwanda kugeza n'uyu munsi Mutesi Aurore Kayibanda aracyabona abamwandikira ku mbuga nkoranyambaga n'ahandi atanga ibiganiro bamubwira ko ari Nyampinga w'ibihe byose w'u Rwanda.

Kayibanda abitse mu kabati ke ikamba rya Miss Rwanda yegukanye tariki 2 Nzeri 2012, irya Miss Fespam Panafrica yegukanye mu 2013 muri Congo Brazzaville, ndetse yahagarariye u Rwanda muri Miss Supranational yo mu 2013 yabereye i Minsk mu Mujyi wa Belarus.

Yigeze kubwira InyaRwanda, ko aya makamba yose yegukanye ayakesha gusenga, ikinyabupfura no kwihugura agakurikiza ibyo amarushanwa yamusabaga.

Uyu mugore ubarizwa muri Leta Zunze Ubumwe za Amerika, avuga ko itariki yambikiweho ikamba rya Miss Rwanda 2012 yahinduye ubuzima bwe mu buryo butandukanye, ihindura amateka ye kugeza kuri ubu.

Avuga ko ikamba rya Miss Rwanda ryafunguye amarembo y'ubuzima bwe, aho akomanze arakingurirwa rimuhesha akazi kugeza n'uyu munsi. Ati: 'Ikamba ryahinduye byinshi mu buzima bwanjye kuko hari utuzi twinshi nagiye mbona n'ubu nkibona kuko ryampaye urubuga.'

Miss Aurore Kayibanda yavuze ko Abanyarwanda batazigera baceceka imbere y’icyo ari cyo cyose cyabasubiza muri Jenoside

Raporo nshya y'ibiciro ku masoko yasohowe n'Ikigo cy'Igihugu cy'Ibarurishamibare, NISR, kuri uyu wa Gatanu, yerekana ko mu kwezi gushize kwa Werurwe ibiciro by'ibiribwa n'ibinyobywa bidasembuye byazamutseho 6,4% ku mwaka mu gihe ubaze ku kwezi ho byazamutseho 2,4%.

NISR igaragaza kandi ko ibiciro by'inzu zo guturamo, amazi, umuriro, gas n'ibindi bikomoka kuri peteroli byazamutse ku kigero cya 2,6% ubaze ku mwaka mu gihe ku kwezi ho byazamutse ku kigero cya 0,2%.

Ni mu gihe ibiciro by'ingendo byiyongereyeho 12% ku mwaka mu gihe ku kwezi ho byiyongereyeho 1,3%. Ibiciro bya za resitora n'amahoteli byiyongereyeho 14,1% ku mwaka ariko ku kwezi byiyongera kuri 2,3%.

Ikigo cy’Igihugu cy’Ibarurishamibare cyatangaje ko ibiciro by’ibicuruzwa ku isoko byiyongereyeho 6,5% mu kwezi gushize kwa Werurwe

Ibiciro by’ingendo na byo byiyongereyeho 12% ku mwaka

Ijambo rye yarivuze ku gicamunsi cyo kuri uyu wa Kane tariki 10 Mata 2025, muri Paruwasi Gatulika ya Rulindo, ahabereye umuhango wo gusezera bwa nyuma ku mugabo we witabye Imana, ku wa Mbere tariki 4 Mata 2025, aguye mu bitaro byitiriwe umwami Faisal. 

Alain Mukuralinda yari Umuvugizi Wungirije wa Guverinoma, kuva mu Ukuboza 2021. Umuhango wo kumusezeraho bwa nyuma witabiriwe n'abarimo Umunyamabanga Mukuru w'Umuryango FPR Inkotanyi, Gasamagera Wellars, Umuvugizi wa Guverinoma y'u Rwanda, Yolande Makolo n’Umuvugizi wa Polisi, ACP Boniface Rutikanga n'abandi.

Martine Gatabazi yatangiye ijambo rye ashima abamubaye hafi muri ibi bihe by’akababaro. Ati “Bavandimwe nshuti, turi hano imbere yanyu kugirango tubashimire tubikuye ku mutima. Uko mwadutabaye, uko mwadufashe mu mugongo mukimara kumva inka y’inshamugongo, kuva ku wa Kane bamwe muri mwebwe muri kumwe natwe, muduhoza, mutubwira amagambo adukora ku mutima. Ndagirango tubashimire.” 

Martine Gatabazi yasabye ko asezera umugabo we mu rurimi rw’Igifaransa, kuko “buri gihe iyo twaganiraga ibintu bivuye ku mutima namuganirizaga mu Gifaransa.”

Yavuze ko bari bamaze imyaka 29 babana, kuva bakiri abanyeshuri i Louvain-la-Neuve i Bruxelles mu Bubiligi, aho basangiye inzozi, ibyishimo, n'ibibazo.

Martine avuga ko Alain yari umuntu w'indashyikirwa, wuzuye imbaraga, inzozi, n'ishyaka. Ubu butumwa bugaragaza uburyo Alain yafataga umwanya mu rugendo rwe rwo gufasha abandi, gukunda umuziki, politiki, ndetse no kugira ibiganiro byubaka.

Avuga ko Alain atigeze amuha umwanya wo kuruhuka, ahubwo buri munsi wabaga ari umunsi mushya wo kuganira, gusangira ibyishimo no guharanira ubutabera. 

Martine yizeza Alain ko azakomeza gufata neza abana babo, Nella na Tony, ndetse ko azabatoza indangagaciro z'ubumuntu, ubufasha, no guharanira gukora ibyiza nk'uko Alain yabibabwiye.

Avuga ko azabatoza (abana) ibitekerezo byiza Alain yasize, kandi akabatoza kubaha no gukunda izina rya se, kugira ngo bazagire imibereho ikomeye n'icyubahiro.

Ati 'Nella na Tony, ni impano y'agaciro Alain yasize. Ndizeza ko nzabatoza gukunda no kubaha, nk'uko Alain yabibabwiye,' Martine yazamuye umutima, ati 'Nzajya mbabwira inkuru z'umugabo mwiza, imbaraga z'umugabo […] ariko wasize isomo rikomeye ku bantu bose.'

Martine kandi yemeza ko azakomeza kubaho mu buryo Alain yamwigishije, atazatezuka ku ntego yo kugera ku byiza mu buzima. Yiyemeza gukomeza kuba umuntu w'ubuntu, no kurushaho gukora ibikorwa byiza, nk'uko Alain yabimubwiye kuva ku munsi wa mbere batangiye kubana.

Ubutumwa bwe burimo icyizere cyo gukomeza kugira imbaraga, aho ashimangira ko Alain agiye guhura n'abantu yakundaga, barimo Papa we, ndetse n'abandi bantu. Yizeye ko Alain azakomeza kubarinda, ari hamwe n'abandi bantu bo mu muryango n'inshuti bari mu ijuru.

Mu mpera, Martine asezera Alain mu buryo bw'umwihariko, avuga ko yabuze Alain ariko ko azahora yibuka ko ari umugore we, kandi ko azakomeza kumukunda igihe cyose, nk'uko yabikundaga.

Yanagarutse ku mazina arimo 'Carotte', 'Papaye', 'Umwana mwiza', Alain Mukuralinda yakundaga gukoresha mu kugaragaza urukundo amukunda. 

Hari aho yavuze ati 'Wa mugore ugucumbikiye uramusize, urigendeye [Iri jambo Alain Mukuralinda yarikoresheje muri Rwanda Day ya 2019 avuga ku rugendo rwe n'umugore, umuziki no kwinjira muri Politiki]. 

Carotte, ni ijambo rishushanya uburyo Alain yari asanzwe amukunda cyane; Papaye ni indi mvugo ikunda gukoreshwa n'abantu basangiye urukundo, ni mu gihe umwana mwiza ari ijambo ryerekana uburyo Alain yishimiraga umugore we Martine. 

Martine Gatabazi, umugore wa Alain Mukuralinda yavuze ko azahora azirikana ibihe byaranze imyaka 29 bari bamaranye 

Martine yavuze ko umugabo we yakoze ibikorwa by’indashyikirwa, kandi amushimira ubuzima babanyemo 

Gusezera bwa nyuma kuri Alain Mukuralinda, byabereye muri Paroisse Gatulika Rulindo, kuri uyu wa Kane tariki 10 Mata 2025 

REBA HANO IJAMBO  RYA MARTINE GATABAZI ASEZERA KU MUGABO WE

“>

Hodari Marie Rose wari ufite imyaka 18 ubwo Jenoside yakorerwaga Abatutsi, yavukiye i Shyorongi muri Rulindo.

Mu buhamya bwe yavuze ko mu 1991 ari bwo iwabo babasenyeye bahungira mu Gatenga ndetse ni ho Jenoside yabaye batuye.

Gusa Se wari umwarimu yishwe rugikubita kuko mu gitondo indege ya Habyarimana imaze guhanurwa, abarinzi be bagiye mu rugo rwabo barabasaka ndetse birangira bamurashe.

Aho bari batuye bagize amahirwe yo guhishwa n'umuntu ariko wari ufite abana babiri bazinduka bajya kwica abantu, ababwira ko yakiriye Yesu nk'Umwami n'Umukiza we bityo adashaka kuzabazwa amaraso yabo.

Ku wa 10 Mata 1994 yarabaherekeje abageza muri ETO Kicukiro kuko ari ho n'abandi Batutsi benshi bari bahungiye, hari n'ingabo za MINUAR. Basanze amashuri yaruzuye kubera ubwinshi bw'abahahungiye, baguma mu kibuga.

Yavuze ko nka saa Kumi n'Imwe za mugitondo ku wa 11 Mata, habyutse hari urusaku mu mashuri ubona ko ibintu bitameneze neza, ariko uko bwagendaga bucya ababyeyi barimo batangira kurira bati 'twabahungiyeho none muradusize?'

Ati 'Ababiligi wabonaga bafashe gahunda ntakuka, bagapakira ibintu byabo, kuko njye nari mu kibuga inyuma natwe tukarira ababyeyi bagasenga ngo mwatubabariye, mudusize mu menyo y'urupfu koko?'

Bamaze kubona nta yandi mahitamo basigaranye umwe mu bagabo bari aho yababwiye ko bashaka uburyo bahungira kuri sitade Amahoro nubwo bamwe batari bazi n'aho iherereye.

Batangiye gukiza amagara yabo, bamanuka biruka, bakanyura mu nzira no mu bisambu ariko abantu bari hirya bakabakwena ngo 'dore ba Batutsi MINUAR irabataye.'

Bageze ahazwi nka Sonatubes bagwa mu gico cy'abasirikare ba FAR, barababwira ngo 'mugiye guherekeza Habyarimana?' babategeka kwicara hasi ngo bashake aho babashyira.

Ati 'Baravuga ngo imyanda igomba kujya mu yindi, ngo n'ubundi Habyarimana bagomba kumworosa.'

Bahise babazamukana babasubiza i Nyanza ya Kicukiro baherekejwe na y'imodoka ya gisirikare, ushatse kuvamo ngo yiruke bakamurasa. Bageze Kicukiro Centre bahamagara abakarani bari aho ngo bajye kwica Abatutsi.

Muri urwo rugendo abagiye kwica bagendaga bazinze akaguru k'ibumoso k'ipantalo, bakazingura ak'iburyo kandi bakagira ikintu bafata mu ntoki nk'ikimenyetso cyerekana abatagomba kwicwa.

Bazamutse babatoteza, babatuka ariko bageze i Nyanza ya Kicukiro barababwira ngo bahagarare bageze aho bagomba kubahisha.

Hodari wigaga mu mwaka wa Gatatu muri APACOPE, yari afite inote ya 100 Frw n'isaha mu mufuka, yumva yabitanga kugira ngo yicishwe isasu kuko yabonye igihe Se araswa atagaraguritse.

Abicanyi babajije ushaka gupfa byihuse Hodari aba azamuye akaboko mu ba mbere, baba baramurashe, isaru rinyura muri murumuna we nyina yari yamuhaye ngo amufate akaboko, nibapfa bapfane. Abandi babateyemo grenade amaraso amwuzuraho n'ibice by'imibiri y'abantu bimwuzura ku mugongo.

Umwana w'umukobwa umwe yavuze ko Se ari Umuhutu nyina akaba Umututsikazi ariko abicanyi bararitsira ngo 'ubwo mwese byaza kurangira mubaye Abahutu.'

Bigeze nka Saa Kumi n'Ebyiri na 45' amasasu abashiranye, na grenade zababanye nkeya bavuze ko batashye ariko mu gitondo bagaruka guhorahoza abaraba bagihumeka.

Ku wa 12 Mata abicanyi basubiyeyo bajya mu mirambo umwe amukozeho yumva akiri muzima, amukuramo aterera ku ruhande, ndetse amukubita ubuhiri mu mutwe ku buryo aho hantu hatongeye kumera umusatsi. Nyuma ya Jenoside yakorewe Abatutsi byatumye ajya ava imyuna mu buryo budasobanutse.

Yari asigaye atabaza umuhisi ngo amwice

Uko Hodari yari aryamye aho mu mirambo harimo n'undi mukobwa ukiri muzima bakajya kurigata urume mu rutoki rw'umukecuru hanyuma bakagaruka ahari imirambo y'ababo.

Ni na ko amasasu yacicikanaga hejuru yabo, hagera abantu bambaye impuzankano, Hodari azunguza akaboko ngo abereke ko hari abantu batapfuye ariko ari no kubasaba ngo bamwicishe isasu kuko n'ubundi yumvaga adateze gukira.

Ati 'Baratwegera baravuga ngo twebwe ntabwo twica, turi Inkotanyi, ngo niba mutari mwapfa muzabaho.'

Kugira ngo Abasirikare b'Inkotanyi babashe kubakura aho mu mirambo bakuraga inzugi, bagahambiraho ibiti barangiza bagashyiraho abagihumeka, babageza ku musozi wa Rebero.

Ku rundi ruhande ariko Hodari yafashe murumuna we (Cadette wari bucura) wari wishwe amushyira mu gihuru kugira ngo nyuma azabashe kubona umubiri we.

Nyuma yo kurokorwa kandi yahawe ubuvuzi, aza kubonana n'abavandimwe be babajya gushakisha imibiri y'ababyeyi n'abavandimwe babo haboneka uwa Se, Cadette na Beninka Cecille.

Ati 'Twabanye n'imibiri itatu igihe kirekire tugira amahirwe ko twandikiye ubuyobozi icyo gihe dubasa uburenganzira ngo tuyijyane hamwe badusenyeye mu 1991.'

Ubusabe bwabo bwaremewe, bahamagara abavandimwe n'abantu bagiye baziranye bajya kubashyingura ku ivuko, ndetse uba umunsi w'ibyishimo ko bashyinguye abantu babo.

Nyuma baje kuvanwa aho iwabo bashyingura mu cyubahiro ku Rwibutso rwa Jenoside rwa Kigali ruri ku Gisozi, mu gihe mama we na musaza we witwa Baraka Benjamin bashyinguye mu Rwibutso rwa Nyanza ya Kicukiro.

Ababiligi mubabwire ko nkiriho

Abasilikare b'Ababiligi zari muri ETO Kicukiro bari 97, bayobowe na Col Luc Marchall wari wungirije Gen Romeo Dallaire.

Aba basirikare bahamagajwe n'igihugu cyabo ngo bazinge utwangushye batahe nyuma y'uko bagenzi babo barindaga Minisitiri w'Intebe Agathe Uwiringiyimana bishwe, na we bagahita bamwica.

ETO Kicukiro yari yarahungiyemo Abatutsi barenga 4000, ndetse ku ruzitiro rwayo hahoraga Interahamwe zishaka kubica ariko zigakomwa mu nkokora n'ingabo za Loni zari zigihari.

Hodari yavuze ko yifuza kubwira Ababiligi ko nubwo babasize mu menyo y'urupfu, hari abarokotse bakiriho.

Ati 'Ababiligi badutaye mu menyo y'urupfu mubambwirire ngo Hodari Marie Rose aracyariho, ubu ntabwo afite imyaka 53 y'amavuko ahubwo afite 31 yo kuzuka, afite abana babiri bafite ingufu, ni abanyeshuri, ni abahanga, ni umubyeyi, ibikomere byaravuwe kandi yarabungabunzwe. Uretse kubabarira gusa ariko badutaye mu kangaratete.'

Urubyiruko rurenga 8600 rwitabiriye kwibuka i Nyanza ya Kicukiro

Uyu musozi wiciweho Abatutsi benshi batereranwe n’Ingabo z’u Bubiligi