Category: Uncategorized

Kuri uyu wa Kabiri ni bwo ikipe ya Mukura VS yari yakiriye Rayon Sports kuri Stade mpuzamahanga ya Huye.  ‎‎Uyu mukino wagombaga gutangira saa kumi n’imwe, watangiye utsinzeho iminota 28 kubera amatara yari yatinze gucanwa. 

‎‎Nyuma y’uko uyu mukino utangiye bigeze ku munota wa 17 urumuri rw’amatara rwabaye rucye ubundi umukino uba uhagaritswe.

‎‎Hashize iminota 3 umukino wongeye gukomeza ariko urumuri rw’amatara rwongera kuba rucye umusifuzi aba ahagaritse umukino.

‎‎Iki kibazo cy’urumuri rucye rw’amatara cyakomeje ubundi Komiseri w’Umukino, Hakizimana Louis, yemeza ko umukino udakomeza.

Biteganyijwe ko ‎‎Komisieri aratanga raporo mu ishyirahamwe ry’umupira w’amaguru mu Rwanda, FERWAFA ubundi akaba ariryo rifata umwanzuro w’igihe umukino uzakomereza haherewe ku minota 20 yari imaze gukinwa cyangwa hagafatwa undi mwanzuro urimo na mpaga ku ikipe yari yakiriye.

‎

Umukino wa Mukura VS na Rayon Sports wasubitswe utarangiye kubera ikibazo cy’amatara 

Source : https://inyarwanda.com/inkuru/154633/umukino-wa-mukura-vs-na-rayon-sports-wasubitswe-utarangiye-kubera-ikibazo-cyamatara-154633.html

Biravugwa ko imyanzuro yemeza ko ingabo za SADC zigomba guca mu Rwanda zigiye gutaha yafatiwe mu nama yabaye ku wa Gatanu w'icyumweru gishize, yahuje abagaba bakuru b'ingabo z'ibihugu bya Afurika y'Epfo, Tanzania na Malawi bifite ingabo muri Repubulika ya Demokarasi ya Congo (RDC).

Izo ngabo ziri mu Burasirazuba bwa RDC mu butumwa buzwi nka SAMIDRC kuva mu Ukuboza 2023. Amakuru aturuka ahabereye inama avuga ko ziteganyijwe gutahukanwa zinyuze ku butaka bw'u Rwanda, aho guhita zicishwa ku kibuga cy'indege cya Goma nk'uko byari byemejwe mbere.

Izi ngabo zifatanyaga n'iza Leta ya Kinshasa, imitwe yitwaje intwaro irimo uwa Wazalendo na FDLR, ndetse n'ingabo z'u Burundi, mu rugamba rwo kurwanya umutwe wa M23.

Nyamara ubwo M23 yigaruriraga umujyi wa Goma, izo ngabo zabuze uko ziwuvamo kuko abarwanyi ba M23 bari barawukikije.

Ku wa 13 Mata 2025, umutwe wa M23 binyuze mu itangazo rya AFC/M23, wasabye ko ingabo za SADC zitahukanwa vuba, uzishinja uruhare mu bitero ingabo za Leta ya Congo zagabye i Goma ku itariki ya 11 Mata 2025, nubwo ingabo za SADC zabyamaganaga.

Ibi bibaye mu gihe hari hamaze kwemezwa ko izo ngabo zacyurwa zinyuze ku kibuga cy'indege cya Goma, nyuma yo kugisana.

Ariko mu itangazo rya nyuma ryasohowe na SAMIDRC, rivuga ko gukoresha ikibuga cy'indege byadindiza gahunda yo kuzicyura, bityo hafatwa icyemezo ko zicishwa ku butaka bw'u Rwanda.

Iryo tangazo ryongeraho ko umuryango wa SADC ugomba kugirana ibiganiro na Leta y'u Rwanda kugira ngo yemere ko izi ngabo zicishwa ku butaka bwayo.

Source : https://kasukumedia.com/ingabo-za-sadc-zigiye-gutahuka-zinyuze-mu-rwanda/

Ahagana saa munani z'igicamunsi cyo kuri uyu wa Kabiri, tariki ya 15 Mata 2025, humvikanye urusaku rw'imbunda hagati y'inyeshyamba za Mai-Mai z'Abapfulero n'iz'Ababembe, mu ntara ya Kivu y'Amajyepfo, muri teritwari ya Fizi.

Amakuru aturuka mu gace ka Manga gaherereye muri zone ya Ubwari, hafi y'umujyi wa Baraka, yemeza ko imirwano ikaze yabaye hagati y'izi mpande ebyiri zari zisubiranyemo, aho barasanye bitavugwa.

Mai-Mai y'Ababembe iyobowe n'uwiyita General Hamuri Yakutumba, mu gihe iy'Abapfulero iyobowe na Colonel Ngomanzito.

Abo ku ruhande rwa Gen. Hamuri Yakutumba ngo batakaje abarwanyi babiri abandi babiri barakomereka, mu gihe ku ruhande rwa Colonel Ngomanzito hataramenyekana igihombo.

Hari andi makuru avuga ko impande zombi zarwanye bikomeye, ndetse ko hapfuye abarwanyi benshi bagera mu mirongo, abandi barakomereka ku bwinshi, bagereranywa mu magana.

Iyi mirwano yateje umutekano muke, ituma abaturage benshi bava mu byabo bagahungira mu duce dutandukanye tw'umutekano muke, bamwe berekeza i Baraka, abandi bajya mu tundi duce twa Fizi tutabereyemo imirwano.

Iri subiranamo rije rikurikira imirwano yabaye mu ntangiriro z'ukwezi kwa Werurwe 2025, aho abarwanyi ba Hamuri Yakutumba barwanye n'abo kwa General Ebuela Tresor Mutetezi, nawe wo mu bwoko bw'Ababembe. Iyo mirwano ni yo yahitanye General Tresor Mutetezi Ebuela, ikaba yarabereye hagati ya zone ya Fizi n'umujyi wa Baraka.

Source : https://kasukumedia.com/umuriro-wongeye-kwaka-hagati-ya-mai-mai-yabapfulero-niyababembe-muri-fizi/

Mu ijoro ryo ku wa Mbere rishyira kuri uyu wa Kabiri, tariki ya 14 Mata 2025, abaturage bo mu Ntara ya Kivu y'Amajyepfo, by'umwihariko muri Teritwari ya Mwenga, babyutse basanga Inka zabo zirenga 70 zapfiriye rimwe mu buryo budasobanutse.

Izi nka zapfiriye mu duce twa Kilungutwe na Kilumba, muri Chefferie ya Lwindi. Nk'uko abahatuye babivuga, icyabishe ntikiramenyekana, ariko hari bakeka ko zishobora kuba zakubiswe n'inkuba nubwo bavuga ko nta mvura yaguye iryo joro, bigatuma bavuga ko iyo nkuba yaba yarazikubise bucece.

Amashusho yakwirakwijwe ku mbuga nkoranyambaga agaragaza imirambo y'izi nka irambitse hasi, aho wabonaga ziryamye zegeranye cyane, ibintu bishimangira iby'inkuba nk'imwe mu mpamvu zishoboka.

Ubutumwa bwatanzwe na bamwe mu baturage baturiye agace byabereyemo bugira buti:

'Inka ziri hejuru ya 70 zapfuye. Ntituramenya icyazishe, ariko zishobora kuba ari inkuba. Zaguye Kilungutwe na Kilumba.'

Aka gace gasanzwe gaturwa n'ubwoko bw'Ababembe, buzwiho kutagira umuco wo korora inka. Ibi byatumye benshi bakeka ko izo nka ari izanyazwe mu bihe byashize, bivugwa ko zanyazwe ku baturage b'Abanyamulenge mu bikorwa by'inyeshyamba.

Raporo zitandukanye zagiye zigaragaza ko kuva mu 2017 kugeza mu 2020, imitwe yitwaje intwaro ya Mai-Mai ikomoka mu moko y'Ababembe, Abapfulero n'Abanyindu, banyaze inka z'Abanyamulenge zibarirwa mu bihumbi. Aho byagaragaraga cyane ni mu misozi ya Fizi, Uvira na Mwenga.

Bivugwa ko inyinshi muri izo nka zanyagiwe mu bice bya Fizi na Mwenga, aho Abanyamulenge bari barajyaga gusuhurira mbere y'intambara ndetse no muri iyo myaka y'ihungabana.

Source : https://kasukumedia.com/inka-zirenga-70-zapfiriye-rimwe-mu-buryo-butunguranye-muri-mwenga/

Abaturage batatu bo muri Repubulika ya Demokarasi ya Congo, aribo Masoso Bideri Antoinette ukomoka muri Kivu y'Amajyepfo, David Fati Karambi ukomoka muri Kivu y'Amajyaruguru, na Mandro Logoliga Paul wo mu ntara ya Ituri, bajyanye kurega Leta ya Perezida Félix Tshisekedi mu Rukiko rw'Umuryango wa Afurika y'Iburasirazuba (EACJ), bayishinja ibyaha by'intambara n'ibyibasiye inyokomuntu.

Icyi kirego cyatanzwe ku wa 11 Mata 2025, cyunganirwa n'abanyamategeko bane. Abareganya bashinja ingabo za Congo kuba zaragabye ibitero bya drones mu bice bituwemo n'Abanyamulenge hagati ya tariki ya 19 na 25 Gashyantare 2025, bigahitana ubuzima bwa benshi, abandi barakomereka cyangwa barahunga.

Mu kirego cyabo, bagaragaje ko ibyo bitero byagabwe ahitwa i Gakangala n'i Lundu, ndetse bakanashinja izo ngabo kugaba ikindi gitero cy'indege ya gisirikare yo mu bwoko bwa Sukhoi i Minembwe ku wa 10 Werurwe 2025, cyahitanye ubuzima bwa benshi ndetse kigasenya n'ikibuga cy'indege cyakoreshwaga n'abasivili.

Aba baturage bavuga ko Leta ya Kinshasa yananiwe kurinda Abanyamulenge ibitero bya Wazalendo na FDLR, by'umwihariko icyagabwe ku wa 3 Werurwe 2025 muri Teritwari ya Fizi.

Ikindi bashinja Leta ni igitero cyagabwe na CODECO ku wa 23 Gashyantare 2025 mu ntara ya Ituri, cyahitanye benshi mu bwoko bw'Abahema, Leta nayo ntigire icyo ikora ngo itabare.

Bagaragaje kandi ko Leta ya Kinshasa yahagaritse serivisi za banki n'ubucuruzi mu ntara za Kivu y'Amajyepfo na Kivu y'Amajyaruguru mu rwego rwo guhohotera Abanye-Congo bo mu bwoko bw'Abatutsi, inabafunga ibashinja gukorana n'umutwe wa M23. Batanze urugero kuri Olive Kirohaa uherutse gufungwa.

Aba baturage banenze imvugo z'urwango zikomeje kumvikana muri Congo, zibasira abavuga Ikinyarwanda n'Igiswahili, bavuga ko ibi bigaragaza umugambi wa jenoside wibasiye abatutsi n'abo bafatanyije, by'umwihariko Abanyamulenge n'Abahema. Bavuze ko aya magambo agenda akwirakwizwa n'abayobozi ba Leta ya Congo.

Basabye Urukiko rwa EAC gutegeka Leta ya Kinshasa guhagarika ibi bitero, kurinda umutekano w'Abanyamulenge, Abatutsi n'Abahema, gusubukura ubucuruzi n'imikorere ya banki mu turere twibasiwe, ndetse no gutanga indishyi z'ibyangijwe cyangwa byatakaye.

Umwanditsi w'Urukiko rwa EAC yamenyesheje Minisitiri w'Ubutabera akaba n'intumwa ya Leta ya Congo kwitaba urukiko yanditse mu gihe kitarenze iminsi 45 uhereye ku ya 11 Mata 2025, bitaba ibyo urubanza rukazaburanishwa Leta idahari.

Source : https://kasukumedia.com/abaturage-batatu-bo-muri-dr-congo-bareze-leta-ya-tshisekedi-mu-rukiko-rwa-eac-bashinja-ibyaha-byintambara/

Yabigarutseho mu muhango wo Kwibuka ku nshuro ya 31 Jenoside i Kibeho, wabaye ku wa 14 Mata 2025.

Minisitiri Dr. Bizimana, yavuze ko Padiri Sagahutu, baniganye i Runyombyi, yicishije Abatutsi benshi muri Paruwasi Gatolika ya Muganza afatanyije na Burugumesitiri Muhitira, ariko ubu akaba yibereye mu Bubuligi ari nako akigisha urwango.

Ati 'Padiri Sagahutu ubu yibereye mu Bubiligi, ariko aracyatangaza ibitekerezo byica, aracyafite ingengabitekerezo ya Jenoside, nyamara aracyambaye umwambaro w'idini rya Kiliziya Gatolika.'

Dr.Bizimana yanagaragaje abandi bapadiri benshi bakomoka muri Kibeho bagize uruhare muri Jenoside yakorewe Abatutsi haba i Kibeho n'ahandi barimo Padiri Emmanuel Uwayezu, wicishije abanyeshuri bo mu Rwunge rw'Amashuri rwa Marie Merci, akanahamagarira abandi bana kwica bagenzi babo.

Yanavuzemo abafaratiri batangazaga inkuru z'urwango zinyuze mu kinyamakuru cyitwaga Urunana, cyandikirwaga mu Iseminari Nkuru ya Nyakibanda, muri za 1990, kiyobowe na Faratiri Kagabo Vincent, wavugaga ko Inkotanyi ari 'inyangarwanda', bigamije kuzangisha Abanyarwanda.

Yanavuze ku bandi bapadiri beze imbuto mbi barimo Padiri Thaddée Rusingizandekwe wishe benshi muri Paruwasi ya Nyumba ituranye na Seminari Nkuru ya Nyakibanda, ndetse na Paruwasi Karama afatanyije na Padiri Anaclet Sebahinde bahimbaga Shikito.

Kuri ubu, muri iyi Paruwasi ya Muganza, iherereye mu Murenge wa Muganza, mu Karere ka Nyaruguru, hari Urwibutso rw'inzirakarengane ruruhukiyemo imibiri igera ku 4900.

Abiciwe i Muganza bagera kuri 4900 bishwe bigizwemo uruhare na Padiri Sagahutu Joseph ariko kuri ubu arakidegembya

---

Source : http://igihe.com/amakuru/u-rwanda/article/minisitiri-bizimana-yakomoje-ku-bugome-bwa-padiri-sagahutu-biganye-warimbuye

Uyu ni umwanya utangaje wagaragaye ubwo Coleen Campbell, umugore w'umugizi wa nabi, yakubitaga Niamh Wasik inyundo mu mutwe mu mirwano yo ku muhanda izwi nka love triangle, mu mujyi wa Ashton-under-Lyne, mu karere ka Greater Manchester, ku wa 29 Kamena 2022.

Iyi mirwano yabaye iminsi mike mbere y'uko Coleen afasha itsinda ry'abagizi ba nabi gutoteza no kwica Thomas Campbell, wahoze ari umugabo we ndetse akaba yaracuruzaga ibiyobyabwenge, nyuma y'uko yari yabahaye amakuru yerekeye aho aherereye.

Thomas yatezwe ubwo yafunguraga urugi rw'inzu ye i Mossley mu karere ka Greater Manchester, ku wa 2 Nyakanga 2022, nyuma y'uko imodoka ye ishyizweho igikoresho gikurikirana (GPS tracker) mu gihe yajyaga gufata umukobwa wabo ku ishuri. Yakubiswe ibyuma, apfa azize gukubitwa ibipfunsi, guterwa inshyi no gushyirwaho amazi ashyushye ku kibuno. Abaturanyi basanze umurambo we wambaye amasogisi gusa mu muryango.

Coleen yaje kugaragara nk'umwe mu bagize uruhare muri icyo cyaha nyuma yo gutanga amakuru yihariye ku bikomere bya Thomas mu nama y'abahanuzi (séance), ibintu byamenywa gusa n'abamwishe.

Coleen yakatiwe igifungo cy'imyaka 13 azira uruhare rwe muri ubwo bwicanyi. Abagabo babiri nabo bahanwe, mu gihe uwa gatatu ukekwaho ubwicanyi azaburanishwa nyuma y'uyu mwaka.

Ku wa mbere, Coleen yongeye kugaragara mu rukiko kubera indi mirwano yari irimo n'abandi bantu batatu: Hannah Derbyshire (27), Chloe Bamford (30), na Simon Bowden (38).

Derbyshire bivugwa ko yari mu rukundo n'umusore witwa James Heaney, wari ufitanye umubano na Wasik ndetse n'undi mugore. Urukiko rwa Minshull Street Crown Court rwumvise ko uyu mwuka mubi w'urukundo ari wo watumye habaho iyi mirwano.

Coleen, wari utari mu rukundo rw'aba bantu, yari atwaye imodoka ya VW Tiguan irimo abandi batatu, ubwo bahuraga na Wasik ahitwa Rutland Street na Granville Street i Ashton-under-Lyne. Bahise bamugabaho igitero gikomeye, cyafashwe na kamera za CCTV.

Derbyshire yahise asohoka mu modoka, atangira gukubita no gukandagira ku ntege Niamh. Bowden wari witwaje icyuma kirekire (drill bit) yambara agapfukamunwa. Campbell, wari wambaye imyenda yirabura kandi afite inyundo, yakubise Wasik inshuro nyinshi mbere yo kumumanura hasi no gukomeza kumukubita hamwe n'abandi bagore babiri.

Iyi mirwano yamaze hafi amasegonda 90 mbere y'uko basubira mu modoka yabo ya Tiguan, nuko bagahunga aho bamuteye, hagira umuntu utera ibuye kuri parabrise y'imodoka.

Campbell bivugwa ko yibye igikapu cya Wasik, kikaza gutoragurwa iwe ubwo polisi yamusakaga. Bose uko ari bane banze gutanga ibisobanuro cyangwa barabeshye ubwo babazwaga na polisi.

Bamford yavuze ko yari yitabara, Bowden avuga ko yari mu mujyi wa Manchester icyo gihe. Ntibizwi niba Wasik yakomeretse, kuko yanze gukorana na polisi.

Iyi mirwano yabaye iminsi mike mbere y'uko Campbell afasha mu bwicanyi bwa Thomas Campbell. Aba bombi bari bazwi cyane kubera ingendo zihenze bajyagamo hanze y'igihugu, zibeshwaho n'ubucuruzi bwa kokayine bw'umuryango wabo. Bafashwe mu 2018, bombi bemera ibyaha byo guhisha umutungo wavuye mu byaha.

Coleen yakatiwe gufungwa bihagaritswe (suspended sentence), naho Thomas afungwa imyaka 2. Bakimara gutandukana mu 2021 ubwo Thomas yatangiye kujya mu rukundo n'undi mugore, Coleen yandikiye inshuti ati: 'Icyiza yakoze ni ugusambana n'inshuti yanjye. Ubu ni ubuzima bushya.'

Nyuma Coleen yisanze mu mugambi wo kwambura Thomas amafaranga, ibiyobyabwenge n'ibindi bifatika, ubwo uwahoze ari umukunzi wa wa mugore mushya nawe yamenyaga ayo makuru.

Coleen yaje kwiyandarika, atanga amakuru atagira icyo ayisabishije ku bikomere bya Thomas mu nama y'abahanuzi, aho yavuze ko 'Thomas yabonekeye' maze agatanga ibyo yari yarakomeretseho, ari kumwe n'umuhanuzi, ibyo byahise bijya kumenywa n'umubyeyi wa Thomas, Lynn Campbell, wahise abimenyesha polisi.

Mu gihe icyo kiganiro cyabaga, polisi ntiratangaza byinshi ku rupfu rwa Thomas — bityo Coleen yahise afatwa nk'ukekwaho icyaha kuko gusa abamwishe bari bazi ayo makuru.

Yaje gufatwa, ahamwa n'icyaha, akatirwa imyaka 13.

Mu rubanza ruheruka ku wa mbere, we n'abandi baregwa bemeye icyaha cyo guteza umutekano muke (violent disorder), na Coleen yemera ubujura.

Ubwunganizi bwa Coleen bwavuze ko asa n'umuntu w'umunyamahoro, w'ubwenge kandi w'umunyampuhwe. Bowden we yagaragajwe nk'ufite umwana w'umuhungu wiga mu mwaka wa mbere w'amashuri yisumbuye, ushaka kubaho neza. Uyu mugabo kandi yari amaze igihe afungiye ku gihano cya burundu kubera ubujura, kuva mu 2022.

Bamford yari atarakabaye afungwa na rimwe, ndetse yigaga muri kaminuza. Derbyshire, wakoraga mu kabari, nawe nta cyaha yari yarigeze akorerwa mbere, kandi yavuze ko yicuza ibyo yakoze.

Umucamanza Michael Blakey yagize ati:
'Ku wa 29 Kamena 2022, mwese uko muri bane mwagiye ahantu, Granville Street, mu mujyi wa Ashton-under-Lyne, aho mwakubitiye uwari wabaye ikigwari. Ibi byari byateguwe. Hari urukundo rw'abashotoranyi hagati y'umwe muri mwe na James Heaney, ari na rwo rwateye ibi byose. Benshi muri mwe bari bitwaje intwaro — Campbell afite inyundo, Bamford afite igikoresho cyo gutogosa, Bowden afite icyuma kirekire.'

Yabwiye Campbell ati:
'Witwaje inyundo, urayikoresha, ariko ndasoma ibigaragaza ko uri gufungirwa hari ibyo wamenye, wagiye mu masomo, kandi uri gukora uko ushoboye ngo wikosore — ibyo ni byo bihesha agaciro.'

Campbell na Bowden bakatiwe imyaka 1 n'amezi 6 y'igifungo. Derbyshire na Bamford bahawe ibihano by'agateganyo (suspended sentences).

 

Source : https://kasukumedia.com/umugore-wumugizi-wa-nabi-yakubise-inyundo-uwahoze-ari-umukunzi-wumukunzi-we-mbere-yo-gufasha-kwica-uwahoze-ari-umugabo-we/

Umuhanzi w'umunyamuziki wo mu itsinda rya Backstreet Boys, Nick Carter, yarezwe n'umugore witwa Laura Penly uvuga ko yamusambanyije ku gahato inshuro nyinshi kandi akamwanduza indwara zitandukanye zandurira mu mibonano mpuzabitsina. Ariko Carter we avuga ko ibyo birego ari ibinyoma.

Muri dosiye y'ikirego yabonetse na TMZ, Penly avuga ko yahuye na Nick mu mwaka wa 2004 ubwo yari afite imyaka 19, bagatangira kugira imibonano mpuzabitsina mu gihe cy'icyumweru cyangwa bibiri, bakajya bahurira mu nzu yo muri Los Angeles aho baboneraga umwanya wo kwishimisha no gukora imibonano.
Avuga ko yamusabye gukoresha agakingirizo, ariko Nick arabyanga amubwira ko 'ari muzima', nta ndwara yanduye.

Penly avuga ko mbere yo guhura na Nick atari yarigeze akora imibonano idakingiye. Yongeraho ko hari ubwo yaje kumusura mu ntangiriro za 2005 amubwira ko atifuza gukora imibonano. Ariko ngo Nick yamusubije ko impamvu yonyine yari yamutumyeho ari uko ashaka kuryamana na we.

Penly avuga ko Nick yamuteruye amukuye hasi, amujugunya ku buriri, amucurika ku ruhande rw'uburiri hanyuma amufata ku ngufu amwinjiza igitsina mu gitsina cye n'ubwo ngo yari yaramubwiye 'oya' inshuro nyinshi. Anemeza ko Nick atigeze akoresha agakingirizo muri iryo fata ku ngufu.

Penly akomeza avuga ko Nick yamusabye guhisha ibyo byabaye, amubwira ko nta muntu n'umwe uzamwemera. Hanyuma, nyuma y'amezi make, ngo Nick yamusabye imbabazi ndetse amusaba kongera guhura.

Avuga ko yaje kongera gusura Nick i Los Angeles, Nick akamujyana mu cyumba cye aho yamubwiye ko atashaka gukora imibonano, ariko ngo Nick yakomeje kumufata ku ngufu, aramutera n'ubwo yari akomeje kumusaba kureka.

Penly avuga ko Nick yamwanduje indwara nyinshi zandurira mu mibonano, zirimo na HPV. Avuga ko yagaragayeho Chlamydia na Gonorrhea, ndetse abamuganga bamumenyesha ko afite kanseri y'inkondo y'umura iterwa n'iyo virusi ya HPV.

Penly avuga ko yagombaga gukorerwa ubuvuzi bukomeye bwa kanseri, burimo n'ubuvuzi bwa muganga ndetse n'ibikorwa byo kubagwa. Avuga ko ibyo byamubabaje cyane, bimugiraho ingaruka mu mutwe no ku mubiri, bituma agira ibibazo mu buzima bw'urukundo n'ubw'imibanire n'abandi, ndetse bimutera ihungabana rikomeye.

Uyu mugore yareze Nick Carter ku cyaha cyo gusambanya ku gahato, kumutera ihungabana ku bushake, ndetse no kutita ku ngaruka z'ibyo yakoze, kandi arasaba indishyi z'akababaro n'ubundi bujurire.

Abunganira Nick mu mategeko, Liane K. Wakayama na Dale Hayes Jr., babwiye TMZ bati:
'Ibi ni ibindi bigaragaza gahunda imwe ihoraho y'abarimo gucura imigambi yo kwangiza Nick Carter hamwe n'abanyamategeko babo, bakoresheje nabi ubutabera. Bategereza igihe Nick yishimira intambwe runaka mu buzima bwe bw'umwuga, hanyuma bakihisha inyuma y'amategeko yo mu manza kugira ngo bamurege ibinyoma bikomeye bagamije kwangiza ubuzima bwe n'umuryango we.'

Itsinda ry'abamwunganira rivuga ko Nick atazigera yibuka guhura n'uwo mugore witwa Penly cyangwa kugira umubano na we, kandi bongeraho ko Penly afite amateka agaragaza ibibazo by'amafaranga n'ibibazo by'amategeko, ndetse ngo yigeze kwandikisha ubukene (bankruptcy) no kuregwa uburiganya.

Source : https://kasukumedia.com/nick-carter-yarezwe-gufata-umugore-ku-gahato-no-kumwanduza-indwara-zandurira-mu-mibonano-mpuzabitsina/

Iryo tora kugira ngo ribe, Perezida Kagame yari ahatanye na Dr Charles Muligande, aho Abadepite bamutoye ku majwi 81 mu gihe Muligande yagize amajwi atanu.

Imyaka 25 irashize ibyo bibaye. Dr Charles Muligande yagarutse kuri ibyo bihe, uko byagenze kugira ngo yisange mu bahataniye kuyobora igihugu.

Mu kiganiro The Long Form yagiranye na Sanny Ntayombya, yavuze ko icyo gihe hari mu nzibacyuho ikurikira ibihe bigoye bya Jenoside yakorewe Abatutsi.

Itegeko Nshinga ryariho icyo gihe, ryavugaga ko mu gihe Perezida uriho azaba adashoboye gukomeza kuyobora igihugu, yaba yeguye, yitabye Imana cyangwa se bigaragaye ko atagifite ubushobozi, Umutwe wa Politiki aturukamo ugomba gutoranya abakandida babiri bavamo uyobora atowe n'Inteko.

Ati 'Umutwe wa Politiki mbarizwamo, ari nawo uwahoze ari Perezida yabarizwagamo ari nawo Perezida uriho abarizwamo, FPR, watumije inama ya Biro Politiki yo gutoranya abakandida babiri, ni uko byagenze ntoranywa hamwe n'uwari Visi Perezida akaba na Chairman wa FPR nk'abakandida.'

'Twagombaga gushyikirizwa Inteko igatora ugomba gusimbura Pasteur Bizimungu.'

Muligande asobanura ko muri ayo matora yo muri FPR, yaje ari uwa kabiri akurikiye Kagame. Ngo ayo matora yabaye hashize igihe gito kigera nko ku Cyumweru Pasteur Bizimungu atowe.

Kwegura kwa Bizimungu ntikwatunguranye

Ukwegura kwa Bizimungu kwari gutunguranye ku ruhande rumwe ariko kubera ibibazo byari bimaze iminsi mu ishyaka, ntabwo bamwe batunguwe. Muligande yavuze ko ubwo hari hashize iminsi hari kuba ibiganiro bijyanye na Guverinoma, Bizimungu yarenze ku byo yari yagiriwemo inama.

Yavuze ko bijya gutangira, muri Mutarama 2000, uwari Perezida w'Inteko Ishinga Amategeko, Joseph Sebarenzi, yeguye hanyuma hashize ukwezi, Minisitiri w'Intebe, Pierre Celestin Rwigema, aregura na Guverinoma ye ihita ivaho.

Ati 'Twatangiye ibiganiro n'indi mitwe ya politiki kuko twari mu nzibacyuho kugira ngo dushyireho guverinoma nshya. Imbere muri FPR, Komite Nkuru yafashe icyemezo, ko abaminisitiri bose binjiye muri Guverinoma mu 1994, batazongera kuyisubiramo, ko bazashakirwa indi myanya.'

Yavuze ko impamvu uwo mwanzuro wafashwe, wari ushingiye ku kuba barakoze mu bihe byari bigoye, nta nzego z'imiyoborere zihamye, uburyo bwo kugenzura imikorere butaboneye, ndetse bamwe bashobora kugwa mu ruswa.

Ati 'Twari twatangiye gukora ubushakashatsi bwimbitse kugira ngo tumenye uburyo bakora inshingano zabo, kuko hari ibihuha byinshi bya ruswa hirya no hino. Rero dufata umwanzuro ko nka FPR, abaminisitiri bose binjiye muri Guverinoma mu 1994 batazasubira muri Guverinoma nshya.'

'Ariko Perezida Bizimungu yashakaga umwe muri abo baminisitiri kugira ngo agume ku nshingano, byari bigoye kugira ngo FPR ibyemere. Icyo gihe Bizimungu yari Vice Chairman wa FPR, mu gihe Visi Perezida Paul Kagame yari Chairman.'

Uwo muminisitiri Bizimungu yashakaga ko aguma muri Guverinoma yari Patrick Mazimhaka.

Mazimhaka yabaye Minisitiri w'Urubyiruyko, Siporo n'Amakoperative muri Nyakanga 1994, nyuma mu 1996 agirwa Minisitiri wo gucyura Impunzi no gusana ibyangijwe n'Intambara. Nyuma y'aho yabaye Minisitiri muri Perezidansi.

Impamvu Bizimungu yashakaga ko Mazimhaka aguma muri Guverinoma, ni ibintu benshi batariyumvisha. Ati 'Ahari ntabwo Bizimungu yumvaga ko ari Perezida, afite uburenganzira bwo kugena uko ibintu bigena.'

Muligande yavuze ko Bizimungu yibagiwe ko FPR iri hejuru ya buri munyamuryango wese hatitawe ku nshingano afite. Ati 'Niba FPR yafashe umwanzuro, yagombaga kubahiriza umwanzuro wayo.'

Yavuze ko yumvaga ko Perezida wa Repubulika ariwe muyobozi wa byose. Ati 'Ikiriho ni uko yibeshyaga, niba ari uko yabitekerezaga mu mutwe we, ntabwo ari uko byagombaga gukorwa, nta nubwo ari uko bikorwa muri FPR.'

Guverinoma nshya yaje gushyirwaho, iyoborwa na Makuza Bernard, irarahira itangira imirimo, ariko ku munsi w'irahira, Bizimungu yavuze ijambo ryumvikanye nabi.

Muri iryo jambo, Bizimungu yavugaga ko Inteko ariyo yananije Guverinoma yabanje, igatuma yegura.

Muligande asobanura ko muri icyo gihe FPR yari ishishikajwe n'uko buri wese abazwa inshingano ze, uzikora nabi akabibazwa.

Ati 'Yanenze ibikorwa by'Inteko byo kubaza inshingano, ijambo rye ryose ryari ukwibasira ibyari biri gukorwa bigamije kwimakaza imiyoborere myiza muri icyo gihugu.'

Iryo jambo yarivuze ari ku wa Mbere, nyuma y'iminsi ibiri yandika ibaruwa yegura, aho Muligande yavuze ko bishoboka ko ashobora kuba yarumvise iryo jambo ritazamworohera cyane ko no muri FPR hari hatangiye urugendo rwo kwibaza impamvu yavuze ayo magambo.

Ati 'Yari abizi ko Biro Politiki ifite ubushobozi bwo kumweguza, aho gutegereza ko yeguzwa, ahita yegura ku mwanya we. Kubera ubwo bwegure bwe, byasabye ko Inama ya Biro Politiki itoranya abantu babiri bagomba gutorwamo n'Inteko uyobora igihugu.'

Bizimungu yaketse ko niyegura Abahutu bari bwigaragambye

Muligande yavuze ko bishoboka ko mu mutwe wa Bizimungu yashoboraga kuba yaratekerezaga ko kuko ari Umuhutu, abo bahuje ubwoko bari bumujye inyuma.

Ati 'Yumvaga ko Abahutu bose bari buhuguruke, bakajya mu myigaragambyo, bagasaba ko Perezida Bizimungu asubizwa ku buyobozi. Icyo gihe nari Umunyamabanga Mukuru wa FPR, nayoboraga inama y'ihuriro ry'imitwe ya politiki, nibuka bamwe mu bantu bo muri iyo mitwe ya politiki, mu nama yakurikiyeho, hari abo yabajije niba nta bantu bateganya kwigaragambya kubera iyegura rye.'

'Ariko nta muntu wigaragambije, amaduka yose yakomeje gukora uwo munsi, n'umunsi ukurikiyeho, kuko bumvaga ko FPR nk'umutwe wa politiki umaze kugira ubunararibonye uzabasha kubona igisubizo.'

'Yari umukandida watanzwe na FPR, ni FPR yamushyize ku butegetsi mu 1994 kandi FPR yari igihari, abaturage b'u Rwanda kubera ubunararibonye bwabaranze muri icyo gihe, batekereje ko nta kintu cyo gutuma bahangayika, ko FPR ibifite byose mu murongo.'

Muligande yavuze ko icyiza ari uko Bizimungu yeguye yamaze kurahiza Guverinoma, kandi Itegeko ryariho icyo gihe rigena ko mu gihe Perezida wa Repubulika yeguye, Visi Perezida afata inshingano.

Ati 'Nta cyuho cyari gihari, hari Guverinoma, Perezida yari ahari, Inteko Ishinga Amategeko, Urukiko rw'Ikirenga rwari ruhari, nta kintu cyari gutuma abantu bahangayika.'

Muligande yavuze ku guhatana na Kagame

Muligande yabajijwe niba mu by'ukuri yarashakaga gutsinda amatora, yasubije ko na mbere y'uko umunsi w'amatora ugera, abantu benshi babazaga uko ibintu bimeze, akabasubiza ko iyo aza kuba mu batora, yari gutora Kagame.

Ati 'Mu by'ukuri yari umukandida mwiza kundusha, rero namamaje uwo twari duhatanye. Umutwe wa Politiki watekereje ko ugiye gutoranya abakandida babiri beza, ko nubwo haba impanuka nkatorwa, bari bizeye ko naba Perezida mwiza.'

Muligande yavuze ko we na Kagame, bari abakandida ba FPR kandi ko nk'umutwe wa politiki, wari witeguye gushyigikira umwe muri bo uri butsinde. Ati 'Rero nyuma nakomeje gukora akazi nari nshinzwe.'

'Ntabwo nicuza kuba ntaratowe, ahanini urebye aho u Rwanda rugeze mu myaka 25 ishize, nishimiye ko amatora yagenze uko yagenze, igihugu kigatera imbere uko kimeze ubu.'

Muligande yavuze uko yahatanye na Kagame ku kuyobora u Rwanda n'imyigaragambyo y'Abahutu Bizimungu yari yiteze

---

Source : http://igihe.com/amakuru/u-rwanda/article/muligande-yavuze-uko-yahataniye-na-kagame-kuyobora-u-rwanda-n-imyigaragambyo-y

Benshi bahise babihuza no kuba abahabwa imirimo inyuranye mu bukwe bazajya batanga umusoro bituma bibaza byinshi, binajyanye no kuba byari biherutse kugarukwaho n'umudepite mu Nteko Ishinga Amategeko.

Iyo nyandiko ya RRA yahererekanyijwe cyane ku mbuga nkoranyambaga igaragaza ahagomba gushyirwa amakuru ajyanye n'umuntu wahawe akazi ko gutaka, abahawe akazi ko gutunganya ibyuma by'itumanaho, abahawe akazi ko gutanga ibyo kurya n'ibyo kunywa, Itorero ryasusurukije abantu ndetse n'amazina y'abageni.

Amakuru asabwa ni amazina y'uwahawe akazi, nimero za telefoni, Tin number ndetse n'izina ry'ikigo mu gihe gihari.

Umuvugizi wa RRA akaba na Komiseri Ushinzwe Abasora bato, Uwitonze Jean Paulin, yabwiye IGIHE ko nubwo iyo nyandiko iri guhererekanywa cyane ari ibintu byari bisanzwe.

Ati 'Icya mbere ni amakuru ari gusabwa, uriya ntabwo ari umusoro mushya, ni amakuru ari gusabwa abantu bo muri iki cyiciro kandi ntabwo ari amakuru mashya, ahubwo dusanzwe tuyabasaba. Kugira ngo tumenye ko abantu bakora imirimo ibyara inyungu muri kiriya cyiciro cy'ubucuruzi no gutegura ibirori bose banditswe ku musoro icyo ni icya mbere. Icya kabiri niba bishyura umusoro, bishyura umusoro ukwiriye? Ibyo ni ibintu bya mbere by'ingenzi.'

Yakomeje ashimangira ko ayo makuru yari asanzwe asabwa, atari ibintu bishya nk'uko abantu bakomeje kubigaragaza ku mbuga nkoranyambaga.

Ati 'Ikindi ni uko ariya makuru babonye asanzwe asabwa hagati y'umukozi n'umuntu ukora muri kiriya cyiciro cy'ubucuruzi. Bivuze ngo ntabwo ari ibintu bishya bije uyu munsi cyangwa ejo, kuko twagiranye inama nabo twumvikana ku makuru twajya dusangira yadufasha kuzuza inshingano zacu zo gusoresha.'

Yongeyeho ati 'Icyo tuvuga ni uko atari ibintu bishya, basanzwe baduha aya makuru. Noneho uburyo tuyakoreshamo, tuyabyaza umusaruro ni akazi kacu kandi umusaruro wo ugenda ugaragara, uko iminsi igenda ishira.'

Yavuze ko itegeko rigena uburyo bw'imisoreshereze riteganya ko umuntu wese ukora ibikorwa bibyara inyungu aba agomba gutanga umusoro nk'uko amategeko abiteganya.

Yakomeje avuga ko nk'ahandi hose, RRA iba ikeneye kubona amakuru agaragaza niba umusoro utangwa kuri ubwo bucuruzi ari wo wakabaye uboneka.

Ati 'Ni gute twakwegera abo bantu tukabaganiriza, tukabagira inama, cyangwa se niba hari n'abawunyereje tukabasaba gukosora tukawugaruza. Impamvu tugiye gukusanya amakuru ni uko dukeneye gukora ubwo busesenguzi bwose kuko hari nk'abari kuvuga ku mbuga nkoranyambaga bati ese ubwo na MC azaba arimo, kandi wajya kureba ugasanga arahembwa ibihumbi 100 Frw ushobora gusanga mu kwezi afite ibikorwa 10, ubwo urumva se atari miliyoni 1Frw. Harimo abatari banditswe, hakabamo n'abari banditswe ariko badatanga umusoro wabo neza.'

Yavuze ko amakuru ari gukusanywa ari agamije kureba abari banditse n'abatanditse, uburyo bamenyekanisha umusoro ku buryo byanozwa kurushaho.

Ati 'Niba utari wanditswe urasabwa kwiyandikisha birumvikana, niba wari wanditswe watangaga umusoro mu buryo budakwiriye urasabwa gukosora cyangwa se kujya utanga umusoro mu buryo bukwiriye.'

Mu bikorwa bishobora gusora bijyanye n'ubukwe harimo nk'ahantu ubukwe bubera, abagemura ibyo kunywa cyangwa ibyo kurya, abayobora ibirori babigize umwuga, abakora muri serivisi no kwakira abashyitsi babigize umwuga, itorero ryasusurukije abitabiriye ubukwe n'ibindi bikorwa bitandukanye.

Hazajya habaho uburyo bwo gusesengura amakuru mu rwego rwo kumenya ko abantu bakoreshejwe atari abo mu miryango y'abakoze ubukwe biturutse ku makuru bakusanyije.

RRA ifite ishami rishinzwe ubutasi n'iperereza, ku buryo ishobora kubona amakuru yose akenewe yaba ashingiye ku makuru yakusanyijwe mu buryo butandukanye.

Ubwo yari mu Nteko Ishinga Ametegeko y'u Rwanda muri Werurwe 2025, Komiseri Mukuru w'Ikigo cy'Igihugu cy'Imisoro n'Amahoro, Niwenshuti Ronald, yasobanuye ko hari ubwo bigora gukurikiranwa ariko ko hatangiye ubukangurambaga kandi butanga umusaruro.

Ati 'Turi mu bukangurambaga tubona ko buzatanga umusaruro. Tugitangira twajyaga mu bukwe bw'abantu tugashyiraho abantu bacu ukabona ko atari byiza, ariko twaje gusanga hari uburyo bwiza twabikoramo. Turabanza tukabigisha tukaganira n'abataka aho ubukwe bubera.'

Yunzemo ati 'Abinangiye turabatungura mu bukwe, n'uyu munsi birakorwa ariko tubyitwaramo neza tugashyira ku ruhande ababishizwe, kugira ngo tumenye ngo ni bande barimo kubikora. Bigenda bigaragaza ko abantu bari kubyumva bagasora.'

Hari abakora ubucuruzi bushingiye ku gutegura ubukwe batishyura imisoro

Inyandiko ya RRA igaragaza amakuru asabwa

---

Source : http://igihe.com/amakuru/u-rwanda/article/ukuri-ku-cyemezo-cyo-gusoresha-abahabwa-akazi-mu-bukwe