Webrwanda Backend

Category: Uncategorized

  • RIB yamaganye 'ni ko zubakwa' yeze mu ngo – #rwanda #RwOT

    Mu kiganiro n'itangazamakuru ku wa 15 Gicurasi 2025, Umuvugizi wa RIB, Dr. Murangira B. Thierry yavuze ko ihohoterwa atari igisebo ku buryo umuntu urikorerwa ashiriramo imbere ku mpamvu izo ari zo zose.

    Ati 'Guhohoterwa byaba ku mugore cyangwa ku mugabo ntabwo ari igisebo. Byagombye ahubwo gutera isoni ukora rya hohotera. Wowe uhohoterwa ntiwari ukwiye guterwa isoni n'ibyo ukorerwa ngo bitazamenyekana.'

    Aho Umuvugizi wa RIB yavuze ko hari bamwe baceceka bitwaje ko ari ibyamamare cyangwa ababahohotera ari ibyamamare ngo izina ryabo ritangirika muri rubanda.

    Ati 'Turasaba abantu gutera intambwe bakarega mu gihe ubona ihohoterwa rikorerwa iwawe. Usanga umuntu ahora acunaguzwa abwirwa amagambo mabi, asererezwa agaceceka bikagera naho akubitwa ngo ni ko zubakwa ariko si ko zubakwa kuko hari izubakwa ariko zidafite amakimbirane. Iryo jambo rya ni ko zubakwa murirwanye nta bwo ari byo. Ntibivuze ko kwihanganirana bitabaho ariko wihanganira umuntu wikosora.'

    Yakomeje ati 'Bitangirira mu magambo bikagera aho umuntu agukubita, akakwambura na telefone yawe ngo ajye areba abaguhamagara ngo bitazamenyekana. Aba yibeshya ariko kuko abaturanyi baba babizi uba ugenda babibona ko ufite ikibazo. Ibintu byo gupfiramo imbere ngo bitazamenyekana kandi hari inzego za Leta zakakurengeye si byo.'

    Dr. Murangira yagaragaje ko RIB idashyigikiye guceceka ihohoterwa iryo ari ryo ryose haba iryo ku mubiri, ku gitsina, mu marangamutima no ku mutungo ndetse isaba n'abandi kutarirebera.

    Ati ' Umuturanyi mwiza ashobora gutanga amakuru mu gihe mugenzi we abona ahohoterwa ariko ataratera intambwe. Hari n'abo usanga barateye ubwoba abandi ngo bazabica, ahubwo se wabivuze mbere atarakwica.'

    Umuvugizi wa RIB, Dr. Murangira B. Thierry yamaganye ni ko zubakwa ikingira ikibaba ihohoterwa mu ngo

    Source : http://igihe.com/amakuru/u-rwanda/article/rib-yamaganye-ni-ko-zubakwa-yeze-mu-ngo

  • Dean Huijsen yasinye amasezerano y'imyaka 5 muri Real Madrid, nyuma yo gusoza ibizamini by'ubuzima i Londres #rwanda #RwOT

    Myugariro ukiri muto w'Umuholandi, Dean Huijsen, yamaze kuba umukinnyi wa Real Madrid nyuma yo gusinya amasezerano azamugeza muri Kamena 2030. Uyu musore w'imyaka 19, wahoze akinira ikipe ya Bournemouth yo mu Bwongereza, yagaragaje ubushake bukomeye bwo kwerekeza mu ikipe yubatse amateka mu mupira w'amaguru ku Isi, ndetse ibizamini by'ubuzima byabereye i Londres byagenze neza mu ijoro ryo ku wa Gatanu rishyira ku wa Gatandatu.

    Impapuro zose z'amasezerano zamaze gushyirwaho umukono ku impande zombi, nyuma y'uko Real Madrid yemeye kwishyura £50 miliyoni z'amapawundi yari amafaranga y'amasezerano (release clause) yashyizwe ku mukinnyi wa Bournemouth.

    Amakuru yemeza ko ibiganiro byari bimaze iminsi bikorwa mu ibanga hagati y'ubuyobozi bwa Real Madrid n'ubwa Bournemouth, none byose byarangiye ku mugaragaro uyu munsi.

    Dean Huijsen, ukomoka mu Buholandi ariko ufite inkomoko muri Espagne ku ruhande rwa nyina, azahita yinjizwa mu myiteguro ya Real Madrid aho azaba afite amahirwe yo gukina FIFA Club World Cup, irushanwa rizahuza amakipe yabaye aya mbere iwayo ku migabane itandukanye.

    Uyu mukino azawufatiramo nk'igihe cyo kwigaragaza no kwiyereka abafana ba Real Madrid, mu gihe bivugwa ko umutoza Carlo Ancelotti yishimiye cyane iyi transferi.

    Uyu mukinnyi asanzwe azwiho ubuhanga mu kwitwara neza mu bwugarizi no gutangira imipira y'ubwenge aturutse inyuma, kandi ahanini abasesenguzi bavuga ko azaba umwe mu basimbura ba kera nka Nacho na Rudiger.

    Real Madrid ikomeje kwiyubaka hashingiwe ku bakinnyi bakiri bato bafite impano ikomeye, kandi Dean abaye undi mukinnyi wiyongereye ku rutonde rw'abakiri bato barimo Jude Bellingham, Arda Güler, na Endrick.

    Dean Huijsen yasinye amasezerano y'imyaka 5 muri Real Madrid, nyuma yo gusoza ibizamini by'ubuzima i Londres

    Source : https://kasukumedia.com/dean-huijsen-yasinye-amasezerano-yimyaka-5-muri-real-madrid-nyuma-yo-gusoza-ibizamini-byubuzima-i-londres/

  • Mahoro Peace Association yanyomoje ibihimbano byitiriwe izina ryayo, isaba ko byateshwa agaciro #rwanda #RwOT

    Inyandiko z'ibihimbano ku mbuga nkoranyambaga ziyitirira Mahoro Peace Association (MPA), uyu muryango wamaganye ibyo bikorwa bisebya, usaba abantu kubitesha agaciro.

    Mu minsi ibiri ishize, bamwe mu bagize aka gatsiko bafunguye konti ya X (Twitter) biyitirira urubuga rwa MPA, bayisangaho ubutumwa bugira buti: 'Umuryango wa Mahoro Peace Association twamaganye ubwicanyi bukomeje gukorerwa Abanyamulenge mu bice bigenzurwa na M23.'

    Ubu butumwa bwashimangiye umugambi w'aka kagara wo gucamo ibice Abanyamulenge, bashyira imbere ubushyamirane hagati yabo n'umutwe wa M23 urwanirira inyungu zabo.

    M23 yongeye gusubukura imirwano mu mpera za 2021 nyuma y'imyaka myinshi y'iyicwa ry'Abanyamulenge n'Abatutsi muri rusange, ryakorwaga n'ingabo za Leta ya Congo (FARDC) n'imitwe ibashyigikiye.

    Ubwicanyi bwatangiye ahagana mu 1964, ariko bwarushijeho gufata indi ntera guhera mu 2017 kugeza magingo aya. Urugero ni ku wa Gatanu ushize ubwo abandi Banyamulenge biciwe mu biraro n'ingabo za FARDC zifatanyije n'iz'u Burundi.

    Nyuma y'ibi bikorwa by'uburiganya, Mahoro Peace Association yahise ibyamaganira kure, isohora itangazo rigira riti: 'Turabeshyuza ubutumwa bwanditswe n'inkozi z'ibibi ziyitiriye urubuga rwa MPA kuri X. Ibyo banditse ntaho bihuriye n'ukuri, mubitindukirweho mubiteshe agaciro.'

    Bagize bati:
    'Turi mu rugamba rw'ubuvugizi kuri jenoside dukorerwa na Leta ya Congo. Abadutoteza barimo no gukoresha amazina yacu mu kuyobya abakurikirana ibikorwa byacu.'

    Mahoro Peace Association ni umuryango w'Abanyamulenge baba muri Leta Zunze Ubumwe za Amerika, ukaba uyobowe na Adele Kibasumba.

    Uyu muryango umaze imyaka ufasha impunzi z'Abanyamulenge bahunze intambara, cyane cyane mu bice bya Minembwe na Mulenge, aho ubaha ibyo kurya birimo amafu, imboga, n'icyonywa nka amazi, nyuma y'uko inka zabo zinyazwe n'ingabo za FARDC.

    Ubuyobozi bwa MPA bwatangaje ko ubu bufasha bwatangiye kuva mu 2017 bukaba bukomeje kugeza n'ubu.

    Ni muri urwo rwego abamagana ibikorwa by'aka kagara bagaragaza ko kayobowe na Gen. Masunzu Pacifique, umusirikare ushinzwe zone ya gatatu y'ingabo za Congo.

    Urubuga rwa Facebook Kivu New, rumwe mu mbuga zikunze gukoreshwa n'Abanyamulenge, rwamusabye kureka ibikorwa byo gusebya abandi, rugira ruti: 'Hariho Fake News yakozwe na Gen Masunzu Pacifique. Uyu yaje ari bindi bindi, agamije kurimbura ubwoko bwe. Yiyitirira abandi, akandika ibihimbano. Turamwamaganye; ari gukora mu buryo bw'amayobera ya satani.'

    Si urubuga rwa Mahoro Peace Association gusa biyitiriye, kuko banakoresheje izina rya Adele Kibasumba bamwitirira ibitekerezo bitari ibye, bamushinja kwamagana umutwe wa M23. Ibi na byo byamaganiwe kure n'uwo muyobozi, agaragaza ko ari ibihimbano byakozwe n'abanyabyaha bagamije gusenya umuryango.

    Mahoro Peace Association yanyomoje ibihimbano byitiriwe izina ryayo, isaba ko byateshwa agaciro

    Source : https://kasukumedia.com/mahoro-peace-association-yanyomoje-ibihimbano-byitiriwe-izina-ryayo-isaba-ko-byateshwa-agaciro/

  • Kivu y'Amajyepfo: Umusaza w'Umunyamulenge w'imyaka 60 yiciwe mu gitero cyagabwe na FRDC #rwanda #RwOT

    Manowa Gatambara, umugabo w'Umunyamulenge uri mu kigero cy'imyaka 60, ni we waraye ahitanywe n'igitero cyagabwe n'ihuriro ry'ingabo za Repubulika Iharanira Demokarasi ya Congo (FARDC), iz'u Burundi, hamwe n'imitwe yitwaje intwaro ya Wazalendo na FDLR. Iki gitero cyagabwe ku biraro by'inka biherereye mu duce twa Marango ya Minembwe, muri Kivu y'Amajyepfo.

    Amakuru aturuka mu baturage b'aho byabereye, yatangajwe ku mugoroba wo ku wa 16 Gicurasi 2025. Ayo makuru avuga ko icyo gitero cyagabwe mu masaha y'umugoroba, kigasiga cyishe Manowa Gatambara ndetse kinyaga n'inka zibarirwa hafi mu 90.

    Ubutumwa bw'abaturage bugira buti: 'Manowa yiciwe mu gitero cyagabwe i Nyamiringa Mumashya, mu Marango. Hanyazwe n'inka zikabakaba 90.'

    Manowa yari kumwe n'abandi bantu babiri ubwo bagabwaho igitero. Abo bandi babiri bahise biruka bajya gutabaza umutwe wa Twirwaneho, ariko ubwo abo baje gutabara bahageraga, abateye bari bamaze guhunga binjiriye mu ishyamba bajyanye n'inka bari banyaze.

    Ubutumwa bwakomeje bugira buti: 'Abandi babiri bari kumwe na nyakwigendera barahunze berekeza aho Twirwaneho yari iri. Ariko ubwo barimo gutabara, basanze abanzi bamaze guhunga binjiriye mu ishyamba n'inka banyaze.'

    Nyakwigendera Manowa Gatambara yari umubyeyi wubatse, afite abana b'abahungu n'abakobwa bashatse, ndetse barimo n'abamaze kugira abana, bityo akaba yari asigaye ari sekuru w'abuzukuru.

    Kivu y'Amajyepfo: Umusaza w'Umunyamulenge w'imyaka 60 yiciwe mu gitero cyagabwe na FRDC

    Abaturage bo mu gace ka Minembwe, by'umwihariko Abanyamulenge, bakomeje gushengurwa n'ibitero nk'ibi. Ubutumwa bwihanganisha umuryango wa nyakwigendera bugira buti: 'Twihanganishije umuryango wa Manowa, n'Abanyamulenge bose muri rusange.'

    Mu myaka ishize, umubare w'Abanyamulenge bamaze guhitanwa n'ibitero nk'ibi ukomeje kwiyongera. Mu cyigereranyo cyashyizwe ahagaragara na Mahoro Peace Association, cyavugaga ko abasaga 600 bamaze kwicwa, barimo abishwe na FARDC, Mai Mai, n'izindi ngabo z'amahanga zifatanya n'iza Congo.

    Source : https://kasukumedia.com/kivu-yamajyepfo-umusaza-wumunyamulenge-wimyaka-60-yiciwe-mu-gitero-cyagabwe-na-frdc/

  • Inka zirenga 40 z'Abanyamulenge zanyazwe n'ingabo za Leta muri Minembwe #rwanda #RwOT

    Ku mugoroba wo kuri uyu wa Gatanu, tariki ya 16 Gicurasi 2025, ihuriro ry'ingabo za Leta ya Repubulika ya Demokarasi ya Congo (FARDC) ryagabye igitero mu gace ka Nyamiringa gaherereye mu nkengero za centre ya Minembwe, mu Ntara ya Kivu y'Amajyepfo, ritwara inka zibarirwa mu mirongo z'Abanyamulenge.

    Iki gitero cyagabwe ahari ibiraro by'inka mu gace ka Nyamiringa, kari mu Marango ya Minembwe, mu majyepfo ashyira uburengerazuba bwa komine ya Minembwe.

    Umwe mu batangabuhamya yagize ati: 'Mu kagoroba ni bwo inka zanyagiwe i Nyamiringa, Mumashya mu Marango ya Minembwe.'

    Yakomeje agira ati: 'Kuko byabaye ni mugoroba, ntituramenya umubare nyawo w'inka zanyazwe, ariko bivugwa ko zabarurwaga mu mirongo.'

    Mbere y'uko iki gitero kigabwa, mu duce twa Kabanju ho mu gace ka Lulenge humvikanye urusaku rw'imbunda. Uyu mutangabuhamya avuga ko humvikanagamo imbunda imwe yo mu bwoko bwa Twelve.

    Ati: 'Twabanje kumva imbunda imwe ivuga i Kabanju, ariko si imirwano. Ahubwo bishoboka ko uwo mwicanyi yayikoreshaga ayiyungurura, nk'uko bikunze gukorwa.'

    Izi nka zanyazwe nyuma y'amezi atatu gusa hashize zindi z'Abanyamulenge zanyazwe muri ako gace. Mu cyumweru gishize kandi, abarwanyi b'imitwe yitwaje intwaro ya Wazalendo banyaze izindi nka mu Bibogobogo, aho mu icumi banyaguye habashije kugaruka ebyiri gusa.

    Bivugwa ko kuva mu mwaka wa 2017, ubwo imitwe yitwaje intwaro yatangiraga kugaba ibitero ku Banyamulenge, bamaze kunyagwa inka zibarirwa mu bihumbi amagana, banasenywa n'imihana yabo.

    Icyakora, kuva mu 2020 ubwo umutwe wa Twirwaneho watangizwaga n'urubyiruko rw'Abanyamulenge mu rwego rwo kwirwanaho, ibitero byo kunyaga inka byagiye bigabanuka kuko uwo mutwe wagiye uhangana n'ababatezaga ibibazo. Ubu Twirwaneho imaze kwigarurira ibice byinshi byahoze bigenzurwa n'imitwe yitwaje intwaro.

    Inka zirenga 40 z'Abanyamulenge zanyazwe n'ingabo za Leta muri Minembwe

    Source : https://kasukumedia.com/inka-zirenga-40-zabanyamulenge-zanyazwe-ningabo-za-leta-muri-minembwe/

  • Wazalendo bahawe ibikoresho bya gisirikare n'amafaranga nyuma yo guhura n'abakuru b'ingabo za RDC n'u Burundi #rwanda #RwOT

    Ihuriro rya Wazalendo risanzwe rifatanya n'ingabo za Repubulika Iharanira Demokarasi ya Congo (FARDC) mu rugamba rwo kurwanya imitwe ya M23 n'iya Twirwaneho mu Ntara za Kivu y'Amajyepfo na Kivu y'Amajyaruguru, ryahawe ibikoresho bya gisirikare, imyambaro (tenis) n'amafaranga mu mujyi wa Uvira.

    Ibi byabaye kuri uyu wa Gatanu, nyuma y'iminsi ibiri aba barwanyi bagiranye ibiganiro n'abakuru b'ingabo za Congo na Burundi.

    Ku wa Gatatu w'iki cyumweru, umugaba mukuru w'ingabo za Congo, Lt. Gen. Jules Banza Mwilambwe, hamwe na Lt. Gen. Prime Niyongabo uyobora ingabo z'u Burundi, basuye Uvira.

    Muri uru ruzinduko, aba bayobozi banahuye na Guverineri w'Intara ya Kivu y'Amajyepfo ndetse n'ubuyobozi bw'ingabo za FARDC n'iza gisirikare z'u Burundi zisanzwe zicumbitse muri uwo mujyi.

    Intego y'uru ruzinduko yari uguhuza no kumvikanisha impande zombi Wazalendo na FARDC nyuma y'amakimbirane yagiye agaragara hagati yazo, aho byigeze no kugera aho zirwana.

    Aba bayobozi b'ingabo basabye impande zombi gukorana neza no kuvanga ingabo, ndetse bizeza abarwanyi ba Wazalendo ko bagiye kujya bahembwa n'ubwo umushahara wabo utazangana n'uw'abasirikare basanzwe.

    Lt. Gen. Jules Banza Mwilambwe yabwiye Wazalendo ati: 'Nzabavuganira kugira ngo mujye muhabwa amafaranga. Nubwo mutazajya muhembwa menshi, ariko muzajya muhabwa make buri kwezi.'

    Hashize iminsi ibiri gusa, ibyo aba bayobozi bari basezeranyije byageze ku barwanyi ba Wazalendo. Nk'uko umwe mu batangabuhamya yabitangaje, Wazalendo boherejweho ibikoresho bya gisirikare, imiti, ibyo kurya, amateni n'amafaranga.

    Yagize ati: 'Bohereje ibikoresho bya gisirikare, imiti n'ibyo kurya. Bazaniye Wazalendo amateni n'amafaranga.'

    Uyu mutangabuhamya yongeraho ko bahise basabwa kongera gusubira ku rugamba, aho bagombaga gutera umutwe wa M23 mu bice bya Kamanyola, Nyangenzi na Bukavu.

    Ati: 'Babwiwe guhita batangiza intambara kuri M23 i Kamanyola, Nyangenzi n'i Bukavu no mu bindi bice.'

    Nubwo byatangajwe ko hari ibikoresho n'amafaranga bitari byatangwa bose babifitiye uburenganzira, amakuru avuga ko byatangiye gutangwa vuba na bwangu.

    Wazalendo bahawe ibikoresho bya gisirikare n'amafaranga nyuma yo guhura n'abakuru b'ingabo za RDC n'u Burundi Uvira

    Source : https://kasukumedia.com/wazalendo-bahawe-ibikoresho-bya-gisirikare-namafaranga-nyuma-yo-guhura-nabakuru-bingabo-za-rdc-nu-burundi/

  • Umusaruro w'uruzinduko rwa Minisitiri Nduhungirehe na Minisitiri Mukazayire muri Hongrie – #rwanda #RwOT

    Ni uruzinduko rwaranzwe no gukomeza kwagura umubano w'ibihugu byombi.

    Rushimangira izindi abayobozi bo muri Hongrie bagiriye mu Rwanda nk'urwa Perezida w'iki gihugu, Katalin Novák mu 2023, urwa Minisitiri w'Ububanyi n'Amahanga n'Ubucuruzi, Péter Szijjártó mu 2021 n'izindi.

    Iyi minsi ibiri yaranzwe n'ibikorwa bitandukanye, birimo gutaha k'umugararo Ambasade y'u Rwanda muri Hongrie, gusura ibikorwa bitandukanye nk'umuhanda wifashishwa mu marushanwa y'imodoka ya Formula One izwi nka 'Hungaroring', kuganira n'abashoramari n'ibindi.

    Ataha ku mugaragaro inzu y'ibiro ikoreramo Ambasade y'u Rwanda muri Hongrie, Minisitiri Nduhungirehe yavuze ko icyo gikorwa kigaragaza uburyo u Rwanda rukomeje guhamya umubano warwo n'amahanga, by'umwihariko n'ibihugu by'inshuti nka Hongrie.

    U Rwanda rwafunguye ambasade yarwo i Budapest, Hongrie, mu Ukuboza 2023. Muri Werurwe 2024, Ambasaderi Marguerite Françoise Nyagahura, ashyikiriza Perezida wa Hongrie, Tamás Sulyok, impapuro zimwemerera guhagararira u Rwanda muri iki gihugu.

    Minisitiri Nduhungirehe ati 'Ambasaderi wacu hano muri Hongrie yatangiye gufasha mu bikorwa bitandukanye bigamije guhamya umubano n'ubufatanye bw'impande zombi mu nzego zitandukanye. Mu gihe gito amaze twatangiye kubona umusaruro mu nzego zitandukanye, nko mu ishoramari, uburezi no kubaka ubushobozi.'

    Minisitiri Nduhungirehe yavuze ko hakiri amahirwe menshi yo gufatanyamo mu nzego zitandukanye, ndetse agomba kuyabyazwa umusaruro hashingiwe ku nyungu z'ibihugu byombi.

    Ati 'Iyi ambasade ntabwo izafasha mu bijyanye na dipolomasi gusa, ahubwo ni n'ikiraro gifasha mu guteza imbere ibiganiro bitandukanye, kwimakaza udushya, no kubaka ubucuti hagati y'abaturage b'ibihugu byombi. Dushimiye Guverinoma ya Hongrie yatumye bishoboka.'

    Umunyamabanga wa Leta muri Minisiteri y'Ububanyi n'Amahanga ushinzwe ibijyanye no guteza imbere umubano n'ibihugu, Boglárka Illés, yavuze ko Hongrie ibona u Rwanda nk'umufatanyabikorwa mwiza, na cyane ko ari igihugu cya mbere cyo munsi y'Ubutayu bwa Sahara gifunguye ambasade i Budapest mu myaka 21 ishize.

    Ati 'U Rwanda ni kimwe mu bihugu bya Afurika bitanga icyizere mu bijyanye n'uko rwibanda ku guhanga udushya. Nubwo rwahuye n'ibibazo bikomeye rwabashije gutera intambwe mu nzego zitandukanye nko guhanga udushya, ikoranabuhanga, umutekano n'iterambere rirambye. Ni yo mpamvu twafunguyeyo ibiro mu myaka ibiri ishize. Tubona ko ari ahantu heza ku gutangiriza ishoramari ugamije usoko rya Afurika y'Uburasirazuba.'

    Abanye-Hongrie ba mbere bagiye gushora imari mu Rwanda

    Mu kiganiro na IGIHE Minisitiri Nduhungirehe, yavuze ko basuye ibikorwa bitandukanye bigamije gukangurira Abanye-Hongrie gushora imari yabo mu Rwanda.

    Mu basuwe harimo abashoramari bo muri Hongrie bafite ikigo kizwi nka Hunland, gikora ubworozi bw'inka no gucuruza ibizikomokaho.

    Abo bashoramari basuye u Rwanda bagirana ibiganiro na Minisiteri y'Ubuhinzi n'Ubworozi, basura n'umushinga w'ubworozi i Gako ndetse biyemeza gushora imari ya miliyoni 63$ (arenga miliyari 89,9 Frw) mu bijyanye n'ubworozi bw'inka zigera kuri 2000.

    Ni bo bashoramari ba mbere bo muri Hongrie bifuje gushora imari mu Rwanda, ndetse bakazita no ku bijyanye no gutunganya amata ku rwego mpuzamahanga.

    Nduhungirehe ati 'Mu myaka itanu iri imbere barashaka gukora ishoramari ry'inka zirenga 2000 z'amata yo ku rwego rwo hejuru. Bazakora n'ubworozi butanga icyororo cy'inka za kigezweho ku Banyarwanda n'abo mu Karere. Ni ishoramari bazafatanyamo n'Abanyarwanda.'

    Icyakora yavuze ko uwo mushinga w'ishoramari ukiganirwaho na Minisiteri y'Ubuhinzi n'Ubworozi, ndetse n'Urwego rw'Igihugu rw'Iterambere kugira ngo ubanze wemezwe.

    Haganiriwe kandi no guteza imbere ubufatanye mu bucuruzi n'ishoramari, uburezi n'ibijyanye no guteza imbere siporo, ubuvuzi, ingufu za atomike n'izindi.

    Ikindi cyagarutsweho ni intambwe imaze guterwa ku kibazo cyo mu Burasirazuba bwa Congo, aho Hongrie na yo ishyigikiye ko bigomba gukemurwa hisunzwe ibiganiro ako kuba intambara.

    Uretse kwagura umubano ukava ku nzego za Leta ukagera no ku Bikorera, biteganyijwe kandi ko ibihugu byombi bizateganya amasezerano ajyanye no kurinda ishoramari riba ryarakozwe n'abaturage muri ibyo bihugu.

    Ni ukuvuga nk'iryo Abanyarwanda bakoze muri Hongrie, n'iryo Abanya-Hongrie bakoze mu Rwanda. Ni ibiganiro bizatangira kuganirwamo muri Kamena 2025.

    Minisitiri w'Ububanyi n'Amahanga n'Ubucuruzi, Péter Szijjártó, na we yashimiye umubano w'u Rwanda Hongrie ukomeje gutera imbere agaruka ku mushinga wo kuvugurura Uruganda rutunganya amazi rwa Karenge ruhereye mu Karere ka Rwamagana.

    Minisitiri Péter Szijjártó yavuze ko igihugu cyabo cyateye ikunga uwo mushinga y'arenga miliyoni 52$, ndetse imirimo yo kuruvugurura ikaba iratangira mu minsi mike, agaragaza ko bazafatanya n'u Rwanda mu yindi mishinga.

    Minisitiri Nduhungirehe kandi yatanze ikiganiro mu Ishuri ryigisha ibijyanye na Dipolomasi rya Hongrie, ku bijyanye na politiki y'Ububanyi n'amahanaga y'u Rwanda.

    Minisitiri Nduhungirehe n'inkingi zigize dipolomasi y'u Rwanda, zirimo kubungabunga umutekano w'u Rwanda no gushakira u Rwanda amaboko mu ishoramari no kubana n'ibindi buhugu amahoro.

    Ubufatanye bwagutse muri siporo

    Itsinda ry'Abanyarwanda kandi ryasuye 'Piscine' yitwa Széchenyi Thermal Bath, ikaba iya mbere mu Burayi n'iya gatatu mu Isi ihambaye bijyanye n'umwihariko w'amazi ashyushye ava mu nda y'Isi.

    Ni amazi karemano ashyushye kuva ku kigero 18°C kugeza 40°C. Aba yashyuhishwe n'umuriro ubarizwa mu nda y'Isi, akagira imyunyu ngugu karemano ifasha mu guteza imbere ubuzima bw'abahogera.

    Ni 'piscine' igira ibice bitandukanye bijyanye n'ibyo abantu bakunda, ikagira ibyuzi biherereye mu nzu, hanze. Yatashywe mu 1913.

    Minisitiri Nduhungirehe ati 'Mu bufatanye dushaka gufatanya na bo harimo n'ubwa siporo nk'ibyo bafasha u Rwanda, nk'amahugurwa n'ibindi. Iriya 'piscine' iri ku rwego rwo hejuru mu gutoza abantu, no kwakira amarushanwa mpuzamahanga. Twagiyeyo kugira ngo turebe uko twateza imbere imikino yo koga mu Rwanda.'

    Nyuma Minisitiri Nelly Mukazayire yakoranye inama n'Umunyamabanga wa Leta muri Hongrie ushinzwe siporo, baganira ku bufatanye hagati y'ibihugu byombi ndetse bemeza ko bagiye kunonosora umushinga w'amasezerano y'ubwo bufatanye agasinywa vuba.

    Hemejwe kandi ko Hongrie nk'igihugu kizobereye imikino yo koga, izohereza impuguke mu bijyanye n'umukino wo koga, kakaza kureba ibikenewe n'ibihari ku buryo bafashanya mu rwego rwo kubakira ubushobozi abatoza n'abakora uwo mwuga bo mu Rwanda.

    Basuye Ikigo gishinzwe umukino w'imodoka cyitwa 'Motorsports' ari na cyo gifasha mu gutegura Fomule 1.

    Bijyanye n'uko u Rwanda bwasabye kwakira Formule 1. Minisitiri Mukazayire yagiyeyo kugira ngo amenye uko uwo mukino utegurwa, ibikorwaremezo bikenewe, kubakira abakozi ubushobozi n'ibindi bijyanye n'ayo marushanwa y'imodoka.

    Bahuye kandi n'Abayobobozi bari bayobowe na Perezida w'Umukino w'Amagare muri Hongrie, bemeranya ubufatanye mu kubaka ubushobozi muri uwo mukino.

    Mininsitiri Mukazayire na we yabatumiye kuzitabira Shampiyona y'Isi y'Umukino w'Amagare izabera mu Rwanda muri Nzeri 2025 na bo bagaragaza ko bazohereza ikipe.

    Nyuma itsinda ry'Abanyarwanda ryitabiriye ibirori byo gutangiza Isiganwa ry'Amagare rizwi nka ” Tour de Hongrie ” ryateguwe ku nshuro igira 100.

    Minisitiri Mukazayire yahawe umwanya wo kuvuga ijambo aho yakanguriye abaryitabiriye kuzakurikira Shampiyona y'Isi y'Amagare izabera i Kigali muri Nzeri 2025, anabashishikariza gusura u Rwanda no kureba ibyiza nyaburanga birutatse.

    Uko uruzinduko rwagenze mu mafoto

    Gutaha Ambasade y'u Rwanda muri Hongrie

    Minisitiri Péter Szijjártó wa Hongrie yakiriye mugenzi we w'u Rwanda, Minisitiri Olivier Nduhungirehe ari kumwe na Minisitiri wa Siporo, Nelly Mukazayire

    Minisitiri Péter Szijjártó na Minisitiri Olivier Nduhungirehe baganiriye n'itagazamakuru

    Itsinda ry'u Rwanda ryasuye abashoramari bo muri Hongrie bafite ikigo kizwi nka Hunland, gikora ubworozi bw'inka kikanacuruza ibizikomokaho

    Itsinda ry'u Rwanda ryasuye 'Piscine' ya Széchenyi Thermal Bath, igizwe n'amazi ashyushye ava mu nda y'Isi

    Basuye ahakorerwa amarushanwa ya Formula 1 hazwi nka 'Hungaroring'

    Itsinda ry'u Rwanda n'Abashoramari bo mu bigo bikomeye byo muri Hongrie

    Ubwo itsinda ry'u Rwanda ryahuraga n'abayobobozi b'umukino w'amagare muri Hongrie

    Minisitiri Nduhungirehe atanga ikiganiro ku biga ibijyanye na dipolomasi

    [email protected]

    Source : http://igihe.com/amakuru/u-rwanda/article/umusaruro-w-uruzinduko-rwa-minisitiri-nduhungirehe-na-minisitiri-mukazayire

  • Gasabo: Urubyiruko rwasabwe gutera umugongo ibisenya ubumwe bw'Abanyarwanda – #rwanda #RwOT

    Yabivugiye mu gikorwa cyo kwibuka ku nshuro ya 31 abazize Jenoside yakorewe Abatutsi, Ikigo kigura kikanagurisha imiti mu Rwanda, RMS, cyakoze ku wa 16 Gicurasi 2025 cyabereye ku cyicaro cyacyo giherereye mu murenge wa Kacyiru.

    Ni igikorwa cyitabiriwe n'abakozi ba RMS, MINUBUMWE, abayobozi batandukanye ku rwego rw'Akarere ka Gasabo ndetse n'abandi baje kwifatanya na bo.

    Perezida wa IBUKA mu Karere ka Gasabo, Theogene Kabagambire, yasobanuye ko inzibutso za Jenoside 11 ziri mu Karere ka Gasabo, ziruhukiyemo inzirakarengane nyinshi, asaba abazi ahari imibiri y'Abatutsi bishwe muri Jenoside gutanga amakuru kugira ngo na yo ishyingurwe mu cyubahiro.

    Inararibonye mu mateka y'u Rwanda wari uhagarariye MINUBUMWE, Karinamaryo Theogene, yavuze ko Jenoside yakorewe Abatutsi yateguwe kuva kera binyuze mu kwigisha ingengabitekerezo yayo ahantu henshi bikagaragazwa n'uko mu gihugu hose yakozwe mu buryo bumwe.

    Agira ati' Jenoside yateguwe kera, kuva mu 1957 haza ibitekerezo bitandukanya Abahutu n'Abatutsi, birakura bigera 1959…kugeza mu 1994. Biriya bintu ntibishobora gukorwa bitarateguwe kandi ikigaragaza ko byari byarateguwe ni uko byakozwe mu gihugu hose kandi ababikora bakoresha amagambo amwe n'uburyo bumwe bwo kwica abantu.'

    Yongeraho ko ubwo Abatutsi birukanwaga mu Rwanda atari uko rwari ruto nk'uko babivugaga, ahubwo bashakaga kubirukana ngo bahere mu mahanga.

    Avuga ko ingengabitekerezo ya Jenoside igihari ahubwo Abanyarwanda bagomba kuba maso bagahangana na yo kuko umwanzi ntaho yagiye.

    Umuyobozi Nshingwabikorwa w'Akarere ka Gasabo, Mudaheranwa Regis, yavuze ko Abanyarwanda bagomba gushikama bagahangana n'ingengabitekerezo ya Jenoside, asaba urubyiruko kwirinda kwishora mu bikorwa bibi.

    Ati' Abanyarwanda dukwiye guhitamo urupfu tugomba gupfa nk'uko Nyakubahwa Perezida wa Repubulika akunze kubidusaba, kuko twarazibonye zose… dukwiriye gushikama tukareba kuko bajya kutwica bahereye ku gusenya ubumwe. Urubyiruko inama babagira iteka, nibabahamagarira ikibi muzajye mwanga.'

    Muri icyo gikorwa, RMS, yavuze ko iki ari igice cya mbere kuko ku wa 06 Kamena 2025, bazakomeza kwibuka aho bazajya kwifatanya n'abarokotse kunamira inzirakarengane zazize Jenoside ziruhukiye mu Rwibutso rwa Murambi ndetse hakorwe n'ibikorwa byo kugabira inka abarokotse.

    Habanje gufatwa umunota wo kwibuka

    Perezida wa IBUKA mu Karere ka Gasabo, Theogene Kabagambire yasabye Abanyarwanda gutanga amakuru ku hajugunywe imibiri itarashyinguwe mu cyubahiro

    Karinamaryo Theogene yatanze ikiganiro ku mateka y’u Rwanda

    Umuyobozi Mukuru wungirije wa, RMS, Mutoni Diana yavuze ko bazakomeza ibikorwa byo kwibuka abazize Jenoside yakorewe Abatutsi

    Perezida wa IBUKA mu Karere ka Gasabo, Theogene Kabagambire yasabye Abanyarwanda gutanga amakuru ku hajugunywe imibiri itarashyinguwe mu cyubahiro

    Source : http://igihe.com/amakuru/u-rwanda/article/gasabo-urubyiruko-rwasabwe-gutera-umugongo-ibisenya-ubumwe-bw-abanyarwanda

  • U Rwanda rweretse abanya-Ethiopia amahirwe y'ishoramari arubonekamo – #rwanda #RwOT

    Ambasade y'u Rwanda muri Ethiopia ku bufatanye na Queen Nyabinghi East Africa hamwe na Bridge Investment Consultancy, yakiriye ku nshuro ya gatatu inama yiswe 'Africa Business Link Forum', igamije kwereka abashoramari amahirwe aboneka ku isoko ry'u Rwanda ngo bayabyaze umusaruro.

    Iyi nama yabaye ku wa 15 Gicurasi 2025, hagamijwe gukomeza gahunda yo guteza imbere umubano ishoramari n'ubucuruzi hagati y'u Rwanda na Ethiopia.

    Iyi nama yitabiriwe n'abayobozi b'ibigo bikomeye muri Ethiopia, ba rwiyemezamirimo n'abandi bayoboye inzego zitandukanye z'abikorera.

    Yari igamije kubaha amakuru n'uburyo bwo gushora imari mu Rwanda mu nzego zirimo ubukerarugendo, ikoranabuhanga, ubuhinzi, ingufu, inganda n'imiturire.

    Ambasaderi Maj. Gen. (Rtd) Charles Karamba, uhagarariye u Rwanda muri Ethiopia, yashimangiye ko u Rwanda rwafunguye amarembo ku bashoramari bo muri Ethiopia.

    Yagize ati 'Iyi nama igamije kugaragaza amahirwe y'ishoramari ari mu Rwanda no koroshya imikoranire hagati y'abashoramari bo mu bihugu byombi'.

    Umubano mwiza hagati y'u Rwanda na Ethiopia ushingiye ku bufatanye mu bucuruzi, ubuhinzi, ubuzima, ingufu, imikino n'umuco.

    Ambasaderi Karamba yanagarutse ku bukungu bw'u Rwanda bwazamutseho 8.9% muri 2024, yereka abifuza gushora imari mu gihugu ko baba bayishoye ahunguka.

    Yongeyeho ati 'U Rwanda ntabwo ari ikirwa; rutanga amasoko atandukanye arenga imipaka yarwo. Hamwe no kugera ku masoko ya EAC na ECCAS, abashoramari bungukirwa n'abaturage bo mu karere barenga miliyoni 400'.

    Imwe mu myanzuro yafashwe ni uko muri Nzeri cyangwa Ukwakira 2025, hazabaho urugendo rw'ubucuruzi ruzageza abashoramari ba Ethiopia mu Rwanda, aho bazareba amahirwe ahari ndetse banahure n'abashoramari bo mu Rwanda.

    Ambasaderi Karamba yavuze ko 'Dukwiye kubaka ubucuti bushingiye ku nyungu zifatika, aho amahirwe ahinduka ubukire buhuza ibihugu byacu byombi'.

    Iyi nama yashimangiye u Rwanda nk'ahantu ho gushora imari hizewe.

    Ambasaderi Maj Gen Charles Karamba, yashimangiye ko u Rwanda rwafunguye amarembo ku bashoramari bose

    Iyi nama yiswe 'Africa Business Link Forum', yabaye ku nshuro ya gatatu ibera i Addis Ababa

    Source : http://igihe.com/amakuru/u-rwanda/article/u-rwanda-rweretse-abanya-ethiopia-amahirwe-y-ishoramari-arubonekamo

  • Karongi: Babangamiwe no kutagira aho bagurira ibiryo by'amatungo – #rwanda #RwOT

    Akarere ka Karongi ni kamwe mu turere turimo abaturage benshi umushinga wa PRISM wahaye amatungo magufi arimo inkoko, ihene, intama n'ingurube. Ibi byatumye aborora biyongera cyane nubwo bakigorwa no kubona ibiryo by'amatungo.

    Niyigena Alice utuye mu Mudugudu wa Kibamba mu Kagari ka Nkoto mu Murenge wa Murambi, yavuze ko ibiryo by'amatungo babikura mu Karere ka Muhanga ariko kubera imihanda mibi ngo bibageraho bitinze kandi bihenze.

    Ati 'Ibiryo by'amatungo tubikura kure, bikaza bihenze ku buryo twe tworoye amatungo magufi bitugora cyane, ubu ikilo cy'ibiryo by'inkoko kiragura 800 Frw ariko dufite uruganda hafi bishobora korohamo. Turasaba ubuyobozi ko bwadufasha tukabona uruganda hafi.''

    Nyiranzira Marie Rose utuye mu Kagari ka Nyarunyinya worora ingurube, we yavuze ko bishyize hamwe bakajya batumiza ibiryo by'amatungo mu Mujyi wa Kigali, ariko na bwo ngo ni ibintu bibahenda cyane ku buryo basaba ubuyobozi kubafasha hakaboneka uruganda rw'ibiryo by'amatungo hafi.

    Turikumwe Eric we yavuze ko kutabona ibiryo by'amatungo hafi binatuma batongera amatungo borora kandi aba ashobora kubafasha mu kwiteza imbere.

    Ati 'PRISM yaduhaye inkoko icumi kuri buri rugo, hari ubwo dushaka kongera ubu bworozi mu ngo zacu tukagorwa no kubona ibiryo by'amatungo hafi, ubu turabigura biduhenze ariko ubuyobozi bubitwegereje twakorora inkoko nyinshi.''

    Umuyobozi w'Akarere ka Karongi wungirije ushinzwe Iterambere ry'Ubukungu, Ntakirutimana Julienne, yavuze ko ikibazo cy'ibura ry'ibiryo by'amatungo kizwi mu nzego zose, yijeje abaturage ko hari gushakwa uko muri aka Karere hakubakwa uruganda rw'amatungo.

    Ati 'Dufite umushinga ugiye kuzana uruganda rw'ibiryo by'amatungo mu Karere. Uwo mushinga uracyari mu nyigo ariko uzaba ubitanga mu Ntara y'Iburengerazuba yose, urwo ruganda ruzaba ruri mu Karere ka Karongi.''

    Visi Meya Ntakirutimana yavuze ko undi mushinga bakiri kuganiraho na RAB ari uko bakwigisha abaturage gukora ibiryo by'amatungo bakoresheje utumashini ku buryo umuturage yakwigurira utumashini duto akigishwa kwikorera ibiryo by'amatungo.

    Kugeza ubu mu Karere ka Karongi umushinga PRISM washyizweho na Leta y'u Rwanda uterwa inkunga n'Ikigega Mpuzamahanga giteza imbere ubuhinzi n'ubworozi, IFAD, binyuze muri Minisiteri y'Ubuhinzi n'Ubworozi na RAB, umaze gutanga amatungo magufi ku baturage barenga 1500 bahawe amatungo arimo inkoko 7650, ingurube 383 n'ihene 901.

    Umuyobozi w'Akarere ka Karongi wungirije ushinzwe Iterambere ry'Ubukungu, Ntakirutimana Julienne, yavuze ko iki kibazo bakizi kandi bari gushaka uko cyakemurwa burundu

    Abaturage bavuga ko ibiryo by'amatungo babikura mu Karere ka Muhanga abandi bakabitumiza i Kigali

    Niyigena Alice yasabye ubuyobozi kubafasha bakabona ibiryo by'amatungo hafi

    Source : http://igihe.com/amakuru/u-rwanda/article/karongi-babangamiwe-no-kutagira-aho-bagurira-ibiryo-by-amatungo