Category: Uncategorized

Abahanzi b’indirimbo zo kuramya no guhimbaza Imana, Adrien Misigaro na Richard Nick Ngendahayo bageze muri Australia aho bafite ibitaramo bitatu.

Igitaramo cya mbere aba bahanzi bazakora kizabera mu Mujyi wa Brisbane ku wa 12 Nzeri 2026 babone gukomereza mu kizabera i Melbourne ku wa 19 Nzeri 2026 basoreze ibitaramo byabo i Sydney ku wa 26 Nzeri 2026.

African Gospel Echoes yateguye ibi bitaramo yahisemo aba bahanzi baba muri Leta Zunze Ubumwe za Amerika mu rwego rwo guhuza Abanyafurika binyuze mu muziki wo kuramya no guhimbaza Imana.

Richard Nick Ngendahayo ni umuhanzi ukunzwe mu ndirimbo nka “Yambaye Icyubahiro”, “Mbwira Ibyo Ushaka”, “Ibuka”, “Gusimba Umwonga”, “Si Umuhemu”, “Ijwi Rinyongorera”, “Sinzakwitesha”, “Wemere Ngushime” n’izindi nyinshi.

Adrien Misigaro yamenyekanye cyane mu ndirimbo nka “Ntacyo Nzaba”, “Niyo Ndirimbo”, “Nkwite Nde”, “Nkurikira” n’izindi.

Adrien Misigaro na Richard Nick Ngendahayo bageze muri Australia

Umutoza w’ikipe y’igihugu Amavubi, Stephen Constantine yahamagaye abakinnyi 28 azifashisha mu gushaka itike y’Igikombe cya Afurika cya 2027.

Ni imikino ibiri afitanye na Liberia i Kigali tariki ya 25 Nzeri 2026 na Cape Verde muri Cape Verde tariki ya 29 Nzeri 2026.

Umutoza Stephen Constantine akaba yahamagaye abakinnyi 28, iyo urebye nta gutungurana kunini kwabayemo mu bakinnyi bahamagawe.

Niyomugabo Claude udafite ikipe muri iyi minsi ni we mukinnyi usa n’uwatunguranye.

Abakinnyi 28 umutoza Stephen Constantine yahamagaye

Abanyezamu:

1. NIYONGIRA Patient – POLICE FC
2. HAKIZIMANA Adolphe – APR FC
3. NTWARI Fiacre – KRUGER UTD
4. MUGISHA Yves – RAYON SPORTS

Ba Myugariro bo hagati:

1. MUTSINZI Ange – ZIRA FK
2. NIYIGENA Clement – SMOUHA SC
3. KAVITA Phanuel – BIRMINGHAM LEGION
4. NKULIKIYIMANA NGANJI Darryl – STANDARD LIEGE

Ba Myugariro bo ku mpande n’abasatira banyuze ku mpande :

1. IMANISHIMWE Emmanuel – CHENNAIYIN FC
2. MICKELS Leroy – WALDHOF MANNHEIM
3. EMERAN Noam – FC STADE LAUSANNE OUCHY
4. NIYOMUGABO Claude – (-)
5. KWIZERA Jojea – RHODE ISLAND FC
6. BYIRINGIRO Jean Gilbert – APR FC
7. UWUMUKIZA Obed – RAYON SPORTS
8. MUGISHA Gilbert – JWANENG GALAXY

Abakina Hagati:

1. MUGISHA Bonheur – AL HAZEM
2. BIZIMANA Djihad – CS CONSTANTINE
3. GUEELETTE Samuel – UTA ARAD
4. HAMIS Hakim – KIYOVU SC
5. NSANZIMFURA Keddy – KIYOVU SC
6. MUHIRE Kevin – JAMUS FC

Ba Rutahizamu:

1. NSHUTI Innocent – AL WAFAQ AJDABIA
2. MBONYUMWAMI Taiba – ETHIOPIAN COFFEE SC
3. BIRAMAHIRE Abeddy – AL BATIN FC
4. MICKELS Joy Lance – SABAH FK
5. UWIYAREMYE Fidal – APR FC
6. MICKLES Slayd – HIBERNIANS

Amavubi yahamagawe

Umubyinnyi mpuzamahanga w’Umunyarwanda, Sherrie Silver yavuze ko impamvu atarashaka umugabo ari uko adakunze guhura nabo cyane kandi ngo iyo agize uwo yiyumvamo ahita amuhunga.

Mu butumwa yanyujije ku rukuta rwe rwa Instagram, asubiza umuntu wari umubajije impamvu adafite umugabo.

Sherrie Silver yavuze ko iki kibazo akunda kukibazwa ariko na we atazi impamvu kuko ni umuntu udahura n’abagabo cyane ariko n’iyo bahuye baba baganira akazi gusa.

Ati “Abantu bakunze kumbaza impamvu ntarashaka. Mu by’ukuri, sinjya mpura n’abagabo benshi, kandi iyo mpuye na bo akenshi ibiganiro byacu biba bifitanye isano n’akazi. Nanone ndi umuntu ugira isoni cyane kandi rimwe na rimwe nkagira n’uburyo bwo kwitwara butanoze mu gihe ndi kumwe n’umuntu mushya.'

Yakomeje avuga ko iyo abonye umuhungu akumva aramukunze ahita yigira busy ikindi ngo bamubwiye ko abanyarwanda bamutinya.

Ati 'Iyo mbonye umusore mwiza, mpita mva aho ndi, nkajya gushaka ikindi kintu nkora gituma mpuga (busy). Musengere mwese. Hari uwambwiye ngo niba nshaka kubona umugabo nkwiye kumara igihe gito mu Rwanda kuko abagabo bo mu Rwanda barantinya.”

Uyu mubyinnyi kandi abona kuba atabona umwanya uhagije wo kuba yagira umuntu bagirana umubano wihariye kuko ahora mu ngendo kubera imiterere y’akazi ke ari kimwe mu bituma ashobora kuba atajya mu rukundo.

Sherrie Silver ku mpamvu adashaka umugabo

Ngo agira isoni nyinshi

Mu bihe bitandukanye hagiye hakorwa impinduka mu burezi zigamije kuzamura ireme ry'uburezi, kugeza ku zitangiranye n'umwaka w'amashuri wa 2026/27 zijyanye no kuzamura urwego rw'abarimu bigisha mu mashuri abanza bakazagera ku rwego rwa kaminuza mu bihe biri imbere

Hari kandi ibikorwa byunganira integanyanyigisho byagaragaye ko iyo bigenewe umwanya bifasha umunyeshuri gufata neza no gukoresha mu buzima busanzwe ibyo yigishwa na mwarimu.

Minisitiri w'Uburezi Joseph Nsengimana yabwiye IGIHE ko iyo urebye impinduka ziri gukorwa mu burezi, mu myaka itanu iri imbere abana bazaba barangiza imyaka itatu ya mbere bazi gusoma no kwandika.

Ati 'Mu myaka itanu, ni uko umwana azajya arangiza umwaka wa gatatu w'amashuri abanza azi gusoma, azi kwandika, mu Kinyarwanda no mu Cyongereza, azi kuvuga Icyongereza ku buryo avuga akaganira n'umuntu bakumvikana, akaba ashobora gukora imibare yo kuri rwa rwego rw'amashuri abanza mu mwaka wa gatatu kandi akaba asobanukiwe na siyansi kuri urwo rwego.'

Isuzuma ry'imyigire mu mashuri yo mu Rwanda, Learning Achievement in Rwandan Schools 2025, LARS 2025 rigaragaza ko mu gusoma igika cy'amagambo akurikiranye, 70,8% bageze kuri icyo gipimo, bafite impuzandengo y'amagambo 45 ku munota.

Ariko ikibazo gikomeye kigaragara mu gusobanukirwa. Ku rwego rw'igihugu, 43,6% gusa by'abanyeshuri biga mu mwaka wa gatatu ni bo bashoboye gusubiza neza nibura ibibazo bitandatu muri birindwi byo gusobanukirwa ibyo bari bamaze gusoma.

Minisitiri Nsengimana ati 'Ariko cyane cyane gusoma kwandika, kumva ibyo yasomye mu Cyongereza no mu Kinyarwanda. Tubigezeho ku buryo umwana wese urangije mu mwaka wa gatatu w'abanza aba yabigezeho, icyo gihe tuzaba duhagaze neza. Ikindi ni uko umwana uzaba urangije amashuri abanza azaba afite umusingi ufatika wo kugira ngo ashobore kwiga amashuri yisumbuye ndetse na wawundi urangije amashuri yisumbuye ashobore kuba ari umuntu ushobora kujya kuri kaminuza akihitiramo icyo yiga, akacyiga akagitsinda, akajya mu kazi kandi agakora bishimishije.'

Yasobanuye ko n'utagiye muri kaminuza agahita ajya mu kazi, ari uwize TVET, agomba kujya arangiza akora ibintu bifite ireme.

Ati 'Ari na wawundi wiga amasomo asanzwe agakora ibintu bifite ireme, ari wawundi wize ubuforomo cyangwa ibaruramari agakora ibintu bifite ireme.'

'Kugira ngo uvemo ufite ubumenyi muri ibyo byiciro byose, icyo gihe ni bwo tuzavuga ko twateye intambwe mu kuzamura ireme ry'uburezi. Mu myaka itanu ndakeka ko ibi twavuze dushaka ko umwana urangije umwaka wa gatatu w'amashuri abanza, wawundi urangije amashuri abanza agiye mu yisumbuye, wawundi urangije ayisumbuye agiye muri kaminuza, ibyo tugomba kuba twabigezeho mu myaka itanu.'

Mu mpinduka zakozwe mu burezi harimo kuzamura imyaka abiga mu mashuri nderabarezi ku buryo bazajya biga imyaka itanu bakarangiza bafite A1.

Ati 'Nubwo tuzaba tutararangiza kuko ba barimu bazaba batangiye kuza bafite A1 ariko na babandi basanzwe bigisha na bo bazaba bageze kuri iki cyiciro rero ireme ry'uburezi rizahita rizamuka. Na kaminuza izajya isohora abantu atari abo abantu binubira ahubwo ari abantu baza bafite n'ubumenyi bugaragara ku buryo ahita atangira gutanga umusaruro.'

Kaminuza zizajya zerekana abo zigisha aho bajya

Minisitiri Nsengimana yavuze ko kuva mu 2026, kaminuza zigomba kujya zikora intonde z'abanyeshuri bazo barangije bari mu mirimo cyangwa abayihangiye.

Ati 'Ubu kaminuza zose zigiye kujya zikora igenzura ku banyeshuri zigishije kugira ngo zerekane nko mu mezi atatu, atandatu, mu mezi icyenda bamenye muri ayo mezi muri abo barangije ni bangahe babonye akazi? Ni bangahe bihangiye umurimo? Noneho babigeze kuri HEC na yo ibitangaze, ababyeyi, abanyeshuri n'abandi barebe uburyo buri kaminuza ikora n'abayivuyemo umusanzu batanga mu guteza igihugu imbere. Bizatuma n'ibyo bigisha kuri kaminuza turushaho kubikora mu buryo bufatanyije n'abikorera cyangwa se akazi bazajya gukora bitume n'ako kazi bajya kugakora bagateze imbere.'

Abanyamahanga biga muri kaminuza zo mu Rwanda muri Kamena 2026 barengaga ibihumbi 13.

Kugeza mu 2024/25 mu Rwanda habarizwaga amashuri makuru na kaminuza 39 zivuye kuri 37 mu mwaka wari wabanje.

Mu myaka 10 iri imbere u Rwanda MINEDUC iteganya ko abantu bajya muri kaminuza bazaba ari benshi kandi abanyamahanga na bo bakiyongera.

Ati “Ubu hari abanyamahanga biga mu Rwanda barenga ibihumbi 13 muri za kaminuza z'u Rwanda ariko turashaka ko uwo mubare wiyongera ku buryo u Rwanda ruzaba ahantu abantu bose bifuza kujya kwiga. Aho ni mu cyiciro cya kaminuza ariko nanone abenshi bazaba ari Abanyarwanda.”

Ibi yabigarutseho mu gikorwa cyo kumurika ibyagezweho muri manda y'imyaka itanu y'Imana Njyanama y'akarere yatangiye mu mpera za 2021, igiye kurangira mu Ukwakira 2026.

Hazamuwe kandi ubworozi bw'amatungo atandukanye arimo n'inka zahawe abatishoboye ku bufatanye n'abafatanyabikorwa batandukanye bituma abatezaga bongera umusaruro w'ibiribwa n'amafaranga mu ngo zabo.

Zimwe mu ngero z'ababigezeho zigaragaramo Uwimana Clémence wo mu Murenge wa Kibeho, Akagari ka Mpanda worojwe inka, nyuma y'igihe kinini yamaze ahinga nabi nta fumbire.

Ibi byatumaga arumbya, kuko nk'aho yagomga gusarura ibilo 500 b'ibigori, yahakuraga ibitarenze 120 gusa, ndetse bikanatuma ajya gushakisha ibishingwe yahirira mu biraro by'abandi, bikamuviramo imvune nyinshi, ariko nyuma yo guhabwa inka yongera umusaruro.

Ati 'Inka nahawe yazanye agaciro mu buryo bwinshi kuko ibasha kumpa ibishingwe imirima ikarumbuka, amata y'abana akaboneka, urugo rukazamuka. Yanduhuye kujya gusasa mu biraro by'abandi nshaka ibishingwe, nsigaye mbyibonera ku yacu kandi bihagije.'

Iri terambere ryageze no kuri Ndagijimana Jean Marie Vianney w'imyaka 35 wo mu Murenge wa Mata, wavuze ko mu bihe bitambutse iwabo hataragera imishinga yo guhinga icayi, yigeze gutekereza kugurisha ubutaka bwe kubera ubukene abona nta kibweraho, ariko kuva mu 2021 aho atangiye gufashwa gutera icyayi kuri hegitari 1,37, ubu yabaye umukoresha w'abandi kuko akigirigita ifaranga ritubutse.

Ati 'Ubu mu 2026 nsigaye mfite amatungo, abana bariga kandi natanze n'akazi, nkoresha abakozi barenga 10 buri munsi. Icyayi cyampaye icyizere cy'ubuzima bw'ejo hazaza, nta mirire mibi iwanjye.'

Perezida w'Inama Njyanama mu Karere ka Nyaruguru, Ingabire Vénéranda, yavuze mu gihe we na bagenzi be bamaranye mu nshingano mu gihe cy'imyaka itanu, bafashe ibyemezo bisaga 240, byabyaye umusaruro ku kugabanya igwingira mu bana kubera imbaraga zashyizwe mu kuzamura umusaruro w'ubuhinzi cyane cyane ubumaze kwamamara muri Nyaruguru burimo ubw'ibirayi, icyayi na kawa, kongera uturima tw'igikoni n'ibindi.

Ati 'Twishimira cyane ibipimo bitwereka iterambere ry'umuturage byazamutse birimo igabanyuka ry'igwingira ry'abana aho bavuye kuri 39% muri 2021 bakaba 23% muri 2025. Ni intambwe yatewe, ariko kandi turifuza ko ikomeza kujya mbere n'abo basigaye bakayivamo kuko nabo ni abana b'igihugu.'

Ingabire, yavuze ko ibi byashobotse bihereye mu izamuka ry'ubukungu, uburezi, ubuvuzi, kwegerezwa amazi nk'aho ubu muri Nyaruguru bageze hejuru ya 80% bamaze kwegerezwa amazi, ibyo avuga ko byerekanye ko mu myaka itanu hari impinduka zishoboka.

Ingabire, yasabye ko abazabasimbura bazakomerezaho kugira ngo imibereho myiza y'abatuye i Nyaruguru ikomeza kuzamuka, bityo iterambere igihugu cyifuriza buri munyarwanda rigerweho.

Ibi biri mu myanzuro yatangajwe nyuma y'uruzinduko rw'akazi Perezida Paul Kagame, yagiriye mu Bwami bwa Oman kuva ku wa 7- 8 Nzeri 2026, ku butumire bwa Sultan Haitham bin Tariq wa Oman.

Mu biganiro byahuje aba bayobozi bombi, bashimangiye ko umubano w'ibihugu byombi ugomba kurushaho kwaguka, hibandwa ku nzego zirimo ishoramari, ubwikorezi, ingufu, ubucukuzi bw'amabuye y'agaciro, ubukerarugendo, ubucuruzi, itumanaho ndetse na serivisi z'imari.

Itangazo rihuriweho n'impande zombi rigira riti 'Impande zombi zemeranyije gufungura ambasade muri buri gihugu, gushyiraho Komisiyo ihuriweho n'ibihugu byombi ndetse n'Inama y'ubucuruzi ihuriweho, bizafasha gukurikirana no guteza imbere imishinga y'ubutwererane.'

Impande zombi kandi zemeranyije gushyiraho gahunda y'ubufatanye mu by'ubumenyi n'ikoranabuhanga, hagamijwe kongera imikoranire hagati y'inzego za Leta n'abikorera.

Muri uru ruzinduko, ibihugu byombi byasinye amasezerano n'imyanzuro itandukanye irimo ayerekeye korohereza abafite pasiporo z'akazi mu ngendo, kwirinda gusoresha kabiri, ubufatanye mu biganiro bya politiki, guteza imbere ubwikorezi n'ibikorwaremezo by'ibyambu, ubuhinzi, guteza imbere ishoramari ndetse no gushimangira ubufatanye mu by'ubucuruzi.

Perezida Kagame na Sultan Haitham bin Tariq bashimiye intambwe imaze guterwa mu mubano w'ibihugu byombi, by'umwihariko mu bijyanye n'ubwikorezi, itumanaho n'ikoranabuhanga.

Aba bayobozi banaganiriye ku bibazo byo mu karere ndetse no ku rwego mpuzamahanga, bashimangira ko bashyigikiye gukemura amakimbirane mu mahoro no kubahiriza amahame y'amategeko mpuzamahanga.

Perezida Kagame yashimiye Oman uruhare igira mu guteza imbere ibiganiro n'amahoro mu karere, mu gihe Sultan Haitham bin Tariq yashimye u Rwanda ku ruhare rwarwo mu kubungabunga amahoro no gushakira ibisubizo ibibazo byugarije akarere.

Iyo nkota yahawe Perezida Kagame mu musangiro yakiriwemo na Sultan Haitham mu Ngoro ya Al Hosn ku wa 7 Nzeri 2026, aho abayobozi bombi bahererekanyije impano z'urwibutso. Oman yatangaje ko uko guhererekanya impano kwagaragazaga 'ubucuti bwimbitse n'umubano ukomeye' hagati y'ibihugu byombi.

Perezida Kagame yahaye Sultan Haitham impano y'inkoni ya kinyarwanda iriho amasaro. Mugenzi we, yamuhaye inkota.

Nubwo ubuyobozi bwa Oman butigeze butangaza ku mugaragaro icyo inkota yahawe Perezida Kagame isobanura by'umwihariko, ifite umwanya ukomeye mu mateka y'icyo gihugu.

Ikirango cy'Igihugu cya Oman kigizwe n'inkota ebyiri zisobekeranye, hejuru yazo hari inkota ngufi igoramye izwi nka khanjar. Icyo kimenyetso gikomoka ku kirango cy'Ubwami bw'ingoma ya Al Bu Said, imaze kuyobora Oman kuva mu kinyejana cya 18, mbere y'uko gihinduka kimwe mu bimenyetso bikomeye biranga igihugu.

Ingoma ya Al Bu Said yashinzwe mu 1744 na Ahmad bin Said Al Busaidi, wabaye Imam wa Oman, ashyiraho urufatiro rw'umuryango w'ubwami Sultan Haitham abarizwamo kugeza uyu munsi.

Muri ayo mateka, inkota ntiyabaye gusa ikimenyetso cy'intambara. Yagiye ihuzwa n'ububasha, icyubahiro, ubwigenge bw'igihugu n'indangagaciro z'Abanya-Oman. Inkota gakondo na khanjar byakomeje kugaragara mu mihango ikomeye, ku bimenyetso by'igihugu no mu buryo Oman igaragaza umurage wayo.

Ni muri urwo rwego inkota yahawe Perezida Kagame ishobora gusobanurwa mbere na mbere nk'ikimenyetso cy'icyubahiro, aho Oman yahaye umukuru w'igihugu wayisuye ikintu gifitanye isano ikomeye n'amateka n'indangamuntu byayo.

Si ubwa mbere Sultan Haitham ahaye inkota umuyobozi ukomeye w'igihugu cy'amahanga.

Mu 2022, yahaye Umwami Philippe w'u Bubiligi inkota mu ruzinduko yagiriye muri icyo gihugu. Muri uwo mwaka kandi, Perezida wa Leta Zunze Ubumwe z'Abarabu, Sheikh Mohamed bin Zayed Al Nahyan, na we yahawe inkota ya Oman na Sultan Haitham nyuma y'uko abayobozi bombi bahererekanyije imidali n'impano z'urwibutso.

Imihanda ya miliyari 39 Frw mu mihigo: Umwaka uzarangira iri kuri 5% na 15%

Isesengura ry'imihigo ya Minisiteri y'Ibikorwa Remezo, MININFRA, y'umwaka wa 2026/27 rigaragaza ko imishinga itanu y'imihanda ifite uburebure bwa kilometero hafi 149 yagenewe hamwe amafaranga agera kuri miliyari 39,4 Frw, nyamara biteganyijwe ko umwaka uzarangira imirimo yayo igeze hagati ya 5% na 15% gusa.

Iyo mihanda ni Kigali–Muhanga wa kilometero 45, Prince House–Giporoso–Masaka wa kilometero 10, Shyira–Vunga–Musanze–Cyanika wa kilometero 51,2, Kinigi–Kora wa kilometero 28, ndetse n'imihanda ibiri yo mu Mujyi wa Kigali ifite kilometero 14,73, ihuza Zindiro, Masizi, Birembo, Kami, Gasanze, Cyamitsingi na Bibare.

Kuba iyi mishinga izarangiza umwaka igeze ku gipimo gito ntibisobanuye ko nta bikorwa bizaba byarayikozweho. Gahunda ya MININFRA igaragaza ko kuri myinshi muri yo, 2026/27 uzaba ari umwaka wo kuyivana mu byiciro byo gutegura no gutanga amasoko, ikinjira mu mirimo nyir'izina y'ubwubatsi.

Mbere y'uko imashini zitangira imirimo ikomeye, hari amasoko agomba kurangira, amasezerano agasinywa, abaturage bafite imitungo izangizwa n'imishinga bakishyurwa, ibikorwa remezo birimo imiyoboro y'amazi, amashanyarazi n'itumanaho bikimurwa, ndetse n'abatsindiye amasoko bakabona aho bashyira ibikoresho n'abakozi.

Umuhanda Kigali–Muhanga ni umwe mu mishinga igaragaza neza uko ibyo byiciro bizagenda.

Kigali–Muhanga: Amasezerano y'ubwubatsi ashobora gusinywa mu gihembwe cya gatatu

Leta iteganya kuvugurura no kwagura kilometero 45 za mbere z'umuhanda mugari Kigali–Muhanga–Akanyaru ufite kilometero 157.

MININFRA yagennye hafi miliyari 6,36 Frw kuri uyu mushinga mu mwaka wa 2026/27.

Imibare igaragaza ko uyu mushinga utaratangira kubakwa kuko urwego uriho rugaragazwa nk'urw'inyigo irambuye aho kuba urw'imirimo y'ubwubatsi.

Mu gihembwe cya mbere cy'uyu mwaka w'ingengo y'imari biteganyijwe ko amasoko azaba akomeje, mu cya kabiri akazaba ageze kure, naho mu gihembwe cya gatatu hakazasinwa amasezerano yo kubaka.

Ni mu gihembwe cya kane gusa hateganyijwe gutangira kubona igipimo gifatika cy'imirimo y'ubwubatsi, umwaka wose ukazarangira umushinga ugeze ku 8%.

Ibi bivuze ko igice kinini cy'umwaka w'ingengo y'imari kizakoreshwa mu gushyiraho ibyangombwa byose bituma imirimo y'ubwubatsi itangira, aho kuba mu kubaka umuhanda ubwawo ku kigero kinini.

Mu bikorwa biteganyijwe harimo kurangiza amasoko no gutangira imirimo y'ubwubatsi. Uturere twa Nyarugenge na Muhanga tuzagira uruhare mu bukangurambaga no mu korohereza ibikorwa byo kwimura no kwishyura abaturage bazagirwaho ingaruka n'umushinga.

Gahunda y'imihigo ihura n'ibikorwa by'amasoko byari byaratangiye muri RTDA. Iki kigo cyatangaje isoko ry'imirimo yo kubaka Kigali–Muhanga ku wa 8 Kamena 2026, nyuma ku wa 4 Kanama 2026 gitangaza ko igihe cyo gutanga inyandiko z'ipiganwa cyongerewe.

Uyu mushinga uri mu igenzurwa rya RTDA binyuze muri gahunda yayo y'ubwikorezi bwo mu mijyi no guteza imbere imihanda ihuza u Rwanda n'akarere, ikubiyemo kandi umuhanda ugana ku Kibuga cy'Indege Mpuzamahanga gishya cya Bugesera, Nyacyonga–Mukoto na Prince House–Masaka.

Prince House–Giporoso–Masaka wagenewe amafaranga menshi kurusha indi mihanda

Umuhanda Prince House–Giporoso–Masaka ufite kilometero 10 ni wo ufite umwihariko ukomeye kurushaho.

Mu mwaka wa 2026/27, uyu mushinga wagenewe hafi miliyari 22,26 Frw.

Aya mafaranga yonyine arenga kimwe cya kabiri cy'ingengo y'imari ya miliyari 39,4 Frw yagenewe imishinga itanu y'imihanda twasesenguye turebye mu mihigo y'iyi minisiteri.

MININFRA iteganya ko uzagera kuri 6% mu gihembwe cya mbere, 8% mu cya kabiri, 12% mu cya gatatu, hanyuma ukarangiza umwaka ugeze kuri 15%.

Ibikorwa byo gutangiza nyir'izina kwagura uyu muhanda, biteganyijwe kuri uyu wa Kabiri.

Shyira–Vunga–Musanze–Cyanika

Umuhanda Shyira–Vunga–Musanze–Cyanika ufite kilometero 51,2 ni urundi rugero rugaragaza ko igice kinini cy'umwaka kizakoreshwa mu bikorwa by'amasoko.

Utangira umwaka wa 2026/27 ugeze kuri 0% y'imirimo y'ubwubatsi, ukaba wagenewe hafi miliyari 2,82 Frw.

MININFRA iteganya ko amasoko azatangizwa mu gihembwe cya mbere, agakomeza mu cya kabiri, naho amasezerano yo kubaka agasinywa mu gihembwe cya gatatu.

Umwaka wose uzarangira umuhanda ugeze kuri 5% gusa.

Uretse amasoko, RTDA igomba kwishyura abaturage bazagirwaho ingaruka n'umushinga ndetse igatangira gutegura aho imirimo izakorerwa, kuzana abakozi n'ibikoresho.

Uturere twa Musanze na Nyabihu duteganyijwe kugira uruhare mu korohereza ibikorwa byo kwimura no kwishyura abaturage, gukurikirana umushinga no gufasha mu gukemura ibibazo byavuka mu ishyirwa mu bikorwa.

Muri Kamena 2026 RTDA yongereye igihe cyo kwakira inyandiko z'abapiganira imirimo yo kuvugurura no kubaka kilometero 51,2 z'uyu muhanda.

Kinigi–Kora na wo uzarangiza umwaka kuri 5%

Umuhanda Kinigi–Kora, ufite uburebure bwa kilometero hafi 28. MININFRA yawugeneye hafi miliyari 4,57 Frw.

Utangira umwaka ugeze kuri 0%, mu gihe intego y'umwaka wose ari 5%.

Biteganyijwe ko amasoko azatwara ibihembwe bibiri bya mbere, amasezerano agasinwa mu gihembwe cya gatatu, naho imirimo ya mbere y'ubwubatsi igatangira mu gihembwe cya kane.

Imihanda ya Zindiro izagera kuri 10%

Undi mushinga uteganyijwe kumara igice kinini cy'umwaka mu bikorwa by'amasoko ni uwo kuvugurura imihanda ibiri yo mu Karere ka Gasabo.

Umuhanda wa mbere ufite kilometero 10,23, uva Zindiro unyuze Masizi, Birembo na Kami ukagera Gasanze, mu gihe undi ufite kilometero 4,5 uhuza Cyamitsingi, Bibare na Zindiro.
Yombi hamwe ifite kilometero 14,73.

Mu mwaka wa 2026/27, iyi mihanda yagenewe hafi miliyari 3,37 Frw.

Urwego iriho ubu rugaragazwa nk'urw'inyigo irambuye.

Amasoko azaba akomeje mu gihembwe cya mbere, ageze kure mu cya kabiri, amasezerano asinywe mu gihembwe cya gatatu.

Nyuma yaho ni bwo imirimo izatangira, umwaka ukazarangira umushinga ugeze kuri 10%.

Akarere ka Gasabo kazagira uruhare mu korohereza ibikorwa byo kwimura no kwishyura abaturage, mu gihe RTDA izaba ishinzwe amasoko no gutangiza imirimo y'ubwubatsi.

Base–Butaro–Kidaho wo ufite ikibazo gitandukanye n'indi

Umuhanda Base–Butaro–Kidaho wo ufite umwihariko utandukanye n'indi.

Uyu muhanda ufite kilometero 63 ntabwo utangirira kuri zeru.

Imihigo ya 2026/27 igaragaza ko ugeze kuri 57,1%, ukaba wagenewe hafi miliyari 8,29 Frw muri uyu mwaka.

Icyakora, MININFRA iteganya ko uzakomeza kuba kuri 57,1% mu gihembwe cya mbere, icya kabiri n'icya gatatu, hanyuma ukagera kuri 60% gusa mu mpera z'umwaka.

Mu Ugushyingo 2024, RTDA yatangaje ko umuhanda Base–Butaro–Kidaho wari ugeze kuri 38,2%, icyo gihe ikavuga ko wari uteganyijwe kurangira mu mpera za 2025.

Raporo yakurikiyeho y'ishyirwa mu bikorwa ry'ingengo y'imari ya Leta yagaragaje ko mu gihembwe cya mbere cya 2025/26 umushinga wari ugeze kuri 55,3%, urenze gato intego ya 55% yari yarashyizweho.

Gahunda nshya ya 2026/27 ishyira aho umushinga ugeze kuri 57,1%, ariko ikagaragaza ko nta terambere rinini ry'imirimo riteganyijwe mbere y'uko isoko rishya rirangira.

Uyu muhanda ufite akamaro kanini mu Ntara y'Amajyaruguru, unyura mu Turere twa Rulindo na Burera, ukoroshya ingendo zijya i Butaro no ku bikorwa remezo bikomeye birimo Ibitaro bya Butaro ndetse na University of Global Health Equity.

Si imihanda yose minini izagenda gahoro

Kuba hari imishinga izarangiza umwaka igeze ku gipimo gito ntibikwiye gufatwa nk'ikimenyetso cy'uko gahunda yose y'u Rwanda yo kubaka imihanda izagenda gahoro muri 2026/27.

Hari indi mishinga iri muri gahunda imwe ya MININFRA ifite intego zikomeye cyane.

Umuhanda Ngoma–Ramiro ufite kilometero 52,8, urugero, utangira umwaka ugeze kuri 71,6%, ukaba uteganyijwe kugera kuri 100%.

Imirimo y'inyongera ku gice cya Base–Rukomo cya kilometero 15,5 hagati ya Byumba na Ngondore izava kuri 50% igere kuri 100%.

Umuhanda Nyacyonga–Mukoto wa kilometero 36 uteganyijwe kuva kuri 56% ukagera kuri 95%.
Imihanda Masaka–Kabukuba–Riziyeri na Kabukuba–Nyamata/Gahembe–Kindama izava kuri 5% igere kuri 60%.

Umuhanda Bugarama–Bweyeye ufite kilometero 60,11 n'uwa Kazabe–Rutsiro ufite kilometero 55,3, yombi izatangira kuri zeru ariko iteganyijwe kugera kuri 30% mu mwaka umwe.

Perezida Kagame yasuye Inzu Ndangamurage ya Frankincense Land, aho yatemberejwe mu byumba bitandukanye byayo, anasobanurirwa mu buryo burambuye ibyerekanwa bigaragaza amateka n'umurage ndangamuco bya Oman.

Iyi nzu ndangamurage igaragaza amateka maremare ya Oman, umuco n'imigenzo byaranze iki gihugu uko ibihe byagiye bihinduka, igafasha abayisura gusobanukirwa inkomoko yacyo n'umurage kimaze ibinyejana gisigasira.

Perezida Kagame kandi yasuye Ubworozi n'Ubuhinzi bwa Royal Razat, aho yagaragarijwe uburyo Oman iri kuvugurura urwego rw'ubuhinzi.

Yasobanuriwe amateka y'aho hantu, intego zabwo, ibikorwaremezo ndetse n'ibikoresho bikoreshwa mu guteza imbere umusaruro w'ubuhinzi n'ubworozi.

Royal Razat ikoresha uburyo bugezweho mu buhinzi n'ubworozi, ariko umwihariko wayo ni uko itagarukira gusa ku gutanga umusaruro. Yanashyizweho ku buryo ubuhinzi buhuzwa n'ubukerarugendo.

Binyuze muri ubu buryo buzwi nka agritourism, ibikorwa by'ubuhinzi bihindurwa kimwe mu bikurura ba mukerarugendo, bikanafasha urwego rw'ubuhinzi kugira uruhare rwagutse mu guteza imbere ubukerarugendo n'ubukungu.

Ibi biri mu murongo wa gahunda ya Oman yo kuvugurura no guteza imbere ubuhinzi, ikanashaka uburyo bushya bwo kongera agaciro k'ibikorwa bikorerwa muri uru rwego.