Category: Uncategorized

Yabitangaje kuri uyu wa Gatandatu tariki 15 Gicurasi ubwo yifatanyaga n'abo baturage mu kwizihiza umunsi mpuzamahanga wahariwe umuryango.

Muri uyu muhango wabaye hubahirizwa ingamba zo kwirinda Covid-19, Prof Bayisenge Jeanette yashimye gahunda nziza iri muri uyu murenge yiswe 'Kubyara muri Batisimu' igamije guherekeza imiryango itishoboye yo mu cyiciro cya mbere, aho itozwa gukoresha neza inkunga y'ingoboka ihabwa ndetse no gucunga neza amafaranga bakorera binyuze muri gahunda ya VUP (Vision Umurenge Program).

Minisitiri Bayisenge yashimye umusaruro watanzwe n'iyi gahunda, ashimira imiryango yemeye guherekezwa muri iyi gahunda ikanakurikiza inama yahawe.

Ati 'Turabashimira ku bw'umuhate wanyu kuko mwagaragaje ko abashyize hamwe nta kibananira, guherekeza umuntu mu rugendo rw'impinduka ni umurimo usaba ubwitange no kureba kure kuko ufashije umuryango aba afashije igihugu'.

Yashimye kandi ubuyobozi bw'Akarere ka Gicumbi uburyo bukomeje gushyigikira iyi gahunda ndetse n'izindi ziteza imbere umuryango, abasaba ko iyi gahunda yarenga imbibi z'Umurenge wa Muko ikagera no mu yindi mirenge yose y'Akarere ka Gicumbi.

Umwe mu baherekejwe muri gahunda yiswe 'Kubyara muri Batisimu' Buregeya Boniface, yavuze ko byamufashije kuvugurura inzu atuyemo, kwigurira inka biciye mu kwizigamira ku mafaranga ahabwa muri VUP.

N'ibintu ahuriyeho na Seromba Augustin ufite ubumuga bwo kutabona na we uhamya ko guherekezwa muri gahunda yo kubyarwa muri batisimu byamufashije kwizigamira mafaranga ahabwa y'ingoboka, aho yabashije kwigurira umurima w' ibihumbi 300 Frw ndetse akaba yaratangiye no kwizigamira muri gahunda ya Ejo Heza.

Umunyamabanga Nshingwabikorwa w'Umurenge wa Muko, Kayiranga Théobald yavuze ko iyi gahunda yatangijwe mu mwaka wa 2018 nyuma yo kubona ko hari bamwe bahabwa inkunga y'ingoboka bakayipfusha ubusa ntigire icyo ihindura ku mibereho yabo.

Yongeyeho ko imiryango 75 ariyo iherekezwa biciye muri iyi gahunda yo Kubyara muri Batisimu.

Mu rwego rwo gushyigikira gahunda yo guherekeza imiryango itishoboye, Minisitiri Bayisenge Jeannette yashyikirije ubuyobozi bw'Umurenge wa Muko Sheki ya miliyoni ebyiri n' ibihumbi Magana atanu (2,500,000 Frw)

Minisitiri Bayisenge yavuze ko ku bindi bibazo bikibangamiye umuryango birimo amakimbirane, imiryango ibana itarasezeranye mu buryo bwemewe n' amategeko, ihohoterwa rishingiye ku gitsina, abangavu baterwa inda bakiri bato, abana bata amashuri n'abakoreshwa imirimo ivunanye.

Mu gukemura ibi bibazo, yavuze ko hakenewe ubufatanye bw' abagize umuryango cyane cyane ababyeyi, aho yabasabye guhindura imyumvire.

Yongeyeho ko nk' abayobozi bagomba kugira uruhare mu gufasha abaturage muri urwo rugendo, bagafata ingamba zihamye zo gukemura ibibazo byugarije umuryango.

Umuyobozi w’Umurenge wa Muko, Theobald Kayiranga yavuze ko gahunda yo kubyara muri batisimu yatangijwe nyuma yo kubona ko hari bamwe bahabwa inkunga y'ingoboka bakayipfusha ubusa ntigire icyo ihindura ku mibereho yabo

Buregeya Boniface ni umwe mu batejwe imbere na gahunda yo kubyara muri batisimu

Abatuye Muko bahawe sheki ya miliyoni 2.5 Frw mu rwego rwo guteza imbere gahunda yo kubyara muri batisimu

Minisitiri Bayisenge yasabye uruhare rwa buri wese mu gukemura ibindi bibazo byugarije umuryango

Yavuze ko biri mu murongo wo kugabanya amakosa yajyaga agaragara mu mikoreshereze y'ubutaka, bigatuma igishushanyo mbonera cy'imikoreshereze y'ubutaka kitubahirizwa.

Ibi yabigarutseho ku wa Gatanu tariki ya 14 Gicurasi 2021 ubwo hatangizwaga icyumweru cyo kwakira ibibazo by'abaturage bishingiye ku butaka muri tumwe mu turere tugize Intara y'Iburasirazuba.

Iki gikorwa cyatangirijwe mu Karere ka Bugesera mu Murenge wa Nyamata.

Mukamana yavuze ko abaturage n'abayobozi bakwiriye gushyira mu bikorwa igishushanyo mbonera cy'imikoreshereze y'ubutaka, bakareka kurenga ku mabwiriza akigenga ngo kuko iyo ubirenzeho gato uba wishe imikoreshereze y'ubutaka, kuburyo ngo bishobora no kuzagira ingaruka ku gihugu mu myaka 50 iri imbere.

Yavuze ko kuri ubu mushinga w'imikoreshereze y'ubutaka uri mu Nteko Ishinga Amategeko hashyizweho amande yaba ku bayobozi ndetse n'abaturage bica imikoreshereze y'ubutaka kandi ngo ibikorwa bizajya biba byubatswe bizajya bihita bisenywa nta nteguza.

Mukamana yavuze ko impamvu bashyizeho ibihano bikarishye ari uko imikoreshereze y'ubutaka mu Rwanda iteye impungenge, ngo ubutaka burakoreshwa nabi kandi hari ubutaka buke bwagakwiriye gukoreshwa neza.
Ati ' Ibihano twateganyije ntabwo bizahabwa abaturage gusa n'abayobozi, uzajya atanga uburenganzira aho butari bukwiriye agomba kujya ahanwa mu buryo bufatika nta mpuhwe, yaba njye cyangwa ku mukozi wahinduye imikoreshereze y'ubutaka.'

Mukamana yavuze ko babizi neza ko mu bijyanye no gutanga serivisi y'ubutaka habamo ruswa nyinshi akaba ari nayo mpamvu bari gushyira imbaraga mu kuba ibyangombwa by'ubutaka byatangwa hakoresheje ikoranabuhanga aho ikigo gishinzwe imicungire n'imikoreshereze y'ubutaka aricyo kizajya kibigiramo uruhare.

Inama Njyanama igiye kwamburwa inshingano

Ubusanzwe Inama Njyanama z'uturere zari zifite inshingano zo kwemeza no guhindura imikoreshereze y'ubutaka muri ako Karere bashingiye ku gishushanyo mbonera, kuri ubu mu mushinga w'itegeko rishya izi nshingano bagiye kuzamburwa nyuma yo gusanga hari imyanzuro imwe n'imwe bafata iba idakwiriye ku mikoreshereze y'ubutaka.

Mukamana yagize ati ' Ubu ikigo kizajya kibanza kibirebe tubanze turebe icyo igishushanyo mbonera giteganya, tujye mu ingengamurongo (system) turebe niba ahantu ari ubuhinzi kugira ngo uzahavana ku buhinzi ahashyira ku gutura ntibizamushobokere kuko mu ngengamurongo ntibizamukundira, tuzabishyiramo imbaraga mu ikoranabuhanga kuko mu busanzwe babihinduraga.'

Yakomeje avuga ko iri tegeko rishya rizatuma abantu bo mu turere batangaga ibyangombwa byo kubaka mu manyanga bazajya bahita babihanirwa kuko hari abatangaga ibyangombwa byo kubaka ahantu hatari ho ariko ngo mu itegeko rishya bazajya babihanirwa.

Mukamana avuga ko babizi neza ko abatanga serivisi zo mu butaka badakora neza ariko ko akenshi biterwa n'ubuke bwabo ugereranyije n'abasaba iyi serivisi hirya no hino mu gihugu yizeza abaturage ko hari impinduka zigiye kuba kandi zizatanga umusaruro.

Umuyobozi Mukuru w’Ikigo cy’ubutaka Mukamana Esperance yavuze ko bagiye gukaza ibihano ku bkoresha nabi ubutaka

Iri tsinda ry'aba bapolisi, bahaguruse kuri uyu wa Gatandatu tariki ya 15 Gicurasi 2021 ku isaha ya saa tatu z'igitondo , mu gihe ku isaha ya saa cyenda babisikanye n'abandi bari bamazeyo umwaka n'igice bagera 125.

Iki cyiciro cya Gatandatu (PSU1-6) cyerekeje muri Centrafrique kiyobowe na Chief Superintendent of Police(CSP) Innocent Rutagarama Kanyamihigo naho abagarutse bari bayobowe na Superintendent of Police(SP) Gilbert Musoni.

Ibi byiciro byombi ni umutwe wihariye ushinzwe kurinda abayobozi bakuru n'abandi banyacyubahiro barimo abayobozi b'intumwa z'umuryango w'abibumbye, kurinda ibikorwaremezo n'abaturage.

Umuvugizi wa Polisi y'u Rwanda, CP John Bosco Kabera yashimiye abapolisi bavuye muri Centrafrique uburyo bitwaye mu kazi bari bamazemo umwaka urenga, n'ubwo byari mu bihe bigoye byo kurwanya icyorezo cya COVID-19.

Ati 'Aba bapolisi twakiriye uyu munsi igihugu cyabohereje mu butumwa mbere y'uko icyorezo cya COVID-19 kigera mu Rwanda ndetse n'aho bari bagiye babyitwayemo neza babasha gusohoza neza inshingano zabo. Nk'ibisanzwe mbere y'uko bagenda abayobozi bakuru muri Polisi y'u Rwanda babanza kubaha impanuro, muri izo mpanuro haba harimo uko bagomba kwitwara no mu bihe bigoye.'

CP Kabera yanasabye abapolisi bavuye mu butumwa bw'amahoro muri Centrafrique gukomeza kwirinda icyorezo cya COVID-19 kandi banafasha n'abandi baturarwanda kukirinda.

CSP Kanyamihigo uyoboye itsinda ryagiye, yavuze ko impanuro bahawe n'ubuyobozi bukuru bwa Polisi ziri mu bizabafasha kwitwara neza bagahesha ishema u Rwanda.

CSP Kanyamihigo yavuze ko usibye akazi ko kurinda, bazanakora ibindi bikorwa bijyanye no kuzamura imibereho myiza y'abaturage nk'ibikorwa by'isuku, gukangurira abaturage kuboneza imirire, kubegereza amazi meza no kubafasha kwicungira umutekano.

Superintendent of Police (SP) Gilbert Musoni waje uyoboye abapolisi 125 bagarutse na we yavuze ko nubwo icyorezo cya COVID-19 cyabasanzeyo, bitababujije gusohoza neza inshingano.

Yavuze ko usibye inshingano zo kurinda bari bafite, banageretseho no gukora ibindi bikorwa birimo nko gutanga amazi meza mu baturage n'ibindi bikorwa by'isuku nk'umuganda rusange.

Abapolisi ubwo buriraga indege berekeza muri Centrafrique

Abapolisi bavuye muri Centrafrique bashimiwe uburyo bitwaye

Itsinda ry’abapolisi 125 niryo risoje ubutumwa muri Centrafrique

Byavuzwe n’Umuyobozi wa IPRC-Huye ubwo hibukwaga ku nshuro ya 27 Jenoside Yakorewe Abatutsi.

Iri shuri rya IPRC-Huye rikorera ahahoze hari ishuri ry’abasirikare rizwi nka ESO (Ecole des Sous Officier) ryaguyemo Abatutsi benshi ndetse binagizwemo uruhare n’abasirikare ubwabo.

Major Dr Twabagira Bernabe avuga ko bamwe mu bateguye bakanakora Jenoside bari bafite ubuhanga ariko bakabukoresha nabi.

Yagize ati 'Hano mu ishuri tubigisha byinshi, kandi tuzi ko urangiza mu ishuri wese aba ari umuhanga kuba uri umuhanga rero wakabaye umuhanga ukora byiza, ntube umuhanga wo gukora bibi. Mu by’ukuri urebye ibyakozwe muri Jenoside yakorewe abatutsi mu 1994, urwo rubyiruko bari abahanga pe, ariko abahanga mu by’ukuri bakora ibintu bibi ntabwo twabita abahanga.'

Major Dr Twabagira Bernabe kandi avuga ko abicaga abantu muri ESO bashobora kuba barabajyanaga bakajya kubajugunya ahandi kuko kugeza ubu hataraboneka icyobo nyamara haraguye abantu benshi.

Muri 2019, ubwo muri iri shuri haheruka kubera igikorwa cyo kwibuka Jenoside yakorewe abatutsi, bamwe mu barokokeye mu cyahoze ari perefegitura ya Butare bavuze ko hari abatutsi bagiye binjizwa muri ESO bakicirwamo n’abasirikare babaga muri icyo kigo.

Mbaraga Clement, avuga ko mu 1994, abasirikare bigaga muri ESO bajyana abatutsi muri iki kigo bakabiciramo.

Yagize ati 'Iki kigo cyari Ikigo cy’abasirikare, hari abantu benshi bagiye bahazanwa barahicirwa. Imiryango imwe nagiye ngaragaza ni izwi twagiye tunamenya bigaragaza ko hari abantu benshi bahiciwe.'
Yakomeje agira ati 'Urebye imibare y’ abantu bagiye bazanwa hano mu gihe cya Jenoside, n’ uburyo nyuma ya Jenoside imibiri yagiye ikurwa hano ari mike, ntabwo wahamya ko ibyobo byose biri muri iki kigo byaba byarakuwemo iyo mibiri.'

Mbaraga icyo gihe yasabye ubuyobozi bw’iri shuri gufatanya n’izindi nzego gushaka indi mibiri ishobora kuba iri muri iri shuri buranabyemera.

Nubwo hashize imyaka ibiri ubuyobozi bwa Ibuka mu karere ka Huye n’ubuyobozi bwa IPRC Huye butangaje ko bagiye gukora ubushakashatsi bugamije kumenya ibyo byobo byaba byaratawemo abiciwe muri ESO kugeza ubu nta cyobo na kimwe kiraboneka nk’uko bitangazwa na Major Dr Twabagira.

Ati 'Ni byo koko icyo gihe twarabivuze, kandi kuva tubivuze twahise dutangira gushakashaka, ariko mu by’ukuri nta makuru na make twigeze tubona agaragaza ko hano bahajugunye abatutsi bishwe muri Jenoside.'

Akomeza agita ati 'Iki kigo tukimazemo iminsi tugenda dukurikirana, ndetse twatangiye no kucyubaka, ahantu hose tugenda dushakisha ngo turebe ko twabona icyobo cyaba cyarahishwemo iyo mibiri ariko ntabwo kugeza ubu iraboneka bigaragara ko bashoboka kuba barabiciraga wenda hano bakajya kubajugunya ahandi.'

Umuhuzabikorwa wa CNLG mu turere twa Huye na Gisagara, Mukamana Basilisse na we yemeza ko muri ESO hiciwemo Abatutsi benshi bigizwemo uruhare n’abasirikare bo mu ngabo zatsinzwe.

Yagize ati 'Iki kigo bivugwa ko kiciwemo Abatutsi benshi bigizwemo uruhare n’abasirikare, ngira ngo abasirikare ni bo bari ku isonga mu gutinyura abaturage gukora Jenoside.'

Abanyeshuri biga muri iri shuri biyemeje ko bagiye kurushaho guhangana n’abapfobya Jenoside yakorewe abatutsi n’abakwirakwiza ingengabitekerezo ya Jenoside mu rwego rwo kwirinda ko ibyabaye mu Rwanda byazongera kuba.

Iki gikorwa cyo kwibuka ku nshuro ya 27 Jenoside Yakorewe Abatutsi, cyabanjirijwe no kugabira inka uwarokotse Jenoside yakorewe abatutsi utuye mu Murenge wa Mukura mu karere ka Huye witwa Mukashyaka Virgenie.

Nyuma yo gushyikirizwa inka yagabiwe n’ubuyobozi n’abakozi ba IPRC-Huye, Mukashyaka yavuze ko iyi nka igiye kumufasha kutazongera kwigunga.

Ati 'Ubu ntabwo nzongera kwigunga, nzajya mpaguruka mu gihe cyo kwigunga no kwiheba, njye kwahirira Imararungu ubwatsi.'

Ernest NSANZIMANA
UKWEZI.RW