Category: Uncategorized

Imihanda yubakwa mu bufatanye bw'Umujyi wa Kigali n'abaturage yatangiye kubakwa Umujyi utanga 70% abaturage bagatanga 30% ku ngengo y'imari.

Gusa mu myaka yashize iyi gahunda yagaragayemo ibibazo birimo ko imihanda yatindaga kurangira kubera hamwe bitewe n'uruhare rw'Umujyi wa Kigali rutabonekeye igihe.

Ubwo Umujyi wa Kigali wisobanuraga ku makosa yagaragaye muri raporo y'Umugenzuzi Mukuru w'Imari ya Leta y'umwaka warangiye muri Kamena 2024, ku wa 8 Nyakanga 2025, Meya Dusengiyumva Samuel yavuze ko hari aho ibyo kubaka imihanda ku bufatanye byatinze bahitamo kubyikorera.

Ati 'Dufite imihanda myinshi mu Mujyi wa Kigali abaturage bubatse 100% ku ruhare rwabo bavuga bati turabona amasezerano ari gutinda reka tubyikorere. Twabonaga hari ibintu bitanoze ni yo mpamvu twavuze ngo reka tubanze dushyireho amabwiriza abigenga, asobanura uruhare rwa buri muntu muri ibi bikorwa ariko tunavuga ngo reka tubanze turangize ibyo twatangiye.'

Yasobanuye ko ubu hari amabwiriza 'y'inama njyanama agaragaza iriya mihanda itoranywa gute, abantu bamenyeshwa ryari, amafaranga ni angahe, ajyahe akoreshwa gute, n'uburyo butandukanye ku buryo abaturage bafite ubushobozi bashobora kwiyubakira.'

Meya Dusengiyumva yavuze ko icyiciro gishya cy'imihanda izubakwa bigomba kuba ari ibintu byizweho neza, bitandukanye n'uko byakozwe mu bihe byashize.

Ati 'Ibijyanye n'ubufatanye bw'abaturage twifuza ko ikindi cyiciro twajyamo kizaba gitandukanye n'ibyo twakoranye ubushize, bikaba ari ibintu bisobanutse bigaragaza uruhare rwacu n'urwabo ndetse n'uburyo bigomba gukorwa cyane cyane ko mbere umuntu yavugaga ati nageze ku mujyi, natanze ibaruwa ariko se wayitanze ryari, ni iyihe mihanda irebwaho, kuko twaravugaga ngo reka turebe imihanda ikomeye kuko ikindi kibazo cyagaragaye harimo n'ugukomera kw'imihanda.'

Meya Dusengiyumva yavuze ko mu mabwiriza yashyizweho basobanura uko umuhanda ugomba kuba ungana mu bugari, kaburimbo ijyaho n'ibindi byose byatuma uba umuhanda ukomeye.

Perezida wa Komisiyo y'Ingengo y'Imari, Depite Uwamariya Odette, yavuze ko gahunda yo kubaka imihanda ku bufatanye n'abaturage ari nziza ariko hari abaturage batanze amafaranga yabo ariko batari bamenyeshwa igihe imihanda bashakaga kubaka izubakirwa.

Ati 'Bari batubwiye ko bizashyirwa mu igenamigambi kugira ngo abazajya basaba bijye bijyane n'uko umujyi wateganyije ibyo bazakora ku buryo bituma iyo mihanda yubakwa. Nshimye ko amabwiriza yagiyeho ariko sinumvise uburyo yahujwe n'igenamigambi nibura duhereye ku mwaka wa 2025/26 kugira ngo binasobanurirwe abaturage duhereye ku bamaze gutanga amafaranga yabo. Uyu munsi barayatanze kandi uruhare rw'Umujyi ntirwagaragaye.'

Meya w'Umujyi wa Kigali Dusengiyumva yavuze ko hari imihanda yubakwa na Leta hakaba n'indi abaturage bagiramo uruhare.

Yavuze ko mu mwaka wa 2024/2025 hari imihanda ingana na kilometero 12 abaturage biyubakiye ku ruhare rwabo 100%.

Ati 'Kuri iyi dufatanya n'abaturage muri uyu mwaka twabashije kubona miliyari 1 Frw ku ruhande rw'Umujyi wa Kigali ariko MINECOFIN na Minisitiri w'Intebe bari batubwiye ko tuzaganira turebe ko haboneka ubundi bushobozi.'

Yasobanuye ko urebye amafaranga asabwa, ubushobozi buhari bukiri buke ku buryo batahita bavuga ngo barabwira abaturage icyo bagiye gukora, ariko mu mpera z'umwaka wa 2025 bazaba bamenyesheje abaturage ibijyanye n'iyi gahunda.

Mu bihe bishize hari harubatswe imihanda ingana na kilometero 15 zubakwaga ku bufatanye n'abaturage ndetse ngo birinze gutangira indi iyi itarangiye.

Yahamije ko gahunda yo kubaka imihanda ku bufatanye n'abaturage nitangira ari bwo hazatangazwa ibilometero bizubakwa n'igihe bizarangirira, bakazahera ku batanze amafaranga yabo, kandi bakazajya bavuga imirenge izakorerwamo iyi gahunda.

Meya Dusengiyumva yahamije ko bashimira abaturage biyubakiye imihanda ku ruhare rwabo 100%

Ubuyobozi bw’Umujyi wa Kigali bwavuze ko hatunganyijwe uburyo imihanda yubakwa ku bufatanye n’abaturage

Abadepite bagaragaje ko gahunda yo kubaka imihanda ku bufatanye n’abaturage ikwiye gukorwa kuko iha umuturage uruhare rwe mu bimukorerwa

Amafoto: Nzayisingiza Fidele

Byabereye mu Mudugudu wa Cyimana Akagari ka Kibilizi Umurenge wa Rubengera ku wa 6 Nyakanga 2025.

Ahagana Saa Sita z'amanywa nibwo umugore w'uyu mugabo yagiye kumugaburira asanga yikingiranye mu cyumba, ahamagara ubuyobozi bw'umudugudu buhageze busanga hari kunuka kiyoda, bwica urugi busanga yamaze kunegekara.

Ubuyobozi bwahise bushaka ingobyi ya kinyarwanda, abahetsi bamujyana ku Kigo Nderabuzima cya Rubengera, nacyo gihita kimwohereza ku Bitaro bya Kibuye ari naho yaje kugwa.

Saa Yine z'igitongo ku wa 7 Nyakanga nibwo uyu mugabo yapfuye.

Abaturanyi bavuga ko uru rugo rwari rusanzwe rubanye mu makimbirane, aho umugabo yashinjaga umugore kwanga ko batera akabariro, umugore agashinja umugabo kutita ku nshingano z'urugo.

Umunyamabanga Nshingwabikorwa w'Akagari ka Kibilizi, Habimana Viateur yabwiye IGIHE ko uru rugo kandi rwari rufite amakimbirane ashingiye ku gucana icyuma.

Ati “Bombi umwe yashinjaga mugenzi we kumuca inyuma”

Gitifu Habimana yasabye abaturage kwirinda icyatuma biyambura ubuzima ko ahubwo ubonye ibibazo byamurenze yajya yegera ubuyobozi bukamugira inama.

Nyakwigendera asize umugore n'abana batatu.

Ni inkuru yasakaye mu gitondo cyo ku wa 7 Nyakanga 2025. Byabereye mu Murenge wa Ngamba, Akagari ka Marembo, mu Mudugudu wa Rugarama, mu ijoro ryo ku wa 6 Nyakanga 2025.

Singuranayo Philippe w'imyaka 47 yitabye lmana, bikekwa ko yishwe akubiswe n'umugore we, Mukamabano Jeanne afatanyije n'umwana wabo w'umukobwa w'imyaka 14.

Abageze ahabereye uru rugomo rwavuyemo urupfu bavuze ko basanganye nyakwigendera ibikomere ku mutwe, bigakekwa ko hari icyo bamukubise ku mutwe.

Umunyabanga Nshingwabikorwa w'Umurenge wa Ngamba, Munyakazi Epimaque, yabwiye IGIHE ko urupfu rwabaye muri uriya muryango rwatunguranye kuko mu buzima busanzwe uru rugo rwabanaga neza.

Ati 'Icyo bapfuye kugeza ubu ntikiramenyekana.'

Gitifu Munyakazi yakomeje avuga ko umurambo wa nyakwigendera wajyanywe mu Bitaro bya Kacyiru, mu Karere ka Gasabo gusuzumwa, naho abakekwa mu kugira uruhare mu rupfu bo bajyanywe gufungirwa kuri Polisi, Sitasiyo ya Rukoma mu gihe iperereza rigikomeje.

Uyu nyakwigendera yari afitanye abana batatu n'umugore we ukekwaho kumwica, afatanyije n'umwe mu bo babyaranye.

Ibi byabereye mu Murenge wa Murunda, mu Kagari ka Mburamazi, mu Mudugudu wa Rukingu, mu ijoro ryo ku wa Mbere tariki 7 Nyakanga.

Umunyamabanga Nshingwabikorwa w'Umurenge wa Murunda, Mukamana Jeanette yahamirije IGIHE iby'uru rupfu, avuga ko rwatewe n'inkuba.

Ati 'Ni byo koko Hitimana wari ufite imyaka 76 yapfuye nyuma gukubitwa n'inkuba mu Kagari ka Mburamazi. Bikimara kuba abaturage bagerageje gutabara ariko ntibyagira icyo bitanga. Iperereza riracyakomeje.'

Yanaboneyeho gusaba abaturage kugira imirindankuba ku nzu zabo.

Muri Mata 2025 na bwo inkuba yambuye ubuzima umugore witwa Imanizabayo wari ufite imyaka 28 wo mu Karere ka Rutsiro, Umurenge wa Mushonyi, imukubitiye mu rugo rwe.

Umuyobozi Mukuru ushinzwe ubutabazi bwihuse muri MINEMA, ACP Egide Mugwiza aherutse gutangariza IGIHE ko inkuba ari ikibazo by'umwihariko mu bice by'icyaro, kuko mu bice by'imijyi usanga inyubako nyinshi zifite imirindankuba.

Ni urubyiruko ruza mu Rwanda buri mwaka kuva mu 2021 mu gikorwa cyiswe 'Rwanda Youth Tour' aho ruva mu bihugu bitandukanye rukaza mu Rwanda mu byumweru bibiri rusura ibikorwa n'inzego zitandukanye.

Muri uyu mwaka haje urubyiruko 60 rwo mu bihugu birindwi ari byo Leta Zunze za Amerika, u Bwongereza, u Butaliyani, Uganda, Sénégal, u Bubiligi na Canada.

Urwo rubyiruko harimo abari bageze mu Rwanda ku nshuro ya mbere kuko bavukiye mu mahanga nyuma y'uko ababyeyi babo bavuye mu Rwanda hamwe n'bandi bahavuye bakiri bato cyane.

Urwo rubyiruko rwatangiye ibyo bikorwa rusura Pariki y'Igihugu ya Nyandungu mu Mujyi wa Kigali nyuma yo kwakirwa ku mugaragaro na Minisiteri y'Ububanyi n'Amahanga n'Ubutwererane (MINAFFET) n'iy'Urubyiruko Iterambere ry'Ubuhanzi.

Ubwo rwakirwaga, Umuyobozi ushinzwe Asia Pacific n'Uburasirazuba bwo Hagati muri MINAFFET, Rwanyagatare Virgile yavuze ko urwo rubyiruko rufite inyota yo kumenya u Rwanda no kugira uruhare mu iterambere ryarwo.

Ati 'Ni abasore n'inkumi bakunda Igihugu cyabo kandi bakunda amateka yacyo ndetse bashaka kugira uruhare mu iterambere ryacyo. Igihugu cyacu cyishimiye kubakira, baze barebe aho u Rwanda rugeze, bamenye aho Igihugu cyavuye n'amateka ya Jenoside yakorewe Abatutsi. Bituma bamenya amavu n'amavuko y'u Rwanda n'uruhare bagira mu iterambere ryarwo.'

Rwanyagatare yongeyeho ko kuva mu myaka itanu 'Rwanda Youth Tour' itangiye byongeye umusanzu w'urubyiriko rwo muri diaspora mu iterambere ry'Igihugu haba mu bijyanye n'amasomo, umusanzu mu byo bize ndetse no gukora ishoramari.

Umunyamabanga wa Leta muri Minisiteri y'Urubyiruko n'Iterambere ry'Ubuhanzi, Umutoni Sandrine, yavuze ko mu rubyiruko rw'Abanyarwanda baba mu mahanga harimo icyuho mu makuru ruba ruzi ku Rwanda.

Ati 'Abenshi baza bavuga ko bari bazi amateka y'u Rwanda ariko ntabwo baba bafite amakuru yose y'uko byagenze nk'icyateye Jenoside yakorewe Abatutsi, uko yahagaritswe n'uko twagaruye amahoro n'umutekano. Bamwe muri bo baza inshuro zirenze imwe usanga bamaze kumva neza indangagaciro tugenderaho nk'Igihugu zo kongera kucyubaka, guha agaciro abagituye bose no kubaka ubumwe.'

Musinga Dethier Calliste witabiriye 'Rwanda Youth Tour' umwaka ushize akaba yitabiriye n'iy'uyu mwaka, yavuze ko kugaruka mu rwamubyaye byatumye abasha kuhakorera ishoramari.

Ati 'Nashakaga gushora imari mu gihugu cyanjye kandi ntako bisa kuko kuhakorera ari ugukorera mu rugo. Numva hari ikintu nkorera Igihugu cyanjye ntagamije gusa kwinjiza amafaranga cyangwa guteza imbere umwuga nkoramo ahubwo ni n'umusanzu mu kubaka Igihugu.'

Uru rubyiruko rwaganiriye ku ngingo zitandukanye zo guteza imbere Igihugu

Uru rubyiruko ruzamara ibyumweru bibiri mu Rwanda

Umuyobozi ushinzwe Asia Pacific n'Uburasirazuba bwo Hagati muri MINAFFET, Rwanyagatare Virgile yavuze ko urwo rubyiruko rufite inyota yo kumenya u Rwanda no kugira uruhare mu iterambere ryarwo

Umunyamabanga wa Leta muri Minisiteri y'Urubyiruko n'Iterambere ry'Ubuhanzi, Umutoni Sandrine yavuze ko urubyiruko rw'Abanyarwanda ruba mu mahanga ruza mu Rwanda rufite icyuho cy'amakuru ruzi ku gihugu

Bushimiye gusura igihugu bafitemo inkomoko

Muri Pariki y’Igihugu ya Nyandungu uru Rubyiruko rwasuye ibice byose biyigize

Buri kubakwa mu Murenge wa Gisenyi, ku buso bwa hegitari 1,7. Nibwuzura buzaba bufite ubushobozi bwo kubika toni 10.000.

Umuyobozi w'Akarere ka Rubavu, Mulindwa Prosper yabwiye IGIHE ko ubu bubiko buje gukemura ikibazo cy'abakora ubucuruzi bwambukiranya umupaka, bavugaga ko babura aho babika ibicuruzwa byabo.

Ati 'Ubu bubiko bugiye kuzura, buzakemura ikibazo cy'ubuke bw'ububiko bw'ibicuruzwa byambukiranya umupaka byari bihari. Kutagira ubuhagije byari imbogamizi. Ubu ni bunini. Bwiyongera ku bundi buke bwari buhari. Bwongera amahirwe mu ishoramari.'

Meya Mulindwa yakomeje avuga ko ubu bubiko ari n'andi mahirwe ku bashoramari batinyaga gushora imari, avuga ko ubu bagiye kubona aho babika ibicuruzwa byabo.

Meya Mulindwa kandi yijeje Abanyarwanda ko Nyakanga 2025 izasiga ubu bubiko butashywe ku mugaragaro ndetse bugatangira gukoreshwa.

Yashimiye Sosiyete Dubai Ports World iri kubaka iki gikorwaremezo, yemeza ko ari amahirwe akomeye Rwanda.

Uku kwezi kuzarangira i Rubavu huzuye ububiko bunini cyane

Ububiko bw’i Rubavu buzaba bufite ubushobozi bwo kubika toni 10.000

I Rubavu hagiye kuzura ububiko bwa miliyoni zirenga 800 Frw

Ni umushinga ugamije kugira iki gihugu igicumbi cy'amabuye y'agaciro by'umwihariko ubutare.

Uzashorwamo arenga miliyari 20$. Ukazafasha gucukura ubutare bungana na toni miliyari umunani bubarirwa muri iki gihugu, buri mwaka kakazajya hacukurwa toni miliyoni 160.

Uzubakwamo n'ibikorwaremezo nk'ibilometero 622 by'umuhanda wa gari ya moshi uhuza ibirombe bicukurwamo ubutare n'inkengero z'inyanja. Hazubakwa ibyambu, imihanda isanzwe y'ibilometero ibihumbi 10.

Ni umushinga biteganyijwe ko uzafasha Guinée-Conakry kongera umusaruro mbumbe ukagera kuri miliyari 132$ mu 2040. Byitezwe ko buri mwaka iki gihugu kizajya cyinjiza hafi miliyari 2$ avuye mu birombe by'amabuye y'agaciro, uwo mushinga ukazatanga imirimo ihoraho ibihumbi 60.

Guinée-Conakry yatangiye kuwushyira mu bikorwa hagamijwe guteza imbere imibereho myiza y'abaturage binyuze mu kubaka ibikorwaremezo bigezweho, kubaka inganda ndetse no guteza imbere ubukungu bushingiye ku kurengera bidukikije.

Ni gahunda izasiga hubatswe ibikorwaremezo byinshi cyane mu ruhererekane rw'imisozi ya Simandou rureshya na kilometero 110 ruherereye mu Majyepfo y'Uburasirazuba bwa Guinée-Conakry, ahitwa Nzerekore na Kankan, ikazahindura cyane ubuzima bw'abaturage inatanga imirimo myinshi.

Ibyayo mahirwe byerekanywe ubwo Abanyarwanda baba muri Guinée-Conakry, bizihizaga umunsi wo kwibohora, igikorwa cyabereye mu Mujyi wa Conakry.

Cyitabiriwe n'Abanyarwanda batuye muri Guinée-Conakry, abayobozi batandukanye bo muri y'iki gihugu, abahagarariye ibihugu byabo n'imiryango mpuzamahanga n'abandi, bari barenga 250.

Minisitiri Yaya Kairaba Kaba yasabye Abanyarwanda kujyana ubuhanga, imbaraga n'ubushobozi mu by'imari muri iyi gahunda ngari y'imyaka 15.

Ati 'U Rwanda ni urugero rwiza rw'ubudaheranwa, imiyoborere myiza, kurwanya ruswa ndetse no guharanira umurimo unoze. Intambwe rwateye muri iyi myaka 31 ishize iragaragaza ko hari byinshi n'ibindi bihugu bya Afurika bikwiye kurwigiraho. Turahamagarira amasosiyete anyuranye yo mu Rwanda kuza gukorana natwe mu ishyirwa mu bikorwa ry'umushinga wa Simandou 2040 ugamije kuzazana impinduka zikomeye mu rwego rw'ubukungu hano muri Guinée-Conakry mu myaka 15 iri imbere.'

Ambasaderi w'u Rwanda muri Guinée-Conakry, Michel Minega Sebera yagaragaje inzira u Rwanda rwanyuzemo muri iyi myaka 31 ishize mu rwego rwo kongera kubaka igihugu.

Yerekanye ko uru rugendo rwaranzwe no gushyira mu bikorwa amahitamo y'Abanyarwanda yo guharanira ubumwe no guteza imbere igihugu mu buryo bwose, bikajyana no kunoza ubucuti n'ubuhahirane bw'u Rwanda n'ibindi bihugu birimo na Guinée-Conakry.

Yashimiye uburyo umubano w'u Rwanda na Guinée-Conakry ukomeje gutera imbere, yerekana ko ugaragarira cyane mu bufatanye bukomeye mu bijyanye n'imiyoborere, ikoranabuhanga n'ubuhinzi.

Yavuze ko ibihugu byombi bikorana mu guteza imbere urubyiruko, ibigaragaza uburyo Abanyafurika bakwiriye gukemura ibibazo byabo.

Abitabiriye ibirori byo kwizihiza imyaka 31 u Rwanda rumaze rwibohoye, bibereye i Conakry, basusurukijwe n'umuhanzi w'injyana ya gakondo witwa Mireille Mukakigeri, afatanya n'Abanyarwanda kuririmba no kubyina indirimbo zijyanye n'urugamba rwo kubohora u Rwanda.

Minisitiri w'Ubutabera wa Guinée-Conakry, Yaya Kairaba Kaba,yasabye Abanyarwanda gushora imari mu mushinga wa Simandou 2040

Ambasaderi w'u Rwanda muri Guinée-Conakry, Michel Minega Sebera, yagaragaje uburyo u Rwanda rwateye imbere mu myaka 31 ishize

Ibirori byo kwizihiza imyaka 31 u Rwanda rumaze rwibohoye, byateguwe n’Abanyarwanda baba muri Guinée-Conakry, byitabiriwe n’abantu batandukanye

Abitabiriye ibirori byo kwizihiza imyaka 31 u Rwanda rumaze rwibohoye, byateguwe n’Abanyarwanda baba muri Guinée-Conakry, basusurukijwe binyuze mu ndirimbo zitandukanye

Abanyarwanda baba muri Guinée-Conakry bizihije imyaka 31 u Rwanda rumaze rwibohoye

Ibi yabigarutseho kuri uyu wa 6 Nyakanga 2025, mu birori byo kwizihiza isabukuru y'imyaka irindwi iki kigo kimaze gishinzwe.

Ambasaderi Karega yashimiye Umuyobozi w'iki kigo, Muhizi Elie, akaba ari na we wagishinze mu 2018.

Yagize ati 'Uyu munsi nishimiye kwifatanya namwe cyane cyane nkomeza gushimira Muhizi na bagenzi be bakiri bato bagize uruhare mu gushinga iki kigo.'

Yakomeje avuga ko hari imbaraga nyinshi Leta yagiye ishyira mu burezi.

Ati 'Abanyarwanda 67% ntabwo bari bazi gusoma no kwandika mu 1995, gusa uyu munsi si ko bimeze, niyo mpamvu abantu bashora imari n'ibitekerezo mu kurerera u Rwanda, ari ingenzi n'intwari kubera uruhare bagira mu kuzamura ireme ry'uburezi mu gihugu.'

Umuyobozi Mukuru wa Winners Mount Academy, Muhizi Elie, yavuze ko urugendo rw'imyaka irindwi rutari rworoshye kubera ko iki kigo cyavuye kure, ariko bishimira aho kigeze n'umusanzu gikomeje gutanga mu bigendanye no kurerera u Rwanda.

Yakomeje avuga ko biteguye gukomereza aho bageze.

Muhizi kandi yagaragaje ko iki kigo gifite intego zikomeye mu myaka itanu iri imbere, aho giteganya kugeza ku banyeshuri 2000 no gutanga imirimo ku bakozi barenga 500.

Ati 'Turifuza gukomeza kugira uruhare mu gutanga uburezi n'akazi ku baturage. Byibura twifuza kwakira abana bagera ku 2000 mu myaka itanu iri imbere kandi twihaye intego yo gutanga akazi ku baturage bacu mu rwego rwo guteza imbere imibereho yabo.'

Winners Mount Academy yashinzwe mu 2018, itangirana abanyeshuri 20, ariko kubera icyizere yakomeje kugirirwa n'ubunyamwuga mu myigishirize yayo, umubare w'abanyeshuri wagiye wiyongera.

Kuva mu 2020 kugeza 2022, abanyeshuri bariyongereye bagera ku bari hagati ya 300 na 400, abakozi bayo bagera hagati ya 20-25.

Muri 2022-2024 abakozi na bo bariyongereye bagera kuri 30, na ho mu 2025, abanyeshuri banyuze mu maboko y'iki kigo, bamaze kugera kuri 700.

Ambasaderi w'u Rwanda mu Karere k'Ibiyaga Bigari, Vincent Karega, yashimye umusanzu wa Winner Mount Academy gikomeje kugira mu guteza imbere uburezi mu Rwanda

Abanyeshuri ba Winner Mount Academy basoje amasomo

Umuyobozi Mukuru wa Winners Mount Academy, Muhizi Elie, yagaragaje ko iki kigo y’uko mu myaka itanu iri imbere, bateganya kugeza ku banyeshuri 2000 no gutanga imirimo ku bakozi barenga 500

Ababyeyi bari babukerye baje kureba uko abana babo bitwaye mu mwaka w’amashuri uheruka

Abana basoje icyiciro cy’amashuri abanza muri Winners Mount Academy bahembwe

Lt Col Charles Kamali na we yari yitabiriye ibirori byo kwizihiza imyaka irindwi Winners Mount Academy imaze ishinzwe

Byagarutsweho ku wa 7 Nyakanga 2025, ubwo ubuyobozi bwa FONERWA bwisobanuraga ku makosa yagaragaye muri Raporo y'Umugenzuzi Mukuru w'Imari ya Leta y'umwaka warangiye muri Kamena 2025.

Igaragaza ko hari ibiti byatewe ntibyakurikiranwa ku buryo hari nk'umuturage wari wahawe ibiti 19 harokoka bitandatu gusa.

Umuyobozi Mukuru wa FONERWA, Teddy Mugabo, yavuze ko amasezerano bagiranye na rwiyemezamirimo ateganya ko 30% yishyurwa nyuma y'umwaka n'igice.

Ati 'Amasezerano ateganya ko nyuma yo gutera hishyurwa 70% hanyuma 30% akishyurwa nyuma y'amezi 18 kandi rwiyemezamirimo akaba akurikirana, agenda anasimbuza [ibiti] muri icyo gihe. Wenda icyo navuga muri iyi mishinga irebana no kurengera ibidukikije […] iyo uteye ibiti ntihashobora kubura kimwe kidakura neza, haza n'iyo mvura ishobora no kuza ikangiza.'

Perezida wa PAC, Muhakwa Valens, yahise avuga ko bitumvikana ukuntu mu mpagararizi zose Umugenzuzi Mukuru w'Imari ya Leta yafashe ku ngo z'abaturage zagombaga guterwaho ibiti bivangwa n'imyaka, yasanzeyo ibiti bitandatu nyamara umwe yarahawe 19 undi agahabwa 26.

Ati 'Iyo mpurirane y'uko humye bimwe ku rugo rwa runaka bakahasanga umubare ungana n'uwo mu rundi rugo bisobanuka bite?'

FONERWA isobanura ko ibiti bitewe biba bishobora gukuramo nibura 70%, ariko ku baturage bamwe bari bafite ubutaka butatanye hari abo byagiye biterwa kure y'ingo zabo.

Umuyobozi w'Umushinga Green Gicumbi, Kagenza Jean Marie Vianney, yavuze umushinga wa Green Gicumbi ari wo wabonetsemo ibiti byinshi bivangwa n'imyaka byakuze ari byinshi kuko bigeze kuri 80% mu gihe mu gihugu hose biri kuri 64%.

Yasobanuye ko ibiti byakorewe ubugenzuzi ari iby'imbuto byagombaga guterwa mu ngo z'abagenerwabikorwa.

Ati “Byaratewe hanyuma umugenzuzi w'imari we yabaze ibiti biri mu rugo hanyuma abaturage bagiye no kubimwereka aho babiteye mu mirima yabo kubera ko abenshi batuye mu midugudu, bafite ahantu hato ho gutera ibiti, bahisemo rero ko bimwe babyimurira mu mirima yabo ariko itari aho ngaho.”

Kagenza yavuze umugenzuzi w'imari wagiye gusura uyu mushinga atasobanukiwe neza imiterere y'umushinga.

Ati 'Uburyo amasezerano yari ateye, ibiti bagombaga kubisanga mu busitani bw'umuhinzi mu rugo, abahinzi rero bateye bike bitewe n'uko ubutaka bwabo mu rugo bungana, ibindi babitera ku miringoti.'

Umuyobozi mu Biro by'Umugenzuzi Mukuru w'Imari ya Leta, Munyanturire Jean Claude, yavuze ko ingo z'abaturage basuye batigeze basobanurirwa ko ibiti byatewe mu bindi bice.

Ati 'Ni ibintu bigaragara ko hari ahantu ibiti byagiye byangirika ntibisimbuzwe, gusa ku bijyanye n'amahirwe yo gukura ni ikigereranyo twavuga cyumvikana cy'ibiti byatewe wenda hakagira ibikura n'ibyangirika ariko ntabwo bikuraho inshingano za rwiyemezamirimo zo gusimbuza ibyangiritse kugeza bikuze.'

Munyanturire yahamije ko FONERWA yohereje umukozi wayo kandi na we yemeje ko ibiti abaturage bateye ari bike.

Umuyobozi Mukuru wa FONERWA, Teddy Mugabo, yavuze ibiti biterwa hakura 70%

Abadepite bagaragaje impungenge mu ikurikirana ry’ibiti biterwa mu bice bitandukanye