Webrwanda Backend

Category: Uncategorized

  • Abakuru b'ibihugu biri muri EAC bahaye ikaze RDC muri uyu muryango #rwanda #RwOT

    Repubulika Iharanira Demokarasi ya Congo yahawe ikaze Muryango wa Afurika y'Iburasirazuba (EAC), nyuma yaho iki gihugu kigaragaje ko ubusbawe bwo  kwinjira muri uyu muryango.

    Ubusabe bwa RDC bwasuzumiwe mu nama idasanzwe ya 18, yahuje abakuru b'ibihugu biri muri uyu muryango yateranye hakoreshejwe ikoranabuhanga kuri uyu wa Gatatu tariki 22 Ukuboza 2021.

     Ni inama yari ifite insanganyamatsiko yo 'Kwimakaza ukwishyira hamwe, kwagura ubutwererane.'

    Abakuru b'ibihugu babanje kuganira kuri raporo yemejwe n'abaminisitiri bashinzwe ibikorwa by'Akarere ku kwakira Repubulika Iharanira Demokarasi ya Congo muri EAC.

    Aba bayobozi  b'ibihugu bya EAC bahaye ikaze  Repubulika Iharanira Demokarasi ya Congomuri EACariko berekana ko hari ibikeneye kunozwa kugira ngo iki gihugu kibe umunyamuryango bidasubirwaho.

    Perezida Paul Kagame yabwiye bagenzi be ko u Rwanda rwishimiye ibimaze kugerwaho mu kwemerera iki gihugu kwinjira muri EAC.

    Yagize ati 'U Rwanda rwishimiye intambwe yatewe mu kwemerera RDC kwinjira muri EAC. Dutegereje umwanzuro w'ibisigaye kwemezwa.''

    Yasabye ko hongerwa imbaraga mu kwihuza kw'Akarere binyuze mu kubaka inzego zihamye, anizeza ko u Rwanda rwiteguye gutanga umusanzu warwo.

    Yakomeje ati 'Mu gihe dusoza umwaka, turacyahura n'imbogamizi za COVID-19, biradusaba gukorana bya hafi nk'Akarere mu kurinda ubuzima bw'abaturage bacu no guhangana n'ihungabana ry'ubukungu.''

    Perezida wa Uganda, Yoweri Kaguta Museveni na we yerekanye ko kwakira RDC mu Muryango w'Ibihugu byo mu Karere, ari intambwe nziza ku kwigobotora ubukoloni.

    Ati 'Ndishimye ko twemeye ko RDC yinjira muri EAC. Amateka yerekana ko Congo ari igice cya EAC, by'umwihariko mu Burazirazuba bwayo, bavuga Igiswahili, tujya no guhuza amoko. Abakoloni ni bo batumye bigenda bityo [dutandukana] ariko ubu ubwo Afurika yigenga turi kubikemura.''

    Yagaragaje ko kwihuza kw'ibihugu byubaka iterambere ry'ubucuruzi, gukemura ibibazo by'abaturage no kubungabunga umutekano w'abantu n'ibintu.

    Intambwe yo kwemerera RDC kwinjira muri EAC ifatwa nk'intsinzi yo kwihuza kwa EAC no kureba amahirwe atabyazwa umusaruro.

    Perezida wa Tanzania Samia Suluhu Hassan, yavuze ko nyuma y'icyerekezo cyatanzwe ku bigomba kunozwa ngo RDC yinjire muri EAC, bizeye ko bizihuta.

    Yagize ati 'Tuzi agaciro ka RDC mu muryango wacu kuko dufitanye imikoranire ya hafi nk'ibihugu bituranye cyangwa bifitanye umubano mu by'ubucuruzi uzamura iterambere ry'abaturage bacu n'Akarere. RDC igiye kwiyunga n'abavandimwe bayo.''

    Perezida wa RDC, Antoine Félix Tshisekedi, tariki  8 Kamena 2019 ni bwo yandikiye Perezida Paul Kagame wayoboraga EAC, amusaba ko igihugu cye cyakwinjira muri uyu muryango urimo u Rwanda, u Burundi, Uganda, Kenya, Sudani y'Epfo na Tanzania.

    The post Abakuru b'ibihugu biri muri EAC bahaye ikaze RDC muri uyu muryango appeared first on FLASH RADIO&TV.

    Source : https://flash.rw/2021/12/22/abakuru-bibihugu-biri-muri-eac-bahaye-ikaze-rdc-muri-uyu-muryango/?utm_source=rss&utm_medium=rss&utm_campaign=abakuru-bibihugu-biri-muri-eac-bahaye-ikaze-rdc-muri-uyu-muryango

  • Yavuye Rulindo aza kwiyahurira ku Nkundamahoro bamufata atarabigeraho #rwanda #RwOT

    Uyu musore w’imyaka 21 asanzwe ari uwo mu Karere ka Rulindo, ari na ho yaturutse aje kwiyahurira kuri iyi nyubako imaze imaze kwiyahuriraho abantu bagera muri bane bakahasiga ubuzima.

    Ubwo yari agiye kwiyahura, abashinzwe umutekano kuri iyi nyubako yo ku Nkundamahoro, yasanganywe ibaruwa yandikishije intoki agaragaza icyari kimuteye gufata uyu mwanzuro ugayitse.

    Muri iyi baruwa igoranye kuyisoma kubera umukono utoroshye, bigaragara ko yanditswe tariki 20 Ukuboza 2021, atangira agira ati 'Nanditse uru rupapuro ngirango menyeshe Perezida Paul Kagame ko nakunze ingabo z’u Rwanda RDF ariko nkaba narabuze amahirwe yo kwinjiramo.'

    Akomeza avuga ko ikimuteye gufata iki cyemezo ari uko yimwe amahirwe yo kwinjira mu ngabo z’u Rwanda.

    Akomeza agira ati 'Ndasaba Perezida Paul Kagame ko umurambo wanjye azawushyire mu ntwari nkaba nabiharaniye mpisemo gufata umwanzuro.'

    Niyonshuti Rwamo Emile uyobora iri soko ry’Inkundamahoro, yatangaje ko camera zabonye uyu musore bigatuma abashinzwe umutekano hariya bahita bihutira kujya kumufata ngo bamubuze kwiyambura ubuzima.
    Uyu musore ntiyigeze asobanura igihe yashakiye kujya muri RDF n’impamvu yatumye bamwanga.

    Amakuru avuga ko nyuma y’uko uyu musore arekuwe na Polsi, mu gitondo cyo kuri uyu wa Gatatu tariki 22 Ukuboza 2021 yongeye gufatirwa muri iyi nyubako ashaka kwiyahura ku nshuro ya kabiri.

    Source : http://www.ukwezi.rw/1-1/Amakuru-anyuranye/article/Yavuye-Rulindo-aza-kwiyahurira-ku-Nkundamahoro-bamufata-atarabigeraho

  • Irushanwa rya Miss world 2021 ryasubukuwe #rwanda #RwOT

    Miss World 2021 yagombaga gusozwa mu ijoro ryo ku wa Kane tariki ya 16 Ukuboza 2021, ariko abaritegura bafashe icyemezo cyo kuyisubika by'agateganyo kubera impamvu z'ubuzima bw'abakobwa bahatana, abategura n'abandi bose bafite aho bahuriye n'iri rushanwa.

    Mu banduye iki cyorezo harimo Manasa Varanasi uhagarariye u Buhinde muri iri rushanwa, ndetse anamaze iminsi ari mu kato.

    Mu ijoro ry'uyu wa Kabiri tariki ya 21 Ukuboza 2021, abategura iri rushanwa basohoye itangazo rigenewe abanyamakuru bavuga ko irushanwa ryasubukuwe.

    Muri iri tangazo, bavuze ko bishimiye gutangaza ko irushanwa rya Miss World ryasubukuwe nyuma y'iminsi micye yari ishize barisubitse kubera Covid-19.

    Source : https://umuryango.rw/imyidagaduro/article/irushanwa-rya-miss-world-2021-yasubukuwe

  • Meddy aravugwaho kuba agiye kwiyegurira Gospel agasezerera burundu indirimbo z’Isi #rwanda #RwOT

    Mu butumwa yacishije ku muyoboro wa YouTube, Meddy yanditse ko agiye gutangira urugendo rushya mu muziki we, ndetse ateguza abakunzi be ko agiye gushyira hanze indirimbo nshya.

    Yagize ati ' Urupapuro rushya mu rugendo rwanjye rwa muzika ruratangiye. Mwarakoze kuri uru rugendo twakoranye mwitegure indirimbo nshya zihariye.'

    Ubwo Meddy yakoraga ubukwe muri Kamena uyu mwaka, byavuzwe ko nyuma y’indirimbo ebyiri yahimbiye umugore we, azahita atangira gukora indirimbo zo kuramya no guhimbaza Imana.

    Icyo gihe kandi nibwo Meddy yatangaje ko yakiriye agakiza yahindutse icyameremwe gishya. Ndetse ntahwema kubigaragaza ku mbuga nkoranyambaga.

    Mu minsi ishize aherutse guhindura imyirondoro ye kuri YouTube yandika ko ari umuririmbyi w’indirimbo zo kuramya no guhimbaza Imana.

    Bivugwa ko mu minsi ishize hari igitaramo yatumiwemo mu Rwanda ariko arabyanga.

    Mbere y’uko atangira urugendo rwo kuririmba indirimbo zisanzwe Meddy yakoraga izo kuramya no guhimbaza Imana. Indirimbo ye yise Ungirira Ubuntu ni imwe mu zakunzwe cyane.

    Ubwo yageraga muri Amerika yakoze izindi ndirimbo zihimbaza Imana zirimo Holy Spirit, Ntacyo Nzaba yakoranye na Adrien Misigaro.

    Source : http://www.ukwezi.rw/Imyidagaduro/article/Meddy-aravugwaho-kuba-agiye-kwiyegurira-Gospel-agasezerera-burundu-indirimbo-z-Isi

  • Ruvebana Antoine wigeze kuba Umunyamabanga Uhoraho muri MIDIMAR arafunzwe akekwaho gusambanya abakobwa ku ngufu #rwanda #RwOT

    Urwego rw'Igihugu rw'ubugenzacyaha RIB, rwataye muri yombi Ruvebana Antoine wigeze kuba Umunyamabanga Uhoraho muri MIDIMAR akurikiranyweho gusambanya abakobwa ku ngufu.

    Igihe dukesha iyi nkuru cyanditse ko nta makuru menshi inzego z'ubutabera zitanga kuri dosiye y'uyu mugabo umaze iminsi akorwaho iperereza, gusa zivuga ko abo yasambanyije ari  benshi.

     Umuvugizi w'Urwego rw'Igihugu rw'Ubugenzacyaha RIB, Dr Murangira Thierry yemereye itangazamakuru rya Flash iby'aya amakuru.

    Ati 'Nibyo koko akurikiranweho icyaha cyo gusambanya abakobwa ku ngufu, afungiye kuri Sitasiyo ya RIB ya Kicukiro.'

    Umuvugizi wa RIB, Dr Murangira  utifuje kugira byinshi atangaza kuri iyi dosiye yavuze ko kugeza ubu ayo makuru ariyo bari gutangaza ku mpamvu z'uburenganzira bw'abahohotewe.

    Umwe mu banyamategeko bazi neza iby'iyi dosiye, yabwiye IGIHE ko ishobora kuba yarageze mu Bushinjacyaha, gusa Umuvugizi w'Ubushinjacyaha, Nkusi Faustin, yatangaje ko nta makuru yayo afite.

    Ku rundi ruhande, bivugwa ko ku wa 11 Ukuboza 2021, aribwo Ruvebana yatawe muri yombi.

    Hari andi makuru yizewe agera kuri IGIHE avuga ko Ruvebana yatangiye gusambanya abo bakobwa cyera bamwe batarageza n'imyaka y'ubukure.

    Ngo bamwe yabashukishaga ibintu bitandukanye birimo n'imyambaro kugira ngo abigarurire.

    Amakuru avuga ko abo bakobwa hafi ya bose yabasambanyije hagati ya 2003 na 2006.

    Umwe mu bantu bazi neza uyu mugabo, yabwiye IGIHE ko nyuma y'aho bimenyekanye, we n'umugore we bahise batangira inzira iganisha kuri gatanya kuko uwo bashakanye yari yananiwe kubyihanganira.

    Ku rundi ruhande, amakuru avuga ko umwe mu bakobwa yasambanyije nawe amaze igihe kinini abana n'ihungabana ku buryo uko imyaka igenda ishira, arushaho kumererwa nabi.

    The post Ruvebana Antoine wigeze kuba Umunyamabanga Uhoraho muri MIDIMAR arafunzwe akekwaho gusambanya abakobwa ku ngufu appeared first on FLASH RADIO&TV.

    Source : https://flash.rw/2021/12/22/ruvebana-antoine-wigeze-kuba-umunyamabanga-uhoraho-muri-midimar-arafunzwe-akekwaho-gusabamya-abakobwa-ku-ngufu/?utm_source=rss&utm_medium=rss&utm_campaign=ruvebana-antoine-wigeze-kuba-umunyamabanga-uhoraho-muri-midimar-arafunzwe-akekwaho-gusabamya-abakobwa-ku-ngufu

  • Kayonza : Gitifu ukurikiranyweho gukubita umugore we yatawe muri yombi #rwanda #RwOT

    Uyu muyobozi ukurikiranyweho icyaha cyo gukubita no gukomeretsa, yatawe muri yombi kuri uyu wa Kabiri tariki 21 Ukuboza 2021 ubu akaba afungiye kuri station ya RIB ya Rwinkwavu mu gihe iperereza rigikomeje.

    Yatawe muri yombi nyuma y’uko umugore we w’imyaka 20 bamaranye amezi atandatu amureze mu buyobozi avuga ko yamukubise umutwe ku gitanda ndetse akamukanda mu nda ngo ashaka kumukuramo inda.

    Amakuru avuga ko uyu mugore yakubizwe nyuma yo kubwira nyina w’uyu muyobozi ko ari umugore we ngo kuko yari yamushatse mu buryo bunyuranyije n’amategeko.

    Umunyamabanga Nshingwabikorwa w’Umurenge wa Murama, Mutuyimana Pauline, yemeje aya makuru yo guta muri yombi uyu muyobozi azira gukubita umugore we.

    Yagize ati 'Yagiranye amakimbirane n’umugore we bigera n’aho amukubita bimuviramo kujya kwa muganga, ni amakimbirane asanzwe bagiranye yo mu rugo, umugore we afite imyaka 20 bamaranye amezi atandatu ndetse yanamushatse mu buryo butemewe n’amategeko.'

    Mutuyimana yasabye abayobozi bo mu nzego z’ibanze kumenya ko bakwiriye kuba intangarugero ku bo bayobora bakamenya kwitwararika mu rwego rwo kudatanga isura mbi mu bo bayobora.

    Kuri ubu umugore w’uyu muyobozi arwariye mu bitaro bya Rwinkwavu mu gihe umugabo we yashyikirijwe RIB ishami rya Rwikwavu, akurikiranyweho icyaha cyo gukubita no gukomeretsa.

    Source : http://www.ukwezi.rw/1-1/Amakuru-anyuranye/article/Kayonza-Gitifu-ukurikiranyweho-gukubita-umugore-we-yatawe-muri-yombi

  • Ikintu cy’ingenzi umuhanzi Platini yishimira 2021 imusigiye, icyamubabaje kizagorana kwibagirwa #rwanda #RwOT

    Impera z’umwaka ni igihe cyiza cyo kwisuzuma ngo urebe niba intego wari warihaye warazigezeho cyangwa zaranze k’uburyo byakubera isomo ryiza ry’ingamba winjirina mu mwaka utaha, umuhanzi Nemeye Platini avuga ko umwaka wa 2021 ari umwaka wagenze neza kuri we kuko ugiye gusiga umuziki we awugeje ku rwego rurenze urwo yari yateganyije.

    Ni mu kiganiro kigufi yagiranye n’ikinyamakuru ISIMBI cyagarukaga ku ko umwaka wa 2021 urangiye kuri we niba byaramuhiriye cyangwa hari ibitaragenze neza ndetse n’ibyamubabaje muri rusange.

    Avuga ko ikintu cyamubabaje ari urupfu rw’umuraperi Tuyishimire Joshua [ Jay Polly] witabye Imana tariki ya 2 Nzeri 2021, avuga ko ari ikintu kitazapfa kwibagirana.

    Ati 'Ni urupfu rwa Jay Polly, ni cyo kintu numva bizagorana kwibagirwa uyu mwaka udusigiye.'

    Avuga ko muri ursange umwaka wamugendekeye neza, by’umwihariko avuga ko habayemo n’ikintu yita ko kidasanzwe aho yabashije kwambutsa umuziki we akawushyira ku rundi rwego.

    Ati 'Byagenze neza, biri hejuru y’ibyo nari narateganyije ariko navuga ko uyu mwaka ari uwo kwishimira pe, gusa icy’ingenzi kinini kirimo kidasanzwe ni uburyo nagerageje kwambutsa ibintu byanjyeho gato, ntibiragera ku rwego nifuza ariko nabashije kubona uburyo bwo kwambutsa muzika yanjye.'

    Uyu muhanzi muri uyu mwaka wa 2021 muri Kanama nibwo yasinyanye amasezerano na Sosiyete yo muri Nigeria yitwa 'One Percent International’ izwi mu kumenyekanisha ibihangano by’abahanzi aho izajya imufasha na we kumenyekanisha ibihangano bye.

    Platini yagize amahirwe yo guhatana mu bihembo bya 'AFRIMA’ nubwo nta gihembo yabonye. Indirimbo ye ‘Atansiyo’ yahatanaga mu cyiciro cya 'Best Artist, Duo or Group in African Contemporary’, abifashijwemo kandi na 'One Percent International’ yabashije gutaramira abitabiriye ibi bihembo.

    Platini P avuga ko yishimira aho 2021 isize umuziki we

    Urupfu rwa Jay Polly ni cyo kintu cyababaje Platini P

    Source : http://isimbi.rw/imyidagaduro/article/ikintu-cy-ingenzi-umuhanzi-platini-yishimira-2021-imusigiye-icyamubabaje-kizagorana-kwibagirwa

  • Perezida Kagame mu bitabiriye inama idasanzwe ya EAC #rwanda #RwOT

    Perezida Paul Kagame yifatanyije n'abandi bakuru b'ibihugu bo mu Muryango wa Afurika y'Iburasirazuba (EAC) mu nama ya 18 idasanzwe y'uyu muryango, mu byo igamije harimo no gusuzuma raporo y'abaminisitiri bo muri uyu muryango ku busabe bwa Repubulika Iharanira Demukarasi ya Kongo bwo kwinjira muri uyu muryango.

    Iyi nama iri kuba hifashishijwe ikoranabuhanga ifite insanganyamatsiko yo 'Kwimakaza ukwishyira hamwe, kwagura ubutwererane.'

    Abakuru b'ibihugu babanje kuganira kuri raporo yemejwe n'abaminisitiri bashinzwe ibikorwa by'akarere ku kwakira Repubulika Iharanira Demokarasi ya Congo muri EAC.

    Ubunyamabanga bukuru bwa EAC buheruka gutangaza ko iyi nama isuzuma ibintu bibiri; harimo raporo y'inama y'abaminisitiri ku kwakira Repubulika Iharanira Demokarasi ya Congo muri EAC n'ivugururwa ry'itegeko rigena umubare shingiro w'abakuru b'ibihugu wemewe ngo babashe gukorana inama.

    Umubare ntarengwa w'abakuru b'ibihugu wemewe ngo inama iterane ni ingenzi cyane, kuko ubusanzwe iyo umuyobozi umwe muri batandatu b'ibihugu bigize EAC atitabiriye inama cyangwa adahagarariwe, iba igomba gusubikwa.

    Ibyo bikagira ingaruka mu kudindiza ibyemezo by'ingenzi cyangwa imishinga y'akarere.

    Ku bijyanye no kwakira RDC muri EAC, mu Ugushyingo 2021 ba Minisitiri bashinzwe ibikorwa by'akarere bemeje raporo ku busabe bwayo bwo kwinjira mu muryango.

    Babikozeho raporo igomba gufatwaho icyemezo n'abakuru b'ibihugu.

    Ba minisitiri banasabye abakuru b'ibihugu gutanga umurongo ku biganiro na RDC, hagendewe ku byagaragajwe na raporo y'abakoze igenzura bemeje ko imiterere y'inzego n'amategeko byatuma icyo gihugu cyakirwa muri EAC.

    Umunyamabanga Mukuru wa EAC, Dr. Peter Mathuki, aheruka kuvuga ko abaturage bagera muri miliyoni 90 z'abaturage ba RDC bashobora kongerera imbaraga isoko ry'akarere n'amahirwe y'ishoramari.

    AMAFOTO

    The post Perezida Kagame mu bitabiriye inama idasanzwe ya EAC appeared first on FLASH RADIO&TV.

    Source : https://flash.rw/2021/12/22/perezida-kagame-mu-bitabiriye-inama-idasanzwe-ya-eac/?utm_source=rss&utm_medium=rss&utm_campaign=perezida-kagame-mu-bitabiriye-inama-idasanzwe-ya-eac

  • Ghana : Ibyari Inteko Rusange byahindutse imirwano ubwo Abadepite bakozanyagaho #rwanda #RwOT

    Izi mpaka ku musoro uzatangwa kuri mobile money zabaga mu masaha akuze y’umugoroba Abadepite baganira ku mushinga w’itegeko ryo gusoresha ibikoresho by’ikoranabuhanga bagejejweho na Guverinoma.

    Amakuru y’igitangazamakuru cyo muri Ghana, kitwa Graphic Online avuga ko Abadepite baje gushyuha, nyuma batangira gusunikana, hakurikiraho guterana ingumi abandi baza gukiza.

    Imirwano mu ngoro y’Inteko ngo yatangiye ubwo Abadepite b’amashyaka atavuga rumwe n’iriri ku butegetsi bahagurukaga mu byicaro byabo bakajya kugukumira Umuyobozi Mukuru wungirije w’Inteko ishinga Amategeko, Joseph Osei Owusu bamubuza guhaguruka ngo ajye gutora.

    Uyu Muyobozi ni we wari uyoboye imirimo y’inteko ariko ahitamo kuyisubika kubera impaka zari zimaze kuba urudaca.

    Abadepite b’ishyaka (National Democratic Congress, NDC) ritavuga rumwe n’iri ku butegetsi bari ku ruhande rudashyigikiye umusoro wa 1.75% ku mafaranga yakirwa mu buryo bw’ikoranabuhanga, harimo n’ahererekanywa binyuze kuri mobile-money.

    Iri shyaka rivuga ko uwo musoro uzagira ingaruka no ku baturage bakennye cyane, ndetse no ku baturage badakoresha Bank mu kubitsa no kubikuza amafaranga yabo.

    Nyamara Minisitiri w’Imari, Ken Ofori-Artta avuga ko uriya musoro ari ngombwa kubera ko uzafasha igihugu kubona amafaranga miliyari 6.9 akoreshwa muri Ghana yitwa cedi, ayo akaba ari hafife miliyari 1.15 y’amadolari ya America.

    Kuganira kuri ririya tegeko byatangiye ku wa Mbere mu gitondo ariko biza gufata amasaha akuze y’ijoro Abadepite bakijya impaka.

    Imirwano yadutse mu Nteko ishinga Amategeko ya Ghana, bamwe mu baturage barayinenze bavuga ko Abadepite bakwiye kuba intangarugero aho kugaragara mu bikorwa bidahesha ikuzo.

    Umuyobozi wungirije w’Inteko ishinga Amategeko, Joseph Osei Owusu wari uyoboye imirimo y’inteko ijwi rye ryari rikomeye kandi ni uwo mu ishyaka riri ku butegetsi New Patriotic Party (NPP).

    Abadepite b’ishyaka NDC ritavuga rumwe n’iriri ku butegetsi bavugaga ko kuba Umuyobozi wungirije w’Inteko ari we wari uyoboye imirimo y’inteko adafite uburenganzira bwo gutora itegeko.

    Nyuma umushinga w’itegeko waje kwemerwa na Komite ishinzwe Ubukungu mu Nteko ishinga Amategeko aho amajwi 13 harimo irya Joseph Osei Owusu wari uyoboye ibiganiro yatsinze 12, yanze umushinga w’itegeko.

    Inteko rusange y’Abadepite yagombaga kwemeza itegeko ku wa Kabiri, ariko Abadepite ntibaritoye nyuma y’uko bumvikanye gusubika imirimo y’Inteko ikazakomeza muri Mutarama 2022.

    Muri Ghana ishyaka ritavuga rumwe na Leta (NDC) rifite Abadepite bangana n’ib’ishyaka riri ku butegetsi (NPP) buri rimwe rifite imyaka 137 mu Nteko.

    Source : http://www.ukwezi.rw/1-1/Amakuru-anyuranye/article/Ghana-Ibyari-Inteko-Rusange-byahindutse-imirwano-ubwo-Abadepite-bakozanyagaho

  • Madagascar: Minisitiri 'yoze amasaha 12' arokoka impanuka y'indege yaguye mu nyanja #rwanda #RwOT

    Ananiwe cyane, arimo kongera kugarura imbaraga ari ku ngombyi igezweho y'ababwayi (stretcher), Minisitiri ushinzwe polisi Serge Gelle yagize ati: “Si igihe cyanjye cyo gupfa”.

    Abandi bategetsi babiri bo mu rwego rushinzwe umutekano bari bari kumwe na we muri iyo kajugujugu na bo barokotse.

    Iryo tsinda ryari ririmo gushakisha mu gace ko mu majyaruguru ashyira uburasirazuba bw'igihugu aho ubwato butwara abagenzi bwari bwarohamiye.

    Ku wa kabiri abategetsi bavuze ko abantu batari munsi ya 39 bapfiriye muri iyo mpanuka y'ubwato.

    Kuri Twitter, Perezida wa Madagascar Andry Rajoelina yihanganishije ababuze ababo muri iyo mpanuka y'ubwato, anaha icyubahiro Bwana Gelle n'abandi bashinzwe umutekano babiri, bageze ukwabo muri uwo mujyi wo ku nkengero y'inyanja wa Mahambo.

    Ntibiramenyekana icyateje impanuka yo ku wa mbere, ariko Bwana Gelle, w'imyaka 57, nyuma y'iyo mpanuka yavuze ko yoze “kuva saa moya n'iminota 30 za mu gitondo [7:30] zo mu ijoro ryayeye, kugeza saa moya n'iminota 30 zo muri iki gitondo”, akagera i Mahambo.

    Yavuze ko nta bikomere yagize, ariko yongeraho ko yumvaga akonje.

    Bwana Gelle yabwiye abaturage b'i Mahambo ati: “Nifuzaga gusa ko mwatangaza iyi videwo kugira ngo umuryango wanjye uyibone, abo dukorana bayibone, abagize guverinoma bayibone. Ndi muzima kandi meze neza”.

    Umukuru wa polisi Zafisambatra Ravoavy yabwiye ibiro ntaramakuru AFP ko Bwana Gelle yakoresheje imwe mu ntebe zo muri kajugujugu nk'ikintu cyo kogeraho mu mazi.

    Bwana Ravoavy yagize ati: “Buri gihe yabaga afite imbaraga mu mikino, kandi yakomeje uru rwego [rw'imbaraga] ari na minisitiri, nkaho ari umuntu w'imyaka 30… afite ubushobozi butangaje cyane bwo kuguma atuje mu bibazo bikomeye”.

    Mbere yuko mu kwezi kwa munani uyu mwaka agirwa Minisitiri, Bwana Gelle yari yarabaye umupolisi mu gihe cy'imyaka 30.


    BBC

    Source : https://umuryango.rw/amakuru/mu-mahanga/ubuzima/article/madagascar-minisitiri-yoze-amasaha-12-arokoka-impanuka-y-indege-yaguye-mu