Webrwanda Backend

Category: Uncategorized

  • APR FC na Rayon Sports zamenye amakipe bazahura muri 1/8 cy’igikombe cy’Amahoro #rwanda #RwOT

    Tombala ya 1/8 cy’igikombe cy’Amahoro yasize amakipe arimo APR FC na Rayon Sports zitakinnye ijonjora ry’ibanze amenye amakipe bizahura.

    Amakipe 5 APR FC, Rayon Sports, Kiyovu Sports, Police FC na Mukura VS ni yo makipe atarakinnye ijonjora ry’ibanze akaba yariyunze kuri 11 yatsinze mu ijonjora ry’ibanze.

    Tombola ya 1/8 ikaba yabaye uyu munsi ku cyicaro cya FERWAFA aho APR FC yatomboye Ivoire Olympique mu gihe Rayon Sports yatomboye Intare FC, aya makipe yose ni ayo mu cyiciro cya kabiri.

    Uko tombola yagenze

    Ivoire Olympique vs APR FC
    Intare FC vs Rayon Sports
    Bugesera FC vs Musanze FC
    La Jeunesse vs Kiyovu Sports
    Esperance FC vs Rwamagana City
    Sunrise FC vs Police FC
    Rutsiro FC vs Mukura VS
    Marines FC vs Etincelles FC

    Biteganyijwe ko tariki ya 28 Gashyantare na tariki ya 1 Werurwe 2023 ari bwo hazaba imikino ibanza.

    APR FC na Rayon Sports yamenye amakipe bazahura muri 1/8

    Source : http://isimbi.rw/siporo/article/apr-fc-na-rayon-sports-zamenye-amakipe-bazahura-muri-1-8-cy-igikombe-cy-amahoro

  • Kenya: Inzara iri gutuma bajya gusaba ibiryo ku bigo by'amashuri #rwanda #RwOT

    Ababyeyi baturanye n'amashuri mu Ntara ya Kaijado, bari kujya kwaka ibiryo ku mashuri kubera inzara ica ibintu, yatewe n'amapfa yahibasiye.

    Ibinyamakuru byandika ko ababyeyi bari kujya gusaba ibiribwa ku mashuri, biganjemo abakuze n'abanyantege nkeya.

    Ikinyamakuru Daily Nation cyanditse ko ubusanzwe mu bamasayi imitungo iba ari iy'abagabo, ariko amapfa yatumye ubu basigariye aho ndetse ngo aba babyeyi bajya gusabiriza ibiribwa ku mashuri, biganjemo abagabo ariko bakuze.

    Iki kinyamakuru cyanditse ko kuri uyu wa Gatatu tariki 22 Gashyantare 2023, cyagiye ku ishuri ribanza rimwe, gisanga amasaha ya saa sita iyo yegereje aba babyeyi baba bicaye ku marembo, bategereje ko abana bajya kurya nabo bakajya gusaba ibiribwa.

    Daily Nation yandika ko ubarebye ubona ari abantu bababaye bananiwe kandi baturutse kure, kuko ntawe ugihinga izuba ryabaye ryinshi.

    Aba baturage ngo bajya ku murongo hamwe n'abanyeshuri, abenshi baba bari mu kigero cy'abuzukuru, ariko amashuri ngo arabaha imvungure n'ibishyimbo nka bimwe mu biribwa bihaboneka, bamara kurya bagataha.

    Umuyobozi wa rimwe mu mashuri rikunze kuba ririho abaturage bakuze baje gusaba ibiryo, avuga ko akurikije ikibazo gihari nta wabima, ariko imbogamizi iba ko ababyeyi bose batabasha gutanga umusanzu wo kugaburira abana, ibiryo bikaba bike kuko abanyeshuri baba bagomba gusangira n'ababyeyi.

    Muri iyi Ntara amakuru ahava avuga ko hamwe na hamwe abana bataragera imyaka yo kwiga, bajyana na bakuru babo ku ishuri bagategereza hanze ngo nibura babashe kurya rimwe ku munsi.

    Abategetsi mu nzego z'uburezi barasaba ko nibura leta ya Kenya, yashyiraho gahunda yo kugaburira abana mu mashuri ahantu hose habaye amapfa, kuko byatuma abana baza ku ishuri bakurikiye ibiryo bakiga, kandi ngo hari impungenge ko kurya bihagaze n'abanyeshuri batagaruka.

    Ikigo gishinzwe kurwanya amapfa mu ntara ya Kaijado, cyatangaje ko imiryango ibihumbi 400 muri iyi ntara yugarijwe n'inzara, kandi amatungo abarirwa muri za miliyoni yamaze gupfa azize inzara.

    The post Kenya: Inzara iri gutuma bajya gusaba ibiryo ku bigo by'amashuri appeared first on FLASH RADIO&TV.

    Source : https://flash.rw/2023/02/24/kenya-inzara-iri-gutuma-bajya-gusaba-ibiryo-ku-bigo-byamashuri/?utm_source=rss&utm_medium=rss&utm_campaign=kenya-inzara-iri-gutuma-bajya-gusaba-ibiryo-ku-bigo-byamashuri

  • Tour du Rwanda 2023: Uwafuze imyenda akomeze… – #rwanda #RwOT

    Kuva mu 2009 Tour du Rwanda yaba Mpuzamahanga. Uyu mwaka ni umwe mu myaka igaragaje irushanwa rikomeye. Ndetse, abenshi bari kurya indimi igihe babajijwe ushobora kwegukana iri siganwa.

    Kuri uyu wa kane tariki 23 Gashyantare 2023, nibwo abasiganwa bakinnye agace ka Gatanu, kavuye i Rusizi kerekeza mu karere ka Rubavu mu Burengerazuba bw'u Rwanda.

    Kari agace ka kabiri muri Tour du Rwanda gafite intera ndende ingana na Kirometero 195.5, irushwa ibirometero hafi bitanu n’inzira ya Kigali Gisagara abakinnyi banyuzemo ku wa mbere.

    Isiganwa riracyari ribisi abafuze imyenda muyirekere ku mugozi:

    Tour du Rwanda y’uyu mwaka abakinnyi bazazenguruka ibirometero bingana na 1129.9, mu minsi umunani.

    Kuri ubu, abakinnyi bamaze gukina ibirometero bingana na 781 .8, bivuze ko 1/2 bamaze kukigenda. 

    Ni ibirometero byinshi ariko bitaratanga inzira isobanutse ndetse biri mu bituma iri siganwa riryoha rikanarushaho gukomera.

    Umwenda w’umuhondo, ni ukuwigera ubundi ukawutanga:

    Kuva ku cyumweru ubwo Tour du Rwanda 2023 yatangiraga. Callum Ormiston yabaye umukinnyi wa kane wambaye umwenda w’umuhondo, bivuze ko nyuma ya Ethan Vernon wegukanye agace ka mbere.

    Ethan Vernon ntabwo uyu mwenda yawuraranye kuko ubwo bajyaga Gisagara,Henok Mulueberhane yaje ku wumwaka, ndetse uyu musore akora agashya ko kongera kurarana uyu mwenda ubwo yari abaye uwa mbere bajya Musanze.

    Bava Musanze bajya Karongi, Thomas Bonnet yaje gufata umwenda w’umuhondo, gusa kuri uyu wa kane, yaje kuwamburwa na Callum Ormiston ukomoka muri Afurika Y’Epfo.

    Ubwo Ethan Vernon yegukanaga agace ka mbere ka Tour du Rwanda, yari abaye u Mwongereza wa mbere wambaye umwenda w’umuhondo muri Tour du Rwanda

    Mu gihe ibintu byakomeza uku, nibura Tour du Rwanda yajya kurangira abakinnyi bagera kuri batandatu bamaze kwambara uyu mwenda.

    Mu ntera ya Kirometero 781 na metero 800 abakinnyi bamaze kwiruka, Lecerf William Junior aza ku mwanya wa mbere, amaze gukoresha amasaha 19 iminota 40 n’amanota 50. 

    Arusha Budiak Anatolii uza ku mwanya wa kabiri amasegonda 2′, akarusha De Laparte Victor amasegonda 7′.

    Henok Mulueberhane niwe wambaye umwenda w’umuhondo inshuro zirenze imwe muri uyu mwaka wa Tour du Rwanda

    Chris Froome waje yitezwe na benshi akomeje kugaragaza intege nke gusa abantu bamufitiye ubwoba

    Tour du Rwanda haracyari kare ko kumenya uzegukana iri siganwa

    Muhoza Eric niwe munyarwanda uza hafi ku rutonde rusange, aho ari ku mwanya wa 7 arushwa amasegonda 7′ n’umukinnyi wa mbere.

    Chris Froome wamaze isaha yose ari imbere mu gace ko kuri uyu wa kane, ubu ari ki mwanya wa 21 arushwa iminota 4′ n’amasegonda 49′

    Source : https://inyarwanda.com/inkuru/126379/tour-du-rwanda-2023-uwafuze-imyenda-akomeze-ayanike-126379.html

  • Uganda: Abadepite bakomoka mu ntara ya Kalamoja batangiye kweguza Minisitiri Kitutu #rwanda #RwOT

    Itsinda ry'abadepite bakomoka mu ntara ya Karamoja, batangiye urugendo rwo kweguza minisitiri Mary Goretti Kitutu,ushinzwe iyi ntara, ushinjwa kurya amabati n'ibindi byagenewe abaturage batishoboye, bugarijwe n'inzara.

    Ibinyamakuru muri Uganda bimaze igihe byandika ko minisitiri Mary Goretti Kitutu uretse kunanirwa gutanga ibi bikoresho, ahindukira agaha abatabigenewe ndetse umuryango we uvugwa mu bucuruzi bw'imfashanyo z'abatishoboye.

    Amategeko muri Uganda ateganya ko umutegetsi utuzuza inshingano cyangwa se utatiye indahiro, iyo ari minisitiri uhagarariye akarere akaba ari umudepite, atererwa icyizere binyuze mu itora mu nteko ishinga amategeko.

    Muri 2021 inteko yemeje inyongera y'ingengo y'imari ya miliyaridi 39 yo kugurira amabati urubyiruko rwa Karamoja, rwitandukanije n'imitwe yitwaje intwaro, ariko kugera ubu ntibarayahabwa.

    Ikinyamakuru Daily Monitor cyanditse ko aba badepite banyuze mu nteko ishinga amategeko, ngo beguze minisitiri ushinzwe intara ya Karamoja, nyuma yo gusaba Perezida Museveni kumwirukana ntabikore.

    Hari abandi bavuga ko ibigenerwa intara ya Karamoja yugarijwe n'inzara byigira ahandi, bagasanga ubishinzwe yarananiwe, akwiye kwegura cyangwa se akirukanwa kuri uyu mwanya.

     Hari amakuru yavuye mu biro bya minisitiri w'intebe, agaragaza ko bamwe mu bategetsi bigabagabanije amabati y'abaturage ba Karamoja, ndetse uyu minisitiri ushyirwa mu majwi, ngo yasanganwe agera ku bihumbi 3.000.

    Aba Badepite bavuga ko kwirukana uyu mugore kuri uyu mwanya, byatuma nta muntu uzongera kwigabiza ibyagenewe abaturage.

    The post <strong>Uganda: Abadepite bakomoka mu ntara ya Kalamoja batangiye kweguza Minisitiri Kitutu</strong> appeared first on FLASH RADIO&TV.

    Source : https://flash.rw/2023/02/24/uganda-abadepite-bakomoka-mu-ntara-ya-kalamoja-batangiye-kweguza-minisitiri-kitutu/?utm_source=rss&utm_medium=rss&utm_campaign=uganda-abadepite-bakomoka-mu-ntara-ya-kalamoja-batangiye-kweguza-minisitiri-kitutu

  • Karongi: Bafatiwe mu kabari banywera arenga ibihumbi 900Frw bibye – #rwanda #RwOT

    CIP Mucyo Rukundo, ushinzwe guhuza ibikorwa bya Polisi n'abaturage mu Ntara y'Iburengerazuba, yavuze ko bafashwe ahagana saa kumi n'ebyiri z'umugoroba, biturutse ku makuru yatanzwe n'uwo bari bamaze kwiba.

    Ati 'Umucuruzi wo mu mujyi wa Karongi yahamagaye atanga amakuru ko amaze kwibwa kandi ko acyeka umugabo waje avuga ko ashaka ibicuruzwa bitandukanye, mu gihe agiye kubimushakira mu bubiko, agarutse abura amafaranga 981,100 yari agiye kujya kubitsa kuri banki.'

    'Mu kumwiba ay0 mafaranga, yari kumwe na mugenzi we bari bazanye kuri moto asigara hanze, acyeka ko ari we winjiye akayakura muri kontwari kuko bagarutse akayabura, nyuma y'uko bakije moto bakagenda amwizeza ko agiye kuyabikuza kuri banki akabona kugaruka kwishyura.'

    Yakomeje avuga ko abakekwaho ubujura bafashwe. Ati 'Bose uko ari babiri baje gufatirwa mu kabari ku mugoroba w'uwo munsi, mu kagari ka Kibirizi mu murenge wa Rubengera barimo gusangira inzoga na mugenzi wabo, biyemerera ko bafatanyije ubu bujura. Basanganywe 848,800Frw bavuga ko hari andi bamaze gukoresha batazi umubare wayo.'

    CIP Mucyo Rukundo yasabye abacuruzi kuba maso kuko hari ababagana biyoberanya ko ari abakiriya bagamije kubahombya cyangwa kubiba bakihutira gutanga amakuru ku nzego z'umutekano igihe bahuye n'ubujura nk'ubu.

    Abafashwe bashyikirijwe Urwego rw'igihugu cy'ubugenzacyaha kuri sitasiyo ya Rubengera kugira ngo bakurikiranwe n'amategeko.

    Itegeko riteganya ibyaha n'ibihano muri rusange Ingingo ya 166 ivuga ko; umuntu wese uhamijwe n'urukiko icyaha cyo kwiba, ahanishwa igifungo kitari munsi y'umwaka umwe ariko kitarenze imyaka ibiri, ihazabu y'amafaranga y'u Rwanda atari munsi ya miliyoni imwe, ariko atarenze miliyoni ebyiri, imirimo y'inyungu rusange mu gihe cy'amezi atandatu cyangwa kimwe gusa muri ibyo bihano.

    Ingingo ya 167 ivuga ko ibihano ku cyaha cyo kwiba byikuba kabiri iyo uwibye yakoresheje guca icyuho, cyangwa kwiba byakozwe n'abantu barenze umwe.

    Aba bagabo uko ari batatu bafatiwe mu Karere ka Karongi bakekwaho icyaha cy'ubujura

    Source : http://igihe.com/amakuru/u-rwanda/article/karongi-bafatiwe-mu-kabari-banywera-arenga-ibihumbi-900frw-bibye

  • Ngororero:  Uwizeyimana wiyujurije inzu abikesha kudoda inkweto yatangiye kuba ikitegererezo cya benshi #rwanda #RwOT

    Hari bamwe mu bagore bo mu Karere ka Ngororero, bavuga ko bayobotse umurimo wo kudoda inkweto nyuma yo kubona Uwizeyimana Adelphine watangiye kudoda ikweto mbere yabo, bimaze kumwubakira inzu ndetse n'abana be akabarihira amashuri.

    Uwizeyimana Adelphine ni umubyeyi w'abana 2, utuye muri Susa mu Murenge wa Ngororero.

    Uwizeyimana ni umwe mu bagore bo muri aka karerewatinyutse kudoda inkweto, ibintu byari bimenyerewe ko muri aka gace bikorwa n'abagabo nk'uko abisobanura.

    Uwizeyimana ati 'Mbimazemo imyaka myinshi. Nabigiyemo banseka buri wese anshungera, bamwe bakanampa akazi nk'abagabo bapinga ngo ubuse ntunyicira inkweto? Ariko kubera ko nari narabyize nta kibazo byanteye. Nyine iyo ugitangira biravuna, kuko nka koroshi n'icyuma gishobora kugukomeretsa no kuba wakata inkweto gutya ntuba ubishobora, ugomba gufata gutya ugashinga.'

    Bamwe mu batuye mu Murenge wa Ngororero bagannye Adelphine ngo abadodere inkweto, bavuga ko bamugannye batazi ko ari bubadodere neza kuko bari bamenyereye ko bisanzwe bikorwa n'abagabo.

    Icyakor Ango  baje gutungurwa no kubona ko nawe abishoboye.

    Umwe ati 'Nabanje gushidikanya ndavuga nti ese ubu abagore bazi kudoda inkweto ko narinzi ko ari abagabo bazi kudoda inkweto? Ndumuhaye mbona arandodeye mbona birakomeye.'

    Undi yungamo ati 'Naramubonye mbona biratangaje! Twari tuzi ko badoda imyenda, batashobora inkweto.'

    Nubwo Uwizeyimana akorera mu isoko iyo ryaremye, iyindi minsi akadodera hafi yaho atuye.

    Ibi byanatumye abana be abishyurira amashuri, dore ko harimo n'uwiga mu mashuri yisumbuye.

    Umuyobozi bw'Akarere ka Ngororero, Nkusi Christophe, avuga ko nk'ubuyobozi bashishikariza abagore gutinyuka imirimo isanzwe izwi nk'iy'abagabo.

    Kugeza ubu Uwizeyimana ku munsi w'isoko yinjiza amafaranga ari hagati ya 6.500 na 8000 Frw, ni mugihe ku minsi isanzwe yinjiza hagati ya 2000 na 4500Frw.

    Umuhoza Honore

    The post <strong>Ngororero:  Uwizeyimana wiyujurije inzu abikesha kudoda inkweto yatangiye kuba ikitegererezo cya benshi</strong> appeared first on FLASH RADIO&TV.

    Source : https://flash.rw/2023/02/24/ngororero-uwizeyimana-wiyujurije-inzu-abikesha-kudoda-inkweto-yatangiye-kuba-ikitegererezo-cya-benshi/?utm_source=rss&utm_medium=rss&utm_campaign=ngororero-uwizeyimana-wiyujurije-inzu-abikesha-kudoda-inkweto-yatangiye-kuba-ikitegererezo-cya-benshi

  • Nyuma y’amezi 7 Mico Justin uheruka muri Rayon Sports yabonye ikipe 3 #rwanda #RwOT

    Mico Justin uheruka gutandukana na Rayon Sports imusezereye, yamaze gusinyira Mukura VS amasezerano y’amezi 6.

    Uyu mukinnyi ukina asatira yari amaze amezi 7 nta kipe afite, ni nyuma y’uko muri Nyakanga 2022 Rayon Sports yakiniraga imubwiye ko atari muri gahunda y’abakinnyi bazakomezanya mu mwaka w’imikino wa 2022-23.

    Mico Justin akaba agiye gufatanya n’abandi barimo Umunya- Uganda, Robert Mukogotya, Rekeraho Jean Jacques na Nsabimana Emmanuel ‘Balotelli’ gushakira ibitego iyi kipe yo mu Karere ka Huye ibe yanava mu myanya mibi.

    Mico Justin yakiniye Police FC na Rayon Sports zo mu Rwanda ni mu gihe yanakinnye muri Kenya mu ikipe ya Sofapaka.

    Asanze Mukura VS ku mwanya wa 8 n’amanota 25, ni mu gihe APR FC ya mbere ifite 40.

    Mico Justin yasinyiye Mukura VS

    Source : http://isimbi.rw/siporo/article/nyuma-y-amezi-7-mico-justin-uheruka-muri-rayon-sports-yabonye-ikipe-3

  • Perezida Kagame yakiriye Slyvan Adams, Umuher… – #rwanda #RwOT

    Ku mugoroba wo kuri uyu wa Kane, nibwo ibiro by’umukuru w’igihugu byatangaje ko Perezida Kagame yakiriye Slyvan Adams n’itsinda ryari rimuherekeje.

    Slyvan Adams yari kumwe n’abo mu itsinda bazanye mu Rwanda, Minisitiri wa Siporo, Munyangaju Aurore Mimosa ndetse na Murenzi Abdallah uyobora Ishyirahamwe ry’umukino w’amagare mu Rwanda.

    Adams ni rwiyemezamirimo wihebeye umukino w’amagare, akaba nyir’ikipe ya Israel Premier Tech ibarizwamo Umwongereza Chriss Froome, iri no kubarizwa mu Rwanda muri iyi minsi, aho yitabiriye Tour du Rwanda 2023.

    Perezida Kagame aganira na Slyvan Adams

    Kuva mu myaka ine ishize, uyu mugabo yakunze kugaragaza ko afite inyota yo guteza imbere umukino w’amagare mu Rwanda haherewe ku kubaka ibikorwa remezo by’uyu mukino, bisanzwe bitaboneka henshi muri Africa.

    Ku ikubitiro, Israel Premier Tech yatanze inkunga yo kubaka ibibuga by’umukino w’amagare ‘Track Field’ mu Karere ka Bugesera, ndetse icya mbere cyamaze kuzura ndetse gitahwa ku mugaragaro mu cyumweru gishize.

    Indi mishinga ya Slyvan Adams n’ikipe ye mu mukino w’amagare mu Rwanda, irimo kubaka ishuri (Academy) ryigishirizwamo umukino w’amagare, Gahunda ya ‘Race For Change’ igamije guteza imbere abanyempano n’ibindi byinshi.

    Slyvan Adams n’itsinda rimuherekeje bakiriwe na Perezida Kagame mu biro

    Source : https://inyarwanda.com/inkuru/126382/perezida-kagame-yakiriye-slyvan-adams-umuherwe-wubatse-ikibuga-cyamagare-mu-bugesera-126382.html

  • Tour du Rwanda 2023: Kuki Mugisha Moise wari… – #rwanda #RwOT

    Abakinnyi b’ikipe y’igihugu y’u Rwanda ntabwo baragera ku ntego bihaye, ndetse no kubabona mu b’imbere biragoye. Mbere y’uko isiganwa agace ka gatanu ritangira, InyaRwanda yagiranye ikiganiro n’umutoza w’ikipe y’igihugu Sempoma Felix, aduha amakuru ari mu ikipe ndetse n’icyo abanyarwanda bakitega. 

    Sempoma yatangiye atubwira uko abakinnyi bamerewe ndetse n’abarwaye. Yagize ati “Abakinnyi bacu bariteguye, n’ubwo harimo imvune, ariko twizeye kwitwara neza. Manizabayo Eric yavunitse akaboko, ariko afite ibyibanze tubona ko ashobora kugerageza wenda tukagera mu duce twa nyuma yarakize. 

    Mugisha Moise niwe watwaye agace ka nyuma ka Tour du Rwanda ya 2022

    Abajijwe ku mpamvu Mugiha Moise atari kugaragara mu b'imbere, Sempoma yavuze ko igihe kigihari byose bishoboka. “Tujya gutangira Tour du Rwanda twari difite intego 2 iya mbere, yari ukwegukana Tour du Rwanda bwa mbere kuva yaza kuri 2.1, ibi byakanga tugashaka uduce twajya twegukana.

    Mugisha Moise umunsi wa mbere yakinnye neza, tugeze i Gisagara ntibyagenda neza atakaza amasegonda, umunsi wa gatatu abyuka atameze neza, asa nk’uwarwaye giripe, kandi ntibyari gukunda atameze neza. Ubu twavuga ko arimo kugaruka neza,  abantu bashatse bamwitega uyu munsi cyangwa kuri uyu wa gatanu.” 

    Mugisha Moise kuri ubu ari ku mwanya wa 47 ku rutonde rusange, aho arushwa n’umukinnyi wa mbere iminota 15 n’amasegonda 19.

    Source : https://inyarwanda.com/inkuru/126358/tour-du-rwanda-2023-kuki-mugisha-moise-wari-witezwe-bitarimo-gukunda-126358.html

  • Niyo ya mbere muri Afurika! Kigali Clipper Zo… – #rwanda #RwOT

    Kigali Clipper Zone Salon, 'Niyo ya mbere muri Afurika!' ikaba yaraje gutanga igisubizo ku banyarwanda nk'uko bitangazwa na Tuyishime Evaliste cyangwa se Rama The Barber, umuyobozi akaba ari nawe washinze iyi salon y'akataraboneka.

    Mu kiganiro na InyaRwanda, yavuze ko 'Impamvu iyi saloon ari mpuzamahanga ni uko dufite ibikoresho biri ku rwego rwo hejuru umunyamahanga usanzwe ubimenyereye yakenera' atanga urugero rw'imashini yasohotse uyu mwaka bafite akaba ari nabo bonyine bayifite mu Rwanda.

    Kigali Clipper Zone Salon ifite umwihariko w'ubudasa utasanga ahandi, ahanini bushingiye ku bikoresho kabuhariwe byifashishwa mu ma Saloon akomeye ku Isi. Yafunguye imiryango kera ndetse n'abayigannye barayirahira, ikaba kuri ubu noneho yaragutse.

    Tuyishime Evaliste uzwi nka Rama The Barber, yadusobanuriye byinshi birimo n'aho kwagura iyi Saloon byavuye.

    Tuyishimire yavuze ko impamvu batekereje kwagura Saloon ari uko bari bamaze kugira umubare mwinshi w'abakiriya, bituma rero bahitamo kwagura iyi Saloon. Ramadhan akomeza avuga ko na mbere iyi Saloon yari nini ariko kubwo kureberera ibyiza abakiriya babagana, bahisemo kwagura ngo ibe nini bisanzure.

    Muri Kigali Clipper Zone Salon niho honyine mu Rwanda ushobora gusanga internet (Wifi) yihuta, mu gihe bari kugukorera mu mutwe cyangwa n'ibindi bijyanye n'isuku uganiriza inshuti n'abavandimwe.

    Muri iyi Saloon uba wumva umuziki ndetse unafata ku mafu aturuka mu biti byo mu mujyi, cyane ko iherereye mu mujyi rwagati mu nyubako ya La Bonne Adresse.

    Kigali Clipper Zone Salon niho honyine bogosha ibyamamare mu Rwanda ndetse iyo ugiyeyo ntushobora kubura urujya n'uruza rw'abakinnyi b'umupira n'aba firime, abahanzi n'abandi bari mu ruganda rw'imyidagaduro n'abatarurimo.

    Iyi ni Saloon ifite ubushobozi bwo kogosha umubare munini w'abantu ku munsi kandi bose bagataha banyuzwe, bitewe n'uko bogoshwe n'abogoshi b'abahanga ndetse banafite uburambe byibura bw'imyaka itanu n'icumi kuzamura.

    Umukobwa wogosha agaragaza ubuhanga bwe

    Muri Kigali Clipper Zone Salon niho honyine harimo umukobwa umwe mu bahanga u Rwanda rufite mu Bogoshi, ndetse ibyamamare bitandukanye mu kogosha bikaba ariho byagiye binyura nk'izingiro.

    Usibye uyu mukobwa wogosha, harimo Lando umwe mu bogoshi bakomeye ndetse akaba ari n'umuhanzi, hari kandi n'abandi biganjemo abazwi bari muri iyi Saloon itagira uko isa.

    Mu kiganiro yakomeje agirana na inyaRwanda, Tuyishime (Rama The Barber) yahamije anashimangira ko iyi ariyo Salon ya mbere muri Afurika, ndetse kubera ko ibyihariye nk'ubudasa kuri iyi saloon biyishyira ku rwego mpuzamahanga ari byinshi, yagerageje kubihina agaruka ku by’ingenzi. Ibindi yavuze, bikubiye mu kiganiro yahaye inyaRwanda Tv.

    Rama The Barber, umuhanga mu kogosha ni nawe washinze iyi Saloon

    Kigali Clipper Zone salon ntiyasigaje inyuma gusigasira ubwiza bw'abari n'abategarugori. Inkumi twasanze bayitunganyiriza umusatsi yatubwiye igituma amahitamo yayo yabaye 'Kigali Clipper Zone Salon'. 

    Ntiyashatse kwivuga amazina, gusa yagize ati 'Impamvu nahisemo kuza muri iyi soloon hari ibintu barusha abandi nk'isuku, ibikoresho bifite karite, abakozi babizi n'uburyo bakiramo abantu'.

    Uyu mukobwa wari ufite aho agiye gusohokera yakomeje avuga ko kuva iyi soloon yafungura imiryango nta handi arajya, kuko bafite ubudasa avuga ko umukobwa wifuza kugaragara neza no gusa neza yafata umwanzuro nk’uwe agahitamo kuyigana.

    Bakwitaho mu buryo bwose

    Muri serivise baha igistina gore harimo SPA, Fesho, Gusuka Dread, gutunganya umusatsi mu buryo butandukanye, n'ibindi kandi byose bikozwe n'abahanga n'ibindi.

    Ukeneye ibindi bisobanuro Kigali Clipper Zone Salon iherereye mu mugi rwagati mu nyubako ya Labonne Adresse muri Etage ya kabiri. Ushobora no kubahamagara kuri terefone igendanwa 0788295833, cyangwa ukabasura ku mbuga nkoranyambaga zabo kigali_clipperzone_salon.

    Ni Saloon y’ikitegererezo

    Kugana muri Kigali Clipper Zone uba washishoje

    Uyu yamaze kunyurwa

    Isuku ni nta makemwa

    Umucongo nawo uba ‘uvuza ubuhuha’

    Abahakorera bafata umwanya wo kuganiriza abakiriya

    Lando The Barber wogoshera muri iyi Saloon ni n'umuhanzi

    Amafaranga yawe uyishyura mu buryo ushatse bwose

    Bimwe mu bikoresho byifashishwa

    Imashini utasanga ahabonetse hose


    Umukobwa Wogosha niko yitwa

    Abategereje baba bari kuri WIFI

    KANDA HANO UREBE IKIGANIRO CYOSE TWAGIRANYE N’UMUYOBOZI WA KIGALI CLIPPER ZONE

    “>

    Source : https://inyarwanda.com/inkuru/126333/niyo-ya-mbere-muri-afurika-kigali-clipper-zone-salon-yatanze-igisubizo-ku-banyarwanda-amaf-126333.html